Великий понедельник

Песни св. Романа Сладкопевца на Страстную седмицу в русском переводе / Пер. с древнегреч. П. Цветкова. М., 1900.

Понедельник Великой седмицы

Во Святый и Великий Понедельник на Утрени,

по шестопсалмии поем Аллилуиа, на глас 8, велегласно, и со сладкопением, и поем тропарь косно и велегласно, и со сладкопением равно. Глас 8:

Се Жених грядет в полунощи, и блажен раб, егоже обрящет бдяща: недостоин же паки, егоже обрящет унывающа. блюди убо душе моя, не сном отяготися, да не смерти предана будеши, и Царствия вне затворишися, но воспряни зовущи: Свят, Свят, Свят еси Боже, Богородицею помилуй нас. [Трижды.]

Таже обычное стихословие с поклоны.

По 1-м стихословии седален, глас 1.
Подобен: Гроб Твой:

Страдания честная настоящий день, якоже светила совершенная, возсиявают миру: Христос бо грядет страдати благостию, вся содержай дланию, изволяет простретися на Древе, еже спасти человека.

Слава, И ныне, тойже.

По 2-м стихословии седален, глас 1. Подобен:

Невидимый Судие, в плоти како виден был еси, и идеши от мужей беззаконных убиен быти, наше осуждение осуждаяй страстию Твоею? Темже хвалу, величие и славу возсылающе власти Твоей Слове, согласно приносим.

Слава, И ныне, тойже.

По 3-м стихословии седален, глас 8.
Подобен: Премудрости:

Страстей Господних начатки, настоящий день светлоносит. Приидите убо празднолюбцы, усрящим песньми: Создатель бо грядет Крест прияти, испытания и раны, Пилатом судимь. Темже и от раба ударен быв по главе, вся терпит, да спасет человека. Сего ради возопиим Ему: Человеколюбче Христе Боже, прегрешений даруй оставление, покланяющимся верою пречистым страстем Твоим.

Слава, И ныне, тойже.

И абие посем чтение в толковании Евангелиа еже от Матфеа. И Слово Иоанна Златоустаго о изсохшей смоковнице, емуже начало: Якоже убо видя: И слово Дамаскиново о изсохшей смоковнице, и о притчи винограда. Таже, И о сподобитися нам: Евангелие от Матфеа, зачало 84, без преступки: Во время оно, возвращься Иисус во град, взалка: Конец, в зачале 88-м: И дастся языку творящему плоды его.

Посем псалом 50. Таже, Спаси Боже люди Твоя: Господи помилуй, 12.

Трипеснец, творение господина Космы, егоже краестрочие: {Ти девтера}, си есть: во вторый день, еже есть понедельник. Ирмос по дважды, тропари на 12. Припев: Слава Тебе Боже наш, слава Тебе. [Сей во всю седмицу]. Последи ирмос, оба лика вкупе. Глас 2.

Песнь 1.

{Т} Ирмос: Непроходимое волнящееся море, Божиим Своим велением изсушившему, и пешешествовати сквозе е Израильтеския люди наставльшему, Господеви поим, славно бо прославися.

{H} Неизреченное Слова Божия схождение, еже Христос Тойжде есть Бог и Человек, еже Бог невосхищением быти непщевав, внегда воображатися рабом, показует учеником, славно бо прославися.

{D} Послужити Сам приидох, Егоже зраком Создатель волею обложен есмь, обнищавшему Адаму, богатствуяй Божеством, положити хотяй Мою душу избавление зань, иже безстрастный Божеством.

Кондак, глас 8.
Подобен: Яко начатки.

Иаков рыдаше Иосифова лишения, и доблий седяше на колеснице, яко царь почитаемь: египтяныни бо тогда сластем не поработав, воспрославляшеся от Ведущаго человеческая сердца, и Посылающаго венец нетленный.

Икос: На рыдание ныне приложим рыдание, и излием слезы со Иаковом, плачущеся Иосифа приснопамятнаго и целомудреннаго, порабощеннаго убо телом, душу же непорабощену соблюдшаго, и Египтом всем царствовавшаго: Бог бо подает рабом Своим венец нетленный.

Синаксарий. Стихи на Иосифа Прекраснаго:

Целомудренный Иосиф, праведный держитель явися:
И пшеницодавец, о добрых стоже!

Стихи на изсохшую смоковницу:

Соборище смоковницу Христос еврейское,
Плодов чуждую духовных вообразуяй,
Клятвою усушает: еяже бежим страсти.

Во Святый и Великий Понедельник память творим блаженнаго Иосифа Прекраснаго, и изсохшия смоковницы: занеже начало отсюду приемлют святыя страсти Господа нашего Иисуса Христа: Иосиф же во образ Сего первее приемлется. Сей убо сын последний бяше патриарха Иакова, от Рахили ему рожденный, от своих же братий позавиден быв неких ради во сне видений. Прежде убо во ископание рова скрывается: и отец его от детей прелестию окровавленною ризою украдается, яко от зверя изъяден бысть. Таже на тридесятих сребреницех продан бывает исмаилитом, иже паки продают его Пентефрию, начальнику скопцей царя Египетскаго фараона. Неистовствовавшей же госпоже его на целомудрие юноши, понеже беззакония содеяти не восхоте, ризу оставль отбеже: она же господину его оболгает его, и узы и темница горькая сего приемлет. Таже разрешением снов изводится, и царю является, и господин всея земли Египетския поставляется. Паки же пшеницодательством братиям явлен бывает, и всяческое своего живота добре препроводив, во Египте умирает, великий о целомудрии при инех его добрых познаваемый. Образ же сей Христов: зане и Христос от единоплеменных иудей завиствуемь бывает, и от ученика на тридесяти сребреницех продается, и во мрачный и темный ров, гроб, заключается, и оттуду самовластно восторгнувся, царствует над Египтом: яве на всякий грех, и до конца сего побеждает, миром же всем обладает, и человеколюбно искупует нас таинственным пшеницодательством, яко Сам Себе за нас давый, и яко питает нас небесным хлебом, Своею живоносною плотию. По сему убо словеси, Прекрасный Иосиф ныне приемлется. Зде же и о изсохшей смоковнице память творим: занеже божественнии евангелисти, сиесть, Матфей и Марко, по повести о ваиах приносят: во утрие же изшедшим им от Вифании, взалка. Другий же утру же возвращься во град глаголет, взалка, и видев смоковницу, листвие токмо имущую, не бе бо время смоквам, прииде к ней, и елма, плода не обрете на ней, рече: да не ктому плод от тебе будет в век: и изсше абие смоковница. Смоковница убо есть, сонмище иудейское, на немже плода подобнаго Спас не обрет, точию осеняющее закона, и сие отъят от них, праздное всячески содеяв. Аще ли же кто речет: почто бездушное древо сухо бысть, клятву вземшее не согрешившее? Да навыкнет, яко иудее видяще Христа присно всех благодетельствующа, никомуже ключимое скорбно соделавша, непщеваху, яко силу имать точию благодетельствовати, злотворити же ни. Человеколюбив же Владыка сый, не восхоте на человеце сие показати, и сему быти: да убо уверит неблагодарныя люди, яко имать силу и к муце довольную: яко благ же не хощет, на бездушном и нечувственном естестве мучение соделовает. Вкупе же некое и неизглаголанное слово есть, от старец премудрых к нам пришедшее. Якоже глаголет Исидор Пилусиот: яко древо преступления сие бысть, егоже и листвие в покров преступльшии употребиша. Темже и проклятся от Христа человеколюбно, понеже тогда сие не пострада, ктому плода не принести виновна греху. А якоже грех смокви уподобляется, благоявленно: имать бо услаждающее сласти, прилепляемое греха, и ожесточавающее последи и полютевающее совестию. Обаче от отец смоковничная повесть зде умиления ради положися, якоже Иосифа ради, за еже носити образ Христов. Есть же смоковница всяка душа, всякаго духовнаго плода непричастна: в нейже утру, по настоящей яве жизни, не обретая Господь покоя у нея, усушает ю клятвою, и в вечный посылает огнь, и столп некий стоит усушенный, устрашаяй не делающих прикладнаго добродетелей плода. Прекраснаго Иосифа молитвами Христе Боже помилуй нас.

Песнь 8.

{Е} Ирмос: Устрашися отроков благочестивых, сообразнаго души несквернаго тела, и устранися воспитанный в безмерном веществе, неутружден огнь: присноживущу же изувядшу пламеню, вечнующая песнь воспевашеся: Господа вся дела пойте, и превозносите во вся веки.

{U} Вас тогда Моих учеников познают вси, аще Моя заповеди соблюдете, глаголет Спас другом, ко страсти идый: мир имейте в себе, и во всех, и смиренная мудрствующе возвыситеся: и Господа знающе Мя пойте, и превозносите во вся веки.

{Т} Чина сопротивна вам языческа, да есть держава купнородных: не жребий бо Мой, мучительство же разум самоизбранный. Иже убо предызящный в вас быти хотяй других, да есть всех последнейший: и Господа знающе Мя пойте, и превозносите во вся веки.

Хвалим, благословим:

И паки ирмос. Честнейшую не поем.

Песнь 9.

{Е} Ирмос: Возвеличил еси Христе рождшую Тя Богородицу, от Неяже Создателю наш, в подобострастное нам облеклся еси тело, наших прегрешений решительное: Сию ублажающе вси роди, Тебе величаем.

{Р} Скверну всю страстную отринувше, достойный Божественнаго Царствия разум восприимем благомудрственный, Твоим апостолом предрекл еси, всех Премудросте: в немже прославитеся, светящеся солнца светозарнее.

{А} Взирающе на Мя, рекл еси Господи Твоим учеником, не мудрствуйте высокая, но соотведитеся смиренными: Мою, юже пию, пийте чашу, яко да во Царствии Отца со Мною прославитеся.

Таже ирмос: Возвеличил еси Христе: И поклон до земли.

Ексапостиларий глаголем трижды, косно и со сладкопением. Сей же глаголется до Великаго Четвертка, поется же посреде церкве от певца, и противу глашается от нас:

Чертог Твой вижду Спасе мой, украшенный, и одежды не имам, да вниду вонь: просвети одеяние души моея Светодавче, и спаси мя.

На хвалитех стихиры самогласны на 4, глас 1:

Грядый Господь к вольной страсти, апостолом глаголаше на пути: се восходим во Иерусалим, и предастся Сын Человеческий, якоже есть писано о Нем. Приидите убо и мы, очищенными смыслы, сшествуим Ему, и сраспнемся, и умертвимся Его ради житейским сластем, да и оживем с Ним, и услышим вопиюща Его: не ктому в земный Иерусалим, за еже страдати, но восхожду ко Отцу Моему, и Отцу вашему, и Богу Моему, и Богу вашему, и совозвышу вас в горний Иерусалим, в Царство Небесное. [Дважды.]

Глас 5: Достигше вернии спасительную страсть Христа Бога, неизреченное Его долготерпение прославим: яко да благоутробием Своим совоздвигнет и нас умерщвленных грехом, яко Благ и Человеколюбец. [Дважды.]

Слава, И ныне, глас тойже:

Господи, грядый к страданию, Твоя утверждая ученики, глаголал еси особь прием их: како глагол Моих не помните, яже прежде рекох вам? Яко всякому пророку несть писано, токмо во Иерусалиме убиену быти. Ныне убо время настоит, еже рекох вам: се бо предаюся рукама грешных поруган быти, иже и Кресту Мя пригвоздивше, и погребению предавше, омерзена вменят яко мертва. Обаче дерзайте: тридневен бо востану в радость верных, и жизнь вечную.

На стиховне самогласен. Глас 5:

Господи, к таинству неизглаголанному Твоего смотрения, не довлеющи сынов Зеведеовых мати, прошаше Тя, временнаго царства почести дароватися чадом ея: но вместо тоя, чашу смерти обещал еси пити другом Твоим, юже чашу прежде сих пити Сам глаголал еси, грехов очищение. Темже Тебе вопием: спасение душ наших, слава Тебе.

Стих: Исполнихомся заутра милости Твоея Господи:

Господи, совершеннейшая мудрствовати, Твоя наказуя ученики, не уподобитися языком глаголал еси, во еже обладати меньшими: не тако бо будет вам Моим учеником, яко нищий хотя есмь. Первый убо вас, да будет всем слуга: начальствуяй же яко начальствуемый, предызящный же яко последнейший. Ибо приидох Сам обнищавшему Адаму послужити, и избавление дати за многих душу Мою, вопиющих Ми: слава Тебе.

Стих: И буди светлость Господа Бога нашего на нас:

Глас 8: Изсохшия смоковницы за неплодие, прещения убоявшеся братие, плоды достойны покаяния принесем Христу, подающему нам велию милость.

Слава, И ныне, глас тойже:

Вторую Еву египтяныню обрет змий глаголы, тщашеся ласканьми запяти Иосифа, но той оставив ризу, бежа греха: и наг не стыдяшеся, якоже первозданный прежде преслушания. Того молитвами Христе помилуй нас.

Таже: Благо есть: И прочая по обычаю с поклоны. Таже отпуст: Грядый Господь на вольную страсть, нашего ради спасения, Христос истинный: Сей же отпуст глаголется во вторник и в среду.

Ведомо же буди, яко на 1-м часе и 9-м Псалтирь не глаголем в Великую седмицу: но точию глаголются трипсалмны, но обычаю. Третий же час и шестый поем со Псалтирем. Чтется же и Четвероевангелие, в Понедельник, во Вторник и в Среду совершается. При часе 3-м дне ударяет параекклисиарх в било, яко же есть обычай. И собравшеся в церковь, поем 3-й час, с кафисмою: и творяще обычныя поклоны. Таже тропарь: Господи, Иже Пресвятаго Твоего Духа: и Богородице Ты еси лоза: поклоны 3. И абие украшену аналогию, положат на нем верху святое Четвероевангелие, и двема лампадома возжженнома. Всем же стоящим откровенными главами. Священник же кадит храм весь, и братию. А на 6-м часе кадит токмо Евангелие. На 9-м же часе Евангелие кадит, и храм весь, и братию: И тако чтет Евангелие. По скончании же чтения Евангелиа глаголем: Господь Бог благословен: И прочее последование. Глаголется и кондак дне: Иаков рыдаше: И обычныя поклоны. И абие начинаем шестый час. Приидите поклонимся: трижды, и псалмы обычныя: Кафисму рядовую. Таже тропарь: Иже в шестый день же и час: и Богородичен: Яко не имамы дерзновения: и поклоны 3.

Таже тропарь пророчества, глас 6:

Душею сокрушенною припадаем Тебе, и молим Тя Спасе мира: Ты бо еси Бог кающихся.

Слава, И ныне, тойже:

Прокимен, псалом 125, глас 4: Внегда возвратити Господу плен Сионь.
Стих: Тогда исполнишася радости уста наша.

Пророчества Иезекиилева чтение. [Глава 1, ст. 1 - 20]

Прокимен, псалом 126, глас 4: Аще не Господь созиждет дом, всуе трудишася зиждущии.
Стих: Аще не Господь сохранит град всуе бде стрегий.

И чтется Евангелие по предписанному чину. По чтении же, Скоро да предварят ны щедроты Твоя Господи: Трисвятое, с поклоны. По Отче наш: Кондак дне. Господи помилуй, 40. И прочее по обычаю, и отпуст.

Ведомо же буди: яко Евангелие от Матфеа все чтется, подобне и от Марка, и от Луки: от Иоанна же чтется до начала святых страстей, яве яко до Ныне прославися Сын Человеческий: Чтется же тако в трех днех, сиречь, в Понедельник, во Вторник, в Среду: И совершается в Среду на 9-м часе. Бывают же от Луки чтения три. Прочая же по два. Вкупе всех чтений девять, и вящше ничтоже. Девятый же час трех дней стихословия не имать, якоже речеся. Но по трипсалмии поется от учиненнаго монаха: Иже в девятый час: Слава, И ныне: Иже нас ради рождейся от Девы: И бывает чтение в Четвероевангелии: По немже глаголем: Не предаждь нас до конца: Трисвятое с поклоны. По Отче наш: Кондак дне. Во Царствии Твоем: И прочее последование, яко обычно. Глаголем же и кондак дне. Присовокупляем же и Вечерню.

Во Святый и Великий Понедельник вечера,

по предначинательном псалме обычное стихословие: Ко Господу внегда скорбети ми, воззвах: На Господи воззвах, поставим стихов 10, и поем стихиры самогласны дне 4 по дважды, а два по единожды, глас 1:

Грядый Господь к вольней страсти, апостолом глаголаше на пути: се восходим во Иерусалим, и предастся Сын Человеческий, якоже есть писано о Нем. Приидите убо и мы, очищенными смыслы, сшествуим Ему, и сраспнемся, и умертвимся Его ради житейским сластем, да и оживем с Ним, и услышим вопиюща Его: не ктому в земный Иеросолим за еже страдати: но восхожду ко Отцу Моему и Отцу вашему, и Богу Моему и Богу вашему, и совозвышу вас в горний Иеросолим, в Царство Небесное. [Дважды.]

Господи грядый к страданию, Твоя утверждая ученики, глаголал еси особь прием их: како глагол Моих не помните, яже прежде рекох вам? Яко всякому пророку несть писано, токмо во Иеросолиме убиену быти. Ныне убо время настоит, еже рекох вам: се бо предаюся рукама грешных поруган быти, иже и Кресту Мя пригвоздивше, и погребению предавше, омерзена вменят яко мертва. Обаче дерзайте, тридневен бо востану, в радость верных, и жизнь вечную. [Дважды.]

Господи, к таинству неизглаголанному Твоего смотрения, не довлеющи сынов Зеведеовых мати, прошаше Тя, временнаго царства почести дароватися чадом ея: но вместо тоя, чашу смерти обещал еси пити другом Твоим: юже чашу прежде сих пити Сам глаголал еси, грехов очищение. Темже Тебе вопием: спасение душ наших, слава Тебе. [Дважды.]

Господи, совершеннейшая мудрствовати, Твоя наказуя ученики, не уподобитися языком глаголал еси, во еже обладати меньшими: не тако бо будет вам Моим учеником, яко нищий хотя есмь. Первый убо вас, да будет всем слуга: начальствуяй же, яко начальствуемый: предызящный же, яко последнейший. Ибо приидох Сам обнищавшему Адаму послужити, и избавление дати за многих душу Мою, вопиющих Ми: слава Тебе.

Слава, И ныне, глас тойже:

Вторую Еву египтяныню обрет змий глаголы, тщашеся ласканьми запяти Иосифа: но той оставив ризу, бежа греха, и наг не стыдяшеся, якоже первозданный прежде преслушания. Того молитвами Христе помилуй нас.

Таже вход со Евангелием. Свете тихий:

Прокимен, псалом 127. Глас 6: Благословит тя Господь от Сиона, и узриши благая Иерусалима.
Стих: Блажени вси боящиися Господа, ходящии в путех Его.

Исхода чтение. [Глава 1, ст. 1 - 20.]

Прокимен, псалом 128, глас 6: Благословихом вы во имя Господне.

Стих: Множицею брашася со мною от юности моея.

Иова чтение. [Глава 1, ст. 1 - 12.]

Таже, Да исправится молитва моя:

И посем Евангелие от Матфеа, зачало 98. [Мф. 24, 3 - 35.]

И прочее последование Преждеосвященных, по обычаю. Тако долженствует быти и в Великий Вторник, и в Великую Среду.

Аще же несть Преждеосвященныя: Поем на Господи воззвах, половину от стихир, на 6. Стихира, глас 1: Грядый Господь к вольной страсти: дважды. Достигше вернии: дважды. Господи, к таинству неизглаголанному: дважды. Слава, И ныне: Господи грядый к страданию: По сих вход с Евангелием: и Свете тихий: Таже прокимен, и паремии, и Евангелие. Таже, Сподоби Господи: И ектениа: Исполним вечернюю:

На стиховне, от техже стихир, стихира, глас 5: Господи совершеннейшая мудрствовати:
Стих: К Тебе возведох очи мои: И паки туюжде стихиру.
Стих: Помилуй нас Господи: Глас 8: Изсохшая смоковницы: Слава, И ныне, глас тойже: Вторую Еву:

Таже, Ныне отпущаеши: И прочая обычная с поклоны. И по конечном Трисвятом, и по Отче наш: Господи помилуй, 12. Таже, молитва, Всесвятая Троице: и Буди имя Господне: И отпуст.

Сице убо творим во Вторник и в Среду.

На трапезе же ядим сухоядение, и сим удовляемся. И якоже в первую неделю святаго сего Поста: сице и в сия дни, в Великий Понедельник, во Вторник и в Среду поститися подобает.

Ведати бо подобает, яко и Шестый великий Собор повеле, спасительныя страсти дни в посте, и молитве, и умилении сердца сотворяти верным: в полунощи же Великия Субботы, оставляти пост, Божественным евангелистом Матфею и Луце: овому убо позде в субботу глаголанием, овому же утром глубоким, медлемое нам нощи написующим.

Во Святый и Великий Понедельник вечера,

Повечерие глаголем великое, на Повечерии трипеснец господина Андреа Критскаго. Глас 8.

Песнь 2.

Ирмос: Вонми небо и возглаголю, и воспою Христа, от Девы рождшагося во спасение наше.

Пойдем со Христом к горе Елеонстей, тайно со апостолы соводворимся Ему.

Разумей смиренное мое сердце, что есть жерновная притча? О нейже прежде рече Христос, и истрезвися прочее.

Готови сама себе о душе моя, ко исходу: пришествие приближается неумолимаго Судии.

Богородичен: Пречистая Богородице Дево, едина всепетая, Сына Твоего моли о рабех Твоих.

Ин, глас тойже.

Ирмос: Видите, видите, яко Аз есмь Бог, древле Израиля сквозе Чермное море проведый, и питавый, и спасый, и от горькия работы свободивый фараоновы.

Видите, видите, яко Аз есмь Бог, Иже прежде бытия всех, и прежде сотворения земли и неба, вем вся: и весь сый во Отце, и всего ношу в Себе.

Словом составих небо вкупе и землю: со Отцем бо бех, и словом ношу вся, яко Слово, мудрость, и сила, и образ, и содействителен, и равнодетелен.

Кто времена положи? Кто веки соблюдаяй? Кто вся определяяй и совоздвизаяй? Разве Безначальный присно сый со Отцем, якоже заря во свете.

О безмернаго Твоего человеколюбия Иисусе! Сказал бо еси нам скончания свыше время, скрыв час, уяснив же светло образы его.

Вся веси, вся знаеши Иисусе яко имеяй все в Себе Отеческое достояние Божественне, и всего Духа всаждена носяй в себе, соприсносущнаго Отцу.

Владыко Господи, веков творче, сподоби и нас священный оный тогда глас услышати, зовущий избранныя Отца в Царство Небесное.

Слава: Безначальная, несозданная Троице, нераздельная Единице, трое сущая и едино, Отче, Сыне и Душе, единый Боже, приими пение от бренных язык, якоже от уст пламенных.

Богородичен: Селение святое явилася еси Дево Божие: в Тя бо Небесный Царь вселився плотию, пройде красный, человека в Себе вообразив Божественне.

Седален, глас 2.
Подобен: Милосердия сущи:

Милосердием движимь Христе, волею предыдеши страдати благодетелю, хотяй страстей нас избавити, и еже во аде осуждения. Темже честная Твоя воспеваем страдания, и славим Спасе, крайнее твое вси схождение.

Песнь 8.

Ирмос: Ангели и небеса, на престоле славы седящаго и яко Бога непрестанно славимаго, благословите, пойте и превозносите его во веки.

Всяко слышала еси душе, како Христос Божественным учеником Своим провозглашаше, глаголя скончание: разумевши же Твой конец, уготовися прочее: время исхода прииде.

Познала еси неплодная душе, лукаваго раба притчу, бойся и не небрези о даровании, егоже прияла еси, да не сокрыеши в землю, но да куплю дееши.

Да уяснится свеща, да преизлиется сея и елей, якоже девам тогда сострадание, да обрящеши душе моя чертог Христов тогда отверстый.

В субботу бегство и в зиме глаголя Учитель, седмаго бурю предгадательствует настоящаго века, в немже найдет яко зима кончина.

Яко скорость молнии преходящая, тако тогда будет страшное оное Владыки твоего пришествие, душе моя: слышала еси, готова прочее быти потщися.

Егда приидет Судия с тысящами, и тьмами ангельских чинов и сил, тогда кий страх душе моя, кий трепет, увы мне! Нагим стоящим всем.

Благословим Отца, и Сына, и Святаго Духа, Господа.

Един Бог убо Троица, ни Отцу изступившу в сыновство, ниже Сыну пременившуся во исхождение, но свойственная, и обое Свет, Бога, Три славлю во веки.

И ныне, Богородичен: Молитвами Боже, Богородицы, приими молитву нашу, возниспосли же милости Твоя на вся богатно, и мир Твой подаждь людем Твоим.

Хвалим, благословим, покланяемся Господеви, поюще и превозносяще во вся веки.

Таже ирмос: Ангели и небеса на престоле:

Песнь 9.

Ирмос: Проявленное на горе законоположнику во огни и купине, Рождество Приснодевы, в наше верных спасение, песньми немолчными величаем.

Слышала еси душе моя, Судии предвозглашающу, и учащу тя времене кончины: готови яже на исход дела, да не яко неискусна, Бога овержена будеши.

От смоковницы о душе моя, научися кончины! Егда младо будет листвие, и прозябнет ветвие, жатвы час прочее, и ты егда сия увидиши, разумей, яко при дверех есть.

Кто разве Тебе иный Твоего знает Отца? Или кто кроме Тебе весть час, или день? У Тебе бо сокровища премудрости вся внутрь суть, Христе Боже.

Книги убо разгнутся тогда, престолом поставленным, деяния же обличатся, нагим стоящим всем: ни свидетелем, ни клеветником присутствующим: обнажена бо вся Богу.

Грядет всех Судия, изведен быти на суд, на престоле херувимсте седяй, яко повинный предстати Пилату, и вся пострадати, да спасется Адам.

Приближися Пасха нам великая и Божественная: по двою бо днию преднаучает Христос, страдания прописуя день, воньже Отцу жертва приведется.

При Кресте Твоем Спасе предстоящи Мати, и Твое неправедное зрящи заколение, вопияше: увы Мне Чадо Мое! Увы Мне незаходимый свете! Просияй всем Солнце славы свет.

Слава: О единице Святая, Троице едино Божество, и Троица Единице Боже, триипостасное Естество, единочестная, и нераздельная славо, избави от бед души наша!

И ныне, Богородичен: Приими Матерь Твою Христе в молитву, да молитвами Ея умириши мир, и утвердиши царствия скиптры, и Церкви Твоя совокупиши во едино.

Ирмос 9-я песни: Проявленное на горе: за Достойно: И поклон до земли.

Трисвятое. И по Отче наш: Кондак дне. Таже, Господи сил с нами буди: И прочее обычное. И отпуст.