Тропари и кондаки на праздники

Ср. богослужение

8 cентября, Рождество Богородицы. - 14 cентября, Воздвижение креста.

Введение во Храм (21 ноября).

            Тропарь, глас 4: Днесь благоволения Божия предъображение и человеков спасения проповедание, в храме Божии ясно Дева является и Христа всем предвозвещает. Той и мы велегласно возопиим: радуйся, смотрения Зиждителева исполнение.

            Кондак, глас 4: Пречистый храм Спасов, многоценный чертог и Дева, священное сокровище славы Божия, днесь вводится в дом Господень, благодать совводящи, яже в Дусе Божественном, Юже воспевают Ангели Божии: Сия есть селение небесное.

Рождество Христово (25 декабря).

            Тропарь, глас 4: Рождество Твое, Христе Боже наш, воссия мирови свет разума, в нем бо звездам служащии звездою учахуся Тебе кланятися Солнцу правды и Тебе ведети с высоты Востока, Господи, слава Тебе.

            Кондак, глас 3: Дева днесь Пресущественнаго рождает, и земля вертеп Неприступному приносит; Ангели с пастырьми славословят, волсви же со звездою путешествуют: нас бо ради родися Отроча младо, Превечный Бог.

Крещение Господне (6 января).

            Тропарь, глас 1: Во Иордане крещающуся Тебе, Господи, Троическое явися поклонение: Родителев бо глас свидетельствоваше Тебе, возлюбленнаго Тя Сына именуя: и Дух в виде голубине извествоваше словесе утверждение: явлейся, Христе Боже, и мир просвещей, слава Тебе.

Кондак, глас 4: Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси, Свет Неприступный.

Сретение Господне (2 февраля).

            Тропарь, глас 1: Радуйся, Благодатная Богородице Дево, из Тебе бо воссия Солнце правды, Христос Бог наш, просвещаяй сущия во тьме: веселися и ты, старче праведный, приемый во объятия Свободителя душ наших, дарующаго нам воскресение.

            Кондак, глас 4: Утробу Девичу освятивый рождеством Твоим, и руце Симеоне благословивый, якоже подобаше, предварив, и ныне спасл еси нас, Христе Боже; но умири во бранех жительство, и укрепи православныя христианы, ихже возлюбил еси, Едине Человеколюбче.

Благовещение (25 марта).

            Тропарь, глас 4: Днесь спасения нашего главизна, и еже от века таинства явление, Сын Божий Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.

            Кондак, глас 8: Взбранной Воеводе победительная, яко избавльшеся от злых, благодарственная восписуем Ти раби Твои, Богородице: но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Преображение (6 августа).

            Тропарь, глас 7: Преобразился еси на горе, Христе Боже, показавый учеником Твоим славу Твою, якоже можаху; да воссияет и нам грешным свет Твой присносущный, молитвами Богородицы, Светодавче, слава Тебе.

            Кондак, глас 7: На горе преобразился еси, и якоже вмещаху ученицы Твои славу Твою, Христе Боже, видеша: да егда Тя узрят распинаема, страдание убо уразумеют вольное, мирови же проповедят: яко Ты еси воистину Отчее сияние.

Успение (15 августа).

            Тропарь, глас 1: В рождестве девство сохранила еси, во успении мира не оставила еси, Богородице, преставилася еси к Животу, Мати сущи Живота, и молитвами Твоими избавляеши от смерти души наша.

            Кондак, глас 2: В молитвах неусыпающую Богородицу, и в предстательствах непреложное упование, гроб и умерщвление не удержаста: якоже бо Живота Матерь, к Животу престави во утробу вселивыйся приснодевственную.

Тропари и Кондаки

из Триоди Постныя

В Неделю Мытаря и Фарисея

            Кондак, глас 4: Фарисеева убежим высокоглаголания, и мытареве научимся высоте глагол смиренных, покаянием взывающе: Спасе мира, очисти рабы Твоя.

В Неделю Блуднаго сына

            Кондак, глас 3: Отеческия славы Твоея удалихся безумно, в злых расточив, еже ми предал еси богатство. Темже Ти блуднаго глас приношу: согреших пред Тобою, Отче щедрый, приими мя кающася, и сотвори мя яко единаго от наемник Твоих.

В Неделю Мясопустную

            Кондак, глас 6: Егда приидеши, Боже, на землю со славою, и трепещут всяческая: река же огненная пред судищем влечет, книги разгибаются; и тайная являются: тогда избави мя от огня неугасимаго и сподоби мя одесную Тебе стати, Судие Праведнейший.

В Неделю Сыропустную

            Кондак, глас 6: Премудрости Наставниче, смысла Подателю, немудрых наказателю, и нищих Защитителю, утверди, вразуми сердце мое, Владыко: Ты даждь ми слово, Отчее Слово, се бо устне мои не возбраню, во еже звати Тебе: Милостиве, помилуй мя падщаго.

В 1-ую Неделю Св. Четыредесятницы

            Тропарь, глас 2: Пречистому образу Твоему поклоняемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

            Кондак, глас 2: Неописанное Слово Отчее, из Тебе, Богородице, описася воплощаемь: и осквернившийся образ в древнее вообразив, Божественною добротою смеси: но исповедающе спасение, делом и словом, сие воображаем.

Во 2-ую Неделю Св. Четыредесятницы

            Тропарь, глас 8: Православия светильниче, Церкве утверждение и учителю, монахов доброто, богословов поборниче непреборимый, Григорие чудотворче, Фессалонитское похвало, проповедниче благодати, молися выну спастися душам нашим.

            Кондак, глас 8: Премудрости священный и божественный орган, богословия светлую согласно трубу, воспеваем тя Григорие богоглагольниче: но яко ум уму первому предстоя, к Нему ум наш, отче, настави, да зовем: радуйся, проповедниче благодати.

В 3-ию Неделю Св. Четыредесятницы

            Тропарь, глас 1: Спаси, Господи, люди Твоя и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.

            Кондак, глас 7: Не ктому пламенное оружие хранит врат Едемских: на тыя бо найде преславный соуз, древо крестное: смертное жало и адова победа прогнася, предстал бо еси, Спасе мой, вопия сущим во аде: внидите паки в рай.

В 4-ую Неделю Св. Четыредесятницы

            Тропарь, глас 1: Пустынный житель и в телеси ангел, и чудотворец явился еси богоносе отче наш Иоанне: постом, бдением, молитвою небесная дарования приим, исцеляеши недужныя, и души верою притекающих к тебе: слава Давшему тебе крепость, слава Венчавшему тя, слава Действующему тобою всем исцеления.

            Кондак, глас 4: На высоте Господь воздержания истинна тя положи, яко же звезду нелестную, световодящую концы, наставниче Иоанне, отче наш.

В 5-ую Неделю Св. Четыредесятницы

            Тропарь, глас 8: В тебе, мати, известно спасеся еже по образу: приимши бо крест последовала еси Христу, и деющи учила еси презирати убо плоть, преходит бо: прилежати же о души, вещи безсмертней: темже и со ангелы срадуется, преподобная Марие, дух твой.

            Кондак, глас 3: Блудами первее преисполнена всяческими, Христова невеста днесь покаянием явися, ангельское жительство подражающи, демоны креста оружием погубляет: сего ради Царствия невеста явилася еси, Мария преславная

Вход в Иерусалим

            Тропарь, глас 1: Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроцы победы знамения носяще, Тебе победителю смерти вопием: осанна в вышних, благословен Грядый во имя Господне.

            Кондак, глас 6: На престоле на небеси, на жребяти на земли носимый, Христе Боже, Ангелов хваление и детей воспевание приял еси, зовущих Ти: благословен еси, грядый Адама воззвати.

Тропари и Кондаки

из Триоди Цветной

Во Неделю Пасхи

            Тропарь, глас 5: Христос воскресе из мертвых, смертию смерть поправ, и сущим во гробех живот даровав.

            Кондак, глас 8: Аще и во гроб снизшел еси, Безсмертне, но адову разрушил еси силу, и воскресл еси яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшим подаяй воскресение.

В Неделю св. Ап. Фомы

            Тропарь, глас 7: Запечатану гробу, Живот от гроба возсиял еси, Христе Боже, и дверем заключенным, учеником предстал еси, всех воскресение: дух правый теми обновляя нам, по велицей Твоей милости.

            Кондак, глас 8: Любопытною десницею жизноподательная Твоя ребра Фома испыта, Христе Боже: созаключенным бо дверем яко вшел еси, с прочими Апостолы вопияше Тебе: Господь еси и Бог мой.

В Неделю свв. Жен Мироносиц

            Тропарь, глас 2: Егда снизшел еси к смерти, Животе безсмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.

            Слава: Благообразный Иосиф с древа снем Пречистое Тело Твое, плащаницею чистою обвив и вонями во гробе нове закрыв, положи: но тридневен воскресл еси, Господи, подаяй мирови велию милость.

            И ныне: Мироносицам женам при гробе представ, Ангел вопияше: мира мертвым суть прилична, Христос же истления явися чуждь, но возопийте: воскресе Господь, подаяй мирови велию милость.

            Кондак, глас 2: Радоватися мироносицам повелел еси, плачь праматере Евы утолил еси воскресением Твоим, Христе Боже: Апостолом же Твоим проповедати повелел еси: Спас воскресе от гроба.

В Неделю 4-ую по Пасхе

            Кондак, глас 3: Душу мою, Господи, во гресех всяческих и безместными деяньми люте разслаблену, воздвигни Божественным Твоим предстательством, якоже и разслабленнаго воздвигл еси древле, да зову Ти спасаемь: щедрый, слава, Христе, державе Твоей.

В Неделю 5-ую по Пасхе

            Кондак, глас 8: Верою пришедшая на кладязь самаряныня, виде Тя премудрости воду: еюже напоившися обильно, Царствие вышнее наследова вечно, яко приснославная.

В Неделю 6-ую по Пасхе

            Кондак, глас 4: Душевныма очима ослеплен, к Тебе, Христе, прихожду, якоже слепый от рождения, покаянием зову Ти: Ты сущих во тьме Свет пресветлый.

Вознесение

            Тропарь, глас 4: Вознеслся еси во славе, Христе Боже наш, радость сотворивый учеником, обетованием Святаго Духа, извещенным им бывшим благословением: яко Ты еси Сын Божий, Избавитель мира.

            Кондак, глас 6: Еже о нас исполнив смотрение, и иже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами, и никтоже на вы.

В Неделю 7-ую по Пасхе

            Тропарь, глас 8: Препрославлен еси, Христе Боже наш, светила на земли Отцы наши основавый; и теми ко истинней вере вся ны наставивый, Многоблагоутробне, слава Тебе.

            Кондак, глас 8: Апостол проповедание, и Отец догматы, Церкви едину веру запечатлеша: яже и ризу носящи истины, исткану от еже свыше Богословия, исправляет и славит благочестия великое таинство.

На Троицу

            Тропарь, глас 8: Благословен еси, Христе Боже наш, Иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.

            Кондак, глас 8: Егда снишед языки слия, резделяше языки Вышний: егда же огненныя языки раздаяше, в соединение вся призва: и согласно славим Всесвятаго Духа.

В Неделю всех Святых

            Тропарь, глас 4: Иже во всем мире мученик Твоих, яко багряницею и виссоном, кровьми Церковь Твоя украсившися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй и душам нашим велию милость.

            Кондак, глас 8: Яко начатки естества, Насадителю твари, вселенная приносит Ти, Господи, Богоносныя мученики: тех молитвами в мире глубоце Церковь Твою, жительство Твое, Богородице соблюди, Многомилостиве.

В Неделю всех Святых в Земли Русской просиявших

            Тропарь, глас 8: Якоже плод красный Твоего спасительнаго сеяния, земля Русская приносит Ти, Господи, вся святыя, в той просиявшия. Тех молитвами в мире глубоце Церковь и землю нашу Богородицею соблюди, Многомилостиве.

            Кондак, глас 3: Днесь лик святых, в земли нашей Богу угодивших, предстоит в церкви и невидимо за ны молится Богу: Ангели с ним славословят, и вси святии Церкве Христовы Ему спразднуют: о нас бо молят вси купно Превечнаго Бога.