К оглавлению

Воскресная Евангелиа утренняя, ексапостиларии и стихиры евангельские

Евангелие воскресно первое,

от Матфеа, зачало 116.

Единии же надесяте ученицы идоша в Галилею, в гору, аможе повеле им Иисус: и видевше Его, поклонишася Ему: ови же усумнешася. И приступль Иисус, рече им, глаголя: дадеся ми всяка власть на небеси и на земли: шедше убо научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам: и се, Аз с вами есмь во вся дни до скончания века. Аминь.

Ексапостиларий 1:

Начало воскресных ексапостиларий, и утренних самогласных, сиречь евангельских стихир. И утрении убо стихиры суть творение Льва царя премудраго; ексапостиларии же сына его Константина царя.

Со ученики взыдем на гору Галилейскую, верою Христа видети глаголюща власть прияти вышних и нижних: научимся, како учит крещати во имя Отца и Сына и Святаго Духа языки вся, и пребывати с таинники, якоже обещася, до скончания века.

Богородичен:

Со ученики радовалася еси, Богородице Дево, яко Христа видела еси воскресшаго от гроба тридневна, якоже рече: имже и явися, научая и являя лучшая, и крещати во Отце и Сыне и Дусе повелевая, еже веровати нам Того востанию и славити Тя, Отроковице.

Утренняя стихира, глас 1:

На гору учеником идущым за земное вознесение предста Господь, и поклонившеся Ему и данныя власти везде научившеся, в поднебесную посылахуся проповедати еже из мертвых воскресение и еже на небеса возшествие: имже и во веки спребывати неложный обещася Христос Бог и Спас душ наших.