Если есть оглашенные:
Помолитеся, оглашеннии Господеви.
Народ: Господи, помилуй.
Вернии, о оглашенных помолимся, да Господь помилует их.
Народ: Господи, помилуй.
Огласит их словом истины.
Народ: Господи, помилуй.
Открыет им Евангелие правды.
Народ: Господи, помилуй.
Соединит их Святей Своей Соборней и Апостольстей Церкви.
Народ: Господи, помилуй.
Спаси, помилуй, заступи и сохрани их, Боже, Твоею благодатию.
Народ: Господи, помилуй.
Оглашеннии, главы ваша Господеви приклоните.
Народ: Тебе Господи.
Господи Боже наш, Иже на высоких живый и на смиренныя призираяй, иже спасение роду человеческому низпославый единороднаго Сына Твоего и Бога Господа нашего Иисуса Христа, призри на рабы твоя оглашенныя, подклоньшыя Тебе своя выя, и сподоби я во время благополучное бани пакибытия, оставления грехов и одежди нетления, соедини их святей Твоей, соборней и апостольстей Церкви и сопричти их избранному Твоему стаду, да и тии с нами славят пречестное и великолепое имя Твое: Отца, и Сына, и Святаго Духа ныне, и присно, и во веки веков.
Народ: Аминь.
Елицы оглашеннии, изыдите: оглашеннии, изыдите: елицы оглашеннии, изыдите: да никто от оглашенных, елицы вернии, паки и паки миром Господу помолимся.
Народ: Господи, помилуй.
Заступи, спаси, помилуй и сохрани нас, Боже, Твоею благодатию.
Народ: Господи, помилуй.
Премудрость
Молитва верных первая: Благодарим Тя, Господи, Боже Сил, сподобившаго нас предстати и ныне святому Твоему жертвеннику и припасти ко щедротам Твоим о наших гресех и о людских неведениих: приими, Боже, моление наше, сотвори ны достойны быти, еже приносити Тебе моления, и мольбы, и жертвы безкровныя о всех людех Твоих, и удовли нас, ихже положил еси в службу Твою сию, силою Духа Твоего Святаго, неосужденно и непреткновенно, в чистем свидетельстве совести нашея, призывати Тя на всякое время и место, да послушая нас, милостив нам будеши во множестве Твоея благости, яко подобает Тебе всякая слава, честь и поклонение: Отцу, и Сыну, и Святому Духу ныне, и присно, и во веки веков.
Народ: Аминь.
Паки и паки миром Господу помолимся.
Народ: Господи, помилуй.