Небеса поведают славу Божию, творение же руку eго возвещает твердь. День дни отрыгает глагол, и нощь нощи возвещает разум. Не суть речи, ниже словеса, ихже не слышатся гласи их. Во всю землю изыде вещание их, и в концы вселенныя глаголы их; в солнце положи селение свое; и той яко жених исходяй от чертога своего, возрадуется яко исполин тещи путь. От края небесе исход eго, и сретение eго до края небесе; и несть, иже укрыется теплоты eго. Закон Господень непорочен, обращаяй душы; свидетелство Господне верно, умудряющее младенцы. Оправдания Господня права, веселящая сердце; заповедь Господня светла, просвещающая oчи. Страх Господень чист, пребываяй в век века; судбы Господни истинны, оправданны вкупе, вожделенны паче злата и камене честна многа, и слаждшя паче меда и сота. Ибо раб твой хранит я; внегда сохранити я, воздаяние много. Грехопадeния кто разумеет? от тайных моих очти мя, и от чуждих пощади раба твоего; аще не обладают мною, тогда непорочен буду, и очищуся от греха велика. И будут во благоволение словеса уст моих, и поучение сердца моего пред тобою выну, Господи, помощниче мой и избавителю мой.