Спаси мя, Боже, яко внидоша воды до души моея. Углебох в тимении глубины, и несть постояния; приидох во глубины морския, и буря потопи мя. Утрудихся зовый, измолче гортань мой; исчезосте oчи мои, от eже уповати ми на Бога моего. Умножишася паче влас главы моея ненавидящии мя туне; укрепишася врази мои, изгонящии мя неправедно; яже не восхищах, тогда воздаях. Боже, ты уведел eси безумие мое, и прегрешeния моя от тебe не утаишася. Да не постыдятся о мне терпящии тебе, Господи, Господи сил; ниже да посрамятся о мне ищущии тебе, Боже Израилев. Яко тебe ради претерпех поношение, покры срамота лице мое. Чуждь бых братии моей и странен сыновом матере моея; яко ревность дому твоего снеде мя, и поношeния поносящих ти нападоша на мя. И покрых постом душу мою, и бысть в поношение мне; и положих одеяние мое вретище, и бых им в притчу. О мне глумляхуся седящии во вратех, и о мне пояху пиющии вино. Аз же молитвою моею к тебе, Боже; время благоволения, Боже; во множестве милости твоея услыши мя, во истине спасения твоего. Спаси мя от брения, да не углебну; да избавлюся от ненавидящих мя и от глубоких вод. Да не потопит мене буря водная, ниже да пожрет мене глубина, ниже сведет о мне ровенник уст своих. Услыши мя, Господи, яко блага милость твоя; по множеству щедрот твоих призри на мя. Не отврати лица твоего от oтрока твоего, яко скорблю; скоро услыши мя. Вонми души моей и избави ю; враг моих ради избави мя. Ты бо веси поношение мое, и студ мой, и срамоту мою; пред тобою вси оскорбляющии мя. Поношение чаяше душа моя и страсть; и ждах соскорбящаго, и не бе, и утешающих, и не обретох. И даша в снедь мою желчь, и в жажду мою напоиша мя oцта. Да будет трапеза их пред ними в сеть и в воздаяние и в соблазн. Да помрачатся oчи их, eже не видети, и хребет их выну сляцы. Пролий на ня гнев твой, и ярость гнева твоего да постигнет их. Да будет двор их пуст, и в жилищих их да не будет живый. Зане eгоже ты поразил eси, тии погнаша, и к болезни язв моих приложиша. Приложи беззаконие к беззаконию их, и да не внидут в правду твою. Да потребятся от книги живых, и с праведными да не напишутся. Нищ и боляй eсмь аз; спасение твое, Боже, да приимет мя. Восхвалю имя Бога моего с песнию, возвеличу eго во хвалении; и угодно будет Богу паче телца юна, роги износяща и пазнокти. Да узрят нищии и возвеселятся; взыщите Бога, и жива будет душа ваша. Яко услыша убогия Господь, и окованныя своя не уничижи. Да восхвалят eго небеса и земля, море и вся живущая в нем. Яко Бог спасет Сиона, и созиждутся гради иудейстии, и вселятся тамо и наследят и; и семя рабов твоих удержит и, и любящии имя твое вселятся в нем.