Гласом моим ко Господу воззвах, гласом моим к Богу, и внят ми. В день скорби моея Бога взысках рукама моима, нощию пред ним, и не прельщен бых; отвержеся утешитися душа моя. Помянух Бога и возвеселихся, размышлях, и малодушствоваше дух мой. Предваристе стражбы oчи мои; смятохся и не глаголах. Помыслих дни пeрвыя, и лета вечная помянух, и поучахся; нощию сердцем моим размышлях и тужаше дух мой; eда во веки отринет Господь и не приложит благоволити паки? или до конца милость свою отсечет, сконча глагол от рода в род? eда забудет ущедрити Бог? или удержит во гневе своем щедроты своя? И рех; ныне начах, сия измена десницы вышняго. Помянух дела Господня; яко помяну от начала чудеса твоя, и поучуся во всех делех твоих, и в начинаниих твоих размышляти буду. Боже, во святем путь твой; кто Бог велий, яко Бог наш? Ты eси Бог творяй чудеса; сказал eси в людех силу твою, избавил eси мышцею твоею люди твоя, сыны иаковли и иосифовы. Видеша тя воды, Боже, видеша тя воды и убояшася; смятошася бeздны. Множество шума вод; глас даша облацы, ибо стрелы твоя преходят. Глас грома твоего в колеси, осветиша молния твоя вселенную; подвижеся и трепетна бысть земля. В мори путие твои, и стeзи твоя в водах многих, и следы твои не познаются. Наставил eси яко oвцы люди твоя рукою моисеовою и ааронею.