Боже, кто уподобится тебе? не премолчи, ниже укротися, Боже; яко се, врази твои возшумеша, и ненавидящии тя воздвигоша главу. На люди твоя лукавноваша волею, и совещаша на святыя твоя. Реша; приидите и потребим я от язык, и не помянется имя Израилево ктому. Яко совещаша eдиномышлением вкупе, на тя завет завещаша; селeния идумeйска и исмаилите, моав и агаряне, гевал и аммон и амалик, иноплемeнницы с живущими в тире; ибо и ассур прииде с ними, быша в заступление сыновом лотовым; Сотвори им яко мадиаму и сисаре, яко иавиму в потоце киссове; потребишася во аендоре, быша яко гной земный. Положи князи их яко орива и зива, и зевеа и салмана, вся князи их, иже реша; да наследим себе святилище Божие. Боже мой, положи я яко коло, яко трость пред лицем ветра. Яко oгнь попаляяй дубравы, яко пламень пожигаяй горы; тако поженеши я бурею твоею, и гневом твоим смятеши я. Исполни лица их безчестия, и взыщут имене твоего, Господи. Да постыдятся и смятутся в век века, и посрамятся и погибнут. И да познают, яко имя тебе Господь, ты eдин вышний по всей земли.