Приклони, Господи, ухо твое, и услыши мя; яко нищ и убог eсмь аз. Сохрани душу мою, яко преподобен eсмь; спаси раба твоего, Боже мой, уповающаго на тя. Помилуй мя, Господи, яко к тебе воззову весь день. Возвесели душу раба твоего; яко к тебе взях душу мою. Яко ты, Господи, благ и кроток и многомилостив всем призывающым тя. Внуши, Господи, молитву мою и вонми гласу моления моего. В день скорби моея воззвах к тебе, яко услышал мя eси. Несть подобен тебе в бозех, Господи, и несть по делом твоим. Вси языцы, eлики сотворил eси, приидут и поклонятся пред тобою, Господи, и прославят имя твое; яко велий eси ты и творяй чудеса, ты eси Бог eдин. Настави мя, Господи, на путь твой, и пойду во истине твоей; да возвеселится сердце мое боятися имене твоего. Исповемся тебе, Господи Боже мой, всем сердцем моим и прославлю имя твое в век; яко милость твоя велия на мне, и избавил eси душу мою от ада преисподнейшаго. Боже, законопреступницы восташа на мя, и сонм державных взыскаша душу мою, и не предложиша тебе пред собою. И ты, Господи Боже мой, щедрый и милостивый, долготерпеливый и многомилостивый и истинный, призри на мя и помилуй мя; даждь державу твою oтроку твоему и спаси сына рабы твоея. Сотвори со мною знамение во благо; и да видят ненавидящии мя, и постыдятся, яко ты, Господи, помогл ми и утешил мя eси.