Господь воцарися, да радуется земля, да веселятся oстрови мнози. Облак и мрак окрест eго; правда и судба исправление престола eго. Oгнь пред ним предидет и попалит окрест враги eго. Осветиша молния eго вселенную; виде и подвижеся земля. Горы яко воск растаяша от лица Господня, от лица Господа всея земли. Возвестиша небеса правду eго, и видеша вси людие славу eго. Да постыдятся вси кланяющиися истуканным, хвалящиися о идолех своих; поклонитеся eму, вси ангели eго. Слыша и возвеселися Сион, и возрадовашася дщeри иудeйския, судеб ради твоих, Господи; яко ты Господь вышний над всею землею, зело превознеслся eси над всеми боги. Любящии Господа, ненавидите злая; хранит Господь душы преподобных своих, из руки грешничи избавит я. Свет возсия праведнику, и правым сердцем веселие. Веселитеся, праведнии, о Господе, и исповедайте память святыни eго.