ЛИТУРГИЯ ИОАННА ЗЛАТОУСТАГО
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. Трижды.
Слава Отцу, и Сыну, и Святому Духу, и ныне и присно, и во веки веков. Аминь.
Пресвятая Троице, помилуй нас: Господи, очисти грехи наша: Владыко, прости беззакония наша: Святый, посети и исцели немощи наша, имене Твоего ради.
Господи, помилуй. трижды. Слава, и ныне:
Отче наш, Иже еси на небесех, да святится имя Твое, да приидет Царствие Твое: да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашым: и не введи нас во искушение, но избави нас от лукаваго. Яко Твое есть царство, и сила, и слава, Отца, и Сына, и святаго Духа, ныне и присно, и во веки веков. Аминь.
Помилуй нас, Господи, помилуй нас; всякаго бо ответа недоумеюще, сию Ти молитву яко Владыце грешнии приносим: помилуй нас.
Слава: Господи, помилуй нас, на Тя бо уповахом, не прогневайся на ны зело, ниже помяни беззаконий наших: но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имя Твое призываем.
И ныне: Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.
Таже отходит ко иконе Христове и целует ю, глаголюще:
Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы вражия. Тем же благодарственно вопием Ти: радости исполнил еси вся, Спасе наш, пришедый спасти мир.
Затем к иконе Богородицы, произнося тропарь:
Милосердия сущи источник, милости сподоби нас, Богородице, призри на люди согрешившыя, яви яко присно силу твою: на тя бо уповающе, радуйся, вопием ти яко иногда Гавриил безплотных архистратиг.
Таже приклонь главу, иерей глаголет сию молитву:
Господи, низпосли руку Твою с высоты святаго жилища Твоего и укрепи мя в предлежащую службу Твою: да неосужденно предстану страшному Престолу Твоему и безкровное священнодействие совершу, яко Твоя есть сила и слава во веки веков. Аминь.
Кланяется присутствующим и молится:
Вниду в дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша Тя, Господи. И да возвеселятся вси уповающии на Тя, во веки возрадуются, и вселишися в них, и похвалятся о Тебе любящии имя Твое. Яко Ты благословиши праведника, Господи, яко оружием благоволения венчал еси нас.
Молитва перед одеванием риз: Боже, очисти мя, грешнаго, и помилуй мя.
Благословен Бог наш всегда, ныне и присно, и во веки веков.
Возрадуется душа моя о Господе, облече бо мя в ризу спасения и одеждею веселия одея мя, яко жениху возложи ми венец, и яко невесту украси мя красотою.
И одевает поручи на правую руку, говоря: Десница Твоя, Господи, прославися в крепости, десная Твоя рука, Господи, сокруши враги, и множеством славы Твоея стерл еси супостаты.
На левую же, глаголет: Руце Твои сотвористе мя и создасте мя: вразуми мя, и научуся заповедем Твоим.Облачаясь в фелонь: Священницы Твои, Господи, облекутся в правду, и преподобнии Твои радостию возрадуются всегда: ныне, и присно, и во веки веков. Аминь.
Молитва при омовении рук: Умыю в неповинных руце мои и обыду жертвенник Твой, Господи, еже услышати ми глас хвалы Твоея и поведати вся чудеса Твоя. Господи, возлюбих благолепие дому Твоего и место селения славы Твоея. Да не погубиши с нечестивыми душу мою и с мужи кровей живота моего: ихже в руках беззакония, десница их исполнися мзды. Аз же незлобием моим ходих: избави мя, Господи, и помилуй мя. Нога моя ста на правоте, в церквах благословлю Тя, Господи.
Таже поклонения три пред предложением сотворше, глаголют кийждо:
Боже, очисти мя, грешного, и помилуй мя. Искупил ны еси от клятвы законныя честною Твоею Кровию: на Кресте пригвоздився, и копием прободся, безсмертие источил еси человеком: Спасе наш, слава Тебе.
Благословен Бог наш всегда, ныне и присно, и во веки веков. Аминь.
Таже приемлет иерей левою убо рукою просфору, десною же святое копие, и знаменуя им трижды верху печати просфоры, глаголет:
В воспоминание Господа и Бога и Спаса нашего Иисуса Христа.
А абие водружает копие в десную страну печати, и глаголет режа:
Яко овча на заколение ведеся.
В левую же:
И яко агнец непорочен, прямо стригущаго его безгласен, тако не отверзает уст своих.
В горнюю же страну печати:
Во смирении Его суд Его взятся.
В долнюю же страну:
Род же Его кто исповесть.
Священник же, вложив святое копие от косвенныя десныя страны просфоры, взимает святый хлеб, глаголя сице:
Яко вземлется от земли живот Его.
Надрезает его крестовидно, сице глаголя:
Жрется агнец божий, вземляй грехи мира, за мирский живот и спасение.
И обращает горе другую страну, имущую крест.
Прободи, владыко.
Священник, прободая и в десную страну копием, глаголет:
Един от воин копием ребра Его прободе, и абие изыде кровь и вода, и видевый свидетельствова, и истинно есть свидетельство его.
Вторая профора:
В честь и память Преблагословенныя Владычицы нашея Богородицы и Приснодевы Марии, Ея же молитвами приими, Господи, жертву сию в пренебесный Твой Жертвенник.
И взем частицу, полагает ю одесную святаго хлеба, близ среды его, глаголя:
Предста Царица одесную Тебе, в ризы позлащенны одеяна, преукрашенна.
Таже прием третию просфору, глаголет:
Честнаго славнаго Пророка, Предтечи и Крестителя Иоанна.
Вторая частица: Святых славных пророков Моисея и Аарона, Илии и Елисея, Давида и Иессея, святых триех отроков, и Даниила пророка, и всех святых пророков.
Третья частица: Святых славных и всехвальных апостолов Петра и Павла и прочих всех святых апостолов.
Четвертая частица: Иже во святых отец наших, святителей Василия Великаго, Григория Богослова и Иоанна Златоустаго, Афанасия и Кирилла, Николая Мирликийскаго, Никиты, епископа Новгородскаго, Леонтия, епископа Ростовскаго, и всех святых святителей.
Пятая частица:Святаго апостола первомученика и архидиакона Стефана, святых великих мучеников Димитрия, Георгия, Феодора Тирона, Феодора Стратилата и всех святых мученик, и мучениц Феклы, Варвары, Кириакии, Евфимии и Параскевы, Екатерины, Ирины и всех святых мучениц.
Шестая частица:Преподобных и богоносных отец наших Антония, Евфимия, Саввы, Онуфрия, Афанасия Афонскаго, Антония и Феодосия Печерских, Сергия Радонежскаго, Варлаама Хутынскаго, и всех преподобных отец; и преподобных матерей Пелагии, Феодосии, Анастасии, Евпраксии, Февронии, Феодулии, Евфросинии, Марии Египтяныни, матери Марии Парижской и всех святых преподобных матерей.
Седьмая частица: Святых и чудотворцев бессребреник Космы и Дамиана, Кира и Иоанна, Пантелеимона и Ермолая и всех святых бессребреников.
Восьмая частица: Святых и праведных Богоотец Иоакима и Анны, святых равноапостольных Мефодия и Кирилла, учителей словенских: святаго равноапостольнаго великаго князя Владимира, и всех святых, ихже молитвами посети ны, Боже.
Девятая частица:Иже во святых отца нашего Иоанна, архиепископа Константинопольскаго, Златоустаго.
Таже прием четвертую просфору, глаголет: Помяни, Владыко человеколюбче, всякое епископство православных, всесвятейшаго патриарха Варфоломея, архиепископа Игоря, митрополита Антония.
Таже поминает живых, затем взяв пятую просфору, поминает умерших. И конечне глаголет сице: И всех в надежде воскресения, жизни вечныя и Твоего общения усопших православных отец, и братий наших, человеколюбче Господи.
И взимает частицу. По сем глаголет: Помяни, Господи, и мое недостоинство и прости ми всякое согрешение, вольное же и невольное.
И взимает частицу. Берет кадило, молясь:
Кадило Тебе приносим, Христе Боже наш, в воню благоухания духовнаго, еже прием в пренебесный Твой жертвенник, возниспосли нам благодать Пресвятаго Твоего Духа.
Священник покадив звездицу, полагает верху святаго хлеба, глаголя:
И пришедши звезда, ста верху, идеже бе отроча.
Иерей, покадив первый покровец, покрывает святый хлеб с дискосом, глаголя:
Господь воцарися, в лепоту облечеся: облечеся Господь в силу и препоясася. Ибо утверди вселенную, яже не подвижится. Готов престол Твой оттоле, от века Ты еси. Воздвигоша реки, Господи, воздвигоша реки гласы своя, возмут реки сотрения своя, от гласов вод многих. Дивны высоты морския, дивен в высоких Господь. Свидения Твоя уверишася зело. Дому Твоему подобает святыня, Господи, в долготу дний.
Иерей же, покадив вторый покровец, покрывает святый потир, глаголя:
Покры небеса добродетель Твоя, Христе, и хвалы Твоея исполнь земля.
Иерей же, покадив покров, сиречь воздух, и покрывая обоя глаголет:
Покрый нас кровом крилу Твоею, отжени от нас всякаго врага и супостата. Умири нашу жизнь, Господи, помилуй нас и мир Твой и спаси душы наша, яко благ и человеколюбец.
Таже прием священник кадильницу, кадит предложение, глаголя трижды:
Благословен Бог наш, сице благоволивый, слава Тебе всегда, ныне и присно, и во веки веков. Аминь.
О предложенных честных дарех Господу помолимся.
Священник же, прием кадильницу, глаголет молитву предложения:
Боже, Боже наш, небесный Хлеб, Пищу всему миру, Господа нашего и Бога Иисуса Христа, пославый спаса и избавителя и благодетеля, благословяща и освящающа нас, сам благослови предложение сие и приими е в пренебесный Твой жертвенник. Помяни, яко благ и человеколюбец, принесших и ихже ради принесоша: и нас неосуждены сохрани во священнодействии божественных Твоих таин.
Яко святися и прославися пречестное и великолепое имя Твое: Отца, и Сына, и святаго Духа ныне и присно, и во веки веков. Аминь.
И по сем творит отпуст тамо, глаголя сице:
Слава Тебе, Христе Боже, упование наше, слава Тебе. Слава, и ныне: Господи, помилуй, трижды.
Священник глаголет отпуст:
В воскресенье:
Воскресый из мертвых: В будние дни со слов: Христос истинный Бог наш, молитвами пречистыя своея Матере, иже во святых отца нашего Иоанна, архиепископа Константинопольскаго, Златоустаго, и всех святых, помилует и спасет нас, яко благ и человеколюбец. Аминь.
Каждение жертвенника и алтаря с молитвой:
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй, неописанный.
Таже псалом 50.
Молитва перед алтарем:
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Слава в вышних Богу, и на земле мир, в человецех благоволение. Дважды.
Господи, устне мои отверзеши, и уста моя возвестят хвалу Твою.
Иерей:
Благословенно царство, Отца, и Сына, и святаго Духа, ныне и присно, и во веки веков.
Народ: Аминь.
Миром Господу помолимся.
Народ: Господи, помилуй.
О свышнем мире, и спасении душ наших, Господу помолимся.
Народ: Господи, помилуй.
О мире всего мiра, благостоянии святых божиих церквей, и соединении всех, Господу помолимся.
Народ: Господи, помилуй.
О святем храме сем, и с верою, благоговением и страхом Божиим входящих в онь, Господу помолимся.
Народ: Господи, помилуй.
О богохранимой стране Российстей, о стране Украинстей Господу помолимся.
Народ: Господи, помилуй.
О граде сем, о всяком граде, стране, и верою живущих в них, Господу помолимся.
Народ: Господи, помилуй.
О благорастворении воздухов, о изобилии плодов земных, и временех мирных, Господу помолимся.
Народ: Господи, помилуй.
О плавающих, путешествующих, недугующих, страждущих, плененных, заключенных и о спасении их Господу помолимся.
Народ: Господи, помилуй.
О избавитися нам от всякия скорби, гнева и нужды, Господу помолимся.
Народ: Господи, помилуй.
Заступи, спаси, помилуй, и сохрани нас, Боже, Твоею благодатию.
Народ: Господи, помилуй.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Народ: Тебе, Господи.
Первый антифон.
Благослови, душе моя, Господа, благословен еси, Господи. Благослови, душе моя, Господа, и вся внутренняя моя Имя Святое Его. Благослови, душе моя, Господа и не забывай всех воздаяний Его: очищающаго вся беззакония твоя, исцеляю щаго вся недуги твоя, избавляющего от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Щедр и милостив Господь, долготерпелив и многомилостив. Благослови, душе моя, Господа, и вся внутренняя моя имя святое Его. Благословен еси Господи.
Молитва иерея во время пения перваго антифона:
Господи Боже наш, егоже держава несказанна, и слава непостижима, егоже милость безмерна, и человеколюбие неизреченно: сам, Владыко, по благоутробию Твоему, призри на ны, и на святый храм сей, и сотвори с нами, и молящимися с нами, богатыя милости Твоя, и щедроты Твоя.
Возглашение:
Яко подобает Тебе всякая слава, честь и поклонение, Отцу, и Сыну, и святому Духу, ныне, и присно, и во веки веков.
Народ: Аминь.
Иерей: Паки и паки миром Господу помолимся.
Народ: Господи, помилуй.
Иерей: Заступи, спаси, помилуй, и сохрани нас, Боже, Твоею благодатию.
Народ: Господи, помилуй.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Народ: Тебе, Господи.
Второй антифон.
Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в них же несть спасения. Изыдет дух его, и возвратится в землю свою: в той день погибнут вся помышления его. Блажен, ему же Бог Иаковль помощник его, упование его на Господа Бога своего. Сотворшаго небо и землю, море и вся, яже в них. Хранящаго истину в век, творящаго суд обидимым, дающаго пищу алчущим. Господь решит окованныя, Господь умудряет слепцы. Господь возводит низверженныя, Господь любит праведники. Господь хранит пришельцы, сира и вдову приимет, и путь грешных погубит. Воцарится Господь во век, Бог твой, Сионе, в род и род.
Слава Отцу, и Сыну, и Святому Духу и ныне, и присно, и во веки веков. Аминь.
Единородный Сыне и Слове Божий, Безсмертен Сый, и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, един Сый Святыя Троицы, спрославляемый Отцу и Святому Духу, спаси нас.
Молитва втораго антифона:
Господи Боже наш, спаси люди Твоя, и благослови достояние Твое, исполнение церкви Твоея сохрани, освяти любящыя благолепие дому Твоего, Ты тех воспрослави божественною Твоею силою, и не остави нас, уповающих на Тя.
Возглашение:
Яко Твоя держава, и Твое есть царство, и сила, и слава, Отца, и Сына, и святаго Духа ныне и присно, и во веки веков.
Народ: Аминь.
Иерей:
Паки и паки миром Господу помолимся.
Народ: Господи, помилуй.
Заступи, спаси, помилуй, и сохрани нас, Боже, Твоею благодатию.
Народ: Господи, помилуй.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Народ: Тебе, Господи.
Третий антифон.
Во Царствии Твоем помяни нас, Господи, егда приидеши во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.
Блажени чистии сердцем, яко тии Бога узрят.
Блажени миротворцы, яко тии сынове Божии нарекутся.
Блажени изгнани правды ради, яко тех есть Царство Небесное.
Блажени есте, егда поносят вам, и изженут, и рекут всяк зол глагол на вы, лжуще Мене ради.
Радуйтеся и веселитеся, яко мзда ваша многа на небесех.
Молитва третияго антифона:
Иже общыя сия, и согласныя даровавый нам молитвы, иже и двема, или трем, согласующымся о имени Твоем, прошения подати обещавый: сам и ныне раб Твоих прошения к полезному исполни, подая нам в настоящем веце познание Твоея истины, и в будущем живот вечный даруя. [45]
Возглашение:
Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.
Народ: Аминь.
Молитва входа:
Владыко Господи, Боже наш, уставивый на небесех чины, и воинства ангел и архангел в служение Твоея славы: сотвори со входом нашим, входу святых ангелов быти, сослужащих нам, и сославословящих Твою благость. Яко подобает Тебе всякая слава, честь и поклонение, Отцу, и Сыну и святому Духу, ныне и присно, и во веки веков. Аминь.
Иерей выходит с Евангелием и возглашает:
Премудрость, прости.
Народ:Приидите, поклонимся и припадем ко Христу. Спаси ны, Сыне Божий, во святых дивен сый, поющия Ти: Аллилуиа. Единожды.
В воскресенье добавляются слова:Воскресый из мертвых, поющыя Ти: Аллилуиа. Единожды.
Поются тропари. Священник же глаголет молитву трисвятаго пения.
Боже Святый, иже во святых почиваяй, иже трисвятым гласом от серафимов воспеваемый, и от херувимов славословимый, и от всякия небесныя силы покланяемый: иже от небытия во еже быти приведый всяческая, создавый человека по образу Твоему и по подобию, и всяким Твоим дарованием украсивый: даяй просящему премудрость и разум, и не презираяй согрешающего, но полагаяй на спасение покаяние: сподобивый нас, смиренных и недостойных раб Твоих, и в час сей стати пред славою святаго Твоего Жертвенника и должное Тебе поклонение и славословие приносити: сам, Владыко, приими и от уст нас грешных трисвятую песнь и посети ны благостию Твоею. Прости нам всякое согрешение, вольное же и невольное, освяти наша душы и телеса, и даждь нам в преподобии служити Тебе вся дни живота нашего, молитвами Святыя Богородицы и всех святых, от века Тебе благоугодивших.
Иерей же, знаменуя его, возглашает:
Яко свят еси, Боже наш, и Тебе славу возсылаем: Отцу, и Сыну, и Святому Духу, ныне и присно и во веки веков.
Народ: Аминь.
Иерей же возглашает: Мир всем.
Народ: И духови твоему.
Иерей: Премудрость.
Чтение и пение прокимнов.
Иерей: Премудрость.
И чтец, надписание апостола:
Деяний святых апостол чтение. Или: Соборнаго послания Иаковля, или: Петрова чтение. Или: К Римляном, или: к Коринфяном, или: к Галатом послания святаго апостола Павла чтение.
И паки: Вонмем.
Иерей: Премудрость.
Пение аллилуариев (стихов перед Евангелием).
Молитва прежде евангелия.
Возсияй в сердцах наших, человеколюбче Владыко, Твоего богоразумия нетленный свет, и мысленныя наши отверзи очи во евангельских Твоих проповеданий разумение: вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще, Ты бо еси просвещение душ и телес наших, Христе Боже, и Тебе славу возсылаем со безначальным Твоим Отцем и всесвятым, и благим, и животворящим Твоим Духом ныне, и присно, и во веки веков. Аминь.
Иерей же, стоя пред святою трапезою и зря к западу, возглашает:
Премудрость, прости, услышим святого евангелиа.
Таже:
Мир всем.
Людие: И духови твоему.
Иерей:
От имя рек святаго евангелия чтение
Народ: Слава Тебе, Господи, слава Тебе.
Священник: Вонмем.
Народ: Слава Тебе, Господи, слава Тебе.
Иерей: Рцем вси от всея души и от всего помышления нашего рцем.
Народ: Господи, помилуй.
Господи Вседержителю, Боже отец наших, молим Ти ся, услыши и помилуй.
Народ: Господи, помилуй.
Помилуй нас, Боже, по велицей милости Твоей, молим Ти ся, услыши и помилуй.
Народ: Господи, помилуй, трижды.
Моления о живых и умерших
Народ: Господи, помилуй, трижды. [59]
Зде прилагается о особеннем прошении ектениа.
Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Народ: Господи, помилуй, трижды.
Молитва прилежнаго моления:
Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающыя от Тебе богатыя милости.
Возглашение:
Яко милостив и человеколюбец Бог еси, и Тебе славу возсылаем: Отцу, и Сыну, и святому Духу ныне, и присно и во веки веков.
Народ: Аминь.
Молитва верных первая:
Благодарим Тя, Господи, Боже сил, сподобившаго нас предстати и ныне святому Твоему жертвеннику, и припасти ко щедротам Твоим о наших гресех и о людских неведениих: приими, Боже, моление наше, сотвори ны достойны быти, еже приносити Тебе моления, и мольбы, и жертвы безкровныя о всех людех Твоих: и удовли нас, их- [66] же положил еси в службу Твою сию, силою Духа Твоего cвятаго, неосужденно и непреткновенно, в чистем свидетельстве совести нашея, призывати Тя на всякое время и место: да послушая нас, милостив нам будеши во множестве Твоея благости. Яко подобает Тебе всякая слава, честь и поклонение: Отцу, и Сыну, и святому Духу ныне и присно, и во веки веков.
Народ: Аминь.
Молитва верных вторая:
Паки, и многажды Тебе припадаем. и Тебе молимся, благий и человеколюбче, яко да призрев на моление наше, очистиши наша душы и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же, Боже, и молящымся с нами преспеяние жития и веры и разума духовнаго: даждь им всегда со страхом и любовию служащым Тебе, неповинно и неосужденно причаститися святых Твоих таин, и небеснаго Твоего царствия сподобитися.
Возглашение:
Яко да под державою Твоею всегда храними, Тебе славу возсылаем: Отцу, и Сыну, и Святому Духу ныне, и присно, и во веки веков.
Народ: Аминь.
Священник же глаголет тайно молитву сию:
Никто же достоин от связавшихся плотскими похотьми и сластьми, приходити, или приближатися, или служити Тебе, царю славы: еже бо служити Тебе, велико и страшно и самем небесным силам. Но обаче, неизреченного ради и безмернаго Твоего человеколюбия непреложно и неизменно был еси человек, и архиерей нам был еси, и служебныя сея и бескровныя жертвы священнодействие предал еси нам, яко Владыка всех: Ты бо един, Господи Боже наш, владычествуеши небесными и земными, иже на престоле херувимсте носимый, иже серафимов Господь и Царь Исраилев, иже един свят и во святых почиваяй. Тя убо молю единаго благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей трапезе и священнодействовати святое и пречистое Твое тело и честную кровь. К Тебе бо прихожду, приклонь мою выю, и молютися, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим: Ты бо еси приносяй и приносимый, и приемляй и раздаваемый, Христе Боже наш, и Тебе славу возсылаем, со безначальным Твоим Отцем и пресвятым, и благим, и животворящим Твоим Духом ныне, и присно, и во веки веков. Аминь.
Народ:
Иже херувимы тайно образующе и животворящей Троице трисвятую песнь припевающе, всякое ныне житейское отложим попечение.
После вноса Чаши:
Яко да царя всех подъимем, ангельскими невидимо дориносима чинми. Аллилуиа, аллилуиа, аллилуиа.
Молитвы при поставлении Потира:
Благообразный Иосиф, с древа снем пречистое тело Твое, плащаницею чистою обвив, и вонями во гробе нове покрыв положи.
Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом вся исполняяй неописанный.
Яко живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.
Благообразный Иосиф, с древа снем пречистое тело Твое, плащаницею чистою обвив, и вонями во гробе нове покрыв, положи.
И кадит святая трижды, глаголя:
Ублажи, Господи, благоволением Твоим Сиона, и да созиждутся стены иерусалимския: тогда благоволиши жертву правды, возношение и всесожегаемая, тогда возложат на олтарь Твой тельцы.
Иерей:
Исполним молитву нашу Господеви.
Народ: Господи, помилуй.
О предложенных честных дарех Господу помолимся.
Народ: Господи, помилуй.
О святем храме сем и с верою, благоговением и страхом [79] Божиим входящих в онь Господу помолимся.
Народ: Господи, помилуй.
О избавитися нам от всякия скорби, гнева и нужды Господу помолимся.
Народ: Господи, помилуй.
Заступи, спаси, помилуй и сохрани нас, Боже, Твоею благодатию.
Народ: Господи, помилуй.
Пресвятую, пречистую, преблагословенную, славную владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Народ: Тебе, Господи.
Молитва приношения, по поставлении божественных даров на святей трапезе:
Господи Боже Вседержителю, едине святе, приемляй жертву хваления от призывающих Тя всем сердцем, приими и нас, грешных, моления, и принеси ко святому Твоему жертвеннику, и удовли нас приносити Тебе дары же и жертвы духовныя о наших гресех и о людских неведениих: и сподоби нас обрести благодать пред Тобою, еже быти Тебе благоприятней жертве нашей, и вселитися духу благодати Твоея благому в нас, и на предлежащих дарех сих, и на всех людех Твоих.
Возглашение:
Щедротами единороднаго Сына Твоего, с нимже благословен еси, со пресвятым и благим и животворящим Твоим Духом, ныне, и присно, и во веки веков.
Народ: Аминь.
Иерей: Мир всем.
Народ: И духови твоему.
Иерей:
Возлюбим друг друга, да единомыслием исповемы.
Народ:
Отца и Сына и святого Духа, Троицу Единосущную и Нераздельную.
И священник покланяется трижды, глаголя тайно:
Возлюблю Тя, Господи, крепосте моя. Господь утверждение мое и прибежище мое. Трижды. И целует первее верху святаго дискоса, таже верху святаго потира, и край святыя трапезы пред собою. Аще же будут священников два, или множае, то и они целуют святая вси, и друг друга в рамена.
Настоятель же глаголет:
Христос посреде нас.
Народ:
И есть, и будет.
Иерей: Двери, двери, премудростию вонмем.
Священник же воздвизает воздух, и держит над святыми дарми. Аще же инии будут священницы служащии, такожде воздвизают святый воздух, и держат над святыми дарми, потрясающе, и глаголюще в себе, якоже и людие, исповедание веры.
Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына божия, единороднаго, Иже от Отца рожденнаго прежде всех век. Света от света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже царствию не будет конца. И в Духа святаго, Господа, животворящаго, иже от Отца исходящаго, иже со Отцем и Сыном спокланяема и сславима, глаголавшаго пророки. Во едину, святую, соборную и апостольскую Церковь. Исповедую едино крещение во оставление грехов. Чаю воскресения мертвых: И жизни будущаго века. Аминь.
Иерей: Станем добре, станем со страхом, вонмем, святое возношение в мире приносити.
Народ: Милость мира, жертву хваления.
Иерей:
Благодать Господа нашего Иисуса Христа, и любы Бога и Отца, и причастие святаго Духа буди со всеми вами.
Народ: И со духом твоим.
Священник, обращься к востоку:
Горе имеим сердца.
Народ: Имамы ко Господу.
Священник:
Благодарим Господа.
Народ: Достойно и праведно есть поклонятися Отцу и Сыну и святому Духу, Троице единосущней и нераздельней.
Священник же молится:
Достойно и праведно Тя пети, Тя благословити, Тя хвалити, Тя благодарити, Тебе покланятися на всяком месте владычествия Твоего: Ты бо еси Бог неизреченен, недоведом, невидим, непостижим, присно сый, такожде сый, Ты, и единородный Твой Сын, и Дух Твой святый: Ты от небытия в бытие нас привел еси, и отпадшыя возставил еси паки, и не отступил еси, вся творя, дондеже нас на небо возвел еси, и царство Твое даровал еси будущее. О сих всех благодарим Тя, и единороднаго Твоего Сына, и Духа Твоего cвятаго, о всех, их же вемы и их же не вемы, явленных и неявленных благодеяниих бывших на нас. Благодарим Тя и о службе сей, юже от рук наших прияти изволил еси, аще и предстоят Тебе тысящы архангелов и тьмы ангелов, херувимы и серафимы, шестокрилатии, многоочитии, возвышающиися пернатии
И, приим святую звездицу от святаго дискоса, творит креста образ верху его, и целовав ю, полагает.
Возглашение:
Победную песнь поюще, вопиюще, взывающе и глаголюще.
Народ: Свят, cвят, cвят Господь cаваоф, исполнь небо и земля славы Твоея: осанна в вышних, благословен грядый во имя Господне, осанна в вышних.
Священник молится: С сими и мы блаженными силами, Владыко человеколюбче, вопием и глаголем: свят еси и пресвят Ты и единородный Твой Сын, и Дух Твой святый: свят еси и пресвят, и великолепна слава Твоя, иже мир Твой тако возлюбил еси, якоже Сына Твоего [90] единороднаго дати, да всяк веруяй в Него не погибнет, но имать живот вечный: иже пришед, и все еже о нас смотрение исполнив, в нощь, в нюже предаяшеся, паче же сам себе предаяше за мирский живот, прием хлеб во святыя своя и пречистыя и непорочныя руки, благодарив и благословив, освятив, преломив, даде святым своим учеником и апостолом, рек:
Возглашение:
Приимите, ядите, сие есть тело мое, еже за вы ломимое, во оставление грехов.
Народ: Аминь.
Священник:
Подобно и чашу по вечери, глаголя:
Возглашение:
Пийте от нея вси, сия есть кровь моя новаго завета, яже за вы и за многи изливаемая во оставление грехов.
Народ: Аминь.
Священник молится:
Поминающе убо спасительную сию заповедь, и вся, яже о нас бывшая: крест, гроб, тридневное воскресение, на небеса восхождение, одесную седение, второе и славное паки пришествие.
Возглашение:
Твоя от Твоих Тебе приносяще о всех и за вся.
Народ: Тебе поем, Тебе благословим, Тебе благодарим, Господи, и молимтися, Боже наш.
Священник же молится:
Еще приносим Ти словесную сию и безкровную службу, и просим, и молим, и милися деем: низпосли Духа Твоего святаго на ны и на предлежащыя дары сия.
[Трижды молитвы призывания Святого Духа, которые не читаются в православных церквах других, кроме России, стран, и которые я иногда не читаю:]
Священник:
Господи, иже пресвятаго Твоего Духа в третий час апостолом Твоим низпославый, того, Благий, не отими от нас, но обнови нас, молящихтися.
стих:
Сердце чисто созижди во мне, Боже, и дух прав обнови во утробе моей.
Паки священник:
Господи, иже пресвятаго Твоего Духа:
стих:
Не отвержи мене от Лица Твоего и Духа Твоего святаго не отими от мене.
И паки священник:
Господи, иже пресвятаго Твоего Духа:
Священник же восклонься знаменует святый хлеб, глаголя:
И сотвори убо хлеб сей, честное Тело Христа Твоего. Аминь.
И священник благословляя глаголет:
А еже в чаши сей, честную кровь Христа Твоего. Аминь.
Священник же, благословляя обоя святая, глаголет:
Преложив Духом Твоим святым. Аминь, аминь, аминь.
Священник же молится:
Якоже быти причащающымся, во трезвение души, во оставление грехов, в приобщение святаго Твоего Духа, во исполнение царствия небеснаго, в дерзновение еже к Тебе, не в суд или во осуждение.
Еще приносим Ти словесную сию службу о иже в вере почивших праотцех, отцех, патриарсех, пророцех, апостолех, проповедницех, евангелистех, мученицех, исповедницех, воздержницех, и о всяком дусе праведнем, в вере скончавшемся.
И прием кадило, священник возглашает:
Изрядно о пресвятей, пречистей, преблагословенной, славней Владычице нашей Богородице и приснодеве Марии.
И кадит пред святою трапезою трижды.
Народ:
Достойно есть, яко воистину блажити Тя, Богородицу, присноблаженную и пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу Тя величаем.
Или вместо этого поется ирмос с припевом праздника.
Священник же молится:
О святем Иоанне пророце, предтечи и крестители, о святых славных и всехвальных апостолех, о святом имя рек, егоже и память совершаем, и о всех святых Твоих, их же молитвами посети нас, Боже.
И поминает, ихже хощет, усопших по именом.
И упокой их, идеже присещает свет лица Твоего.
Еще молим Тя, помяни, Господи, всякое епископство православных, право правящих слово Твоея истины, всякое пресвитерство, во Христе диаконство, и всякий священнический чин.
Еще приносим Ти словесную сию службу о вселенней, о святей соборней и апостольстей Церкви, о предержащих властех наших, да и мы в тишине тихое и безмолвное житие поживем, во всяком благочестии и чистоте.
И по пении стиха, священник возглашает:
В первых помяни, Господи, господина всесвятейшего патриарха Варфоломея, преосвященнейшего епископа Игоря, митрополита Антония, их же даруй святым Твоим церквам в мире, целых, честных, здравых, долгоденствующих, право правящих слово Твоея истины.
Народ:И всех и вся.
Священник молится:
Помяни, Господи, град сей, в нем же живем, и всякий град и страну и верою живущих в них. Помяни, Господи, плавающих, путешествующих, недугующих, страждущих, плененных, и спасение их. Помяни, Господи, плодоносящих и добротворящих во святых Твоих церквах, и поминающих убогия, и на вся ны милости Твоя низпосли.
И поминает по именом, ихже хощет, живых.
Возглашение:
И даждь нам единеми усты и единем сердцем славити и воспевати пречестное и великолепое имя Твое, Отца и Сына и святаго Духа, ныне и присно, и во веки веков.
Народ: Аминь.
И да будут милости великаго Бога и Спаса нашего Иисуса Христа со всеми вами.
Народ: И со духом твоим.
Иерей:
Вся святыя помянувше, паки и паки миром Господу помолимся.
Народ: Господи, помилуй.
О принесенных и освященных Честных Дарех Господу помолимся.
Народ: Господи, помилуй.
Священник же молится:
Дне всего совершенна, свята, мирна и безгрешна у Господа просим.
Народ: Подай, Господи.
Ангела мирна, верна наставника, хранителя душ и телес наших у Господа просим.
Народ: Подай, Господи.
Прощения и оставления грехов и прегрешений наших у Господа просим.
Народ: Подай, Господи.
Добрых и полезных душам нашим и мира мирови, у Господа просим.
Народ: Подай, Господи.
Прочее время живота нашего в мире и покаянии скончати, у Господа просим.
Народ: Подай, Господи.
Христианския кончины живота нашего, безболезненны, непостыдны, мирны и добраго ответа на страшнем судищи Христове, просим.
Народ: Подай, Господи.
Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.
Народ: Тебе, Господи.
Священник молится: Тебе предлагаем живот наш весь и надежду, Владыко человеколюбче, и просим, и молим, и мили ся деем: сподоби нас причаститися небесных Твоих и страшных таин, сея священные и духовныя трапезы, с чистою совестию, во оставление грехов, в прощение согрешений, во общение Духа cвятаго, в наследие царствия небеснаго, в дерзновение еже к Тебе, не в суд или во осуждение.
Возглашение:
И сподоби нас, Владыко, со дерзновением, неосужденно смети призывати Тебе, небеснаго Бога Отца, и глаголати.
Людие:
Отче наш, Иже еси на небесех, да святится имя Твое, да приидет Царствие Твое: да будет воля Твоя, яко на небеси и на земли. Хлеб наш насущный даждь нам днесь: и остави нам долги наша, якоже и мы оставляем должником нашим: и не введи нас во искушение, но избави нас от лукаваго.
Священник:
Яко Твое есть царство, и сила, и слава, Отца, и Сына, и святаго Духа, ныне и присно, и во веки веков.
Народ: Аминь.
Священник: Мир всем.
Народ: И духови твоему.
Иерей:
Главы ваша Господеви приклоните.
Народ: Тебе, Господи.
Священник молится:
Благодарим Тя, царю невидимый, иже неисчетною Твоею силою вся содетельствовал еси, и множеством милости Твоея от небытия в бытие вся привел еси. Сам, Владыко, с небесе призри на подклоньшыя Тебе главы своя: не бо подклониша плоти и крови, но Тебе страшному Богу. Ты убо, Владыко, предлежащая всем нам во благое изравняй, по коегождо своей потребе: плавающым сплавай, путешествующим спутешествуй, недугующыя исцели, врачу душ и телес.
Возглашение:
Благодатию, и щедротами, и человеколюбием единороднаго Сына Твоего, с нимже благословен еси, со пресвятым и благим и животворящим Твоим Духом, ныне, и присно, и во веки веков.
Народ: Аминь.
Священник же молится:
Вонми, Господи Иисусе Христе, Боже наш, от святаго жилища Твоего и от престола славы царствия Твоего, и прииди во еже освятити нас, иже горе со Отцем седяй, и зде нам невидимо спребываяй: и сподоби державною Твоею рукою преподати нам пречистое тело Твое и честную кровь, и нами всем людем.
Таже покланяется священник, подобне и диакон, на немже стоит месте, глаголюще тайно, трижды:
Боже, очисти мя, грешного, и помилуй мя.
Вонмем.
Священник же, вознося святый хлеб, возглашает:
Святая святым.
Народ:
Един свят, един Господь Иисус Христос, во славу Бога Отца. Аминь.
Священник же, разрезая на четыре части со вниманием и благоговением, глаголет:
Раздробляется и разделяется агнец божий, раздробляемый и неразделяемый, всегда ядомый и никогдаже иждиваемый, но причащающыяся освящаяй.
Священник же, взем горе лежащую частицу, яже Иисус, творит с нею крест верху святаго потира, глаголя:
Исполнение Духа святаго.
И тако влагает во святый потир. Священник же благословляет теплоту, глаголя:
Благословенна теплота святых Твоих, всегда, ныне и присно, и во веки веков. Аминь.
И вливает мало, крестообразно, внутрь святаго потира, глаголя:
Теплота веры, исполнь Духа святаго. Аминь.
Подобне взем и священник едину частицу святаго хлеба, глаголет:
Честное и пресвятое Тело Господа и Бога и Спаса нашего Иисуса Христа преподается мне, имя рек, священнику, во оставление грехов моих и в жизнь вечную.
И приклонив главу, молится, глаголя:
Верую, Господи, и исповедую, яко Ты еси воистину Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть cамое пречистое тело Твое и cия есть cамая честная кровь Твоя. Молюся убо Тебе: помилуй мя, и прости ми прегрешения моя, вольная и невольная, яже словом, яже делом, яже ведением и неведением: и сподоби мя неосужденно причаститися пречистых Твоих таинств, во оставление грехов и в жизнь вечную. Аминь.
Таже:
Вечери Твоея тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем. [115]
Да не в суд или во осуждение будет мне причащение cвятых Твоих таин, Господи, но во исцеление души и тела.
Таже священник восклонься приемлет обема руками с покровцем святый потир и причащается трижды из него, глаголя:
Честныя и святыя крове Господа Бога и Спаса нашего Иисуса Христа причащаюся аз, раб Божий, священник имя рек во оставление грехов моих и в жизнь вечную. Аминь.
И тако свои устне и край святаго потира в руку держимым платом отер, глаголет:
Се прикоснуся устнам моим, и отимет беззакония моя, и грехи моя очистит.
Священник:
Со страхом Божиим и верою приступите.
Народ:
Благословен грядый во имя Господне, Бог Господь и явися нам.
Таже приступают хотящии причащатися.
Священник же, причащая его, глаголет:
Причащается раб божий (раба божия) имя рек, честнаго и святаго тела и крове Господа и Бога и Спаса нашего Иисуса Христа, во оставление грехов своих и в жизнь вечную.
После причащения:
Светися, светися, новый Иерусалиме, слава бо Господня на тебе возсия. Ликуй ныне и веселися, Сионе: ты же, чистая красуйся, Богородице, о востании рождества твоего.
О Пасха велия и священнейшая, Христе! О мудросте, и слове божий, и сило! Подавай нам истее Тебе причащатися в невечернем дни царствия Твоего.
Священник же благословляет люди, возглашая:
Спаси, Боже, люди Твоя и благослови достояние Твое.
И обращается священник к святей трапезе и кадит трижды, глаголя в себе:
Вознесися на небеса, Боже, и по всей земли слава Твоя.
Лик же поет:
Видехом свет истинный, прияхом Духа небесного, обретохом веру истинную, нераздельней Троице поклоняемся: та бо нас спасла есть.
Иерей берет святой Потир:
Благословен Бог наш.
И возгласно:
Всегда, ныне, и присно, и во веки веков.
И отходит ко святому предложению и поставляет тамо святая.
Народ: Аминь.
Да исполнятся уста наша хваления Твоего, Господи, яко да поем славу Твою, яко сподобил еси нас причаститися cвятым Твоим, божественным, безсмертным и животворящим тайнам: соблюди нас во Твоей святыни, весь день поучатися правде Твоей. Аллилуиа, аллилуиа, аллилуиа.
Иерей: Прости приимше божественных, святых, пречистых, безсмертных, небесных и животворящих, страшных Христовых таин, достойно благодарим Господа.
Народ: Господи, помилуй.
Заступи, спаси, помилуй и сохрани нас, Боже, Твоею благодатию.
Народ: Господи, помилуй.
День весь совершен, свят, мирен и безгрешен испросивше, са- [123] ми себе, и друг друга, и весь живот наш Христу Богу предадим.
Народ: Тебе, Господи.
Молитва благодарения.
Благодарим Тя, Владыко человеколюбче, благодетелю душ наших, яко и в настоящий день сподобил еси нас небесных Твоих и безсмертных таинств. Исправи наш путь, утверди ны во страсе Твоем вся, соблюди наш живот, утверди наша стопы, молитвами и моленьми славныя Богородицы и приснодевы Марии, и всех святых Твоих.
Иерей же, согнув антиминс и прямо держа святое евангелие, творит над ним крест. Возглашает:
Яко Ты еси освящение наше, и Тебе славу возсылаем, Отцу, и Сыну, и святому Духу, ныне, и присно, и во веки веков.
Народ: Аминь.
Иерей: С миром изыдем.
Народ: О имени Господни.
Диакон: Господу помолимся.
Народ: Господи, помилуй.
Молитва заамвонная возгласно:
Благословляяй благословящыя Тя, Господи, и освящаяй на Тя уповающыя, спаси люди Твоя и благослови достояние Твое, исполнение Церкве Твоея сохрани, освяти любящыя благолепие дому Твоего: Ты тех возпрослави Божественною Твоею силою, и не остави нас, уповающих на Тя. Мир мiрови Твоему даруй, Церквам Твоим, и всем людем Твоим. Яко всякое даяние благо, и всяк дар совершен свыше есть, сходяй от Тебе, Отца светов, и Тебе славу, и благодарение, и поклонение возсылаем, Отцу, и Сыну, и святому Духу ныне и присно, и во веки веков.
Народ: Аминь. Буди имя Господне благословенно отныне и до века трижды.
И псалом 33: Благословлю Господа на всякое время, / выну хвала его во устех моих. О Господе похвалится душа моя: / да услышат кротцыи и возвеселятся. Возвеличите Господа со мною, / и вознесем имя его вкупе. Взысках Господа, и услыша мя / и от всех скорбей моих избави мя. Приступите к нему и просветитеся, / и лица ваша не постыдятся. Сей нищий воззва, и Господь услыша и, / и от всех скорбей его спасе и. Ополчится ангел Господень окрест боящихся его / и избавит их. Вкусите и видите, яко благ Господь: / блажен муж, иже уповает нань. Удержи язык твой от зла / и устне твои, еже не глаголати льсти. Уклонися от зла и сотвори благо: / взыщи мира и пожени и.
Иерей:
Благословение Господне на вас, Того благодатию и человеколюбием, всегда, ныне, и присно, и во веки веков.
Народ: Аминь.
Священник: Слава Тебе, Христе Боже, Упование наше, слава Тебе
Народ: Слава, и ныне: Господи, помилуй, трижды. Благослови.
Священник:
Христос, истинный Бог наш, молитвами Пречистыя Своей Матере (и прочая), иже во святых отца нашего Иоанна, архиепископа Константина града, Златоустаго: и святаго имя рек, егоже есть храм, и егоже есть день: и всех святых, помилует и спасет нас, яко благ и человеколюбец.
Лик многолетие.