Песнь 1: Яко по суху пешешествовав Израиль по бездне стопами, гонителя фараона, видя потопляема. Богу победную песнь поим, вопияше.
Слава, Господи, святому Воскресению Твоему!
Тропари: Распростертыма дланьма на Кресте, отеческаго исполнил еси благоволения, благий Иисусе, всяческая. Темже победную песнь Тебе вси поим.
Слава, Господи, святому Воскресению Твоему!
Страхом к Тебе, яко рабыня, смерть повелена (как ей было приказано) приступи Владыце живота, тою (чрез нее) Подающему нам безконечный живот и воскресение.
Пресвятая Богородице, спаси нас!
Богородичен: Своего приемши Содетеля, яко Сам восхоте, от безсеменнаго Твоего чрева, паче ума воплощаема, Чистая, тварей воистинну явилася еси Владычица.
Хор (катавасия 1-я): Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою радуяся Тоя чудеса.
Ирмос 3
Хор: Несть свят, якоже Ты, Господи, Боже мой, вознесый рог верных Твоих, Блаже, и утвердивый нас на камени исповедания Твоего.
Чтец: Слава, Господи, святому Воскресению Твоему!
Тропари: Бога распинаема плотию зрящи тварь растаявашеся страхом: но содержительною дланию нас ради Распятаго, крепко держима бе.
Слава, Господи, святому Воскресению Твоему!
Смертию смерть разорена лежит окаянная без дыхания: живота бо не терпящи Божественнаго приражения, умерщвляется крепкий и даруется всем воскресение.
Пресвятая Богородице, спаси нас!
Богородичен: Божественнаго рождества Твоего, Чистая, всякий естества чин превосходит чудо: Бога бо преестественне зачала еси во чреве, и рождши пребываеши присно Дева.
Хор (катавасия 3-я): Твоя песнословцы, Богородице, живый и независтный (неисчерпаемый) источниче, лик себе совокупльшия, духовно утверди, в Божественней Твоей славе венцев славы сподоби.
Яко Ты еси Бог наш, и Тебе славу возсылаем, Отцу и Сыну и Святому Духу, ныне и присно и во веки веков.
Хор: Аминь.
Седален, глас 6:
Чтец: Владыко, Боже, призри с небесе, и виждь наше смирение, яко Щедр, и умилосердися, яко Человеколюбче Преблагий: ни откуду бо надеемся прощение получити злых, ими же согрешихом. Тем же буди с нами, и никтоже на ны!
Ирмос 4
Хор: Христос моя сила, Бог и Господь, Честная Церковь боголепно поет, взывающи, от смысла чиста (ясного сознания) о Господе празднующи.
Чтец: Слава, Господи, святому Воскресению Твоему!
Тропари: Древо процвело есть, Христе, истинныя жизни: Крест бо водрузися, и напоен быв кровию и водою от нетленнаго Твоего ребра, живот нам прозябе.
Слава, Господи, святому Воскресению Твоему!
Не ктому змий мне ложне обожение подлагает: Христос бо, Богоделатель человеческаго естества, ныне невозбранно стезю живота мне отверзе.
Пресвятая Богородице, спаси нас!
Богородичен: Яко воистинну неизвещанна и непостижима, яже Твоего боголепнаго, Богородице, суть рождества, сущим на земли и на небеси, Приснодево, таинства.
Хор (катавасия 4-я): Седяй в славе на престоле Божества, во облаце легце прииде Иисус Пребожественный, (носимый) нетленною дланию, и спасе зовущия: слава силе Твоей, Господи!
Ирмос 5
Хор: Божиим светом Твоим, Блаже, утреннюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Чтец: Слава, Господи, святому Воскресению Твоему!
Тропари: Уступают мне Херувими ныне и пламенное оружие, Владыко, плещы (плечи) мне дает, Тя видевше, Слове Божий, истиннаго Бога, разбойнику путь сотворшаго в рай.
Слава, Господи, святому Воскресению Твоему!
Не ктому боюся, еже в землю, Владыко Христе, возвращения: Ты бо от земли мя возвел еси забвенна, благоутробия ради многаго, к высоте нетления воскресением Твоим.
Пресвятая Богородице, спаси нас!
Богородичен: Иже Богородицу Тя от души, Владычице мира Благая, исповедающих спаси: Тебе бо предстательство непоборимое имамы, истинную Богородительницу.
Хор (катавасия 5-я): Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.
Ирмос 6
Хор: Житейское море, воздвизаемое зря (видя) напастей бурею, к тихому пристанищу Твоему притек, вопию Ти: возведи от тли живот мой, Многомилостиве!
Чтец: Слава, Господи, святому Воскресению Твоему!
Тропари: Распинаемь, Владыко, гвоздьми убо клятву, юже на нас, потребил еси; копием же прободаемь в ребро, Адамово рукописание растерзав, мир свободил еси.
Слава, Господи, святому Воскресению Твоему!
Адам низведеся, лестию запят быв во адове пропасти: но Иже естеством Бог же и Милостив, сшел еси на взыскание, и на раму (плечах) понес, совоскресил еси.
Пресвятая Богородице, спаси нас!
Богородичен: Пречистая Владычице, рождшая человеком кормчию (-аго) Господа, страстей моих непостоянное и лютое утоли смущение, и тишину подаждь сердцу моему.
Хор (катавасия 6-я): Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.
Яко Ты еси Бог наш, и Тебе славу возсылаем, Отцу и Сыну и Святому Духу, ныне и присно и во веки веков.
Хор: Аминь.
Кондак: Живоначальною дланию умершыя от мрачных удолий, Жизнодавец воскресив всех, Христос Бог воскресение подаде человеческому роду: есть бо всех Спаситель, Воскресение и Живот и Бог всех.
Икос: Крест и погребение Твое, Жизнодавче, воспеваем, вернии, и покланяемся, яко ад связал еси, Безсмертне, яко Бог всесильный, и мертвыя совоскресил еси, и врата смертная сокрушил еси, и державу адову низложил еси, яко Бог. Тем же, земнороднии, славословим Тя любовию, воскресшаго и низложившаго вражию державу всепагубную, и всех воскресившаго в Тя веровавших, и мир избавльшаго от стрел змииных, и от прелести вражия, яко Бог всех.
Песнь 7: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси Боже отец наших.
Слава, Господи, святому Воскресению Твоему!
Тропари: Рыдающее во страсти Твоей солнце во мрак облечеся, и во дни по всей, Владыко, земли свет померче, вопия: благословен еси. Боже отец наших!
Слава, Господи, святому Воскресению Твоему!
Облекошася, Христе, схождением Твоим во свет преисподняя, праотец же веселия исполнь явися ликовствуя, взыграся вопия: благословен еси, Боже отец наших!
Пресвятая Богородице, спаси нас!
Богородичен: Тобою, Мати Дево, Свет возсия всей вселенней светлый: Зиждителя бо Ты всех родила еси Бога. Его же проси, Всечистая, нам низпослати, верным, велию милость.
Хор (катавасия 7-я): Не послужиша твари богомудрии паче (вместо) Создавшаго, но огненное прещение (угрозу) мужески поправше, радовахуся поюще: препетый отцев Господь и Бог, благословен еси!
Ирмос 8
Хор: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Чтец: Слава, Господи, святому Воскресению Твоему!
Тропари: Иудейския древле пророкоубийцы люди, богоубийцы зависть ныне содела, Тебе на Крест вознесшия, Слове Божий: Его же превозносим во вся веки.
Слава, Господи, святому Воскресению Твоему!
Небеснаго круга не оставил еси и, во ад сошед, всего совоздвигл еси лежащаго во гноищи, Христе, человека, Тя превозносяща во вся веки.
Пресвятая Богородице, спаси нас!
Богородичен: От Света Светодавца Слова зачала еси и, рождши неизреченно Сего, прославилася еси: Дух бо в Тя, Отроковице, Божий вселися. Темже Тя поем во вся веки!
Чтец: Благословим Отца и Сына и Святаго Духа Господа.
Хор: Хвалим, благословим, покланяемся Господеви, поюще и превозносяще во вся веки.
Хор (катавасия 8-я): Отроки благочестивыя в пещи Рождество Богородичо спасло есть, тогда убо образуемое, ныне же деиствуемое, вселенную всю воздвизает пети Тебе: Господа пойте дела и превозносите во вся веки!
Богородицу и Матерь Света в песнех возвеличим!
Величит душа Моя Господа, и возрадовася дух Мой о Бозе, Спасе Моем. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем! (То же повторяется по окончании каждого следующего стиха.) Яко призре на смирение рабы Своея, се бо отныне ублажат Мя вси роди. Яко сотвори Мне величие Сильный и, свято имя Его, и милость Его в роды родов боящимся Его. Сотвори державу мышцею Своею, расточи гордыя мыслию сердца их. Низложи сильныя со престол, и вознесе смиренныя; алчущия исполни благ и богатящияся отпусти тщи. Восприят Израиля, отрока Своего, помянути милости, якоже глагола ко отцем нашим, Аврааму и семени его даже до века.
Ирмос 9
Хор: Бога человеком не возможно видети, на Него же не смеют чини Ангельстии взирати: Тобою же, Всечистая, явися человеком Слово воплощенно, Его же величающе, с небесными вой Тя ублажаем.
Чтец: Слава, Господи, святому Воскресению Твоему!
Тропари: Страстей непричастен Ты пребыл еси (по Божеству), Слове Божий, плотию приобщився страстем: но решиши от страстей человека, страстем быв страсть, Спасе наш: Един бо еси безстрастен и всесилен!
Слава, Господи, святому Воскресению Твоему!
Тлю смертную прием, тления соблюл еси тело Твое невкусно (непричастно), Твоя же животворящая и Божественная, Владыко, душа во аде не оставлена бысть: но яко же от сна воскрес, нас совоздвигл еси.
Пресвятая Троице, Боже наш, слава Тебе!
Троичен: Бога Отца, Сына Собезначальна, вси человецы устнами убо чистыми славим, неизреченную же и преславную Духа Всесвятаго силу чтим: Едина бо еси всесильная Троица неразлучная.
Хор (катавасия 9-я): Всяк земнородный да взыграется Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная, Богородице чистая, Приснодево.