Содержание: Кресту. Рождеству Христову. Крещению. Иконе Знамения. Казанской иконе. "Не имамы." "К Богородице прилежно." "Предстательство христиан." Тропарь и Кондак Покрова. Новомученикам Российским. Царской семье. Равноапостольной Нине. Блаженной Ксении Петербургской. Великомученику Георгию. Мученице Александре. Апостолу Иоанну Богослову. Святым Кириллу и Мефодию. Равноапостольным царям Константину и Елене. Рождеству Иоанна Предтечи. Апостолам Петру и Павлу. Святителю Иоанну Шанхайскому. Равноапостольной княгине Ольге. Равноапостольному князю Владимиру. Святому Серафиму Саровскому. Пророку Илии. Равноапостольной Марие Магдалине. Великомученику Пантелеймону. Благоверному князю Александру Невскому. Преподобному Сергию Радонежскому. Преподобному Роману Сладкопевцу. Праведному отцу Иоанну Кронштадтскому. Архангелу Михаилу. Апостолу Андрею Первозванному. Святителю Николаю Чудотворцу. Преподобному Герману Аляскинскому.
Глас 1-ый: Спаси Господи люди Твоя, / и благослови достояние Твое, / победы православным христианом / на сопротивныя даруя, / и Твое сохраняя // Крестом Твоим жительство.
Тропарь, глас 4-ый: Рождество Твое, Христе Боже наш, / возсия мирови свет разума: / в Нем бо звездам служащии / звездою учахуся / Тебе кланятися, Солнцу правды, / и Тебе ведети с высоты Востока: // Господи, слава Тебе.
Кондак, глас 3-и: Дева днесь Пресущественнаго раждает, / и земля вертеп Неприступному приносит: / Ангели с пастырьми славословят, / волсви же со звездою путешествуют, // нас бо ради родися Отроча младо, Превечный Бог.
Глас 1-ый: Во Иордане крещающуся Тебе, Господи, / Тройческое явися поклонение: / Родителев бо глас свидетельствоваше Тебе, / возлюбленнаго Тя Сына именуя: / и Дух в виде голубине, / извествоваше словесе утверждение. / Явлейся, Христе Боже, // и мир просвещей, слава Тебе.
Глас 4-ый: Яко необоримую стену / и источник чудес / стяжавше Тя раби Твои, Богородице Пречистая / сопротивных ополчения незлагаем. / Темже молим Тя / мир отечеству нашему даруй // и душам нашим велию милость.
Глас 4-ый: Заступнице усердная, / мати Господа вышняго / за всех молиши Сына Твоего Христа Бога нашего, / и всем твориши спастися, в державный Твой покров прибегающим / всех нас заступи, / о Госпоже, Царице и Владычице, иже в напастех и в скорбех и в болезнех обремененных грехи многими, / предстоящих и молящихся Тебе умиленною душею и сокрушенным сердем пред пречистым Твоим образом со слезами, / и невозвратно надежду имущих на Тя, / избавления всех зол, / всем полезная даруй, / и вся спаси, Богородице Дево, // Ты бо еси божественный покров рабом Твоим.
Кондак, глас 6-ый: Не имамы иныя помощи, / не имамы иныя надежды, / разве Тебе, Владычице / ты нам помози, / на Тебе надеемся / и Тобою хвалимся, / Твои бо есьмы раби, // да не постыдимся.
Глас 4-ый: К Богородице прилежно ныне притецем, / грешнии и смиреннии, и припадем, / в покаянии зовуще из глубины души / Владычице, помози, на ны милосердовавши. / Потщися, погибаем от множества прегрешений./ Не отврати Твоя раби тщи // Тя бо едину недежду имамы.
Глас 6-ый: Предстательство христиан непостыдное, / ходатайство ко Творцу непреложное, / не презри грешных молений гласы, / но предвари, яко Благая, на помощь нас, верно зовущих Ти / ускори на молитву и потщися на умоление // предстательствующи присно, Богородице, чтущих Тя.
Тропарь глас 4-ый: Днесь благовернии людие светло празднуем, / осеняеми Твоим Богомати пришествием, / и к Твоему взирающе пречистому образу, умильно глаголем: / покрый нас честным Твоим покровом / и избави нас от всякаго зла, / моляще Сына Твоего Христа Бога нашего, // спасти души наша.
Кондак, глас 3-ый. Дева днесь предстоит в церкви, / и с лики святых невидимо за ны молится Богу, ангели со архиереи поклоняются, / апостоли же со пророки ликовствуют: // нас бо ради молит Богородица Превечнаго Бога.
Глас 4-ый: Цвети российскаго луга духовнаго / в годину лютых гонений дивно процветшии / новомученицы и исповедницы бесчисленнии; / святителие, царственнии страстотерпцы и пастырие, / монаси и мирстии, мужие, жены же и дети, / добрый плод в терпении Христу принесшии, / молитеся Ему, яко насадителю вашему, / да избавит люди Своя от безбожных и злых, / да утверждается же Церковь Русская / кровьми и страданиями вашими // во спасение душ наших.
Глас 5-ый: Царства земнаго лишение / узы и страдания многоразличныя кротко претерпел еси / свидетельствовав о Христе даже до смерти от богоборцев / страстотерпче великий боговенчанный царю Николае. / Сего ради мученическим венцем на небесех / венча тя с царицею, и чады, и слуги твоими Христос Бог, / Егоже моли помиловати страну Российскую, // и спасти души наша.
Тропарь, глас 1-ый: Слова Божия служительнице, / во апостольстей проповеди подражая первозванному Андрею и прочим апостолом, / просветительнице Иверии, / и Духа Святаго цевнице, / святая равноапостольная Нино, // моли Христа Бога спастися душам нашим.
Блаженной Ксении Петербургской
Тропарь, глас 1-ый: Суеты земнаго мира отвергшися, / крест жития бездомнаго прияла еси. / Скорбей, лишений, людскаго осмеяния не убоялася еси, / любовь же Христову познала еси, / еюже ныне на небеси услаждаешися; // Ксение блаженная богомудрая, молися о спасении душ наших.
Тропарь, глас 4-ый: Яко пленных свободитель / и нищих защититель, / немощствующих врач, / царей поборниче, / победоносче великомучениче Георгие, / моли Христа Бога, // спастися душам нашим.
Тропарь, глас 4-ый: Агница Твоя, Иисусе, Александра, / зовет велиим гласом: / Тебе, Женише мой, люблю, / и Тебе ищущи страдальчествую, / и сраспинаюся, и спогребаюся крещению Твоему, / и стражду Тебе ради, яко да царствую в Тебе, / и умираю за Тя, да и живу с Тобою, / но яко жертву непорочную приими мя, с любовью пожершуюся Тебе: // тоя молитвами, яко милостив, спаси души наша.
Тропарь, глас 2-ый: Апостоле Христу Богу возлюбленне, / ускори избавити люди безответны, / приемлет тя припадающа, Иже падша на перси приемый. / Егоже моли Богослове, и надлежащую мглу языков разгнати, // прося нам мира и велия милости.
Тропарь, глас 4-ый: Яко апостолом единоравнии / и Словенских стран учителие, / Кирилле и Мефодие богомудрии, / Владыку всех молите, / вся языки словенския утвердити в Православии и единомыслии, / умирити мир, // и спасти души наша.
Константину и Елене
Тропарь, глас 8-ый: Креста Твоего образ на небеси видев, / и якоже Павел звание не от человек прием, / во царех апостол Твой, Господи, / царствующий град в руце Твоей положи. / Егоже спасай всегда в мире, // молитвами Богородицы, едине Человеколюбче.
Тропарь, глас 2-ый: Пророче и Предтече пришествия Христова, / достойно восхвалити тя недоумеем мы, / любовию чтущии тя: / неплодство бо рождшия и отчее безгласие разрешися, / славным твоим рождеством, // и воплощение Сына Божия мирови проповедуется.
Тропарь, глас 4-ый: Апостолов первопрестольницы, / и вселенныя учителие, / Владыку всех молите, / мир вселенней даровати, // и душам нашим велию милость.
Тропарь, глас 5-ый: Попечетие твое о пастве в странствии ея, / се прообраз и молитв твоих за весь мир присно возносимых; / тако веруем, познав любовь твою, святителю и чудотворче Иоанне! / Весь от Бога освящен священнодействием пречистых таин, / ими же присно укрепляем, / поспешал еси ко страждущим, / целителю отраднейший. // Поспеши и на помощь нам, всем сердцем чтущим тя.
Равноапостольной княгине Ольге
Тропарь, глас 1-ый: Крылами богоразумия вперивши твой ум, / возлетела еси превыше видимыя твари: / взыскавши Бога и Творца всяческих, / и Того обретши, паки рождение крещением прияла еси: / древа животнаго наслаждающися, // нетленна во веки пребываеши, Ольго приснославная.
Равноапостольному князю Владимиру
Тропарь, глас 4-ый: Уподобился еси купцу, ищущему добраго бисера, / славнодержавне Владимире, / на высоте стола седя матере градов, богоспасаемого Киева, / испытуя же и посылая к царскому граду уведети Православную веру, / обрел еси бесценный бисер Христа, / избравшаго тя яко втораго Павла / и отрясшаго слепоту во святей купели, душевную вкупе и телесную. / Темже празднуем твое успение людие твои суще. / Моли спастися стране твоей Российстей // и подати православным людем мир и велию милость.
Тропарь, глас 4-ый: От юности Христа возлюбил еси, блаженне, / и Тому единому работати пламенне вожделев, / непрестанною молитвою и трудом в пустыни подвизался еси, / умиленным же сердцем любовь Христову стяжав, / избранник возлюблен Божия Матере явился еси. / Сего ради вопием ти: // спасай нас молитвами твоими, Серафиме преподобне, отче наш.
Тропарь, глас 4-ый: Во плоти ангел, пророков основание, / вторый предтеча пришествия Христова, Илия славный, / свыше пославый Елисееви благодать, / недуги отгоняти и прокаженныя очищати: // тем же и почитающим его точит исцеления.
Равноапостольной Марие Магдалине
Тропарь, глас 1-ый: Христу нас ради от Девы рождшемуся, / честная Магдалина Мария последовала еси, / Того оправдания и законы хранящи: / темже днесь всесвятую твою память празднующе, // грехов разрешение молитвами твоими приемлем.
Великомученику и целителю Пантелеимону
Тропарь, глас 3-ий: Страстотерпче святый и целебниче Пантелеимоне, / моли милостиваго Бога, / да прегрешений оставление // подаст душам нашим.
Благоверному князю Александру Невскому
Тропарь, глас 4-ый: Познай свою братию, российский Иосифе, / не в Египте, но на небеси царствующий, / благоверне княже Александре, / и приими моления их, / умножая жита людем плодоносием земли твоея, / грады владычествия твоего ограждая молением, // и наследником твоим благоверным людем на сопротивныя споборствуй.
Преподобному Сергию Радонежскому
Тропарь, глас 4-ый: Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же и пощениих, образ быв твоим учеником: / темже и вселися в тя Пресвятый Дух, / Его же действием светло украшен еси. / Но яко имея дерзновение ко Святей Троице, / поминай стадо, еже собрал еси мудре: / и не забуди, якоже обещался еси, / посещая чад твоих, // Сергие Преподобне, отче наш.
Преподобному Роману Сладкопевцу
Тропарь, глас 8-ый: В тебе отче известно спасеся еже по образу: / приим бо крест последовал еси Христу, / и дея учил еси презирати убо плоть, преходит бо: / прилежати же о души, вещи безсмертней. // Темже и со ангелы срадуется, преподобне Романе, дух твой.
Праведному отцу Иоанну Кронштадтскому
Тропарь, глас 4-ый: Во Христе во веки живый, чудотворче, / любовию милуяй сущия в бедах. / Слыши чада твоя, верою тя призывающия, / щедрыя помощи от тебе чающия, // Иоанне Кронштадтский, возлюблене пастырю наш.
Кондак, глас 4-ый: От младенчества Богом избранный, / и во отрочестве дар учения чудесно от Него приемый, / и к пресвитерству в сонном видении преславно призван быв, / пастырь дивный Церкве Христовы явился еси, / отче Иоанне, благодати тезоимените. / Моли Христа Бога // всем нам с тобою в Царствии Божием быти.
Тропарь, глас 4-ый: Небесных воинств архирстратиже, / молим тя присно мы недостойнии, / да твоими молитвами оградиши нас / кровом крил невещественныя твоея славы, / сохраняюще ны припадающыя прилежно, и вопиющыя: / от бед избави ны, // яко чиноначальниче вышних сил.
Тропарь, глас 4-ый: Яко Апостолов Первозванный, / и Верховнаго сущий брат, / Владыце всех Андрее молися, / мир вселенней даровати, // и душам нашим велию милость.
Тропарь, глас 4-ый: Правило веры и образ кротости, / воздержания учителя / яви тя стаду твоему, / яже вещей истина: / сего ради стяжал еси смирением высокая, / нищетою богатая. / Отче священноначальниче Николае, моли Христа Бога, // спастися душам нашим.
Преподобному Герману Аляскинскому
Тропарь, глас 4-ый: Пустыни северныя подвижниче / и о всем мире благодатный молитвенниче, / православныя веры обучителю и благочестия добрый наставниче, / Аляски украшение / и всея Америки радование. // Преподобне Германе, моли Христа Бога, да спасет души наша.