К оглавлению - Триодь постная.

Во Святый и Великий Вторник на Утрени,

Аллилуиа, на глас 8. Тропарь трижды: Се Жених грядет: писан в Понедельник Великий. И обычное стихословие.

По 1-м стихословии седален, глас 4.
Подобен: Вознесыйся на Крест:

Жениха братие возлюбим, свещи своя украсим, в добродетелех сияюще и вере правой: да яко мудрыя Господни девы готови внидем с Ним на браки: Жених бо дары, яко Бог всем подает нетленный венец.

Слава, и ныне, тойже.

По 2-м стихословии седален, глас 4.
Подобен: Удивися Иосиф:

Совет Спасе беззаконный на Тя, священницы и книжницы завистию собравше люте, в предательство подвигоша Иуду: темже безстудно исхождаше, глаголаше на Тя беззаконным людем: что ми, глаголет, дадите, и аз вам Его предам в руки ваша? Осуждения сего избави Господи, души наша.

Слава, и ныне, тойже.

По 3-м стихословии седален, глас 8.
Подобен: Премудрости:

Иуда разумом сребролюбствует, на Учителя враждебне подвизается, советует, поучается преданию, света отпадает, тьму приим, соглашает цену, продает Безценнаго: темже и удавление, возмездие еже содея, обретает окаянный, и лютую смерть, предав Тебе Господа. Того нас части избави Христе Боже, прегрешений оставление даруя, празднующим верою пречистую страсть Твою.

Слава, и ныне, тойже.

Таже, И о сподобитися нам: Евангелие от Матфеа, зачало 90 без преступки: Во время оно, совет приемше вси фарисее на Иисуса, яко да обольстят Его словом. Конец в зачале 96-м: Благословен Грядый во имя Господне. [Мф. 22, 15 - 23, 39.]

Посем псалом 50. Таже, Спаси, Боже, люди Твоя: Господи помилуй, 12. Посем ектениа малая.

Таже кондак, глас 2.
Подобен: Вышних ища:

Час душе конца помысливши, и посечения смоковницы убоявшися, данный тебе талант трудолюбно делай окаянная бодрствующи и зовущи: да не пребудем вне чертога Христова.

Икос: Что унываеши душе моя окаянная? Что мечтаеши безвременно попечения неполезная? Что упражняешися к мимотекущим? Последнейший час есть отселе, и разлучитися имамы от сущих зде. Дондеже время имаши, возникни зовущи: согреших Ти Спасе мой не посецы мене якоже неплодную смоковницу, но яко благоутробен Господи, ущедри со страхом зовущую: да не пребудем вне чертога Христова.

Синаксарь. Стихи:
Вторник величайший дев десять носит,
Победу носящих неумытнаго Владыки.

Во Святый и Великий Вторник, десяти дев притчи память творим: зане таковыя притчи, восходя во Иерусалим Господь, на страсть грядый, Своим глаголаше учеником: суть же притчи, яже и ко иудеем простираше. Десяти убо дев притчу на милостыню обращая рече, вкупе и уча, еже прежде конца всем готовым быти. Зане о девстве много тем сказоваше, и о скопцех: многую же и славу девство имать, велико бо есть яко воистинну. Но да не кто сие дело исправляя, небрежет о других, паче же о милостыни, еже свеща девства просвещается, вводит священное Евангелие притчу сию: и пять убо мудрых наричет, яко с девством и многий и богатый милостыни елей приложивших: и пять же буих, яко и тех девство убо имущих, милостыню же несравненну. Сего бо ради буия, зане большее исправивше, о меньшем же небрегоша, и ничтоже блудниц разнствоваху: яко они убо телесы, сия же имении побеждени быша. Нощи же настоящаго жития мимотекущей, воздремашася вся девы, сиесть, умроша: сон бо смерть глаголется. И спящим им, вопль посреди нощи бысть, и овы убо обильно елей приложившия, дверем отверзшимся, внидоша с Женихом. Буия же недовольный елей имущия, по сне искаху его. Но мудрыя хотевшия убо дати, не могшия же, прежде вшествия отвещаша глаголюще: еда когда не удовлеет нам и вамъ? Идите к продающим, сиесть, убогим, и купите: но неудобно, по смерти бо сие не возможно. Еже и о богатом и Лазаре показует Авраам, глаголя: нужда убо преходити отсюду тамо. Но буия пришедши непросвещены, сице вопиют, во врата ударяюще: Господи, Господи, отверзи нам. Сам же Господь Собою страшный оный ответ дает: отыдите, рек, не вем вас. Како бо аще увидите Жениха вена не имущия, милостыни самыя? Сего убо ради образа притча десяти дев, зде положена быти богоносными отцы учинися, наказующая нас присно бдети, и готовым быти к сретению истиннаго Жениха, благими деянии, паче же милостынею: зане безвестен день и час кончины: якоже и Иосифом целомудрие стяжати, и смоковницею присно плод духовный предлагати. Иже бо дело единое и пребольшее убо яве делает, о других же небрежет, паче же о милостыни, не входит со Христом в вечное упокоение, но возвращается вспять посрамлен. Ничтоже бо печальнейше, и срама исполненнейше, якоже девство побеждаемое имением. Но о Женише Христе, с мудрыми нас сочетай девами, и избранному Твоему сопричти стаду, и помилуй нас, аминь.

Таже двоепеснец, егоже краестрочие: {Трити те}, сиесть, во вторник же. Творение господина Космы, ирмос по дважды, стихи же на 12. Последи же ирмос, оба лика вкупе. Глас 2.

Песнь 8.

{Т} Ирмос: Велению мучителеву преподобнии трие отроцы не повинувщеся, в пещь ввержени, Бога исповедаху поюще: благословите дела Господня Господа.

{Р} Леность далече нас отвержим, и светлыми свещами безсмертнаго Жениха Христа пением усрящим, благословите, вопиюще, дела Господня Господа.

{I} Да удовлеет общительный души нашея елей в сосудех, яко да не на куплю положше время почестей, поем: благословите дела Господня Господа.

{Т} Талант елицы от Бога приясте, равносильную благодать, помощию давшаго Христа возрастите, поюще: благословите дела Господня Господа.

Хвалим, благословим:

И паки ирмос: Велению мучителеву:

Честнейшую не поем.

Песнь 9.

{H} Ирмос: Невместимаго Бога во чреве вместившая, и радость миру родившая, Тя поем Богородице Дево.

{Т} Учеником Благий, бдите, рекл еси, воньже час приидет Господь, не разумеете, отдати комуждо.

{Е} Во втором Твоем и страшном пришествии Владыко, десным овцам мя сопричти, прегрешений презрев моих множества.

И паки вместо, Достойна, ирмос: Невместимаго Бога:

Ексапостиларий, трижды:

Чертог Твой вижду, Спасе мой, украшенный, и одежды не имам, да вниду вонь: просвети одеяние души моея Светодавче, и спаси мя.

На хвалитех поставим стихов 4, и поем стихиры самогласны повторяюще, глас 1:

Во светлостех святых Твоих, како вниду недостойный? Аще бо дерзну совнити в чертог, одежда мя обличает, яко несть брачна, и связан извержен буду от ангелов. Очисти Господи, скверну души моея, и спаси мя яко Человеколюбец.

Глас 2: Душевною леностию воздремався, не стяжах Женише Христе, горяща светильника иже от добродетелей, и девам уподобихся буим, во время делания глумляся. Утробы щедрот Твоих не затвори мне Владыко, но оттряс мой омраченный сон, возстави, и с мудрыми введи девами в чертог Твой, идеже глас чистый празднующих, и вопиющих непрестанно: Господи слава Тебе.

Слава, и ныне, глас 4:

Скрывшаго талант осуждение слышавши, о душе не скрывай словесе Божия, возвещай чудеса Его, да умножающи дарование, внидеши в радость Господа твоего.

На стиховне стихиры самогласны, глас 6:

Приидите вернии, делаим усердно Владыце: подавает бо рабом богатство, и по равенству кийждо да многоусугубим благодати талант: ов убо мудрость да приносит делы благими, ов же службу светлости да совершает. Да приобщается же словом верный тайны ненаученному, и да расточает богатство убогим другий: сице бо заимованное многоусугубим, и яко строителие вернии благодати, Владычния радости сподобимся. Тоя нас сподоби, Христе Боже, яко Человеколюбец.

Стих: Исполнихомся заутра милости Твоея Господи:

Егда приидеши во славе со ангельскими силами, и сядеши на престоле, Иисусе, разсуждения, да мя Пастырю Благий не разлучиши: пути бо десныя веси, развращени же суть шуии. Да не убо с козлищи грубаго мя грехом погубиши: но десным мя сочетав овцам, спаси яко Человеколюбец.

Стих: И буди светлость Господа Бога нашего на нас:

Женише, добротою красный паче всех человек, призвавый нас к трапезе духовней чертога Твоего, нелепый мой зрак прегрешений совлецы причастием страданий Твоих, и одеждею славы украсив Твоея красоты сообедника светла мя покажи Твоего Царствия, яко Милосерд.

Слава, и ныне глас 7:

Се тебе талант Владыка вверяет душе моя, страхом приими дар, заимствуй давшему, раздавай нищим, и стяжи друга Господа, да станеши одесную Его, егда приидет во славе, и услышиши блаженный глас: вниди рабе в радость Господа твоего. Тоя достойна мя сотвори Спасе, заблудившаго, великия ради Твоея милости.

И прочее последование яко обычно.

Часы со обычным стихословием, и чтение Евангелиа.

На 6-м часе тропарь пророчества, глас 1:

Безмерно согрешающим, богатно прости Спасе, и сподоби нас неосужденно поклонитися Твоему святому Воскреснию, молитвами Пречистыя Твоея Матере, едине Многомилостиве.

Прокимен, псалом 129. Глас 6: Яко у Господа милость, и многое у Него избавление.
Стих: Из глубины воззвах к Тебе Господи, Господи услыши глас мой.

Пророчества Иезекиилева чтение. [Глава 1, ст. 21 - 28. гл. 2, ст. 1]

Прокимен, псалом 130, глас 4: Да уповает Израиль на Господа от ныне и до века.
Стих: Господи, не вознесеся сердце мое, ниже вознесостеся очи мои.

И прочее. Вкупе же поем и 9-й час, без кафисмы, и чтем Евангелие. И блаженны поем, и Помяни нас Господи, с поклоны. И прочее все, якоже и в Понедельник указася.

В тойже Святый и Великий Вторник вечера,

во светильничное, обычное стихословие, на Господи воззвах, поставим стихов 10, и поем стихиры самогласны.

Глас 1: Во светлостех святых Твоих, како вниду недостойный? Аще бо дерзну совнити в чертог, одежда мя обличает, яко несть брачна, и связан извержен буду от ангелов: очисти Господи скверну души моея, и спаси мя яко Человеколюбец.

Глас 2: Душевною леностию воздремався, не стяжах Женише Христе, горяща светильника иже от добродетелей, и девам уподобихся буим, во время делания глумляся: утробы щедрот Твоих не затвори мне Владыко, но оттряс мой омраченный сон, возстави Милостиве, и с мудрыми введи девами в чертог Твой, идеже глас чистый празднующих, и вопиющих непрестанно: Господи слава Тебе.

Глас 4: Скрывшаго талант осуждение слышавши, о душе, не скрывай словесе Божия, возвещай чудеса его, да умножающи дарование, внидеши в радость Господа твоего.

Глас 6: Приидите вернии, делаим усердно Владыце: подавает бо рабом богатство, и по равенству кийждо многоусугубим благодати талант: ов убо мудрость да приносит делы благими, ов же службу светлости да совершает: да приобщается же словом верный, тайны ненаученному, и да расточает богатство убогим другий. Сице бо заимованное многоусугубим, и яко строителие вернии благодати, Владычния радости сподобимся: тоя нас сподоби Христе Боже, яко Человеколюбец.

Егда приидеши во славе со ангельскими силами, и сядеши на престоле Иисусе разсуждения, да мя Пастырю Благий не разлучиши, пути бо десныя веси, развращени же суть шуии. Да не убо с козлищи грубаго мя грехом погубиши: но десным мя сочетав овцам, спаси яко Человеколюбец.

Женише добротою красный паче всех человек, призвавый нас к трапезе духовней чертога Твоего, нелепый мой зрак прегрешений совлецы, причастием страданий Твоих, и одеждею славы украсив Твоея красоты, сообедника светла мя покажи Твоего Царствия, яко Милосерд.

Слава, и ныне, глас 7:

Се тебе талант Владыка вверяет душе моя: страхом приими дар, заимствуй давшему ти, раздавай нищим, и стяжи друга Господа, да станеши одесную Его, егда приидет во славе, и услышиши блаженный глас: вниди рабе в радость Господа твоего. Тоя достойна мя сотвори Спасе заблудившаго, великия ради Твоея милости.

Вход со Евангелием. Свете тихий:

Прокимен, псалом 131, глас 6: Воскресни Господи в покой Твой, Ты и кивот Святыни Твоея.
Стих: Помяни Господи Давида, и всю кротость его.

Исхода чтение. [Глава 2, ст. 5 - 10.]

Прокимен, псалом 132, глас 4: Се что добро, или что красно, но еже жити братии вкупе.
Стих: Яко миро на главе, сходящее на браду, браду Аароню.

Иова чтение. [Глава 1, ст. 13 - 22]

И абие, Да исправится молитва моя:

Евангелие от Матфеа, зачало 102. [Мф. 24, 36 - 26, 2.]

И прочая Преждеосвященных.

Во Святый и Великий Вторник

Повечерие великое,

на немже поем трипеснец, творение господина Андреа Критскаго. Глас 2.

Песнь 3.

Ирмос: Неплодствовавший мой ум, плодоносен Боже покажи ми, делателю добрых, насадителю благих, благоутробием Твоим.

Кончины время, обратимся прочее, Христос учит: приидет бо во мгновении, приидет и не умедлит, судити миру всему.

Внезапное Своего пришествия Христос являя, рече, Ноево древле ненадежное тление, навестися хотящее земли.

Отверзеся чертог, украсися с ним Божественный брак, Жених близ призываяй нас, уготовимся прочее.

Симонов дом, невместимаго везде, вмести Тя Иисусе Царю, и жена грешная миром Тя помаза.

Благовония таинственнаго исполнена жена, перваго избавися зловония Спасе, многих грехов. Миро бо источаеши жизни.

Небесная пище алчущим, животе сам сый, ял еси Христе с человеки, проявляя снисхождение Твое.

Неблагодарный ученик, отвергся Тебе Христе, соборище всебеззаконных людей сподвизаше на Тя, на предание обращься.

Слава: Со Отцем Тебе Сыну, и Духу правому, единому Естеству покланяюся и воспеваю, Лицы разделяя, и Существом соединяя.

И ныне, Богородичен: Рождшая Тя Агница, Пастыря и Агнца, присно молит Иисусе Боже, о всех людех верующих в Тя.

Седален, глас 1.
Подобен: Лик ангельский:

Се лукавый совет воистинну собрася неистовно, яко осужденника осудити, горе седящаго, яко Судию всех Господа: ныне собирается с Пилатом Ирод, Анна, вкупе же и Каиафа, испытати единаго долготерпеливаго.

Песнь 8.

Ирмос: В купине Моисею Девы чудо, на Синайстей горе прообразившаго иногда, пойте, благословите, и превозносите во вся веки.

Не неведый время нашего скончания, держай веки, день оный не ведети предрече: но пределы всем положи к смиреномудрию.

Егда сядеши Судие, разлучаяй, якоже рекл еси, пастырь от овец козлища Спасе, стояния онаго избави нас, не лиши же нас Божественныя десницы Твоея.

Ты еси Пасха наша, пожреный за всех, яко Агнец и Жертва, и прегрешений очищение, и Твоя Божественныя страсти превозносим Христе, во вся веки.

Древу уподобися, и селу, и храмине, все житие душе моя: темже стяжи к Богу готово сердце, да не что тлением плоти оставиши.

Не к фарисеом Спасе, ни к Симону токмо изволил еси во храм на снедь внити: но уже и мытари вкупе и блудницы, Твое почерпают милосердие.

Сребролюбие рачительствуяй предатель Иуда, о истощившемся мире печашеся: прочее же о продании Владыки, к беззаконным пришед о цене согласоваше.

О блаженных рук! о власов и устен целомудренныя блудницы! Имиже возлия, Спасе, миро на нозе Твои, отирающи я, и часто облобызающи.

Возлежащу Тебе Слове, жена представши, и у ног рыдающи, сткляницу Спасе истощи мира на главу Тебе безсмертнаго мира.

Благословим Отца, и Сына, и Святаго Духа, Господа.

Со Отцем Сына и Святаго Духа, Святую Троицу в Божестве едином славим, вопиюще: Свят, Свят, Свят еси во веки.

И ныне, Богородичен: Молитвами Спасе, Пречистыя Твоея Матере, и Твоих апостол, милости Твоя нам низпосли богатно, и мир Твой подаждь людем Твоим.

Таже: Хвалим, благословим, покланяемся Господеви:

Ирмос: В купине Моисею Девы чудо:

Песнь 9.

Ирмос: Преестественно плотию Заченшую во чреве, от Отца безлетно предвозсиявшее Слово, в песнех немолчных величаем вернии.

Делания время, спасения намерение: талант вземши, древний образ, душе моя, купи вечную жизнь.

Яко свещи светлыя украсивше души, Жениху приходящу к нетленному браку, прежде заключения дверей, внидем с Ним.

Показати хотя Иисусе, преестественное Твоего смирения всем, ял еси в дому Симонове вечеряв, алчущих пище.

Хлеб сый животворящий, снел еси Иисусе с Симоном фарисеем, да блудница приобрящет некупимую благодать Твою, истощанием мира.

Руце мои сквернаве, устне блудничи во мне, нечисто мое житие, растленны уды: но ослаби ми, и остави, вопиет блудница Христу.

Приступльши жена к ногама Твоима Спасе, возливаше миро, благоухания исполняющи, и мира исполняема дел очищения.

Ароматы богатею, добродетельми же нищетствую, яже имам, Тебе приношу: даждь Сам, яже имаши, и ослаби ми, и остави, вопиет блудница Христу.

Миро у мене тленное, миро у Тебе жизни, миро бо Тебе имя излиянное на достойныя: но ослаби ми, и остави, вопиет блудница Христу.

Слава: Безначален еси Отче, несозданен еси Сыне, сопрестолен и Душе, едино три Естеством, и три Лицами, един Бог истинный.

И ныне, Богородичен: Богородице, упование чтущих Тя присно, не престай молящи из Тебе Родившагося, избавити мя бед, и всяких искушений.