К оглавлению - Триодь постная.

Во Святую и Великую Среду, на Утрени,
по шестопсалмии Аллилуиа, на глас 8, и тропарь трижды Се Жених: Зри в Понедельник Великий.

И стихословие.

По 1 стихословии седален, глас 3.
Подобен: Красоте девства:

Блудница приступи к Тебе, миро со слезами изливающи на нозе Твои Человеколюбче, и смрада зол избавляется повелением твоим! Дыша же благодать Твою ученик неблагодарный, сию отлагает, и смрадом одевается, сребролюбием продая Тебе. Слава Христе благоутробию Твоему.

Слава, и ныне, тойже.

По 2-м стихословии седален, глас 4.
Подобен: Удивися Иосиф:

Иуда льстец, сребролюбия рачительствуяй, предати Тя Господи, сокровище живота, лестно поучашеся, отонудуже и упився, течет ко иудеом, глаголет беззаконым: что ми хощете дати, и аз вам предам, во еже распяти Его?

Слава, и ныне, тойже.

По 3-м стихословии седален, глас 1.
Подобен: Гроб Твой:

Блудница в плаче вопияше Щедре, отирающи тепле пречистеи Твои нозе власы главы своея, и из глубины стенящи: не отрини мя, ниже омерзи Боже мой: но приими мя кающуюся, и спаси яко един Человеколюбец.

Слава, и ныне, тойже.

Чтения же вся от сказания, еже от Матфеа святаго Евангелиа дне.
Таже Евангелие от Иоанна, зачало 41, близ конца, без преступки: Во время оно, свидетельствоваше народ сый со Иисусом, егда Лазаря возгласи от гроба [12:17]: Конец в зачале 43-м: Яже убо Аз глаголю, якоже рече Мне Отец, тако глаголю [12:50].

Псалом 50.

И трипеснец, творение господина Космы, егоже краестрочие: {Тетради псало}. Сиесть В Среду воспою. Ирмосы по дважды. Тропари на 12. Последи же ирмос оба лика вкупе. Глас 2.

Песнь 3.

{T} Ирмос: На камени мя веры утвердив, разширил еси уста моя на враги моя, возвесели бо ся дух мой внегда пети: несть свят, якоже Бог наш, и несть праведен, паче Тебе Господи.

{E} Во тщетных соборище беззаконных, и мыслию собирается злонравною, осуждена Избавителя изрещи Тя Христе. Емуже поем: Ты еси Бог наш, и несть свят паче Тебе Господи.

{T} Лютый совет беззаконных, притворяется богоборныя души сущий, яко злопотребна праведнаго убити Христа. Емуже поем: Ты еси Бог наш, и несть свят паче Тебе Господи.

Кондак, глас 4.
Подобен: Вознесыйся:

Паче блудницы Блаже, беззаконновав, слез тучи никакоже Тебе принесох: но молчанием моляся припадаю Ти, любовию облобызая пречистеи Твои нозе, яко да оставление мне яко Владыка подаси долгов, зовущу Ти Спасе: от скверных дел моих избави мя.

Икос: Яже первее блудница жена, внезапу целомудренна явися, возненавидевши дела студнаго греха, и сладости телесныя, поминающи студ многий и суд мучения, егоже претерпят блудницы и сквернии, от нихже первый есмь аз, и боюся: но пребываю в злом обычаи безумный. Блудная же жена убоявшися, и потщавшися скоро прииде, вопиющи ко Избавителю: Человеколюбче и Щедре, от скверных дел моих избави мя.

Синаксарий. Стихи:
Жена полагающи телеси Христову миро,
Никодимов предприят смирналой.

Во Святую и Великую Среду, помазавшия Господа миром жены блудницы, память творити повелеша Божественнейшии отцы: зане мало прежде спасительныя страсти сие бысть. Вшедшу бо Иисусу во Иерусалим, и в дому прокаженнаго Симона бывшу, жена к Нему приступи, и излия на главу Его оное многоценное миро. Учинено убо сего ради бысть зде, да по Спасову словеси везде и во всех оноя теплейшее дело проповестся. Откуду же подвигшися прииде? Занеже сострадательное Христово зряше, и ко всем общительное, и ныне паче, егда в дом прокаженнаго того виде введена, егоже нечиста и отреченна во общение, закон повелеваше быти. Помысли убо жена, якоже онаго проказу, сице и ея душевный недуг исцелит. И убо возлежащу Ему на вечери, на верх главы Его лиет миро, яко ценою сущее динарий трех сот: еже есть шестьдесят ассарий, пенязей десять, сребренников триех. Ейже ученицы запретиша, и наипаче Иуда Искариотский: но Христос сию заступи, да не пресекут добраго ея намерения. Таже и погребение Свое воспоминает, Иуду отвращая предательства, и жену почести сподобляя, еже везде по вселенней сея доброму делу проповедатися. Ведомо же буди, яко жена сия, едина убо мнится неким быти, у евангелистов всех. Несть же, но у триех убо, якоже глаголет божественный Златоустый (Беседа на Матф. 13), едина и таяжде есть, яже и блудница сице именовася, у Иоанна же не ктому: но другая некая чудная, и житие имущая честное, Мариа сестра Лазарева, яже не аки блудница сущи, Христом любима бе. Сих же, овая убо Мариа, прежде шести дней Пасхи, в дому своем, иже в Вифании, на вечери возлежащу, мира помазание содея, на краснеи Онаго нозе сие изливающи, и главными власы сия отирающи, изобилия цены нань употребляющи, и аки Богу миро приносящи. Ведяше бо известно, яко и в жертвах приношашеся елей Богу (Исход гл. 30, Быт. 28 и 35): и священницы миром помазовахуся: и Иаков древле столп помаза Богу. Принесе же сие дарствующи яве Учителю, аки Богу, паки оживления ради братняго. Темже ниже мзда ей обещавается, егда и сам Иуда ропщет, яко любостяжателен. Другая же яве блудница, прежде двою дню Пасхи, в тойже Вифании еще сущу Христу и в дому бывшу Симона прокаженнаго на вечери, и тогда возлежащу, многоценное оное миро на главу изливает, якоже священный Матфей и Марк повествоваша. О сей же блуднице и ученицы негодуют, к милостыни Христу тщательно уготованное известно провидевше: сей же и мзда дадеся, еже всюду по вселенней доброму ея делу прославитися. Овии убо едину: языком же златый сице две жене быти глаголет. Суть же нецыи и три сия быти глаголют: две убо предреченнеи, страсти Христовой к дверем приближающейся, третию же иную прежде сих, паче же первую тамо близ среды проповеди евангельския сие сотворшую, яже и блудница и грешница бе, внутрь же дому не прокаженнаго, но фарисеа Симона. На нозе Христа Самаго, и наедине миро излиявшая: егда и един фарисей соблазняшеся, ейже и мзду Спас, оставление грехов дарует. О сей же токмо самой божественный Лука (зачало 33) в своем Евангелии близ среды, якоже речеся повествует. И по повести о сей блуднице, абие наводит сице глаголя: и бысть по сем, и Той прохождаше сквозе грады и веси, благовествуя и проповедуя Царствие Божие, от нихже является, яко не во время страсти сие бысть. Мнится убо и от времене, и от приемших Его, и от места, и лиц, и домов, еще же и от нрава миропомазания трем быти женам сим: две убо блудницы, третию же Лазареву быти сестру Марию, житием сияющую честным. И иный убо дом быти фарисеа Симона, другий же прокаженнаго Симона в Вифании, и иный паки дом Марии и Марфы сестр Лазаревых в тойже Вифании, якоже от сих сразумети есть: яко и две вечере бесте Христу, и обои в Вифании: едина убо прежде шести дней Пасхи в дому Лазареве, егда ядяше с ним и Лазарь, якоже громов сын повествует (Иоан. 41 зач.), глаголя сице: Прежде шести дней Пасхи, прииде Иисус в Вифанию, идеже бе Лазарь умерый, егоже воздвиже от мертвых. Сотвориша убо Ему вечерю, тамо, и Марфа служаше: Лазарь же един бе от совозлежащих Ему. Мариа убо приемши литру мира нарда пистики многоценнаго, помаза нозе Иисусове, и отре власы своими нозе Его. Другая же вечеря бысть Ему прежде двою дню Пасхи, еще сущу в Вифании Христу в дому Симона прокаженнаго, егда и блудница прииде к нему многоценное миро изливающи, якоже священный Матфей повествует глаголя (Матф. 108 зач.), яко от Христа ко учеником: весте, яко по двою дню Пасха будет. И помале паки наносит: Иисусу же бывшу в Вифании, в дому Симона прокаженнаго, приступи к Нему жена, алавастр мира имущи тяжкоценнаго, и возливаше на главу Его возлежащаго. Емуже согласует и Марк, глаголя (Марк. 63): Бе же Пасха, и опресноцы по двою дню, и сущу Ему в Вифании в дому Симона прокаженнаго возлежащу, прииде жена: и елика по сем. Прящиися же и глаголющии, едину и туюжде быти, у четырех евангелистов жену помазавшую Господа миром единаго и тогожде мнят быти Симона, фарисеа же и прокаженнаго: егоже и отца Лазаря же и сестр его Марии и Марфы, быти нецыи издаша, и едину вечерю и туюжде, и тойжде и един дом его, иже в Вифании, у негоже и горница постлана уготовася, и таинственную Вечерю быти, не добре мнят. Сии бо две вечери, вне Иерусалима в Вифании бесте Христу прежде шести, и прежде двою [якоже речеся] дню законныя Пасхи, егда и жены мира различно Христу принесоша. Тайная же Вечеря, и постланная горница, внутрь града Иерусалима благоукрасишася, прежде единаго законныя Пасхи и страсти Христовы дне. Овии убо в дому неведомаго человека, овии же в дому [якоже глаголют] наперсника и ученика Иоанна во святом Сионе, идеже и ученицы страха ради иудейска бяху сокровени, и Фомино бысть осязание по воскресении, и Святаго Духа пришествие на Пятьдесятницу, и иная некая неизреченная и таинственная совершишася. Темже сие убо мнится ми, и истине златоглаголиваго паче известнее быти, яко две убо сия жены вменяются: едина убо, якоже речеся у триех евангелистов, блудница сущи и грешница, на главу Христову миро возлиявшая: иная же у Иоанна, Мариа сестра Лазарева, самем же Божественным ногам Христовым сие принесшая и возлиявшая. Иныя убо яже в Вифании вечери: иную же быти Тайную. И явственно и от оных по повести о блуднице сей, ученики Спас ко граду посылает, уготовати Пасху. Идите, глаголя, во град ко онсице, и рцыте: Учитель глаголет, у тебе сотворю Пасху со ученики Моими. И паки: и срящет вы человек, скудельник воды нося, и той покажет вам горницу велию постланную, тамо уготовайте нам. Они же отшедше, глаголет, обретоша, якоже заповеда им, и уготоваша Пасху, яве законную при дверех сущую, юже и пришед соверши со ученики, якоже божественный Златоуст глаголет. Таже и Вечери бываемой, сиесть Тайной, и Божественному умовению посреде содеяну бывшу, паки возлег, и нашу предает Пасху на самой трапезе, якоже языком златый Иоанн повествует, и сия убо тако. Божественный же Иоанн, к сему и Марк, божественнии евангелисти, и мира вид приложиша, верное сие именовавше и многоценное. Возмнеша же пистикон, сиесть верное нарещи, нелестное же и нерастворенное и вверенное в чистоту, негли же и нарицание бе некое сие, изряднейшаго и перваго мира. Прилагает же Марк, яко и сосуд сокруши от тщания жена, аки тесновходный, иже и алавастр именует. Есть же сей сосуд сткляный, якоже глаголет священный Епифаний, без рукояти сотворенный некия, иже и викион сице глаголется. Бе же миро оное сложенное от видов убо и иных многих, паче же от сих, смирны, цвета кинамома благоуханна, сиесть, трости ароматския, и елеа. Но иже умным миром помазавыйся Христе Боже, находящих страстей свободи, и помилуй нас, яко един Свят и Человеколюбец, аминь.

Песнь 8.

{Р} Ирмос: Глагол мучителев понеже превозможе, седмерицею пещь разжженна бысть иногда: в нейже отроцы не опалишася, царево поправше веление, но вопияху: вся дела Господня Господа пойте, и превозносите во вся веки.

{А} Изливающи жена миро честное, Владычню и Божественному страшному верху Христе, следов Твоих пречистых прикоснуся, оскверненыма дланьма, и вопияше: вся дела Господня Господа пойте, и превозносите во вся веки.

{D} Слезами омывает нозе, повинная грехом, Создавшаго, и отирает власы своими. Темже в житии содеянных не погреши избавления, но вопияше: вся дела Господня Господа пойте, и превозносите во вся веки.

{I} Священнодействуется избавление благонравней, от спасительных утроб же и слез источника, в немже исповеданием измывшися, не стыдяшеся, но вопияше: вся дела Господня Господа пойте, и превозносите во вся веки.

Таже, Хвалим, благословим:

И паки ирмос: Глагол мучителев:

Честнейшую, не поем.

Песнь 9.

{Y} Ирмос: Душами чистыми, и нескверными устнами, приидите возвеличим Нескверную, и Пречистую Матерь Еммануилеву, Еюже из Нея к Рожденному приносяще молитву: пощади души наша Христе Боже, и спаси нас.

{А} Неразумен явлься, и лукав ревнообразник, дар достойнобожествен словом продает. Имже долг разрешися грехов, крадый лютый Иуда любобожественную благодать: пощади души наша Христе Боже, и спаси нас.

{L} Глаголет шед беззаконным князем: что ми хощете дати, и аз Христа вам искомаго хотящим предам? Присвоение Христово Иуда отринувый златом: пощади души наша Христе Боже, и спаси нас.

{W} О слепотнаго сребролюбия нечестиве, отонудуже забвение получил еси, яко души никакоже равностоятелен мир, якоже научился еси: отчаянием бо сам себе удавил еси вжегся предателю: пощади души наша Христе Боже, и спаси нас.

Таже ирмос: Душами чистыми, и нескверными устнами:

Ексапостиларий, трижды, яко обычно:

Чертог Твой вижду Спасе мой украшенный, и одежды не имам, да вниду вонь, просвети одеяние души моея Светодавче, и спаси мя.

На хвалитех поставим стихи 4, и поем сия самогласны, глас 1:

Тебе Девыя Сына, блудница познавши Бога, глаголаше, в плачи молящися, яко слез достойная соделавшая: разреши долг, якоже и аз власы: возлюби любящую, праведно ненавидимую, и близ мытарей Тебе проповем, Благодетелю Человеколюбче.

Многоценное миро, блудница смеси со слезами, и излия на пречистеи нозе Твои, облобызающи: оную абие оправдал еси, нам же прощение даруй Пострадавый о нас, и спаси нас.

Егда грешная приношаше миро, тогда ученик соглашашеся пребеззаконным. Овая убо радовашеся, истощающи миро многоценное: сей же тщашеся продати Безценнаго. Сия Владыку познаваше, а сей от Владыки разлучашеся. Сия свобождашеся, а Иуда раб бываше врагу. Люто есть леность, велие покаяние: еже мне даруй Спасе, пострадавый о нас, и спаси нас.

О Иудина окаянства! Зряше блудницу целующую стопы, и умышляше лестию предания целование. Оная власы разреши, а сей яростию вязашеся, нося вместо мира злосмрадную злобу: зависть бо не весть предпочитати полезное. О Иудина окаянства! От негоже избави Боже, души наша.

Слава, глас 2: Грешная тече к миру, купити многоценное миро, еже помазати Благодетеля, и миропродателю вопияше: Даждь ми миро, да помажу и аз Очистившаго вся моя грехи.

И ныне, глас 6: Погруженная грехом, обрете Тя пристанище спасения, виждь и мира со слезами растворяющую, Тебе вопияше: виждь согрешающих покаяния ожидаяй. Но Владыко спаси мя от волны греховныя, великия ради Твоея милости.

На стиховне стихиры самогласны, глас: 6.

Днесь Христос приходит в дом фарисеов, и жена грешница приступивши к ногам, валяшеся вопиющи: виждь погруженную грехом, отчаянную деяний ради, негнушаемую от Твоея благости: и даждь ми Господи оставление злых, и спаси мя.

Стих: Исполнихомся заутра милости Твоея, Господи:

Простре блудница власы Тебе Владыце, простре Иуда руце беззаконным: ова убо прияти оставление, ов же взяти сребреники. Темже Тебе вопием проданому и свобождшему нас: Господи слава Тебе.

Стих: И буди светлость Господа Бога нашего на нас:

Приступи жена злосмрадная и оскверненая, слезы проливающи, любящи Спасе, страсть исповедающи: како воззрю к Тебе Владыце? Сам бо пришел еси спасти блудницу: из глубины умершую мя воскреси, иже Лазаря воздвигнувый из гроба четверодневна: приими мя окаянную Господи, и спаси мя.

Стих: Исповемся Тебе Господи всем сердцем моим:

Отчаянная жития ради, и уведомая нрава ради, мира носящая приступи Тебе вопиющи: да не отвержеши мене блудную, Родивыйся от Девы: да не презриши моя слезы радосте ангелов. Но приими мя кающуюся, юже не отринул еси согрешающую Господи, великия ради Твоея милости.

Слава, и ныне, самогласен, глас 8:
Творение Кассианы инокини.

Господи, яже во многия грехи впадшая жена, Твое ощутившая Божество, мироносицы вземши чин, рыдающи миро Тебе прежде погребения приносит: увы мне глаголющи! яко нощь мне есть разжжение блуда невоздержанна, мрачное же и безлунное рачение греха. Приими моя источники слез, иже облаками производяй моря воду. Приклонися к моим воздыханием сердечным, приклонивый небеса неизреченным Твоим истощанием: да облобыжу пречистеи Твои нозе, и отру сия паки главы моея власы, ихже в раи Ева, по полудни, шумом уши огласивши, страхом скрыся. Грехов моих множества, и судеб Твоих бездны кто изследит? Душеспасче Спасе мой, да мя Твою рабу не презриши, иже безмерную имеяй милость.

И абие, Благо есть: Трисвятое с поклоны, и час 1-й без стихословия: Бывают же и поклоны по чину их. И литиа. И отпуст. И прочее якоже прежде указася в Понедельник Великий.

На 6-м часе тропарь пророчества, глас 8:

Днесь лукавое собрася сонмище, и на Тя тщетная поучишася. Днесь от согласия удавление Иуда обручает, Каиафа же неволею исповедует: яко един за всех восприемлеши смерть волею, Избавителю наш Христе Боже, слава Тебе.

Прокимен, псалом 133, глас 4: Благословит Тя Господь от Сиона, сотворивый небо и землю.
Стих: Се ныне благословите Господа вси раби Господни.

Пророчества Иезекиилева чтение. [Глава 2, ст. 3 - 10, глава 3, ст. 1 - 3]

Прокимен, псалом 134, глас 6: Боящиися Господа, благословите Господа.
Стих: Хвалите имя Господне, хвалите раби Господа.

Чтение Евангелиа. И по чину Трисвятое с поклоны и отдаем стихословие часов.

Девятый же час начинаем от Трисвятаго: в немже и последнее бывает чтение от Евангелиа. Таже глаголем: Не предаждь нас: Трисвятое с поклоны. Такожде и блаженны. Творяще и обычныя поклоны. Глаголем же и кондак Великия Среды, и храма святаго, или святыя. Слава, Со святыми упокой: И ныне, храма, Богородицы. Аще же ни, глаголем: Предстательство христиан: Господи помилуй, 40, и 3 великия поклоны, и 12 малыя. Трисвятое: и поклоны 3. Господи помилуй, 12, и молитва: Всесвятая Троице: Таже, Достойно есть: Слава, и ныне: и вместо отпуста глаголет настоятель молитву: Владыко многомилостиве: всю до конца. Сей же глаголемей мы ниц падше на землю, молимся. И по исполнении тоя, нам воставшим, преклоняется и той сам к братии, и просит прощения, глаголя: Благословите отцы святии, и простите ми грешному, яже согреших во всей жизни моей, и во всей святей Четыредесятнице, словом, делом, помышлением, и всеми моими чувствы. Братиям же отвещавшим: Бог да простит ти честный отче. Таже приходят и братия два два, просят подобне и тии прощения, глаголюще: Прости мя отче святый: и прочее, якоже выше писася. И приемше прощение, идем в келлии наша, и молчим до часа вечерняго. В соборных же храмех и приходских росход не бывает: но по прощении трезвон в двои.

Во Святую и Великую Среду вечера,

во светильничное, обычное стихословие от Трисвятаго без поклонов. Стихословим же, и Ко Господу внегда скорбети ми: без поклонов. На Господи воззвах, поставим стихов 10 и поем самогласны, глас 1:

Тебе Девыя Сына, блудница познавши Бога, глаголаше, в плачи молящися, яко слез достойная соделавшая: разреши долг, якоже и аз власы: возлюби любящую, праведно ненавидимую, и близ мытарей Тебе проповем, Благодетелю Человеколюбче.

Многоценное миро, блудница смеси со слезами, и излия на пречистеи нозе Твои, облобызающи: оную абие оправдал еси, нам же прощение даруй Пострадавый о нас, и спаси нас.

Егда грешная приношаше миро, тогда ученик соглашашеся пребеззаконным. Овая убо радовашеся, истощающи миро многоценное: сей же тщашеся продати Безценнаго. Сия Владыку познаваше, а сей от Владыки разлучашеся. Сия свобождашеся, а Иуда раб бываше врагу. Люто есть леность, велие покаяние: еже мне даруй Спасе, пострадавый о нас, и спаси нас.

О Иудина окаянства! Зряше блудницу целующую стопы, и умышляше лестию предания целование. Оная власы разреши, а сей яростию вязашеся, нося вместо мира злосмрадную злобу: зависть бо не весть предпочитати полезное. О Иудина окаянства! От негоже избави Боже, души наша.

Глас 2: Грешная тече к миру, купити многоценное миро, еже помазати Благодетеля, и миропродателю вопияше: Даждь ми миро, да помажу и аз Очистившаго вся моя грехи.

Глас 6: Погруженная грехом, обрете Тя пристанище спасения, виждь и мира со слезами растворяющую, Тебе вопияше: виждь согрешающих покаяния ожидаяй. Но Владыко спаси мя от волны греховныя, великия ради Твоея милости.

Днесь Христос приходит в дом фарисеов, и жена грешница приступивши к ногам, валяшеся вопиющи: виждь погруженную грехом, отчаянную деяний ради, негнушаемую от Твоея благости: и даждь ми Господи оставление злых, и спаси мя.

Простре блудница власы Тебе Владыце, простре Иуда руце беззаконным: ова убо прияти оставление, ов же взяти сребреники. Темже Тебе вопием проданому и свобождшему нас: Господи слава Тебе.

Приступи жена злосмрадная и оскверненая, слезы проливающи, любящи Спасе, страсть исповедающи: како воззрю к Тебе Владыце? Сам бо пришел еси спасти блудницу: из глубины умершую мя воскреси, иже Лазаря воздвигнувый из гроба четверодневна: приими мя окаянную Господи, и спаси мя.

Отчаянная жития ради, и уведомая нрава ради, мира носящая приступи Тебе вопиющи: да не отвержеши мене блудную, Родивыйся от Девы: да не презриши моя слезы радосте ангелов. Но приими мя кающуюся, юже не отринул еси согрешающую Господи, великия ради Твоея милости.

Слава, и ныне, глас 8:
Творение Кассианы инокини.

Господи, яже во многия грехи впадшая жена, Твое ощутившая Божество, мироносицы вземши чин, рыдающи миро Тебе прежде погребения приносит: увы мне глаголющи! яко нощь мне есть разжжение блуда невоздержанна, мрачное же и безлунное рачение греха. Приими моя источники слез, иже облаками производяй моря воду. Приклонися к моим воздыханием сердечным, приклонивый небеса неизреченным Твоим истощанием: да облобыжу пречистеи Твои нозе, и отру сия паки главы моея власы, ихже в раи Ева, по полудни, шумом уши огласивши, страхом скрыся. Грехов моих множества, и судеб Твоих бездны кто изследит? Душеспасче Спасе мой, да мя Твою рабу не презриши, иже безмерную имеяй милость.

Вход со Евангелием. Свете тихий:

Прокимен, псалом 135, глас 4: Исповедайтеся Богу Небесному, яко благ, яко в век милость Его.
Стих: Исповедайтеся Богу богов, яко в век милость Его.

Исхода чтение. [Глава 2, ст. 18 - 22.]

Прокимен, псалом 137, глас 4: Господи, милость Твоя во век, дел руку Твоею не презри.
Стих: Исповемся Тебе Господи всем сердцем моим, и пред ангелы воспою Тебе.

Иова чтение. [Глава 2, ст. 1 - 10]

Таже, Да исправится молитва моя:

Евангелие от Матфеа, зачало 108. [Мф. 26, 6 - 16.]

И прочее последование Преждеосвященных.

И по пренесении честных Даров поклоны 3. И абие упраждняются совершенно в церкви бываемыя поклоны. В келлиах же даже и до Великаго Пятка совершаются.


Во Святую и Великую Среду вечера Повечерие глаголем малое,
на немже поем трипеснец господина Андреа Великаго Четвертка. Глас 6.

Песнь 4.

Ирмос: Услыша пророк пришествие Твое Господи, и убояся, яко хощеши от Девы родитися, и человеком явитися, и глаголаше: услышах слух Твой, и убояхся, слава силе Твоей Господи.

Горница постланая, прият Тя Создателя и стаинники, и тамо Пасху скончал еси, и тамо соделал еси таинства: тамо бо двема посланома ныне ученикома Твоима, Пасха уготовася Тебе.

Идите ко онсице, вся ведый предглаголет апостолом, и блажен есть, иже может верно прияти Господа: горницу убо сердце предуготовав, и вечерю благочестие.

Нрав сребролюбия, и образ твой безумия исполнь несмысленный Иудо: вверен бо быв един токмо ковчежцу, всяко не преклонился еси к милосердию: но заключил еси жестокаго твоего сердца утробу, предав единаго Благоутробнаго.

Нрав богоубийц проданию сребролюбца смесивыйся: ов убо ко убиению вооружився, ов же к сребреннком устремляшеся: удавлением бо тогда предразсудив покаяние зле, еже жити лишися.

Лобызание исполнено льсти, еже радуйся, со оружием, льстивый Иудо: языком убо провещаваеши яже к соединению, нравом же помаваеши к разстоянию: предати бо беззаконником Благодетеля лестне поучился еси.

Лобызаеши и продаеши Иудо, целуеши и не стыдишися, лестию притекий. Кто ненавидя лобызает треокаянне? Кто любя продает на цене? Лобызание твоего безстуднаго злосоветия обличает произволение.

Слава: Нераздельное Существом, неслитное Лицы, богословлю Тя, Троическое едино Божество, яко единоцарственное и сопрестольное, вопию Тебе песнь великую, в вышних трегубо песнословимую.

И ныне, Богородичен: Зачатие паче слова, рождество Твое паче естества Богородительнице: ово убо от Духа без семене, ово же законов естества таящееся, яко нетленно, и паче естества всякаго рождения: Бог бо раждаемое.

Седален, глас 4.
Подобен: Явился еси днесь:

Ядый Владыко со ученики Твоими, таинственно явил еси всесвятое Твое заколение, имже тли избавихомся, честная Твоя почитающии страдания.

Песнь 8.

Ирмос: Егоже воинства небесная славят, и трепещут херувими и серафими, всяко дыхание и тварь: пойте, благословите и превозносите во вся веки.

Законное скончав повеление, скрижали законныя Написавый в Синаи, снеде убо Пасху древнюю и сеновную: бысть же Пасха тайная и живожертвенная.

От века сокровенную Христе премудрость тайноводя, показал еси купно всем апостолом Спасе на вечери, юже Церквам предаша богоноснии.

Един от вас лестию предаст Мя, евреем продав в нощь сию, сие Христос возопив смущаше други: тогда един ко единому, недоумеваяся колебашеся.

Смирився нас ради богатый, от вечери востав, лентий прием, сим препоясался еси, и преклонь выю, омыл еси ноги учеников и предателя.

Паче ума, и неизреченна разума высоте Твоей Иисусе, кто не удивится! Яко брению предстал еси, Содетелю всяческих, омывая убо ноги, отирая же и лентием.

Ученик, егоже любляше Господь, на перси возлег, рече к Нему: кто есть предаяй Тя? Христос же ко оному: сей вложивый в солило ныне руку.

Ученик хлеб приемый, по хлебе отлучается, проданию поучаяйся, течет ко иудеем, глаголет беззаконным: что мне хощете дати: и аз Его вам предам.

Благословим Отца, и Сына, и Святаго Духа, Господа.

Единаго Бога по Существу чту, три Ипостаси пою определительне, иныя, но не инаковыя: понеже Божество едино, в триех Лицех, ибо Отец, и Сын, и Божественный Дух.

И ныне, Богородичен: Избави нас Иисусе Спасе наш от лести лукаваго, и напасти: приими Богородицу молящуюся непрестанно: Мати бо есть, и может Тя умолити.

Хвалим, благословим:

И паки ирмос: Егоже воинства небесная: И поклон.

Песнь 9.

Ирмос: Безсеменнаго зачатия Рождество несказанное, Матере безмужныя нетленен плод: Божие бо рождение обновляет естества. Темже Тя вси роди, яко Богоневестную Матерь, православно величаем.

Великое таинство Твоего вочеловечения, на вечери совозлежащу Тебе учеником Твоим Человеколюбче, открыв рекл еси: ядите Хлеб животный верою, пийте и Кровь излиянную от Богоребреннаго заколения.

Сень небесная явися горница, идеже Пасху Христос соверши: Вечеря безкровная, и словесная служба, трапеза же тамо совершенных Таин, мысленный жертвенник.

Пасха Христос есть великая и всечестная, снеден быв яко хлеб, заклан же яко овча: Той бо вознесеся о нас Жертва. Того Тела благочестно, и Того Крове вси тайно причащаемся.

Хлеб благословив, Хлеб сый небесный, благодарив Отцу Родителю, приемый, и чашу учеником давал еси: приимите, ядите, вопия, сие есть Тело Мое, и Кровь нетленныя жизни.

Аминь глаголя, рече рождиям Лоза, апостолом Христос истина: отселе не имам пити от лозы питие, дондеже пию е новое, во славе Отца Моего, с вами наследники Моими.

Продаеши на тридесятих сребреницех Господа, и не помышляеши Иудо беззаконный Вечери таинство, или честное умовение. О како поползся падением в конец света пришел еси, удавление облобызав!

Руце простерл еси, имиже хлеб приял еси нетления, прияти сребреники, уста к целованию принося льстивно, имиже Тело Христово и Кровь приял еси: но горе тебе, якоже рече Христос.

Христос учреди мир, небесный и Божественный хлеб: приидите убо христолюбцы, бренными устнами, чистыми же сердцы, приимем верно жремую Пасху, в нас священнодействуемую.

Слава: Отца прославим, Сына превознесем, Божественному Духу верно поклонимся, Троице нераздельней, единице по Существу: яко Свету и Светом, Животу и Животом, животворящему и просвещающему концы.

И ныне, Богородичен: Чертог небесный, и Невеста Приснодева, едина явилася еси, Бога носивши, рождши же непреложно, из Тебе воплощенна. Темже Тя вси роди яко Богоневестную Матерь, православно величаем.

И паки ирмос: Безсеменнаго зачатия: И прочее Повечерия малаго по обычаю, и отпуст, и творим поклоны 3, вси равно косно. И бывшей молитве, от предстоятеля, отходим в келлии своя.

Ведомо же буди, яко от сего святаго дне, Полунощница не поется в церкви, до седмицы Фомины.