|
Оп.: Слово святаго Феодосия о терпении и о любви. // Памятники древне-русской церковно-учительной литературы. Выпуск первый, содержащий поучения: Луки Жидяты, митроп. Иллариона, Феодосия Печерскаго и Кирилла Туровскаго. — Издание журнала «Странник», под ред. проф. А. И. Пономарева. — СПб.: Типография С. Добродеева, 1894. — С. 33-35.
Что внесем, любимици мои, в мир сей, или что имамы изнести (1 Тим. 6, 7)? Не оставихом ли мира, и яже в мире, (по) заповеди Христовы, глаголавшаго: иже [1] възненавидить всего и последуеть Ми, несть Ми ученик (ср. Лук. 14, 26. 33), и пакы: иже Мя аще любить и слово Мое схранить, и иже душу свою погубить Мене ради, обрящеть ю (Іоан. 14, 23). И любы Божия не в словесех съвръшается, но в делех детельных (ср. Марк. 8, 35; Матф. 10, 39; Лук. 9, 24). Рече бо: иже пребудеть в заповедех Моих, Аз възлюблю и явлюся ему сам (Іоан. 14, 21). Заповедь бо нову даю вам, да любите друг друга, якоже и Аз възлюбих вы, и по сем разумеють вси, яко Мои ученици есте, аще любовь имаете междю събою (Іоан. 13, 34-35). Да аще храним заповеди Его, и Он възлюбить нас. Рече бо Ісус в оном долзем и нощнем наказании к Іюде Скариоту, глаголавшему, како есть, яко нам хощеши явитися, а не всему миру, и отвещав Ісус и рече ему: аще кто слово Мое възглаголеть, и Отець Мой възлюбить и, и к нему приидеве, и обитель в него створиве; а не любяй Мене, иже словес Моих не сохранить (Іоан. 14, 22-25). Аз бо есмь виноград истинный, и Отець Мой делатель есть, и всяка лоза, не творящии плода о Мне, посекается, а творящиа плод, отребится, да болий плод сотворить (Іоан. 15, 1-2). Аще бо кто во Мне не пребудеть, и извержется вон. Яко же и лоза, съсхнет, и сбирають ю, и в огнь влагають, и сгораеть (Іоан. 15, 6), тако жде и мы, отци мои и братиа, аще потщимыся заповеди Его творити, да словеса Его в нас будуть, и плод створим. О сем бо, рече, прославися Отец Мой, да плод мног, створите, и будете Мои ученицы (Іоан. 15, 8). И кто не удивится, възлюблении, яко Богу прославитися нашими делесы? И колика на нас худых любы Его излияся! Яко же бо, рече, възлюби Мя Отец, и Аз възлюбих вы (Іоан. 15, 9). Болше сея любве ни кто же не имать, да кто душу свою положит за другы своя; вы бо, рече, есте друзи Мои (Іоан. 15, 13-14).
И та слышасте, нам убогым кацемь (какими) достоить длъжным быти? Не сердце ли в нас горитъ? И та вся слышаще, нам нимало от съвести своеа въсклоняющимся? Что бо добро створихом Ему, да нас изъбра, изведе ны от маловременнаго житиа сего? Не вси (ли) уклонимся (уклонихомся) и неключими быхом работати Ему? не в след ли похотей идохомъ? И Он не презре нас, в толице зле сущим, ни възгнушася естьства нашего, и въсприим рабий образ, уподобися нам (Флп. 2, 7) и вся та створи, да мы спасены будем. Глаголаше бо: вся, елико створят вам человеци, и вы творите им такожде, и всякому просящему в вас, дайте, и взяти хотящим у тебе не отвратите (Матф. 5, 42), и будете съвръшени, якоже Отец Мой свершен есть (Матф. 5, 48). Якоже сиаеть солнце на злыа и на добрыя, такожде и дождить, не токмо на рабы своя, но и на съпостаты своя (Матф. 5, 45). И не себе бо ради сниде Слово Божие на землю, но всех ради (Срв. Евр. 2, 9), и за вся пострадати смерть восприят. И Петрови бо некъгда в обрезаннцех пребывающу и с теми ядущу, а иноязычник гнушающуся, не свесил (ли) ему Господь съсуда некакого, полна суща нечистых годъ? И глаголаше ему: заколи и яжь. И что же рече Петръ? Господи николиже нечисто не вниде в уста моя. И что противу тому услыша? Рече бо: еже Бог очисти, человек да не осквернавить (Деян. 10, 11-14). И Богу тако сътворшу, и тако повелеющу рабом своим в годы своя. И како аз могу, грешный и недостойный раб ваш, противник Богу быти, оному о мне тако творящу? Трость бо не пишеть сама, аще не будеть пишущаго ею, ниже прославиться секира без секущаго ею. Сами бо весте, братие моя и отци, яко не аз послах проповедник своих, дая всем покаание, но Отец, живый в вышних, пославый единороднаго Сына своего за избавление всего мира (Ср. 1 Іоан. 4, 9). Темже, братие моя, дръжаще междю собою любовь истинну, и въсприимемь благаго Бога нашего закон чист, и заповеди Его ненорочны съблюдем, тружающеся в бдении и в молитвах молящеся за весь мир без престани (= непрестанно), да тем получим царство небесное о Христе Ісусе, Господе нашем, ему же [2].
Примечания:
[1] Вероятно здесь опущена частица «не» (ср. Лук. 14, 26).
[2] Вероятно в списке конец недописан: «Ему же слава, честь и держава». Ср. ниже, поучение 5-е.
|
