Статьи, находящиеся в рукописи археографической комиссии после комиссионного списка новгородской первой летописи.

ПРАВИЛО ЗАКОНЬНО О ЦЕРКОВНЫИХ ЛЮДѣХ, И О ДЕСЯТИНАХ, И О МИРИЛѣХ ГРАДСКЫИХ, И О СУДѣХЪ ИЕПИСКОПСКЫИХЪ.

От самое истинны слышахъ святых апостолъ и отець предания и перваго правовѣрнаго царя Костянтина и всѣхъ цареи христианьскыхъ на всѣхъ соборѣхъ вселеньскых исправлениа о судѣхъ церковныих и о десятинахъ и о всемь священничьскомъ чину, еже уставиша и утвердишя судомъ и съборною апостольскою церковию; иного же основаниа никтоже не можеть положити паче лежащаго. И аще кто измѣнитьсе, вѣчнѣиклятвѣосужены будут и горе наслѣдують. Се же бяше богомъ данныи законъ Израилтяномъ въ всемъ своемъ животѣ и имѣнии: въ девяти частеи имѣаху власть, а десятое богови отдааху.

В лѣто 6496 [988], въ ца рство Костянтина и Василия, при патриарсѣ Фотѣи, крестися самъ Володимеръ и всю Русь, и приведе с собою из Грѣкъ митрополита Леонта, такоже уставъ положи съборнои церкви, съблюдати нераздрушимо всему роду своему заповѣда, по немъ царьствующимъ и клятвами страшьными утверди; и правовѣрнѣи князи /л.265об./ велицѣи тожде приаша готово, а к тому и много приложишя, създавше церковь матери божии архиепископью, и подаваша грады, погосты, села, винограды, землѣ, борти, озера, рѣкы, волости съ всѣми прибыткы, и десятое изо всего царства и княжения. А княгыни ихъ свою многоцѣнную кузнь, порты, злато, камение драгое, великыи женчюгъ, иконы украшены, еуангелиа утварьна, священныя трапезы, съсуды, царскы украсивъше, обогатишя, паче тѣх, от кого ти приали. Писано бо есть въ святыхъ апостолъ правилѣ 29-мь: церковное богатьство нищих богатьство въздраста дѣля сиротъ и старости и немощи и въ недугъ въпадшиихъ, и нищихъ кръмление, и странной чяди прилежание, сиротамъ и убогимъ промышление, и вдовамъ пособие, дѣвицамъ потребы, обидимымъ заступление, въ напастехъ поможение, въ пожарѣ и въ потопѣ, и плѣннымъ свобожение и искупление, въ глад прѣкръмление, у худобѣ, умирающимъ покровъ на гробы и погрѣбания, а церквамъ и манастыремь пустымъ подъятие, живыимъ прибѣжище и утѣшение, а мертвы/л.266./имъ память, того ради на потребу церковную и люди свои давали. А се люди съборныя церкве прѣданы митрополитом и епископомъ: игуменъ, попъ, дияконъ, попадья, поповичеви и кто въ клиросѣ, игумениа, чернець, чернидя, проскурниця, паломникъ, лѣчець, прощеникъ, задушьныи человѣкъ, манастыреве, болници, гостинници, странноприимници: то люди церковные, а богадѣлные; митрополитъ или епископъ вѣдаеть между ими суд, или котораа обида, или вражда, или задница; аще будеть иному человѣку с тымъ человѣкомъ рѣчь, то обьчии ^А судъ. А се церковные суды даны закономъ божиемъ, по правиломъ святыхъ отець, христианьскыми цари и князи въ всѣхъ христианьскыих людѣх: роспусты, смилное, заставание, пошибание, умыкание, промежи мужемъ и женою о животѣ, въ племени или въ сватьствѣ поимуться, вѣдьство, зелеиничьство, потворы, чародѣяния, влъхвования, урѣканиа на три: бляднею и зелии, еретичьствомъ; зубоѣжа, сынъ отца биеть, или матерь, или дщи, или сноха свекровь, братиа /л.266об./ или дѣти тяжются о задницу, церковная тадба, и иже мертвеци съвлачять, гробы крадуть, крестъ посѣкають, или на стѣнахъ рѣжють, или трѣскы

изъ креста емлють, въ церкви скотъ или ^А псы или поткы ^А без велики нужа кто въведеть, или ино что неподобно церкви подѣеть, или два друга имета ся бити, единого жена иметь за лоно или роздавить, или когоВперёдть съ четвероногою, или кто молится под овиномъ или в рощении или у водѣ, или дѣвка дѣтя повержеть. Тыя вси суды церковныя даны суть церкви; князю и боляромъ и судиамъ ихъ в тыи суды нѣлзѣ въступатися по пръвыихъ царевъ уряжению и по вселеньскыих святыихъ патриархъ, великиихъ святитель. Аще кто приобидить сии уставъ, тѣмъ не прощенномъ быти от закона божиа, но горе себѣ наслѣдують; а своимъ тиуномъ приказываю суда церковнаго не обидити, и съ суду давати 9 чястии князю, а десятаа святѣи церкви. А кто пообидить сии уставъ ^Б. От княжя суда от всякого десятаа вѣкша, и с торгу /л.267./ десятаа недѣля, и от всего схода и прибытка и от лова княжя и от всякого стада и от всякого жита десятое въ соборную церковь: царь или князь въ девяти чястехъ, а церкы съборнаа десятую часть. Основания иного никтоже можеть положити паче лежащяго, да вси сограждають на семъ основании. Иже кто расыплеть храмъ божии, расыплеть и того богъ: церкы бо божиа свята есть. Кто измѣнить святыи сии уставъ отечьскыи, горе наслѣдует и клятву.

О МѣРИЛѣХЪ

Градскыя и торговыя и всякаа мѣрила, спуды, извѣсы, ставила от бога исконѣ како установленно святителю блюсти бес пакости, не умалити, ни умножити: за все то ему слово отдати въ день суда великаго, яко и о душахъ человѣчьскыихъ.

ПРАВИЛО СВЯТЫХ ОТЕЦЬ 1655-го СЪБОРА О ОБИДЯЩИХ ЦЕРКВИ БОЖИА И СВЯЩЕННЫА ВЛАСТИ ИХЪ.

Великааго сего нашего града съ пресвятыими архиепископы 100 и 60 и 5 се полагание писаниемъ прѣдаемъ: обидѣвшаа святыя божия церкве и на священныя власти ихъ, даное богу в наслѣдие вѣчныихъЦ благъ и на память послѣдняго рода обидящихъ власти тѣми даема, безаконно отъимаа села и винограды, аще ли кто и в сану приобидѣти начнеть, или суды въсхыщати, церковнаа оправданиа, или привълачяюще насилиемъ епископа, и попа и диякона, и всякого просто рещи священничьскаго чина, или манастыремъ данное граблениемъ и насилиемъ отъимаа от нихъ все даное, даемое богови, аще кто изъобрящется се творя, негодование и нерадство творя, и бещиние велие, мятыи святыми церквами, четверицею да вдасть пакы въспять церковное. Аще ли саномъ гордящиися негодовати начнуть нашего повелѣниа, истинному правилу не покорящеся святыихъ отець, въ каковомъ сану буди въ насъ, или воевода, воеводьства чюждь, или воинъ, воиньства чюждь. Пакы аще велиимъ негодованиемь начнуть негодовати, забывше вышнии страх, облъкшеся въ бестудие, повелѣваеть нашя власть тѣхъ огнемъ съжещи, домы же ихъ святыимъ божиимъ церквамъ въдати, их же обидѣшя. Аще ли же са/л.268./мыи вѣнець носящеи тоя же вины послѣдовати начнуть, надѣющеся богатьствѣ и благородствѣ, а истоваго неродяще, не отдавающе иже обидѣшя святыя божия церкве или манастыри, преждереченною виною да повинни будуть, по святыхъ же правилѣхъ, да будуть прокляти въ сии вѣкъ и въ будущии.

РУКОПИСАНИЕ СВЯТОГО КНЯЗЯ, КРЕСТИВЪШАГО РУСКУЮ ЗЕМЬЛЮ.

Во имя Отца и Сына и святого Духа. Се азъ князь великыи Володимеръ, нареченныи въ святѣмь крещении Василие, сынъ Святославль, внукъ Игоревъ и блаженныя княгыни Олгы, въсъприалъ есмь святое крещение от греческыихъ цареи Костянтина и Василия и от Фотия патриарха цареградскааго, взяхъ пръвааго митрополита Леона на Киевъ и на всю Русь, иже крести всю Рускую землю святымъ крещениемъ. И по том же, лѣтомъ многымъ минувшемь, създахъ церковь святыя Богородица Десятинную и дахъ еи десятину по всеи землѣ Рустѣи и съ княжения въ съборную церковь от всякого княжа суда десятую вѣкшу, а от торгу десятую недѣлю, а из домовъ на всякое лѣто /л.268об./ десятое от всякого стада и от всякого жита чюдному Спасу и чюдьнѣи его матери. И потомъ разгнувше греческыи номоканонъ и обрѣтохомъ в немъ, аже не подобаеть сихъ судовъ и тяжь князю судити, ни боляромъ его, ни судиямъ. И азъ, сгадавъ съ своею княгынею Анною и съ своими дѣтми, далъ есмь тыя суды церквамъ, митрополиту и всѣмъ епископомъ по Русьскои землѣ; а по томъ не надобѣ въступатися дѣтемъ моимъ, ни внучатомъ, ни всему роду моему до вѣка въ люди церковныя, ни въ вси суды ихъ гю всѣмъ городомъ и по волостемъ и по погостомъ и по свободамъ, кдѣ ни суть христиане; и своимъ тиуномъ приказываю церковнаго суда не обидити, ни судити безъ владычня намѣстника. А кто въступить на мое дание или сиа суды пообидить, судъ мнѣ и съ тѣмъ пред богомъ, а митрополиту проклинати его съборомъ. А се церковныя суды далъ есмь: роспусты, смилное, заставание, умыкание, пошибание, и промежю мужемъ и женою, и о животѣ, /л.269./ и въ племени или въ сватовьствѣ поимутся, вѣдьство, зелеиничьство, урѣкания три: блядьнею, зельи, еретичьство; зубоѣжа, или сынъ отца биеть, или матерь, или дщи, или сноха свекровь, или братиа биются, или братьа или дѣти тяжются о задницу, потворы, чародѣяниа, влъхвованиа, узлы. А се люди съборныя церкве прѣданы митрополитомъ и епископомъ: игуменъ, игумениа, подъ, попадиа, поповичеве, чернець, черниця, диаконъ, диаконоваа, проскурница и кто въ клиросѣ, пономарь, диякъ, и вси причетници церковнѣи и дѣти ихъ, вдовиця, калѣка, лѣчець, прощеникъ, задушьныи человѣкъ, прикладникъ, хромець, слѣпець; кто тыхъ внидеть въ вину, судити ихъ митрополиту и епископомъ, опроче мирян.