Книгохранильница Якова Кротова
 

ПЧЕЛА



По изд.: Пчела / Памятники литературы Древней Руси. XIII век. — М., 1981. — С.486-519.

Подготовка текста В.В.Колесова.

По рукописи XIV ст. ГПБ, F. п. I. 44, оп.: В.Семенов. Древнерусская «Пчела» по пергаменному списку. СПб., 1893, с.1-444.


КНИГЫ «БЧЕЛА». РЂЧИ И МУДРОСТИ О ЕУАГЕЛЬЯ И ОТЪ АПОСТОЛА, И ОТ СВЯТЫХ МУЖЬ, И РАЗУМЪ ВНЂШНИИХЪ ФИЛОСОФЪ.



О ЖИТИИСТЂИ ДОБРОДЂТЕЛИ И О ЗЛОБЂ


Соломонъ. Да не прельстять тебе мужи нечестивии, ни ходи в путь с ними, но уклони ногы своя от стезь ихъ, ногы бо ихъ на зло текуть, и скори суть на пролитье крЂви.

Яко же от оскомины пакость зубомъ, и дымъ — очима, тако и безаконие требующимъ его.

Всякъ, держайся добрыя дЂтели, не можеть быти безъ многыхъ врагъ.

Не мЂсто добродЂтелии, но добродЂтель мЂсто можеть украсити.

Нускыи . Престанье от зла — починокъ добродЂтели. Плутархъ. СвЂтлость добродЂтелии видима есть, яко и злато въ кровЂх; пища же сладъка является стражущим, а добродЂтель наказанымъ.

Лукавии мужи, аще и благою рЂчью свЂщають, но нрава ради невЂрни суть.

Идола образъ украшаеть, а мужа дЂянья.

Тако въсхощи жити, да ни боле тебе могущеи быша тебе обидЂли, но ни ты будеши страшенъ меньшимъ своимъ.

Мужу нЂкоему насилье створившу Плутарху и бЂгающю и стыдящюся усрЂтатися с нимъ, Плутархъ, единою усрЂтъ, рече ему: «Не тебЂ подобаеть мене бЂгати, но мнЂ тебе, занЂ праведенъ еси».

Аще нынЂшнее время добрЂ исправимъ, то и будущаго времени добра чаи.

Сократъ рече. Достоино основанью храминному и корабльному тверду быти, тако же и починку дЂломъ истинну и праву быти. Сократ. Се видЂвъ ученика своего, селу прилежаща, а учения небрегуща, и рече: «Блюдися, друже, еда село хотя сдЂлати, а душу пусту оставиши и несдЂлаиу».

И тъ же. Се видЂвъ друга своего, тъснущася к письцемъ, да быша написали на камени образъ его, и рече ему: «Ты ся тъснеши, да бы камень былъ подобенъ тебЂ, а о семъ въскую ся не печеши, а бы ты ся не уподобилъ камени?»

Медляя починаи дЂло, поченже, въборзЂ кончаи.

Диоген. Поноси ему нЂкто, яко по нечистымъ мЂстомъ ходить, и отвЂща: «И солнце такоже нечистыя мЂста осияеть, но не оскверняеться».

Пиперид мудрый рече. Достойно благому являти при словесныхъ, яже мыслить, а при дЂлЂхъ — яже творить.

Аристотель рече. Богъ можеть створити, елико хощеть, человЂкъ же тъ добръ, иже полезная промыслить.

Мужьскому добродЂянию знаменье бываеть не починанье дЂлъ, но скончание.




О МУДРОСТИ


От апостола. Не дЂти бывайте умомъ, но злобою млади будите, а умомъ же свершени.

ЛЂствица, утвержена и устроена твердо на здание, при трусЂ не распадеться, тако и сердце, утвержено мысльми, во время думы не устрашиться.

Сирах. НЂкто рече от златолюбець сице: «Уне ми имЂти каплю вазни, нежели ботарь ума». Ему же отвЂщавъ, любомудрець и рече: «А бы ми капля ума, негли глубина вазни».

Сократъ. Егда думаеши, помысли о преже бывшихъ и приложи она къ нонЂшьнимъ; тЂмъ бо не явленымъ, явленая скоро разумЂються.

ЛЂпа бо рЂчь велика знаменья доброумью являеть.

Диодоръ. Мудра дума паче многыхъ рукъ, и мудрый паче крЂпкаго.

Аристотель рече. Думы нЂсть ничтоже ино, но оскудЂнье ума. НевЂдуще бо, что подобаеть створити, или — ни, того ради и думаемъ; воля бо когождо не въдасть смотрити, яже подобаеть.

НЂкто впраша Вианта, кто есть добрый думца, и рече: «Время».

Фаворинъ рече. Достойно намъ, конець вещи преже смотривше, и тако начатье ихъ творити.





О ЧИСТОТЂ И О ЦЂЛОМУДРИИ


Иовъ. Аще въслЂдова сердце мое женЂ мужатЂ, или при дверехъ ея сЂдЂл, да тако бы и моя супруга угодна бы иному была.

Не льютъ мюра въ скверный съсудъ.

Плутархъ. Агисилаось, лакедЂмоньскый воевода, нЂкоторЂй женЂ краснЂй приступивши к нему, о тяжи въпрашающи, възврати лице въспять, рече: «Луче ми такымъ не покоритися, негли многомужный градъ взяти, уне бо ми есть своея съблюсти свободы, нЂгли инЂхъ поработити».

Но и Александръ царь не стерпЂ прити на видЂние Дарьевы жены, прекраснЂ ей сущи; но приходя къ матери еЂ, старЂй ей сущи, не стерпяше младое и красное зрЂти. Мы же, на сЂдло и на столцЂ, женьскыя очи попущающе, изъ оконець выничюще, како не мнимъся съгрЂшающе?

Епиктит. Аще хощеши кромЂ работы быти, самъ ся отпусти от работы, свободенъ бо будеши, аще ся отпустиши от похоти.

Менедем рече. УношЂ нЂкоему рекшю: «Велико дЂло есть, иже кто улучить вся, ихъ же жадаеть», — онъ же рече: «Се есть болЂ, иже не жадаеть неполезнаго».

Ксанфъ. Ксанфъ мудрый, видЂвъ домогубца мужа при дверехъ красны жены, и рече: «Сия сладость малая купить великую напасть».






О МУЖЕСТВЂ И О КРЂПОСТИ


Сократъ. Сь, видЂвъ коринфЂйская врата твердо замчена, и рече: «Ци жены здЂ живуть?»

Александръ. Се, молимъ сы ет дружины иощью напасти на супостаты, и рече: «Не царьскыя есть крЂпости побЂда».

Леонидий рече. Сь Леонидий лакедЂмоньскый, мало имЂя вои, иде на персы, и ему нЂкто рече: «Како с малыми вои идеши на толику землю?» Он же отвЂща: «С малыми иду, но съ хотящими и съ довлЂющими битися».

Аристотель рече. КрЂплыний есть, иже желание побЂждает, нигли ратники. Се бо есть лютъ и храборъ, аще кто собЂ одолЂеть.






О ПРАВДЂ


Цесарь Филипъ. НЂкоего Антипатрова друга пристави с судьями судити; потомъ же, поразумЂвъ извЂсто, яко вапомъ красить браду и главу, и сведе и от судийскаго стола рече: «Аще власомъ своимъ невЂренъ еси, то како людемъ и суду вЂренъ можеши быти?»

Менадръ . Да грабить мя богатъ, нЂгли убогъ, да обидить мя лучьший мене, нЂгли хужьшии. Уне бо есть терпЂти вышьщи себе насильство, нЂгли пущьшихъ.

Ипиридъ рече. Двоея дЂля вины человЂци от правды отступають — или страха ради, или срама ради.

Пифагоръ. ЗлЂй стражеть своими страстьми мучим и свЂстьми, иже кого обидЂлъ, неже бьем по тЂлу ранами и боденъ.





О БРАТОЛЮБЬИ И О ДРУЖБЂ


Иже строить протива лицю друга своего тенето, то самъ своею ногою увязнеть въ немъ.

Не остави друга древняго; новый бо не будеть ему подобенъ.

Филонъ. Мужь правдивъ есть не иже не обидитъ, но иже обидЂти мога, то не въсхощеть.

Аще другу не можеши угодити, то како можеши чюжему вЂренъ быти?

Все новое лучьши — и съсуды, и порты, а дружьба ветхая.

Земнии плоди от лЂта до лЂта ражаються, а дружба по вся дни.

Аристотель. Стяжанье достойно есть приобрЂсти другъ дЂля, неже другы стяжанья дЂля.

Се поношенъ бысть, яко съ лукавыми живеть, и отвЂща: «Добрый врачь есть, иже иметься лЂковати больных и отчаяныхъ всЂми врачи».

Критий. Иже всегда бесЂдують съ другомъ сладъкая, то сладость напослЂдокъ, на вражьство възвращаеться.

Антигонъ цесарь рече. Се же рабомъ моляшесь, да быша и съхраыили от мнимых другъ. И нЂкоему въпросившю его: «Въскую таку молбу твориши?» — отвЂща: «ЗанЂ отъ враг сам ся съблюдаю, вЂдая ихъ».

Агисилаосъ рече. НЂкто перескокъ прииде къ нему из нЂмець, а властелемъ велящимъ ему поручити вои свое, и рече: «Не подобает поручити чюжихъ побЂгшему от своихъ».






О МИЛОСТЫНЂ


Питаконъ. Сь, обидимъ бысть нЂ от кого, и власть имЂя мъстити себе, и отда, рече: «Прощенье есть лучьше мъщения: ово бо кроткаго естьства речеться, ово же звЂринаго»,

Разбойникъ нЂкый утапаше въ мори и нагъ выбреде къ брегу. Исократъ же, видЂвъ и зимою умирающа, и одЂ и, и обу и, и пищу давъ ему и отпусти и. И поносимъ же бысть от нЂкоего, зане незнаемаго разбойника снабдЂ, и отвЂща: «Не аки человЂка разбойника почьстихъ, но человЂчьское естество почьстихъ».






О БЛАГОДАТИ


Змию кормити и блудному даяти подобно есть: от обою бо ничто же добромысльно ражаеться.

Дионисий цесарь, слушая гудьца, добрЂ гудуща, обЂща ему даръ дати капь злата. Утру же бывшю и приде гудець проситъ обЂщанаго, он же отвЂща: «Ты вчера гуда възвеселилъ мя еси пЂсньми, а яз такоже обЂщаньем възвеселихъ тя, нынЂ же отиде от ушию моею веселие твое, а от тебе упованье мое».

НЂкоему другу, хотящю дщерь въдати замужь, и просящу у Олександра имЂнья по ней, сей повелЂлъ вдати по ней 50 талантъ злата. Иному же рекшю: «ДовлЂеть 10 талантъ», Олександръ отвЂща: «ТобЂ достойно толико просити, а мнЂ достойно толико даяти, елико есмь реклъ».

Сь, исполнивъ костий блюдо, посла къ Диогену, куньскому философу. Онъ же приимъ и рече: «Куньское брашьно се, но не цесарьский даръ».

Диогенъ рече. Сьй, въпрашаемъ бывъ от иного, которыя дЂля вины человЂци просящимъ дають, а мудролюбцемъ — не въдають, и отвЂща: «Зане хромоты и слЂпоты чають над собою и иныЂ проказы, мудрости же не чають».

Опикуръ. Не отмЂтай малаго дарованья: будеши бо невЂренъ къ болынимъ.






О ВЛАСТИ И О КНЯЖЕНИИ


Плутархъ. Притча глаголеть: дЂтемъ ножа не давай; азъ же рьку: ни дЂтемъ богатьства, ни мужемъ ненаказанымъ силы и власти подавати.

Дионъ Римьскый. Всячьская, яже велишь сущимъ подъ тобою — быти и творити, то преже самъ твори, потомъ же учи. ТЂмъ бо луче ихъ накажеши, неже законъным мучением: ово бо подражание имЂеть, а сь — страхъ, да уне есть с подражаньемъ, неже съ боязнью вънити въ лучьшее.

Димокритъ. Любимъ въсхощи быти при житьи, нежели страшенъ: его же бо вси бояться, и тъ всЂхъ боиться.

Цесарь ума вЂньцемъ не приищеть, умъ бо цесарьствуеть.

Агафонъ. Князю достойно три вещи въспоминати: первое — яко на человЂкы владЂеть; второе — яко законъ ему порученъ от господа; третье — яко власть си временъна сущи истлЂвасть.

Апаминда ФивЂйскый видЂ много вои без добра воеводы и рече: «Великъ звЂрь, но главы не имать».

ФивЂемъ гордящимъ, зане обладаша ЛакедЂмоньею, слышавъ же Коту, фракийский цесарь, и рече: «Азъ много ручаи видЂхъ, болша рЂкъ бывающихъ, но на мало время»,






О ЛЖИ И КЛЕВЕТЂ


Уне есть злое слышати, нежели злаго молвити.

Къ сему пришедъшю клеветнику и рекъшю: «Онъсии пред мною сице лаяшеть тебЂ» — и отвЂща: «Аще бы того не сладъко слушал, онъ бы мнЂ не лаялъ».

НЂкому рекъшю к нему: «Оньсии злЂ ти лаяшеть» — и отвЂща: «Ръци ему: атъ мя и бьеть кромЂ суща!»

Диогенъ. Сей, лаемъ от нЂкоего плЂшива, и рече: «Азъ лаяньемъ не въздаю тебЂ, но хвалю власы главы твоея, занЂ, испытавъши главу твою безумьную, и отбЂгоша!»

Аристипъ. Сей, от иного лаемъ, отступаше, затокъ уши. Оному же рищющу по немъ и кличющю: «Чему бЂжиши?» — он же рече: «Ей же, ты бо власть имаши злЂ молвити, азъ же власть имамъ ни стояти, ни слышати тебе».

Филимонъ. Иже лаяние претерьпить, крЂплии есть всЂхъ. Аще бо лаемъ не твориться ни слышая, то лающему есть горьчай смерти.

Димостенъ рече. И иному лающю ему, и рече: «Не борюся с тобою: имъ же бо одолЂю тебЂ, тЂмъ яко одолЂнъ буду».

Дионъ Римьскый . Якоже очьная болЂзнь видЂние омрачает и възбраняеть лежащая предъ собою видЂти, такоже и неправедъное слово, аще вънидет въ праведныхъ разумъ, то омраченьемъ гнЂвнымъ не дасть видЂти истины.

Дионисий цесарь рече. Сьй, слышавъ, цесарь, яко два уноши много молвиста на нь и на цесарьство его въ пиру, и повелЂ възвати я къ собЂ на обЂдъ. Видъ же единого упивъшася и много суетная глаголяща, а другаго съ страхомъ пыоща и съ блюденьемъ, оного отпусти, занЂ пьяница естьствомъ былъ, а оного посЂче, яко злоумьника и волею блудяща.






О ЛАСКАНЬИ


Фитионъ рече. МорьстЂи свиньи пловуть съ пловущими до самого брега морьскаго, на брегъ же не выходять. Такоже и ласкавци до тихости пребывають съ своими другы; а имъ же преклоняться друзи его на убожьство и на жесточЂишее житье, то отходять.

Плутархъ. Ласканье подобно есть щиту нетверду, вапомъ украшену: на нь же зрЂти сладъко, а потребы в немъ нЂсть ни единоя.






О БОГАТЬСТВЂ И О УБОЖЬСТВЂ, И О СРЕБРОЛЮБЬИ


Богатый възглаголеть — и вси умолкоша, и слово его възвысиша до облакъ.

Нускый рече. Луче есть мало имЂти съ добрымъ, нежели много съ злымъ.

Диогений. Сь, въпросимъ от инЂхъ, въскую злато блЂдо есть, и отвЂща: «ЗанЂ мнози на нь помышляють».

Тимодинъ. Сь, въпросимъ, что есть вышьши, богатьство ли или мудрость, и отвЂща: «Не вЂмь, но обаче вижю мудрыя, къ вратомъ богатаго ходяща».






О УДОБЬИ


Луче хлЂбъ съ солью въ молчаньи и бес печали, нежели предложение брашномъ многоцЂнънымъ съ мятежемъ и съ ужасомъ.

Климий. Всякое чресъ мЂру пакостьно.

Филонъ. Книголюбець, мало пищи и питья приемьля, стоить межи смертью и бесмертием: смертна бо тЂла дЂля приемлеть нужное, и душа его, бесмертия желающи, многоцЂнныя пища не ищеть.






О МОЛИТВЂ


Епикуръ рече. Аще бы богъ, послушая молитвы всЂхъ человЂкъ, и сътворилъ бы въслЂдъ моленья ихъ, то весь род человЂческый погыблъ бы, зане много зла другъ на друга молит.






О УЧЕНИИ И О БЕСЂДЂ


Богослов. Негласно дЂло лучи есть, нежели слово несвершено.

Уне есть на себЂ узду носити и от инЂхъ хытрыхъ коньникъ исправливатися, нежели намъ инЂхъ убо обуздати и коньникомъ быти.

ДЂи словесная, а не глаголи дЂяния.

Плутархъ. Сь глаголаше, яко Клеанфий и Ксенократий, тупа суща паче инЂхъ ученикъ, поношена быста. Она же отвЂщаста: «ВЂ подобна сЂсудомъ тонкожерлымъ, яже, едва приемля лЂемая, твердо и добрЂ хранять й».

Филиппъ цесарь. Гудьцю ладящю гусли своя, и Филипъ, сЂдя, и рече: «Криво ладиши, инако было». И гудець отвЂща: «Да не тако попустить богъ гнЂвъ свой на тя, цесарю, яко тобЂ лучьши мене умЂти гусльная!»

Якоже и коневи рзание, и псу брехание, и волови рютье, и лютому звЂри риканье дано есть, да то ихъ знаменье есть, такоже и человЂку слово, да то его знаменье, то же его градъ, то же его сила, то же оружье, то же и стЂна, сь животенъ боголюбенъ кромЂ всЂх животъ симъ почтенъ есть.

Мосхионъ. Егда бесЂдуеши съ ннЂми, преже смотри, аше луче тебе есть сповЂстьникъ тъ или хужьши, или равенъ тебЂ. Аще разумЂеши и лучьша себе — то покорися ему, аще же хужьши — то покори и, аще ли ровенъ тобЂ — то одиноумися с нимъ.

Солонъ. Сь глаголаше, яко слово — образъ есть дЂлу.

Иродот. Равное добро есть, о цесарю, аще кто самъ о собЂ добро мыслить и иного, глаголющаго добро, хочеть послушати.






О НАКАЗАНИИ


Еврипидий. Вси есмы хитри наказати, а сами не вЂмъ, что сътворимъ.

Осопъ. Сь рече: «Кождо насъ два мЂха носить: единъ пред собою, а другый — за собою. В предний же кладемъ чюжие грЂхы, а въ задний — свои».






О ЛЮБОМУДРИИ И О УЧЕНИИ ДЂТИИ


Невозможно есть велика учения начати мало учивъся.

Златоустъ. Рьци ми, кто васъ, домовь шедъ, книгы взялъ крестьяньскыя въ руку и чтение челъ, и испыталъ писание? Никто же можеть того изрещи. Но тавлЂи и шахы въ многых васъ обрЂтаеми суть, а книгь ни въ кого же, раз†и въ малыхъ, но и ти таци же, якоже и не имЂюще: съгнувъше бо я, и кладуть въ лари — а въсе имъ тъщание .на харатийную тонкоту и на грамотную красоту, а о чтеньи не пекуться. Не душевныя пользы ради стяжають книгы, но хотяще явити богатьство свое и гордость. Тако преумножися въ них тъщеславие, а никто же слыша рькуща: «ВЂмъ книжную силу!»

Климий. Мудрость въслЂдуеть дЂянию, якоже и тЂлу стЂнь.

ДЂлатели, видящи класы, клонящася к земъли, радуються, вЂдуще, яко исполнени суть жита; аще же прости стоять, печаль возложать дЂлателемъ, вЂдушимъ, яко тъщи суть. Такоже и уношЂ, тягости тъщеЂ и мудростьноЂ не имуще, с шатанием живуть, и образъ хожения, и лица ихъ буява, и обиды испольнена, имъ же не щадять всего. Наченше же съзирати и плодъ събирати от слова, тогда гордыньну укору отмЂтають. Якоже съсудъ тощь, въздуха исполнен есть, нальянъ же водою или виномъ, или инымъ чимъ исполненъ, воздухъ отходит, такоже и человЂци, исполнивъшеся истинънаго блага, отступаеть тщеславие.

Еронъ. Сь цесарь сикелиискыи въпроси Ксенофонта о творци ОмирЂ, и, оному же хулившю его, пакы въпроси его: «Колико рабъ имЂеши?» А тому рекшу: «Два, и тою едва могу укормити» — и отвЂща ему Иеронъ: «Не стыдиши ли ся, охуляи Омира, иже по своеи смерти кормить боле ста тысячь своим творениемъ?!»

Лаосъ рече. Сь, въпросимъ, что есть мудрость, и рече: «Искушение».

Чьто есть человЂку умну тяжелЂ всего работати? ОтвЂтъ: А тяжелЂ всего человЂку умыу работати глупа и упряма учити человЂка.






О БОГАТЬСТВЂ И О УБОЖЬСТВЂ


Сирахъ рече. Въспомяни гладъ въ время сытости, убожьство и скудьство во время богатьства: от утра и до вечера премЂняеться время.

Вазнь, якоже стрЂлець, овогда улучаеть, стрЂляющи въ насъ яко въ натычь, овогда же на прилежащая ближыяя.

Димонаксъ. Кажеть побЂда храбраго, а напасть умнаго.

Димитрий. Иже не можеть крЂпъко держати печалй, то радости не терпить.

Добровазнье мню, якоже и овощь: времени же минувшю исъхнеть.






О ЯРОСТИ И О ГНЂВЂ


Сирахъ. Ярость и гнЂвъ умаляеть дни.

Плутархъ. Ярость подобна есть суцЂ: якоже она слЂпа ражаеть щенята, такоже и от ярости слЂпы вины исходять.

Лютъ конь уздою въздержиться, а скоръ гнЂвъ умомъ обуздаеться.

Кротъко слово разрушаеть гнЂвъ.

Сотионъ. Сей рече: «БЂста два мужа мудра, а гнЂвлива — Араклитъ и Димокрит. Единъ же, разгнЂвався, прослезися, а другый — смЂяшеться, и тЂмъ нравомъ отбЂгоста ярости».






О МОЛЧАНИИ И О ТАЙНЂ


Богословъ. Глаголи, когда чюеши слово луче молъчания, молчанье же люби, еже чюеши луче глаголанья.

Пупо риторъ. Не хотя слышати многы рЂчи, повелЂ рабомъ своимъ протива прашанья отвЂщевати бес приложения. Потомъ же, почтити хотя Клавдия князя обЂдомъ, и посла зватъ его и устроивъ свЂтелъ пиръ. Наставъшю же часу обЂдьнему, и инии звании все приехаша, а Клавдия вси чаяху, и многажды посылаше обычнаго зватая съ загляданиемъ, аще идеть. Вечеру же бывъшу, отчаянъ бывъ Клавдии и рече рабу, звавшему й: «Звалъ ли еси?» — онъ же рече: «Ей!» И рече: «Како не приде?» — и онъ рече: «Яко не бЂ часъ». И онъ рече: «Въскую ми еси исперва не повЂдалъ?» И онъ рече: «О томъ бо еси мене не прашалъ».

Зинонъ философъ. Мучимъ цесаремъ Дмитром, да бы проявилъ которую тайну своего отечьства, и нудимъ сый, укуси языка своего и рождьвавъ, выплюну на нь.

(Аристотель). Сь, въпросимъ, что люто во всемъ житии, и отвЂща: «Молчати, яже льзЂ глаголати».

(Сократ). Сь, въпросимъ, кто тайну может хранити, и отвЂща: «Иже угль горячь можеть возложити на языкъ».

НЂкому поносящю ему, яко воняеть ему душа, и отвЂща: «Многы бо тайны изъгнили суть въ моемъ горлЂ».






О МНОГОПЫТАНИИ И О МОЛЧАНЬИ


Алькивиадъ. Сей имЂ пса красна; и седмь тысящь злата въдасть на немъ — и отрЂза ему хвостъ. НЂкому въпрошьшю его, что ради тако сътвори, и рече: «Да быша о томъ молвили люди, а не о мнЂ».

Мосхионъ. НЂкому рекъшю к нему: «Чему села не брежеши, а собою печешися?» — и рече: «Того дЂля пекуся, его же дЂля и село стяжахъ».

Герионъ. Сь, узрЂвъ мужа, на небо зряща и звЂзды пытающа, — и въ пропасть въпадъшася, и рече: «По достоянью еси приялъ, иже, земнаго не свЂдая, и небесныхъ пытаеши!»






О МНОГОИМАНЬИ И ОБИДЂ


Иже, чюже грабяи, съзидаеть имъ домъ свои, то яко каменье собра въ рЂку зимьнюю.

Диогенъ. Се засталъ татя, крадуща каменье его, и, оному запирающуся и глаголющю, яко: «Не вЂдая, твоя суща, украдохъ» — и рече: «Аще не вЂдалъ еси, яко — не твоя суть?»

Аще яже имЂемъ, не требуемъ, а яже не требуемъ, ищемъ, то от обоего лишени будемъ: овыхъ приклученья дЂля, а овыхъ — себе дЂля.






О ЧЬСТИ РОДИТЕЛЬ


Иже хотять промыслити своими отци, да позрять на стеркы. Они же, узрЂвше своего отца и старостью безъ крылъ суща, окрестъ его стояще, набьдять своими крылы и корьмлю без зависти подають, и, егда летЂти хочеть, помагають ему, по малу облегчающе своими крилы.

Прокопий (софист). Якоже удеса телесная наших дЂтии от рожьства повиваються, да быша крЂпка и права, и была дебела, такоже исперва подобаеть нам нравъ дЂтиный исправливати.

Такъ буди родителем своимъ, акъ бы молилъ быти дЂтемъ своим.

Никоклисъ. ЖенЂ его поносящи ему, зане сына своего, блудна суща, не прииметь, онъ же рече, плюнувъ: «И си слины от мене суть, но не на потребу ми есть!»






О СТРАСТИ


Лиственая трясанья устрашають заяци, а мужии некрЂпъкыхъ — стЂнь невевдьный.

Виасъ. Сь, въпросимъ, что въ семъ житии без страха есть, и отвЂща: «СвЂсть права».






О СКОРОВОЗВРАЩАЮЩИМСЯ И О ПОКАЯНИИ


Соломон. Мужь, ворочаяся языкомъ, падеть въ зло.

Имъ же простъ на измЂнение бываеть умъ, тЂхъ и житье бесщинъно есть.

ЧеловЂци подобни суть облакомъ, ииогда въ ино мЂсто воздухомъ носими.

ТЂхъ мнимъ безумъныхъ, иже скоро преклоняться на обЂ странЂ, якоже вихръ вертимъ, и гворове воднии, и морьскыя волны нестаемы.

Садъ, часто пресажаем, плода не носить.

Епихаръ. Мудру мужу недостойно каятися, но промыслити.






О ГРЂСЂ И О ИСПОВЂДАНЬИ


Плутархъ. Ни огня возможно покрыти ризою, ни скверна дЂла лЂты.






О ЧРЕСЪ СЫТОСТИ ЧРЕВУ УГАЖАЮЩЕ


Душа, насытившися, и медвена гнушаеться ста.

Стужающю чреву, съмЂряеться сердце, веселящю же ся ему — гордить умъ.

Сь, званъ на пиръ, не обЂщася, преже даже не въпроси, котории звани суть, и рече, яко въ одиномъ корабли плути можеть терпЂти, или въ одиномъ дому жити, а въ пиру съзлыми съсмЂситися — без ума есть.

Катонъ. Сь рече: «Люто есть съ чревомъ повЂсти дЂяти, ушью не имЂющу».

Волкъ, видЂвъ пастуха, Ђдуща чюжи овци отай въ кучЂ, и рече: «О, колико бысте голкы съставили, оже быхъ то я створилъ!»






О ПЕЧАЛИ И О БЕСПЕЧАЛЬИ


Соломонъ. Яко моль ризЂ и червь древу, тако и печаль мужеви пакостить сердцю.

Святаго Василья. Якоже черви въ изгнилЂ дре†ражаються, такоже и печаль въ мякъкыя человЂкы входить.

Сократъ. Сь, въпросимъ, что опечалить благыхъ, и рече: «Слава лукавыхъ».

Безумнии временем забудуть печали, а умнии — словомъ.






О СЪНЂ


Плутархъ. Въ дни спящу Филипу цесарю, и властелемъ его приЂздившимъ къ нему и пред враты стоявъше, и жалующим продолженья лежанья дЂля, Пармении же, выникъ, и рече имъ: «Не чюдитеся, еже нынЂ Филипъ спитъ: когда бо вы спасте, тогда онъ бьдяше!»






О ПЬЯНЬСТВЂ


Куръ цесарь, слышавъ, яко уноши, пыоще, много хулы изрекоша на нь, и, утру бывъшю, всЂ повели привести предъ ся и въпроси перваго, аще тако изъглаголаша о немъ. Онъ же отвЂща: «Тако рекохомъ, цесарю, и боле сихъ быхомъ изорькли, аще быхомъ боле имЂли вина!»

Диогенъ. Сему въдаша много вина въ пиру, и, въземъ, пролья. ИнЂмъ же поносящимъ ему, занЂ губить вино, и се отвЂща: «Аще бы вино не погыбло мною, то азъ быхъ погыблъ виномъ».

Нахаръсосъ. Се рече: «Егда сядеши въ пиру, первую чашю испьеши здоровью, а въторую сладости, а третиюю безумью, а послЂднюю — бЂсовьствию!»

Софоклисъ. Сь, въпросимъ, рече: «Лоза три розгы ражаеть: первый съ сластью, вторый пьяньства, третьюю безумью».






О ДЕРЗОСТИ И О ОБЛИЧЕНИИ


Сему древле послану от Афиней къ Филипу цесарю и съ дерзновениемъ бесЂдующю, и Филипъ рече: «Не убоиши ли ся, занЂ, повелю усЂкнути главу твою?» И онъ рече: «Ни, аще бо ты усЂкнеши ю, то мое отечьство бесмертиемъ почьстить ю».

Врагъ, истину исповЂдавъ, луче лицемЂрна друга.






О СТРАДАЛЮБИИ


Димостенъ. Сь, въпросимъ, како риторикию училъ, и рече: «Склочилъ масла боле вина».






О ТЩЕСЛАВИИ


Не хвались, егда ся явиши лучши злыхъ, но печалуйся, егда добрых не пристигнеши.

Буесть отнимаеть бытье мудрьное.

Тать ненавидить солньца, а гордый — кроткаго.

Сей, узрЂвъ отрока, о многоцЂнне хламидЂ гордяща, и рече ему: «Престани гордя о овчии волнЂ






О ИСТИНЂ И ЛЖИ


Соломон. Иже ся утвержает лъжею, тотъ пасеть вЂтры и птицЂ крилатыя.

Богословъ. Истина одина есть, а лъжи многомыслены.

Осопъ. Сь, въпросимъ, что польза от лъжи лъжющимъ, и рече: «Аще и право молвять, не имуть имъ вЂры».






О ХВАЛЕНИИ


Феофилактъ. Истинъная хула лучеи есть лицемЂрныя славы.

Исократъ. ВЂрных мни не тЂхъ, иже по твоему слову молвять, но иже противяться глаголемымъ тобою по криву.






О КРАСОТЂ


Сирах. Не похвали мужа красоты его ради, красота человЂческая познаеться възрастомъ сЂдинъ.

Плутархъ. Приникни къ зерцалу и смотри лица своего: да аще и красенъ ся явиши, твори протива своей красотЂ и не посрами еЂ злыми дЂлы; аще же злообразенъ еси, то личьное оскудЂние украси добродЂяньемъ.

Красны жены лобзания блюдися, яко змиина Ђда злаго.






О СЛАВЂ


Бещестье стерпЂти — велико и крЂпко, а еже сла†причяститися — великы душЂ требуеть и зЂло умны, дабы не отпалъ славы приимый. Но оже хощеши славу обрЂсти, — отжени славу; аще ли гониши славу — отпадеши славы, та бо слава — стЂнь славЂ.

Никто же, на стЂнЂ вапомъ написана хлЂба зря, аще и велми гладенъ есть, и иде укуситъ его.

Александръ. Сь плЂнилъ индЂянина, славна стрЂльца и нарочита. И онЂмъ рекшимъ: «Сь можеть сквозЂ перьстень прострЂлити» — повелЂ ему явити хытрость его пред собою. И не хотящу ему, повелЂ посЂщи. Ведущимъ же его на посЂчение, глагола къ водящимъ, яко: «Много время минуло, яко въ руку лука не прияхъ и убояхся, еда, погрЂшивъ, погублю си славу». Слышавъ же, Алексаидръ дивися и отпусти и съ дары, занЂ умрЂти изволи, нежели славу свою погубити.






О МНОГОМОЛВЛЕНИИ


Евагрий. Молви, яже достойно, и егда достойно, и о нихъ же достойно — и не услышиши, яже не достойно.

Мигдольный цвЂтъ мразомъ гыбнеть, занЂ ранЂи всЂхъ цвететь, человЂци же многымъ скоромолвлениемъ истляють. Подобаеть беспрестани умом възбраняти языку и въздержати струя его, да не будемъ безумнЂише гусии. Ти бо, егда прилетять от Киликия и къ Таурмении, вЂдуще, яко исъполнена мЂста та суть орлии, емлють въ уста каменье, яко замокъ гласу, и нощь прелетять.

Сь, въпросимъ, како д†уши имЂемъ, а единъ языкъ, и рече: «ЗанЂ достойно сугубо слышати, а одиною молвити».






О СМИРЕНИИ


Нилъ. Блаженъ мужь, иже имЂеть житье высоко, умъ же смЂренъ.






О ВРАЧЂХЪ


Никоклий. Сь, слышавъ злаго лЂчьца, яко глаголаше, велику силу имЂеть, и рече: «Како бо не хощеши тако рещи, иже толико людий убивъ, и яко неповиненъ ходиши!»






О ПАМЯТИ


Платонъ рече. ДЂти и старЂи равно непамятиви суть: ови растуще, ови изнемагающе. Что есть память? Держание видимых и слышаныхъ, погонение же ихъ испоминание наречеться. ТЂмъ бо тупии памятиви суть, а хитрии въспоминаньливи.






О ЗЂВИСТИ


Якоже мухы сдравая удеса прелЂтають, а къ гнойнымъ мЂстомъ прилипають, тако же и завистивии.

Что стонеши, завистьливыи, о своей ли напасти, цили о чюжем блазЂ?

Анахарсъ рече . Сь скутьскый философъ, въпросимъ бысть, коеи вины дЂля человЂци печальни суть воину, и рече: «Яко не токмо о своихъ напастехъ пекуться, но и о чюжемъ добровазньст※.

Зависть — есть струпъ правьдЂ.

Агафонъ. Аще бы не была въ человЂцЂхъ зависть, то вси быхомъ равни были.






О ВОЛЬНЂМ И НЕВОЛЬНЂМ


Уне ти есть волею печальну быти, нежели неволею радоватися.






О РАЗУМЂИ О СОБЂ


От Евангелия . Что зриши сучьца въ оцЂ брата своего, а въ своемъ бервьна не видиши!

Платонъ. Начало разуму — разумЂнье невЂжьства своего; мы же, не вЂдуще ничтоже, мнимся всевЂдуще.

Ираклий. Сь, уноша сый, приведенъ бысть пред учителя, вънегда философью учаше, и, въиросимъ сы от него: «Что, уноше, училъ ся еси?», и онъ отвЂща: «Се училъ ся есмь, яко не вЂмъ ничтоже». Слышавъ же, учитель чюдися, и вси, окрестъ стоящеи учителя, кликоша: «Воистину сь уноша хитрЂе всЂхъ насъ есть!»






О ЗАКОНЂ


Дионъ. Достойно лежащий законъ твердо хранити и ни единого ихъ не, измЂняти, уне бо древний держати законъ, нежели новый, аще и лучии мнитъся.

Залевк. Законъ подобенъ есть паучинЂ, якоже паучина, яже въ ню вълетить муха или комаръ, то увязнеть въ ней, аще ли бчела или шершень, то, исторгавше, вылЂтають. Тако же и законъ: аще въпадеть убогъ и простый мужь, то увязнеть въ немъ, аще ли богатъ или силный, то, рЂчью исторгавше, отидуть.






О БЕЗУМЬИ


ПЂсокъ и соль, и желЂза крици удобь подъяти, нежели человЂка безумна.

Зинон. НЂкто безумный уноша в Акадимии пряшеться о душЂ, Зинонъ же рече: «Что ся приши? Не омочивъ языка въ умЂ, много съгрЂшишь въ сло※.






О БЛУЖЕНИИ


Диогенъ рече. Сь, приступивъ къ нЂкоему уношЂ, испортивъшю отчю власть, и просяше у него десяти литръ злата. УношЂ же рекшу: «Въскую въ инЂхъ по цятЂ просиши, а у мене десяти литръ?» — и отвЂща: «У инЂхъ бо чаю взяти чго, а у тебе ничьтоже».

Зинонъ. Сь пряся съ раздавающимъ имЂние безума блудънымъ и, оному отвЂщавшу, яко от множьства мало исклачиваемъ, онъ же рече: «Или повари безумны суть, иже, пересоливъше брашно, и рекуть: «Много бо соли у иас есть?»






О БЛАГОРОДИИ И О ЗЛОРОДЬИ


Димостенъ. Не та пшеница добра мниться, иже на добрЂ поли пожата, но яже полоньна и на пищу угодна есть; такоже и мужа расудимъ не от славнаго рода, но от нрава.






О СМЂСЂ


Соломон. Буявый въ смЂхъ възносить глас свой, мужь же мудръ едва с кротостыо улыснеться.

Епиктит. СмЂхъ отгони и смЂху начальникъ не буди: мЂсто бо то полъзко къ хулЂ.






О СЪНЂ


Сонъная видЂния дньныхъ помыслъ суть възглашения, иже во снЂ видить любимая, тЂмъ и утЂшаеться.

Паче мЂры спати подобваеть мертвымъ, нежели живымъ.






О БЕЗЛОБИИ И О НЕВОСПОМИНАНИИ ЗЛУ


Есхииий. Сь осуженъ бысть от афинЂй, а Димостенъ, иже бЂ наставникъ граду, посла к нему 10 тысящь злата, утЂшая

и, дабы мужьскы терпЂлъ осужение и нужю бес бечали. Онъ же рече: «А како могу не печаловатися, выгонимъ сы от такового отечьства, въ немъ же обидимии пользують обидящимъ?»






О НЕПОСТОЯНИИ ЖИТЬЯ


Егда вся житья твоего исправлива.ються по твоей воли, тогда и чай измЂнения; и пакы, егда неначаемыя напасти обыдуть тя, тогда чай добра и лучьша.

Димокритъ. Подобиться житье се подърумию, въ немъ же многажды добрии падають, а хужьшии — на лучьшая мЂста выступають.

Яко достойно чьстити благодать, а злобу отгнати.

Сократъ. Сей, въпросимъ бысть, который град добрЂ стоитъ, и отвЂща: «Въ немъ же съ закономъ живуть, а обидящихъ казнятъ».

Солон. Тот град твердъ, в немъ же добрии. в чьсти суть, немощенъ въ немъ же злии чьстни.






ЯКО ПРОСТА ЕСТЬ ЗЛОБА, И ОДВА СЯ ГОДИТЪ БЛАГОДЂАНИЕ ЧЕЛОВЂКОМЪ


Диогенъ. Сь въ день древле свЂщю въжег, хожаше по граду, и нЂкоему и просивъшу: «Въскую се твориши, о философе?» — он же рече: «ЧеловЂкъ ищу!»






О САМОЛЮБЬИ


Критиас. Люто есть, еда че-ловЂкъ не уменъ сы, мниться уменъ быти.

Диогенъ. Друзии человЂци инЂхъ учат, а сами своего ученья не слушающе; то ти подобьни суть гуслемъ, иже человЂкомъ добръ глас испущают, а сами не слышатъ.






О СМЕРТИ


Отъ сего житья добро изити, яко ис пиру: ни жажуща, ни упивъшася добрЂ.

Сократ. Уне славну мужьскы умрети, нежели жити съ срамомъ.

Виасъ. УзрЂвъ на пути лежащь мечь и рече: «Кто тя погуби или кого ёси погубилъ?»






О МИРЂ И О РАТИ


Фавиинъ сынъ рече къ отьцю: «Исполчимся прямо ратнымъ, и сто от насъ не погыбьнеть». Онъ же рече: «А кто вЂсть, аще ты будеши от ста единъ?»

Брань славна лучьши есть мира скудъна.






О УПОВАНИИ


Плутарх. Ни корабль единомъ якоремъ спасеться, ни се житье единою надеждою.






О ЖЕНАХЪ


Уне жити въ пустыни съ львомъ и съ змиею, неже жити с женою лукавою и язычною.

(Солон) Сь, въпросимъ от иного, аще велить ему оженитися, онъ же рече: «Ни! Аще бо злообразну поимеши — мука ти будеть, аще ли красну — инии на ню хотять зрЂти!»

Диогенъ. Сь, видЂвъ жены прящася, и рече: «Зрите: како аспида отъ ехыдны зелья просить!»

Въ триехъ нужахъ был есмь: въ грамотикии, въ убожии, у люты жены; да двою нужю убЂжахъ, а злы жены не могу утечи!






О ПРОТИВОСЛОВЬИ И О ШАТАНИИ


Феофрасъ. Срамляй самъ ся, да от иного не посрамленъ будеши.






О СТАРОСТИ И О УНОСТИ


Не хули мужа въ старости его, ти бо от насъ старЂються.

Троего възненавиди, душе моя, и зЂло ми мерзитъ живогь ихъ: стара блядива, богата лжива, убога хупава.

(Диоген) Сь, видЂвъ стару жену, красящюся вапомъ, и рече: «Аше къ живымъ красишися — то облазнилася еси, аще ли къ мертвымъ — то не облЂнися!»

Димокритъ. Старъ мужь унотою былъ есть, унота же не вЂсть, аще дойдеть старости.



 
    Return