Книгохранильница Якова Кротова
 

Похвала роду рязанских князей



По изд.: Похвала роду рязанских князей / Памятники литературы Древней Руси. XIII век. — М., 1981. — С.200-203.

См. 13 век.



Сии бо государи рода Владимера Святославича — сродника Борису и ГлЂбу, внучата великаго князя Святослава Олговича Черниговьского. Бяше родом христолюбивыи, братолюбивыи, лицем красны, очима светлы, взором грозны, паче мЂры храбры, сердцем легкы, к бояром ласковы, к приеждим привЂтливы, к церквам прилЂжны, на пированье тщывы, до осподарьских потех охочи, ратному дЂлу велми искусны, к братье своей и ко их посолником величавы. Мужествен умъ имЂяше, в правде-истине пребываста, чистоту душевную и телесную без порока соблюдаста. Святаго корени отрасли, и богом насажденаго сада цвЂты прекрасныи. Воспитани быша въ благочестии со всяцем наказании духовнем. От самых пеленъ бога возлюбили. О церквах божиих велми печашеся, пустошных бесЂд нетворяще, срамных человекъ отвращашеся, а со благыми всегда бЂсЂдоваша, божественых писаниих всегода во умилении послушаше. Ратным во бранех страшениа ивляшеся, многия враги, востающи на них, побежаша, и во всех странах славна имя имяша. Ко греческим царем велику любовь имуща, и дары у нихъ многи взимаша. А по браце целомудрено живяста, смотряющи своего спасениа. В чистой совести, и крЂпости, и разума предержа земное царство и к небесному приближаяся. Плоти угодие не творяще, соблюдающи тЂло свое по браце греху непричасна. Государьский сан держа, а посту и молитве прилежаста; и кресты на рамЂ своем носяща. И честь и славу от всего мира приимаста, а святыа дни святого поста честно храняста, а по вся святыа посты причащастася святых пречистых бесмертных таин. И многи труды и побЂды по правой вЂре показаста. А с погаными половпы часто бьяшася за святыа церкви, и православную вЂру. А отчину свою от супостат велми без лЂности храняща. А милостину неоскудно даяше, и ласкою своею многих от невЂрных царей, детей их и братью к собЂ приимаста, и на вЂру истиную обращаста. БлаговЂрный во святом крещении Козма сяде на столе отца своего великаго князя Ингоря Святославича. И обнови землю Резаньскую, и церкви постави, и манастыри согради, и пришелцы утЂши, и люди собра. И бысть радость християном, их же избави богъ рукою своею крЂпкою от безбожнаго зловЂрнаго царя Батыя. А Кир Михайло Всеволодовича Пронского посади на отца его отчине.

 
    Return