Серапион Владимирский

Cлово

Господи, благослови Отче!

Слышасте, братье, самого Господа, глаголюща в Евангелии: «И в последняя лета будет знаменья в солнци, и в луне, и в звездах, и труси по местом, и глади». Тогда реченное Господом нашим ныня збысться - при нас, при последних, людех. Колико видехом солнца погибша и луну померькшю, и звездное пременение!

Ныне же земли трясенье своима очима видехом; земля, от начала утвержена и неподвижима, повеленьем Божиим ныне движеться, грехы нашими колеблется, безаконья нашего носити не может. Не послушахом Еуаггелья, не послушахом Апостола, не послушахом пророк, не послушахом светил великих, рку: Василья и Григорья Богословца, Иоана Златоуста, инех святитель святых, ими же вера утвержена бысть, еретици отгнани быша, и Бог всеми языкы познан бысть, и те учаще ны беспрестани, а мы - едина безаконья держимся! Се уже наказает ны Бог знаменьи, земли трясеньем его повеленьем: не глаголет усты, но делы наказает. Всем казнив ны, Бог не отведет злаго обычая.

Ныне землею трясет и колеблет, безаконья грехи многия от земля отрясти хощет, яко лествие от древа. Аще ли кто речет: «Преже сего потрясения беша и рати, и пожары быша же», - рку: «Тако есть, но - что потом бысть нам? Не глад ли? не морови ли? не рати ли многая? Мы же единако не покаяхомся, дондеже приде на ны язык немилостив попустившю Богу; и землю нашю пусту створша, и грады наши плениша, и церкви святыя разориша, отца и братью нашю избиша, матери наши и сестры в поруганье быша».

Ныне же, братье, се ведуще, убоимся прещенья сего страшнаго и припадем Господеви своему исповедающесь: да не внидем в болши гнев Господень, не наведем на ся казни болша первое. Еще мало ждет нашего покаянья, ждет нашего обращенья. Аще отступим скверных и немилостивых судов, аще применимся криваго резоимства и всякого грабленья, татбы, разбоя и нечистаго прелюбодеиства, отлучающа от Бога, сквернословья, лжи, клеветы, клятвы и поклепа, иных дел сотониных, - аще сих пременимся, добре веде: яко благая приимут ныне токмо в сии веке, в будущии, сам Бо Господь рече: «Обратитеся ко мне, обращюся к вам, отступите от всех, аз отступлю, казня вы".

Доколе не отступим от грех наших? Пощадим себе и чад своих: в кое время такы смерти напрасны видехом? Инии не могоша о дому своем ряду створити - восхыщени быша, инии с вечера здрави легше - на утрия не всташа: убоитеся, молю вы, сего напраснаго разлученья! Аще бо поидем в воли Господни, всем утешеньем утешит ны Бог небесный, акы сыны помилует ны, печаль земную отимет от нас, исход мирен подасть нам на ону жизнь, идеже радости и веселья бесконечнаго насладимся з добре угожьшими Богу.

Многа же глаголах вы братье и чада, но вижю: мало приемлют, пременяються наказаньем нашим; мнози же не внимают себе, акы бесмертны дремлют. Боюся, дабы не збылося о них слово, реченное Господом: «Аще не бых глаголал им, Греха не быша имели; ныне же извета не имут о гресе своемь». Много бо глаголю вам: аще бо не пременитеся, извета не имате пред Богом! Аз бо, грешныи ваш пастух, повеленое Господом створих, слово его предаю, вы же весте, како куплю владычню умножити. Егда бо придет судить вселенеи и воздати комуждо по делом его, тогда истяжет от вас - аще будете умножили талант, и прославит вы, в славе Отца своего, с Пресвятым Духом и ныне, присно, векы.

ПОУЧЕНИЕ

Многу печаль в сердци своем вижю вас ради, чада, понеже никако же вижю вы пременишася от дел неподобных. Не тако скорбит мати, видящи чада своя боляща, яко же аз, грешныи отец ваш, видя вы боляща безаконными делы.

Многажды глаголах вы, хотя отставити от вас злыи обычаи - никако же пременившася вижю вы. Аще кто вас разбоиник, разбоя не отстанет, аще кто крадет - татбы не лишиться, аще кто ненависть на друга имать - враждуя не почивает, аще кто обидит и восхватает грабя - не насытиться, аще кто резоимец - рез емля не престанеть, обаче, по пророку: «Всуе мятется: збирает, не весть кому збирает». Окаанныи и помыслит, яко наг родися - тако отходит, ничто же имый, но токмо клятву вечну; аще ли кто любодей - любодейства не отлучиться, сквернословец и пьяница своего обычая не останеться.

Како утешюся, видя вы от Бога отлучишасся? Како ли обрадуюсь? Всегда сею в ниву сердец ваших семя Божественое, николи же вижю прозябша и плод породивша. Молю вы, братье и сынове, пременитесь на лучьшее, обновитесь добрым обновленнем, престаните злая творяще, убойтесь створшаго ны Бога, вострепещете суда Его страшнаго! Кому грядем, кому приближаемся, отходяще света сего? Что речем, что отвещаем?

Страшно есть, чада, впасти в гнев Божии. Чему не видем, что приди на ны, в сем житии еще сущим? Чего не приведохом на ся? Какия казни от Бога не восприяхом? Не пленена ли бысть земля наша? Не взяти ли быша гради наши? Не вскоре ли падоша отци и братья наша трупием на земли? Не ведены ли быша жены и чада наша в плен? Не порабощени быхом оставшеи горкою си работою от иноплеменник? Се уже к 40 лет приближает томление и мука, и дане тяжькыя на ны не престанут, глади, морове живот наших, и в сласть хлеба своего изъести не можем, и воздыхание наше и печаль сушат кости наша. Кто же ны сего доведе? Наше безаконье и наши греси, наше неслушанье, наше непокаянье.

Молю вы, братье, кождо вас: внидите в помыслы ваша, узрите сердечныма очима дела ваша, - возненавидете их и отверзете я, к покаянью притецете. Гнев Божий престанет, и милость Господня излеется на ны, мы же в радости поживем в земли нашей, по ошествии же света сего придем радующеся, акы чада к Отцю, к Богу своему и наследим Царство Небесное, Его же ради от Господа создани быхом. Великий бо ны Господь створи, мы же ослушанием малы створихомся. Не погубим, братье, величая нашего: «Не послушници делом и закону спасаються, но творци». Аще ли чим пополземся, пакы к покаянью притецем, любовь к Богу принесем, прослезимся, милостыню к нищим по силе створим, бедным помощи могуще, от бед избавляйте. Аще не будем таци - гнев Божий будет на нас; всегда в любви пребывающи, мирно поживем.

Слышим бо Ниневгыю град: бывше великий множеством людии, полн же безаконья. Богу хотящу потребити, аки Содома и Гомора, Иону пророка посла, да проповедает погыбель града их. Они же, слышавше, не пождаша, но скоро пременишася от грех своих, и кождо от пути своего злаго, и потребиша безаконья своя покаянием, постом, молитвою и плачем, от старець и до унот, и до сущих младенец, и тех бо млека отлучиша на 3 дни, но и до скота: и конем, и всей животине пост створиша. И умолиша Господа, и томленье от него свободишася, ярость Божию премениша на милосердье и погибель избыша. Ионино пророчество вотще бысть, дондеже и потужи к Богу, яко в бещестье створися пророчество его: град бо не погибе! Иона же, акы человек, погибели и градьскыя ожидаше; Бог, видев их сердца яко воистину покаявшеся, обратишася кождо от своего зла делом и мыслью, - милость к нищим пусти.

Мы же что о сих речем? Чего не видехом? Чего ли ся над нами не створи? Чим же ли не кажет нас Господь Бог наш, хотя ны пременити от безаконии наших? Ни единого лета или зимы прииде, коли быхом не казними от Бога - и никако лишимся злаго нашего обычая: но в нем же кто гресе вязит - в том пребывает, на покаяние никто не подвигнеться, никто обещаеться к Богу истиною зла не створити. Какыя казни не подыимем в сии век и в будущий огнь неугасимый? Отселе престаните Бога прогневающе, молю вы!

Мнози бо межи вами Богу истиньно работают, но на сем свете равно со грешник от Бога казними суть, да светлеиших от Господа венец сподобяться, грешьником же болшее мучение, яко праведници казними быша за их безаконье. Се слышаще, убойтеся, вострепещите, престаните от зла, створите добро. Сам бо Господь рече: «Обратитесь ко мне, Аз обращюся к вам». Ждет нашего покаянья, миловати ны хощет, беды избавити хощет, зла хощет спасти! Мы же с Давидом речем: «Господи, вижь смерение наше, отпусти вся грехы наша, обрати ны, Боже, спасителю наш, везврати ярость свою от нас, да не век прогневаешися на ны, ни да простреши гнев свои от рода в род!» Ты бо еси Бог Небесный, и Тебе прославляем з безначальным Отцем и с Пречистым Духом и ныне, и присно, векы.

СЛОВО

Почюдим, братье, человеколюбье Бога нашего. Како ны приводить к себе? Кыми ли словесы не наказеть нас? Кыми ли запрещении не запрети нам? Мы же никако же к нему обратимся! Видев наша безаконья умножившася, видев ны заповеди Его отвергша, много знамении показав, много страха пущаше, много рабы своими учаше - и ничим же унше показахомся! Тогда наведе на ны язык немилостив, язык лют, язык, не щадящ красы уны, немощи старец, младости детии; двигнухом бо на ся ярость Бога нашего, по Давиду: «Вскоре возгорися ярость Его на ны».

Разрушены Божественьныя церкви, осквернены быша ссуди священии и честные кресты и святыя книгы, потоптана быша святая места, святи тели мечю во ядь быша, плоти преподобных мних птицам на снедь повержени быша, кровь и отец, и братья нашея, аки вода многа, землю напои, князии наших воевод крепость ищезе, храбрии наша, страха наполнешеся, бежаша, мьножайша же братья и чада наша в плен ведени быша, гради мнози опустели суть, села наша лядиною поростоша, и величество наше смирися, красота наша погыбе, богатьство наше онем в користь бысть, труд наш погании наследоваша, земля наша иноплемеником в достояние бысть, в поношение быхом живущим воскраи земля нашея, в посмех быхом врагом нашим, ибо сведохом собе, акы дождь с небеси, гнев Господень!

Подвигохом ярость Его на ся и отвратихом велию Его милость - и не дахом призирати на ся милосердныма очима. Не бысть казни, кая бы преминула нас, и ныне беспрестани казними есмы, не обратихомся к Господу, не покаяхомся о безаконии наших, не отступихом злых обычай наших, не оцестихомся калу греховнаго, забыхом казни страшныя на всю землю нашу; мали оставши, велици творимся. Тем же не престают злая мучаще ны: зависть умножилася, злоба преможе ны, величанье вознесе ум наш, ненависть на другы вселися в сердца наша, несытовьство имения поработи ны, не даст миловати ны сирот, не даст знати человеческаго естества - но, акы зверье жадают насытитися плоть, тако и мы жадаем и не престанем, абы всех погубити, а горкое то имънье и кровавое к собе пограбити; зверье ядше насыщаються, мы же насытитися не можем: того добывше, другаго желаем!

За праведное богатьство Бог не гневается на нас, но, еже рече пророком: «С небеси призри Господь видети, аще есть кто разумевая или взиская Бога, вси уклонишася вкупе», и прочее: «Ни ли разумевают все творящи безаконье снедающе люди моя в хлеба место?» Апостол же Павел беспрестани вопиет, глаголя: «Братье, не прикасайтеся делех злых и темных, ибо лихоимци грабители со идолослужители осудяться». Моисееви что рече Бог: «Аще злобою озлобите вдовицю и сироту, взопьют к мне, слухом услышю вопль их, и разгневаюся яростью, погублю вы мечем». И ныне збысться о нас реченое: не от меча ли падохом? не единою ли, ни двожды? Что же подобает нам творити, да злая престануть, яже томят ны? Помяните честно написано в Божественых книгах, еже самого Владыкы нашего болшая заповедь, еже любити другу друга, еже милость любити ко всякому человеку, еже любити ближняго своего аки себе, еже тело чисто зблюсти, а не осквернено будеть блюдомо; аше ли оскверниши, то очисти е покаянием; еже не высокомыслити, ни вздати зла противу злу ничего же. Тако ненавидить Господь Бог нас, яко злу помятива человека. Како речем: «Отче наш, остави нам грехи наши», а сами не ставляюще? В ню же бо, рече, меру мерите, отмерит вы ся. Богу нашему Слава.

ПОУЧЕНИЕ

Мал час порадовахся о вас, чада, видя вашю любовь и послушание к нашей худости, и мнях, яко уже утвердистеся и с радостию приемлете Божественое Писание, - «на свете нечистивых не ходите и на седалищи губителей не сидите». Аже еще поганьскаго обычая держитесь: волхвованию веруете и пожигаете огнем невиныя человекы и наводите на весь мир и град убийство; аще кто и не причастися убийству, но, в соньми быв в единой мысли, убийца же бысть; или могай помощи, а не поможе, аки сам убити повелел есть.

От которых книг или от ких писаний се слышасте, яко волхвованием глади бывают на земли и пакы волхвованием жита умножаються? То аже сему веруете, то чему пожигаете я? Молитеся и чтете я, дары и приносите им - ать строят мир, дождь пущают, тепло приводить, земли плодити велят! Се ныне по три лета житу рода несть не токмо в Русь, но в Латине: се волхвове ли створиша? Аще не Бог ли строит свою тварь, яко же хощет, за грехы нас томя?

Виде аз от Божественаго Написанья, яко чародеици и чародейца бесы действуют на род человеком и над скотом и потворити могут; над тими действуют, и им веруют. Богу попущьшу, беси действуют; попущает Бог, иже кто их боится, а иже кто веру тверду держить к Богу, с того чародеици не могуть. Печален есмь о вашем безумьи, молю вы, отступите дел поганскых. Аще хощете град оцистити от безаконных человек, радуюся тому; оцещайте, яко Давид пророк и царь потребляше от града Ерусалима вся творящая безаконие: овех убитием, иних заточением, иних же темницами; всегда град Господень чист творяше от грех.

Кто бо так бе судия, якоже Давид? Страхом Божиим судяше, Духом Святым видяше и по правде ответ даяше. Вы же как ссужаете на смерть, сами страсти исполни суще? И по правде не судите: иный по вражьде творить, иный горкаго того прибытка жадая, а иный ума не исполнен; толко жадает убити, пограбити, а еже а что убити, а того не весть. Правила божественаго повелевают многыми послух осудити на смерть человека. Вы же воду послухом постависте и глаголете: аще утапати начнет, неповинна есть; аще ли попловет - волхвов есть. Не может ли диявол, видя ваше маловерье, подержати, да не погрузится, дабы воврещи в душегубьство; яко, оставльше послушьство боготворенаго человека, идосте к бездушну естьству к воде приясть послушество на прогневанье Божие?

Слышасте от Бога казнь, посылаему на землю от первых род: до потопа на гыганты огнем, при потопе водою, при Содоме жюпелом, при фараоне десятью казнии, при хананиих шершенми, каменьем огненым с небеси; при судьях ратьми, при Давиде мором, при Тите плененьем, потом же трясеньемь земли и паденьемь града. При нашем же языце чего не видехом? Рати, глади, морове и труси; конечное, еже предани быхом иноплеменником не токмо на смерть и на плененье, но и на горкую работу. Се же все от Бога бываеть, и сим нам спасение здевает.

Ныне же, молю вы, за преднее безумье покайтесь и не будьте отселе аки трость, ветром колеблема. Но аще услышите что басний человеческых, к Божественому Писанию притецете, да враг наш дьявол, видев ваш разум, крепкодушье, и не возможет понудити вы на грех, но посрамлен отходит. Вижю вы бо великою любовью текущая в церковь и стояща з говеньем; тем же, аще бы ми мощно коегождо вас наполнит сердце и утробу разума Божественаго! Но не утружюся наказая вы и вразумляя, наставляя. Обида бо ми немала належить, аще вы такоя жизни не получите и Божия свита не узрите; не может бо пастух утешатись, видя овци от волка расхыщени, то како аз утешюсь, аще кому вас удееть злый волк дьявол? Но поминающе си нашю любовь, о вашем спасении потщитесь угодити створшему ны Богу, Ему же лепо всяка Слава честь.

СЛОВО О МАЛОВЕРИИ

Где се есть в Писаньи, еже человеком владети обильем или скудостью? подавати или дождь, или теплоту? О, неразумнии! Вся Бог творит, якоже хощет; беды и скудость посылаеть за грехи наша и наказая нас, приводя на покаянье. О, маловернии, слышасте казни от Бога: в первых родех потопа на гиганты, огнем пожьжени, а содомляне огнем же сожени, а при фараоне десять казней на Егупет, при ханании каменее огненое с небес пусти, при судьях рати наведе, при Давиде мор на люди, при Тите плен на Ерусалим, потом трясенье земли и паденьем града. И в наша лета чего не видехом зла? Многи беды и скорби, рати, голод, от поганых насилье. Но никако же пременимся от злых обычай наших; ныне же гнев Божий видящи и заповедаете: хто буде удавленика или утопленика погребл, не погубите людии сих, выгребите. О, безумье злое! О, маловерье!

Полни есми зла исполнени, о том не каемся. Потоп бысть при Нои не про удавленаго, ни про утопленика, но за людския неправды, и иныя казни бещисленыя. Драчь град 4 лета стоял от моря потоплен бысть и ныне в мори есть. В лясех от умноженья дождя 600 людий потопло, а инии в Перемышли граде 200 потопоша, и глад бысть 4 лета. Тамо же се все бысть в сия лета за грехи наша. О, человеци, се ли ваше покаянье? Сим ли Бога умолите, что утопла или удавленика выгрести? Сим ли Божию казнь хощете утишити? Лучши, братья, престанем от зла; лишимся всех дел злых: разбоя, грабленья, пьяньства, прелюбодейства, скупости, лихвы, обиды, татбы, лжива послушества, гнева, ярости, злопоминанья, лжи, клеветы, резоиманья. Аз бо грешный всегда учю вы, чада, велю вам каятися.

Вы же не престанете от злых дел. Егда кая на нас казнь от Бога придет, то боли прогневаем, изветы кладучи: того ради ведро, сего деля дождь, того деля жито не родиться; и бываете строители божией твари, а о безумьи своем почто не скорбите? Поганин бо, закона Божия не ведуще, не убивают единоверних своих, ни ограбляют, ни обадят, ни поклеплют, ни украдут, не заряться чужаго; всяк поганый брата своего не продаст; но, кого в них постигнет беда, то искупят его и на промысл дадуть ему; а найденая в торгу проявляют; а мы творимся, вернии, во имя Божие крещени есмы и, заповеди его слышаще, всегда неправды есмы исполнени и зависти, немилосердья; братью свою ограбляем, убиваем, в погань продаем; обадами, завистью, аще бы мощно, снели друг друга, но вся Бог боронит. Аще велможа или простый, то весь добытка жалает, како бы обидети кого. Окаянне, кого снедаеши? не таков же ли человек, яко же и ты? Не зверь есть, ни иноверец. Почто плач и клятву на ся влечеши? Или бессмертен еси? Не чаеши ли суда Божия, ни возданья комуждо по делом его? От сна бо востав не на молбу ум прилагаеши, но како бы кого озлобити, лжами перемочи кого.

Аще ся не останете сих, то горшая беды почаете по сем. Но, моляся, вам глаголю: приимем покаянье от сердца, да Бог оставит гнев свой и обратимся от всех дел злых, да Господь Бог обратиться к нам.

Се веде аз, поучаю вы, яко за моя грехи беды сия деються. Придете же со мною на покаянье, да умолим Бога; веде убо, аще ся покаеве, будем помиловани; аще ли не останетеся безумья и неправды, то узрите горша напослед. Богу же нашему слава.