СЛОВО О ДИМИТРИИ КУПЦЕ ЗОВОМОМ ПО РЕКЛУ БАСАРЪГЕ, КИЕВЛЕНИНЕ,
И О МУДРОМ И О БЛАГОРАЗУМНОМ СЫНЕ ЕГО, ОТРОЧАТИ ДОБРОМУДРОМ СМЫСЛЕ
Бысть некто купец богат зело в Руской земли во граде Киеве,
именем зовом Димитрий Басарга. Ему же некогда прилучися отплыти от славнаго
Царяграда. И бысть с ним рабов немало. И взя с собой единароднаго сына своего,
еще млада суща — возрастом седми лет. И пловяху же ему по морю, и внезапу
восташа ветр велий, и понесоша корабль по морю, и отбиша вся правления корабля.
И носивши корабль по морю 30 дней. Купец же Дмитрей воздев руце на небо и
нача молитися богу и испусти слезы от очию потоки немалый з детищем своим
и со отроки своими. И внезапу узреша град велик издалече стоящ, и возрадовася
купец радостию великою и обратиша корабль ко брегу, ко пристанищу градскому.
И видехом у пристанища того 300 и 30 кораблей стояща, и удивишася купец Дмитрей
тому, что много кораблей стоит: «Мню, яко земля та богата есть и купцы в ней
торгуют». И сниде с корабля купец Дмитрей и поиде во град. И стретоша его
гражане и рече ему: «Откуду еси, купче, прииде, и ис которого царствия, и
коей еси ты веры?» И купец тако рече: «Аз семи, господия, веры руской, верую
во единого бога, отца и сына и святаго духа, а урожением града Киева». И рекоша
ему граженя: «Брате купче, единой еси веры с нами — руской. Толке за наше
согрешение послал бог нам царя законопреступника ельнинския [1]веры и томит нас, хощет привлещи ко своей вере. Видиш ли,
купче, приходят купцы изо всех стран, хотят торговать в сем царстве всякими
товары. И царь им велит 3 загатки отгонуть. И оне не могут ни единой загатки
отгонуть. И сих ради загадок купцы все седят в темницы. И заповедывает царь
— не велит на торг никому хлебов петчи, дабы гладом измерли». Купец же Дмитрей,
слышав тако от гражан и возвратися скоро на карабль свой, хотя отплыть от
града того. И приде на корабль свой, ажно на корабли стоят стражи царевы,
занеже закон царев есть: как придет корабль ис которого царства и царь им
велит стрещи корабль, чтобы не отшел не обявяся царю тому.
Купец же Дмитрей, взем дары великия, и поиде к царю, а царю
тому имя Несмиян Гордяич. И приде купец Дмитрей, ста пред царем и рече: «Государь
царь Несмиян Гордяич: купчишко пришло из Руской страны, чтобы ты, государь,
дары принял, а торговать велел во своем царстве всякими товары». И рече царь
купцу: «Буди, купче, ныне ко мне обедать, а дары у тебя возму по времени же».
Приде купец к царю обедать и яко же пообеда у царя, и рече царь купцу: «Купче!
коей ты веры?» И купец рече ко царю: «Аз есми, царю, веры руской, верую во
единого бога, отца и сына и святаго духа». И рече царь купцу: «Аз чаял — единой
веры со мной и единого бога, и хотел тобе область дать, и торговать велел
бы во своем царстве всякими товары, и з дары и с проводники отпустити тобя
хотел во твою землю. А нынеча сказывает про себя — не моея веры, но руския.
И ныне же ти ведомо буди, купче, — отгадай ми сегодни загатку, что аз тобе
загону. Аше ли ту отгадает, и аз тобе другую загану. Аще ли и ту отгадает,
и яз тобе и третыою загону. Аще ли и ту отгадает, то аз тобе велю торговать
во своем царстве всякими товары, и з дары и с проводники отпустити тя имам
во твою землю. Аще ли загадок моих не отгадает и ты пребывай в моей вере,
аз тобе воздам великую честь и торговать велю во своем царстве всякими товары,
и з дары и с проводники отпущу тя во твою землю. Аще ли загадок моих не отгадает
и в вере моей не пребывает, то ведомо ти буди, купче,— велю главу твою мечем
усекнуть, а товар твой повелю на собя взять». Купец же Дмитрей став на долг
час, пониче лицем на землю, не имея что отвещать царю. И рече купец к царю:
«Яко же годе, царю, твоей державе, тако и будет. Дай мне сроку на 3 дни подумать,
а в 4 день приду к тобе да отгадаю твои загатки». Царь же даде ему сроку на
3 дни.
И прииде купец Дмитрей на корабль свой плача и рыдая, чая от
царя смерти приять. А сын его играет на карабли, на древце ездит: рукой за
конец держит, а другой рукой плеткой побивает, а мнит, яко на коне ездит,
яко же подобает детям игры творити. Детище же, виде отца своего велми печалня,
и отложи игру свою, и скоро тече ко отцу своему и рече: «Что тя вижу, отче
мой, велми печалня и изнемогающа? Кое зло прилучися тебе на сем царстве?»
Рече отец сыну своему: «Чадо мое милое! Ты играет по-детски, а отцовы печали
не ведаеш. Не веси ли, чадо мое милое, что ми царь отвечал смертный час? А
ответу не имам дать и не вем как пособить». И рече детище отцу своему: «Отче,
скажи мне, что тобе царь извечал и какую речь говорил тобе. Яз помогу ти».
И рече отец к сыну своему, воздохнув из глубины сердца своего: «Тебе ли, чадо
мое, помочи мне? А ты отроча младо еще. Аз и свершен муж, а смысла не знаю,
что ми царю отвещать, а ты ли, что хощеши царю отвещать и смыслить?» И рече
детище отцу своему: «Отче мой, скажи мне, что тебе царь извечал и какую речь
поведал тобе. Яз помогу ти. Ведомо же ти буди, отче: конь на рати познаваетца,
а милый друг у беды помогает. И ты, отче, скажи ми, младому своему отрочати,
что тобе царь извечал. Аще ли, отче, не поведаешь мне, то сам от царя смерть
примет, а меня погубит!» Слышав же отец от сына своего мудрую речь и рече
се: «Сыну мой, то печаль и рыдание имам от царя: царь мне велел у собя 3 загатки
отгадать. А тех ради 3-х загадок триста и 30 купцов седят в темнице, терпят
глад и наготу и скорбь имени ради Христова. И заповедывает царь не велит на
торг хлеба петчи, дабы гладом измерли. И яз, страха ради царева, взя сроку
на 3 дни, а в четвертый день хощет главу мою мечем усекнуть, а товар мой на
собя възять». И рече детище отцу своему: «Прости мя, отче, пред собой глаголати.
Безумных мужей рыдание твое: един хощеш печаль свою утаить, а мне, отрочати
своему, не поведает. Аз, отче, помогу ти. И ты, отче мой, молися богу, а не
тужи: аз за тобя загатки у царя отгадаю! Возверзи на господа печаль свою и
той тя пропитает!» Детище же взем игру свою и нача играть. Отец же его малу
утеху приим от сына своего и рече в себе: «Сын мой меня тешит, а что ему младому
отрочати учинить?» И плакася купец Дмитрей всю 3 дни.
И уже светающу четвертому дни, и призва сына своего и рече:
«Се, сыну мой, тот день приде, коего просих у царя. Что ми велиш пред царем
говорить?» И рече сын отцу своему: «Пойдем, отче, пред царя, возмем с собой
единаго раба. Воля господня да будет; яко же и бысть, тако же и будет. Буди
имя господне благословенно от ныне и до века!» Отец его дивися разумному ответу
сына своего и помышляше в себе, глаголя: «Господи, что се будет?» И пойде
купец Дмитрей ко царю с сыном своим и с рабом и ста пред царем. И рече царь
купцу: «Се, купче, тот день приде, коего просил у меня. Отгадай три загатки
мои!» И рече сын купцов ко царю: «Дай мне, царю, испить. Яз тебе загатки отгону».
И рече царь детищу: «Не подобает тобе загатки мои отгадовать. Аз велю купцу
сему отгадывать». И рече детище к царю: «Яз сего купца сын единородный и превозлюбленный,
аз за отца своего загатки отгадаю». Царь же налья чащу златую меду и даст
детищу. Детище же даст отцу своему. Отец же испив чашу и хотя отдать царю.
И детище же рече отцу своему: «Не отдавай, отче мой, чаши сия, но скры в недра
своя[2], занеже царево даяние не отходит вспят!» Отец же
послушав сына своего и съкры чашу в недра своя. Царь же налия другую чашу
и даст —детищу. Детище же испив чашу и скры в недра своя. Тако же и рабу повеле
скрыть в недра своя. И рече детище: «Царево даяние не ходит вспят».
И рече царь детищу: «Тебе глаголю, детище, загатку мою: много
ли того или мало от востока и до запада? Скажи мне». И рече детище ко царю:
«Загатку твою отгадаю: тово, царю, ни мало ни много — день с нощию. Солнце
пройдет в круг небесный от востока и до запада единым днем, а нощию единою
пройдет от севера и до юга. То тебе, царю, моя отгатка». И удивися царь тому
разумному ответу его, что ему добре разумно отвечал. И царь налиял чашу меду
и даст купцу, тако же и сыну его и рабу. Детище же и те повеле скрыть в недра
своя и рече: «Царево даяние не отходит вспять!» И рече царь детищу: «Другую
загатку во утрешний день отгадай, а ныне мы повеселимся». Почтив же царь купца
и сына его и раба и отпусти их.
На утрие же царь повеле собрать ипаты и тироны[3], и князи, и бояре и весь град на предивное
чюдо, что седми лет детище царевы загатки отгадывает. Царь же седя за столом
среди царского своего двора. Купец же Дмитрей приде ко царю с сыном своим
и с рабом и ста у престола царева и поклонистася все три равно до земли. И
рече царь детищу: «Младый отрок, а разумом смыслен! Отгадай ми сегодни другую
загатку: что днем десятая часть в миру убывает, а нощию десятая часть в миру
прибывает?» И рече детище ко царю: «Государь царь, той твои загатки младых
отроков. А сих ради словес твоих 300 и 30 купцов сидят в темнице,терпят глад
и скорбь и наготу имени ради Христова! То, царю, днем десятая часть в миру
убывает — солнцем воды усыхает из моря и из рек и из озер; а нощию десятая
часть в мир прибывает — ино та часть воды исполняется, занеже солнцу зашедшу
и несияющу. То тобе, царь, другая моя отгатка». Диви же ся царь разумному
его ответу, что ему разумно отвечал.
И рече царь детищу: «Младый отрок, а разумом смыслен! Отгадай
ми сегодни третею загатку, чтобы ся аз поганой не смеялся вам християном!»
И рече детище ко царю: «Тое загатки не отгадаю, потому что мало людей у тобя,
не перет кем сказать. И ты, царю, дай мне сроку на пять дней, а в 6 день повели
проповедником кликать по всем торгом, дабы шли на царев двор ипаты и тироны,
князи и бояре, и всякия люди: мужи и жены и девицы. А вам гражанам добро будет».
И царь даде ему сроку на 5 день.
А в 6 день велел проповедником[4] кликать по всем торгом, дабы шли на царев
двор ипаты и тироны, и князи и бояре и весь град. И снидеся весь град на царев
двор. Царь же, седя на престоле своем царском, в руце держит жезл, а в другой
меч, хотя главу купцу и сыну и рабу их усекнуть. И приде купец с сыном своим
и с рабом на царев двор и ста у престола царева и поклонистася царю все три
равно до земли. И рече царь детищу: «Младый отрок, а разумом смыслен! Отгадай
ми сегодни третьюю загатку, чтобы ся поганой не смиялсе вам християном». И
рече детище царю: «Ты еси, царю, велик и высоко седиш на престоле своем, а
яз есми отрок млад, стою у престола твоего. И аз тебе скажу, и ты молвишь:
«Не дослышал». И ты, царю, сойди с престола своего да пусти меня на престол
свой и дай мне одеяние свое царское и венец, и жезл, и меч своими руками.
И яз тебе отгадаю загатку твою третьюю». Царь же слышав от отрока и ста во
иступлении ума своего и оцепенеша кости его. И ступиша с престола своего и
пусти детище на престол и даст ему одеяние свое и венец, и жезл, и меч своими
руками. А рече в себе царь: «Аз его тешу, а что ему свести[5] младому отрочати?» А не ведает того, яко бог
власть дает комуждо хощет. И бысть голка велика во дворе царском: народом
хотяще видети чюдо, что будет. И рече детище ко царю: «Повели, царю, молчать
народом». И повеле царь молчати. И бысть тишина и молчание во дворе велие
народом. И возопи отрок велиим гласом и глаголя: «Ипаты и тироны, князи и
бояре и вси людие граждане — мужие и жены и девицы! В котораго бога хотите
веровать?» И рекоша вей единым гласом и глаголя: «Хотим веровать во отца и
сына и святаго духа. Помози нам!» Детище же извлек меч и отсече главу царю
и рече ему: «Се ти, царю, третьяя моя отгатка: не смейся поганой нам христьяном!»
И бысть голка велика на дворе царском народом. Детище же рече
и веле им молчать. И бысть тишина велия во дворе. И рече детище: «Ипаты и
тироны, князи и бояре и вси граженя, мужие и жены и девицы! Кого себе царем
поставите?» И возопиша вей людие единогласно рекуще: «Ты нас избавил от сего
мучителя, ты у нас и царем буди!» И детище же глаголя к народом: «Коли есте
меня производили над собой царем быть, но не вашим произволением, но божиим
строением все збысться. Аще бог по нас, кто на ны! Десница твоя, господи,
прославися, десная ти рука сокруши враги! Аще бы не господь предал сего гонителя
младому отрочати, то како мощно зрети на таковое величество и гордость? Царь
бо имянуем есть и все царство покоренно ему суть; ныне же господь предал в
руце наши. Возвеличим господа и прославим милосердие его, давшаго нам победу
на враги наша. Избавил есть господь отца моего и меня единороднаго сына отцу
моему и раб наших от лютаго сего мучителя и от горкия смерти, и вас милостию
своею господь посети и не отторг сущия веры християнския. Но всем нам подобает
славить святую Троицу, отца и сына и святаго духа!» И воскликнуша вей единым
гласом и с великой радостью и рекоша: «О, милосердие владычне! Много лет государю
нашему новому царю Борзосмыслу[6] Дмитреевичю!» И дивишася вей великой его мудрости
и младости.
И рече новый царь Борзосмысл Дмитреевич: «Взыщите ми патриярха!»
И они же ему рекоша: «Патриярх наш и учитель. гоним бысть злым нашим гонителем
и мучителем и богоотступником царем в заточение». И поводе царь вскоре патриярха
из заточения вон выпустить, да благословится от него на царство и примет свой
престол. Яко же и первие начнет люди учить закону господню и по заповедям
божиим ходить. И бысть радость велия во царствие том и дивишася вей разуму
и словеси его. Они же с радостию великою, — ипаты и тироны, князи и бояре,
— послаша множество посланников. И взыскаша патриярха в заточении и сказаша
вся по ряду патриярху, иже содеяшася во царствии том и как послал по него
новый царь Борзосмысл. Патриарх же слышав и прослезися и руце воздев на небо
и рече: «О владыко! Что ти воздам милосердию твоему, иже нам даровал еси в
последняя лета наша. Не предал еси нас беззаконному царю, избавил еси царство
и люди от горкаго сего мучителя!» И поиде патриярх с посланники во царство
с великой радостию, и возвестиша царю приход патриярхов. Царь же повеле всему
царству встретить патриярха с великой честию со кресты и со иконами и с клиросы[7] и всему народу. И вси стретоша патриярха с великой честию.
Патриярх же поклонися новому царю Борзосмыслу и рече: «Тебе повеле господь
царствовати!» II поклонися весь град со слезами и рече: «Много лет государю
нашему Борзосмыслу Дмитреевичю! Тебя господь послал избавить нас и град наш
от горкия смерти от сего мучителя!» И дивися патриярх возрасту и смыслу его.
И вниде патриярх во церковь и сотвори молитву, яко же подобает патриярхом;
и постави патриярх над царем на главе турей рог с маслом древяным; и воскипе
рог на нем, и благослови его патриярх на царство. Людие же вси воскликнуша
от мала и до велика: «Много лет государю нашему царю Борзосмыслу Дмитреевичю!»
Царь же сотвори в той день пиршество велие и созва патриярха и все множество
людей, ипаты, и тироны, князи и бояре.
И повеле царь привести царицу прежняго царя и рече ей: «Есть
ли у тобя сын или дщерь?» И рече ему царица: «Нет у меня сына, столке есть
у меня едина дщерь красна и мудра, а возрастом еще седми лет». И рече ей царь:
«В котораго бога хотите веровать?» И рече ему царица: «Дай мне, царю, сроку
на седмь дней, а в восьмый день приду да скажу тебе». Царь же даде ей сроку
на седмь дней. И в восьмый день приде царица и со дщерию пред царя и поклонися
царю и рече: «Хотим веровать богу твоему!» Царь же повеле патриярху крестити
царицу и со дщерью ея и вскоре венчася царь со тою девицей. И бысть радость
паче велия во царствии том.
И повеле царь привести купцов тех ис темниц. И приведенным
им бысть пред царя. И зря на них царь и удивися: бысть лица их, аки земля,
а тело их прилпе к костем, власы же их обростоша до раму[8], брады же их, аки стрелы по переем лежаща
от глада и от наготы, и ризы их распадошася. И расплакался царь на них смотрячи,
и учреди их царь у собя по три дни, и раздав им имения их и отпусти их коегождо
во свою землю с миром. Купцы же поидоша во свою землю, славяще бога и молящеся
богу за царя Добросмысла.
Повеле же царь от темниц замки поснимать, а седящая в темницах
и в заточении и во юзах повеле всех свободить и милостыню дал им доволню и
свободи всех. И рече царь отцу своему: «Отче мой! Избавил нас бог и пречистая
богомати от напрасный смерти. Восприими, отче мой, умиление и слезы от избавления
душ наших в день Страшнаго суда христова, яко да избавил нас господь геоны
огненный. И восприими, отче мой, болярство во царствии моем и боли доволно
о мире всего мира и о благостоянии святых божиих церквах, чтобы нам господь
подал свыше победу видимыя и невидимыя враги наша сопротивныя и возвысил бы
господь бог десницу нашу над бусорманы!» И разосла царь во все окрестныя царства
гонцы с листы, чтобы в его царство со всех государств ехали купцы на караблех
со всякими товары да торговали в его царстве безо всякия пакости и прекословия
всякими товары.
И отпустиша царь отца своего во свою землю и повеле привести
матерь свою и сродник своих. Отец же его скоро и не замедлив сяде на корабль
свой и поиде во свою землю. И приде купец Дмитрей во свою землю и росказа
жене своей и сродцам о избавлении смерти своей и сына своего и вся бывшая
по ряду и как сын его Добросмысл Дмитреевич царство правит. Мати же его слышавши
сия и наполнися радости великия. И собра весь род свой и поиде во царство
сына своего Добросмысла Дмитреевича, славяще бога и пречистую богоматерь.
И приде отец царев и мати во царство сына своего и ста на пристанище морстем.
И возвестиша граженя царю, что приехал отец его и мати и сродники и
ста у пристанища. Царь же возрадовася отцову приезду и матери своей и сродником
и учини им стречю с великою честию. Сам же царь Добросмысл встретил отца своего
и матерь и сродников своих во дворе царском. И бысть радость велик и брак
честен.
И начата купцы многия приходить ко царству его на кораблех
со многими товары. И вся суть учинишася во царствии его и обогате царство
велми всякими узорочии, златом и сребром и камением драгим и многоценным жемчюгом.
И начата царь Добросмысл Дмитреевич править царство свое во благоденьствии
и в тишине и во всяком исправлении безо всякого мятежа. И бысть царства его
60 седмь лет и пять месяц. И по преставлении своем приказа царство свое править
брату своему Кирьяку Дмитреевичю, а старейшинство приказа дяде своему Василию
Кудрявцу.
В славу и похвалу божиго и пречистьтя богородицы всегда и ныне
и присно и во веки веком. Аминь.»
