ЖИТИЕ ИОВА ЛЬГОВСКОГО

См. старообрядчество; 17 век. Кратко о нём Кротов.

«Повесть» известна в единственном списке начала XVIII века, переданном в 1971 году старообрядческим епископом Иоасафом (Карповым) археографической экспедиции Московского государственного университета.

Месяца Маия в 9 день

Повесть и сказание вкратце о житии и подвизех и отчасти чюдес исповедание преподобнаго отца нашего игумена и строителя Иова, иже многия святые обители создавшаго своими боговдохновенными труды, наипаче же пречестные Лавры святаго великомученика Димитрия Солуньскаго чюдотворца во пределех града Рыльска, на Семи реце на горах Льговских создавшаго, в посте просиявшаго.

Логисон патеро [1].

Исповедание чюдно и преславно слышите от мене, любимицы, еже есть потребно душам нашим. Но убо зело спешно, аще не точию слышатель будет кто, но и творец, якоже апостол Павел уча глаголет: не бо слышателе /л. 498./ праведни пред Богом, но творцы закону оправдятся. Аще бо кто скажет, вам сокровище сокровенно, и да может ли обогатети от показания, аще не со многим трудом и спехом ископавше его, приобрящете? Не убо того ради наказую вы, возлюбленная моя иночествующих отцы и братия, да безделно приимете, еже хощу сказати житие чюдно преподобнаго отца. Но и в душах ваших опасне начертавше, поспешите о том слове творцы быти, а не послушницы. Аз бо хуждьшии коснухся грехослужимую десницу прострети и на хартии написати, иже успешную души повесть предложив, еще же и самовидец бых и сын непотребный по духу благодати. Многая же и от древних мужей богоугодно с ним поживших слышах, глаголю же отца Феодосия Святогорца и Леонтия Цареградца, /л. 498 об./ трудов его и терпения и неповинная изгнания от присных сожителей его. Но не поревновах того ангельскаго и безплотнаго жития — вредне (!) же быв и возлюбив паче духа плоть. Но вы, отцы, да будете ревнители сему чюдному отцу. Мне бо лепо глаголати и вся вам опасне предлагаю. Должники вы творя. Богу бо рекшу к проныривому рабу аки ко мне: Почто таланта моего непредложи купцем, да аз пришел, с приплодом взял бых? Молю убо вас, отцы и братие, словесе моего в худости не (за)зрите. Без навычения бо есмь риторска и науки богословски и в лепоту не возмогу повести сея сотворити. Но веде вас, яко не противу слову неудобренну зрите, воз(з)ревше же противу силе моей собеседованную, послушайте мною /л. 499./ исповедуемаго жития. Яко же святый Симеон Метафраст повествует: жития и похвалы святых подобятся светлости звездам. Яко же бо звезды положением на небеси утверждены суть, всю же поднебесную просвещают: тыяжде и от индианов зрятся, ни сокрываются от скифов, землю озаряют и морю светят, и плавающих корабле управляют. Их же имен аще и несвемы, множества ради, обаче светлой доброте их чюдимся. Сице и светлость святых: аще и затворены суть мощи их во гробех, но силы их в поднебесной земными пределы не суть определенны. Чюдимся тех житию и удивляемся славе, его (!) же Бог угодившия ему прославляет, якоже прославил и есть сего угодника преподобнаго отца Иова. Его же дивное житие в просвещение и образ хотящим любовию работати Богови, писанием от дальних стран росийския /л. 499 об./ державы принесено последнему сему роду, от многих малая предложися сице.

Сей преподобный отец наш Иов рождение имея росийскаго царства, во едином от мест богоспасаемаго града Москвы, от предел града Волокаламскаго, от благочестиву родителю християнскаго закона болярска рода: от отца именем Тимофея, а прозванием Лихачева, матери же такоже боголюбивы. Имени же ея в забытии преминух: млад отрок остася в детске сир от матери. От святаго же крещения наречен бысть Иоанн. Отец же его приобщися по закону второму браку и мало поживе и ко Господу отиде в вечное блаженство. Вторая же его мати воспита во всяком благодеянии и вере и чистоте и целомудрию научила, яко присное чадо /л. 500./ свое. Егда е бысть времени достиже в научение грамоте божественнаго разума, вдаде его мати учителю учитися буквам. Бог же искони провидя еже несоделанное очима, зря сего отрока, откры ему разу мети вскоре писания, и всех сверстник своих превзыде, яко учителю его дивитися разуму его и прилежанию и тщанию ко церкви Божией, еже послушати чтомаго Святаго Писания. И вниде в сердце его благодать дара Святаго Духа, еже како угодити Господеви и спасти душю свою, и еже уединитися и устранитися мира сего суетнаго. И егдаже достиже до дванадесятаго лета возраста своего, не восхоте быти в волнении мирския красоты и богатства тленнаго, вся та остави Бога ради. И утаився матери и всех сродник своих, и отиде от дому своего яко един от нищих. И многая монастыри и места пустынная обшед

Бог же видя теплоту сердца его и кипение разума божественнаго, и доведе его до пристанища жизни нескончаемыя, глаголю же пречестныя обители Святыя Единосущныя и Живоначальныя Троицы — ограды преподобнаго и богоноснаго отца нашего игумена Сергия Радонежскаго чюдотворца иже в Маковце. И молитву велию и слезы теплыя пролия ко Пресвятей Троице, и у гроба преподобнаго Сергия любезне припадает и милости просит, еже у него водворитися и спасенну быти, и потом приходит и припадает к честным стопам тоя Лавры настоятелю преподобному отцу архимандриту Дионисию именем, мужю святу и чюдну житием, и молит и просит, еже быти ему во обители, и потрудитися на братию, и святаго иноческаго чина сподобитися от него. Преподобный же Дионисий, провидя духом премудрости отрока, еже в нем любви Божией /л. 501./ исполнену быти, и прият его яко приснаго сына и сочетовает его ко братии, и посылаем бывает на всякую монастырьскую службу. Святый же сей отрок велие послушание ко братии показа и труды, и ко церкви тщание, и молитву ко Господу возсылая, яко кадило благовонно. И паки по времени молит преподобнаго отца Дионисия, еже бы сподобил его лику иноческаго достояния восприяти.

Преподобный же видя слезы его и приводит во святую соборную и апостольскую церковь, и по обычаю постригает власы главы его и во иноческий образ облачает, и нарече имя ему вместо Иоанна Иовом, и сочетает братии, и приимает его себе во ученичество в келию. И поучает како быти младому иноку в послушании и целомудрии и чистоте душевней вкупе же и телесней, и посту, и молитве. Пострижеся сей преподобный Иов в лето 7117 [1609] года, во младости яко мало более 17 лет /л. 501 об./ труды же и терпение и пост и молитву его кто изочтет яко дивитися отцу ею архимандриту и мнозей братии о бодрости и крепости телесней и зелному посту Еще во отрочестве навыкшему (!) и не вкушати животных заклаему (!), якоже поведают знаеми его пустынножители воздержание его.

Пребысть же преподобный многа лета во обители Пресвятые Троицы и преподобнаго Сергия. Труждаяся на братию и наставнику своему отцу Дионисию во всем повинуяся, без лености ревнуя стопам его преледовати и житию его святому подражати. По времени же довол(ь)не припадает ко отцу и просит благословения и молитвы от него, еже наедине в пустыне бемолвствовати и неславиму быти от человек.

Преподобный же Дионисий сподобляет его благословения и молитвы и поучает его, како ополчатися к невидимым врагом и Христови работати верою /л. 502./ истинною. Многа от писания святаго пользовав его, отпусти от себе, провидя в нем цветущую добродетель и веру во Христе.

Преподобный же отец наш Иов вооружися силою крестною и пойде пустынная места искати, иде же Бог наставит, где обитати. Обходит многия леса и дебри, ища места покойна, идеже мощно Богу работати, от мирския молвы удалялся и все человеческое житие отринув, моляся Богу со слезами, направитися на место угодно, безмолвию и спасению подобно. И Богом вразумляем и наставляем, прииде преподобный в Новогородския пределы, во область Осташковскую и вселися в месте лесне и темне, зовому Могилеву, ископав в горе пещеру малу, и ту пребысть един безмолвствуя, единому Богу работая, и землю мотыкою копая и насевая от зелия пустыннаго, и тем тело свое питая, душу же /л. 502 об./ свою постом и молитвою насыщая. По случаю же некоему купцу заблудившу пути и в стремнины чаща леса впадшу, и обрете сего преподобнаго труждающагося, земныя плоды собирающа. И припадает той купец благословения прося и пути ко граду испытуя, велми плачася и обещание свое полагая Господеви Богу и Пречистей Богородице, да на сем месте созиждет церковь Пресвятыя Богородицы. Преподобный же, много поучив его о спасении души, и обещания своего не изменити. Купец же повеле ему пустыню строити и церковь поставити и келий созидати, понеже зело место угодно к монастырьскому строению, и вда преподобному милостыни сто рублев на созидание церковное. Святыи же путь ему указа. Сам же возложи упование свое на Господа Бога и Пречистую Богородицу и многи беды и искушения от бесовскаго мечтания претерпе и досаждения люта. Вооружив себе блаженный знамением честнаго Креста Господня и нача лес посека/л. 503./ти своима рукама и место отребляти и очищати ко строению Святыя церкви и вся приготови. И пойде к Великому Нову граду ко архиерею Исидору митрополиту бити челом о благословении сыятыя церкви здати и о антимисе. Святитель же подаде ему на созидание церкви грамоту и всю потребную утварь вручи ему. Блаженный же велми благодарствуя Бога и Пречистую Богородицу, и нача строити на месте своем церковь во има Пресвятыя Богородицы, честнаго Ея Успения, в помощь призывая християнскую Заступницу Пресвятую Богородицу. И прилагаше труды ко трудом и подвиги к подвигом, и разгарашеся яко огнь на божественную добродетель. И в то время един по единому начаша братия к нему приходити пустыннолюбцы. Святый же с радостию приимаше их, яко Богом посланнии, и поучаще их, како спастися. И вскоре созда церковь Пресвятыя Богородицы, и внезапу Божиим изволением от огня сгоре до основания прежде (!) освящения храма. Преждереченный (!) же купец по /л. 503 об./ времени прииде соглядати свое обещание и церковное строение, и виде згоревшу от огня, опечалился велми, виновна себе творя пред Богом и недостойна, и паки вторицею вручи преподобному отцу Иову сто рублев на создание церковное. И инии мнози християне начаша потребная ко церковному строению приносити. И воскоре совершиша вторую церковь Пресвятыя Богородицы, и та, Богу попустившу, от молнии згоре. Преподобный же благодарив Бога и Пресвятую Богородицу и братию утешив от печали, пойде сам ко православным христолюбцем на создание церковное просити милостыни. Овии начаша денгами подаяти, овии же младым скотом. И множество собрася всякаго скота, и сами разплодишася по пустыни ходяще. Молитвой же святаго отца Иова ни един зверь какой вреди скота его. И нача посылати братию по градом и продаяти скота, и тем имением паки третию церковь созда в похвалу Пресвятей Богородице честнаго Ея Успения, /л. 504./ и святыми иконами украси ю яко невесту, и книгами и ризами удоволи ея, и освящением освяти ея по благословению преосвященнаго Макария митрополита Новгородскаго. От него же и священства сан восприя и строительства чин пастырства. Службы же и литоргии всегда сам служаше, и о благочестивом царе моляше: еж(е) бы Господь в мире и тишине и благоденствии пода ослабу християном от иноплеменных [2]. Пение же единогласное наречное любляше и сам на клиросе в церкви часто пояше, якоже и учитель его преподобный Дионисий архимандрит Радонежский чюдотворец. И келии многим братиям сам созидая и древие рубяше сырое, и печи делаше, а угару в зимное время отнюдь не бываше молитвами его святыми. А спание его на ребрех николи же бываше, но сидя мало сна приимаше и до кончины своея. Многажды же сам пасяше и скот монастырский меж службою и вечернею, а пастырей /л. 504 об./ посылаше в полуденное время отдыхати. Сам же втайне во блатех розблачася с комаром и оводом и мшицам плоть свою даяше ясти. О, велия мужа сего чюднаго самовол(ь)ное терпение, кто не ублажит! А егда же путем от царствующаго града Москвы шествоваше и где видя человека древняго леты и взимаше в монастырь свой, и доволяше его пищею и одеждою(!) и о спасении души его моляшеся. Таков бе страннолюбив и нищелюбив. Иногда же богомольцы и нищии прихождаху и милостыни прошаху, всем подаяше хлебы. Аще кто от братии поропщет святому сему, еже много даеши, он же вдвое и втрое подаяше. Хлеба же наипаче множашеся молитвами святаго, якоже напреди будет написуемо в чюдотворении его. Ово же пруды и кладези многи прекоповаше и мелницы строяше /л. 505./ и труждашеся, образ собою всем братиям показоваше. Многих же неверных человек поляков и татар и черкас и корелов привождаше учением своим во православную Христову веру. И сам крестяше их во имя Отца и Сына и Святаго Духа, без лености до старости в бодрости и силе пребываше. И в крестном хождении отнюдь недаяше себе вести дияконом на высокия горы Льговския, сам о себе идяше в такой древности. И тако пасяше христоименитое стадо словесных овец своея ограды. Слово бо его полезное и сладостное ко всем великим и малы любезное а не гневное и не гордостное, всем угождаше Богу и человеком.

Искони же ненавидяи рода християнскаго враг диявол востает и водвизает во братии мятеж и ропот на преподобнаго сего мужа /л. 505 об./, пустыннолюбца и страннопитателя и нищеприятеля, яко всегда литоргисаше, и многажды всенощная пения многим святым пояше и служаше. И худость ризную многошвенную его ненавидяху и гнушахуся, яко невежди и поселянина. И то яко странным много раздаваше хлеба, и скудость себе мнеще терпети, а неведуще враждующий, яко молитвами его святыми вся преизобильствует во обители его. Преподобный же отец наш Иов строитель, дая место гневу роптавшим братиям, отиде втай нощию никому же ведущу в далечайшия пустынныя места, ища безмолвия. Ничтоже взем, ни пищи ни одеяния, но токмо сам себе пасяше и соблюдаше душу свою от вражия сети и пронырства лукаваго. Многи стремнины и блата и чаща леса обыйде и многажды со зверьми в разселинах и пещерах горских обиташе, Божиею помощию покрываем от них, никоея пакости прием, неякоже от ропчющих иноков.

Бог же, видя его пустынное пребывание, доведе его в место зовомо Ракова пустыня на речке глаголеме имя рек, и возлюби /л. 506./ е зело. И сотвори молитву Господеви, и постави крест и малу хлевину, понеже место угодно бе ему безмолвствовати, от человеческие молвы удалено. И пребысть многое время ту подвизаяся и труды ко трудом прилагая, и пост к посту, зелнейши себе удручаше воздержанием, тело же свое питаше вершием дубовым, до конца смирив себе и очисти душу свою яко зерцало. Бог же премилостивый паки устрояет его пастырем, еже пещися ему душами християньскими, посылает к нему от далечайших стран иноков Бога ради странствовавших. И моляху преподобнаго отца, еже сожительствовати с ним вкупе, и святыни его сообещники быти и ревновати во всем добродетели его. Преподобный же толико беззлобив, паки братию Богом посланных приимаше, повсюду бо слава об нем происхождаше, неможе нигде укрытися.

По времени же многих христолюбцов милостыни подаянием и церковь постави в похвалу Пресвятыя Богородицы честнаго Ея Покрова, славословие Божие. Такожде украси ю иконами и книгами и ризами и всякою утварию церковною. Паки таяжде добрая дела творяше и поучаше /л. 506 об./ братию посту и молитве и любви нелицемерней между собою. Веру же истинную держати непорочну, и латыньския ереси уклонятися, последовати же Святых Отец преданию седми Вселенских Соборов. Сам же всегда во трудех пребывая, работая на братию: ово дрова сецаше, ово же жито меляше своима рукама, и воду ношаше. Иногда же и власяницы мыяше на престаревших иноков, и всем им служаше, яко истовый раб или пленник. Бе, бо зело бодр и крепок телом. Мнози же слышаху окрестнии и далнии жителие, велми удивляхуся жестокому его труду и терпению и блажаху его. Преподобный же, бегая славы, отнюдь ненавидя славим быти от человек, желаше бо любиму быти ему от Бога, уклонися паки в пустыни и дебри, и многое время един Богови работая.

Божием же изволением невкое время дойде царствующаго /л. 507./ града Москвы, еже помолитися святей соборней церкви и святым угодником, Божиим, честным ракам их достигнута и мощем их приложитися. Мановением же и действием Пресвятаго Духа извещение приим пресвятейший патриарх Филарет Никитичь Московский и всея Росии, присмотре сего преподобнаго Иова пустынножителя, и пригласи его к себе и благослови десницею своею, и повеле ему ити после божественный литоргии в келию к себе, и приобщи его к трапезе своей, и потом вопроси его, кто и откуду и где пребывание его. Блаженный же отец вся по ряду бываемая поведа ему о себе, крайнему пастырю. Святейший же патриарх возлюби его зело за толикий труд иночества, и повеле ему у себе в келии пребывати, насыщался добродетельми его божественными. И многое время пребысть у него в послушании, паки воспомяну преподобный пустынное /л. 507 об./ свое первое житие, не восхоте славы сея маловременныя. По пророку (!) Давыдову словеси, се удалихся бегая и водворихся в пустыню.

Се же помыслив преподобный то и сотвори: утаився пресвятейшаго патриарха и отиде паки на прежнюю свою пустыню Могилевскую. Братия же вси возрадовашася о пришествии его, а прежде негодовавший иноцы на святаго, прежде его в бегство, претворившеся инамо. Егда же святейший патриарх Филарет ко Господу отиде, преподобный же паки ища безмолвия на пустынное житие обратися. И прииде в пределы града Тфери во Верховской стан Старицскаго уезда на речку Держичю, в Красныя горы, и возлюби место сие, и нача жителствовати един о Христе Бозе, инаго брата себе не имея. Господь же и ту его пришествием место освяти и уготова любящим его воистинну, посла своя рабы к нему на подвизание и на создание сея пустыни, во дни святейшаго Иоасафа Перваго патриарха Московскаго и всея Росии, при преосвященном епископе Нектарии /л. 508./ Тферском и Кашинском. Нигде не може блаженный утаитися и укрытися. Господь бо рече: славящая бо Мя прославлю пред ангелы и человеки. Не может бо град укрытися верху горы стоящ, ни светимник под спудом или под одром держимый, но на свещнице поставляемый да светит всем, иже во храмине суть. Тако и сему преподобному мнози христолюбцы желающе отцем и пастырем его имети, и ревнующе его благоговеинству, моляху его, да созиждет дом молитвенный на словословие Божие. Преподобный же аще и не хотяше, но повинуяся братии и созда церковь малу во имя великого во ерарсех святаго Николы чюдотворца, такоже с Божиею помощию и Пресвятыя Богородицы, снабдеваем христоименитыми людьми их подаянием.

Повсюду бо яко луча солнечная осиявающи добродетельми своими и досязающи в слухи до царствующаго града Москвы и до его царскаго Величества Государя и Царя Михáйла Феодоровича всеа Росии самодержца. По преставлении Святейшаго Иоасафа патриарха царским повелением и всего Освященнаго Собора всем властем собранным бывшим в царствующий /л. 508 об./ град Москву, доиде же царсткое повелительство и до сея пустыни Святаго Николы чюдотворца, еже быти преподобному отцу нашему на Соборе со святители. Еже нужда бе ему укрытися и с великою печалию пойде до Московскаго царства. И егда предста царскому лицу и всему освященному Собору и много избрания сотвориша меж себе по Апостолу по жребию. И паде жребий на дву достойных престола архиерейскаго седалища: на Симановскаго архимандрита Иосифа и на сего блаженнейшаго Иова отца нашего и пастыря. И царева избрания ради много нудим бе, еже прияти сан архиерейства. Святый же, видя себе отовсюду утесняема, не восхоте пустыню оставити, претвори себе Бога ради уродством и невеждою, аще и саном и брадою величества и доброгласием украшена. Но обаче Божиею помощию покрываем, утаися всего собора и царскаго величества и бежа во свою пустыню желанную, окрылате умом, яко серна от тенята. И паки радость сотвори учеником своим и много благодарение Богови возсылая и Пречистеи Богоматере и великому заступнику /л. 509./ Николе чюдотворцу. И того ради обет полагает преподобный отец святым верховным апостолом Петру и Павлу, еже создати храм во имя их зде во пустыни, что на их память Господь его укрыл от избрания царева и всего Освященнаго Собора на пастырский престол патриаршества. Разумейте, христолюбцы, блаженнаго сего мужа, еже не восхоте сана величества прияти себе. Но паче пустынное житие лобзаше, поминая Господне слово глаголющее, еже кому много дано, много и взыщется от него; и Приточника глаголюща: еже бо чести многи воздвижют во человецех брови и отменяют в человецех крови; жестоко убо быти в сану высоком. Се же преподобный помыслив то и сотвори бегство Христа ради, и Божиим изволением и милостынею христолюбцов созда церковь Святых апостол Петра и Павла во ограде своей, и освяти ю сам /л. 509 об./. И иная многая строения в пустыни сей полагая труды своими, не дая себе покоя телеснаго никогда же, но присно в подвизех пребывая день и нощь, собою братии образ показуя всем.

В лето [7]161 (го)ду [1653] [3]. Некогда бо прииде ему желание духовное, еже посетити ему святая места Богом спасаемаго града Киева дойти, и Богом зданныя пещеры преподобных отец Антония и Феодосия видети, и Святым мощем помолитися о нашедшем серпе немилостивем на Рускую землю мороваго поветрия. Чтобы Господь милостивым оком призрел на нас грешных и недостойных рабех своих. Еже и сотвори блаженный обещание свое, предложи учеником своим, еже достигнути святых пещер. Братия же много сетующе по нем и много молиша его со слезами, еже не оставити их сирых неимуще такова пастыря себе. Преподобный же отец наш Иов предложи /л. 510./ им свое боговдохновенное учение от святых отец и мало утешив их от печали, яко присная своя духовная чада, обещася по молитве паки возвратитися, аще Господь Бог и Пречистая Богородица изволит и угодник их великий святитель Николае чюдотворец. И потом поручи братию Господеви и благослови их, пойде в путь свой, взя единаго токмо ученика и сопостника своего Феодосия именем Святогорца. И достизают града Киева и святыя соборныя церкви Премудрости Божий Софии, и пещер преподобных отец. И любезно к мощем их припадают и молятся о себе и о всем православном християнстве. Приидоша же и во обитель Пресвятыя Богородицы Межицкаго монастыря, и ту селитву себе и обитание приемлют, и прочия святыя места обходят. Таможе обретает себе ученика и послушника некоего дворянска рода именем Иоанна Петрова [4] пореклу Савеловых, желающа иноческаго чина вседушно /л. 510 об./. Преподобный же сподобляет его иноческаго чина постризает его во святый ангельский образ и нарицает по писанию именем Иоаким. И поучи его от писания божественнаго, како подобает иноческое житие проходити непорочно и соблюдати обещание свое. И тако вси трие вкупе пребыша во граде Киеве и Межицком монастыре. И потом возвратишася паки в Великую Росию в Лавру Святаго Николы чюдотворца с новопостриженым учеником Иоакимом. И мало поживе в келий преподобнаго отца Иова в послушании, и отиде по благословению во град Можаеск посетити отца своего Петра при старости [иже бысть последи на Москве патриархом] [5]. Паки же да речем вам, иночествующих лицы, еще о блаженнем, елико слышах от ученика его священноинока Святогорца Феодосия, еже многих его трудов и подвизаний самовидец /л. 511./ быв и ученика же его старца Тихона.

Некогда бо грядущу ему путем к Москве ради духовных управлений от обители своея Никольския пустыни. И (с)лучися ему путь миновати близ монастыря Воскресения Христа Бога нашего иже на Истре реце строение святейшаго господина Никона патриарха Московскаго и всеа Росии. Тогда бывшу ему ту во обители своей пребывающу по сошествии со престола, и невемы, како уведа о сем нашем отце, еже путем шествует. Посла во стретение его, желая видети ангелоподобное лице его и житие слыша его чюдное и святое, реку поистинне. И много беседова с ним, вопрошая сам о пребывании его. Святый же потаявая своея труды, не восхоте чести архипастырской, претвори себе урода и несмысленна и невежду от писания. И тако утаився от него, путем своим отиде к царствующему граду Москве ради потребы /л. 511 об./ монастырский. И вся по Бозе исправи паки возвратися во свою киновию Святаго Николы чюдотворца.

Всепагубный же змий лукавый отступник льстивый паки воздвизает бурю велию на всю Росийскую землю мятеж, паче же на Церковь Божию: усты дунув адскими, челюстьми хотя поглотити в прелесть свою пестрообразную род християнский, и разврати люди Божия разных стран обычаев поганских. Паче же воздвиже иконоборцов, еже не покланятися святым иконам, и многия иные соблазны возниче в мире по писанию святых отец, якоже рекоша: отступят нецыи от веры, внемлюще духовом лестным, и прочая... Преподобный же отец наш Иов обыче странствовати и бегати от прелести мира сего, уклонися паки во пределы Киевския, со ученики своими Феодосией Святогорцем и Никодимом и Ермогеном, во область града Рыльска /л. 512./ на место зовомо Льговския горы, идеже леса и дебри вкруг облежащия, близ реки глаголемы Сейми, расстоянием от града Рыльска яко поприщ 40. Зело бе место угодно и красно ко вселению иноческаго пребывания и к монастырьскому строению полезно. И возлюби преподобный отец наш Иов место сие святое и сотвори молитву Господеви...

Владыко Царю небесный, призри с высоты небесныя славы Своея на место сие, осени его сиянием Божества своего Триипостаснаго и сподоби нас, Господи Вседержителю, зде вселитися и Тебе единому Богу работати всею душею и всею крепостию и всею правою верою. Прошу и молю, еже создатися на месте сем храму угодника Твоего святаго страстотерпца великомученика Димитрия Солунскаго чюдотворца. Понеже на его память честную обретох пустыню сию искони желанную. Еже в нем обитати благоволи и прославляти пресвятое имя Твое, Отца и Сына и Святаго Духа, и на помощь призывати Пресвятую и Преблагословенную Деву Пречистую Богородицу, и всех святых Твоих в заступление имети нам смиренным /л. 512 об./ рабом Своим во вся веки, аминь. И по молитве обыйде вся места со святым и животворящим крестом Господним, ограждая и осеняя. И сниде под горие в дебрь и ископà в горе той Л(ь)говской пещеру малу на вселение себе, по подобию святых пещер киевских, и на приходящих к себе братии. В то же время, еже егда нача пещеру копати, прииде к нему от Москвы Чюдова монастыря черной диякон именем Арсении, яко Богом посланный. И нача с ним труждатися и Богови работати и пещеру большую копати и многия улицы пещерныя сотвориша яко на поприще; землю же на плещих своих ношаху со псалмопением немолчным, Богови работающе. Прочии же иноцы выше помянутии леса росчищающе и нивы насевающе и борти делающе в дубровех на вселение пчел. И много проживше во пещерах сих пяточисленнии отцы. Богу же паки прославляющу Своего угодника сего блаженнаго Иова. Благоволи создатися и церкви святаго Димитрия над пещерами на горах Льговских, и монастырю быти на пребы/л. 513./вание иноком. Такожде, яко и прочии от него созданнии монастыри быша и до днесь Благодатию Божиею стоят. Преподобный же по создании церкви и украшении иконном и всея лепоты, многи созда келии своима рукама, и трапезу велию и ограду устрои около обители зело крепкую, и башни и бойницы подела ради частаго нахождения крымских татар, пленующих села и деревни, разоряюще православных хрестиян. И иная многая труды полагая; озера и пруды копая и мелницы поставляя на упокоение братии, и рыбныя ловли устрой на Се(й)ми реце в лето 7170 [1662]. И множество братии собравшася к нему от далних мест, слышаще житие его святое и ревнующе последовати стопам его.

По некоем же времени в лето 7175 [1667] году бысть нашествие иноплеменных, за умножение грех ради наших, приидоша ратию безбожнии варвари крымския татарове на Рускую землю и на Рылския пределы. Изгоном пленующе /л. 513 об./ многих християн погубиша, а иных без милости мучаще и домы их огнем попалиша, а иных в плен во свою землю с собою взяша. Тогда же рыльския веси много народа, мужей и жен и детей, от тех злых зверолютых безбожных бусурман крымскых татар збегошася ко преподобному отцу во Л(ь)говскую пустыню и пресецаху ему безмолвие. Святый же моляше всесилнаго Бога и в молитве призывая християнскую Заступницу Пречистую Богородицу, дабы всемилостивый Бог молитвами Пречистыя Владычицы нашея Богородицы сохранил род християнский от нашествия безбожных агарян. Тогда же они окаяннии варвари покушахуся итти в пустыню святаго, и собрашася более трех тысящ татар и приидоша близ обители его. Преподобный же вооружився силою крестною, пойде из монастыря з животворящим крестом Господним, призва в помощь себе святаго великомученика Димитрия Победоносца, низложити сопротивных. Яко же он /л. 514./ и прежде помогаше святому Нестору еже победити силу безбожнаго Лия (царя), тако и зде помогаше преподобному отцу крепкии во бранех святый Димитрии, и обитель свою не попусти агаряном разорити и трудов преподобнаго не презре. И егда же святый нача ограждати крестом агарянов, и многи от християн видеша, и невернии последи поведаша, яко изыйде пламень огненный от креста Господня и многих попали и ослепи их, и смяте кони их невидимая сила святаго Димитрия, и сотрошася и падаша и мертви быша. Прочих же татар православнии християне вооружившеся начаша дреколием бити и гнати их к реце Се(й)ми. И мнози истопоша тамо, иных же живых многих взяша в плен. И тако Божиею помощию и заступлением Пречистыя Богородицы и святаго Димитрия (храбростию) [6] защищением, побождени (!) быша вси и исчезоша, и память их с шумом погибе. Преподобный же зело за сие чюдное /л. 514 об./ побеждение Богови длагодарение воздаде и Пречистей Богородице и святому великомученику Димитрию и всем святым. Потом преподобный совеща з братиею совет и с православными християны, коих Бог спасе молитвами святаго от поганых ту во осаде: еже оставших плененых татар более 70 их человек послати к Москве к Государю Царю и великому князю Алексею Михайловичю всеа Росии самодержцу. Еже и бысть. Великий же Государь, слыша таковое побеждение сопротивных от преподобнаго отца нашего, зело удивися, яко при его державе такое чюдо бысть. И за сие посла в монастырь ко преподобному милостыню довольну зело на утешение братии, и бранных оружии: пушек больших 6, снарядов и мушкетов болших с три ста, и пороховой казны и свинцу доволно, и четыре знамян (!) золотных по отласу шитых — ради преди будущих незапных татар опасения обители святаго старца Иова своих богомолцов /л. 515./.

Потребно же, братия священноиноцы и иноки и вси христолюбцы, послушати еще о преподобием отце нашем, от Бога данном ему прозорливстве. Некто от дворянска чина стольник именем Стефан Нащокин от Москвы прииде в Комарицкия волости беглых християн сыскивати. Паче же яряся на обитель преподобнаго сего разорити гордостию своею всуе, и близ монастыря живущих християн волных побрати себе в порабощение. Преподобный же, слышав вторую бурю востающую на обитель его от растленных християн, паче и горши иноверных язык, и рече ко братии, утешая малодушных. «Претерпим, братие, беды и напасти сия со благодарением Христа ради и царствия его небеснаго. Сей бо хваляйся человек вскоре погибнет, по писанию: Господь гордым противится, смиренным же нам даст благодать. Не узрит ни следу ограды сея. Божиею десницею покрываеми есмы». /л. 515 об./ Еже и бысть по словеси святаго мужа сего молитвами. И до монастыря не дойдет и память его с шумом погибе, исчезе безвестно. Аще Бог по нас, кто на ны от востающих! Бог Своя рабы сохраняет и снабдевает. Яко же аз, последний изверга, видех многая от него прозорливства от Бога данныя ему благодати, не у зде написах, забытая и продолжения ради многих лет, иногда же леностию поддержим бех. Еще же Господь Бог восхоте прославити раба Своего на вся концы и пределы Росийския земли. Слуху бо прошедшу о преподобием велию, нигде сокровену от человек возможе утаитися. Доиде бо слава и до ратных людей, глаголю казаков донских, желающе, дабы шел до мест их и освятил грады их пришествием своим, и святое и ангелом подобное и говейное лице его ведете и слышати от уст его словеса полезная души, еще же требующе, да/л. 516./бы общежительство сотворил иноком во областех пребывания их. Многажды присылаху к нему в монастырь, прошаху и моляху святыню его и преподобство неотступно.

Преподобный же отец наш, Богу на се изволившу, восхоте посетити и просветити учением своим люди сия ратныя, да и тамо прославится имя Господне. Зане не бысть тамо прежде иночествующих собори. И тако учредив во ограде своей вся по чину, наместники остави искуснейших иноков на сие дело, глаголю Арсения и Гурия, правити вся монастырьския дела. Сам же сотвори всенощное пение и молитвы Господеви возсылая, еже сему святому месту невреждену быти от всякаго вреда душевнаго и телеснаго. И братию поучив доволно от писания и утешив от печали разлучения; поим же с собою триех ученик своих: Тихона и Ермогена и Тимофея, и пойде в лето 7182-м [1674] году на Дон реку /л. 516 об./ великую к тамо живущим человеком. Мнози же избраннии христолюбцы вельми возрадовашася о пришествии его — градка Сиротина зовома и Пятиизбенска и прочих казачьих городков. Преподобный же, ища себе места на вселение покойнаго, и обретает себе безмолвное место близ Чиру реки Верхнево зело красно и угодно к монастырьскому строению. И воздев руце на небо, и на долг час помолився сотворшему Богу всяческая. И по молитве рече: «Призри, Господи, с небесе и виждь и посети место сие на вселение иноческому чину и на славословие Твое истинное». И потом водрузи крест и благослови место и малу колибу созда близ креста Господня, и пребываше благодаря Бога и рече: «Се покой мой в век века; зде вселюся, яко изволися Тебе, Владыце моему, в новей сей пустыне изволих /л. 517./ приметатися в дому Божии день и нощь». Такожде пришедший с ним иноцы тако же малы хлевины себе возградиша, моляху всесильнаго Бога, еже не оставити их сирых и послушати моления раб Своих и препитати их душа и телеса вкупе. Бог же во Троице певаемый и славословимый от них, во скоре многих христолюбивых людей воздвиже к ним с милостынею. И часто посещаху преподобнаго отца Иова и братию, и молитвы и благословения от них приимаху, многу пользу душам своим обретаху и в домы своя возвращахуся, славяще Бога и благодаряху, яко такова чюдна мужа Бог сподоби видети их. И потом мнози иноцы от преже созданных монастырей стекахуся к нему и сожительствовати с ним желаху. Блаженный же всех с любовию приимаше и поучаше их о спасении души и о любви и о послушании и покорении ко всем малым же и великим

По всем блаженный отец наш Иов игумен з братиею своею проразсудив, еже создати храм на месте крестном во имя Пречистыя Богородицы честнаго ея Покрова. Еже и бысть по совещанию их и по благословению пречестнаго отца и пастыря преосвященнаго архиепископа Лазаря Барановича Чернеговскаго (!) и Новгородскаго и всея Малыя Росии. И созда прекрасну церковь в похвалу Пресвятей Богородице и украси ю святыми иконами и книгами и ризами и всею церковною красотою, яко же подобает. Посылаше бо к Москве о написании святых икон ко мне, грубому и невежде, еже бы паки к нему возвратитися и написати иконы. Аз же грешный обыкл во слабостех мира сего суетнаго пребывати, за дальностию пути разстояния не пройдох, но возвестих учителю своему изографе Саве именем Иникиеву родом ярославцу. Он же со /л. 518./ тщанием пойде с Москвы со ученики своими и со старцом Тихоном, учеником святаго. И все желание святаго отца исправи и написа святыя иконы по чину. И тако общее жительство иноком утвердися, и славословие Богови приношаху. и моляху Бога о благостоянии святых Божиих церквей и о благороднейших государей наших и о всем христолюбивом воиньстве и о всех православных християнех.

Еще повем нашей любви, отцы честнии, о преподобием сем муже и чюдотворце: реку воистинне, елико слышах от бывших его послушников тамо живших во обители Пресвятыя Богородицы старца Леонтия и старца Марка, поведающе сице: слышахом от келейника и ученика преподобнаго именем Тимофея Пирожникова [7], еже по успении блаженнаго поведа с клятвою, рече: «Некогда посла преподобный отец Иов казначея своего именем Дамияна ржи молоть на мельницу на речку Лиску, своего строения, разстоянием два поприща вниз по речке /л. 518 об./ короб ржи мерою полтора воза на братию свою труждающихся Христа ради. И егда смолоша рожь, и молитвами преподобнаго отца нашего Иова благословением умножися мука, и привезоша, и наполниша житницу трехсаженную наклали, едва вместиша хлеба того. А рожь была старая в коробах росла. (А сей ученик блаженнаго Иова выкуплен был отцем нашим ис полону от татар сто рублев окупу). И несмеша при нем никто от братии поведати о умножении хлеба молитвами святаго отца.

Дивно же и преславно сие чюдо, содеяся в нынешнее время при животе святаго отца. Некогда минующе путем мнози татари мимо обители Пресвятыя Богородицы и преподобнаго Иова в церкви той зело удивишася, мнеша дворянина живуща. Божиим же изволением приидоша к ним, аки от обители, два юноша зело прекрасны, /л. 519./ яко луча солнечная. И всех их татар ужасиша видением доброты своея и принесоша к ним два хлеба печены и мяхки и сладки зело и вдаша им в руце, рекоша: «От сего старца живущаго принесохом» [8]. Они же прияша и отъехаша от обители 60 поприщ, и казаком донским поведаша в городке Пятиизбеньском рекоша сице: «Ехавшим нам вверх по Дону реце выше Чиров и нам видевшим вашу християнскую церковь и дивящимся, яко из начала света невидавшим на том месте никогда. И нам де выслал со двема юноши каратун тамо живущий два хлеба велми добры и мяхки и парны и сладки; и ели и насытилися тема двема хлебы боле пятисот человек нас бывших, и никогда бо такова хлеба едали». И по времени того градка приехаша казаки помолитися Пресвятей Богородице, и у преподобнаго отца благословения получити, и вопросиша святаго отца и братию, были ли у вас /л. 519 об./ в монастыре татарове, или кто виде их, и выносили ли кто от братии хлебы два. Преподобный же отец рече, отнюд и слухом не слыхали про них в то время и число, егда казаки поведаша. И удивишася вси людие, и преподобный: «Воистинну, — рече,— покрыла нас Царица Небесная честным Си омофором, и препитала хлебом ангельским, избавляющи от плена рабы своя». И се прирече преподобный отец Иов: «И когда преже сего слышахом близ монастыря нашего ехавшим многим татаром с Руси с полоном, и выносихом им хлебы и посылахом вослед их без боязни. И ни единаго обретохом и паки возвратишася послании». Видесте ли братия, яко и невернии не смеяху коснутися обители его? Толь благ Бог: боящихся его и молитву их услышит и спасет их, творящих волю Его святую /л. 520./. Дивен Бог во святых Своих, Бог Израилев, творяй чюдеса и в последния сия времена.

Некогда приидоша в монастырь ко преподобному отцу нашему игумену Иову пять вдовиц, престаревшихся леты милостыни просити на препитание хлеба. Преподобный же отец повеле последния хлебы дати вдовицам Бога ради келейнику своему Тимофею Пирожникову. Он же рече блаженному со гневом: «Чесо сами ядим ныне со братиею? Яко несть ржи ни муки! Все бо изостало, аще боголюбцы не посетят нас убогих». Преподобный же рече: «Бог нас не оставит гладом тающих. Вдовиц же прошения не презрите».

По роптании же отдаде последния хлебы вдовицам. Блаженный же отец, виде ропчющих братию на себе, вниде в келию. И воздев преподобнии свои руце вышнему Богу, сотворшему вся человеки, помолився на долг час. Келейник же Тимофей иде тогда на погреб и видев выход /л. 520 об./ погребной полон хлебов печеных мяхких до избытка всей братии, и приходящим людем многим предлагаху ясти хлебы тыя во удивление. Потом преподобному отцу впредь вопреки несмеюще глаголати, видяще толикая чюдеса творимая святым. Сие чюдо поведа трудник монастыря того именем Ераст Стефанов, мне грубому, и еже слышах достоверно, то и написах.

Хощу вашей любви еще предложити трапезу словесную, души нашей полезную: егда казаком бывает служба великаго Государя, посланная противо сопостат, они же первее прихождаху Пресвятей Богородице честному ея Покрову в монастырь [9], и ко преподобному отцу помолитися у него благословения испросити приезжаху. Святый же учреждаше первее молитвою и благословением; потом пищею монастырьскою и на путное шествие казначею повел(ел) давати по хлебу на десять человек и на два десят всем /л. 521./ по равенству. Казначей же по приказу блаженнаго так не исправлял, ради оскудения хлеба, чая тем утаением прибыток чинити братии, и хлебы утая, оставлял. Преподобный же, провидя духом Божия премудрости, рече, все ли дали по его приказу. И рече: «Все исполних». Он же сам шед и видев хлебы утаенныя; и псом пометал за преслушание его, видя диявола на них сидевша во образе змиеве.

Во иное же время паки казаки молитвы ради и благословения ко преподобному приезжаху в пустыню. Он же по обычаю такожде учреждаше их пищею и на путь по хлебу на десять человек повеле даяти. Яко ничесо у себя оставити, надеяся на всемогущаго Бога и Пречистую Богородицу питательницу жизни нашея. И после того времени поведаша святому братия его иноцы о пришествии казаков ис Чесных станиц зовомых. Привезоша де два карбаса хлебов печеных, /л. 521 об./, теплых и мягких, и рекоша старцом: бьют де челом хлебом отцу Иову з братиею ясти. Преподобный же возвеселися духом, повеле приняти тыя от Бога присланныя хлебы. Братия же принята у них хлебы. Тии же людие вскоре невидими быша от очию зрящих братии. Преподобный же, благодарив Бога и Пресвятую Богородицу о сем, и повеле всей братии и иноком ясти те хлебы. Тогда же было более двою сот человек. И ели те печеныя хлебы и мяхкия и теплыя. И после того блаженный и братия посылаша спрашивати казаков того градка и бити челом на хлебах. И они сказали все, что, мы де к вам хлебов не посылывали никогда же от себе. Преподобный же со братиею зело удивишася и мнеша, яко ангели Божии присещаху их. Зрите, братия, милосердие божие ко преподобному, яко не оставляет его. /л. 522./ А привозили те хлебы порознь к монастырю не по едино время. Аще все роздаст преподобный нищим и богомольцом, Бог же десяторицею пришлет ему.

Многая же сотвори преподобный отец наш Иов игумен чюдеса: от трясовищния болезни исцелял и от огневицы избавлял кроплением святыя воды и молитвою своею бесы от человеков изгонял (многими леты были одержими). И аще у коего брата покраденная кая рухлядь или деньги, вся возвещая, а того хищника втайне уча и наказуя впредь таковая не творити человеком. Младых же отроков учаше в целомудрии пребывати и девство хранити. Старых же в монастырь призываше (ласкою) [10] и наимаше Богу молитися (и каши ясти) [11], дабы в послушании жили. А сам за них правило исправлял в монастырьскую страду.

И тако пожив, добре Богови угодив, до старости маститы не измени правила своего /л. 522 об./.

Преподобный же отец наш Иов игумен впаде в телесную болезнь, и оттоле познав святый свое к Богу отшествие. И союз телесныи(х) хотя разрешитися (и отец своих в прясло преселитися) [12] в вечное жилище, их же уготова Бог любящим Его, и призывает к себе братию и к ним творит молебная словеса: «Блюдите,— рече, — заповеди Божия и храните предание святых апостол и святых отец седми соборов вселенских, и монастырьскии чин весь по преданию отеческому творите со всяцем утверждением. Да не поткнется нога ваша или рука да не коснется з десныя на шуюю страну. А в церкви Божии на молитве пения и чтения божественнаго со страхом стойте и со всяцем вниманием послушайте; а на трапезе пищу и питие немятежно имейте. «Семи словесы духовными блаженный /л. 523./ братию много наказав и любити друг друга духовною любовию и ближняго своего якоже и сам себе. И все изглагола братии своей, и отшествие свое к Богу. «Вас же,— рече,— предаю в руце Божии и Пречистей Богородице Заступнице християнской: да подаст вам Бог молитвами Пречистыя Своея Матере в мое место пастыря и учителя, духовнаго наставника, вашему спасению игумена». Потом рече ученику своему Тимофею: «После трех лет умертвия моего раскопайте могилу мою и егда увидишь тело мое грешное цело — и ты держися веры християнския, как я тебя учил. А буде тленен буду — и ты тем путем не ходи». Потом же повеле себе гроб дощатой зделат и вскоре и схимити священноиноком. Сам же причастися Пречистых Тайн Тела и Крови Господа нашего Iсуса Христа и о исхождении своем моляся, рече: «Влады-ко человеколюбче Господи, сподоби мя одесную /л. 523 об./ тебе стати, Судии праведнаго, егда приидеши во славе Своей страшней, не осуди мене тогда». И конечное наказание изрек им и рече: «В руце Твои, Господи, предаю дух мой», — и перекрестився трижды крестообразно, и предаде дух свой Господеви. И тако от сущих зде прейде в вечную жизнь. И просветися лице его, яко [13] ангелу солнцеобразну, и изыде от честнаго телеси его неизреченное благоухание, не токмо в келии, но и по всему монастырю.

Тогда же мнози казаки ехаша карбасами по реце в войской свой град зовом Черкаской, ко атаману государево жалование брати, и ощутиша то благоухание, зело удивишася и вопросиша, близ монастыря подъехаша, ту сущих трудников: «Что благоухание от зде явися и столп огнен видим необычно в полудне?» Они же со слезами егда отвещаша им: «Второе солнце зайде от очию нашею и скрыся в небесныя обители. Угасе свеща право /л. 524./ славия Росийския земли, пустынный гражданин преставися зде во обители Пресвятыя Богородицы — преподобный отец наш и игумен Иов, начал(ь)ник лавры сея». Мнози же вскоре притекоша казаки с великими слезами зелне плачющеся, яко такова лишишася свята мужа, подобна древним святым отцем.

Ученицы же его вси иноцы також де неутешно плачюще о разлучении своего отца, не имуще пастыря себе. Казаки же последи всему войску поведаша чюдесное преставление преподобнаго отца. Поживе же преподобный в розных обителях от него состроеных, и изгнание от них претерпевый; во иночестве; всего поживе 87 лет [14]. А пострижеся 16-ти лет. Препроводи же дни своя в постничестве и в молитве и в безмолвном пребывании. Преставися преподобный отец наш Иов игумен, обыче зватися Льговский, в лето 7189 [1681] [15] году месяца (маия) [16] в (9) [17] день в четверток /л. 524 об./. Братия же вси, священноиноцы и иноцы и трудники, и множественное число донских казаков яко птиц собрашася к трудолюбезному телу преподобнаго отца. Со слезами и сокрушенным сердцем проводивше честное и многоцелебное тело преподобнаго отца нашего Иова игумена со псалмы и надгробными песньми и пении духовными. И положено бысть в своем ему уготованнем месте, в пречестнем монастыре, иже сам преподобный созда своима рукама и многими труды и поты лица своего, в церкви Пресвятыя Богородицы честнаго ея Покрова близ праваго клироса, иде же и доныне почивает, всем братиям видящим честный и чюдотворный гроб его, благодатию Господа Бога и Спаса нашего Iсуса Христа творяще и источающе различная исцеления и чюдеса своя многим с верою приходящим людем и просящим у него помощи и заступления в различных своих болезнях, яко от источника /л. 525./ непрестанно текущи: слепым прозрение, глухим слышание, немым глаголание, бесным очищение, и всяким недугом исцеление.

Бысть же неисчетное Божие благовоздаяние и святаго милость с наказанием: в лето 7197 [1689] за умножение грехов ради наших и за неправду, бысть запаление огненное от мимо ехавших воровских татар, в нощи зажогаша степь и траву. И дойде пламя свирепаго огня и до монастыря, и весь, и с церковию и со всем строением и иконами и книгами, погоре — не успеша братия ничего вынести, зело неутешно плачюще и рыдающе толикаго отца здание и труды.

И егда утишися пламень, приидоша братия на место церковное: ино вся испепелися, но зрят едину гробницу преподобнаго и пелену целу, и ниже воня дымная прикоснуся ей. О велия милости Божия! и чюдес преподобнаго изобилие нам /л. 525 об./ являет.

Обретоша же и посох святаго цел, и отхожая его келийца малая, во угле монастырьском соделана, тако же цела. Братия же мало от печали утешишася, удивляющеся о гробнице преподобнаго. Дойде же слух и во вся тамошния жители о чюдеси сем, яко не вотще трудися Богови верою правою — прославляя Бог и по смерти Своего угодника.

Христолюбцы же паки милостынею и щедротами своими построиша иноком во обитание келий; над святым же часовню соделаша.

Божиею же благодатию той, вышереченный ученик его Тимофей не обретеся тогда в монастыре, но в дальних украинских местех ходил ради потреб монастырьских три лета. И прииде на место сие святое, и ко гробу преподобнаго припадая со слезами моляся, и слово, реченное к нему от преподобнаго отца при кончине, воспомяну. И советова со братию иноками, еже рече по /л. 526./ триех летех повеле ему преподобный гроб свой роскопав открыти и видети мощи. А отнеле же уже скончася, пройде и 7 лет. И по мнозей молитве Богови и ко преподобному молении, дерзнуша могилу раскопал со мноземи людми. И видеша (в то время вешнее было водополие) гроб преподобнаго плавал в воде. Понеже был пущен в землю первее струбец около гроба. И раскрыта гроб, и видеша тело его честное цело и нетленно, благоухание велие испущающее. Из гроба водою подняло его и верхнею доскою шею его перегнело и кровь знать аки у живаго. Ризы же и схима на главе все целы же. И егда начата святое тело его оправливати, и видеша: только перста у руки да у ноги палца болшаго нет. Свойственно бо есть земли свою часть взяти. Яко и у прочих святых видим разлучение от грешных телес. И тако учредиша: воду от гроба изяша и паки гроб закрыта /л. 526 об./ и учредиша, яко же достоит святым, благода-ряще Бога, яко извещение приемше о житии и о вере преподобнаго отца нашего Иова, новопросиявшаго в лице святых и представша престолу иже на херувимех седящаго Христа Бога нашего, образ подая правоверным, како спасти душа своя в нынешния последния времена. Аще кто хощет, спасен будет бедами и напастьми, паче же правою истинною верою.

Потом ту правоверующие и до днесь притекающе ко гробу его святому, исцеления дара просяще и молящеся, приемлюще — отхождаху в домы своя, прославляюще Бога во святых своих. И сего преподобнаго отца ублажающе во вся страны, понеже мнози ученицы его разыдошася по пустынным местом ради многих востающих ратей междоусобных браней в Росийской земли.

Слава содетелю Богу сотворшему всяческая /л. 527./ и благоволившему мне грешному и недостойному, бывшу у него во обители и видевшему житие его равноангельское написати, от многих его трудов малая обрести, иная же —от ученик его поведомая слышати, и от сынов его духовных глаголемая. О, преподобие угодниче Христов, отче наш и пастырю добрый и бодрый Иове! Аще угодно ти сие написанейце, помяни нас во святых своих молитвах пред Богом, и не забуди, посещая чад своих, якоже обещася. Да сподобит Бог нас вечных благ улучити, о Христе Iсусе Господе нашем, Ему же слава во веки, аминь.

Аще хощеши имя списателево уведати, зде буквами предложенное: четыредесятница со единицею и двадесятница со двусотицею и осмерица с четыредесятницею окончевается ером [18].

Примечания:

[1] Житие печатается по рукописному сборнику 1716 года, принадлежавшему «сторожу Кремлевскаго собора, что у Государя на сенях (т. е. Архангелскаго), Симеону Федорову сыну Моховикову».
[2] Речь идет о времени польско-литовского вторжения.
[3] Написано рукой писца на левом поле листа.
[4] Отчество вписано рукой писца на нижнем поле листа.
[5] Квадратные скобки поставлены писцом в тексте.
[6] Слово зачеркнуто.
[7] Фамилия вынесена на поле листа.
[8] Последняя фраза вписана на поле листа.
[9] Исправлено на: в монастырь помолитися ко преподобному отцу, у него благословения испросити приезжаху.
[10] Слово ласкою зачеркнуто и на поле выписано — с любовью.
[11] Слова и каши ясти зачеркнуты.
[12] Слова, помещенные в скобки, в тексте зачеркнуты.
[13] В конце строки вписано лишнее: а.
[14] – [15] Вместо 80 (П) в обоих случаях написана цифра 90 (Ч), затем зачеркнутая. Это несомненная описка, т.к. далее в тексте о 1689 г. говорится, что прошло уже 7 лет со времени смерти.
[16] Слово маия зачеркнуто и внизу подписано февраля.
[17] 9 зачеркнуто и ниже вписано — 27.
[18] Таким образом имя составляют буквы, которыми обозначаются цифры: 40, 1, 20, 200, 8, 40 и буква «ъ» — то есть: Максимъ.