Ко входуЯков Кротов. Богочеловвеческая историяПомощь
 

Слово Андрея Денисова поморского киновиарха

Праведный от веры жив будет [Аввакум глава 2].


Его житие и справка о нем.

 

См. старообрядчество. XVIII век.

 

Многих и неизреченных благ, добродетели виновны бывают: ибо тех ради стяжавшии я безсмертною славою ублажаются.

Каяждо бо добродетель, истинно лобзавшаго ю, неисповедимою красотою венчавает: и паче маргаритов белоблистающих украшавает. Терпением бо прославляется Иов многострадальный. страннолюбием же сияет, Авраам недростяжатель райский. всюду превопиет целомудрием, Иосифово и Сусанино. кротостию светится Давыд царьственный псалмопевец. ревностию горяй, огненный колесничник Илия удивляем. Даниил же муж желаний духовных проповедается: тако в ветхом, яко и в новом завете, различными добродетелей маргариты, светоблистает церковь. Но аще и многи звезды блистают, единоже небо сих стяжавает: аще высокоустроенный дом красновидно усмехается, но основания крепостию весь утверждается: тако церковь, аще многими светоблистает добродетельми, но единою веры православныя красотою светлеется. многа строения духовная: но едино основание, вера православно кафолическая. Ибо Павел сосуд избранный вопиет, кроме же веры невозможно есть угодити Богу. О той пророк велегласно взывает. праведный от веры жив будет, с сим пророческим гласом желаю аз грубый, за молитв ваших желаю, словодатне приити. к вашему церковному сословию не яко доволен, но желание много имый украсити боголюбное и братолюбное ваше совокупление: не сребром не златом не белостию маргаритов, не блещанием камений драгих. не инеми от тленных ими же мир любокрасится: но теми, киими вы услаждаетеся: сими от них же веселитеся. которыми просвещени и просвещаетеся. еже есть животною верою ея же ради странствуете. и различно страждете, ею же животворитеся, о ней же и глаголати и слышати и усердствовати, присно долженствуем. Есть же вера по апостолу Павлу. уповаемым извещение вещем обличение невидимым: Бога невидимаго поелику мощно человеческое познавание, Творца твари от твари ведение, извещение Божия к человеком повеления. вера Божиих тако на земли древних дел. яко на небеси невидимых светлостей, несумненно показание. вера вочеловечения Сына Божия. известнейшее явление. вера апостольскаго учения нелестное послушание: отеческих преданий. невла?емое хранение: православно кафолическия церкви непоколеблемое основание вера по согласию со святыми благодатей Божиих. тако на небеси, яко на земли. неошибное получение. О дивность, православныя веры. о богоданныя нам светлости ея. едина к единому Богу. единем православия светом: но различными лучами блистает вера, яже невидим. известнейше еже видим веруем. не видим Бога, веруем во единаго Бога. не видим, ни видети можем, трех ипостасей в единосущественную трисоставную Троицу. не видехом видимую и невидимую тварь сотворшаго Бога. веруем, яко вся Тем быша, и без Него ничтоже бысть. еже бысть. не видехом вочеловечьшася Божия Слова на земли плотию поживша, крестившагося, распята воскресша, учеником заповедавша. учити Его заповеди и крестити, пред ними же вознесшася плотию на небо: но веруем несумненно, всему яже о нас человеколюбному смотрению Его. Не видехом тако в древнем, яко в новом завете спасительныя заповеди, Бога заповедающа нам творити: веруем и не сумневаемся. Веруем во святую соборную апостольскую церковь, и не истязуем. веруем яже Христом и церковию Его. тайны новаго завета, преданныя во спасение нам: и с любовию приемлем. прежде яже видим. безмерно яже не видим веруем. в воде православном крещении: веруем еже не видим Духа Святаго сошествие, Им же первороднаго и прочих грехов очищение, во Христа облечение: и прочая православным крещением нам подаемая. в хлебе и вине. в православнодействуемом причащении: веруем еже не видим. самое тело, и самую кровь Христову быти. и чрез прочая видимая тайнодействия церковная, невидимыя благодати приятие веруем, тако. Крест Христов тричастный. видим мал видением: веруем и исповедаем. распятаго ради на нем Христа. небес ширши быти силою его. и знаменованием его по преданию церковному. веруем тайнодействам совершатися, и прочим на них же знаменуется и освящатися: и всему добрыя веры таинству. в знаменовании его исповедоватися веруем таинственне.

Тем же веры имя тое есть: еже по апостолу, извещение уповаемым, невидимым обличение. его же чувствами телесными не познаваем, но извещением умным уповаем, его же чувственныма очима не зрим: но душевным оком светло разумеваем, его же пред собою не чювствуем не осязаем: оно чрез умное постижение. надежно лобзаем, любовию объемлем, сердечно услаждаемся. но аще тако великая, тако неодержимая вера. откуду правая в нас вливается: откуду невидимая, в невидимей души. известно всаждается; Павел учитель языков: вера [рече] от слуха, слух же глаголом Божиим. а понеже глагол Божий в церкви Его. аще от пророк, аще от апостол. аще от святых отец реченный. Духом Святым реченный: тем же от Бога есть: убо вера от Бога в нас известная глаголом Его творится. ибо и в создании, словесной души даде Бог силу веры. во еже мощи веровати в Него, невидимаго Сущаго и непостизаемаго. верою единою познаваемаго: глаголом же Его и ныне назидает и просвещает, и известнейшу в нас творит.

Тем же не в теле, ни в телесных чувствах, ни в телесных доброделаниих. веры доброта но в самословесной души раждается, аще и телесными детельми помогаема и показуема. или аще не такова объявляема, но обаче духовна добродетель сия невидима сущи, в невидимей души состоится, с прочими же добродетельми таково имать. яко без нея каяждо добродетель богоугодна быти не может; с нею надежда и любовь красуется: о ней воздержание, смирение, терпение, утвержаются. пост, целомудрие, милосердие, при той светлеются. ибо таже душевнии, яко телеснии добродетели, с верою совокуплени, добродетели богоугодни сице бывают. Не токмо же в сопряжении прочих добродетелей, но имати всех благих по Божественному Златоусту. вера есть: тая, егда к Богу будет теплая присная раждает молитву, милосердие, терпение, пост соделовает: созидает целомудрие: уряжает воздержание, и смирение. тая приемлет блудницу. и творит вселенней покаяния плод. приемлет гонителя, и творит вселенней благовестника. приемлет чадолюбиваго отца, и творит боголюбивейша веры делателя, презирающа естества пределы. воююща на свое чадо, приемлет грешники и творит праведники. Приемлет чревообъястники и пияницы. и творит воздержники постники, и водопийцы. приемлет своевольнаго лениваго. и творит послушнаго тщателя, и ревнителя трудолюбнаго. поелику бо вера цветет в сердцы, потолику и тело спешит на службу: рече лествичный небосошественник. тем же вера егда будет напаяема словом Божиим, егда к Богу возженная теплая. егда несумненная, егда со святыми согласная, тогда последовати ей будут вся добродетели: тогда уступают страсти, бегают грехи, фараон томитель в мори безстрастия утопает, злость безстудная египтян умолчевает; израиль ум зряй Бога верою, от всех злых египетских свобождается. поет сладкия победныя Богу песни. ударяя в тимпан безстрастия, иго благо, и бремя легко Владычнее и глаголет и помышляет. но тако вседейственная вера, недейственная от несоюзных тоя бывает. егда бо излишная многоиспытная стязания, и словопрения наведеши души, тогда она ску?товается: егда несогласно со святыми мудрование нанесеши, она в души нелепа стается. егда ереси и противства привнесеши, тая тогда неправая и неправославная у тебе соделовается. егда сомнение помысла привнесеши. тая тогда малая творится: егда грехи, страсти, похоти лукавыя родиши, тогда тую студеную и мертвую устраяеши. якоже облаком мрачным аер застанови?вшим: земля солнечных сладких лучь лишается: тако несоюзная вере душа приемши, лишается окаянная благодатных веры действ. Но иже смеющии противным тако мудрованием, яко дело творением, святей вере досаждати. пагубе вечней злочастнии предаваются. ибо тако еретики, яко расколники и раздорники: противно мудрствующе святей церкви, и несогласно со святыми учаще и творяще: клятве и смерти вечней, повинных себе учиниша: и мнящеся веровати, святей вере досадники учинишася. аще бо праведный по пророку от веры жив будет: они неподобишася вечнаго с церковию живота, яве яко противны вере святей, чрез какое свое неправомудрствование сташася. Понеже еретик есть, и еретическим законом подлежит, аще и мало кто уклоняется от православныя веры: у святых сице написано. и Златоустый в беседах на реченное Павлом анафематисание толкует глаголя: и не рече аще противное возвестят, или превратят все, но аще и мало нечто благовествуют, паче еже благовестихом, аще и худое что подвигнут: анафема да будут. Елма убо сице силна вера, противящиися и недостойне ей действующия, осуждавати; убо и добре говейно стяжавающия ю. могуща прославляти, и равно тако в богатших, яко и в нищайших действующия. равно лучи благодатныя. яко в багрянице на престоле седящему, сице на гноищи в рубища одеянному изливающа. и равно никому кроме Бога неподвластна. но над всеми царьствующа и владеюща; тако над простейшими невежды. яко же над нами вышшими архиереи. якоже вышний Бог лица к суду не приемлет сице она лицу славных не стыдится, и последних говейно об ней прилежащих не обещевает. ибо во архиереох и иереох пребывает, и походит в них и украшает и украшается с сими: но егда и тии достойная той, согласно со святыми. и мудртвуют и учат: егда же ли тии презрят тоя величество, чрез достоинство ея. противно святым, новоучити и новодействовати начнут: тогда она уничиживши их, благодати луча своя спрятавши. общения их удаляется. тако бо Павел велегласно вопиет, аще мы или ангел с небесе благовестит вам, паче еже благовестихом, анафема да есть. Аще же и нерукополагаемии достойно в вере. и с верою жительствуют: тогда она в них украшается, и их украшает. сице Мелетий патриарх Александрийский, в послании до белорусцев, отступивших от архиереов повредившихся в вере похвально глаголет. называя их, православия заступниками, овчатами христоименитыми, светом тмою неповрежденным. ангелми земными, столпами недвижимими: удивляютлися их наипаче. еже восприяша пастырьскую ревность, со злыми пастырьми, не отпадоша: но пребыша крепце во отцепреданном благочестии. тако достойне ю содержащия человеки просветлевает, яко же и места в честь Богу и ей сотворенная. пресветла творит: иже местом необъемлемая. храмы прославляет чудны, церкве достойны, иконами святыми украшены. многи раками телесе святых прославлены, ликами чинами светлоукрашенными, сияюще. блистающе ризами златозарными. песненными сладостьми и читательною красотою, медокаплюще звонами светлогромными чиновременно шумяще. народами православными яко звезды пресветлыми собираеми: наипаче таинствы священными и самем телом и кровию Христовою. яко солнце втории пресветло сияюще, великолепотная зрелища небесе подобящаяся, лучезарно светлеющаяся бывают. но аще вера со святыми согласная в них. неповрежденно соблюдается, тогда тако бывает: аще ли же новинами, и ересьми, и раздорьми святая вера в них досаждается: увы жалости, не терпит в таких светлых храмех жити досаждаема: но отлучающися многажды, со страждущими в темницах за Христа и за законы Его страждет: з бегающими богорадне бегает, со странствующими Бога ради странствует, в скровных домех, страха ради гонителей скрывается: в ненаселенных местех пустых, поселяема бывает во всех сих с теми. иже достойне тую почитающими содержится. но тако в нужду по случаю, кроме священников, кроме видимых церквей, кроме литоргий. тако с Феклою равноапостольною. в страдании, и в пустыни, сице с Галактионом и Епистимиею. в мире и в пустыни и в страдании, сице со инеми многшими святыми в писании поведаемыми. тако с Павлом Фивейским от гонения скрывшимся в пустыни. его же душу виде великий Антоний на небо со многою славою возносиму. тако в прообразовательном новому, ветхом законе выну вера со святыми в нужных случаех бе: сице со Иосифом во Египте. и со Ионою во чреве китове. с Манасиею в поле медяне: с пленеными израильтяны в Вавилоне, кроме жертв, кроме видимых церквей, тако с Даниилом в рове: и с треми отроки в пещи, иже тако с верою к Богу вопиющими: яко Владыко умалихомся. паче всех язык, и есмы смирени во всей земли днесь. грех ради наших и несть во время се князя ни пророка ни вожда. ни всесожжения, ни жертвы ни приношения, ни кадила, ни места еже пожрети пред Тобою, и изобрести милость но душею сокрушенною и духом смиренным да прияти будем. и ниже: яко несть студа уповающим на Тя. тем вресноту? пророк глаголет. праведный от веры жив будет.

Аще же кроме церкви несть спасения: Златоуст же глаголет. церковь есть не стены и покров. но вера и житие: убо с верою правою. и добрым житием во всяко время и место, всякому есть спасение. Архиереи жидовстии по рапятии Христове. во церкви святая святых. кроме веры собирающеся не услышаеми бяху от Бога: Петру от них связану в темнице. молитва от церкви. кроме видимей церкви. но в дому заключенном. прилежна бываемая. разрешенна учини Петра. осужденных показа архиереов, в Риме старом егда папы развращение в вере дерзнуша: от гонения их Антоний со мнихи крыяхуся в пустыни но егда к гонению гонение приложиша тыя разгнаша. Антоний един тогда бывает каменноселенный житель безхрамный обитатель. безкровный населник, гонимый веры святыя исповедник, безгласный гласа светлейший, папежскаго развращения обличитель, и папа убо в каменнотворных и златосияющих храмех. с высокими архиерейства их чиньми. в церквах их идеже безчисленная украшения. но паче всех красот. священнейшая тела преславную вселенней светилу. Петра и Павла опочивающа. тамо со звоны и происхожденьми высокими. и всенародными собрании, службы и молбы творяще: Антоний же един к единому, на едином камене. правоверною верою службу молитвенную приношаше: разстояние и борба бяше видимое дело. боряшеся един со многими, простый со архиереими, невежда противо хитроплетенных языков, немощный и бегун, противо тьмы народов, но что творит живый на высоких. и на смиренныя призираяй. обличает неправоверие премногих, со архиерейми. прославляет с правою верою единаго страдальца: повелевает возшумети морю чрез естество, да паче гласа шум его обличитель латином будет. помавает волнам восклокотати зелне. да зелны помощники правоверному борцу будут. претворяет камня тяжкое существо, легчайши корабля, послушнее словесных нечувственное показася. подлагает хребет море. подъемлет каменя яко корабля. вскачет нань камень яко пернатый, подъемлет на себе человека паче человека. воскипевающе скоростию волны скачуще. друга? другой камень реюще: чудно видение ангел некий легчайш орла. каменноплаватель бывает: преносят моря. реки Нева, Волхов с радостию воспящают свои струи. отдают Нову Граду преестественна благовестника. обличителя латинскаго кривоверства, уяснителя и показателя российскаго правоверия. тако вера славящих ю прославляет. тако уничиживающих тую безчестных творит. тако не к чинам высоким ни к местам пресветлым, но к произволению благому привязана, и к правым законом церьковным припряжена, и в души словесной нетрудно вмещаема: по речению сосуда избранного: вы есте церкви Бога жива, якоже рече Бог. яко вселюся в них и похожу. сего ради вера при прочих добродетелех дивна и преславна, аще и болше тоя. и прочих. любовь по Павлу апостолу, благовествуется: ради неотстатия тоя. и в будущем веце: но вера мати всем добродетелем, и начало прочим есть. И толико подобает быти в нас велика, яко да будет согласна со апостолы, не отторжена от пророков, единомудрственна со святыми соборы: единопроповедателна со духи всеми праведными, и толико опасно хранима, яко несообщателна противоверным отлучательна от раздорных, и тоя непокорных, отгребателна же от мерзских дел беззаконных. понеже вера без добрых дел, мертва есть, не тая соборная иже во всех святых, присно жива пребывающая: но отлучившися от оноя. ради скверных вожделений, тоя души, вера мертва бывает. тем же и толико нужная нам правая вера. яко без нея нам спастися, по святому писанию невозможно. якоже солнце вознесшися на высоту в весненное время. всю вселенную обзирает зрачнейше; зиму прогоняет, мразовы изничтожает, землю беззрачну и безплодну, яко жену стару и преко?рчену. снежными грудами; паки младообразну, и благоплодну показует, цветы изукрашену плодами обагащену: отдаст воды удо?лиям. быстрины рекам, корабли морю. плавателя водам, земледелатели нивам. тако вера аще где в высоту небесную взыдет. и небо вознесется, и яко второе равноденьствие. равносогласие со святыми покажет; тогда зловерие зимное безчиние проженется. мразове ересей изничтожаются. снеги грехов и беззаконий. от лучь светлости тоя истают. души правоверныя красотою боговидения возцветают, и плодами добродетелей обогащени покажутся, тем понеже праведный от веры жив будет: а вера без дел мертва есть: нужда правоверному. в правоверии правоверная дела делати: да от правоверия правоверно делателей праведный покажется: и от правды живаго правоверия жив будет безсмертно. аще ли же понеже вера добрая доброе же зави?димо, завидимое же ратуется. ратуемое же с терпением хранится. не того ради верному. понеже терпети. веры добрыя отставати: аще не хощет безверный или зловерный быти. ибо Спас во евангелии, на сие нас правоверных избирая рече, ну?жно царствие небесное и нужницы восхищают е. аще бо погании языцы, о безбожных и мерских своих верах, тако стоят: тако от законов своих отстати не хотят тако вне красоты безбожия валя?тися ну?дятся: яко ини ратовати на христиан. со многими нуждьми, и ратными скорбьми и смертьми. понуждаваются. Яко же моамефяне угождающе скверно преданию Моамефа творят: инии же яко зверие дивии посреде зверей живут нужно безсловествуют, якоже самоядцы вотяки, вогуличи и прочии степнии татарове: бедственно бедственную жизнь живут, и живут да вечно окаяннии в преисподней тьме вечно бедствуют. тако и от еретик прельщении християне, в новопреданных их развратах, толико укрепляются, яко мнят и проповедают кождо их свое согласие, паче всех законов на земли добрейше быти. то кольми паче нам христианом правоверным. не за скверныя языческия законы, не за еретическая новодерзостная предания: но за чистую веру православную, веру евангельскую, веру апостольскую, соборную отеческую веру святыми содержимую. и до нас обычаем и писанием дошедшую, веру держащих ю соблюдательно спасающую, и живота вечнаго сподобляющую: должно мужественно стояти, и стояти не телеса чуждая низлагати. но самем в терпении и нуждах богорадных себе не ослабевати вражия бесовския советы попирати, страстная похотения побеждати, грехи изничтожати. не радоватися в пространствах в покои, в богатьстве кроме веры: не низпадати в нищете, в скорбех, гонениих с верою православною. Сице убо о православное сословие, слово показует како праведный от веры жив будет: согласно сему многа наказания. многи образы во святых книгах имеем. слышавше же возрадуемся о славе веры. возвеселимся о богатстве ея. возторжествуем о тоя силе непобедимой. о красоте величества ея. возъусердствуем, возлюбим с нею быти и в ней, яже нищих безсмертнаго богатьства сподобляющую, и безродных небеснаго благородия достойных быти творящую. покажем всяко тщание. да придержимся православнаго тоя благолепия. стяжем в сердцы нашем присно к Богу сию веру теплую, веру на небеси у Христа пребывающую, веру в вышнем Иеросалиме, по улицам града небеснаго выну ликующую, веру со святыми согласную, согреваем тую присно писанием и молитвами, и песньми церковными, совокупим к ней надежду и любовь, от нея никогда неотлучающияся, украсим и теплу ю творим добродетельною светлостию. не обесчестим, злыми делы тоя благородия: в гневе зависти и во мнении, не помрачим душ своих, излишними стязаньми и испытаньми не сволнуемся, раздорами и спорами не раздерем благоверия соединения, не променяем славы тоя вечныя на временную славу, светлости тоя безконечныя на тленную красоту, богатьства тоя неоценяемаго на малоденное гниющее богатьство, сладости ея небесныя на скверныя похоти. Но в мире и любве и соединении и во отеческих преданиих пребудем, в посте и молитвах терпяще чисто тою воздержанием, и смирением украшающеся: благодатию, милосердием, безгневием, и благотворением благолепотствующе в гонениих и нуждах и скорбех терпением текуще. взирающе на начальника и совершителя вере Исуса.

Ему же Христу истинному Сыну Божию слава, со Отцем и со Святым Духом. во вся веки аминь.


 

 
Ко входу в Библиотеку Якова Кротова