О второй редакции жития преподобного Авраамия Ростовского

456

           *Житие вкратце*

[1] преподобнаго и богоноснаго отца нашего Аврамиа, архимандрита Богоявленьского, ростовскаго чудотворца, *иже списано бысть от ученик его*

[2].  Благослови, отче.

(РНБ. Q 1468. Сборник. XVI в. Лл. 155-167).

Л.155. Еже удивитися святых трудом добро, а еже равновати[3] спасению, ходатайственному[4].  Похваляти же и писати чюдное их по Бозе житие, и еже от Святаго Духа дарованием действуемаа в них чудеса, богоугодно и полезно.  Понеже и древле Духом Святым речено бысть пророком: память праведнаго с похвалами.  И похваляему праведнику, възвеселятся людие.  Не убо требуют от нас святии некиа похвалы, но и удаляются от них:  възненавидеша бо мир, и *яже суть лестнаа в мире сем*[5]. Но мы себе похвалами святых вразумляеми, преднапутие спасениа творим.  Святии бо ничтоже от мира възлюбиша: и сего ради свет миру явишася.  Възлюбиша бо Господа Бога от всего сердца своего, *и яко бесплотни суще*[6],  естественнаа // (л. 155 об.) презревше, целомудренне и праведне поживша, страхом Господним уклонишася от всякого зла.  И сего ради быша от ангел славни, и бесом страшни.  Яко же рече Господь, прославляющаа Мя прославлю.  Понеже всяк человек звание  от своих дел приемлет: или[7] прославится, или постыдится.  И всяк любяй Бога, ненавидит зла, и възлюблен будет Богом.  А любяй неправду, ненавидит свою душю, и възненавиден будет Богом.  И сиа вся ведяще святии, деснаа убо възлюбиша, шуая же презреша.  От них же есть и сей великий Аврамие чюдотворец, о нем же нам ныне слово предлежит.

                    Съ[8] преподобный отец нашь Аврамие от предел Галичских[9], града нарицаемаго Чюхлома:  бе родителю благочестиву сын[10].  И от них книжному учению наказан бысть, и благочестию научен,  и бе въ страсе божии, от младых ногот, ходя въ всяком смерении простоте, любя чистоту душевную, въкупе и телесъную.  И еще же юн сый възрастом, остави родители своа, и мирский мятеж, и взем крест свой, последова Христу, отсюду прочее весь Богови себе представити хотя.  Изыде взыскати

Л. 156. в честных, и чюдотворных обителех жилища святых, помянув рекшаго:  Добро опечалити родителя, а не Господа.  Овь бо създа, и спасе, *ови же множицею их же возлюбиша, погубиша*[11] и муце предаша.  И тако *обшед и съглядав места довол

457

на, прииде в пресловущий великий Новград, и тамо съглядав вся спасенаа, и чюдотворнаа места*[12], многонародна суща, и по Бозе живуща.  Обаче въсхоте по пророку рекшему, и глас он помянув, к великому (оному)[13]: еже бегати от человек, и спастися[14].  Тако и съй преподобный удалитися от человек и въдворитися в пустыню прииде к великому езеру Ладожскому[15], и тамо обрете обитель, реченую Валам.  Вниде, и обита: и виде (место)[16] от града удалено, и не зело народно, въсхоте пребывати ту, // (л. 156 об.) и приат бысть.  Видев же въ[17] братии благое устроение, начат *молити пастыря*[18] обители тоа, да и сподобит его ангельскому образу.  Игумен же, того искусив духовне, обрете съсуд чист Богови, повеле пострищи его, и дасть ему ангельский образ,  и причте его к прочей братии.  Преподобный же порадовася,  яко бысть мних[19], и чистоте приятелище быв Святаго Духа.  Покори убо плотскаа духови, и обладаа страстьми душевными и телесными, и жестокому пребыванию себе вдав, труды к трудом прилагаа, и бысть искусен инок[20], и въ всех тяжких службах, и пребых ту лета доволна, *и трудом многим себе истончив*[21].  *И видев игумен и братиа*[22] преподобнаго Авраамиа трудившася доволно, и искусна о всем,  начаша почитати его[23], и честь велию въздаати ему, инем же яко и пастыря того нарицати.  Преподобный же сего никакоже въсхоте слышати, ниже чести некиа взыскати,  но абие отиде

Л. 157. в незнаемыа страны. И по благоволению Божию прииде близ града Ростова, и ту обита при езере, малу колибицу себе поткнув.   Видевше же благоразумнии и богобоязнивии человеци, начаша приходити к нему, инии же и съжителствовати с ним произволяюще.  Преподобнии же приимаше, и учаше когождо их от божественаго писаниа.  И съветоваше комуждо полезнаа, и печашеся ими.  Отселе и нехотя, бысть *иноком началник*[24], и болшим трудом касашеся, и житие паче ангельское подражаа, и чюдес обогатився благодатию, яко всем приходящым  исцеляти страсти неисцелныя.  Преподобный же о сем паче умиливъся, и течением слезным непрестанно душу омываа. Видев же блаженный еще в то время прелесть идольскую, в нечестивых душах единаче растущю,  не убо бе и еще прияли вси в Ростове святое крещение.  Но Чюдский конець

458

единаче // (л. 157 об.) поклоняшеся идолу каменну, омрачени бо суть сердца их деанием бесовьским. Бе же въ идоле бесу злу  живущу, и мечты творящу христианом, и страшилища злым своим омрачением, яко близ его не смеаше никтоже путем тем ходити. Преподобный же Аврамие, видев сицеву прелесть в несмысленных человецех, и огорчися духом, и възревновав по Господи, якоже древле *пророк Илиа*[25], помолися Богови[26], глаголя:  Господи Боже Вседръжителю, призри с высоты святыа Своеа на раба Твоего, и даждь ми силу и благодать Твоего Святаго Духа, еже разорити многокозненаго сего идола, и настави человеки прелщеныа, во еже творити волю Твою святую.  И сиа рек, тщашеся жилище бесовьское разорити, и не можаше, не дадяше бо близ себе приити окаанный тъи влъшеством своим. И недоумеашеся о сем.  И се по смотрению Божию бысть, не яко презря[27] Господь молитвы святаго,

Л. 158. но да усерднейша покажет его и прославится в них, вся бо возможна суть от Бога.  И бе святый скорбя седяше, виде некоего старца к себе грядуща, благоговейна образом суща.  Преподобный же срете его, и оба поклонистася межю събою, и взяста друг от друга благословение, седоста.  И по молитве начат блаженны Аврамие к старцю глаголати, откуду, отче, грядеши, и коеа страны еси, святъче Божий.  И глагола ему старець: аз есмь, отче, Царя града родом, и пришлець странен на вашей земли.  Рци же ми ты, отче, что ради скорбя седиши близ многострастнаго[28] сего идола окааннаго Велеса.  Глагола же блаженный Аврамие къ старцю: тщание мое, отче, къ Господу Богу, яко да подасть ми помощь, еже разорити многострастнаго сего идола нечистаго[29] Велеса, и не възмогаю: презре бо Господь Бог моление мое, и се, скорбя седох.  И глагола старець к преподобному Авраамию.  Аще хощеши, отче, // (л. 158 об.) желаемое получити, иди к Царю граду, и тамо взыщи въ граде дому Иоанна Богослова, и вниди в дом его, и да помолися[30] образу его, и не изыдеши оттуду тощь, но все желаемое тобою получиши.  Ащели же не идеши в дом Иоанна Богослова, не можеши желаемое получити.  И печален бысть блаженный Авраамие о долготе путнем[31].  И рече ему старець: Господь Бог прекратит путь твой малым временем.  Блаженный же Авраамие исполнився Духа Свята, и взем благословение от

459

старца, и нача тещи путемь, и яко забы длъготу пути.  И яко прейде Ишню реку, стрете человека страшна, благоговейна образом, плешива, възлыса, брадою круглою великою, и зело благолепна суща, имеюща в руце трость.  И пад пред ногама его блаженный, поклонися ему.  И глагола ему страшный он муж: камо грядеши, старче. И поведа ему блаженный все поряду, коеа

Л. 159. ради вины, и камо грядет, и что ради на взыскание дому Иоанна Богослова. Глагола ему страшный тъи муж: иди, възвратися, старче, вземши трость мою, и приступи къ идолу Велесу, и избоди его тростию сею въ имя Иоанна Богослова, и будет ти в прах окаанныи. И абие невидим бысть.  Преподобный же[32], страхом и радостию одръжим, възвратися вспять.  И прииде абие къ идолу без возбранениа, и избоде тростию въ имя святаго Иоанна Богослова, и абие идол Велес в прах бысть окаанный.  Святый же Авраамие чудотворець о сем прослави Бога, давшаго ему победу на всю силу вражию, и святаго апостола и евангелиста Иоанна Богослова, иже бысть ему помощник на диавола и на действо его.  И поведа сиа вся в то время епископу сущу Феодору[33]. И по благословению постави на том месте блаженный, идеже срете святаго апостола и евангелиста Иоана Богослова, церковь во имя Иоанна Богослова, иже суть и до сего дне.  И паки // (л. 159 об.) вземши благословение у епископа, възгради церковь малу на том месте, идеже бе прежде идол Велес, в славу Христа Бога нашего, во имя святаго Его Богоявлениа, и келии поставив, и мнихи призвав, печашеся ими, и сътвори обитель свою общину[34].  Людие же, окрест сущии, елици зломыслием одръжими, и елици древле неверием погружени, съи въоружахуся на святаго,  паче же сам сатана, иже древле чтим бяше от них, и действоваше в них, и ныне же от святаго попираем. И много зла святый подъят от неверных.  Овогда убо разорити хотяше святыню его, овогда же и съжещи хотяше, но Богу не попустившу им, молитвами и тръпением преподобнаго. Елико бо они злобою въоружахуся на святаго, толико он молитвою подвизашеся о них[35]. И не по мнозе времени всех къ Христу приведе богоразумием.  И крестишася от мала, и до велика, и начаша

Л. 160. вкупе славити Бога: и к пению ходити, на славословие Божие во дне и в нощи, и жены их, и отроци.  Преподобный же

460

почитанием книжным, и поучением духовным наслаждаяше сердца их, паче меда, и сота сладчайши.  И толико тщание и благочестие в них процвете, преподобнаго Авраамиа молитвами и поучением и духовною любовию, яко и юнныя отроки  на ревность подвиже к добродители. Мнози бо отроци оставльше родителя своа, (и отай)[36] прихождааху къ святому, и быша мниси.  Преподобный же без възбранениа вся приходящиа с верою приимаше и с разсуждением духовным постризаше, яко виноград благоплодне садяше при водах въздержаниа, и напааше их поучении божественых словес. И умножи монахи, и наипаче молитвою украси их, и церковь велию създа, и украси ю, яко невесту Христову, чюдными иконами, и святыми книгами, // (л. 160 об.) и в ней день дне преспевающе, а наипаче мъножашеся пение святое и славословие Богови.  Князи же ростовьстии начаша веру велику имети, ко отцу своему Авраамию, и к монастырю его, и къ всем мнихом[37], и имения многа дааху на строение монастыреви[38], и села дааху монастырю и всем мнихом[39] на потребу, и нищим на прекръмление.  Видев же преподобный епископ Феодор[40] множащюся братию во обители святаго, и монастырю всеми[41] потребами обилну сущу, и благослови их, и любовию помагаше им, съвет даа о всем къ спасеным стезям[42].  Последи же совет сътвори епископ Иларион с великим князем Владимером, и с князем з Борисом, дабы сътворили архимандритию ту обитель. И с съветом абие понудиша святаго, и святивше, поставиша преподобнаго Авраамиа архимандрита, и тако запечатлевше любовию, утвердиша

Л. 161. благословением.  И начат святый болшими (подвиги)[43] подвизатися, и труды к трудом прилагати, и сугубей молитве, и посту себе вдав, и прочим добродетелем, образ быв всем, смирение, и целомудрие стяжав, и любовь нелицемерну ко всякому приходящему равно, к велику и к малу, к вельможам не тщеславием, *ни к нищим презорьством*[44], но къ всем подобающаа исправляше.  Яко же рече апостол, никомуже ничим же должни бывайте.  Старый же ненавистник добру диавол всячески многими искусы въоружаяся[45] на преподобнаго, и пакости ему творяше в нощи и во дни, но никакоже устраши преподобнаго мечты своими, огражден бо бе благодатию Христо

461

вою, и силою честнаго и животворящаго креста.  Бысть некогда, хотящу святому по обычаю литоргисати въ святей Божии церкви, и обычныа молитвы уже съвръши къ святому // (л. 161 об.) причащению.  И яко хотящу ему умыти руце, диавол вниде въ умывалницу в воду, хотя преподобному спону сътворити водою. Разумев же преподобный лукаваго духа в сосуде, взем честный крест, положи верх сосуда, и окрест сосуда огради крестным знамением, и тако остави сосуд, и не врежаше его на многи дни.  Бес же, крестною силою жгом в сосуде, не могий изыти.  Бысть же обычай ту сущим князем на поле ездити по вся дни, лов деюще, и паки възвращаася въ град, вхождааху в монастырь поклонятися церкви, и от святаго благословение приимаху.  Паки же по обычаю приидоша князи в келию к преподобному благословения ради.  Случижеся в то время не обрестися преподобному в  келии, бяше бо в пеколнице мыяше власяници на братию. Обычай бо имеаше преподобный по вся дни на братию тружатися, овогда убо в поварню дрова секий,

Л. 162. овогда же власяницы на братию мыаше, иногда же воду нося в поварню и в пеколницю.  Слышав же преподобный о князех, яко поидоша в келлию его, и хотяще благословити их.  Еще же преподобному недошедшю своея келиа, князи же суть в келии, ждуще преподобнаго, и видеша сосуд крестом покрыт, недоумевахуся о сем.  Един же от них дръзну въсхитити крест с сосуда, да знаменается им, и абие изыде бес ис сосуда, черн, аки дым, и злосмраден, яко устрашити ту всех сущих мрачьным своим привидением.  И усрет лукавый дух преподобнаго, в келлию грядуща, и нача зла словеса износити на преподобнаго, глаголющи: яко же ты мне сотвори, окаанне, мучитися силою невидимаго Бога, и палиму быти ми силою крестною во убозем твоем съсуде, тако и аз тебе спону сътворю начинанию твоему, и одолею ти в мале времени, яко поострю // (л. 162 об.) на тебе лютейший ков, и сътворю ти раны многы, и укор всем видящим тя, и муки злы наведу на тя, и на пезе ослятице всажен будеши без седалища, и в сандалиа женскаа чръвлены обувен будеши.  И ина многа зла сътворю тебе, противу твоему злому неистовству, яже (приях от тебе. Преподобному же)[46] оградившуся крестным знамением, и абие бес изчезе, и не видим бысть. Князем же въпрашающим преподобнаго о бывшем, яко

462

дым злосмраден изыде ис сосуда.  Преподобному же ничтоже им о том поведавшю.  Приаша же князи благословение от святаго, преподобный же поучениа духовнаа предложив им от божественаго писаниа, яко да саном княжениа не възвышаются, и рабом и подручным милостиви будут, и не възносятся на них, яко же Господь рече: блажени милостивии, яко ти помиловани будут, и паки рече: блажени нищии духом, яко тех есть Царство Небесное. Инъ рече: блажен град от благочестивых царь[47] царствуемь,

Л. 163. и корабль от искусных окръмляем[48].  Нечестия же ради град пленится, корабль же, от неискусных окръмляем[49], погибает.  Дондеже душа любит славу человечю, еже есть тщеславие, отвращание же от Бога, еже к меншим себе презорьство.  От сего бо ражается безвестнаа дръзость.  Любовь же истиннаа вся наставляет к свету богоразумия.  И апостол рече, яко любы покрывает множество грехов.  Сия же, и ина такова рече им, отпусти их с миром. Князи же, благодаряше Бога о сих, къ святому *паче веру*[50] простирааху.  Не по мнозе же времени преобразися той бес лукавый, иже глагола къ святому развращенаа, въ образе воина, и прииде к великому князю Владимеру во град Владимерь. И начат на преподобнаго тяжки и зла словеса износити.  Рече: господи царю, хощу ти тайну поведати велику[51], твоему дрьжавству достойну. Есть въ твоей дрьжаве, царю, въ граде // (л. 163 об.) Ростове, мних некий, Авраамий зовом, волхв сый, образом творяся, яко свят, прелщаше люди, смирен ся творя.  Съи обрете влагалище велие в земли, съсуд медян, полн злата, достоин твоему господству, имъже бо съсудом златым, и поясом златым и чепем немощно цены предати, сребру же и иным *драгим неким вещем*[52] немощно исповедати, и тем съкровищем монастырь созда, и церковь велию постави, а твоему господьству не поведа.  Князь же великий Владимер разжегся гневом великим на преподобнаго, и посла воина люта зело по блаженнаго Авраамиа, глаголющи тако: где обрящеши того старца[53], то не глаголи *к нему*[54] ни единого слова, но в чем паки обрящеши его, тако и постави его пред мною.  Сия же вся суть по научению злаго того[55] оболгавшаго его воина, иже суть лукаваго беса.  И яко приспе воин, посланый от князя  по блаженнаго,

463

Л. 164. святому же[56] в то время на келейной молитве стоящю после съборнаго пениа, въ единой власяници, и не обувен в сандалиа.  Прииде же в то время злый тъй и сверепый воин, не имый милости ни единоя о преподобнем, и тако вниде ко святому, и обрете его сице не оболчена, ни обувена, и тако въсхити его, *не дааше ни*[57] глаголати к себе преподобному, ни ризами облещися, ни обувениа ногам, тако бо сатана обуя ему сердце. Виде же преподобный вражду вражию бывшю на ня, ничтоже усумнеся, ни убояся, но паче благодаряще Бога о приключившейся на нем беде.  И взем его воин, посади на свой конь с собою.  И женяше[58] скоро граду Владимерю, и яко бысть на оной стране езера, обрет селянина, яздяща на пезе ослятице, и в руце имый сандалия женьскаа и суть червлены.  И всади преподобнаго[59] на ослятицю, и чръвленаа сандалиа възложи на ногу его. // (л. 164 об.) И абие тако постави его пред державъным великим князям Владимером, въ единой власянице, безчествуема, и не бе на преподобнем ничтоже, разве единоа власяници, яже на теле ношаше, и червлена сандалиа. *Повеле же князь великий Владимир*[60] поставити воина съперника его пред собою. Став же мнимый воин пред великим князем, начат те же глаголы злы *на преподобнаго износити*[61] о обретении влагалища велия, яко же пред рекохом.  Преподобный же святый[62] Аврамие, въздев руце на небо, запрети духу лукавому, глаголя:  запрещаю ти именем Господа нашего Иисуса Христа.  Повежь ми, кто ты еси, иже таковыми глаголы оболсти на мя великому князю Владимеру.  Бес же, не могий святаго запрещениа стерпети, абие въстрепета.  И нача, трепеща, глаголати: аз есмь бес Зефеус, искони ненавидяй добра роду человеческому, паче же иноком[63], боящимся Бога.  Сеже  увесть, калогоре[64], яже ти глаголах

Л. 165. прежде, то и сътворих, о первем твоем неистовьстве, яже мя еси мучил во убозем твоем съсуде. И се рек, абие изчезе, и не видим бысть.  Князь же великий Владимер, видев прелесть вражию, и чудо сие, еже сътвори святый, яко не стерпе диавол запрещения от святаго, но абие изчезе, и без вести бысть, и преподобнаго святаго чюдотворца стояща поругана, и странна очима зрети. И абие страх обьят всех ту сущих, иже суть с великим князем Владимером.  И нача князь великий Владимер съ

464

слезами молити *старца чудотворца*[65], прося от него прощениа, о нем же съгреши, и слезам текущим, глаголаше: аз, отче, повинен есмь твоему *нуждъному приходу*[66], и люто оскорбих тя зело.  Отдай же ми, отче, о нем же тя прогневах.  Себо враг оскорби[67] ми сердце, и разъяри мя, и въверже мя в сей грех, его же ты, чюдодействовав, прогнал еси, и без вести сътворил еси его. По истине // (л. 165 об.) бо от сего разумею, яже от пророка Святым Духом реченное, яко дивен Бог во святых Своих, Бог израилев. Но мы не вемы, и от неведения неначаанно впадаем в согрешениа. *Старец же*[68] глаголя: Господь простит тя, самодръжавный царю, сие бо дело древняго врага диаволе суть. Понеже, царю, не дивися сему, искони бо сатана боряся с человеки, паче же боящимися Бога, спону сътворити обыче.  Князь же великий Владимер, видев преподобнаго (обычай и)[69] смерение и благое разсуждение, понеже тихими словесы и *смереными вещающа*[70] к нему, яко ничто же зла восприемша, паче умилися о сем.  И начат ублажати преподобнаго Аврамиа, и честь велию въздаати, *к старцю же глаголаше*[71]: что ти въздам, отче, яко много тебе длъжен есмь.  *Старец же*[72] глаголя: Благый царю, мы вся оставихом, и вслед Христа идохом, что убо хотехом приати, точию же надеждами будущих веселимся.  Аще что и произволиши дати, то

Л. 166. церкви Божии.  Подобает же ти  со благым предложением, яже к Богу, и разсуждение имети благо, вам бо дано бысть по Бозе правити мир. Праведен Господь во всех путех своих, сего ради рече: блажени милостивии, яко ти помиловани будут. Клеветы скоро не приимати, и на повиннаго суду яро не нападати.  Понеже и божественный апостол рече: хвалится милость суда[73].  Такоже и о иных добродетелех, да не како зде в суетных упражняяся, тамо будущих погрешим.  Князь же великий[74], в сласть послушаа старца блаженнаго Авраамиа чюдотворца, и велми почте, и многа имениа вдасть ему на устроение церкве, и на създание монастырю.  И домы, и села, и водныа угодиа многы *подасть монастырю*[75].  И устрои его своим монастырем, и учини его вышша всех обителей, иже суть в Ростове, и многи рабы подасть в дом святому Богоявлению, и грамоты многи подасть // (л. 166 об.) жаловалныа, иже суть и до сего дне. И отпусти преподобнаго Аврамиа с великою честию въ свой ему

465

монастырь.  И слышашя братиа отца своего приход, архимандрита Авраамиа чюдотворца, и иже о нем в повестех, како Бога прослави, и диавола посрами, и великаго князя възвесели, и како одарован бысть.  И абие с радостию сретоша его, он же благодарив Бога, и братию благословив, вниде в келлию свою, и паки труды к трудом прилагаа, образ бысть всем добродетелем.  И поживе преподобный архимандрит Аврамие чюдотворець в своем монастыри в велице смирении, труды и поты, и слезныа капля безпрестанно истачая, тело убо труды, душю же слезами омываа изрядне, и в глубоких сединах, в старости добре, ко Господу отиде.  Его же измлада възлюби. И погребен бысть въ своей ему обители от своих ученик[76] месяца октября в 29 день.

                    Помолимжеся и мы, да и нас

Л. 167. сподобит Господь Бог молитвами святаго чюдотворца Авраамиа вечных благ получити о Христе Иисусе Господи нашем, Ему же слава и дръжава, съ Безначалным Его Отцем, и с Пресвятым и Благым , и Животворящим Духом, ныне и присно, и во веки веков, аминь.