Воспойте Господеви песнь нову, воспойте Господеви вся земля; воспойте Господеви, благословите имя eго; благовестите день от дне спасение eго. Возвестите во языцех славу eго, во всех людех чудеса eго. Яко велий Господь и хвален зело, страшен eсть над всеми боги. Яко вси бози язык бесове; Господь же небеса сотвори. Исповедание и красота пред ним, святыня и великолепие во святиле eго. Принесите Господеви, oтечeствия язык, принесите Господеви славу и честь. Принесите Господеви славу имени eго; возмите жeртвы и входите во дворы eго. Поклонитеся Господеви во дворе святем eго; да подвижится от лица eго вся земля. Рцыте во языцех: яко Господь воцарися; ибо исправи вселенную, яже не подвижится; судит людем правостию. Да возвеселятся небеса, и радуется земля; да подвижится море и исполнение eго; возрадуются поля, и вся яже на них; тогда возрадуются вся древа дубравная от лица Господня, яко грядет, яко грядет судити земли; судити вселенней в правду, и людем истиною своею.