Ко входуБиблиотека Якова КротоваПомощь
 

ПАНИХИДА

Cр. богослужение.

Священник: Благословен Бог наш…

Хор: Аминь. Святый Боже, Святый крепкий, Святый безсмертный, помилуй нас (трижды).

Диакон: Миром Господу помолимся.

Хор: Господи помилуй (на каждом прошении).

Диакон:

О свышнем мире, и о спасении душ наших, Господу помолимся.

О оставлении согрешений, во блаженней памяти преставльшихся, Господу помолимся.

О приснопамятных рабех Божиих (имена), покоя, тишины, блаженныя памяти их, Господу помолимся.

О простити им всякое прегрешение вольное и невольное, Господу помолимся

О неосужденным предстати у страшнаго престола Господа славы, Господу помолимся.

О плачущих и болезнующих, чающих Христова утешения, Господу помолимся.

О отпуститися им от всякия болезни, и печали, и воздыхания, и вселити их идеже присещает свет лица Божия, Господу помолимся.

О яко да Господь Бог наш учинит души их в месте светле, в месте злачне, в месте покойне, идеже вси праведнии пребывают, Господу помолимся.

О причтении их в недрех Авраама, и Исаака, и Иакова, Господу помолимся.

О избавитися нам от всякия скорби, гнева, и нужды, Господу помолимся.

Заступи, спаси, помилуй и сохрани нас, Боже, Твоею благодатию.

Милости Божии, царства небеснаго и оставления грехов испросивши тем, сами себе, друг друга, и весь живот наш Христу Богу предадим

Хор: Тебе, Господи.

Священник:

Яко Ты еси воскресение, живот, и покой усопших рабех Твоих (имя): Христе Боже наш: и Тебе славу возсылаем со безначальным Твоим Отцем и пресвятым и благим и животворящим Твоим Духом, ныне и присно, и во веки веков.

Хор: Аминь.

Диакон:

Аллилуия, глас 8-й. Блажени, яже избрал и приял еси, Господи.

Стих: Память их в род и род.

Стих: Души их во благих водворятся

Хор: Аллилуия (по трижды на каждый стих).

Тропарь, глас 8-й

Глубиною мудрости человеколюбно вся строяй и полезное всем подаваяй, едине Содетелю, упокой, Гсподи, душы раб Твоих: на Тя бо упование возложиша Творца и зиждителя и Бога нашего.

Слава и ныне: Тебе и стену и пристанище имамы, и молитвенницу благоприятну к Богу, Егоже родила еси, Богородице безневестная, верных спасение.

Тропари, глас 5-й

Припев: Благословен еси, Господи, научи мя оправданием Твоим.

Святых лик обрете источник жизни и дверь райскую да обрящу и аз путь покаянием; погибшее овча аз есмь, Воззови мя, Спасе, и спаси мя.

Благословен еси, Господи…

Агнца Божия проповедавше, и заклани бывше якоже агнцы, и к жизни нестареемей, святии, и присносущней преставльшеся. Того прилежно мученицы молите, долгов разрешение нам даровати.

Благословен еси, Господи…

В путь узкий хождшии прискорбный, вси в житии крест яко ярем вземшии, и Мне последовавши верою, приидите насладитеся, ихже уготовах вам почестей, и венцев небесных.

Благословен еси, Господи…

Образ есмь неизреченныя Твоея славы аще и язвы ношу прегрешений. Ущедри Твое создание, Владыко и очисти Твоим благоутробием и возжеленное отечество подаждь ми рая паки жителя мя сотворяя.

Благословен еси, Господи…

Древле убо от не сущих создавый мя и образом Твоим божественным почтый. Преступлением же заповеди паки мя возвративый в землю, от неяже взят бых. Но еже по подобию возведи древнею добротою возобразитеся.

Благословен еси, Господи…

Упокой Боже рабы Твоя, и учини я в раи, идеже лицы святых, Господи, и праведницы сияют яко светила. Усопшия рабы Твоя упокой презирая их вся согрешения.

Слава: Трисиятельное единаго Божества благочестно поем вопиюще. / Свят еси Отче безначальный, / собезначальный Сыне и Божественный Душе, / Просвети нас верою Тебе служащих / и вечнаго огня исхити.

И ныне: Радуйся Чистая, Бога плотию рождшая во спасение всех / Еюже род человеческјй обрете спасение. / Тобою да обрящем рай, / Богородице чистая, благословенная.

Аллилуия, аллилуия, аллилуия, слава Тебе Боже (трижды).

Малая ектения

Диакон:

Паки и паки миром Господу помолимся.

Хор: Господи, помилуй.

Еще молимся о упокоении душ усопших рабов Божиих (имена); и о еже проститися им всякому прегрешению, вольному же и невольному.

Яко да Господь Бог учинит душы их, идеже праведнии упокояются.

Милости Божия, Царства Небеснаго, и оставления грехов их у Христа безсмертнаго Царя и Бога нашего просим

Хор: Подай Господи.

Диакон: Господу помолимся.

Хор: Господи, помилуй.

Священник: Яко Ты еси воскресение, и живот, и покой, усопших рабов Твоих (имена), Христе Боже наш; и Тебе славу возсылаем, со безначальным Твоим Отцем, и с пресвятым и благим и животворящим Твоим Духом, ныне и присно, и во веки веков.

Хор: Аминь.

Седален гл. 5-й

Покой, Спасе наш, / с праведными рабы Твоя, / и сия всели во дворы Твоя, / якоже есть писано, / презирая яко благ прегрешения их / вольная и невольная, / и вся яже в ведении и не в ведении, Человеколюбче.

Слава и ныне: От Девы возсиявый миру Христе Боже / сыны света Тою показавый, помилуй нас.

Запевы: Покой, Господи, души усопших раб Твоих.

Слава… и ныне… (два раза).

Ирмосы 6-го гласа

Песнь 3-я

Несть свят, якоже Ты, Господи Боже мой, вознесый рог верных Твоих Блаже, и утвердивый нас на камени исповеданя Твоего.

(опять запевы дважды).

Песнь 6-я

Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, многомилостиве.

Малая ектения

(смотри выше)

Хор:

Со святыми упокой Христе, душы раб Твоих идеже несть болезнь, ни печаль, ни воздыхание ,но жизнь безконечная.

Сам един еси безсмертный, сотворивый и создавый человека. Земнии убо от земли создахомся, и в землю туюжде пойдем якоже повелел еси, создавый мя, и рекий ми: яко земля еси и в землю отыдеши, аможе все человецы .Надгробное рыдание творяще песнь: Аллилуия, аллилуия, аллилуия.

(Опять запевы по два раза)

Диакон: Богородицу и Матерь Света в песнех возвеличим.

Хор: Дуси и души праведных восхвалят Тя, Господи.

Песнь 9-я

Бога человеком невозможно видети, на Него же не смеют чини ангельстии взирати. Тобою бо, Всечистая, явися человеком Слово воплощенно, Егоже величающе, с небесными вои, Тя ублажаем.

.

Чтец: Отче наш, Иже еси на небесех! да святится имя Твое, да приидет Царствие Твое; да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Священник: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Хор: Аминь.

Тропари (глас 4-й)

Со духи праведных скончавшихся, душы раб Твоих, Спасе, упокой, сохраняя их во блаженной жизни, яже у Тебя, человеколюбче. В покоищи Твоем Господи, идеже вси святии Твои упокоеваются, упокой и душы раб Твоих, яко един еси человеколюбец.

Слава Отцу и Сыну и Святому Духу: Ты еси Бог, сошедый во ад, и узы окованных разрешивый, сам и душы раб Твоих упокой.

И ныне и присно и во веки веков, Аминь: Едина чистая и непорочная Дево, Бога без семене рождшая, моли спастися душам их

Сугубая ектения

Диакон: Помилуй нас, Боже, по велицей милости Твоей, молимтися, услыши и помилуй.

Хор: Господи, помилуй (трижды).

Дальше идут прошения малой ектении, смотри выше. После “Тебе, Господи:”

Священник:

Боже духов и всякия плоти, смерть поправый, и диавола упразднивый, и живот миру Твоему даровавый, сам, Господи, упокой душы усопших рабов Твоих (имена): в месте светле, в месте злачне, в месте покойне, отнюдуже отбеже болезнь, печаль и воздыхание: всякое согрешение содеянное ими, словом, или делом, или помышлением, яко благий человеколюбец Бог прости. Яко несть человек, иже жив будет, и не согрешит: Ты бо един кроме греха, правда Твоя правда во веки, и слово Твое истина.

Яко Ты еси воскресение, и живот, и покой, усопших рабов Твоих (имена), Христе Боже наш; и Тебе славу возсылаем, со безначальным Твоим Отцем, и с пресвятым и благим и животворящим Твоим Духом, нынееи присно, и во веки веков.

Хор: Аминь.

После “отпуста” хор поет “Вечная память.”

Лития на Радоницу

После возгласа священника, певчие: Христос воскресе из мертвых, смертию смерть поправ и сущим во гробех живот даровав (трижды).

1. Воскресения день, просветимся людие: Пасха, Господня Пасха! От смерти бо к жизни, и от земли к небеси, Христос Бог нас преведе победную поющия.

Припевы: Христос воскресе из мертвых (в конце каждого ирмоса).

3. Приидите пиво пием новое, не от камене неплодна чудодеемое, но нетления источник из гроба одождивша Христа, в Нем же утверждаемся.

6. Снисшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскрес еси от гроба.

8. Ангел вопияше Благодатней: Чистая Дево, радуйся, и паки реку: радуйся; Твой Сын воскресе тридневен от гроба, и мертвыя воздвигнувый, людие веселитеся.

9. Светися, светися, новый Иерусалиме, слава бо Господня на Тебе возсия. Ликуй ныне, и веселися Сионе. Ты же Чистая, красуйся, Богородице, о востании Рождества Твоего.

Священник говорит сугубую ектению.

Вечная память.

 
Ко входу в Библиотеку Якова Кротова



Замена матриц

Форум и чат. Советы психолога.

zion-kirov.ru

Уличные светодиодные светильники

Сколько можно сэкономить, если использовать светодиодные лампы

omes-led.ru