БИБЛИЯ

3 книга Царств

1

1 И царь давид бысть стар прешед дни, и одеваху его ризами (многими), и не согревашеся.

2 И реша отроцы его ему: да поищут господину нашему царю девицы юныя, и предстоит цареви, и будет греющи его, и да лежит с ним, и согреется господин наш царь.

3 И искаша отроковицы добрыя от всего предела израилева, и обретоша ависагу сумантяныню, и приведоша ю ко царю.

4 И бе отроковица добра видением зело: и бысть греющи царя и служаше ему: царь же не позна ея.

5 И адониа сын аггифин вознесеся, глаголя: аз имам царствовати. И сотвори себе колесницы и конники, и пятьдесят мужей еже ходити пред ним.

6 И не возбрани ему отец его никогда, глаголя: почто сие ты сотворил еси? И бе той красен зраком зело, и того роди по авессаломе.

7 И беша совети его со иоавом сыном саруиным и со авиафаром иереом, и помогаху вслед адонии.

8 Садок же иерей и ванеа сын иодаев, и нафан пророк и семей, и рисий и сынове сильнии давидовы не быша по адонии.

9 И пожре адониа овцы и телцы и агнцы при камени зоелефе, иже бе близ источника рогиля: и призва всю братию свою, сыны царевы, и вся мужы иудовы, отроки царевы:

10 нафана же пророка и ванеа и сильных и соломона брата своего не зва.

11 И рече нафан ко вирсавии матери соломони, глаголя: не слышала ли еси, яко воцарися адониа сын аггифин, господин же наш давид не весть:

12 ныне убо совещаю ти совет, и избавиши душу свою и душу сына твоего соломона:

13 гряди, вниди к царю давиду и речеши к нему, глаголющи: не ты ли, господи мой царю, клялся еси рабе твоей, глаголя: яко соломон сын твой имать царствовати по мне, и той сядет на престоле моем? и что яко воцарися адониа?

14 и се, еще глаголющей тебе тамо со царем, и аз вниду вслед тебе и дополню словеса твоя.

15 И вниде вирсавиа ко царю в ложницу. И царь стар зело, и ависаг сумантяныня бяше служащи царю.

16 И приклонися вирсавиа и поклонися цареви. И рече царь: что ти есть?

17 Она же рече: господи мой царю, ты клялся еси пред Господем Богом твоим рабе твоей, глаголя: яко сын твой соломон имать царствовати по мне, и той сядет на престоле моем:

18 и се, ныне адониа царствует, ты же, господи мой царю, не веси:

19 и пожре телцы и агнцы и овцы во множестве, и созва вся сыны царевы, и авиафара жерца и иоава князя силы, соломона же раба твоего не призва:

20 ты же, господи мой царю, очи всего израиля к тебе: да возвестиши им, кто сядет на престоле господина моего царя по нем:

21 и будет егда уснет господин мой царь со отцы своими, и буду аз и сын мой соломон грешни.

22 И се, еще ей глаголющей с царем, и нафан пророк прииде.

23 И возвестиша царю, глаголюще се, нафан пророк. И вниде пред лице царево, и поклонися царю пред лицем его до земли,

24 и рече нафан: господи мой царю, ты ли рекл еси: адониа да царствует по мне, и той да сядет на престоле моем?

25 яко сниде днесь и закла телцы и агнцы и овцы во множестве, и созва вся сыны царевы и князи сильных, и авиафара иереа: и се, суть ядуще и пиюще пред ним, и реша: да живет царь адониа:

26 и мене самаго раба твоего, и садока иереа, и ванеа сына иодаева, и соломона раба твоего не зва:

27 от господина ли царя моего бысть глагол сей? и не сказал еси рабу твоему, кто сядет на престоле господина моего царя по нем?

28 И отвеща царь давид и рече: призовите ми вирсавию. И вниде (вирсавиа) пред царя и ста пред лицем его.

29 И клятся царь и рече: жив Господь, иже избави душу мою от всея печали:

30 якоже бо кляхтися пред Господем Богом израилевым, глаголя: яко соломон сын твой воцарится по мне, и той сядет на престоле моем вместо мене, яко тако сотворю ему в днешний день.

31 И преклонися вирсавиа лицем на землю, и поклонися царю и рече: да живет господин мой царь давид во веки.

32 И рече царь давид: призовите мне садока жерца и нафана пророка, и ванеа сына иодаева. И внидоша пред царя.

33 И рече им царь: поимите с собою рабы господина вашего, и всадите сына моего соломона на мска моего, и ведите его к гиону,

34 и да помажет его тамо садок иерей и нафан пророк в царя над израилем, и вострубите трубою рожаною и речете: да живет царь соломон:

35 и изыдите вслед его, и внидет, и сядет на престоле моем, и той воцарится вместо мене: и аз заповедах, да будет властелин над израилем и иудою.

36 И отвеща ванеа сын иодаев царю и рече: буди тако: да утвердит Господь Бог глагол сей господина моего царя:

37 якоже бе Господь со господином моим царем, тако да будет и с соломоном, и да возвеличит престол его паче престола господина моего царя давида.

38 И сниде садок иерей и нафан пророк, и ванеа сын иодаев, и хереффи и фелеффи, и всадиша соломона на мска царя давида, и возведоша его к гиону:

39 и взя садок иерей рог с елеем от скинии, и помаза соломона, и воструби трубою рожаною, и реша вси людие: да живет царь соломон.

40 И взыдоша вси людие вслед его и ликоваша в лицех, и веселяхуся веселием великим, и разседеся земля от гласа их.

41 И слыша адониа и вси званнии его, и тии скончаша уже ядуще. И слыша иоав глас трубы рожаны и рече: кий глас есть града шумяща?

42 И еще ему глаголющу, и се, ионафан сын авиафара иереа прииде. И рече адониа: вниди, яко муж силы ты еси, и благая возвести.

43 И отвеща ионафан и рече: известно, господин наш царь давид постави соломона царем:

44 и посла с ним царь садока иереа и нафана пророка, и ванеа сына иодаева, и хереффи и фелеффи, и всадиша его на мска царева:

45 и помазаша его садок иерей и нафан пророк на царство в гионе, и взыдоша оттуду веселящеся, и возшуме град: сей глас, егоже слышасте:

46 и седе соломон на престоле царстем:

47 и внидоша раби царевы благословити господина нашего царя давида, глаголюще: да ублажит Бог имя соломона сына твоего паче имене твоего, и да возвеличит престол его паче престола твоего: и поклонися царь на одре своем,

48 и сице рече царь: благословен Господь Бог израилев, иже даде днесь от семене моего седяща на престоле моем, и очи мои видят.

49 И ужасошася ужасом, и восташа вси званнии адониевы, и отиде кийждо путем своим.

50 И адониа убояся от лица соломоня, и воста и отиде, и ятся за рог олтаря.

51 И возвестиша соломону, глаголюще: се, адониа убояся царя соломона, и держится за рог олтаря, глаголя: да кленетмися днесь царь соломон, яко не убиет раба своего оружием.

52 И рече соломон: аще будет сын силы, ни влас главы его упадет на землю: аще же злоба обрящется в нем, умрет.

53 И посла царь соломон, и сведоша его со олтаря. И вниде, и поклонися царю соломону. И рече ему соломон: иди в дом свой.
2

1 И приближишася давиду дние умрети ему, и заповеда соломону сыну своему, глаголя:

2 аз отхожду в путь всея земли: ты же крепися, и буди муж совершен,

3 и сохрани завет Господа Бога твоего, еже ходити во всех путех его, хранити заповеди его и оправдания его, и судбы его и свидения его, писанная в законе моисеове: да разумееши яже сотвориши по всем, елика заповедах тебе:

4 да утвердит Господь слово свое, еже рече о мне, глаголя: аще сохранят сынове твои пути своя, еже ходити предо мною во истине всем сердцем своим и всею душею своею, глаголя: не искоренится тебе муж с престола израилева:

5 и ты веси, елика сотвори мне иоав сын саруин, елика сотвори двема воеводама сил израилевых, авениру сыну нирову и амессаю сыну иеферову, и уби их, и излия крови брани в мире, и даде кровь неповинных на поясе своем, иже на чреслех его, и на сапозе своем сущем на нозе его:

6 и сотвориши по мудрости твоей, и не сведеши старости его с миром во ад:

7 сыном же верзеллии галаадитина сотвориши милость, и да будут с ядущими трапезу твою: яко тако приближишася мне, внегда бежати мне от лица авессалома брата твоего:

8 и се, с тобою семей сын гирань сын иемениин от ваурима, и той прокля мя проклятием горьким, в день в оньже исхождах в полки: и той сниде на сретение ми на иордан, и кляхся ему о Господе, глаголя: не убию тя оружием:

9 и да не обезвиниши его, яко муж мудр еси ты, и увеси что сотвориши ему, и сведеши старость его с кровию во ад.

10 И успе давид со отцы своими, и погребен бысть во граде давидове.

11 И бысть дний, в няже царствова давид во израили, четыредесять лет: в хевроне царствова седмь лет, во Иерусалиме же тридесять три лета.

12 И соломон седе на престоле давида отца своего сын дванадесяти лет, и уготовася царствие его зело.

13 И вниде адониа сын аггифин к вирсавии матери соломони, и поклонися ей. Она же рече: мир ли вход твой? И рече: мир.

14 И рече: слово мне к тебе. И рече ему: глаголи.

15 И рече ей: ты веси, яко мне бе царство, и на мя весь израиль положи лице свое, еже царствовати, и обратися царство, и бысть брату моему, яко от Господа бысть ему:

16 и ныне прошения единаго аз прошу от тебе, не отврати лица своего. И рече ему вирсавиа: глаголи.

17 И рече к ней: рцы к соломону царю, яко не имать отвратити лица своего от тебе, и дабы ми дал ависагу сумантяныню в жену.

18 И рече вирсавиа: добре, аз имам глаголати о тебе к царю.

19 И вниде вирсавиа пред царя соломона глаголати ему о адонии. И воста царь на сретение ей, и поклонися ей, и седе на престоле своем: и поставиша престол другий матери цареве, и седе одесную его,

20 и рече ему: прошения мала единаго аз прошу у тебе, не отврати лица моего. И рече к ней царь: проси, мати моя, яко не отвращуся от тебе.

21 И рече: даждь ависагу сумантяныню адонии брату твоему в жену.

22 И отвеща царь соломон и рече матери своей: вскую ты просиши ависаги сумантяныни адонии? еще проси ему и царства, яко той брат мой болший мене, и ему авиафар иерей, и ему иоав сын саруин воевода друг.

23 И клятся царь соломон Господем, глаголя: сия да сотворит мне Бог и сия да приложит, яко на душу свою глагола адониа слово сие:

24 и ныне жив Господь, иже уготова мя, и посади мя на престоле отца моего давида, и той сотвори ми дом, якоже глагола Господь, яко днесь умрет адониа.

25 И посла царь соломон рукою ванеа сына иодаева, и уби его, и умре адониа в той день.

26 И авиафару иерею рече царь: тецы ты во анафоф на село твое, яко муж смерти еси ты в днешний день, но не умерщвлю тебе, яко носил еси кивот завета Господня пред отцем моим (давидом), и яко озлоблен был еси во всех, имиже озлоблен бе отец мой.

27 И изгна соломон авиафара, еже не быти ему иереем Господним, якоже сбытися словеси Господню, еже глагола на дом илиев в силоме.

28 И слух дойде до иоава сына саруина, яко иоав последова адонии, и в след соломонь не уклонися. И бежа иоав в скинию Господню, и ятся рогов олтаревых.

29 И возвестиша соломону, глаголюще: яко бежа иоав в скинию Господню, и се, держится рогов олтаревых. И посла царь соломон ко иоаву, глаголя: что ти бысть, яко убежал еси во олтарь? И рече иоав: яко убояхся от лица твоего, и бежах ко Господу. И посла соломон ванеа сына иодаева, глаголя: иди, и убий его, и погреби его.

30 И прииде ванеа сын иодаев ко иоаву в скинию Господню, и рече ему: сия глаголет царь: изыди. И рече иоав: не изыду, но да зде умру. И возвратися ванеа сын иодаев и рече царю, глаголя: сия глагола иоав и сия отвеща мне.

31 И рече ему царь: иди и сотвори ему, якоже рече, и убий его, и погреби его, и отими днесь кровь, юже туне пролия иоав, от мене и от дому отца моего:

32 и возврати Господь кровь неправды его на главу его, якоже нападе на два мужа праведна и блага паче его, и уби их оружием: и отец мой давид не разуме крове их, авенира сына нирова, воеводу израилева, и амессая сына иеферова, воеводу иудина:

33 и возвратися кровь их на главу его и на главу семене его во веки: давиду же и семени его, и дому его, и престолу его мир да будет до века от Господа.

34 И взыде ванеа сын иодаев и нападе на него, и уби его, и погребе его в дому его в пустыни.

35 И постави царь соломон ванеа сына иодаева вместо его над воинством: царство же управляшеся во Иерусалиме. И садока иереа даде соломон царь во иереа перваго вместо авиафара. (1) И даде Господь смысл соломону и премудрость многу зело, и широту сердца, якоже песок иже при мори: (2) и исполнися разума соломон паче разума всех древних сынов и паче всех мудрых египетских. И поят дщерь фараоню, и введе ю во град давидов, дондеже сконча себе здати дом свой, и дом Господень в первых, и стену Иерусалима окрест: (3) в седмь лет сотвори и сконча. (4) И бяше у соломона седмьдесят тысящ (мужей) носящих бремена, и осмьдесят тысящ каменосечцев в горе. И сотвори соломон море, и подкрепления, и бани великия, и столпы, и источник дворный, и море медяное: (5) и созда краеградие, и забрала над ним, и разсече град давидов. (6) Тако дщи фараоня прейде от града давидова в дом свой, егоже созда ей: (7) тогда созда краеградие. И соломон возношаше трижды в лето всесожжения и мирная на олтарь, егоже созда Господеви, и кадяше пред Господем, и соверши дом. И сии старейшины приставлени над делами соломоними, (8) три тысящы и шесть сот приставник за людьми делающими дело. И созда (9) ассур, и магдон и газер, и вефорон вышний и валалаф: обаче по создании дому Господня и стены Иерусалимския окрест, по сих созда грады сия. И еще жив сый давид, заповеда соломону глаголя: (10) се, с тобою семей сын гирань, сын семене иемениина, от хеврона: сей кляше мя клятвою укоризненною, в день в оньже идох в полки: и той сниде в сретение ми на иордан, и кляхся ему Господем, глаголя, яко не умерщвлю его оружием: и ныне да не обезвиниши его, яко муж смыслен еси ты, и разумееши яже сотвориши ему, и сведеши старость его с кровию во ад.

36 И послав царь соломон, призва семеа и рече ему: созижди себе дом во Иерусалиме и седи тамо, и не исходи оттуду никаможе:

37 и будет в день исхода твоего, и прейдеши поток кедрский, разумея разумей, яко смертию умреши: кровь твоя будет на главе твоей. И заклят его царь в день той.

38 И рече семей к царю: благ глагол, егоже глаголал еси, господи мой царю: тако сотворит раб твой. И седе семей во Иерусалиме три лета.

39 И бысть по триех летех, и бежаста два раба семеина ко агхусу сыну маахаину, царю гефску. И возвестиша семею, глаголюще: се, раби твои во гефе.

40 И воста семей, и оседла осля свое, и иде во геф ко агхусу взыскати рабы своя: и пойде семей, и приведе рабы своя от гефа.

41 И возвестиша соломону, глаголюще: яко семей ходи из Иерусалима в геф и возврати рабы своя.

42 И посла царь и призва семеа и рече к нему: не заклях ли тя Господем, и засвидетелствовах тебе, глаголя: в оньже аще день изыдеши из Иерусалима и пойдеши на десно или на шуее, разумея разумей, яко смертию умреши? и рекл ми еси: благ глагол, егоже слышах:

43 и что яко не сохранил еси клятвы Господни и заповеди, юже заповедах на тя?

44 И рече царь к семею: ты веси всю злобу твою, юже весть сердце твое, яже сотворил еси давиду отцу моему: и возврати Господь злобу твою на главу твою:

45 и царь соломон благословен, и престол давидов будет готов пред Господем во веки.

46 И заповеда царь соломон ванею сыну иодаеву: и изыде, и уби его, и умре (семей).
3

1 Егда же царство утвердися в руце соломона, сватовство сотвори соломон с фараоном царем египетским: и поят дщерь фараоню и введе ю во град давидов, дондеже сконча здати дом свой и дом Господень и стену Иерусалима окрест.

2 Обаче людие тогда бяху жруще на высоких, яко не бе создан дом Господеви даже до дне онаго.

3 И возлюби соломон Господа, ходити в заповеданиих давида отца своего, токмо на холмех жряше и кадяше.

4 И воста соломон, и иде в гаваон пожрети тамо, яко тамо бе высота велия: тысящу всесожжения вознесе на жертвеннице в гаваоне.

5 И явися Господь соломону во сне нощию и рече ему: проси что хощеши себе.

6 И рече соломон: ты сотворил еси с рабом твоим давидом отцем моим милость велию, якоже ходи пред тобою истиною и правдою и правым сердцем с тобою, и сохранил еси ему милость великую сию, еже дати сыну его седети на престоле его, якоже днесь:

7 и ныне, Господи Боже мой, ты дал еси раба твоего вместо давида отца моего: и аз есмь отрочищь мал, и не вем исхода моего и входа моего:

8 раб же твой посреде людий твоих, ихже избрал еси людий многих, иже не изочтутся от множества:

9 и даси рабу твоему сердце смыслено слышати и судити люди твоя в правде, еже разумевати посреде добра и зла: яко кто может судити людем твоим тяжким сим?

10 И угодно бысть слово сие пред Господем, яко испроси соломон глагол сей.

11 И рече Господь к нему: занеже просил еси от мене глагола сего, и не просил еси от мене дний многих, и не просил еси богатства, ниже просил еси душ враг твоих, но испросил еси себе разума, еже слышати суд:

12 се, сотворих по глаголу твоему, се, дах ти сердце смыслено и мудро: якоже ты, не бысть муж прежде тебе и по тебе не востанет подобен тебе:

13 и яже не просил еси, дах тебе, и богатство и славу, якоже ты, не бысть муж подобен тебе в царех во вся дни твоя:

14 и аще пойдеши путем моим сохранити заповеди моя и повеления моя, якоже хождаше давид отец твой, и умножу дни твоя.

15 И возбудися соломон, и се, сновидение. И воста, и иде во Иерусалим, и ста пред лицем жертвенника, пред лицем кивота завета Господня в сионе, и вознесе всесожжения и сотвори мирная, и сотвори пир велий себе и всем отроком своим.

16 Тогда явистеся две жене блуднице пред царем и стасте пред ним.

17 И рече жена едина: во мне, господи мой: аз и жена сия жихоме в дому единем и родихоме в дому:

18 и бысть по третием дни рождения моего, и роди и жена сия: и бехом купно, и не бе никтоже с нами, кроме обоих нас в дому:

19 и умре сын жены сея в нощи, яко лежа на нем:

20 и воста в полунощи, и взя отроча мое от объятий моих, и успи е на лоне своем, а отроча свое умершее положи на лоне моем:

21 и востах заутра накормити отроча мое, и обретох и мертво: и се, разсмотрих его рано, и се, не бе сын мой, егоже родих:

22 И рече другая жена: ни, но се есть сын мой живый, се же есть сын твой умерый. И прястеся пред царем.

23 И рече има царь: ты глаголеши, яко сей сын мой живый, сын же сея мертвый: и ты глаголеши: ни, но живый есть сын мой, твой же сын умерший.

24 И рече царь: принесите ми мечь. И принесоша мечь пред царя.

25 И рече царь: разсецыте отроча ссущее живое на двое, и дадите половину его сей, и другую половину оней.

26 И отвеща жена, еяже бе сын живый, и рече ко царю, понеже смятеся утроба ея о сыне ея, и рече: во мне, господи мой, дадите ей отроча живое, смертию же не умертвите его. И та рече: да не будет ни мне, ни тебе, но пресецыте е.

27 И отвеща царь и рече: дадите детище живо жене рекшей: дадите сей е, смертию же не умертвите его: сия мати его.

28 И слыша весь израиль суд сей, имже суди царь, и убояшася от лица царева, разумеша бо, яко разум Божий в нем еже творити оправдания.
4

1 И бе царь соломон царствуяй над израилем.

2 И сии старейшины иже беша с ним:

3 азариа сын садоков, жрец: елиаф и ахиа сынове сивины, книгочии: и иосафат сын ахилудов, напоминатель:

4 и ванеа сын иодаев над силою: и садок и авиафар, иерее:

5 и азариа сын нафань над настоятелми: и завуф сын нафань друг царев:

6 и ахисар бе строитель, и елиав сын сафатов над отечеством: и адонирам сын авдонов над даньми.

7 И у соломона бяху дванадесять приставник над всем израилем, еже подаяти царю и дому его: по месяцу в лете бываше един, еже подаяти,

8 и сия имена их: вен сын оров на горе ефремли, един:

9 сын дакарь во махемате и во висаламине и вефсамисе и елоне, даже до вефанана, един:

10 сын седов во аравофе, сего сохо и вся земля оферова:

11 сына аминадавля вся неффадор: тефаф дщи соломоня бе ему в жену, един:

12 вана сын ахилуфов во ифаанахе и магеддо и весь дом саныи, иже при сесафане под езраелем, и от вифсана даже до савелмаула, даже до маевер лукам, един:

13 сын наверов в равофе галаадстем: сему область ергав в васане, шестьдесят градов великих огражденных стенами, и вереи медяны, един:

14 ахинадав сын саддов во маанаиме:

15 ахимаас в неффалиме: и сей поят васемафу дщерь соломоню в жену, един:

16 ваана сын хусиин во асире и во ваалофе, един:

17 иосафат сын фаруев во иссахаре,

18 семей сын илы во вениамине,

19 гавер сын адаев в земли галааде, в земли сиона царя есевонска и ога царя васанска, и насиф един в земли иудове.

20 Иуда и израиль мнози аки песок иже при мори во множестве, ядуще и пиюще и веселящеся.

21 И соломон бе началствуяй во всех царствах, от реки земли филистимския и даже до предел египетских, (и бяху) приносяще дары и работающе соломону во вся дни живота его.

22 И сия потребная соломону в день един: тридесять мер муки семидалныя и шестьдесят мер муки смешаныя,

23 десять телцев избранных и двадесять волов тучных и сто овец, кроме еленей и серн и птиц, избранна от избранных тучна.

24 Понеже бе началствуяй во всех об он пол реки от фапсы и даже до газы, над всеми царми об он пол реки, и мир бе ему от всех стран окрест.

25 И живяху иуда и израиль безпечально, кийждо под виноградом своим и под смоковницею своею, ядуще и пиюще, от дана и даже до вирсавии, во вся дни соломона.

26 И бяше у соломона четыредесять тысящ кобылиц в колесницы и двадесять тысящ конник.

27 И тако подаяху приставники царю соломону, и вся повеленная на трапезу цареву, кийждо в месяц свой, не пременяюще словесе:

28 и ячмень и плевы конем, и колесницами привозяху на место, идеже бе царь, кийждо по чину своему.

29 И даде Господь смысл и мудрость соломону многу зело, и широту сердца, яко песок иже при мори:

30 и умножися мудрость соломонова зело, паче смысла всех древних человек и паче всех смысленных египетских:

31 и умудрися паче всех человек, и умудрися паче гефана езраилитнна и емана, и халкада и дарды, сына самадова, и прославися имя его во всех странах окрест.

32 И изглагола соломон три тысящы притчей, и быша песни его пять тысящ:

33 и глагола о древех, от кедра иже в ливане и даже до иссопа исходящаго из стены: и глагола о скотех и о птицах и о гадех и о рыбах.

34 И прихождаху вси людие слышати премудрость соломоню: и приимаше дары от всех царей земных, елицы слышаху премудрость его.
5

1 И посла хирам царь тирский отроки своя к соломону: услыша бо, яко помазаша его на царство вместо давида отца его, яко любяше хирам давида во вся дни.

2 И посла соломон к хираму, глаголя:

3 ты веси отца моего давида, яко не возможе создати дому имени Господа Бога моего, от лица противных, окруживших его, дондеже даде я Господь под стопы ног его:

4 и ныне упокои Господь Бог мой мне окрест, несть наветника, ниже сопротивника лукаваго:

5 и се, аз глаголю создати дом имени Господа Бога моего, якоже глагола Господь Бог к давиду отцу моему, глаголя: сын твой, егоже дам вместо тебе на престол твой, той созиждет дом имени моему:

6 и ныне заповеждь, да насекут ми древ от ливана, и се, раби мои с рабы твоими, и мзду трудов твоих дам ти по всему елика речеши, понеже ты веси, яко несть нам ведущаго древа сещи, якоже сидоняне.

7 И бысть егда услыша хирам словеса соломоня, возрадовася зело и рече: благословен Бог днесь, иже даде давиду сына разумна над людьми сими многими.

8 И посла хирам к соломону, глаголя: слышах о всех, ихже ради послал еси ко мне: аз сотворю все хотение твое о древах кедровых и певговых:

9 слуги мои изнесут я от ливана к морю, и аз положу я в складения на место, идеже возвестиши мне, и довезу я тамо: и ты возмеши, и сотвориши хотение мое, еже дати хлебы дому моему.

10 И бе хирам дая соломону кедры и певги и всю волю его.

11 И даде соломон хираму двадесять тысящ мер пшеницы, и пищу дому его, и двадесять тысящ мер елеа чистаго: по сему даваше соломон хираму на всяко лето.

12 И Господь даде соломону премудрость, якоже глагола ему. И бе мир между хирамом и между соломоном, и положиша завет между собою.

13 И взя царь дань от всего израиля, и бе дань тридесять тысящ мужей.

14 И посла я в ливан, десять тысящ на месяц в премену: месяц быша в ливане и два месяца в дому своем: и бяше адонирам над данию.

15 И бяше соломону седмьдесят тысящ носящих бремена и осмьдесят тысящ секущих камение в горе,

16 кроме старейшин приставленых над делами соломоними, три тысящы и шесть сот приставник делающих дела.

17 И заповеда царь, и взяша камение великое, камение честное на основание храма, и камение нетесаное.

18 И истесаша сынове соломони и сынове хирамли и каменосечцы гевалстии: и изготовиша камения и древа в три лета.
6

1 И бысть в четыредесятное и в четвертосотное лето исхода сынов израилевых из египта, в лето четвертое, в месяц вторый, царствующу царю соломону над израилем, и созда храм Господеви.

2 И храм, егоже созда соломон царь Господеви, (бяше) шестьдесят лакот долгота его, и двадесяти лакот широта его, и тридесяти лакот высота его:

3 и притвор, иже пред лицем храма, двадесяти лакот долгота его в широту дому, и десяти лакот широта его пред лицем дому: и созда храм, и соверши его.

4 И сотвори храму окна преклонены сокровены.

5 И созда на стене дому притворы около храма и давира.

6 И сотвори бока около, бок иже с низу, пяти лакот широта его, и средний шести лакот широта, и третий седми лакот широта его: понеже разстояние дому сотвори окрест внеуду храма, яко да не досязают стен храма.

7 И храму зиждему сущу, камением краесекомым нетесаным создася: млат же, и теслица, и всякое орудие железно не слышася в храме, егда созидатися ему.

8 И двери бока нижняго под стеною храма десною, и извиенный восход до средины, а от средины до трекровных.

9 И созда храм, и соверши его: и обстави храм дсками кедровыми.

10 И сотвори вязания окрест всего храма, пять лакот в высоту его, и связа вязание древом кедровым.

11 И бысть слово Господне к соломону, глаголющее:

12 храм сей егоже ты созидаеши, аще пойдеши по заповедем моим, и судбы моя сотвориши, и сохраниши вся повеления моя, еже пребывати в них, утвержу слово мое с тобою, еже глаголах давиду отцу твоему,

13 и вселюся посреде сынов израилевых, и не оставлю людий моих израиля.

14 И созда соломон храм, и сконча его.

15 И созда стены храму внутрь древом кедровым, от земли храма и даже до стен и даже до верха: около обстави содержащая древами внутрьуду и укрепи внутрь храма боками певговыми.

16 И созда двадесяти лакот от края стены бок един от земли даже до верха: и сотвори ему внутрь от давира стену до святая святых.

17 И четыредесяти лакот бяше храм: сей (есть) храм внутреннейший.

18 И от кедра во храме внутрь постави плетение и дщицы и ваяния вся кедрова: камень не являшеся.

19 Пред лицем давира, посреде храма внутрь уготова поставити тамо кивот завета Господня.

20 И пред лицем давира двадесяти лакот долгота, и двадесяти лакот широта, и двадесяти лакот высота его, и объят его златом чистым: и сотвори олтарь кедровый: и повлече соломон храм внутрь златом чистым, и пригвозди гвоздми златыми пред лицем давира, и объят и златом.

21 И весь храм объят златом до скончания всего храма.

22 И все внутрь давира покры златом.

23 И сотвори в давире два херувима от древ кипарисных, десять лакот мерою величество:

24 и пяти лакот крило херувима единаго, и пяти лакот крило его второе, десяти лакот от края крила его до края крила его:

25 и десяти лакот такожде (мера) херувиму второму, мера едина совершение едино обоим херувимом:

26 и высота херувима единаго десять лакот, такожде и второму херувиму.

27 И постави оба херувима посреде храма внутренняго: и простираху крила своя, и досязаше крило едино до стены храма, и крило другаго херувима досязаше до стены вторыя: и крила их яже бяху посреде храма, касашеся крило с крилом:

28 и объяты быша херувимы златом.

29 И на всех стенах храма около ваяния написа подобием херувимов, и финики, и изваянна произницающая внутрьуду и внеуду.

30 И помост храма из внутрьуду и внеуду объят златом.

31 И входу давира сотвори двери от древ смерчиих, и праги пятеричны,

32 и двои двери от древ певговых, и изваяния на них изваяна, херувимы, и финики, и дщицы простертыя, и объят я златом, и бяше златом устроено до херувимов и до фиников.

33 И тако сотвори вратом храма: и праги от древ смерчиих, притворы четверогубо.

34 И на обоих дверях древа певгова: два затвора дверь едина и вереи их, и два затвора дверь вторая вращающаяся в себе,

35 (на нихже сотвори) изваянныя херувимы и финики, и дщицы простертыя, и объятыя златом свешеным на изображение.

36 И созда двор внутренний: в три ряда нетесаных, и ряд тесанаго кедра около.

37 В лето четвертое основа храм Господень в месяце зии, во вторый месяц.

38 Во единонадесятое лето в месяце вул, сей месяц осмый, совершися храм по всему словеси своему и по всему устроению своему: и созда его в седмь лет.
7

1 И дом свой созда соломон треминадесять леты, и соверши соломон весь дом свой.

2 И созда дом древом ливанским, сто лакот долгота его, и тридесять лакот высота его, и пятьдесят лакот широта его, и три ряды столпов кедровых, и рамена кедрова столпом.

3 И покры дсками кедровыми дом свыше над странами столпов: и число столпов четыредесять и пять,

4 по пятинадесяти ряд: и окон три ряда, и камара над камарою трегубо.

5 И вся двери и камары четвероуголны притворени: от дверий над дверми трегубо.

6 И елам столпов, пятьдесят лакот в долготу, и тридесять лакот в широту привязани ко еламу пред лицем их: и столпи и толстота пред лицем того елама.

7 И елам престолов идеже судити, елам судилища, и покры и от земли даже до верха дщицами кедровыми.

8 И дом в немже живяше, двор един распростерт сим по делу сему: и дом созда дщери фараони, юже взя соломон, по еламу сему.

9 Вся сия бяху от каменей драгоценных изваяна от разстояния внутрьуду, и от основания до крова.

10 И внеуду ко двору великому основаному камением драгим великим, камением десяти лакот и осми лакот,

11 и с верху честным камением, по тойже мере несеченых, и кедрами.

12 Окрест двора великаго три ряда нетесаных, и ряд тесанаго кедра: и созда двор храма внутреннейший притвора дому сущаго пред лицем храма.

13 И посла царь соломон в тир, и взя хирама от тира,

14 сына жены вдовицы, и той бе от колена неффалимля: и отец его бе муж тирин, делатель меди, и исполнен художества и разума и ведения, еже делати всяко дело медяное. И приведоша его ко царю соломону: и сотвори вся дела:

15 и слия два столпа еламу храма, осминадесяти лакот высота столпа, и окрест мера его четыренадесятих лакот окружаше его толстота столпа: четырех перстов вглубления: такожде бе и вторый столп:

16 и два возложения сотвори, лежати на главах столпов излиянная от меди: пяти лакот высота возложения единаго, и пяти лакот высота возложения втораго:

17 и сотвори две мрежи еже покрыти возложения столпов: и мрежу возложению единому, и мрежу возложению второму:

18 и дело висимо, два ряда яблок медяных сомрежены, дело висимо, ряд над рядом: такожде сотвори возложению второму:

19 и возложения на главах столпов, подобна крину, якоже во еламе, четырех лакот:

20 и строение над обоими столпами, и свыше стран возложение строения, и яблоков двести рядов около на вторей главе.

21 И постави столпы во еламе храма: и постави столп един и нарече имя ему иахун, и постави столп вторый и нарече имя ему воос.

22 И на главах столпов дело криново, и сконча дело столпов.

23 И сотвори море лияно десять лакот от края до края его, кругло окрест его: пять лакот высота его, и объятие его тридесять лактей окружаше е окрест:

24 и подкрепления под краем его окрест, окружаху е десять лакот около: два ряда подкреплений слиты во слиянии его стояща.

25 И дванадесять волов под морем, три зрящии на север, и три зрящии на юг, и три на запад, и три на восток, и вся задняя их внутрьуду, и море верху их.

26 И устие его бяше яко устие потиря прозябающаго крина, и толстота его на длань.

27 И сотвори десять мехонофов медяных, пять лакот долгота мехонофа единаго, и четыри лакти широта его, и шесть лакот высота его:

28 и сие дело мехонофов, споеное о себе и споеное посреде произницающих:

29 и на споениих их посреде произницающих львы и волы и херувимы, и над произницающими, такожде и свыше и снизу львов и волов места, дело низхождения:

30 и четыри колеса медна и мехонофу коемуждо, и придержания медяна, и четыри части их, и рамена их под умывалницами, и рамена слияная об ону страну коегождо прилежаще.

31 И уста его внутрь главы, и выше единаго лактя, и уста его кругла: дело такожде лактя единаго и пол лактя: и на устах его изваяния, и междустолпия их четвероуголна, а не кругла.

32 И четыри колеса под междустолпиями, и руце в колесех в мехонофе: и высота единаго колеса лакоть и пол.

33 И дело колес, яко дело колес колесницы: руце их и выи их, и хребты их и делания их вся лияна.

34 Четыри рамена на четырех углех мехонофа единаго, и от мехонофа рамена его.

35 И на главе мехонофа пол лактя величество его, кругло окрест над главою мехонофовою: и начало рук его и спаяния его от него: и отверзашеся в началех рук своих.

36 И спаяния его подобия херувимов и львов и фиников стоящая, держащееся коеждо противу лица его внутрь и окрест.

37 По томужде сотвори вся десять мехонофы, по чину единому и по мере единей, мера едина всем.

38 И сотвори десять конобов медяных вмещающих по четыредесяти мер во един коноб, мерою четырех лактей: коноб един на коемждо мехонофе, от десяти мехонофов.

39 И постави пять мехонофов по десней стране храма на восток, и пять по левей стране храма: и море от страны храма одесную на востоки в угле полуденнем.

40 И сотвори хирам конобы и теплицы и фиалы: и сконча хирам вся дела творя, яже творяше цареви соломону во храме Господни:

41 столпа два, и обвития столпов над главами столпов два: и мрежи две, еже покрывати оба обвития изваяных, яже на столпех суть:

42 яблоков медяных четыреста обема мрежема, два ряда яблоков мрежи единей, покрывати оба обвития мехонофа, яже на обоих столпех:

43 и мехонофов десять и конобов десять на мехонофе:

44 и море едино, и волов дванадесять под морем:

45 и конобы и теплицы и фиалы, и вся сосуды, яже сотвори хирам царю соломону во храме Господни: и столпов четыредесять и осмь дому царева и дому Господня: вся дела царева, яже сотвори хирам, быша медяна вся.

46 Близ иордана слия их царь в толстоте земли, между сокхофом и между сирамом.

47 Не бе веса меди, от неяже творяше вся дела сия, от множества зело, не бе предела весу меди.

48 И даде царь соломон вся сосуды, яже сотвори во храм Господень: олтарь златый и трапезу, на нейже хлебы приношения, златую,

49 и свещники пять одесную и пять ошуюю пред лицем давира (святая святых) златыя спаяны, и лампады, и светилники, и щипцы златыя,

50 и преддверие, и гвоздие, и фиалы и блюда и кадилницы златы спаяны: и вереи врат дому внутренняго святаго святых, и двери храма златыя.

51 И совершися дело, еже сотвори соломон во храме Господни: и внесе соломон святая давида отца своего и вся святая соломонова, сребро и злато, и сосуды даде в сокровище храма Господня.
8

1 И собра царь соломон вся старейшины израилевы, вся начала колен, старейшины отечеств сынов израилевых к себе во сион, еже пренести кивот завета Господня от града давидова: той есть сион.

2 И собрашася ко царю соломону вси людие израилевы в месяц афаним в праздник: сей есть месяц седмый.

3 И приидоша вси старейшины израилевы, и взяша иерее кивот,

4 и вознесоша кивот Господень, и скинию свидения, и вся сосуды святыя яже во скинии свидения: и вознесоша я иерее и левити.

5 Царь же соломон и весь собор израилский, собравшеся к нему, с ним пред кивотом жряху волы и овцы несочтенны, безчисленны от множества.

6 И внесоша иерее кивот завета Господня на место его во давир храма, во святая святых, под крила херувимов.

7 Херувими бо беша распростерше криле над местом кивота: и окрываху херувими над кивотом и над святыми его сверху.

8 И обдержаста освященая: и зряхуся главы освященных от святых к лицу давира, и не являхуся вне.

9 Не бе в кивоте токмо две скрижали каменны, скрижали завета, ихже положи моисей в хориве, яже завеща Господь со сынами израилевыми, внегда исходити им от земли египетския.

10 И бысть егда изыдоша иерее из святилища, и облак исполни храм Господень,

11 и не можаху иерее стати служити от лица облака, яко исполни слава Господня храм.

12 Тогда рече соломон: Господь рече еже обитати во мгле,

13 аз же создах дом имени твоему свят тебе и готов, и престолу твоему, еже обитати тебе в нем во веки.

14 И обрати царь лице свое и благослови царь всего израиля: весь же собор израилев стояше.

15 И рече (царь): благословен Господь Бог израилев днесь, иже глагола усты своими о давиде отце моем и рукама своима исполни, глаголя:

16 от дне в оньже изведох люди моя израиля из египта, не избрах града от всех племен израилевых на создание храму, еже быти имени моему тамо: но избрах во Иерусалиме быти имени моему тамо: и избрах давида быти ему властелину над людьми моими израилем:

17 и бысть на сердцы отцу моему давиду, еже создати храм имени Господа Бога израилева,

18 и рече Господь к давиду отцу моему: понеже взыде на сердце твое еже создати храм имени моему, добре сотворил еси, яко бысть на сердцы твоем:

19 обаче ты не созиждеши храма, но разве сын твой, иже изыде из чресл твоих, той созиждет храм имени моему:

20 и возстави Господь глаголгол свой егоже глагола: и востах вместо давида отца моего, и седох на престоле израилеве, якоже глагола Господь, и создах храм имени Господа Бога израилева,

21 и поставих тамо место кивоту, в немже есть тамо завет Господень, егоже завеща Господь со отцы нашими во извождении их из земли египетския.

22 И ста соломон пред лицем олтаря Господня пред всем собором израилевым и воздвиже руце свои на небо,

23 и рече: Господи Боже израилев, несть якоже ты Бог на небеси горе и на земли низу, храняй завет и милость рабу твоему ходящему пред тобою всем сердцем своим,

24 яже сохранил еси рабу твоему давиду отцу моему: ибо глаголал еси усты твоими и рукама твоима совершил еси, якоже день сей:

25 и ныне, Господи Боже израилев, сохрани рабу твоему давиду отцу моему, яже рекл еси ему, глаголя: не оскудеет муж от лица моего седяй на престоле израилеве, токмо аще сохранят чада твоя пути своя, еже ходити предо мною, якоже ходил еси предо мною:

26 и ныне, Господи Боже израилев, да уверится глаголгол твой, егоже рекл еси давиду отцу моему:

27 яко аще истинно вселится Бог с человеки на земли? аще небо и небо небесе не довлеют ти, кольми паче храм сей, егоже создах имени твоему?

28 и да призриши на молитву мою, Господи Боже израилев, послушати молитвы, еюже молится раб твой пред тобою к тебе днесь,

29 да будут очи твои отверсты на храм сей день и нощь, на место о немже рекл еси: будет имя мое тамо на услышание молитвы, еюже молится раб твой на месте сем день и нощь:

30 и услышиши молитву раба твоего и людий твоих израиля, о нихже помолятся на месте сем: и ты услышиши на месте обиталища твоего на небеси, и сотвориши и помилуеши:

31 елика аще согрешит кийждо ко искреннему своему, и аще приимет на него клятву еже кляти его, и приидет, и исповесть пред лицем олтаря твоего в храме сем:

32 и ты услышиши от небесе, и сотвориши суд людем твоим израилю: осудити беззаконнаго, дати путь его на главу его, и оправдити праведнаго, дати ему по правде его:

33 егда падут людие твои израиль пред враги, яко согрешат ти, и обратятся к тебе, и исповедятся имени твоему, и помолятся и возглаголют молитву к тебе в храме сем:

34 и ты услышиши с небесе, и милостив будеши о согрешениих людий своих израиля, и возвратиши я в землю, юже дал еси отцем их:

35 внегда заключитися небеси и не быти дождю, яко согрешат ти, и помолятся на месте сем, и исповедятся имени твоему, и от грех своих обратятся, егда смириши их:

36 и услышиши с небесе, и милостив будеши о гресех раба твоего и людий твоих израиля: яко явиши им путь благий ходити по нему, и даси дождь на землю, юже дал еси людем твоим в достояние:

37 глад аще будет, смерть аще будет, егда будет возжжение, гусеницы, ржа аще будет, и аще оскорбят я врази их в единем от градов их: все противное, всяка болезнь,

38 всяка молитва, всяко моление аще будет всякому человеку от людий израилевых, егда познает кийждо болезнь сердца своего, и воздвигнет руце свои в храме сем:

39 и ты услышиши от небесе, от готоваго жилища твоего, и милостив будеши, и сотвориши, и даси коемуждо по путем его, якоже увеси сердце его, яко ты един токмо веси всех сердца сынов человеческих:

40 да боятся тебе вся дни, в няже поживут на земли, юже дал еси отцем нашым:

41 и чуждему, иже несть от людий твоих израиля, той аще приидет от земли издалеча ради имене твоего, зане услышат имя твое велико, и руку твою крепкую, и мышцу твою высокую,

42 и приидет, и помолится на месте сем:

43 и ты услышиши с небесе от готоваго жилища твоего, и сотвориши по всем, в еликих аще призовет тя чуждий, яко да уразумеют вси людие земнии имя твое и убоятся тебе, якоже людие твои израиль, и разумеют, яко имя твое наречеся на храме сем, егоже создах:

44 егда изыдут людие твои на брань на враги своя, путем имже возвратиши я, и помолятся именем Господним путем града, егоже избрал еси себе, и ко храму, егоже аз создах имени твоему:

45 и ты услышиши с небесе молитву их и моления их, и сотвориши оправдание им:

46 яко согрешат ти, яко несть человек, иже не согрешит, и разгневаешися на ня, и предаси я пред враги, и попленят их пленящии в землю далече, или близ,

47 и обратят сердца своя в земли, аможе преселишася, и обратятся, и помолятся тебе в земли преселения своего, глаголюще: согрешихом, беззаконновахом, неправдовахом:

48 и обратятся ко тебе всем сердцем своим и всею душею своею в земли враг своих, аможе превел еси их, и помолятся к тебе по пути земли своея, юже дал еси отцем их, и ко граду, егоже избрал еси, и ко храму, егоже создах имени твоему:

49 и услышиши от небесе, от готоваго жилища твоего молитву их и моление их, и сотвориши оправдание им,

50 и милостив будеши неправдам их, имиже согрешиша ти, и по всем отметанием их, имиже отвергошася тебе, да даси их в щедроты пред пленившими их, и ущедрят я:

51 яко людие твои и наследие твое суть, ихже извел еси из земли египетския от среды пещи железныя:

52 и да будут уши твои и очи твои отверсты на молитву раба твоего и к молению людий твоих израиля, послушати их о всех, о нихже призовут тя,

53 яко ты избрал еси я себе в наследие от всех людий земли, якоже глаголал еси рукою раба твоего моисеа, внегда извести тебе отцы нашя из земли египетския, Господи Господи. Тогда глагола соломон о храме, егда соверши созидати его: солнце познано сотвори на небеси: Господь рече пребывати во мгле: созижди храм мой, храм благолепный себе, еже пребывати в новости: не сие ли писано в книгах песни?

54 И бысть егда сконча соломон моляся ко Господу всею молитвою и молением сим, и воста от лица олтаря Господня припад на колена своя, и руце свои возде на небо,

55 и ста, и благослови весь собор израилев, гласом велиим глаголя:

56 благословен Господь (Бог) днесь, иже даде покой людем своим израилю, по всем елика глагола: не пременися слово ни едино во всех словесех его благих, имиже глагола рукою моисеа раба своего:

57 да будет Господь Бог наш с нами, якоже бе со отцы нашими: да не оставит нас, ниже да отвратит нас,

58 преклонити сердца наша к нему, еже ходити во всех путех его и хранити вся заповеди его и повеления его и оправдания его, яже заповеда отцем нашым:

59 и да будут словеса сия, имиже молихся пред Господем Богом нашим днесь, приближающеся Господу Богу нашему день и нощь, еже творити оправдания рабу твоему и оправдания людем твоим израилю во вся дни:

60 яко да разумеют вси людие земли, яко Господь Бог той сам Бог, и несть инаго,

61 и да будут сердца наша совершенна ко Господу Богу нашему преподобно ходити в повелениих его и хранити заповеди его, якоже день сей.

62 И царь и вси сынове израилевы пожроша жертву пред Господем.

63 И пожре царь соломон жертвы мирныя, яже пожре Господу, волов двадесять две тысящы и овец сто и двадесять тысящ. И обнови царь храм Господень и вси сынове израилевы.

64 В той день освяти царь (соломон) средину двора, яже пред лицем храма Господня: яко сотвори тамо всесожжение и дары, и жертвы и тучная мирных, яко олтарь медяный, иже пред Господем, мал бе, еже не возмощи вместити всесожжения даров и жертвы мирных.

65 И сотвори соломон праздник в той день, и весь израиль с ним, собор велий, от входа емафа даже до реки египта, пред Господем Богом нашим, у храма, егоже созда, ядый и пия и веселяся пред Господем Богом нашим седмь дний,

66 и во осмый день распусти люди. И благословиша царя, и идоша кийждо в домы своя, радующеся веселым сердцем о благих, яже сотвори Господь давиду рабу своему и израилю людем своим.
9

1 И бысть егда сконча соломон зиждяй храм Господень и дом царев и всякое дело свое соломон, елика восхоте сотворити,

2 и явися Господь соломону вторицею, якоже явися ему в гаваоне,

3 и рече к нему Господь: услышах глас молитвы твоея и моления твоего, имже молился еси предо мною: сотворих ти по всей молитве твоей, и освятих храм сей, егоже создал еси, еже положити имя мое тамо во веки, и будут очи мои ту и сердце мое во вся дни:

4 и ты аще пойдеши предо мною, якоже ходи давид отец твой в преподобии сердца и в правоте, и еже творити по всем, яже заповедах ему, и повеления моя и заповеди моя сохраниши:

5 и возставлю престол царствия твоего во израили во веки, якоже глаголах к давиду отцу твоему, глаголя: не оскудеет ти муж властелин во израили:

6 аще же отвращающеся отвратитеся вы и чада ваша от мене и не сохраните заповедий моих и повелений моих, яже даде моисей пред вами, и пойдете и поработаете богом иным и поклонитеся им:

7 и изрину израиля из земли, юже дах им, и храм сей, егоже освятих имени моему, отвергу от лица моего: и будет израиль в погубление и во глаголание всем людем:

8 и дом сей будет высокий, всяк преходяй сквозе его ужаснется, и возсвищет и речет: чесо ради сотвори Господь тако земли сей и храму сему?

9 и рекут: понеже оставиша Господа Бога своего, иже изведе отцы их из египта, из дому работы, и прияша боги чуждыя, и поклонишася им, и поработаша им, сего ради наведе на ня Господь зло сие.

10 И бысть по двадесяти летех, в няже созда соломон два домы, храм Господень и дом царев,

11 хирам царь тирский помогаше соломону древы кедрскими и древы певговыми и златом и всем хотением его: тогда даде соломон хираму двадесять градов в земли галилейстей.

12 И изыде хирам из тира и пойде в галилею видети грады, яже даде ему соломон: и не быша ему угодни,

13 и рече: что гради сии, яже дал ми еси, брате? И нарече я предел (хавуль), до днешняго дне.

14 И принесе хирам соломону сто и двадесять талант злата.

15 Сие же есть число даяния еже принесе царь соломон, да созиждет храм Господень и дом царев, и мелон и стену Иерусалимску и краеградие еже оградити стену града давидова, и асур и магедо и газер.

16 Фараон царь египетский взыде и взя газер и сожже и огнем, и ханаана живущаго во граде том погуби: и даде его в дар дщери своей, жене соломони.

17 И согради соломон газер и вефорон нижний,

18 и валааф и фамор в пустыни.

19 И вся грады крепкия, иже быша соломону, и вся грады, идеже бяху колесницы, и вся грады, идеже бяху конницы его, и все еже бысть угодно царю соломону, созда во Иерусалиме, и в ливане и во всей земли царства своего.

20 Всех людий оставшихся от аморреа и хеттеа, и ферезеа и хананеа, и евеа и иевусеа и гергесеа, не сущих от сынов израилевых,

21 сынов их оставшихся по них на земли, ихже не возмогоша сынове израилевы потребити их, царь соломон поработи их даяти дань даже до дне сего:

22 от сынов же израилевых не даде в работу соломон, яко тии бяху мужие храбрии, и отроцы его, и князи его, и тристаты его, и воеводы колесниц его, и конницы его.

23 И бяху старейшины приставленным над делы царя соломона, пять сот пятьдесят повелевающии людем делающым дело.

24 Дщерь же фараона прейде из града давидова в дом свой, егоже созда ей соломон, тогда созда мелон.

25 И приношаше соломон трижды в год всесожжения и мирныя жертвы на олтарь, егоже созижде Господу, и кадяше фимиам пред Господем: и соверши храм.

26 И сотвори царь соломон корабль в гасионе гаверстем, иже при елафе, при устии моря последняго, в земли едомстей.

27 И посла хирам на корабли от отрок своих мужы корабелники управляти ведущих море со отроки соломони:

28 и приидоша в софир, и взяша оттуду злата четыре ста и двадесять талант и принесоша царю соломону.
10

1 И царица савска услыша имя соломоне и имя Господне, и прииде искусити его притчами:

2 и прииде во Иерусалим с силою тяжкою зело: и на велблюдех привезоша ароматы и злата много зело, и камение драгое: и вниде к соломону и глагола ему вся, елика име на сердцы своем.

3 И возвести ей соломон вся глаголы ея: и не бе слово презрено от царя, егоже не возвести ей.

4 И виде царица савска весь смысл соломонь и дом егоже созда,

5 и снеди соломони, и жилища отроков его, и предстояние служащих ему, и облачение его, и виночерпцы его, и всесожжения его, яже приношаше во храме Господни, и вне себе бысть,

6 и рече к соломону царю: истинна суть словеса, яже слышах в земли моей,

7 о словесех твоих и о смысле твоем: и не ях веры глаголющым ми, дондеже приидох семо, и видеста очи мои: и се, несть ни пол того, якоже ми поведаша: приложил еси премудрость и благая к сим паче всякаго слуха, егоже слышах в земли моей:

8 блаженны жены твоя, блажени отроцы твои сии, иже предстоят пред тобою всегда, слышаще всякий смысл твой:

9 буди Господь Бог твой благословен, иже восхоте тя дати на престол израилев, понеже возлюби Господь израиля утвердити во веки и постави тя царя над ними творити суд в правде и в судбах их.

10 И даде соломону сто и двадесять талант злата, и ароматы многи зело, и камение драгое: не приидоша еще таковыя ароматы во множестве, яже даде царица савска царю соломону.

11 И корабль хирамль приносящь злато из софира, (и) принесе древа нетесана многа зело, и камение драгое.

12 И сотвори царь древом нетесаным подпоры храму Господню и дому цареву, и сопели и гусли певцем: не приидоша по сем таковая древеса нетесаная на земли, ниже видена быша где даже до дне сего.

13 И царь соломон даде царице савстей вся, елика восхоте и елики проси у него, кроме всех, яже даде ей рукама своима соломон царь, И возвратися, и отиде в землю свою, сама и вси отроцы ея.

14 И бе вес принесеннаго злата соломону во едино лето шесть сот и шестьдесят и шесть талант злата,

15 кроме даней от подданных и от купцов и от всех царей странных и от воевод земных.

16 И сотвори царь соломон триста копий златых кованных, по триста златых во едино копие вдела:

17 и триста щитов кованных златых, по три литры злата бяше на коемждо щите: и даде я царь во храм дубравы ливанския.

18 И сотвори царь престол от костей слоновых велий и позлати его златом искушеным:

19 шесть степеней престолу, и образы телцов престолу созади, и верх престола кругл бе созади его, и руце сюду и сюду на престоле седалища, и два льва стояща при руках,

20 и дванадесять львы стояще ту на шести степенех сюду и сюду: не бяше тако во всяком царстве.

21 И вси сосуди, иже бяху при царе соломоне, злати беша, и умывалницы златы и вси сосуди в храме дубравы ливанския златокованны: не бяше сребра, понеже за ничто бе сребро во дни соломони:

22 корабль бо фарсийский царю соломону на мори с корабли хирамлими, единою во триех летех прихождаше цареви корабль из фарсиса и приношаше злато и сребро, и зубы слоновы, и пифики и павы, и камение точеное и тесаное.

23 И возвеличися соломон паче всех царей земных и богатством и смыслом.

24 И вси царие земстии искаху видети лице соломона, еже бы услышати смысла его, егоже даде ему Господь в сердцы его:

25 и тии приношаху кийждо дары своя, и сосуды златы и сребряны, и ризы, стакти и сладкости, и кони и мски на всякое лето.

26 И собра соломон колесницы и кони, и бяху соломону четыредесять тысящ кобылиц в колесницы, и дванадесять тысящ конных: и постави я во градех колесниц, а (друзии бяху) у царя во Иерусалиме: и бе властелин всем царем от реки и до земли иноплеменник и до предел египта.

27 И сложи царь злато и сребро во Иерусалиме якоже камение, и кедры сложи якоже черничие, еже на поли во множестве.

28 И привождаху соломону кони от египта и от фекуя купцы царстии и куповаху от фекуя променою.

29 И прихождаху колесницы из египта за шесть сот сребреник, и конь за сто пятьдесят сребреник: такожде и ко всем царем хеттимским и сирийским по морю исхождаху.
11

1 И царь соломон бе женолюбив, и поя жены чуждыя, и дщерь фараоню, моавитяныни, амманитяныни, и аморреаныни,

2 от язык, ихже отрече Господь сыном израилевым: не входите в ня, и тии да не входят в вас, да не отвратят душ ваших вслед идол своих: к тем прилепися соломон любити,

3 и быша ему жен началных седмь сот, и подложниц триста.

4 И бысть в время старости соломони, и совратиша жены чуждия сердце его вслед богов иных, и не бе сердце его совершенно с Господем Богом его, якоже сердце давида отца его,

5 и хождаше соломон вслед астарта мерзости сидонския и вслед царя их, идола сынов аммоних.

6 И сотвори соломон лукавое пред Господем: и не хождаше вслед Господа, якоже давид отец его.

7 Тогда созда соломон высоко (капище) хамосу, идолу моавлю, и царю их, идолу сынов аммоних, и астарте, мерзости сидонстей, на горе яже пред Иерусалимом:

8 и тако сотвори всем женам своим чуждим, яже кадяху и жряху идолом своим.

9 И разгневася Господь на соломона, яко уклони сердце свое от Господа Бога израилева, и явльшагося ему дважды

10 и заповедавшаго ему дважды о словеси сем, весма не ходити ему вслед богов инех, но хранити и творити яже заповеда ему Господь Бог,

11 и рече Господь к соломону: понеже быша сия с тобою, и не сохранил еси заповедий моих и повелений моих, яже заповедах тебе, раздирая раздеру царство твое из руку твоею и дам е рабу твоему:

12 обаче во дни твоя не сотворю сих давида ради отца твоего: от руки же сына твоего отиму е:

13 токмо всего царства не возму, скипетр един дам сыну твоему давида ради раба моего и Иерусалима ради града, егоже избрах.

14 И воздвиже Господь противника на соломона адера идумеанина от семене царска во идумеи.

15 И бысть егда искорени давид едома, егда иде иоав воевода вой погребати побиенныя, изсече всяк мужеск пол во идумеи:

16 яко шесть месяц седяше тамо иоав и весь израиль во идумеи, дондеже изби всяк мужеск пол в идумеи:

17 и избеже адер сам и вси мужие идумейстии от отроков отца его с ним, и внидоша во египет: адер же бяше отрочищь мал.

18 И восташа мужие из града мадиамска, и приидоша в фаран, и взяша мужей с собою и приидоша к фараону царю египетскому. И вниде адер к фараону, и даде ему (царь) дом, и пищу определи ему, и землю даде ему.

19 И обрете адер благодать пред очима фараонима зело, и даде ему в жену сестру жены своея, сестру фекемины болшую.

20 И роди ему сестра фекемины адеру ганивафа сына своего, и воскорми его фекемина посреде сынов фараоних, и бе ганиваф посреде сынов фараоних.

21 И адер услыша бо египте, яко успе давид со отцы своими, и яко умре иоав воевода воинству, и рече адер к фараону: отпусти мя, да возвращуся в землю мою.

22 И рече фараон адеру: чим ты не доволен еси у мене? и се, ты просишися отити в землю свою? И рече ему адер: яко отпущая да отпустиши мя. И возвратися адер в землю свою.

23 И воздвиже Господь противника соломону разона, сына елиадаева, иже убеже от ададезера царя сувска, господина своего.

24 И собрашася к нему мужие, и бе воевода полка мятежнаго, егда убиваше я давид: и идоша в дамаск, и седоша в нем, и воцаришася в дамасце.

25 И бе стужая израилеви во вся дни соломони: сия злоба адера: и отягчи израиля и воцарися в земли едомстей.

26 И иеровоам сын наватов, ефрафянин от сариры, сын жены вдовицы, раб соломонов, и воздвиже руце на царя соломона.

27 И сия вина, яко воздвиже руце на царя соломона: царь соломон созидаше краеградие и ограждаше стеною град давида отца своего:

28 иеровоам же человек крепок силою. И виде соломон отрока, яко муж дел есть, и постави его над бременами дому иосифова.

29 И бысть во время оно, и иеровоам изыде из Иерусалима, и обрете его ахиа силонитянин пророк на пути, и соврати его с пути: и бе ахиа облечен в ризу нову: и (беста) оба едины на поли.

30 И взя ахиа за ризу свою новую, яже бе на нем, и раздра ю на дванадесять жребий,

31 и рече иеровоаму: приими себе десять жребий, яко тако глаголет Господь Бог израилев: се, аз отторгаю царство из руки соломони, и дам ти хоругвий десять:

32 и две хоругви будут ему, раба ради моего давида и Иерусалима ради града, егоже избрах себе от всех колен израилевых,

33 занеже остави мя и поклонися астарте мерзости сидонстей и хамосу и кумиром моавлим и царю их претыканию сынов аммоних, и не пойде по путем моим, еже творити угодная предо мною, якоже давид отец его:

34 и не отиму царства всего от руку его, понеже защищая защищу его во вся дни живота его, давида ради раба моего, егоже избрах, иже сохрани заповеди моя и оправдания:

35 и отиму царство от руки сына его, и дам ти десять хоругвий,

36 сыну же его дам две хоругви, яко да будет престол рабу моему давиду во вся дни предо мною во Иерусалиме граде, егоже избрах себе на положение имени моему тамо:

37 и прииму тя, и воцаришися, в нихже желает душа твоя, и ты будеши царь над израилем:

38 и будет аще сохраниши вся, елика заповедаю ти, и пойдеши по путем моим, и сотвориши угодная предо мною, хранити заповеди моя и повеления моя, якоже сотвори давид раб мой, и буду с тобою, и созижду ти дом верен, якоже создах давиду, и дам ти израиля:

39 и озлоблю род давидов за сия, но не во вся дни.

40 И искаше соломон убити иеровоама. И воста иеровоам, и убежа во египет к сусакиму царю египетску, и бе во египте, дондеже соломон умре.

41 И прочая словес соломоних, и вся елика сотвори, и весь смысл его, не се ли, сия писана быша в книзе словес соломоних?

42 И дние, в няже царствова соломон во Иерусалиме над всем израилем, четыредесять лет.

43 И успе соломон со отцы своими: и погребоша его во граде давида отца его, и воцарися ровоам сын его вместо его.
12

1 И иде царь ровоам в сикиму, яко в сикиму прииде весь израиль воцарити его.

2 И бысть егда услыша иеровоам сын наватов, сущу ему еще во египте, яко убегл бе от лица соломона, и возвратися иеровоам из египта:

3 и послаша, и призваша его. И прииде иеровоам и весь сонм израилев, и рекоша людие к царю ровоаму глаголюще:

4 отец твой отягчи ярем наш, ты же ныне облегчи от работы отца твоего жестокия и от ярма его тяжкаго, егоже возложи на ны, и поработаем ти.

5 И рече к ним: отидите (и пребудите) до третияго дне, и возвратитеся ко мне. И идоша.

6 И возвести ровоам царь старейшинам, иже быша предстояще пред соломоном отцем его, еще живу ему сущу, глаголя: како вы мыслите, да отвещаю людем сим слово?

7 И реша ему, глаголюще: аще в днешний день будеши раб людем сим и поработаеши им, и речеши им словеса блага, и будут ти раби во вся дни.

8 И пренебреже совет старейшин, яже совещаша ему, и советова со отроки воспитанными с ним предстоявшими пред лицем его,

9 и рече им: что вы совещаваете? и что отвещаю людем сим, иже реша ко мне, глаголюще: облегчи наш ярем, егоже возложи отец твой на ны?

10 И глаголаша к нему отроцы воспитаннии с ним и реша ему: сице да глаголеши людем сим, иже реша к тебе, глаголюще: отец твой отягчи ярем наш: ты же ныне облегчи от нас: сия речеши к ним: юность моя толстее чресл отца моего:

11 и ныне отец мой наложи на вы ярем тяжек, аз же приложу к ярму вашему: отец мой наказа вы ранами, аз же накажу вы скорпионами.

12 И прииде весь израиль к царю ровоаму в день третий, якоже рече им царь, глаголя: возвратитеся ко мне в день третий.

13 И отвеща царь к людем жестоко: и остави царь ровоам совет старейшин, яже совещаша ему,

14 и рече к ним по совету отроков, глаголя: отец мой отягчи ярем ваш, аз же приложу к ярму вашему: отец мой наказа вы ранами, аз же накажу вы скорпионами.

15 И не послуша царь людий, яко бе превращение от Господа, яко да утвердит глаголгол свой, егоже глагола рукою ахии силонитянина о иеровоаме сыне наватове.

16 И виде весь израиль, яко не послуша царь гласа их, и отвещаша людие царю, глаголюще: кая нам часть в давиде? и несть нам наследия в сыне иессеове: бежи, израилю, в кровы своя: ныне паси дом твой, давиде. И отиде израиль в кровы своя.

17 Над сынми же израилевыми, иже живяху во градех иудиных, воцарися ровоам над ними.

18 И посла царь ровоам адонирама, иже над данию, и поби его камением весь израиль, и умре. Царь же ровоам потщася взыти на колесницу убежати во Иерусалим.

19 И отложися израиль от дому давидова даже до днесь.

20 И бысть егда услыша весь израиль, яко возвратися иеровоам от египта, и послаша, и призваша его на собор, и воцариша его над израилем: и не бе вслед дому давидова, токмо хоругвь иудина и вениаминова.

21 И ровоам вниде во Иерусалим и собра весь сонм иудин и хоругвь вениаминю, сто и двадесять тысящ юношей, творящих брань, ратовати на дом израилев, еже возвратити царство ровоаму сыну соломоню.

22 И бысть слово Господне ко самею человеку Божию, глаголя:

23 рцы к ровоаму сыну соломоню царю иудину и ко всему дому иудину и вениаминову и ко оставшымся людем, глаголя:

24 тако глаголет Господь: не восходите, ниже ратуйте на братию вашу, на сыны израилевы: но возвратитеся кийждо в домы своя, яко от мене бысть глаголгол сей. И послушаша словесе Господня, и престаша ити по глаголголу Господню.

25 И созда иеровоам сикиму в горе ефремли, и вселися в ней, и изыде оттуду, и созда фануила.

26 И рече иеровоам в сердцы своем: се, ныне возвратится царство в дом давидов,

27 аще взыдут людие сии вознести жертву в храме Господни во Иерусалим, и обратится сердце людий ко Господу и господину своему, к ровоаму царю иудину, и убиют мя, и возвратятся к ровоаму царю иудину.

28 И усоветова царь, и сотвори две юницы златы, и рече к людем: довлеет вам восходити во Иерусалим: се, бози твои, израилю, изведшии тя из земли египетския.

29 И постави едину в вефили, а другую в дане.

30 И бысть слово сие на согрешение, и идяху людие пред лицем юницы единыя даже до дана, и оставиша храм Господень.

31 И сотвори капища на высоких, и сотвори жерцов часть от людий, иже не беша от сынов левииных.

32 И сотвори иеровоам праздник в осмый месяц в пятыйнадесять день месяца, по празднику, иже в земли бе иудине, и взыде на олтарь, егоже сотвори в вефили, жрети юницам, яже сотвори, и постави в вефили жерцы на высоких, яже сотвори.

33 И взыде на олтарь, егоже сотвори в вефили, в осмый месяц, в пятыйнадесять день в праздник, егоже состави по сердцу своему: и сотвори праздник сыном израилевым, и взыде на олтарь еже пожрети.
13

1 И се, человек Божий прииде от иуды по словеси Господню в вефиль, и иеровоам стояше на олтари своем жрети хотя:

2 и воззва ко олтарю словом Господним и рече: олтарю, олтарю, сице глаголет Господь: се, сын раждается дому давидову, иосиа имя ему, и пожрет на тебе жерцы, иже на высоких жрущыя на тебе, и кости человеческия сожжет на тебе.

3 И даст в день той чудо, глаголя: сей глаголгол, егоже рече Господь, глаголя: се, олтарь разсядется, и излиется тук иже на нем.

4 И бысть егда услыша царь иеровоам словеса человека Божия воззвавшаго ко олтарю иже в вефили, и простре царь руку свою от олтаря, глаголя: имите его. И се, усше рука его, юже простре нань, и не можаше возвратити ю к себе:

5 и олтарь разседеся, и излияся тук от олтаря, по чудеси, еже даде человек Божий словом Господним.

6 И рече царь иеровоам человеку Божию: помолися ныне пред лицем Господа Бога твоего, дабы возвратилася рука моя ко мне. И помолися человек Божий пред лицем Господним, и возвратися рука царя к нему, и бысть якоже прежде.

7 И глагола царь к человеку Божию: вниди со мною в дом, и обедай, и дам ти дар.

8 И рече человек Божий к цареви: аще даси ми пол дому твоего, не вниду с тобою, ниже ям хлеба, ниже пию воды на месте сем,

9 яко тако заповеда ми Господь словом, глаголя: ни яждь хлеба, ни пий воды, ниже возвратися путем, имже шел еси.

10 И отиде путем иным, и не возвратися путем, имже прииде во вефиль.

11 И пророк един стар живяше в вефили, и приидоша сынове его и поведаша ему вся дела, яже сотвори человек Божий в день той в вефили, и словеса, яже глагола цареви, поведаша отцу своему.

12 И рече к ним отец их, глаголя: киим путем иде? И показаша ему сынове его путь, имже иде человек Божий изшедый от иуды.

13 И рече сыном своим: оседлайте ми осля. И оседлаша ему осля, и вседе на не,

14 и иде вслед человека Божия, и обрете его под дубом седяща, и рече ему: ты ли еси человек Божий пришедый от иуды? И рече ему: аз.

15 И рече ему: гряди со мною, и яждь хлеб.

16 И рече ему: не могу возвратитися с тобою, ниже ям хлеба, ни пию воды на месте сем,

17 яко тако заповеда ми Господь словом, глаголя: не яждь хлеба тамо, ниже пий воды тамо, и да не возвратишися путем тем, имже шел еси.

18 И рече к нему: и аз пророк есмь якоже ты, и ангел глагола ко мне словом Господним, глаголя: возврати его к себе в дом твой, да снест хлеба и пиет воду. И солга ему,

19 и возврати его: и яде хлеб, и пи воду в дому его.

20 И бысть им седящым на трапезе, и бысть слово Господне ко пророку возвращшему его.

21 И рече к человеку Божию пришедшему от иуды, глаголя: сице глаголет Господь: понеже преогорчил еси глаголгол Господень и не сохранил еси заповеди, юже заповеда тебе Господь Бог твой,

22 и возвратився ял еси хлеб и пил еси воду на месте сем, о немже рече к тебе, глаголя: да не яси хлеба и не пиеши воды: сего ради не внидет во гроб тело твое со отцы твоими.

23 И бысть по ядении хлеба и по питии воды, и оседла осля тому пророку, и возвратися, и отиде:

24 и обрете его лев на пути, и умертви его: и бе тело его повержено на пути, и осел стояше над ним, и лев стояше близ телесе (его):

25 и се, мужие мимоидуще, и видеша мертва повержена на пути и льва стояща близ мертваго: и приидоша, и поведаша во граде, в немже живяше пророк старый.

26 И услыша (сие пророк) возвративый его с пути и рече: человек Божии сей есть, иже преступи глаголгол Божий, и предаде его Господь льву, и сокруши его, и умертви его по глаголголу Господню, егоже рече ему.

27 И повеле сыном своим, глаголя: оседлайте ми осля. И оседлаша.

28 И пойде, и обрете тело его повержено на пути, и осел и лев стояста над телом, и не снеде лев телесе человека Божия и не сокруши осла.

29 И взя пророк тело человека Божия, и возложи е на осля, и возврати е пророк, и вниде во град погребсти его,

30 и положи тело его во гробе своем, и рыдаше по нем: увы, брате.

31 И бысть по рыдании о нем, и рече к сыном своим, глаголя: аще умру, погребите мя во гробе сем, идеже человек Божий погребен есть, при костех его положите мя, да спасутся кости моя с костьми его,

32 яко сбудется глагол, егоже глагола словом Господним о олтари, иже во вефили, и о домех высоких, иже в самарии.

33 И по глаголе сем не обратися иеровоам от злобы своея, и возвратися, и сотвори от части единыя людий жерцы высоких: иже хотяше, исполняше руку свою, и бываше жрец на высоких.

34 И бысть глагол сей в прегрешение дому иеровоамлю, и на испровержение, и на изчезновение от лица земли.
14

1 Во время оно разболеся авиа сын иеровоамль.

2 И рече иеровоам к жене своей: востани и измени ризы своя, да не познают, яко ты жена иеровоамова, и иди в силом: се бо, тамо ахиа пророк: той глагола мне еже царствовати над людьми сими:

3 и возми в руце твои человеку Божию десять хлебов, и опресноки чадом его, и гроздие и сосуд меда, и иди к нему: той возвестит ти, что будет отрочати.

4 И сотвори тако жена иеровоамля: и воста и иде в силом, и вниде в дом ахиин: человек же стар бяше еже видети, и притупистася очи его от старости его.

5 И рече Господь ко ахии: се, жена иеровоамова входит вопрошати тя о сыне своем, яко болезнует: по сему и по сему да глаголеши к ней. И бысть внегда внити ей, и она странноявляшеся.

6 И бысть егда услыша ахиа шум ног ея, входящей ей во врата, и рече: вниди, жено иеровоамова, почто ты тако странноявляешися? аз бо есмь посланник к тебе жесток:

7 шедши рцы иеровоаму: сия глаголет Господь Бог израилев: понеже толико вознесох тя от среды людий, и дах тя вожда над людьми моими израилем,

8 и раздрах царство от дому давидова, и дах е тебе, ты же не был еси якоже раб мой давид, иже сохрани заповеди моя, и иже хождаше вслед мене всем сердцем своим, еже творити всякую правоту пред очима моима,

9 и излукавствовал еси, еже творити паче всех елицы быша пред лицем твоим, и пошел еси и сотворил еси себе боги чужды и слияны, еже раздражити мя, и отвергл мя еси назад себе:

10 сего ради се, аз навожду злая на дом иеровоамов, и потреблю иеровоамля мочащаго к стене, держащагося и оставленаго во израили, и истреблю дом иеровоамов, якоже истребляется гной, дондеже скончатися ему:

11 умерших иеровоамлих во граде снедят пси, и умершаго на селе снедят птицы небесныя, яко Господь глагола:

12 ты же воставши иди в дом твой: внегда входити ногама твоима во град, умрет детищь,

13 и восплачется по нем весь израиль, и погребут его, яко той един внидет иеровоаму во гроб, яко обретеся в нем глагол благ о Господе Бозе израилеве в дому иеровоамли:

14 и возставит Господь себе царя над израилем, иже поразит дом иеровоамов в сей день: а что, и ныне?

15 и поразит Господь Бог израиля, якоже колеблется трость на воде: и истребит израиля свыше земли благия сея, юже даде отцем их, и завеет их за ону страну реки, понеже сотвориша дубравы своя, прогневляюще Господа,

16 и предаст Господь израиля за грехи иеровоамли, иже согреши и иже во грех введе израиля.

17 И воста жена иеровоамля и прииде во сариру. И бысть егда вниде в преддверие дому, и детищь умре.

18 И погребоша его, и плакашася его весь израиль по словеси Господню, еже глагола рукою раба своего ахии пророка.

19 И останок словес иеровоамовых, елика ратоваше и елика царствоваше, се, сия написана в книзе словес дний царей израилевых.

20 И дние, в нихже царствова иеровоам, двадесять два лета: и успе со отцы своими, и воцарися нават сын его вместо его.

21 Ровоам же сын соломонов царствова над иудою: бе четыредесяти и единаго лета, егда нача царствовати, и седмьнадесять лет царствова во Иерусалиме граде, егоже избра Господь положити имя свое тамо от всех племен израилевых. И имя матере его наама амманитяныня.

22 И сотвори ровоам лукавое пред Господем: и раздражи его о всех, яже сотвориша отцы их, о гресех их, имиже согрешиша:

23 и создаша сии себе высокая, и столпы, и капища на всяцем холме высоцем и под всяцем древом сеновным:

24 и смешение бе в земли их, и сотвориша от всех мерзостей языческих, яже отя Господь от лица сынов израилевых.

25 И бысть в лето пятое царствующаго ровоама, взыде сусаким царь египетский на Иерусалим

26 и взя вся сокровища дому Господня и сокровища дому царева, и копия златая, яже взя давид из руки отроков адраазара царя сувскаго и внесе я во Иерусалим: вся сия взя, и щиты златыя, яже сотвори соломон, и внесе я во египет.

27 И сотвори царь ровоам щиты медяныя вместо тех, и постави над ними властели от предходящих пред ним, иже храняху врата дому царева:

28 и бысть егда вхождаше царь в дом Господень, и ношаху оныя предходящии, и паки возвращаху тыя во оружехранилище предходящих.

29 Прочая же словес ровоамлих, и вся яже сотвори, не се ли, сия писана суть в книзе словес дний царства иудина?

30 И брань бе между ровоамом и между иеровоамом во вся дни.

31 И успе ровоам со отцы своими, и погребен бысть со отцы своими во граде давидове. И воцарися авиа сын его вместо его.
15

1 И во осмоенадесять лето царства иеровоама сына наватова, воцарися авиа сын ровоамль над иудою,

2 и три лета царствова во Иерусалиме. Имя же матере его мааха, дщи авессаломля.

3 И хождаше во всех гресех отца своего, яже сотвори пред ним, и не бе сердце его совершено с Господем Богом его, якоже сердце давида отца его:

4 яко давида ради остави ему Господь Бог его останок во Иерусалиме, да возставит по нем чада его и утвердит Иерусалим,

5 понеже сотвори давид правое пред Господем и не уклонися от всех, яже заповеда ему вся дни живота его, кроме слова урии хеттеанина.

6 И брань бе между ровоамом и между иеровоамом во вся дни живота их.

7 И прочая словес авииных, и вся яже сотвори, не се ли, сия написана в книзе слов дний царей иудиных? И брань бе между авиею и между иеровоамом.

8 И успе авиа со отцы своими в двадесятое лето иеровоама, и погребоша его со отцы его во граде давидове. И воцарися аса сын его вместо его.

9 И в лето двадесятое иеровоама царя израилева, царствоваше аса над иудою,

10 и четыредесять и едино лето царствова во Иерусалиме. Имя же матере его ана, дщи авессаломля.

11 И сотвори аса правое пред Господем, якоже давид отец его,

12 и отя скверная от земли, и искорени вся изваянная, яже сотвориша отцы его,

13 и ану матерь свою отстави еже не владети ей, понеже сотвори сонмище в дубраве своей: и изсече аса гай ея и сожже огнем в потоце кедрстем:

14 высоких же не искорени, обаче сердце асы бе совершенно пред Господем во вся дни его:

15 и внесе столпы отца своего, и столпы своя внесе во храм Господень сребряны и златы, и сосуды.

16 И брань бе между асою и между ваасом царем израилевым во вся дни их.

17 И взыде вааса царь израилев на иуду и созда раму, яко не быти на исхождение и вхождение асе царю иудину.

18 И взя аса все сребро и злато обретшееся в сокровищах дому Господня и в сокровищах дому царева и даде я в руце отрок своих: и посла их царь аса ко сыну адерову сыну таверема во рамман, ко сыну азаила, царя сирскаго, живущаго в дамасце, глаголя:

19 положи завет между мною и тобою, и между отцем моим и отцем твоим: се, послах ти дары, сребро и злато: прииди, разруши завет твой, иже со ваасою царем израилевым, да отидет от мене.

20 И послуша сын адеров царя асы, и посла воеводы сил своих на грады израилевы, и поразиша аина и дана, и авеля, дому маахиина, и весь хеннереф, даже до всея земли неффалимли.

21 И бысть яко услыша вааса, и остави созидати раму, и возвратися во ферсу.

22 Царь же аса заповеда всему иуде во енакиме, и взяша камение из рамы и древа ея, имиже основа вааса, и созда в них царь аса всяк холм вениаминь и стражбища.

23 Прочая же словес асиных, и вся сила его, и вся яже сотвори, и грады яже созда, не се ли, сия писана суть в книзе словес дний царей иудиных? Обаче во время старости своея начат болети ногама своима:

24 и успе аса со отцы своими, и погребен бысть во граде давида отца своего. И воцарися иосафат сын его вместо его.

25 Нават же сын иеровоамль нача царствовати над израилем во второе лето асы царя иудина, и царствова над израилем два лета,

26 и сотвори лукавое пред Господем, и хождаше путем отца своего и во гресех его, имиже согрешити сотвори израилю.

27 И обседе его вааса сын ахиин в дому велаана сына ахиина, и уби его во гавафоне иноплеменничи: нават же и весь израиль обседоша гавафон.

28 И умертви его вааса в лето третие асы царя иудина, и воцарися вместо его.

29 И бысть егда воцарися, изби весь дом иеровоамль и не остави ничтоже от всего дыхания иеровоамля, дондеже искорени их по глаголу Господню, егоже глагола рукою раба своего ахии силонитскаго,

30 грех ради иеровоамлих, иже согреши, иже введе во грех израиля, и в прогневании его, имже прогнева Господа Бога израилева.

31 И прочая словеса навата, и вся яже сотвори, не се ли, сия писана суть в книзе словес дний царей израилевых?

32 И бяше брань между асою (царем иудиным) и ваасою царем израилевым во вся дни их.

33 И в третие лето асы царя иудина царствова вааса сын ахиин над всем израилем во ферсе двадесять и четыре лета,

34 и сотвори лукавое пред Господем, и иде путем иеровоама сына наватова, и во гресех его, имиже в согрешение приведе израиля.
16

1 И бысть слово Господне рукою иуа сына ананиева ко ваасе, глаголя:

2 понеже вознесох тя от земли и дах тя властеля над людьми моими израилем, и пошел еси путем иеровоамлим и ввел еси в грех люди моя израиля, еже прогневати мя суетными их:

3 се, аз отвергу наследие ваасы и наследие дому его, и сотворю дом твой яко дом иеровоама сына наватова:

4 умершаго ваасова во граде снедят его пси, и умершаго на поли снедят его птицы небесныя.

5 И прочая словес ваасовых, и вся яже сотвори, и сильная его, не се ли, суть писана в книзе словес дний царей израилевых?

6 И успе вааса со отцы своими, и погребен бысть во ферсе, и воцарися ила сын его вместо его.

7 И рукою иуа сына анании пророка глагола Господь на ваасу и на дом его всю злобу, юже сотвори пред Господем, еже прогневати его делами рук своих, быти ему якоже и дому иеровоамлю, и о еже ему поражену быти.

8 В лето двадесять шестое асы царя иудина, царствова ила сын ваасин над израилем во ферсе два лета.

9 И воздвиже (Господь) на него отроки его, и замвриа воеводу половины конников: и ила бе во ферсе упиваяся, и пиян сый в дому арсы домостроителя во ферсе:

10 и вниде замврий, и порази его, и умертви его, в лето двадесять седмое асы царя иудина, и воцарися вместо его.

11 И бысть царствующу ему, внегда сести ему на престоле его, и изби весь дом ваасов: не остави ему мочащаго к стене, и ужиков его, и друга его.

12 И изби замврий весь дом ваасов по глаголу Господню, егоже глагола на дом ваасов и ко иую пророку,

13 о всех гресех ваасовых и илы сына его, яко сотвори согрешити израилю, еже разгневати Господа Бога израилева суетными их.

14 Прочая же словес илы, яже сотвори, не се ли, сия писана в книзе словес дний царей израилевых?

15 В лето двадесять седмое асы царя иудина царствова замврий седмь дний во ферсе: и бе полк израилев на гавафон иноплеменнический.

16 И слышаша людие сущии в полце, глаголющих: превратися замврий и порази царя. И поставиша царем во израили амвриа воеводу, иже над воями во израили в день он в полце.

17 И взыде амврий и весь израиль с ним от гавафона и обседе ферсу.

18 И бысть егда увиде замврий, яко предвзят бысть град его, и вниде во внутренний дом царский, и зажже над собою дом царев огнем, и умре

19 за грехи своя, яже сотвори, сотворения ради лукаваго пред Господем, еже ходити путем иеровоама сына наватова, и во гресех его, яже сотвори, яко введе во грех израиля.

20 И прочая словес замврииных, и наветы его, яже совеща, не се ли, сия суть писана в книгах словес дний царей израилевых?

21 Тогда разделишася людие израилстии, пол людий бысть за фамнием сыном гонафовым, яко да царствует он, и пол людий бысть со амврием.

22 Людие же сущии по амврии превозмогоша людий бывших со фамнием сыном гонафовым И умре фамний и иорам брат его во время оно, и воцарися амврий по фамнии.

23 В лето тридесять первое асы царя иудина царствова амврий во израили дванадесять лет, во ферсе же шесть лет царствова.

24 И купи амврий гору семерон у семира господина горы двема таланты сребра, и созда гору, и нарече имя горе, юже созда, во имя семира господина горы оныя, гора семирон.

25 И сотвори амврий лукавое пред Господем, и прелукавнова паче всех бывших пред ним:

26 и хождаше по всем путем иеровоама сына наватова и во гресех его, имиже введе во грех израиля, еже разгневати Господа Бога израилева в суетных их.

27 И прочая словес амвриевых, и вся яже сотвори, и вся сила его, не се ли, сия писана в книзе словес дний царей израилевых?

28 И успе амврий со отцы своими, и погребен бысть в самарии. И воцарися ахаав сын его вместо его.

29 Ахаав же сын амвриев воцарися над израилем в лето тридесять осмое асы царя иудина: царствова же ахаав сын амвриев над израилем в самарии двадесять два лета:

30 и сотвори ахаав лукавое пред Господем, и прелукавнова паче всех бывших прежде его:

31 и не бе ему доволно, еже ходити во гресех иеровоама сына наватова, и взя жену иезавель дщерь иефеваала царя сидонскаго: и иде, и нача служити ваалу, и поклонися ему,

32 и постави требище ваалу в дому мерзостей его, егоже созда в самарии:

33 и сотвори ахаав дубраву: и приложи ахаав творити прогневания, еже разгневати Господа Бога израилева и душу свою погубити: злодействова паче всех царей израилевых бывших прежде его.

34 Во дни же его созда ахиил вефилянин иерихон: на авироне первороднем своем основа его, и на сегуве юнейшем своем постави двери его, по глаголу Господню, егоже глагола рукою иисуса сына навина.
17

1 И рече илиа пророк фесвитянин, иже от фесвии галаадския, ко ахааву: жив Господь Бог сил, Бог израилев, емуже предстою пред ним, аще будет в лета сия роса и дождь, точию от уст словесе моего.

2 И бысть глагол Господень ко илии:

3 иди отсюду на восток и скрыйся в потоце хорафа прямо лицу иорданову:

4 и будеши пити от потока воду, и враном заповедах препитати тя тамо.

5 И сотвори илиа по глаголу Господню, и седе при потоце хорафове прямо лицу иорданову:

6 и вранове приношаху ему хлебы и мяса заутра, и хлебы и мяса к вечеру, и от потока пияше воду.

7 И бысть по днех, и изсше источник, яко не бе дождя на землю,

8 и бысть глагол Господень ко илии глаголя:

9 востани и иди в сарепту сидонскую, и пребуди тамо: се бо, заповедах тамо жене вдовице препитати тя.

10 И воста и иде в сарепту сидонскую, и прииде ко вратом града: и се, тамо жена вдова собираше дрова. И возопи илиа вслед ея и рече ей: принеси ныне ми мало воды в сосуде, и испию.

11 И иде взяти. И возопи вслед ея илиа и рече ей: приими убо мне и укрух хлеба в руце своей, да ям.

12 И рече жена: жив Господь Бог твой, аще есть у мене опреснок, но токмо горсть муки в водоносе и мало елеа в чванце: и се, аз соберу два поленца, и вниду, и сотворю е себе и детем моим, и снемы е, и умрем.

13 И рече к ней илиа: дерзай, вниди и сотвори но глаголу твоему: но сотвори ми оттуду опреснок мал прежде, и принеси ми, себе же и чадом своим да сотвориши послежде,

14 яко тако глаголет Господь Бог израилев: водонос муки не оскудеет, и чванец елеа не умалится до дне, дондеже даст Господь дождь на землю.

15 И иде жена, и сотвори по глаголу илиину, и даде ему, и яде той, и та, и чада ея.

16 И от того дне водонос муки не оскуде, и чванец елеа не умалися, по глаголу Господню, егоже глагола рукою илииною.

17 И бысть по сих, и разболеся сын жены госпожи дому, и бе болезнь его крепка зело, дондеже не остася в нем дух его.

18 И рече ко илии: что мне и тебе, человече Божий? вшел еси ко мне воспомянути неправды моя и уморити сына моего.

19 И рече илиа к жене: даждь ми сына твоего. И взят его от недра ея, и вознесе его в горницу, идеже сам почиваше, и положи его на одре своем.

20-22 И возопи илиа ко Господу и рече: увы мне, Господи, свидетелю вдовы, у неяже аз ныне пребываю, ты озлобил еси еже уморити сына ея. И дуну на отрочища трижды, и призва Господа и рече: Господи Боже мой, да возвратится убо душа отрочища сего в онь. И бысть тако: и возопи отрочищь, и сведе его с горницы в дом, и даде его матери его. И рече илиа: виждь, жив есть сын твой.

23 И рече жена ко илии: се, уразумех, яко человек Божий еси ты, и глагол Господень во устех твоих истинен.
18

1 И бысть по днех мнозех, и глагол Господень бысть ко илии в лето третие глаголя: иди и явися ахааву, и дам дождь на лице земли.

2 И иде илиа ко ахааву явитися, и бе глад крепок в самарии.

3 И призва ахаав авдиа строителя дому: и авдий бе бояся Господа зело.

4 И бысть егда нача избивати иезавель пророки Господни, и взя авдий сто мужей пророки и скры я по пятидесяти во двоих вертепех и кормяше их хлебом и водою.

5 И рече ахаав ко авдию: гряди, и прейдем на землю, и на источники водныя, и на вся потоки, да негли како обрящем былие и прекормим кони и мски, да не изгибнут от скот.

6 И разделиша себе путь ити по нему: ахаав иде путем единым един, и авдий иде путем другим един.

7 И бе авдий един на пути: и прииде илиа на сретение ему един. И авдий потщася, и паде на лице свое и рече: ты ли еси сам, господи мой илие?

8 И рече илиа ко авдию: аз есмь: иди и повеждь господину твоему, глаголя: се, илиа.

9 И рече авдий: что согреших аз, яко предаеши раба твоего в руце ахаавли еже умертвити мя?

10 жив Господь Бог твой, аще есть язык или царство, аможе не посла господин мой искати тебе: и реша, несть: и закля царство и страны его, яко не обрете тебе:

11 и ныне ты глаголеши ми: иди, возвести господину твоему: се, илиа:

12 и будет егда аз отиду от тебе, и дух Господень возмет тя в землю, еяже не вем, и вниду возвестити ахааву, и не обрящет тебе, и убиет мя: раб же твой есть бояйся Господа от юности своея:

13 или не возвестися тебе господину моему, яже сотворих, егда убиваше иезавель пророки Господни, и сокрых пророки Господни сто мужей, по пятидесяти в вертепе, и кормих их хлебом и водою?

14 и ныне ты глаголеши ми: иди, повеждь господину твоему: се, илиа: и убиет мя.

15 И рече илиа: жив Господь сил, емуже предстою пред ним, яко днесь покажуся ему.

16 И иде авдий во сретение ахааву и возвести ему. И ускори ахаав и иде во сретение илии.

17 И бысть егда узре ахаав илию, и рече ахаав ко илии: ты ли еси развращаяй израиля?

18 И рече илиа: не развращаю аз израиля, но разве ты и дом отца твоего, егда остависте вы Господа Бога вашего и идосте вслед ваала:

19 и ныне посли и собери ко мне всего израиля на гору кармилскую, и пророки студныя вааловы четыреста и пятьдесят, и пророков дубравных четыреста, ядущих трапезу иезавелину.

20 И посла ахаав во весь израиль, и приведе вся пророки на гору кармилскую.

21 И приведе ко всем им илию, и рече им илиа: доколе вы храмлете на обе плесне вашы? аще есть Господь Бог, идите вслед его: аще же ваал есть, то идите за ним. И не отвещаша людие словесе.

22 И рече илиа к людем: аз остах пророк Господень един: и пророцы вааловы четыреста и пятьдесят мужей, и пророков дубравных четыреста.

23 (И рече илиа:) да дадят нам два вола, и да изберут себе единаго, и да растешут и (на уды), и возложат на дрова, и да не возгнетят огня: и аз растешу вола другаго, и возложу на дрова, и огня не возгнещу:

24 и да призовете имена богов ваших, и аз призову имя Господа Бога моего: и будет Бог, иже аще послушает огнем, той есть Бог. И отвещаша вси людие и реша: добр глагол (илиин), егоже глагола (да будет тако).

25 И рече илиа пророком студным: изберите себе юнца единаго, и сотворите вы прежде, яко вас есть множество: и призовите имена богов ваших, и огня не возгнещайте.

26 И пояша юнца, и сотвориша (тако), и призываху имя ваалово от утра до полудне, и реша: послушай нас, ваале, послушай нас. И не бе гласа, ни послушания. И ристаху около жертвенника, егоже сотвориша.

27 И бысть в полудне, и поругася им илиа фесвитянин и рече: зовите гласом великим, яко бог есть, яко непраздность ему есть, и негли что ино строит, или спит сам, и востанет.

28 И зовяху гласом великим, и крояхуся по обычаю своему ножами, и мнози бишася бичми, до пролития крове своея,

29 и прорицаху, дондеже прейде вечер: и бысть егда прииде время взыти жертве, и не бе гласа, ниже послушания. И рече илиа фесвитянин пророком студным, глаголя: отступите ныне, да и аз сотворю жертву мою. И отступиша тии, и умолкнуша.

30 И рече илиа к людем: приступите ко мне. И приступиша вси людие к нему.

31 И взя илиа дванадесять камений по числу колен израилевых, якоже глагола к нему Господь, глаголя: израиль будет имя твое.

32 И созда камение во имя Господне, и изцели олтарь раскопанный, и сотвори море вмещающее две меры семене окрест олтаря.

33 И воскладе дрова на олтарь, егоже сотвори, и растеса на уды всесожегаемая, и возложи на дрова, и воскладе на олтарь.

34 И рече илиа: принесите ми четыри водоносы воды, и возливайте на всесожжение и на полена. И сотвориша тако. И рече: удвойте. И удвоиша. И рече: утройте. И утроиша.

35 И прохождаше вода окрест олтаря, и море исполнися воды.

36 И возопи илиа на небо и рече: Господи Боже авраамов и исааков и иаковль, послушай мене, Господи, послушай мене днесь огнем, и да уразумеют вси людие сии, яко ты еси Господь един израилев, и аз раб твой, и тебе ради сотворих дела сия:

37 послушай мене, Господи, послушай мене огнем, и да разумеют вси людие сии, яко ты еси (един) Господь Бог, и ты обратил еси сердца людий сих вслед тебе.

38 И спаде огнь от Господа с небесе, и пояде всесожегаемая, и дрова, и воду, яже в мори, и камение и персть полиза огнь.

39 И падоша вси людие на лице свое и реша: воистинну Господь Бог той есть Бог.

40 И рече илиа к людем: поимайте пророки вааловы, да ни един скрыется от них. И яша их, и веде я илиа на поток киссов, и закла их тамо.

41 И рече илиа ко ахааву: взыди, и яждь и пий, яко глас есть дождевнаго хождения.

42 И взыде ахаав ясти и пити. Илиа же взыде на кармил, и преклонися на землю, и положи лице свое между коленома своима,

43 и рече отрочищу своему: взыди и воззри на путь морский. И взыде, и воззре отрочищь, и рече: несть ничтоже. И рече илиа: и ты обратися седмижды.

44 И обратися отрочищь седмижды: и бысть в седмое, и се, облак мал, аки след ноги мужеския, возносящь воду из моря. И рече: взыди и рцы ахааву: впрязи колесницу твою и сниди, да не постигнет тебе дождь.

45 И бысть до зде и до зде, и небо примрачися облаки и духом, и бысть дождь велий. И плакася, и иде ахаав до иезраеля.

46 И рука Господня бысть на илии, и стягне чресла своя, и тече пред ахаавом во иезраель.
19

1 И возвести ахаав иезавели жене своей вся, елика сотвори илиа, и яко изби пророки оружием.

2 И посла иезавель ко илии и рече: аще ты еси илиа, аз же иезавель: сия да сотворят ми бози и сия да приложат ми, яко в сей же час утро положу душу твою, якоже душу единаго от них.

3 И убояся илиа, и воста, и отиде души ради своея, и прииде в вирсавию землю иудину, и остави отрочище свое тамо,

4 сам же иде в пустыню дне путь, и прииде, и седе под смерчием, и проси души своей смерти, и рече: довлеет ныне (ми), возми убо от мене душу мою, Господи, яко несмь аз лучший отец моих.

5 И ляже, и успе под садом: и се, ангел Господень коснуся ему и рече ему: востани, яждь и пий.

6 И воззре илиа: и се, у возглавия его опреснок ячменный и чванец воды. И воста, и яде и пи, и возвратився успе.

7 И обратися ангел Господень вторицею, и коснуся ему, и рече ему: востани, яждь и пий, яко мног от тебе путь.

8 И воста, и яде и пи: и иде в крепости яди тоя четыредесять дний и четыредесять нощей до горы Божия хорив.

9 И вниде тамо в пещеру, и вселися в ней. И се, глагол Господень к нему и рече: что ты зде, илие?

10 И рече илиа: ревнуя поревновах по Господе (Бозе) вседержители, яко оставиша тя сынове израилевы: олтари твоя раскопаша, и пророки твоя избиша оружием, и остах аз един, и ищут души моея изяти ю.

11 И рече: изыди утро и стани пред Господем в горе: и се, мимо пойдет Господь, и дух велик и крепок разоряя горы и сокрушая камение в горе пред Господем, (но) не в дусе Господь: и по дусе трус, и не в трусе Господь:

12 и по трусе огнь, и не во огни Господь: и по огни глас хлада тонка, и тамо Господь.

13 И бысть яко услыша илиа, покры лице свое милотию своею, и изыде и ста пред вертепом. И се, к нему бысть глас и рече: что ты зде, илие?

14 И рече илиа: ревнуя поревновах по Господе Бозе вседержители, яко оставиша завет твой сынове израилевы, и олтари твоя раскопаша, и пророки твоя избиша оружием, и остах аз един, и ищут души моея изяти ю.

15 И рече Господь к нему: иди, возвратися путем своим, и изыдеши на путь пустыни дамасковы, и помажеши азаила на царство сирийское,

16 и ииуа сына намессиина помажеши на царство над израилем, и елиссеа сына сафатова от авелмаула помажеши вместо себе пророка:

17 и будет спасаемаго от оружия азаилева убиет ииуй, и спасаемаго от оружия ииуина убиет елиссей:

18 и оставиши во израили седмь тысящ мужей, вся колена, яже не преклониша колена ваалу, и всяка уста, яже не молишася ему.

19 И иде оттуду, и обрете елиссеа сына сафатова, и сей оряше двеманадесятьма супругома волов пред ним, и той сам по двоюнадесяти супруг. И прииде илиа к нему, и поверже милоть свою на него.

20 И остави елиссей волы, и тече вслед илии, и рече: (молю тя,) да облобыжу отца моего и матерь мою, и иду вслед тебе. И рече ему илиа: иди, возвратися, яко сотворих тебе.

21 И возвратися от него: и взя супруги волов, и закла, и испече я в сосудех воловных, и даде людем, и ядоша. И воста, и иде вслед илии, и служаше ему.
20

1 И сын адеров царь сирский собра всю силу свою, и возшед обседе самарию, и с ним тридесять два царя и вси конницы и колесницы: и взыдоша, и обседоша самарию, и ратоваша на ню:

2 и посла ко ахааву царю израилеву во град и рече к нему: сице глаголет сын адеров:

3 сребро твое и злато твое мое есть, и жены твоя и чада твоя добрая моя суть.

4 И отвеща царь израилев и рече: якоже глаголал еси, господи мой царю, твой есмь аз и вся моя.

5 И возвратишася послы и реша: сице глаголет сын адеров: аз посылах к тебе, глаголя: сребро и злато твое и жены твоя и чада твоя даждь мне:

6 яко в сей час утро послю рабы моя к тебе, и изыщут дом твой и домы отрок твоих, и будут вся желаемая очес их, на нихже аще возложат руки своя, и возмут.

7 И призва царь израилев вся старейшины земли и рече: знайте ныне и видите, яко той зле просит, яко присла ко мне (глаголя) о женах моих и о сынех моих и о дщерех моих: сребра моего и злата моего не возбраних ему.

8 И реша ему старейшины и вси людие: не послушай, ни восхощи (дати).

9 И рече послом сына адерова: рцыте господину вашему: вся, ихже ради посылал еси к рабу твоему прежде, сотворю, сего же глагола не могу сотворити. И отидоша мужие (адеровы) и возвестиша ему слово.

10 И паки посла к нему сын адеров, глаголя: сия да сотворят ми бози и сия да приложат, аще доволна будет персть самарии горстем всех людий пешцев моих.

11 И отвеща царь израилев и рече: доволно: да не хвалится слячен, якоже прямый.

12 И бысть егда отвеща ему слово сие, бе пиющь сам и вси царие, иже бяху с ним в кущах: и рече отроком своим: сотворите вал. И сотвориша вал над градом.

13 И се, пророк един прииде к ахааву царю израилеву и рече: сия глаголет Господь: видиши ли весь народ сей великий? се, аз дам его днесь в руце твои, и уразумееши, яко аз (есмь) Господь.

14 И рече ахаав: в чем? И рече: сице глаголет Господь: во отроцех князей градских. И рече ахаав: кто начнет брань? И рече: ты.

15 И сочте ахаав отроки князей градских, и бысть их двести тридесять и два: и по сих сочте люди вся сыны силы, седмь тысящ.

16 И изыде в полудне: и сын адеров пиян бе зело в сокхофе сам и царие (иже с ним), тридесять два царя помощника ему.

17 И изыдоша отроцы воевод градских в первых. И посла сын адеров, и возвестиша царю сирскому, глаголюще: мужие изыдоша из самарии.

18 И рече им: аще на мир изыдоша, поимите их живых: и аще на брань изыдоша, живых поимите их, да не исходят из града.

19 И тии изыдоша из града отроцы воевод градских, и сила вслед их.

20 И порази кийждо противнаго себе, и удвои кийждо противнаго себе. И бежа сириа: и погна их израиль, и гонзе токмо сын адеров царь сирский на кони конника.

21 И изыде царь израилев, и взя вся кони и колесницы, и порази язвою великою в сирии.

22 И прииде пророк к царю израилеву и рече: укрепися и разумей, и виждь, что сотвориши, яко преходящу лету сему, сын адеров, царь сирийский, приидет на тя.

23 И отроцы царя сирийска реша ему: Бог гор Бог израилев, а не Бог юдолий, сего ради укрепися паче нас: аще же сразимся с ними на равнине, истинно укрепимся паче их:

24 по глаголу же сему сотвори: распусти цари коегождо на место свое, и постави вместо их воеводы,

25 и пременим тебе силу вместо силы падшия у тебе, и кони вместо коней, и колесницы вместо колесниц, и сразимся с ними на равнине, и укрепимся паче их. И послуша гласа их и сотвори тако.

26 И бысть минувшу лету тому, и сочте сын адеров сирию, и взыде во афеку на брань на израиля.

27 И сынове израилевы сочислишася и изыдоша во сретение им. И ополчишася израилтяне противу им, аки два стада коз: сириане же наполниша землю.

28 И прииде человек Божий и рече к царю израилеву: сице глаголет Господь: понеже рече сириа: Бог гор Господь Бог израилев, и не Бог юдолий той, и дам силу великую сию в руку твою, и уразумееши, яко аз Господь.

29 И ополчишася тии противу им седмь дний. И бысть в день седмый, и приближися брань, и порази израиль сириан, сто и двадесять тысящ пешцев во един день.

30 И бежаша оставшиися во афеку град, и паде стена на двадесять седмь тысящ мужей оставшихся: сын же адеров бежа и вниде в дом ложа, в чертог.

31 И реша к нему отроцы его: се, ныне вемы, яко царие дому израилева милостиви суть: да возложим ныне вретища на чресла наша и ужа на выи нашя, и изыдем ко царю израилеву, да негли оживит душы нашя.

32 И препоясашася во вретища по чреслом своим, и возложиша ужя на выи своя, и приидоша к царю израилеву и реша: раб твой сын адеров глаголет: да живет душа моя. И рече: аще есть еще жив, брат ми есть.

33 И мужие за знак и в залог прияша слово от уст его, и реша: брат твой сын адеров. И рече: идите и приведите его. И изыде к нему сын адеров. И возведоша его к нему на колесницу.

34 И рече к нему: грады, яже взя отец мой от отца твоего, отдам тебе: и на исход сотвориши я себе в дамасце, якоже положи отец мой в самарии, и аз в завете пущу тя. И положи ему завет и отпусти его.

35 И человек един от сынов пророчих рече ко ближнему своему по словеси Господню: бий мя ныне. И не восхоте человек бити его.

36 И рече к нему: понеже не послушал еси гласа Господня, се, ты отидеши от мене, и поразит тя лев. И отиде от него, и обрете его лев и порази его.

37 И обрете человека инаго и рече: бий мя ныне. И би его человек, и поразив сокруши его.

38 И иде пророк и предста царю израилеву на пути и покры покрывалом очи свои.

39 И бысть егда мимоидяше царь, и сей возопи ко царю и рече: раб твой изыде на войну брани, и се, муж приведе ко мне мужа и рече ко мне: сохрани мужа сего: аще же отрешився отскочит, и будет душа твоя вместо души его, или талант отдаси сребра:

40 и бысть яко озреся раб твой семо и овамо, и сего не бысть. И рече к нему царь израилев: се, суд твой при мне, сам себе убил еси.

41 И ускори и отя покрывало от очес своих. И позна его царь израилев, яко от пророк сей есть.

42 И рече к нему: тако глаголет Господь: понеже испустил еси ты мужа пагубнаго из руки твоея, и будет душа твоя вместо души его, и людие твои вместо людий его.

43 И отиде царь израилев к дому своему смущен и разслаблен, и прииде в самарию.
21

1 И бысть по глаголех сих, и виноград един бе у навуфеа иезраилитянина при гумне ахаава царя самарийска.

2 И рече ахаав к навуфею, глаголя: даждь ми виноград твой, и будет ми во вертоград зелий, яко близ есть сей дому моего, и дам ти вместо сего виноград ин добр паче сего: аще же угодно пред тобою, дам ти сребро измену винограда сего, и будет ми во вертоград зелий.

3 И рече навуфей ко ахааву: да не будет мне от Господа Бога моего дати наследие отец моих тебе.

4 И прииде ахаав в дом свой смущен и оскорблен о словеси, еже глагола к нему навуфей иезраилитянин, и рече: не дам тебе наследия отец моих. И бысть дух ахаавль смущен, и успе на одре своем и покры лице свое и не яде хлеба.

5 И вниде иезавель жена его к нему и рече к нему: что дух твой есть смущен, и не яси ты хлеба?

6 И рече к ней (ахаав): яко глаголах навуфею иезраилитянину глаголя: даждь ми виноград твой за сребро: и аще хощеши, дам ти виноград ин вместо его: и рече: не дам ти наследия отец моих.

7 И рече к нему иезавель жена его: ты ли ныне твориши тако, царю израилев? востани и яждь хлеб и молча буди, аз же дам ти виноград навуфеа иезраилитянина.

8 И написа книгу на имя ахаавле, и запечата ю печатию его, и посла книгу к старейшинам и свободным живущым с навуфеем.

9 И писано бяше в книзе тако: поститеся постом и посадите навуфеа и в начале людий:

10 и посадите два мужа сыны законопреступных противу ему, и да засвидетелствуют о нем, глаголюще, яко (не) благослови Бога и царя: и да изведут его и побиют камением, и да умрет.

11 И сотвориша тако мужие града его старейшии и свободнии живущии во граде его, якоже посла к ним иезавель, и якоже писано бяше в книгах, яже посла к ним:

12 и нарекоша пост, и посадиша навуфеа в начале людий,

13 и приидоста два мужа сынове законопреступных и седоста противу его, и засвидетелствоваша на него мужие отступницы навуфеовы пред людьми, глаголюще: сей (не) благослови Бога и царя. И изведоша его вон из града и побиша его камением, и умре.

14 И послаша ко иезавели, глаголюще: камением побиен бысть навуфей и умре.

15 И бысть егда услыша иезавель глаголющих, яко побиен навуфей и умре, и рече иезавель ко ахааву: востани, наследуй виноград навуфеа иезраилитянина, иже не взя у тебе сребра, и уже несть навуфей жив, но умре.

16 И бысть егда услыша ахаав, яко убиен бысть навуфей иезраилитянин, и раздра ризы своя и облечеся во вретище. И бысть по сих, и воста и сниде ахаав в виноград навуфеа иезраилитянина наследити его.

17 И рече Господь ко илии фесвитянину, глаголя:

18 востани и сниди на сретение ахааву царю израилеву, иже в самарии, се бо, сей в винограде навуфееве, яко сниде тамо наследити его:

19 и речеши ему, глаголя: сице глаголет Господь: понеже ты убил еси (навуфеа) и приял еси в наследие (виноград его), сего ради тако глаголет Господь: на месте, идеже полизаша свинии и пси кровь его, тамо полижут и кровь твою, и блудницы измыются в крови твоей.

20 И рече ахаав ко илии: обрел ли еси мя, враже мой? И рече илиа: обретох: понеже ты всуе продан еси сотворити лукавое пред Господем, во еже разгневати его:

21 сице глаголет Господь: се, аз наведу на тя злая и попалю задняя твоя, и искореню ахаавля мочащагося к стене, и содержимыя и оставшихся во израили:

22 и предам дом твой якоже дом иеровоама сына наватова, и якоже дом ваасы сына ахиина, о прогневаниих, имиже прогневал мя еси, и грешити сотворил еси израиля.

23 И ко иезавели рече Господь, глаголя: пси снедят ю в предградии иезраеля:

24 умершаго ахаавля во граде снедят пси, и умершаго его на поли снедят птицы небесныя:

25 и в суете ты еси, ахааве, иже продан бысть сотворити лукавое пред Господем, яко преврати его иезавель жена его.

26 И омерзися зело, еже ходити вслед мерзостей, яже сотвори аморрей, егоже истреби Господь от лица сынов израилевых.

27 И бысть егда услыша ахаав словеса сия, умилися от лица Господня, и идяше плачася, и раздра ризы своя, и препоясася вретищем по телу своему и постися: и бе облечен во вретище от дне, в оньже уби навуфеа иезраилитянина, и хождаше скорбен.

28 И бысть глагол Господень рукою раба его илии о ахааве,

29 и рече Господь: видел ли еси, яко умилися ахаав от лица моего? сего ради не наведу зла во днех его: но во днех сына его наведу зло на дом его.
22

1 И седе три лета, и не бе брани между сириею и между израилем.

2 И бысть в лето третие, и сниде иосафат царь иудин к царю израилеву.

3 И рече царь израилев ко отроком своим: весте ли, яко моя есть реммафа галаадская, и мы молчим взяти ю от руки царя сирийска?

4 И рече царь израилев ко иосафату: взыдеши ли с нами в реммафу галаадскую на брань? И рече иосафат: якоже аз, такожде и ты: якоже людие мои, людие твои: якоже кони мои, кони твои.

5 И рече иосафат царь иудин к царю израилеву: вопросите убо днесь Господа.

6 И собра царь израилев вся пророки яко четыреста мужей, и рече царь им: взыду ли в реммафу галаадскую на брань, или оставлю? И реша: взыди, яко дая предаст Господь в руки царевы.

7 И рече иосафат к царю израилеву: несть ли зде пророка Господня, и вопросили быхом Господа им?

8 И рече царь израилев ко иосафату: еще есть един муж на вопрошение им Господа, и аз возненавидех его, яко не глаголет о мне добре, но злая, михеа сын иемвлаань. И рече царь иосафат иудин: не глаголи, царю, тако.

9 И призва царь израилев скопца единаго и рече: скоро иди по михею сына иемвлааня.

10 Царь же израилев и иосафат царь иудин седяста кийждо на престоле своем вооружени во вратех самарийских, и вси пророцы прорицаху пред ними.

11 И сотвори себе седекиа сын ханаань рога железна и рече: тако глаголет Господь: сими рогами избодеши сирию, дондеже скончается.

12 И вси пророцы прорицаху тако, глаголюще: взыди в реммафу галаадскую, и наставит тя, и предаст Господь в руце твои царя сирийскаго.

13 И посол шед призвати михею, рече ему, глаголя: се, ныне вси пророцы усты едиными глаголют добрая о цари, буди убо и ты в словесех твоих по словесем единаго от сих и глаголи добрая.

14 И рече михеа: жив Господь, яко яже речет Господь ко мне, сия возглаголю.

15 И прииде ко царю. И рече ему царь: михее, взыду ли в реммафу галаадскую на брань, или оставлю? И рече ему: взыди, и благопоспешит Господь в руки царевы.

16 И рече ему царь: еще аз дважды заклинаю тя, да речеши истину пред Господем.

17 И рече михеа: не тако: видех всего израиля разсеяна по горам якоже стада, имже несть пастыря: и рече Господь: не Господь ли сим в Бога? да возвратится кийждо в дом свой с миром.

18 И рече царь израилев ко иосафату царю иудину: не рех ли тебе, яко не проричет сей ми добрая, но токмо злая?

19 И рече михеа: не тако: не аз: слыши глагол Господень: не тако: видех Господа Бога израилева седящаго на престоле своем, и все воинство небесное стояше окрест его одесную его и ошуюю его:

20 и рече Господь: кто прельстит ахаава царя израилева, и взыдет и падет в реммафе галаадстей? и рече сей тако, и сей тако:

21 и изыде дух, и ста пред Господем, и рече: аз прельщу и:

22 и рече к нему Господь: в чем? и рече: изыду и буду дух лжив во устех всех пророк его: и рече: прельстиши и возможеши: изыди и сотвори тако:

23 и се, ныне даде Господь дух лжив во уста всех пророк твоих сих, и Господь глагола на тя злая.

24 И приступи седекиа сын ханаань, и порази михею в лице и рече: каковый сей прейде дух Господень от мене, еже глаголати в тебе?

25 И рече михеа: се, ты узриши в день он, егда внидеши в ложницу сокровища твоего, еже скрытися ту.

26 И рече царь израилев: поимите михею, и возвратите его ко аммону князю града и ко иоасу сыну цареву,

27 и рцыте, да посадят его в темницу, и да кормят его хлебом печальным и водою печальною, дондеже возвращуся в мире.

28 И рече михеа: аще возвращаяся возвратишися в мире, то не глагола Господь мною. И рече: слышите, людие вси.

29 И взыде царь израилев и иосафат царь иудин с ним в реммафу галаадскую.

30 И рече царь израилев ко иосафату царю иудину: прикрый мя, и вниду в сечь, и ты облецыся в ризу мою. И прикрыся царь израилев и вниде в сечь.

31 Царь же сирский заповеда князем колесниц своих тридесятим и двум, глаголя: не бийтеся ни с великим ни с малым, но токмо с царем израилевым единым.

32 И бысть егда узреша воеводы колесниц иосафата царя иудина, и реша: видится царь израилев сей. И обступиша его еже сразитися с ним: и возопи иосафат.

33 И бысть егда узреша воеводы колесниц, яко несть царь израилев той, и возвратишася от него:

34 и наляче лук един муж приметно, и порази царя израилева между легким и щитом. И рече (царь) всаднику своему: обрати руки твоя, и изведи мя от брани, яко язвен есмь.

35 И умножися брань в той день, и царь бе стоя на колеснице противу сириан от утра даже до вечера, и лияшеся кровь из язвы в недра колесницы, и умре в вечер, и изливашеся кровь от язвы даже до недр колесницы.

36 И ста проповедник о западе солнца, глаголя: кийждо вас да идет во свой град и во свою землю, яко умре царь.

37 И приидоша в самарию, и погребоша в самарии царя.

38 И омыша кровь с колесницы на источнице самарийстем, и полизаша свинии и пси кровь его, и блудницы измышася в крови его, по глаголу Господню, егоже глагола.

39 Прочая же словес ахаавлих, и вся яже сотвори, и храм слоновый, егоже созда, и вся грады, яже сотвори, не се ли, сия писана быша в книзе словес дний царей израилевых?

40 И успе ахаав со отцы своими, и воцарися охозиа сын его вместо его.

41 И иосафат сын асы воцарися над иудою в четвертое лето ахаава царя израилева.

42 Иосафат сын тридесяти пяти лет (бе), егда нача царствовати, и двадесять пять лет царствова во Иерусалиме. Имя же матери его азува, дщи салаиля.

43 И хождаше по всем путем асы отца своего, не уклонися от него, творя правое пред очима Господнима, токмо высоких не разори: еще людие жряху и кадяху на высоких.

44 И умирися иосафат с царем израилевым.

45 Прочая же словес иосафатовых, и силы его, елика сотвори, не се ли, писана суть в книзе словес дний царей иудиных?

46 И прочее мерзости, еже остася во дни асы отца его, отя от земли.

47 И царя не бе во едоме поставленнаго.

48 Царь же иосафат сотвори корабли фарсийския, еже ити во офир по злато, но не поидоша, зане сокрушишася корабли во асеон-гавере.

49 Тогда рече охозиа сын ахаавль ко иосафату: да идут раби мои с рабы твоими в кораблех. И не восхоте иосафат.

50 И умре иосафат со отцы своими, и погребен бысть у отец своих во граде давида отца своего. И воцарися иорам сын его вместо его.

51 И охозиа сын ахаавов воцарися над израилем в самарии, в лето седмоенадесять иосафата царя иудина, и царствова над израилем в самарии лета два,

52 и сотвори лукавое пред Господем, и нача ходити по путем отца своего ахаава и по пути иезавели матере своея, и во гресех дому иеровоама сына наватова, иже введе во грех израиля:

53 и поработа ваалу, и поклонися ему, и разгнева Господа Бога израилева, по всем бывшым прежде его.