БИБЛИЯ

Книга Неемии

1

1 Словеса неемии сына ахалиина. И бысть в месяце хаселев, двадесятаго лета, и аз бех в сусан-авире.

2 И прииде (ко мне) ананиа един от братий моих с мужи иудовы, и вопросих их о спасшихся, иже осташася от пленения, и о Иерусалиме.

3 И рекоша ми: оставшиися от пленения тамо во стране, во озлоблении велице и в поношении, и стены Иерусалимския разорены, и врата его сожжена огнем.

4 И бысть егда услышах словеса сия, седох и плаках и рыдах дни (многи), и бех постяся и моляся пред лицем Бога небеснаго,

5 и рекох: молю тя, Господи Боже небесный, крепкий, великий и страшный, храняй завет и милосердие любящым тя и хранящым заповеди твоя:

6 да будут уши твои внемлюще и очи твои отверсте, еже слышати молитву раба твоего, еюже аз молюся пред тобою днесь, день и нощь, о сынех израилевых рабех твоих: и исповедаюся о гресех сынов израилевых, имиже согрешихом пред тобою, и аз и дом отца моего согрешихом:

7 преступлением преступихом тебе и не сохранихом заповедий (твоих) и повелений и судеб, яже повелел еси моисею рабу твоему:

8 помяни убо слово, еже заповедал еси моисею рабу твоему глаголя: аще преступите вы, аз расточу вы в люди,

9 и аще обратитеся ко мне и сохраните заповеди моя и сотворите я, аще будет разсеяние ваше до конца небесе, оттуду соберу вы и введу вы в место, еже избрах вселитися имени моему тамо:

10 и тии раби твои и людие твои, ихже искупил еси силою твоей великою и рукою твоею крепкою:

11 молю, Господи, да будет ухо твое внемлющее на молитву раба твоего и на молитву рабов твоих хотящих боятися имене твоего: и благопоспеши убо рабу твоему днесь, и даждь его в щедроты пред мужем сим. И аз бых виночерпчий царев.
2

1 И бысть в месяце нисане лета двадесятаго артаксеркса царя, и вино бе предо мною: и взях вино и дах царю, и не бе ин пред ним.

2 И рече ми царь: чесо ради лице твое прискорбно есть, а неси болезнуяй? и несть сие, разве скорбь сердца. И убояхся зело

3 и рекох царю: царю, во веки живи: како не быти прискорбну лицу моему, понеже град, дом гробов отец моих опусте, и врата его сожжена суть огнем.

4 И рече ми царь: почто о сем ты вопрошаеши? И помолихся Господу Богу небесному

5 и рекох ко царю: аще царю видится благо, и аще угоден будет раб твой пред тобою, да послеши мене во иудею, во град гробов отец моих, и возсозижду его.

6 Рече же ми царь, и наложница седяше близ его: до коего времене будет путь твой, и когда возвратишися? И угодно бысть пред лицем царевым, и посла мя, и положих ему время.

7 И рекох царю: аще царю видится благо, даждь мне послание ко воеводам стран за рекою, да преведут мене, дондеже прииду во иудею,

8 и послание ко асафу стражу дубравы царевы, да даст ми древа покрыти врата столпа дому, и на стены градныхя, и на дом, в оньже вниду. И даде ми царь, якоже рука Божия благая (бе) со мною.

9 И приидох ко воеводам стран за рекою и дах им послание царево: посла же царь со мною началники силы и конницы.

10 И услыша санаваллат аронитин и товиа раб аммонитин, и зло има бысть, яко прииде человек взыскати блага сыновом израилевым.

11 И приидох во Иерусалим и бых ту три дни.

12 И востах нощию аз и мужие не мнози со мною, и ни комуже возвестих, что Бог дает в сердце мое сотворити со израилем, и скота не бе со мною, токмо скот, на немже аз седях.

13 И внидох во врата юдоли нощию, ко устию источника смоковничнаго и ко вратом гнойным, и бых размышляя о стене Иерусалимстей разореней и о вратах его пояденых огнем.

14 И приидох ко вратом источника и ко купели цареве, и не бысть места скоту, на немже седях, да пройдет.

15 И взыдох на стену потока нощию, и размышлях о стене, и бех во вратех юдоли, и возвратихся.

16 Стрегущии же не ведяху, камо ходих и что аз творю, и иудеом и священником, и честным и воеводам и прочым творящым дела даже до тогда не сказах.

17 И рекох им: вы видите озлобление сие, в немже есмы, како Иерусалим опустошен, и врата его предана огню: приидите, и созиждем стены Иерусалима, и не будем ктому в поношение.

18 И сказах им руку Божию, яже есть блага со мною, и словеса царева, яже глагола мне, и рекох: востанем и созиждем. И укрепишася руцы их во благое.

19 И услыша санаваллат аронитин и товиа раб аммонитин и гисам аравитин, и посмеяшася нам, и приидоша к нам, и уничижиша, и рекоша: что дело сие, еже вы творите? еда вы противу царя отметаетеся?

20 И воздах им слово и рекох к ним: Бог небесе, той благопоспешит нам, и мы раби его чистии, (востанем) и созиждем: вам же несть части и правды и памяти во Иерусалиме.
3

1 И воста елиасув священник великий и братия его священницы, и создаша врата овчая: сии освятиша их и поставиша двери их и даже до столпа ста лакот освятиша их, даже до столпа анамеиля.

2 И близ его созидаша мужие иерихонстии, и близ их созида закхур сын аманиин.

3 Врата же рыбная созидаша сынове асанаевы: сии покрыша их и поставиша двери их и заворы их и вереи их.

4 И близ их созидаше из рамофы сын уриин, сына аккосова: и близ его созидаше мосоллам сын варахиин, сына мазевиля: и близ их созидаше садок сын ваанаев:

5 и близ их созидаша фекоими, сильнии же их не положиша выи своея в дело Господа Бога своего.

6 И врата старая созидаше иоида сын фасеков и месуллам сын васодиев: тии покрыста их и постависта двери их и заворы и вереи их.

7 И близ их созидаша малтиа гаваонитин и еварон миронофит, мужие от гаваона и масфы, даже до престола князя (иже бысть) об он пол реки.

8 И близ его созида озиил сын арахиев златарь: и близ его созида ананиа сын рокеима, и возставиша Иерусалим даже до стены широкия.

9 И близ их созидаше рафаиа сын сурин, началник половины окрестныя страны Иерусалимли.

10 И близ их созидаше иедеа сын еромафов, и противу дому его: и близ его созида аттуф сын асаваниин.

11 И вторую часть созидаше мелхиа сын ирамов и асув сын фааф-моавль, и даже до столпа пещнаго.

12 И близ его созидаше саллум сын аллоисов, началник половины страны окрестныя Иерусалимли, той и дщери его.

13 Врата юдоли созидаша анун и обитающии в заноне: тии создаша их и поставиша двери их и заворы их и вереи их, и тысяща лакот в стене даже до врат гнойных.

14 И врата гнойная созидаше мелхиа сын рихавль, началник окрестныя страны вифакрамския, той и сынове его, и покрыша их и поставиша двери их и заворы их и вереи их.

15 И врата источника созидаше соломон сын халезеов, началник страны масфы: той созда их и покры их, и постави двери их и заворы их и вереи их, и стену купели силоамли ко вертограду цареву и даже до степеней низходящих от града давидова.

16 По немже созидаше неемиа сын завухов, началник половины страны вифсуровы, даже до вертограда гроба давидова и даже до купели устроеныя и даже до дому сильных.

17 По нем созидаша левити, раум сын ванаимль: по нем созидаше асавиа, началник половины страны кеилы на стране своей,

18 и по нем созидаша братия их, веней сын инададов, началник половины окрестныя страны кеилы.

19 И созидаше близ его азур сын иисусов, началник масфы, меру вторую столпа восхода касающагося углу.

20 И по нем созидаше варух, сын завуев, меру вторую от угла даже до врат дому елиасува священника великаго.

21 По нем созидаше мерамоф сын урии, сына аккосова, меру вторую от врат дому елиасувова даже до конца дому елиасувова.

22 И по нем созидаша священницы, мужие от поля (иорданска).

23 И по нем созидаста вениамин и асув противу домов своих: и по нем созидаше азариа сын маасиев, сына ананиина, близ дому своего.

24 По нем созидаше ваней сын ададов меру вторую от дому азарии даже до угла и даже до уклонения.

25 Фалах сын узаин противу угла и столпа возвышенаго из дому царева высоко, иже во дворе темничнем: и по нем фадаиа сын форосов.

26 И нафиними обиташа во офале, даже до вертограда врат водных ко востоком и даже до столпа, иже бе возвышен.

27 И по них созидаша фекоими меру вторую от страны столпа великаго и высокаго даже до стены офлы.

28 Вышше врат конских созидаша священницы, един кийждо противу дому своего.

29 И по нем созидаше саддук сын еммирь противу дому своего: и по нем созидаше самаиа сын сехениев, страж врат восточных.

30 По нем созидаше ананиа сын селемиев и аном сын селефов шестый меру вторую: по нем созидаше месуллам сын варахиев противу сокровищницы своея.

31 По нем созидаше мелхиа сын сарефиев даже до дому нафинимля и щиты продающих, противу врат судных, и даже до горницы угла.

32 И посреде врат овчих созидаша ковачи и щитопродавцы.
4

1 И бысть егда услыша санаваллат, яко мы созидаем стены, и зло ему вменися, и разгневася зело, и посмеяшеся иудеом,

2 и рече пред братиею своею, иже бяху сила соморов, и рече: что иудее сии созидают свой град? еда жрети будут? или возмогут? или днесь изцелят камение, повнегда быти им в прах земли сожженным?

3 И товиа амманитянин близ его прииде и рече им: еда пожрут, или ясти имут на месте своем? не взыдет ли лисица и разорит стену каменей их?

4 И рече неемиа: услыши, Боже наш, яко сотворени есмы в посмеяние,

5 и обрати поношение их на главу их, и даждь их в посмеяние в землю пленения,

6 и не покрый беззакония их.

7 Бысть же егда услыша санаваллат и товиа, и аравляне и амманите, яко взыде отрасль стен Иерусалимских, зане начаша разселины заграждати, и зло им явися зело.

8 И собрашася вси вкупе, да приидут и ополчатся на Иерусалим и разорят его.

9 И молихомся ко Богу нашему и поставихом стражы на стене противу их день и нощь от лица их.

10 Рече же иуда: истомлена есть сила (от) враг, и земля многа есть, и мы не можем созидати стены.

11 И рекоша оскорбляющии нас: не познают и не увидят, дондеже приидем посреде их и убием их, и престати сотворим делу.

12 И бысть егда приидоша иудее, иже обитаху близ их, и реша нам: восходят от всех язык на ны.

13 И поставих в нижайших местех созади стен в закровении, и поставих люди по племеном с мечи их и с сулицами их и с луками.

14 И видех, и востах, и рекох ко честным и к воеводам и ко прочым людем: не убойтеся от лица их, помяните Господа Бога нашего великаго и страшнаго, и ополчитеся за братию вашу, за сыны вашя и дщери вашя, жены вашя и домы вашя.

15 Бысть же егда услышаша врази наши, яко ведомо бысть нам, и разори Бог совет их: и возвратихомся вси мы на стены, кийждо ко делу своему.

16 И бысть от дне того, пол вчиненых делаху дело, и половина их уготована бысть ко брани с сулицами и щитами, и луки и бронями, и началницы созади всего дому иудина.

17 Созидающии стену и носящии бремена со оружием: единою рукою своею творяху дело, а другою держаху мечь.

18 Созидающым же единому коемуждо мечь бысть опоясан при бедре его, и созидаху, и трубяху трубами близ их.

19 И рекох ко честным и ко старейшинам и ко прочым людем: дело велико есть и пространно, и мы разлучени есмы на стене далече кийждо от брата своего:

20 на месте идеже услышите глас трубный, тамо тецыте к нам, и Бог наш ополчится о нас.

21 И мы быхом творяще дело, и пол нас держаху сулицы от восхода зари утренния даже до восхода звезд.

22 Во время же то рекох людем: кийждо со отроком своим да пребывает в среде Иерусалима: и будет вам нощь на стражу, а день на делание.

23 Аз же и братия мои и отроцы и мужие стражи, иже бяху созади мене, не снимахом одеяний наших тамо ни един от нас.
5

1 И бысть вопль людий и жен их велик на братию свою иудеи.

2 И быша нецыи глаголюще: сынове наши и дщери нашя мнози суть нам, и да возмем (за цену) пшеницу и ядим и живи будем.

3 И быша нецыи глаголюще: села наша и винограды нашя и домы нашя мы да дадим в залог, и возмем пшеницу, и ясти будем.

4 И быша нецыи глаголюще: взаим взяхом сребро на дани царевы, дадим села наша и винограды нашя и домы нашя:

5 и ныне якоже плоть братий наших, плоть наша, якоже сынове их, сынове наши: и се, мы порабощаем сыны нашя и дщери нашя в рабы, и суть от дщерей наших порабощены, и несть силы в руках наших (откупити) и села наша и винограды нашя у вельмож.

6 И оскорбех зело, егда услышах вопль их и словеса сия.

7 И усоветова сердце мое во мне, и воспретих державным и началным и рекох им: лихвы ли кийждо от брата своего истяжет, юже вы истязуете? и собрах противу им собрание велико

8 и рекох им: мы искупихом братию нашу иудеов, проданых языком, по силе нашей: вы же продасте братию вашу, и отдадутся нам? И умолчаша, и не обретоша что отвещати.

9 И рекох: не добро дело, еже вы творите: тако не во страсе Бога нашего (ходяще) убежите ли от поношения языков врагов наших?

10 и аз и братия моя и знаемии мои взаим дахом им пенязи и пшеницу: оставим убо лихоимство сие:

11 возвратите же им днесь села их и винограды их и маслины их и домы их, и от сребра пшеницу и вино и елей отдадите им.

12 И рекоша: отдадим и от них не взыщем, тако сотворим, якоже ты глаголеши. И призвах священников и заклях их сотворити по словеси сему.

13 И отрясох одежду мою и рекох: тако да истрясет Бог всякаго мужа, иже не исполнит слова сего, от дому его и от трудов его, и да будет тако оттрясен и тощь. И рече все множество: аминь. И восхвалиша Бога. И сотвориша людие по глаголу сему.

14 От дне того, в оньже повеле (царь) мне быти вождем их в земли иудине, от лета двадесятаго и даже до лета тридесять втораго артаксеркса царя, лет дванадесять, аз и братия моя оброку их не ядохом.

15 И оброков первых, имиже прежде мене отягчиша их, и прияша от них в хлебе и в вине, по сих сребра (на всяк день) дидрахм четыредесять: и служебницы их обладаша людьми. Аз же не сотворих тако ради страха Божия.

16 И в деле стены сия созидах: и села не стяжах, и вси отроцы мои собрани бяху тамо на дело.

17 Иудей же и началников сто пятьдесят мужей, и приходящии к нам от язык, иже окрест нас, при трапезе моей.

18 И бе уготовано мне на всяк день: телец един и овец шесть избранных и козел быша мне (и птицы), и между десяти дний всем вина много: и с сими хлеба господству моему не взысках, зане тяжка работа на людех сих.

19 Помяни мя, Боже мой, во благо по всем, елика сотворих людем сим.
6

1 Бысть же егда услыша санаваллат и товиа и гисам аравийский и прочии врази наши, яко создах стену, и не остася в них скважня: и аз даже до времене онаго дверий не поставих во вратех:

2 и посла санаваллат и гисам ко мне, глаголюща: прииди, и соберемся вкупе в весех на поли оно (глаголемем). Тии же помышляста мне сотворити злое.

3 И послах к нима послов, глаголя: дело велико аз творю и не могу снити, да не престанет дело: егда же совершу е, взыду к вама.

4 И посласта ко мне, якоже глагол сей, четырижды, и послах к нима по сим.

5 И присла ко мне санаваллат пятое отрока своего, и послание отверсто в руку его, и бе написано в нем:

6 во языцех услышано есть, и гисам рече, яко ты и иудее мыслите отступити, сего ради ты созидаеши стену, и ты да будеши им в царя:

7 и к сим пророки поставил еси себе, да будеши во Иерусалиме царем над иудою: и ныне возвестятся царю словеса сия: и сего ради ныне прииди, да сотворима совет вкупе.

8 И послах к нему, глаголя: не сотворися по словесем сим, якоже ты глаголеши, зане от сердца твоего ты лжеши в сих:

9 яко вси страшат нас, глаголюще: ослабеют руцы их от дела сего, и не сотворится: и ныне укрепих руки моя.

10 И аз внидох в дом семеа сына далаиева, сына метавеилева, и той заключен, и рече: да соберемся в дом Божий посреде его и заключим двери его, яко приходят нощию, да убиют тя.

11 И рекох: кто есть муж, яков аз, и убежит? или кто яко аз, иже внидет в дом, и жив будет? не вниду.

12 И уразумех, и се, Бог не посла его: яко пророчествова слово на мя.

13 И товиа и санаваллат наяста на мя народ, да устрашуся, и сотворю тако, и согрешу, и да буду им во имя зло, яко да поносят ми.

14 Помяни, Боже, товию и санаваллата по делом их сим, и ноадиа пророка и прочих пророк, иже страшаху мя.

15 И совершися стена в двадесять пятый месяца елула в пятьдесят и два дни.

16 И бысть егда услышаша вси врази наши, и убояшася вси языцы, иже окрест нас, и нападе страх велик пред очи их, и познаша, яко от Господа Бога нашего совершено бысть дело сие.

17 И во дни оны от многих державных иудиных послания прихождаху к товии, и товиина (послания) прихождаху к ним.

18 Мнози бо во иудеи кляшася ему, яко зять бе сехении сына ираева: и ионафан сын его поя дщерь месулама сына варахиина в жену.

19 И словеса его быша глаголющии ко мне, и словеса моя быша износящии ему. И послание посла товиа, да устрашит мене.
7

1 И бысть егда создася стена, и поставих двери, и сочтох придверники и певцы и левиты:

2 и повелех анании брату моему и анании началнику дому, иже во Иерусалиме: той бо бе яко муж истинен и бояйся Бога паче прочих:

3 и рекох има: да не отверзутся врата Иерусалимская, дондеже взыдет солнце: и еще им бдящым, да заключатся врата и засунута да будут засовами: и постави стражы от обитающих во Иерусалиме, кийждо во стражи своей и кийждо противу дому своего.

4 Град же бысть широк и велик, и людий мало в нем, и не бяху домы создани.

5 И даде Бог в сердце мое, и собрах честных и князей и народ в собрание: и обретох книгу сочисления тех, иже взыдоша первее, и обретох написано в ней:

6 и тии сынове страны возшедшии от пленения преселения, ихже пресели навуходоносор царь вавилонский, и возвратишася во Иерусалим и иудею, кийждо муж во град свой,

7 с зоровавелем и иисусом и неемиею, азариа и веелма, наеман, мардохей, ваасан, маасфараф, ездра, вогуиа, инаум, ваана, масфар, мужие людий израилевых:

8 сынове форосовы две тысящы сто седмьдесят два,

9 сынове сафатиевы триста седмьдесят два,

10 сынове ираевы шесть сот пятьдесят два,

11 сынове фааф-моавли сынов иисусовых и иоавлих две тысящы шесть сот и осмьнадесять,

12 сынове еламовы тысяща двести пятьдесят четыри,

13 сынове соффуевы осмь сот четыредесять пять,

14 сынове заханевы седмь сот шестьдесят,

15 сынове вануиевы шесть сот четыредесять осмь,

16 сынове вереиевы шесть сот двадесять осмь,

17 сынове гетадовы две тысящы триста двадесять два,

18 сынове адоникамли шесть сот шестьдесят седмь,

19 сынове вагуиевы две тысящы шестьдесят седмь,

20 сынове идини шесть сот пятьдесят четыри,

21 сынове атировы и сынове езекиевы девятьдесят осмь,

22 сынове исамиевы триста двадесять осмь,

23 сынове васеиевы триста двадесять четыри,

24 сынове арифовы сто дванадесять, сынове асеновы двести двадесять три,

25 сынове гаваони девятьдесят пять,

26 сынове вефалеимли сто двадесять три, сынове атофовы пятьдесят шесть,

27 сынове анафофовы сто двадесять осмь,

28 сынове азамофовы, мужие вифовы, четыредесять два,

29 мужие кариафиаримли, кафировы и вирофовы седмь сот четыредесять три,

30 мужие арама и гаваа шесть сот двадесять един,

31 мужие махимасовы сто двадесять два,

32 мужие вефили и аиевы сто двадесять три, мужие анавиа другаго сто пятьдесят два,

33 сынове мегевосовы сто пятьдесят шесть,

34 мужие иламаевы тысяща двести пятьдесят два,

35 сынове ирамли триста двадесять,

36 сынове иериховы триста четыредесять пять,

37 сынове лодовы, адидовы и оновы седмь сот двадесять един,

38 сынове ананини три тысящы девять сот тридесять:

39 священницы, сынове иодаевы в дому иисусове девять сот седмьдесят три,

40 сынове еммировы тысяща пятьдесят два,

41 сынове фассеуровы тысяща двести четыредесять седмь,

42 сынове ирамовы тысяща седмьнадесять:

43 левити, сынове иисуса кадмиильскаго от сынов удуилих седмьдесят четыри:

44 певцы, сынове асафовы сто двадесять осмь:

45 дверницы сынове селлумли,

46 сынове атировы, сынове телмони, сынове аккувовы, сынове атитовы, сынове савиины сто тридесять осмь:

47 нафиними, сынове илаевы, сынове асефовы, сынове заваофовы,

48 сынове кирасовы, сынове сисаины, сынове фадони, сынове лавани, сынове агавовы, сынове акувовы,

49 сынове утаевы, сынове китаровы, сынове гавовы, сынове селмеини, сынове анановы,

50 сынове садеины, сынове гааровы, сынове рааиины,

51 сынове раасони, сынове некодовы,

52 сынове гизамли, сынове озины, сынове фессовы,

53 сынове висиины, сынове меиноновы, сынове нефосаины,

54 сынове ваквуковы, сынове ахифовы, сынове арурины,

55 сынове васалофовы, сынове мидаевы, сынове адасани,

56 сынове варкуевы, сынове сисарафовы, сынове фимаевы,

57 сынове нисиины, сынове атифовы: сынове рабов соломоновых,

58 сынове сутеины, сынове сафаратовы, сынове феридины,

59 сынове лелилины, сынове доркони, сынове гадаили, сынове фарахасовы,

60 сынове саваини, сынове иммини:

61 вси нафиними и сынове слуг соломоновых триста девятьдесят два.

62 И сии взыдоша от фелмефа, феласар, харув, ирон, иемир, и не могоша сказати домов отечеств своих и семене своего, от израиля ли быша:

63 сынове далеаевы, сынове вуаевы, сынове товиины, сынове некодаевы, шесть сот четыредесять два:

64 и от священник сынове авиевы, сынове аккосовы, сынове верзеллаины, яко пояша от дщерей верзеллаа галаадитина жены и прозвашася по имени их.

65 Сии искаша писания своего родословия, и не обретоша, и извержени суть от священства.

66 Рече же аферсафа им, да не ядят от святая святых, дондеже востанет священник изявляяй.

67 И бысть весь собор единодушно аки четыредесять две тысящы триста шестьдесят,

68 кроме рабов их и рабынь их, ихже бяху седмь тысящ триста тридесять седмь: и певцы и певницы двести тридесять шесть.

69 Кони (их) седмь сот тридесять шесть, мски их двести четыредесять пять, велблюды их четыре ста тридесять пять, ослы их шесть тысящ седмь сот двадесять.

70 И от части началников отечеств даша в дело аферсафе, даша в сокровище златых тысящу, фиал пятьдесят и риз жреческих тридесять.

71 И от началников отечеств даша в сокровище дела злата драхм двадесять тысящ и сребра мнас две тысящы и триста.

72 И даша прочии людие злата драхм двадесять тысящ и сребра мнас две тысящы и двести, и риз священнических шестьдесят седмь.

73 И седоша священницы и левити и дверницы и певцы и прочий народ и нафиними и весь израиль во градех своих.
8

1 И прииде месяц седмый, сынове же израилевы бяху во градех своих: и собрашася вси людие яко муж един на пространство, еже пред враты водными, и рекоша ездре писарю, да принесет книгу закона моисеова, егоже заповеда Господь израилю.

2 И принесе ездра священник закон пред множество от мужей даже до жен, и всем, иже можаху разумети слышаще, в день первый месяца седмаго,

3 и чте в нем (явно на пространстве, еже пред враты водными), от утра даже до полудне, пред мужи и женами, и сии бяху разумеюще, и уши всех людий ко книзе закона.

4 И ста ездра писец на степени древянем, егоже сотвориша к народовещанию, и сташа близ его матфафиа и самеа, и ананиа и уриа, и хелкиа и маасиа одесную его, ошуюю же фадаиа и мисаил, и мелхиа и осам, и асавадма и захариа и месоллам.

5 И разгну ездра книгу пред всеми людьми, яко той бе над людьми, и бысть егда разгибаше ю, сташа вси людие.

6 И благослови ездра Господа Бога великаго, и отвещаша вси людие и реша аминь, воздвигше руце свои, и преклонишася и поклонишася Господеви лицем на землю.

7 Иисус же и ванаиа и саравиа, акан, саватей, камптас, азариа, иозавадан, анифанес и левити бяху вразумляюще людий в законе: людие же стояху на стоянии своем.

8 И чтоша в книзе закона Божия, и поучаше ездра и изясняше ко разумению Господню, и разумеша людие чтение.

9 Рече же неемиа и ездра священник и писец, и левити и толкующии людем, и реша всем людем: день свят есть Господу Богу нашему, не рыдайте и не плачите. Понеже плакаша вси людие, егда услышаша словеса закона.

10 И рече им: идите и ядите тучная и пийте сладкая, и послите части не имущым, яко свят есть день Господеви нашему, и не печалитеся, ибо радость Господня сия есть сила наша.

11 Левити же молчание творяху во всех людех, глаголюще: молчите, яко день свят есть, и не тужите.

12 И отидоша вси людие ясти и пити, и послати части, и сотворити веселие велико, яко разумеша словеса, имже научиша их.

13 И в день вторый собрашася князие отечеств со всеми людьми, священницы и левити ко ездре писцу, да протолкует всем словеса законная.

14 И обретоша писано в законе, егоже заповеда Господь рукою моисеовою, да обитают сынове израилевы в кущах в праздник месяца седмаго,

15 и да проповедят трубами во всех градех их и во Иерусалиме. И рече ездра: изыдите на гору, и принесите ветви масличны, и ветви древес кипарисных, и ветви мирсинныя, и ветви финиковы, и ветви древес дубравных, сотворити кущы по писаному.

16 И изыдоша людие, и принесоша, и сотвориша себе кущы кийждо на крове своем и во дворех своих, и во дворех дому Божия и на пространстве врат водных и на пространстве врат ефремлих.

17 И сотвориша весь сонм возвративыйся от пленения кущы, и седоша в кущах, яко не сотвориша от дний иисуса сына навина тако сынове израилевы даже до дне того. И бысть веселие велико.

18 И читаху в книзе закона Божия на всяк день, от дне перваго даже до дне последняго. И сотвориша праздник седмь дний, и в день осмый собрание по обычаю.
9

1 В день же двадесять четвертый месяца сего собрашася сынове израилевы в посте и во вретищих, и персть на главах их.

2 И отлучишася сынове израилевы от всякаго сына чужда, и исповедаху грехи своя и беззакония отец своих.

3 И сташа на стоянии своем и чтоша в книзе закона Господа Бога своего четверицею в день, и бяху исповедающеся Господеви и покланяющеся Господу Богу своему.

4 И сташа на степени левитов иисус и сынове кадмиили, саханиа сын саравиин, сынове ханани, и возопиша гласом великим ко Господу Богу своему,

5 и рекоша левити, иисус и кадмиил: востаните, благословите Господа Бога нашего от века даже до века: и благословят имя славы твоея, и вознесут во всяцем благословении и хвале.

6 И рече ездра: ты еси сам Господь един, ты сотворил еси небо и небо небесе и вся вои их, землю и вся, елика на ней суть, моря и вся, яже в них, и ты оживляеши вся, и вои небеснии покланяются тебе:

7 ты еси Господь Бог, ты избрал еси аврама и извел еси его от страны халдейския, и положил еси имя ему авраам,

8 и обрел еси сердце его верно пред тобою, и завещал еси с ним завет дати ему землю хананейску и хеттейску, и аморрейску и ферезейску, и иевусейску и гергесейску, и семени его: и утвердил еси словеса твоя, яко праведен еси:

9 и видел еси озлобление отец наших во египте, и вопль их услышал еси на мори чермнем,

10 и дал еси знамения и чудеса во египте на фараона и на вся рабы его и на вся люди земли его: познал бо еси, яко возгордешася на них, и сотворил еси себе имя, якоже день сей:

11 и море расторгл еси пред ними, и проидоша посреде моря по суху, и гонители их ввергл еси в глубину, яко камень в воде зелней:

12 и в столпе облачне водил еси их во дни и в столпе огненне в нощи, еже осветити им путь, по немуже идоша:

13 и на гору синайскую сшел еси, и глаголал еси к ним с небесе, и дал еси им судбы правы и закон истинный, повеления и заповеди благи:

14 и субботу святую твою явил еси им, заповеди, повеления и закон повелел еси им рукою моисеа раба твоего:

15 хлеб же с небесе дал еси им во алчбе их в пищу им, и воду из камене извел еси им в жажди их, и рекл еси им, да внидут и наследят землю, на нюже простерл еси руку твою дати им:

16 тии же и отцы наши возгордешася и ожесточиша выя своя и не послушаша заповедий твоих,

17 и не восхотеша слышати, и не воспомянуша чудес твоих, яже сотворил еси им: и ожесточиша выю свою, и даша начало возвратитися на работу свою во египет: ты же, Боже, милостив и щедр, долготерпелив и многомилостив, и не оставил еси их:

18 еще же сотвориша себе и телца слияна и рекоша: сии бози изведоша нас из египта: и сотвориша раздражения велия:

19 ты же в щедротах твоих многих не оставил еси их в пустыни, столп облачный не уклонил еси от них во дни, еже наставити их на путь, и столп огненный в нощи, еже осветити им путь по немуже идоша,

20 и дух твой благ дал еси, еже научити их, и манны твоея не лишил еси от уст их, и воду дал еси им в жажди их,

21 и четыредесять лет препитал еси их в пустыни, ничтоже им оскуде: одеяния их не состарешася, и сапози их не раздрашася:

22 и дал еси им царства, и люди разделил еси им, и наследиша землю сиона царя есевонска и землю ога царя васанска:

23 и умножил еси сыны их яко звезды небесныя, и ввел еси их в землю, о нейже глаголал еси отцем их внити и наследити ю:

24 (и внидоша сынове их) и наследиша землю: и сокрушил еси пред ними обитающих в земли хананейстей, и дал еси их в руку их, и цари их и люди земли, да сотворят им якоже угодно пред ними:

25 и взяша грады высокия, и одержаша домы полны всех благих, кладязи ограждены камением, винограды и маслины и всяко древо снедное во множество, и ядоша и насытишася, и утолстеша и разширишася во благости твоей велицей:

26 и изменишася и отступиша от тебе, и повергоша закон твой созади плоти своея, и пророки твоя избиша, иже засвидетелствоваху им, да обратятся к тебе, и сотвориша хулы велики:

27 и дал еси их в руку оскорбляющих я, и озлобиша их: и во бремя печали своея возопиша к тебе, и ты с небесе твоего услышал еси, и по щедротам твоим многим дал еси им спасителей, и спасл еси их от рук враг их:

28 и егда упокоишася, возвратишася сотворити лукавое пред тобою: и оставил еси их в руках враг их, и обладаша ими: и паки возопиша к тебе, ты же от небесе услышал еси, и избавил еси их в щедротах твоих мнозех,

29 и засвидетелствовал еси им, да обратятся к закону твоему: они же возгордешася и не послушаша, но в заповедех твоих и в судбах твоих согрешиша, яже сотворив человек жив будет в них: и даша плещы непокоривыя, и выю свою ожесточиша, и не послушаша:

30 и продолжил еси на них лета многа, и засвидетелствовал еси им духом твоим и рукою пророк твоих, и не вняша, и предал еси их в руку людий земных:

31 в милосердиих же твоих многих не сотворил еси их в скончание, ниже оставил еси их, яко Бог силен еси и милостив и щедр:

32 и ныне, Боже наш крепкий, великий, державный и страшный, храняй завет твой и милость твою, да не явится мал пред тобою всяк труд, иже обрете нас и цари нашя, и началники нашя и священники нашя, и пророки нашя и отцы нашя и вся люди твоя, от дний царей ассурских и даже до дне сего:

33 и ты праведен во всех, яже приидоша на нас, яко истину сотворил еси, мы же согрешихом:

34 и царие наши и началницы наши, и священницы наши и отцы наши не сотвориша закона твоего и не внимаша повелением твоим и свидением твоим, имиже засвидетелствовал еси им,

35 и тии во Царствии твоем и во благостыни твоей мнозе, юже дал еси им, и в земли широцей и тучней, юже дал еси пред ними, не послужиша тебе и не отвратишася от начинаний своих лукавых:

36 се, мы днесь есмы раби, и земля, юже дал еси отцем нашым ясти плод ея и благая ея, се, есмы раби на ней:

37 и плоды ея мнози царем, имже предал еси нас за грехи нашя, и телесы нашими владычествуют и скоты нашими, якоже угодно им, и в печали велицей есмы:

38 и во всех сих мы полагаем завет верен и пишем, и печатают вси началницы наши, левити наши и священницы наши.
10

1 И в печатлеющих быша сии: неемиа артасаста сын ахалиев и седекиа

2 сын араиев, и азариа и иеремиа,

3 фасур, амариа, мелхиа,

4 аттус, севаниа, маллух,

5 ирам, мерамоф, авдиа,

6 даниил, ганафон, варух,

7 месуллам, авиа, миамин,

8 маазиа, велгаи, самаиа: сии священницы.

9 Левити же: иисус сын азариин, ваней от сынов инададовых, кадмиил

10 и братия его саваниа, одуиа, калитан, фелиа, анан,

11 миха, роов, асевиа,

12 закхор, саравиа, севаниа,

13 одуа, сынове вануини.

14 Началницы людий: форос, фааф-моав, илам, зафуиа,

15 сынове ванниины азгад, вивай,

16 ананиа, вагой, идин,

17 атир, езекиа, азур,

18 одувиа, исам, висий,

19 ариф, анафоф, новай,

20 мегафис, месуллам, изир,

21 месозевил, садук, иеддуа,

22 фалтиа, анан, анаиа,

23 осиа, ананиа, асув,

24 адой, фалаа, совик,

25 раум, ессавана, маасиа

26 и аиа, енан, инам,

27 малух, ирам, ваана.

28 И прочии от людий, священницы, левити, дверницы, певцы, нафиними и всяк приходяй от людий земских ко закону Божию, жены их, сынове их, дщери их, всяк ведяй и разумеяй,

29 укрепляхуся над братиею своею, и заклинаша их, и внидоша в клятву и в роту, еже ходити в законе Божии, иже дан есть рукою моисеа раба Божия, да сотворят и сохранят вся заповеди Господни и судбы его и повеления его,

30 и еже не дати дщерей наших людем земским, и дщерей их не возмем сыновом нашым:

31 людие же земли носящии продаемая и вся купуемая во дни субботы продавати, не купим от них в субботы, ни в день святый: и оставим лето седмое, и даяние всех рук.

32 И поставим над нами заповедь даяти нам третию часть дидрахмы на лето, на дело дому Бога нашего,

33 на хлебы предложения и на жертвы повседневныя, и во всесожжение присное суббот, новомесячий, в праздники и во святая, и яже о гресех, помолитися за израиля, и на дела дому Бога нашего.

34 И жребий метнухом о ношении древес, священницы и левити и людие, носити в дом Бога нашего, по домом отечеств наших, от времене до времене, от лета до лета возжигати на олтари Господу Богу нашему, якоже писано есть в законе,

35 и приносити первородная земли нашея и первородная плода всякаго древа, от лета до лета, в дом Господень,

36 и первенцы сынов наших и скотов наших, якоже писано есть в законе, и первенцы волов наших и стад наших приносити в дом Бога нашего, священником служащым в дому Бога нашего:

37 и начатки жит наших и плод всякаго древа, вина и елеа, приносити будем священником в сокровище дому Божия, и десятину земли нашея левитом, и тии левити десятину приемлют во всех градех дел наших.

38 Будет же священник сын ааронов с левиты в десятинах левитов, и левити имут приносити десятую часть десятины в дом Бога нашего в сокровище дому Божия,

39 яко в сокровища принесут сынове израилевы и сынове левитстии начатки пшеницы и вина и елеа, и тамо (будут) сосуди святии, и священницы и служителие и дверницы и певцы, и не оставим дому Бога нашего.
11

1 И вселишася началницы людий во Иерусалиме, и прочии людие метнуша жребия взяти единаго от десяти, да пребывает во Иерусалиме граде святем, и девять частей во градех.

2 И благословиша людие всех мужей, иже сами произволиша обитати во Иерусалиме.

3 И сии началницы страны, иже обиташа во Иерусалиме: и во градех иудиных обиташе кийждо во одержании своем, во градех своих израилевых, священницы и левити, и нафинее и сынове рабов соломоновых.

4 И во Иерусалиме обиташа от сынов иудиных и от сынов вениаминих. От сынов иудиных афаиа сын озиин, сын захариин, сын самариин, сын сафатиев, сын масеиль и от сынов фаресовых,

5 и маасиа, сын варухов, сын халазов, сын озиев, сын адаиев, сын иоаривль, сын захариев, сын силониев:

6 вси сынове фаресовы, иже обиташа во Иерусалиме, четыреста шестьдесят осмь мужие крепцы.

7 Сии же сынове вениамини: силон сын месулаев, сын иоадов, сын фадаиев, сын колиев, сын маасиев, сын ефииль, сын иессиев,

8 и по нем гевеил, силиев, девять сот двадесять осмь.

9 И иоиль сын зехрин настоятель над ними, и иуда сын асанаев, от града, вторый.

10 От священников: и иадиа сын иоаривль, иахинь,

11 сареа сын елхиев, сын месуламов, сын саддуков, сын мариофов, сын етофов, началник дому Божия,

12 и братия их делающе дело церкве осмь сот двадесять два: и адаиа сын иероамль, сына фалалиина, сына намасова, сына захариина, сына фасефурова, сына мелхиина,

13 и братия его началницы отечеств двести четыредесять два: и амесай сын езрииль, сына сакхиева, сына масаримофова, сына еммирова,

14 и братия его сильнии во бранех сто двадесять осмь: и настоятель их сохриил, сын великих.

15 И от левит: самаиа сын асува, сына езрикама, сына асавии, сына вонни,

16 и саввафей, и иосавад над делами дому Божия внешняго и от началников левитских,

17 и матфаниа, сын михаев, сын зехриев, сына асафова, началник хваления, и иуда молитвы, и вокхиа вторый от братий своих, и авдиа сын самеа сына галелова, сына идифунова:

18 всех левитов во граде святем двести осмьдесят четыре.

19 И дверницы: акув, теламин и братия их, стрегущии врат, сто седмьдесят два.

20 Прочии же от израиля иерее же и левити во всех градех иудеи кийждо в наследии своем.

21 И нафинее, иже обиташа во офле, сиай и гесф от нафинеев.

22 И началник левитов во Иерусалиме озий сын ваниин сына савиева, сына матфаниева, сына михаева, от сынов асафовых поющих над делом дому Божия,

23 яко заповедь царева (бе) им: и пребываше верно над певцами оброк коегождо дне в день свой.

24 И фафеа, сын массизавилов от сынов зариных, сына иудина, при руце цареве всякия потребы ради людий.

25 И при дворех, иже на селех их: и от сынов иудиных обиташа в кариафарвоце и в селех его, и в девоне и в селех его, и в кафсеиле и в селех его,

26 и во иисусе, и в моладе, и в веффалате,

27 и во асерсоале, и в вирсавеи и в селех ея,

28 и в секелаге, и мавне и в селех ея,

29 и в ремаоне, и в саре, и во иеримуфе,

30 и в заннои, и во одолламе и в селех их, и в лахисе и в селех его, и во азике и в селех ея: и ополчишася в вирсавеи даже до дебри еннон.

31 И сынове вениамини от гаваи и магмаса и вефиля и от весей его,

32 и во анафофе, в нове, во ании,

33 во асоре, в раме, в гефаиме,

34 в адоде, в севоиме, в навалате,

35 в лидде и во оногиарасим.

36 И от левитов части иудины и вениамини.
12

1 И сии суть священницы и левити, возшедшии с зоровавелем сыном салафиилевым и иисусом: сараиа, иеремиа, ездра,

2 амариа, малух, аттуй,

3 сехениа, реум, маримоф,

4 адаиа, генафон, авиа,

5 миамин, маадиа, велга,

6 семиа, иоиарив, идиа,

7 салуй, амук хелкиа, одуиа: сии началницы священников и братия их во дни иисуса.

8 И левити: иисус, вануй, кадмиил, саравиа, иодай и матфаниа, при руках той, и братия их в чредныя служения:

9 и ваквакиа и анай, братия их, прямо их во чреды дневныя.

10 Иисус же роди иоакима, иоаким роди елиасива, елиасив роди иодаа,

11 иодай же роди ионафана, и ионафан роди адуа.

12 Во дни же иоакима беху братия его священницы и началницы отечеств: сараии амариа, иеремии ананиа,

13 ездре месуллам, амарии иоанан,

14 амалуху ионафан, сехении иосиф,

15 аресу еднас, мариофу елкей,

16 аддаю захариа, ганафону месуллам,

17 авии зехрий, миамину маадай, фелетию,

18 валгасу самуей, семии ионафан,

19 иоариву матфанай, едию озий,

20 салаию калаиа, амеку авед,

21 елкии асавиа, иедии нафанаил.

22 Левити во дни елиасива, иоада и иоа, и иоанан и идуа, написани началницы отечеств, и священницы в царство дариа персскаго.

23 И сынове левии началницы отечеств писани в книзе словес дний и даже до дний иоанана сына елисуева.

24 И началницы левитом асавиа и саравиа и иисус, и сынове кадмииловы и братия их пред ними в песнех хвалити и исповедовати, по заповеди давида человека Божия, по чредам от дне до дне.

25 Матфаниа и ваквакиа, авдиа, месуллам, телмон, акув, стрегущии дверницы стражу, внегда собрати ми дверники.

26 Во дни иоакима сына иисусова, сына иоседекова, и во дни неемии и ездры священника и книгочии,

27 и во обновлении стены Иерусалимския, взыскаша левитов в местех их да возведут их во Иерусалим сотворити обновление и веселие во хвалении и песнех, в кимвалех и псалтирех и гуслех.

28 И собрашася сынове поющих и от страны окрестныя во Иерусалим, и от сел нетофатиевых,

29 и от дому (галгал) и от стран (гева и азмавет), яко села создаша себе певцы окрест Иерусалима:

30 и очистишася священницы и левити, и очистиша людий и врата и стену.

31 И возведох началников иудиных на стену, и поставих два клироса велика, хвалы ради, и проидоша от десныя страны на стену ко вратом гнойным.

32 И идоша за ними осаиа и половина началников иудиных,

33 и азариа и ездра и месуллам,

34 иуда и вениамин, и самаиа и иеремиа:

35 и от сынов священничих с трубами захариа сын ионафанов, сын самаии, сын мафаниин, сын михаин, сын закхуров, сын асафов,

36 и братия его самаиа и озиил, гелол, маиа, нафанаил и иуда и ананий, еже хвалити в песнех давида человека Божия:

37 и ездра книгочий пред ними при вратех источника, хвалити прямо их. И взыдоша на лествицы града давидова, на восход стены выше дому давидова и даже до врат водных к востоку.

38 И клирос вторый хвалу воздающих идяше сопротив их, и аз по нем, и половина людий по стене, верху столпа фануримля и даже до стены пространнейшия,

39 и на врата ефраима, и на врата старая, и на врата рыбная, и на столп анамеиль, и на столп емаф, и даже до врат овчих.

40 И сташа на вратех стражи, сташа же два клироса хваляща в дому Божии, и аз и половина воевод со мною,

41 и священницы елиаким, маасиа, миамин, михеа, елиона, захариа, ананиа с трубами,

42 и маасиа и семеиа, и елеазар и озиа, и иоанан и мелхиа, и елеамий и иезур. И слышани быша певцы и иезриа, и соглядани, и восхвалиша.

43 И пожроша в день той жертвы великия и возвеселишася, яко Бог возвесели их вельми: и жены их и чада их радовахуся, и слышано бысть веселие то во Иерусалиме издалеча.

44 И поставиша в день той мужей над сокровищными хранилищи, на начатки и десятины, и да собирают сими началниками от градов части священником и левитом, яко веселие бе во иудеи, во священницех и в левитех предстоящих,

45 и стрежаху стражу Бога своего, и хранение очищения, и певцев и дверников, по повелению давида и соломона сына его.

46 Яко во дни давидовы асаф от начала первый в певцех и в песнех и хвалении Богу,

47 и весь израиль во дни зоровавеля и во дни неемии даяху оброк певцем и дверником от дне до дне и освящаху левитом, левити же освящаху сыновом аароним.
13

1 В день той чтено бысть в книзе моисеове во слышание людем, и обретеся написано в ней: да не имут внити амманитяне и моавитяне в церковь Божию даже до века,

2 понеже не сретоша сынов израилевых со хлебом и водою и наяша на них валаама на проклятие их: и обрати Бог наш проклятство на благословение.

3 И бысть егда слышаху закон, и отлучиша всех чуждих от израиля.

4 И прежде сего елиасив священник живяше в сокровищнем дому Бога нашего, сродник товиин,

5 и сотвори ему сокровищный дом велик: таможе бяху прежде приносяще жертву и ливан, и сосуды и десятину пшеницы и вина и елеа, уставленая левитом и певцем и дверником, и начатки священническия.

6 Во всех же сих не бых во Иерусалиме, понеже в лето тридесять второе артаксеркса царя вавилонскаго приидох ко царю: и по скончании дний испросих от царя

7 и приидох во Иерусалим, и уразумех зло, еже сотвори елиасив товии, сотворити ему сокровищный дом во дворе дому Божия,

8 и зло явися ми зело: и извергох вся сосуды дому товиева вон из дому сокровищнаго,

9 и рекох, и очистиша сокровищный дом: и возвратих онамо сосуды дому Божия, жертву и ливан.

10 И познах, яко части левитския не быша даны, и побегоша кийждо на село свое левити и певцы творящии дело.

11 И пряхся со стратигами и рекох: чесо ради оставлен бысть дом Божий? И собрах их и поставих оных во стояниих своих.

12 И весь иуда принесоша десятину пшеницы и вина и елеа в сокровища под руку селемии священника и садока писца и фадаии от левит,

13 и при них анан сын закхуров, сын матфаниев, яко верни искушени суть над ними разделяти братиям своим.

14 Помяни мя, Боже, того ради, и да не погибнет милость моя, юже сотворих в дому Господа Бога моего и в чинех его.

15 Во днех тех видех во иуде топчущих точило в субботу, и носящих снопы, и возлагающих на ослы и вино, и гроздие, и смоквы, и всякое бремя, и носящих во Иерусалим во дни субботныя: и засвидетелствовах им в день продаяния их.

16 И тиряне обиташа в нем приносяще рыбы, и вся продаемая продающе в субботы сыновом иудиным и во Иерусалиме.

17 И обличих сынов иудиных свободных и рекох им: что сия вещь злая, юже вы творите, и скверните день субботный?

18 не сия ли сотвориша отцы ваши, и наведе на них Бог наш и на нас вся злая сия, и на град сей, и вы прилагаете гнев на израиля, скверняще субботу?

19 Бысть же егда поставишася врата во Иерусалиме прежде субботы, и рекох, и запроша двери и повелех, да не отверзают их даже по субботе: и от отрок моих поставих над враты, да ни един вносит бремя в день субботный.

20 И сташа вси и творяху куплю вне Иерусалима единощи и дващи.

21 И засвидетелствовах о них и рекох им: что вы пребываете пред стеною? аще вторицею сие сотворите, простру руку мою на вас. И от времене того не приидоша в субботу.

22 И рекох левитом, иже бяху очищени, дабы приходили хранити врат и святити день субботный. И сих ради помяни мя, Боже, и прости ми по множеству милости твоея.

23 И во днех онех видех иудеев поемших жены азотския, амманитяны, моавитския,

24 и сынове их от полу глаголаху азотским языком и не умеяху глаголати иудейски:

25 и запретих им, и проклях их, и поразих от них мужей, и оплеших их, и заклях их Богом, аще дадите дщери вашя сыновом их и аще поймете от дщерей их сыновом вашым и себе:

26 не тако ли согреши соломон царь израилев? и во языцех мнозех не бысть царь подобен ему, и возлюблен Богу бе, и постави его Бог царем над всем израилем, и того прельстиша жены чуждия:

27 и мы послушаем ли вас творити всяко зло сие, согрешити Богу нашему, еже пояти жены иноплеменничи?

28 И от сынов иоада сына ельтува священника великаго, зятя санаваллатова уранитина, и изгнах его от мене.

29 Помяни им, Боже, за осквернение священства и завета священническа и левитска.

30 И очистих их от всякия чуждия нечистоты, и поставих чреды священником и левитом, комуждо по делу его,

31 и даяние древес во временех уставленых и первородных. Помяни мя, Боже наш, во благое.