Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. (Издание Института литературы им. Янки Купалы Национальной академии наук Беларуси).

К оглавлению

МОЛИТВА В СУБОТУ ПО ВЕЧЕРНИ

Господи Иисусе Христе, Сыне Божий и многомилостиве человеколюбче, не хотяй смерти грешником, но всеми образы ведый //220об. ко спасению, ожидаяй покаания, снабдяй по вся дни живота моего, вся благодеяния подаваяй моему недостоинству, милостив бо еси и человеколюбец, плоти нашея общник, в нюже одеяся, человеки обожи и на первое достояние возва, нас ради, за наше спасение на кресте распятся и в гробе полежа, и воскресе в третий день, свободивый держимыя во аде праведных душа! Призри на смирение мое, приими вечера сего моление, еже, недостойный, возсылаю Ти! Яко голубь, неразумием поучаюся, или, яко вран, неподобне //221 зову, не хитростию бо словес возвышаю глас, но, горестию души из глубины воздыхаяй. Тебе преклоняю выю и сердце, Тебе на колене припадаю и руце простираю. Ты бо свеси безумие мое, и прегрешения моя от Тебе не утаишася. Веси немощь естества моего, Зиждителю //221об. мой! Да что сотворю на угождение Твое, или что воздам вечныя жизни Подателю? Ничтоже имам, на неже благоволит Дух Твой. Но не прогневайся на мя, много зла сотворшаго пред Тобою, ни отрини мене от Твоего лица, неопасен язык имущаго, ни удержи //222 щедрот Твоих от раба Твоего, без Твоея бо помощи ничтоже могу творити! Дерзаю умом безпрестани Тебе молитися, а мыслию разслабеваю, ни часа молитве оставих, духом желаю день и нощь Тебе предстояти, телом низпадаю в тине злодеяний моих. Но, Господи, Господи Боже мой! //222об. от небытия в бытие сотворив мя и от юности даже до сего дни снабдевый мя, и ныне помилуй мя и избави душю мою от лести вражия и помыслы, смущающия сердце мое потреби, утверди нозе мои на недвижимом основании - на твердем камени Твоея веры, да не //223 поразит буря греховная телесныя ми храмины! Но буди ми стена от лица вражия и положи страх Твой посреде утробы моея, да отражю долу влекущую мя плотьскую похоть, и укрепи мя всемощною десницею Твоею на невидимыя и видимыя враги, даждь ми последний //223об. час дне сего богобоязненно прейти и на темнаго искусителя вооружитися! Даждь ми Честнаго и Животворящаго креста знамением, егоже вся полки бесовския трепещут и, потщаящеся, отбегают! И даждь телу моему ложе покойно и очима моима сон легок! //224 И да не уснет храняй мя аггел, да наставляем им, полунощныя и утренния молитвы воздам Тебе просвещенным разумом, на всяк день Тебе угождаяй со всеми любящими Тя истинно, с нимиже сподоби мя одесную Тебе стати силою Честнаго Ти Креста и три- //224об. дневнаго воскресениа, молитвами Пречистыя Ти Матере и Владычицы нашея , и святых небесных сил, и святаго Иоанна Предтечи, и святых прехвалных апостол, и всех святых, от века Тебе угодивших, с нимиже и аз, грешный. Тебе славу возсылаю со Отцем и со Святым Духом ныне и присно и во веки //225 веков. Аминь.

___________________

"Молитвенник" XVII в. Рос. нац. библ. (СПб.), Q. 43. Л.97-225. [Эта общая ссылка для этого и еще нескольких произведений в публикации А.А. Мельникова приведена под произведением № 32. Вывод сделан на основе сличения нумерации листов оригиналов, указанной в текстах. - О.Л.]

МОЛИТВА В СУБОТУ ПО ВЕЧЕРНИ

Хвалю Тя, Господи Боже мой, пою и величаю Тя, Господи, и славлю Твою благостыню, благословлю и превозношю Тя, Пресвятый, и хвалю Твое человеколюбие и поклоняюся, славословлю Твое тредневное ввскресение! Яко от брениа рукою мя создав и оживил мя еси Духом Своим, господина всей земли постави мя и яко отец заповеда ми чистоту хранити бескверну: окраден бых советом змииным, не радих, Христе, закона Твоего, срамляюся моего обожения. Яко праведен сый, и предал еси во тление земли разрушитися, от неяже зачахся, и возрастити земли повелел еси терние от сот в печали мне; распространихся и в безакониих моих причтыхся скотем несмысленым. Но вся плоть потопив в водах, мое обличая нечестие, не наказа мене ярость гнева Твоего и не почюх гневающаго Тя, но греха моего безумием возрастих и безаконие мое умножих, и Твое святое имя, Господи, в твари предах. Твое отвергох божество и бездушней твари послужих, и Твое имя святое прогневах, Владыко. Но Ты пакы щедротами Твоими преклоняяся, велик в милосердии еси, не терпе зрети созданиа своего от дьявола мучима, но преклонь небеса человеколюбно, мене ради быв человек от Девы чистыя, якоже писаше в законе Моисей и пророци, оплеван быв и поруган, долготерпеливе, и заушен и на смерть осужен, и на кресте пригвоздитися изволил еси и въкуси смерть, безсмерътный, и воскресе тридневно. Господи, воздвигни мене осуженнаго на славословие, и очисти мя от соблазн моих. И сына славы Твоея сотворил мя еси, и Отца Тя нарицати сподобил мя еси: но пакы преступих заповедь Твою и грехови раб бых. Ты же, Господи, даровал ми еси покоянию время и пакы да слезами моими омыю я. Прииме, Спасе, мое [покаяние] и очисти мя от скверн соблазн моих и поток слезами подаждь ми, да угашю огнь вечный, рыдание и покаание подаждь ми, да избегну будущаго плача; воздыхание и обращение посли ми, да зде плачюся и каюся оного мучениа, и в первое одеание одежи мя, Христе, и в чертог Твой приими мя, идеже глас ангел Твоих и праведных лицы радуются. О пресвятая Троице единосущная! от славы Твоея не отверзи мя грешнаго. Ты бо божественая Троице: чту и поклоняю Ти ся и Тебе угожю всем сердцем моим, ныне и присно и в веки веком. Аминь.

______________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.253-254.

*

МОЛИТВА В НЕДЕЛЮ ПО УТРЕНИ

Слава Тебе, Господи Боже мой, яко сподобил мя еси видети день преславнаго воскресения Твоего //97об., в онже свободил сей сущия во аде связанныя праведных души! Тоя свободы, Владыко, аз желаю: разрешиши мя связана суща многыми грехы, да восияет свет благодати Твоея во мрачней ми души. Веде бо безчисленыя щедроты Твоя и неизреченное человеколюбие Твое: яко от небытия мя во //98 бытие вся привел еси и своего образа подобием украсив мя, словесем же и разумом превыше скота вознес мя и твари всей владыку устроил мя еси. Сведый время живота моего, от юности моея и доныне пекийся мною, да бых спасен был, и прекраснаго лика Твоих аггел согласника хотяй мя быти, //98об. заповедь дал ми еси и духовное дело во чистоте совершити повелел ми еси; аз же, окаянный, запят бых умом к своему хотению, люблением плотским ввергох себе в смрадную тину греховную и далече ся сотворих от Твоея благости. Твой сын порождением купели духовныя, ныне же раб бых греховный. //99 И того ради стеню из глубины сердечныя и слезю болезнию душевною: судный час помышляя, весь изнемогаю. Како убо обрящуся тамо? Кое ли слово изреку за грехи моя? Или каков ответ будет ми от Судии? Где ли скрыю беззаконий моих множество? Яко несть помогающаго ми, избавляющаго мя. И что //99об. сотворю, Господи мой, Господи! Не веде, к кому ся прибегну, да спасена ми будет душа. Время живота моего мало, и поне отныне пригвозди страсе Твоем плоть мою; да не наг обрящуся от добрых дел, смех бываю демоном. Се бо, яко детище, запят быв от врага моего, и в последнюю впадох погыбель. Не бысть //100 от века человек грешен якоже аз: злых бо ради моих дел прогнах души моей аггела хранителя и приях губителя, неподобная возлагающа на мое сердце. Но не остави мене до конца погибнути, Иисусе, благое имя! От земли создавый мя и живот даровавый ми, призри на смирение мое: аще бо и без числа согреших, но не воздех //100об. руку мою к Богу чюждему, ниже отчаяхся отнюдь, помышляя образ Твоего человеколюбия, еже показа на согрешивших прежде. Поминаю Давида, иже по даровании пророчествия в ров любодеяния впаде и убийство сотвори и покаявся к Тебе Богу и Творцу, достоин бысть Твоея милости. И за Ахава Сам //101 ко пророку глаголя: Не имам сотворити прежде реченнаго нань зла, видех бо его, како сетуя ходит предо Мною о своих согрешениих. Ей, Владыко мой, и еще приложю, плачася, пред Тобою великих и неудобь исцельных моих язв. Како Манасия беззаконствовав и много Израиля осквернив и Тебе, Бога отец своих, прогневал, //101об. предан бысть иноплеменнику в казнь, егоже в сосуде медяне заключивше и яко скота травою питаху: видев же свою погибель и воспомянув прежде сотворенныя своя грехи, и возопи среде уз к Тебе, Богу и Творцу, и чрез надежду изят бысть оттуду преславно. Такоже и аз, вся злая в животе моем содеях //102 и недостойна себе сотворих Твоей милости. И како на высоту к Тебе воззрю скверными очима? како ли явлюся лицу Твоему, раздрав первую боготканную одежу и осквернив плоти моея ризу? Но очисти мя, яко Спас, и прости ми, яко Бог! Призри на смирение мое и не помяни злобы грехов моих, яже сотворих //102об. на убогую мою душю. Надею бо ся Твоей милости и вопию к Тебе воплем велиим: Помяни, Господи, глаголы пречистых Твоих уст, яже рече "Ищите, обрящете, просите и дастъся вам", не пришел бо еси призвати праведных, но грешных на покаяние, от нихже первый есмь аз. И ныне исповедаю вся безакония моя: и мне бо //103 молчащу, Ты сия свеси. Но, о Премилостиве, приими мя, яко разбойника и мытаря и блуднаго сына: тии бо беша всеми отчаеми; Ты же прият я и раю сотвори жителя. Приими и мое покаяние, недостойнаго раба Твоего, Господи Иисусе Христе! Словом очистивый прокаженныя, очисти скверну души моея и помощник ми //103об. буди: честнаго Ти креста силою укрепи мя и Духом Святым утверди мя, возврати посрамлены борющыя мя, и да исповедят уста моя множество милости Твоея, яко бысть помощник мой во всякой беде и утешитель в день печали моея. И ныне не отверзи моления раба Твоего, но спаси страстную ми душю //104 и вся християны помилуй, молитвами Пречистыя Владычицы нашея Богородицы, яко Ты еси Бог наш и Тебе ся мили деем: Отче и Сыне и Душе Святый, помилуй нас всегда ныне и присно и во веки веков. Аминь.

_______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

//104об. МОЛИТВА В НЕДЕЛЮ ПО ЧАСЕХ

Боже всемогий и безначалный Господи, высокий Царю славный, владеяй всею тварию видимою и невидимою, седяй на херувимех, певаемый от серафим! //105 Тебе служат тысящи горнии чинове, молимый от аггел и от всея силы покланяемый, и нужнаа [вариант: нижняа] тварь со страхом трепещет пред Тобою, Ты бо еси Бог един безгрешен! Не презри мене, молящагося в годину шестую сего дне, в нюже явлься апостолом Своим по воскресении печальным сущим //105об. и премени скорбь их на радость показанием пречистую Ти руку и ребр. Премени мою скорбь одержащу мя ныне и избави печали греховныя, и не презри мене, Владыко, молящагося в час сей, в онже рече Закхеови: Днесь спасение дому твоему! Ты же ныне, чист еси, дажь спасение душевному ми дому, //106 зане оскверних телесную сию храмину и несмь достоин прияти пречистое Ти тело! Но яко благ и человеколюбец приими беседу молитвы моея в час сий, в онже беседова со женою Самарянынею и тайная сердца ея рек, веляше просити животныя воды. Ей, Господи мой! Ты свеси тайная //106об. сердца моего; дажь ми каплю милости Твоея, яко у Тебе есть источник животу, угаси изгоревшую душю мою греховным пламенем, устави жажду сердца моего и даждь ми радостно прейти день сий, в онже дастъся агнець Аврааму во Исаака место на жертву, прообразуяй за весь мир заколение Твое, //107 Иисусе Благодателю, Агнче Божий! Призри на смирение мое и исправи молитву уст моих, и приими словесную сию жертву, яко Авелевы дары! Аще бо и нечист и сквернен есмь, но надеюся на Твое милосердие, понеже не отверже медницу двою вдовицы оныя, но похвали ю паче всех, и мытаря со воздыханием //107об. молящася, оправда. И мене не уничижи, яко разбойника и блуднаго, помилова кающася о своих прегрешениих, яко благословен еси со Отцем и Святым Духом ныне и присно и во веки веков. Аминь.

______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В НЕДЕЛЮ ПО ВЕЧЕРНИ

Благословляю Тя, Господи Боже мой, и пение недостойное при- //108 ношю Ти из уст сквернен, от сердца нечиста. Прославлю имя Твое святое, яко о мне, грешнем, всегда печешися и долготерпиши, ожидаяй моего покаяния; аз же всегда прогневаю Тя, преступляяй Твоя заповеди. Что реку пред славою Твоею, Господи! Ты бо свеси безумие мое и грехи моя от Тебе не утаишася. //108об. И ныне не отверзи мене от лица Твоего, нечисте устне имуща, дерзающа на славословие Твоего Божества и вечернюю ныне молитву к Тебе приносяща, Тя бо всяко дыхание и вся тварь со страхом славит. Ей, Господи Боже мой, приемый грехи всего мира! и моя безчисленая и неисповедимая беззакония //109 потреби, прешедша в последний час дне сего, от сует возвратишася и Твоея помощи взыскавша, Твое бо неисповедимое человеколюбие! Иже во единунадесять годину пришедших прият и равных сотворил еси всего дне труд понесшим, и мене такожде приими, не токмо едино день //109об. леностию изнуривша, но и все время живота моего празднолюбно пребывающа и дела духовна николиже не сотворша. Не осуди мене, Владыко, яко и прежде званных на Твою вечерю, отрекшихся своим жестосердием, но взыщи мене яко на житейстем разпутии блудящаго Твоея душекормныя //110 пищи желающа. Се бо день уже приклонился есть, и солнце годину вечернюю варяет, и мудрии светилникы своя готовят, да в полунощи пришедшу Ти с Собою введеши я в чертог Царства Небеснаго, егоже и мене причастника сотвори, не поминая грехов моих множества, но обычною Си //110об. милостию помиловав. Не даждь в смерть уснути ми и утверди уды телесе моего, яко разслабех грехи, укрепи душю мою колеблющуся нечаянием, отжени помыслы скверныя от сердца моего и просвети ми ум, иже омрачися злым унынием, да и нощныя молитвы воздам Тебе, Господи Иисусе Христе! Прикло- //111 ни ухо Твое к молению моему, отпусти вся грехи моя и конец благ даруй ми и тако мя от телесе моего отпусти и аггела мирна подажь ми, от воздушных князь избавляющаго мя, молитвами и молением пресвятыя Богородицы и святых небесных сил и всех святых иже от века угодивших Ти, //111об. яко благословен еси всегда со Отцем и со Святым Духом в безначалныя веки. Аминь.

________________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В НЕДЕЛЮ ПО ВЕЧЕРНИ КО АНГЕЛОМ

Яко первыя Светлости пресветло предстоящи, светила огнеобразная, во мрак соблаженый обхожаема, молитвами Вашими озарите мя, яко светила трисолнечна богосияния суще приималища пребогатая. Се бо Вам ныне предстах, тяжкой сон отгнавше: не тще надежа покажите. Ангельския силы небесныя, видящи душа смирение, милостивно молитву приимите. Не имам к тому прилепляющеся добродетели: от нея удалеешися душе по неразумъствию смертнаго существа вещи. Плотию же пекыйся, радуюся, хотящею в персть преставитися. Почтен во образ Создавшаго, скотию жизнь возлюбивши, причастихся достоаниа безсловеснаго, стремлению повинувся. Живота моего конец настал, и злых отвержениа не сотворих. Сего ради, припадая, молю Вы, Вашего прося милосердия, архангел множество безплотных и ангельстии чины: огня гееньскаго избавите мя, от страстей ми воздерьжитися помолитеся. Власти, чинове святии покорите мя законом Божественным. Силы вышняя, сотворите мя сильна на врага видимаго и невидимаго. Молитвами Вашими уветлива сотворите мене ныне Зиждителеви, яко хощет человеческаго покаяниа, им же плотию человек бысть. Со спасшимся ликом причтите, Михаиле и Гаврииле, начальная ангелом архистратига: неугасающаго пламени избавите мя, яко заступника миру. Безплотныя Начала и Власти и Господьства не отринете мене недостойнаго: к Вам, окаянный, прибегох, яко заступником сущим. Избавите мя от работы: Вы бо стяжахом заступникы к Богу и ходатая архангелы. Тому подобает слава и хваление Отцу и Сыну и Святому Духу и ныне и присно и в векы веком. Аминь.

___________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.258-259.

*

МОЛИТВА В ПОНЕДЕЛЬНИК ПО УТРЕНИ

//112 К вам, яко заступником и хранителем живота нашего, аз окаяный и многогрешный (имярек) припадаяй молюся, просяй вашея милости, зрители божественаго величества, святии аггели, престоли честнии Пресвятыя Троицы, страшно обстоящии, неизреченною светлостию Божественыя Славы облистаеми! Молите милостиваго и всещедраго человеколюбца Бога //112об. избавити мя от всякого зла. Святый великий Михаиле архистратиже, первый предстателю Святыя Троицы, приставниче и хранителю роду человеческому, осиявый чюдесы всю вселенную! и мне подаждь душевное [Так в рукописи, должно быть: "дневное" - Прим. А.А.Мельникова] пребывание преити богоугодно и неискусну от злых помысл и дел неприязнен, отверзи слух ушию //113 моею, да слышю и разумею Божия слова благая и душеполезная, да прозрю внутреннима очима и еще тме сущи греховней одержащей мя, в нейже преходяй вся дни живота моего, прогневах благаго и беззлобиваго и долготерпеливаго Творца моего и Владыку, Емуже предстоят со страхом //113об. небесныя силы, невеществеными усты трисвятую всылающе песнь. Молите за мя, по вся часы согрешающаго, да не пояст мене мечь ярости Господни, зело бо превзыдоша беззакония моя на главу мою, яко бремя тяжкое отяготеша на мне. Аще бо помяну мимошедшее время живота //114 моего, убо преступника себе свем: разумею бо ся паче всякаго человека злая и неподобная Богу сотворивша, и боюся, егда како огнь сошед с небеси и сожжет мя, или преисподняя пропасть жива пожрет мя. Сведый же долготерпение и пучину человеколюбия Божия, не отчаю себе, яко не наводит казни //114об. на достойнаго мучения, но ожидает моего покаяния. Святый архаггеле Гаврииле, радости ходатаю, спасения благовестниче, скорби пременителю и всякаго зла погубителю! буди ми помощник в год, егда побеждаем буду от страстей, присети мене святым ти присещением, освяти //115 ми душю, омеркшую грехи многими, укрепи мя творити добрая дела! Вопию к тебе воплем велиим и, припадая, молюся: Не презри мене, но скоро потщися, даже не постигнет мене конец, да не предварит мене смерть и не восхитит окаянную ми душю в скверных //115об. обычаех, и поимеши мя не готова от жития сего и поставиши мя без ответа пред Судом воздающаго по делом комуждо. Но, яко к Богу дерзновение имый о всех молютися, и мне испроси отпуст грехов. Святый Уриле! Виждь беду мою и брань вражию, еюже побежаем есмь присно, на // 116 помощь тя призываю: прииди в заступление мое, да очутится мой ум от сна греховнаго. Дивлю бо ся себе, како крадом есмь греховными похотьми обретаюся в делах, ихже ненавижю, и неподобная мысляй лишаюся благодати Божия, ожидающаго моего спасения. Увы мне, како не имею тверда // 116об. основания покаянию! Да кто даст очима моима слезы, да плачю ся к милостивому Господу, да поедет милость Свою и исторгнет мя от моря житейскаго, волнующася волнами житейскими, в них же погружаем, не приемлю беззакония исцеления скорым покаянием. Сведый бо узы моя //117, и не хощю изрешитися от них, запинающи ми телесней сласти. Святый Рафаиле! Подвигни множества святых аггел, да молят Владыку Христа за убогую и смиренную ми душю, кающуся о прежде содеянных ми неподобных делах. Ве бо свое естество, тленное сущее и скоро погибающее //117об.: егда како не достигну вечера, и порадуется враг мой о мне, глаголяй: сей человек суете уподобися и дние его, яко сень преидоша. Но, Господи мой Господи Исусе Христе, Сыне Божий! Припадаа, молю Ти ся: призри на мя и помилуй мя, и изведи ис темницы беззакония душю мою прежде даже не отиду отсюду и прииду //118 на Суд Страшный. И приими молящих ся за ны святыя аггелы и архаггелы, херувимы и серафимы, силы власти, престоли и господьствия, начала, иже окрест престола Твоего предстоящий, и за весь мир молят ся: тех молитвами и Пресвятыя Матери Твоея Владычицы нашея Богородицы, избави мя суда оного //118об. и тмы кромешния и неусыпающих ядовитых червей и неугасимаго пламени. Ты бо еси Агнец Божий, вземляй грехи всего мира, распныйся на кресте нашего ради спасения. Вонми молитву мою и посли аггела святаго, хранителя души моей и телу: да тем наставляем, избавлюся от всех враг моих ви- // 119 димых и невидимых и сподоблюся получити милость Твою со всеми угодившими Тебе от века, яко Ты еси Бог наш и к Тебе прибегаю и на Тя надеюся, аще и согреших паче человек, но Тебе не отступих, ни руку мою воздех ко иному Богу; Тебе молюся, Господи Иисусе Христе, Тя благословлю и Тебе покланяюся в Троице единому Богу Отцу и Сыну и Святому Духу ныне и присно и во веки веков. Аминь.

______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В ПОНЕДЕЛЬНИК ПО ЧАСЕХ

//120 К Тебе, Вседержителю и пресвятый Царю, припадаяй и молюся тружайся душею, милости прошю! Руце Твои сотвориста мя и создаста мя и живот даровал еси мне; злокознен же враг безстудне нападе на мя, воскрежета на мя зубы завистию, стрелою беззакония устрели мя, греховным мечем зле порази мя. //120об. Впадох в сети преступления, и, яко зверие на убиение, уловиша мя. Ощутих язву неисцельную, взысках врача на земли и не обретох. Но к Тебе возпущаю глаголы молебныя: Владыко Господи Творче всех, Боже Отче Правителю душ наших! согреших на небо и пред Тобою; не посли на мя гнева достойна //121 по делом моим, да не буду, яко риза молем изъядена или яко железо ржею скончаваемо! Се бо беззакония моя нападоша на мя и греси мои покрыша главу мою, и бысть ми полудне яко полунощи. Перво брашна воздыхание ми прииде, и все житие мое печалию восхищено бысть, страх же //121об. в сердцы всели ми ся, яко изыскал еси беззакония моя, изследил еси, наведе на мя искушение и гнев велик возложи ми. Того ради не могу возникнути Тебе, ни руку воздети на высоту, молюся непрестанно, день дне избавления прося: послух ми есть небеси верен - еди- //122 нородный Сын Твой Господь наш Иисус Христос, Егоже посла грешных спасти. Той бо рече: Просите и дастъся вам! Ей, Господи Боже мой! кровь Твоя - цена души моея; да внидет пред Тя молитва моя; по словеси Твоему избави мя! Помяни, яко персть есмь; измерен ми есть живот и положена лета, изочтени же месяцы! //122об. И в преполовении дний моих не погуби мене, да не возвращуся в землю тмы вечныа, идеже несть света, ни жизни человеком; да не изсушит геенна крови моея! Но даждь ми время покаяния, яко не хощеши смерти грешнику, милостив бо еси и человеколюбец, имеяй пучину щедрот, //123 обретаяйся близ скорбящих, даяй доволная прощения рабом Своим! Иисусе Христе, благодателю, заре Отча, свете неприкосновенный! Просвети омраченнии мои очи и даждь прощение многих ми грехов молитвами святых небесных слуг Твоих: Аггел и Архаггел, Начал и Властей, Сил, Престол и Господьств, //123об. Херувим и Серафим и Святыя Пречистыа Богородицы и всех святых Твоих, ихже молитвами помилуй мя, Отче и Сыне и Святый Душе, яко Ты еси Бог мой, у Тебе милости прошю ныне и присно и в веки веков. Аминь.

________________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В ПОНЕДЕЛЬНИК ПО ВЕЧЕРНИ

Владыко Господи, всея видимыя и невидимыя твари Содетелю, Боже сил, веком Творче, сотворивый //124об. времена и лета, измеривый дни и нощи часми, разлучивый свет от тмы и видев яко добро, и бысть вечер, егоже и мене, смиреннаго, сподобил еси достигнути до последняго часа дне сего, в онже вечернюю службу возсылаю Ти! Исправи молитву мою, яко кадило пред То- //125 бою, утверди нозе мои в заповедех Твоих и руку моею воздеяние освяти, и очисти уста моя словес Твоих чистотою, вложи страх в сердце мое, покрый душю мою сению Святаго Духа, утверди уды моя на зло подвизающияся, не остави мене без Твоего заступления! Ты бо свеси немощь //125об. естества моего, яко хуждьше паучины обретаюся к Твоему угождению. Господи Иисусе Христе Сыне Божий, преблагий Господи, помози моей худости! Рекий усты Своими "Воззови Мя и избавлю тя"! и ныне зову вопияй непрестанно: Не предаждь мене желанию сатанину да не буду причастник //126 пагубы, да не затворю уст своих от славословия Твоего и да не остану в радость врагу моему, да не похвалится о мне глаголяй: Где есть Бог твой! Ты бо еси Бог мой, имеяй пучину человеколюбия и не отлучайся николиже от раб Своих, но даруя прошения любящим Тя! приими моление //126об. мое в час сей, да на всяк день и час приношю Ти пение и молитву, каяйся о прежних и мимошедших днех живота моего, в нихже уподобихся неразумным скотом ядением и питием и всеми похотми скверными, имиже далече бых от Тебе! Тварь сый руку Твоею, врагу порабо- //127 тихся, иже и доныне злохитръствует и крадет мя, хотяй мя потопити во глубине греховней. Но вари на заступление мое, рци души моей: Спасение твое есмь Аз! Да исповедят уста моя множества милости Твоея, яко помилова и спасе мя грешнаго, и восхвалю имя Твое во веки! //127об. И тако мя отпусти от телесе моего, аггельским заступлением огради душу мою и проводи неискусно от злых мытарств сущих у врат небесных, да и десныя страны причастник буду со всеми от века угодившими Тебе молитвами и молением святыя и славныя Богородицы и святаго пророка Предтечи Крестителя Иоанна // 128 и всех святых, яко благословен еси и препрославлен со Отцем и со Святым Духом ныне и присно и во веки веков. Аминь.

______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В ПОНЕДЕЛЬНИК ПО ВЕЧЕРНИ СВЯТОМУ ПРЕДТЕЧИ

От пустаго житиа исходящи, к Тебе прибегаю, раб Твой (имярек) и Твоея милости прошю: не презри мене, Пророче и Предтече, осквернена. Простираю руце мои: не отрини мене страстнаго, но тихою си милостию на мя человеколюбне призри. Се бо сластьми осквернихся и, помыслив прежняя владычества, врага совершающаго послушах и гласа Бога моего ослушахся, образа доброту омрачих и персть нань воставих. Сего ради, молю ти ся, Предтече: молебник ми тепл явися к Христу Спасу Зижителю; достойными плоды покаяниа покажи умиленныа ми молитвы; малое воздыхание мое приими и руку моею воздеяние исправи; в день осужениа избави мя и Судию милостива сотвори. Тебе бо имам заступника и молю, яко помощника и надеждю к Богу: простри ми, рабу твоему, руку, крестившую Христа Бога моего. Ужасаюся и трепещю будущаго судища, но под Твою милость прибегаю и простираю к Тебе очи мои: не отрини мене раба Твоего, Предтече! Всенощными си молитвами избави мя присно от злых грехов, держащих мя; песньми бдяща сотвори славити Христа, Егоже крестил еси. Тому подобает всяка слава, честь и поклонение Отцу и Сыну и Святому Духу и ныне и присно и в векы. Аминь.

________________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.263-264.

*

МОЛИТВА ВО ВТОРНИК ПО УТРЕНИ ИОАННУ ПРЕДТЕЧИ

Крестителю Христов, проповедниче покаяния! Кающагося не презри мене, но, совокупляйся с вои небесными, молися ко Владыце за мя, недостойнаго раба (имярек), унылаго и немощнаго и печалнаго, во многия беды впад- //129 шаго, утружденаго бурными помыслы ума моего. Се бо предстою, имеяй посрамление мое и черность дел моих, и многими обложен есмь деянии и бремены греховными, пореваем страстьми житейскими, лежю в тине дел моих, нечаянием одержим, отнюдь восклонения не имам, крыяй //129об. струпы души моея и студными вретищи греховными, заблудих праваго пути, ведущаго в жизнь, уклоних же ся в стезя беззакония и отвсюду утесняем помыслы ума моего. Возвратихся на страсть, егда унзе ми тернь греховный, от совести своея осуждаюся и всеми //130 человеки окаан бых, и унынием скончах вся дни живота моего, ослепленный имеяй сердечнии очи, и окалях душевную ми ризу, и всю плоть мою злобою оскверних, и неподобному блуду чювственныя двери отверзох, невстягновенъно от юности и доныне вся злая сотворих, и боюся посечения, //130об. яко неплодная смоковница, когда приидет смертная секира и предаст мя во истление огня негасимаго, егоже и сам сатана трепещет, от негоже несть изяти могущаго. Увы мне! Душе, разумей и виждь долготерпение Божие, яко не хощет смерти грешнаго, но ожидает покаяния. //131 Горе мне! Что приобретох в мимошедшее время живота моего? Ибо несть от начала миру и доселе ни единагоже грешника, егоже не преспевах согрешаяй: аз бо есмь вертеп злым делом, отнюдь не имеяй конца греховному обычаю; пригвожден бо есть ум мой земным вещем. //131об. Да что сотворю, не веде, и к кому прибегну, да спасена ми будет душа, но токмо к Тебе, святый пророче и Предтече Иоанне, яко Тя свем больша всех. Ибо Ты сподобился прияти за верх Царя Христа, пречистаго Агньца Божия, вземлющаго грехи всего мира, Егоже моли за убогую мою душю: да //132 поне отныне в первыйнадесять час понесу ярем благий и прииму наем от руки Господня, даже не постигнет вечер, даже не зайдет солнце, даже не обымет мене нощь страшная и трепетная и глубокая тма, да не остану вне чертога святаго Христова, толкий без успеха, имеяй светильник //132об. угасший унынием и леностию, тогда обратится суетная моя надежда. Егда бо вся тварь предстанет Страшному Судищу, идеже явятся дела без испытания, тогда аггели предстанут со страхом, земля восколеблется, тогда огнь свирепый потечет, потребля- //133 яй беззаконники, от нихже первый есмь аз. Тогда праведных лицы возрадуются, преподобнии возвеселятся, девьственицы венчаются, черноризцы утешаются, мученици веселятся, апостоли на облацех восхищаются, пророцы прославляются и вси святии от труда почивают, иже пострадаша //133об. в веце сем. Что же сотворю окаянный аз, яко во глумлении скончах вся дни живота моего и в сквернах преидох лета моя. Смерти убо чаю, о гресех николиже не поболех и царством не пекохся. Но не презри мене, крестителю Христов, честный Предтече, последний пророче, пе- //134 рвый мучениче и поклонниче, постником и пустынником наставниче, чистоте учителю и присный друже Христов. Тя молю и к Тебе прибегаю; не отрини мене от Твоего заступления, возстави мя убогаго, падшагося многими грехи. Обнови душю мою покаянием, еже есть второе крещение, //134об. яко обоему началник еси: крещением омываеши прародительнаго греха и покаянием очищаеши душевную скверну. Очисти мя, грешнаго: уста недостойна вопиют к тебе, и душа скверна молится, сердце нечисто из глубины воздышет. Простри пречистую твою десницу, исторгни мя от враг моих, //135 да не по разлучении души от тела удержат мя лукавии беси и да не рекут: се день, егоже чаяхом. Ей, Господи мой Иисусе Христе! Молитвами святаго Иоанна Крестителя Твоего, не даждь бесом мене в радость, да не похвалятся о мне, глаголюще: В руки наша пришел еси! Человеколюбче Царю всесилне! угаси прещение их, //135об. низложи возносимую их гордыню. Веде бо, Господи, грехов моих множество, яко тии числа не имут, но надеяйся на пучину щедрот Твоих, возвращаюся, яко блудный сын, сотвори мя яко единаго от наемник Твоих, молю тя яко ханааныни, да и аз, яко пес, насыщуся крупиц от святыя Твоея трапезы - //136 Господа нашего Бога. Вопию Ти, яко и прокаженный он: Аще хощеши, можеши мя очистити! И не глаголю, яко разслабленный: Господи, человека не имам! - Ты бо еси Сын Девичь, мене ради плотию обложися и немощь естества моего понес, иже сына вдовича на погребение несома воскреси и четверодневнаго Лазаря //136об. из гроба возстави, и слепцем очи словом отверзе, и кровоточивую прикосновением риз очисти, иже и разбойника исповедавшася во един час прият и раю причястника сотворил. Ты ныне, Господи Боже мой, приими мое исповедание, подаждь ми любовь си в последний день угодно пред Тобою стати. //137 Несть во мне части целы, ни места чиста, ибо впадох, яко в разбойничи руки, чрезестественыя грехи, яже совлекоша мя божественыя Твоея заповеди, яко раны наложиша на мя, свидение студных ми дел, ис полумертва оставиша мя, нечаянием одержима. Сам же, Господи мой Иисусе Христе, //137об. яко самарянин, вземля на свой скот, принесый мя в гостинницу, во святую Ти Церковь, в нейже дается душевное здравие болящим грехи. Ты, якоже гостинник и врачь, прилежи о мне, воздей на мя милость Твою и истреби нечистоту многих ми грехов, и подаждь исцеление души моей //138 и телу, да и на мне явится Твоя милость. И приими молящагося за ны честнаго Предтечю Крестителя Иоанна и Пречистую Твою Матерь Владычицу нашу Богородицу, и спаси мя, грешнаго раба Твоего (имярек), кающася о своих гресех. На Тя, Спасителя, возлагаю надежду, славяй пресвятое имя Твое //138об. Отца и Сына и Святаго Духа ныне и присно и во веки веков. Аминь.

____________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА ВО ВТОРНИК ПО ЧАСЕХ

Боже естеством, Отче милостей, Зиждителю и Творче всея твари, надежда всем концем земли! Нищь и убог есмь аз; //139об. призываю чюдное и святое имя Твое и прошу милости от Тебе, Отче и Сыне и Святый Душе! Ты бо еси Бог един безгрешен, живота и смерти имеяй власть; избави мя от всякия стрелы, летящия во дне, от сряща и беса полуденнаго. Зане сташа и усмотриша мя, и нападоша на мя без милости, //140 помыслиша отторгнути мя от Спасителя моего, подстрекаша мя во вся дни жалом нечистоты, дондеже ощутих смертоносный яд во окаянней ми души. Дние мои, яко сень, преидоша от множества беззаконий моих; уклонихся от праваго пути, оставлен бых от плода духовнаго ми делания, ниву сердца моего //140об. тернием возрастих, леностным сном без памяти воздремахся, совлечен бых от одежди духовныя; врази мои совещаша на мя совет зол. В скорби моей возопих к Тебе, яко раб, бояйся господина своего; от утра помолихся, яко наемник, чяях мзды своея. Услыши мя, Господи Боже мой, в день печали //141 моея, и приими глас молитвы моея, егда помолюся к Тебе; се бо предстою со страхом Тебе и моления исповедания приношю Ти. Не может бо ми престати душа, требующи питатися Твоими словесы, яко сладка гортани моему словеса Твоя, паче меда устом моим. Но не омерзи моего //141об. воздыхания, зане нечист и сквернен есмь, дерзаю призывати пресвятое имя Твое, Егоже трепещет вся тварь, и никтоже от жен рожденных безсквернен, вся же правда человеческая, яко тина, злосмрадна. Но надеяйся на Твое человеколюбие, спасения прошю: Боже, очисти мя, //142 грешнаго, отреби гнилость душа моея, разсыпли бремя грехов моих, избави мя от части лукаваго и причастника мя сотвори Твоего Царствия, Христе, истинный Боже наш, молитвами Пречистыя Твоея Матере. Владычицы нашея Богородицы, и святаго пророка и Предтечи и Крестителя Иоанна, //142об. и всех святых Твоих, яко благословен еси со Отцем и со Святым Духом ныне и присно и во веки веков. Аминь.

_______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА ВО ВТОРНИК ПО ВЕЧЕРНИ

//143 Во твое заступление и крепкую помощь ныне прибегох, Пречистая Госпоже Дево Богородице! Разве тебе прибежища не имам, окаянный аз! Весь бо есмь сквернен, и не сохраних заповеди Сына Твоего и Бога моего, да тем ни на небо очима возрети не смею, все тело злобою уязвих, ни руку возвести [вариант: "воздети"] на высоту, полне бо еста //143об. лихоимства, ни уст не отверсти на мольбу, злословием слепостася, а воздыхания несть во мне от нечювствия. Сердце отяготих многоядением, и все тело мое ослабе леностию; нозе преткнух о камень сластолюбия, уши отверзох на слышание маловременныя похвалы; лице мое без- //144 студием повлекох и смрад дел ноздри мои обоняста, и весь бых, яко древо неплодное и яко храм пуст, емуже на разорение вси поучаются; тать же души моея крыется, ждый подобна времене, видит бо мя неограждена молитвами и тщится малое имение веры моея восхитити. //144об. Не имам бо постнаго оружия, сего ради ратный диавол, яко пленника, греховным ужием связав, к своему хотению нудит мя. Да что сотворю не вем, самовластен бо Богом сотворен бых, волею же поработихся бесу; умножишася беззакония моя и несть числа неправдам моим, яже //145 сотворих от юности моея и доселе вся злая. Да к кому прибегну избавления просяй, да кто о мне помолится к Богу? Но ты, госпоже моя Богородице, всем християном заступнице, не остави мене от твоея помощи, к тебе бо прибегох избавления просяй; приклони ухо твое к молению моему, буди ми, Госпоже, //145об. ходатаице к Сыну своему и Богу моему, да не осудит мене во тму кромешную. Припади ко мне, госпоже милостивая, умоли, Дево Владычице, да не буду предан аггелу немилостивому; от Тебе милости прошю, вся бо можеши елика хощеши: избави мя прежде смерти части лукаваго, от вся сия печали, и злобы, и зависти, и ненависти, //146 и нужды, и беды, и скверных мыслей, и всякия болезни, ты бо падших возведение, отчаявшихся надежда, обидимым помощнице, печальным утеха и праведником похвала, грешником спасение, всего мира покров. Тем и аз, госпоже Дево Богородице, на тя надеяйся, вечера сего возсылаю ти мол[...] - же приими, милостивая, разсыпли //146об. бремя грехов моих и снабди мя своим милосердием, покрый мя своим заступлением, без напасти препроводи живот мой и радости мя святых причастника сотвори благодатию и человеколюбием единороднаго Сына твоего Господа нашего Иисуса Христа, Емуже подобает всяка слава, честь и поклонение со безначалным Его Отцем //147 и с Пресвятым благим и животворящим Духом ныне и присно и во веки веков. Аминь.

_________________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА ВО ВТОРНИК ПО ВЕЧЕРНИ

Благого Царя благая Мати! Призри на раба си милостивно и помощную ми руку простри, и страстнаго мя от страстей возведи. Рыдая со слезами, вопию Ти, человеколюбивая: вонми и спаси мя. Возвести очию не смею, яко весь есмь во гресех. Милостивая Госпоже, Мати сущи Богу, Живодавца родьши мертвым, от мертвости мя злыя въстави: владееши бо всем избавлением. Мучительства мя злых свободи: щит ми подаждь твоея силы; стрела устрели мя вражья: да улучу оставление грехов злых. Прибегаю к благости твоей: лежаща мя, яко мертва окаянна, от страсти возведи. Благая словеса презрех Сына Твоего, иже мирови нисходи. Да не одолеет множество зол моих благых Твоих множество. Благая! Нощь объят мя глубокая страстей; но Ты освети светом Твоим; чужа мя сътвори от страсти, Дево, и приближи единому Твоему Сыну. Ни уповах инде, Препетая, разве Тебе, упование державное. Обиде мя вода до душа моеа и запяхся скверными помышлении; леняся взираю своих зол. Радуюся и уповаю к Тебе, Чистая: Тя бо заступницу имам и очищение. К тебе прибегаю, Мати Божиа! Нищь и убог есмь аз: сохрани мя множеством щедрот си. Гордаго сътвори врага, хотящаго присно пожрети мя, просвети ми разумнии очи, со всем умом, пети Тебе согласно. Радуйся, зову Ти гласом Гаврииловым. Радость Тобою обнови на мне: пою и воспою Тя помощницу Богородицю и стену неразрушиму, яко исходатаицю благоприятну Богу: молитвы приими и Тому донеси. Емуже лепо есть поклонение, Отцу и Сыну и Святому Духу и ныне и присно и в векы веком. Аминь.

_________________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.269-270.

*

МОЛИТВА В СРЕДУ ПО УТРЕНИ

Госпоже моя Богородице! Умилосердися //147об. на мя, много согрешившаго и преступивша самовластным умом Сына Твоего и Бога моего заповеди. Несть бо во мне места достойна ниже чиста, но все скверно. Но не затвори ушию благоутробия Твоего от покаяния моего, не отврати лица Твоего от моления унылыя моея души, //148 не презри двизания нечистую ми устну, но приими воздыхание убогаго моего сердца. Се бо предстою Ти, яко осужденник, скверною греховною, як свидетели, одержим, все тело и душю уязвенну имея, всяцей муке повинен сый. Но простри, Девице, врачебнии Свои руце, на неюже понесе целителя //148об. и врача всего мира Господа нашего Иисуса Христа. О прибежище мое и Заступнице! не престай о мне молящися Ему, яко зол душа моя наполнися, да тем сокрушенным сердцем со слезами вопию ти: Не остави мене до конца погибнути, имаши власть, яко Мати, свободи мя от работы лука- //149 ваго, расторгни узы моя, возврати мя от пленения диаволя и сокруши сети их, и погуби лщение их, покрый мя Твоим заступлением, надеждо всем концем земли! О Пресвятая Дево Богородице, аггельское великое удивление, пророческая проповеди, апостольскаа преславная похвало, мучеником //149об. крепкое утвержение, святителем изрядное украшение, князем нашим необоримая держава, церквам честное украшение, мнихом святое упование, постником непобедимая крепость, верным твердое ограждение и сущим [в] болезнех легкое исцеление, блудящим нетрудная наставнице, //150 в бедах скорая заступнице, ненавидимым любовное смирение, вдовицам и сиротам питательнице, матерем тихое веселие, младенцам мудрость и наказание, плавающим небурное пристанище, путьником легкое прохождение, труждающимся благое покоище, нищим неисчерпаемое богатство, //150об. обидимым покрове и прибежище, печалным присная утеха, грешником к Богу присвоение, христианом неложная хранителнице и миру всему известное спасение. О Пресвятая Дево Богородице! Ты едина мое утешение, не гнушайся мене, грешнаго, надею бо ся аз на Твою милость, //151 угаси мой греховный пламень во мне, ороси покаянием иссохшее ми сердце, очисти ум мой от неподобных мыслей, даждь устом моим тихое глаголание и очима моима источник слез, да омыю кал неподобных ми дел; Ты бо веси нечистоту и скверну окаянныя ми души. Воздыхаю из глубины сердца //151об. и мольбу приношу Ти из уст сквернен: умилосердися, Владычице, и помилуй мя, и призри на моление мое, и виждь болезнь убогия моея души! Приклонися к слезам моим и виждь немощь естества моего, буди ми ходатаица к Сыну Твоему и Богу моему о мне, недостойном рабе (имярек), и укроти ярость Его //152 м[атерними ти молитвами, приемлет бо Тя молящуся о душе оканней [Так в публикации.- О.Л.] и молящуся заступницу Тя показа вероющим [вариант: "верою призывающим Тя"] Тя. Аз же, Госпоже, всегда на Тя уповаю, надеяние мое и при- // бежище, покрове и огражение, стена необоримая Ты еси, Богородице, к Тебе прибегаю верою, душевных и телесных язв исцеления прошу, Ты бо совеси помышление мое преже прошения моего, да что прочее к сведущей мое естество возглаголю? // Аще, Госпоже, восхощеши, можеши мя очистити и прочее время непорочно сохранит и на добродетель укрепи мя, да от сего часа не работаю скверным сластем, влекущим [Лакуну протографа восстанавливает по аналогичной рукописи XVII ст.: Росс. нац. библ., Общество любителей древней письменности, Q. 43. Л. 101об. - 102об. - Прим. А.А.Мельнікава] [См. также ссылку к №22 - О.Л. ]

мя во глубину нечаяния, да, свободный волю творяй, славословлю пресвятое имя Твое. Ей, Владычице, моего неведения направление! приими мое воздыхание и облегчи мою болезнь, устави бурю злых ми напастей, прираждающу ми ся всегда моими грехи, //152об. раздери рукописание беззаконий моих и бремя греховное облегчи, подаждь ми желаемое спасение и сподоби мя порадоватися на земли кротких и в селех праведных и в жизни вечной и в пищи неиждиваемой, в немерцающем свете. О Госпоже моя! припади, молящися о мне, //153 убозем, веси бо, какия беды суть! Подвигнися, яко благая, на помощь мою, да не погибну зле за безчисленыя грехи моа, но, всегда Тобою избавляем, аггельский глас возсылаю Ти: Радуйся, обрадованная Богородице Дево, земное небо, огненый престоле, одушевленная церкви, пространная полато, //153об. Бога невместимаго святое село, пресветлая свеще, молние скорая на помощь, звездо незаходимая, чаше напаяющи здравия, бане омывающая грехи, возведение человеческому роду, трапезо хлеба животнаго, Мати Христа Бога нашего, Егоже моли, да избавит мя вечныя муки //154 Твоими молитвами ныне и присно и во веки веков. Аминь.

______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В СРЕДУ ПО ЧАСЕХ

Приими, Госпоже Богородице, глас молитвы моея, иже недостойный приношю ти от страстнаго сердца, иного бо паче Тебе ходатая не свем к Сыну твоему //155 и Богу моему и Творцу! Яко в суетном сем житии вся неподобная и студная дела сотворих, яже аще помянути восхощу, весь во глубину нечаяния погружаюся, весть бо ми душа деяния, яже сотворих в мимошедшее время живота моего и до сего дне: плотскими похотми облекохся и вся //155об. чювствия души моея и тела моего оскверних. И того ради уны в мне дух мой, и трепещут ми составы и ужасается сердце, изнемогает ми язык: несть бо ни единаго зла дела, егоже аз не сотворих, окаянный. Но ты, пречистая дево Марие, мати живота нашего, помощница верным, грешным //156 надеждо, не презри воздыхания моего, к тебе бо все упование возложих! Умилосердися, Владычице, не остави мене до конца погибнути, зане зело грешен есмь и несмь достоин много глаголати пред Тобою! Поминаяй Давида, рекшаго: Муж язычен не исправится на земли. Но сама веси струпы [вариант: "струны"] сердца моего //156об. и болезнь души моея! Тужю и скорблю, печалию уязвляюся, судный день помышляю и изнемогаю, понеже судия праведен есть и никтоже поможет! Того ради безпрестанно вопию ти со слезами, Мати Божиа пречистая: Умоли Христа человеколюбца благаго, да не помянет безаконий моих многих, но да избавит //157 мя, Госпоже, плача оного безконечнаго и скрежета зубом и червия неусыпающаго, огненаго родства, идеже греховная козлища пасоми суть. Но даждь ми Твою милость и сподоби мя десных овец паствины окрест селений святых во ограде небеснаго рая. Ты бо еси нам надежда наша, Тебе ся мили деем, просяще получити //157об. отпущения грехов Твоими молитвами богоприятными ныне и присно и во веки веков. Аминь.

________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В СРЕДУ ПО ВЕЧЕРНИ СВЯТАГО КИРИЛА

[Добавление: Вечер и заутра и полудне исповедаю Ти ся, Господи Боже Вседержителю, Отче Господа нашего Иисуса Христа, Егоже послал еси взыскати заблужших и спасти погыбших, от нихже первый есмь аз, заблудивый праваго пути, ведущаго в жизнь и уклонився в дебри любосластныя, углебох в тине дел моих, и безаконным тернием весь осужен бых! И видя мя враг, в тех тружающася, болшими сквернами хощет потопити окаанную мою душю; но Тебе единаго избавителя молю, Тебе помощника призываю милостива и человеколюбца: не гнушайся мене, Владыко, ]

//158 ни отрини от Твоего лица, зане вся злая сотворих пред Тобою! Исповедую Ти, Господи, грехи моя, яже сотворих на убогую мою душю, преступник бых всех Твоих заповедей, похотем безсловесным повинухся; работая чреву, душю острупих! И ныне на щедроты Твоя уповаяй, вечернюю приношю Ти молитву. Послушай мене, //158об. обещавыйся послушати верно призывающих Тя! даждь ми аггела Твоего и да запретит всем духом, борющимся со мною, да постыдятся и посрамятся ищущии души моей, и да потребит от моего сердца всякое подвизание вражие от неприязненаго похотения востающее. Да будет ми всегда //159 со мною храняй мя и на дела добрая наставляяй и на всяк день молитвы моя приносяй Тебе Богу и Творцу! Ты бо Пресвятый Царю, от всея твари поклоняемый Иисусе, праведных любяй никогдаже отступающих от Тебе, грешныя же милуяй и ожидаяй покаяния и вся призываяй ко спасению! //159об. Направи ноги моя к заповедем Твоим, пригвозди плоть мою страсе Твоем, сердце очисти правоверием, уста наполни благодати, язык умири смирено глаголати, душу освяти Духом Святым, мысль исправи неприлепну земным, ум возвыси крилома богоразумия и всего мя устрой яко своего угодника! И яко сподобил мя еси день сий прейти, тако и нощь сию //160 даруй ми без мечтания дияволя, да и на одре постеля моея поминаяй имя Твое святое, и тем просвещаем, не омрачюся в день исхода, егда разлучается душа моя от телеси. Но даждь ми обрести радость пред славою Твоею, да приимут мя праведнии с веселием в вечную жизнь, в бесконечную радость молитвами Святыя Владычицы нашея Богородицы Приснодевы Марии //160об. и святых апостол, всеа вселенныя светилник, и святаго отца Николы и всех святых, яко благословися и прославися пречестное и великолепое имя Твое Отца и Сына и Святаго Духа ныне и присно и во веки веков. Аминь.

_________________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В СРЕДУ ПО ВЕЧЕРНИ

Моля, ныне предстах апостольский лик, числом дванадесять! Приимите воздыхание мое и милосердно с небеси призрите на мя, спасения просяща; молитвами вашими, блаженнии, из глубины зол возведите мя; иже всего мира от тля восхищающе, от прелести диаволя избавите; вернии столпове приисходньцы; заповедьми Христовыми утвердите мя, церковнии светильницы, озарите мя, грехми ослепленна; из Египта страстей изведите мя и на землю спасениа наставите; воздеяние руку моею приимите и воздыхание сердца моего услышите и к Богу о мне мольбу сотворите, апостоли! Да милостив ми будет Бог и уветлив: ожидает бо человеком покааниа, зане человек бысть. Святии апостоли славнии Петре и Павле, Иоанне треблаженный, Матфею, Марко и Лука с Филиппом и с Симоном, разумееми верным заступници, Фома, Варфоломею, Андрею и Иакове и вси святии апостоли, утвержение всех, заступница же и стены недвижимыя: молитеся избавитися мне мучениа: молитвенници сущии, всегда славнии, милости мене сподобите и пленица моих грехов разрешите и в он час варите, егда пред Богом станем: страшно бо там судище, нагим всем стоящим на обличение. Апостоли святии, законоположници славнии! Тогда мя вскоре избавите и ущедрите мя грешнаго, егда Богу предстанем, Емуже поклонение, слава и хваление со Отцем и с безначальным Духом и ныне и присно и в векы. Аминь.

___________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.274-275.

*

МОЛИТВА В СРЕДУ ПО ВЕЧЕРНИ СВЯТОМУ НИКОЛЕ

Яко тепла в бедах помощника молю тя, треблаженный Николае! Се бо прихожю ти осуженый, многими грехи уязвен. Полунощи припадаю ти в молитвах молящися: милостивне приклони уши и глас молениа моего внуши. Се бо страсти моя плотьскиа мучащи: якоже преже избавил еси воеводы пришедша, блаженне, якоже во сне цареви предстал еси и от темница неповинныя избавил еси, тако и мене, связаннаго страстьми, спаси и избави, молю ти ся, многосплетеных сетей змиин: яко избавляеши к тебе прибегающаго от враг видимых и невидимых и подаеши божественную помощь, яко пастух милостивый от гордаго мя зверя исхити, якоже трие воеводы. Первие Троицы быв служитель, и молитвы творя к ней, прииди и возстави мя от глубины согрешений моих. Отче Николае! Заступи мя в день страшный и от муки изми и свободи мя от тьмы несветимыя и от скрежета зубнаго. Святителю! да победит множество щедрот твоих соблазн моих бездну. Егда хощет ми судити Зижитель, испытая зол моих множество, и тогда да обрящю тя помощника, избавляющаго мя от напасти видимых и невидимых враг моих. Святителю, молитвами си исцели и избави! Покажи, отче Николае, твоими молитвами бодра мя к Богу, от всякаго мя избави кова бесов. Христе Боже, молитвами пречистыя Твоея матере муки страшныя избави: свеси бо моя согрешения многая, но сия очисти по благости. Свят, свят, свят еси во векы веком. Аминь.

_______________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.275.

*

В ЧЕТВЕРТОК СВЯТЫМ АПОСТОЛОМ МОЛИТВА КИРИЛА МНИХА ТУРОВСКАГО

Владыкы Господа Исуса Христа божественым апостолом верховным и възлюбленным учеником Твоим Петру въистину славному и Павлу поистине чюдному, и обанадесяте: Андрею, Иакову и Иоанну, Луки и Матфею, Марку, Симону, Варфоломею, Фоме и Филиппу, и вся вкупе 70 апостолом Твоим избранным с умилением и съкрушением сердца и с воздыханием припадая и молюся о души. Что не въспрянеши, душе моя окаанная и тело многогрешное, съгрешающи по вся дни? Почто не останешися, преступающи заповеди Божиа, преданныя ти // 298 на съблюдение, и которую от Христа милость приимеши, аще не преже конца останешися пути истиннаго, ведущаго в жизнь вечную? Въспряни, душе моа убогаа, от сна греховнаго и въсплачися поне ныне о злых своих делех, имиже прогневах Творца своего и Владыку живодавца и благодателя, ожидающаго моего покааниа, егоже не съхраних, всепагубный аз многогрешный (имярек), яже исперва се делах, отнели же крещен есмь в всей жизни моей и да иже и до сего часа в нощи и в дни. Съгреших паче всех человек и паче песка морскаго елико отречено святыми книгами и елико отрекохся в святом крещении и в обещании мнишескаго жития, имиже по крещеннем обете и по обещании иноческаго житиа и сущеньство не съхраних чисто, оскверних блудом душу и тело, в том в всем сългах и преступих. Аз есмь бездна грехом, а Ты, Владыко Исусе Христе Боже мой, - бездна милости; аще бо праведна- // 298об. го помилуеши - ничтоже велие, аще чистаго спасеши - ничтоже дивно, достойни бо суть милости Твоея. Но и на мне паче, Владыко, окаяннем и грешнем и скверненем, сътвори милость Свою и покажи благоютробие Свое многое! Господи, приими мое ныне, многогрешнаго, покаание (имярек) и отпусти ми вся съгрешениа и вся злаа моя дела, а и последнему греху несть числа. Ни в мертвых, ни в живых мене окаяннее и грешнее несть, Ты Сам веси, благоютробне, мое окаанство, мое безаконие и мои бесчислении греси, понеже бо аз, яко кал любовещный, греховную скверну выну желаю, но Ты яко Бог всесилен и милостив и щедр, можеши ми възбранити; аще хоще или не хощу, спаси мя, грешнаго, неизреченныа милости Твоея ради и человеколюбиа, иже праведники любяй и грешных милуя, всех зовый к спасению за обещание ради будущих благ! Сам, Господи, приими и услыши малое моление сие в чяс сей!

О всечестьнии и // 299 всехвалнии апостоли и ученици Христови Петре и Павле и вся десятица и прочий седмьдесят вкупе апостоли, избраннии Христом Богом нашим! Услышите мя ныне в чяс сей и вонмите малое моление се к вам приносяща! Выну непрестаита поминайте мя, многогрешнаго раба вашего (имярек) Царю небесному Исусу Христу и Богу истинному нашему! Молитвенници о всем мире, и спасителе душам нашим, велиции скории заступници христианом, молящимся услышатели, грешником споручници в спасение, покааниа възвестници, Небеснаго Царствиа проповедници! укрепите мя ныне от душа покаати ми ся, Господни апостоли, и прощение грехом моим злым у Христа испросите и Царствиа Его сподобите мя! Умолите Его благость о мне, естеством бо благосерд есть и человеколюбив! Предложше к Нему на умоление за мя, еже в благовестии за имя Его пострадание ваше, памятьствует убо Владыка Христос предложение ваю к Нему и душа ваша положение // 299об. в скорбь и смерть Его ради и никакоже не презрит молениа вашего о нас, но в всем прошении вашем послушает вас яко искренних друг и ученик Своих възлюбленных паче всех превеличеств, вы ко тою почести вам от Него почтенном, близ у Себе учреди, дванадесяте престоли, дарованным в седение с присносущней с Ним славе Его выну Того зрети и наследники Царствиа Своего створи съцарствовати вечно с Собою, исплънь обещание реченно к вам: Да идеже есмь Аз - пречистыми усты Своими рече - и вы будете с Мною!

Темже молю вас, от Господа и Царя и Бога моего ученици и апостоли! молите ныне избавитися мне от всех злых обьстоаниих вражиих и от злохитрественых того на мя ухищрении наведения, аще бо и повреди мя, но Владыка Христос Сын Бога живаго - врачь душам и телом нашим есть целитель и спасение душам нашим, и ныне схранити ми ся вами от всякого ядовитаго прилога диаволскаго невре- // 300 женна, яко да вашим заступлением и помощи спасаем, и в покаании жизнь сию преиду, и онех вечных блаженств насладитися и Небеснаго Царства вами сподобити ми ся, славу и хвалу и благодарение, честь и покланяние всех Създателю възсылаем иже в Троици единому Богу Отцу и Сыну и Святому Духу и ныне, и присно, и в векы веком. Аминь.

__________________________________

"Псалтырь с восследованием митрополита Филиппа Колычева". XVI в. Росс. нац. библ., Соловецкий сбор. 711/819. Л. 297об. - 300.

*

//161 МОЛИТВА В ЧЕТВЕРТОК ПО УТРЕНИ

Душе моя! согрешающи по вся дни, почто не востягнешися, преступающи преданныя ти заповеди? Кую приимеши от Бога милость, аще не прежде конца останеши сластолюбиваго хотения, удаляющаго тя от жизни! Воспряни, убогая душе, от сна греховнаго и восплачися //161об. злых своих дел, имиже прогнева Творца своего Владыку и животодавца и благодателя, ожидающа моего покаяния. И ныне останися несытых помысл, горьких и тлетворных скверн уклонися и припади, вопиющи к божественым апостолом, да помолятся Христу подати ми оставление грехов.

Святый апостоле //162 Петре, первый престольниче, твердый каменю веры, недвижимое основание Церкви, пастуше словеснаго стада Христова, ключарю Небеснаго Царствия, ловче глубины неразумия! тя молю, всечестне: да обимет мя божественая мрежа, да извлечет мя из глубины погибелныя! Вем бо тя от Бога приимша власть //162об. вязати и решати; разреши, молю ти ся, связана мя узами греховными, покажи милость твою на мне, убозем рабе (имярек) и оживи смиренную мою душю, якоже прежде Тавифу из мертвых воскреси, востави мя на течение благо, иже в Красных вратех хромаго здрава сотвори и словом своим недуги и бо- //163 лезни всякия отгониши. Да осенит мя твоя благодать, исцеляющи душевныя болезни и прогоняющи телесныя недуги: вся бо можеши, пресвяте, силою Христовою, Егоже ради вся оставил еси и Того возлюбил еси и святым стопам последовал еси, за имя Его узы поносил еси! к Нему помолися за мя окаяннаго, //163об. да избавлюся от всякаго зла твоими молитвами!

Святый апостоле Павле, возлюбленниче Христов, небесный человече, земный аггеле, проповедниче святыя веры, всех язык учителю, церковная трубо, высоколетающий орле и небесных тайн сказателю, пресловущий ветие и вместилище духовное! многия беды пострадав //164 за имя Христово, пекийся вельми християны! Забываяй раны на телеси, море промерив, замлю [Так в публикации - О.Л.] обшед и нас обратив от лести идольския! тя молю и к тебе вопию: Не гнушайся мене сквернаго, не презри мене ослепша душевныма очима! Возстави убогаго и разслабленнаго греховною леностию, ибо ты в Листрех от чрева //164об. роженнаго хромца с Варнавою возставил еси и Евтиха мертва бывша оживил еси; воскреси и мене от мертвых дел! Иже молитвою основание темницы потрясе и узники разреши, вся бо можеши данною ти властию! исторгни мя от сети вражия и укрепи мя творити добрая дела, яко сый великий //165 апостол Павел!

Святый Иоанне Богослове, Сыну Громов, наперстниче Христов, девьственый сосуде, одушевленная Церкви, медоточный языче, громогласная уста, Асийское утвержение, Ефесское похваление, Патомский учителю, всего мира хранителю, Христова Евангелия списателю, //165об. надежде моя и прибежище! не остави мене от твоего заступления, не прогневайся на мя, грешнаго! Иже сына Диоскорова воскреси в бани и воина из моря по седми часех жива отцу его извлече, и прокаженна в горе прикосновением руку исцели, и преклонив от душегубнаго хотения! избави //166 такоже и мене от всякаго греха, яко к тебе упование мое возложих!

Святый Луко, божественый евангелисте, духовный скорописче, богомудрый врачю! Услыши молитву мою, уврачюй страсти души моея и не презри мене, уязвленнаго вражиими стрелами, можеши бо исцелити мя и от сего часа здраваго сотворити!

//166об. Святый Марко, Александрийский и Египетский светильниче, Христовых тайн списателю, работав Христову Евангелию! моли за ны человеколюбца Бога, да порабощу плоть Христовым заповедем, да свобожду душю от работы лукаваго твоими молитвами!

Святый Матфее, оставивль мытницу и все греховное собрание разсыпав, восприял //167 еси на небесех неизживаемое богатство, сказавый нам второе пришествие Христово, егда явится с небес со множеством аггел, со славою небесною, врагы устрашая, верных веселяй; тогда и вы сядете на престолех, судяще языком.

Увы мне! како явлюся аз тогда, грешный, всякаго зла исполнен? Но будите ми помощницы //167об. и укрепите мя на течение блага, да избавите мя от вечныя муки! Вси святии богоизбраннии апостоли Андрее, Иякове, Фомо, Варфоломее, Симоне, Филиппе, Христовы угодницы, лести искоренители и веры насадители! Услышите мя грешнаго, надеющагося на вы, уже бо несть ми //168 от дел спасения, аще не покрыете мене от всякаго коварства вражия! Се бо яко, лев рыкая ходит, хотяй мя поглотити; но сокрушите ему главу вражию и расторгните челюсти его, и мене избавите вашими молитвами, да бых еще на сем свете моих грехов покаялся, еликоже сотворих на убогую мою душю! Еще молю Тя, Владыко, от иных //168об. очисти мя грехов и даждь ми благодать разума моему недостоинству. Ты бо еси Христос Сын Божий! Даяй молитву молящемуся, приими покаяние мое и отпусти нечестие сердца моего и спаси мя по милости Твоей, яко аз раб Твой есмь и сын рабы Твоея! не даждь во смятение ногу моею, ни да воздремлет //169 храняй мя аггел, но вразуми смиренную ми душю и очисти, да не возвращуся уничижен и прискорбен, но да получю ихже желаю безконечных благ. И еще молю Тя, Пресвятый Царю: помяни мя милостию и щедротами, раба Своего (имярек) и вся православныя християны, и отпусти //169об. им всякая прегрешения вольная и невольная, молитвами святыя Богородицы и всех святых Твоих помилуй нас и спаси душа наша, яко Ты еси Бог наш, и Тебе славу возсылаем Отцу и Сыну и Святому Духу ныне и присно и во веки веков. Аминь.

________________________________

"Молитвенник" XVII в. Рос. нац. библ. (СПб.), Q. 43. Л.97-225.

МОЛИТВА ПО ЗАУТРЕНИИ В ЧЕТВЕРТОК СВЯТОМУ НИКОЛЕ

Владыко Христе Боже наш, иже благослови Сын и агнец, честнейши Спаситель, унице непорочный, иже паче мирныя благодати ради святитель нашь быти восхотев, иже различными чинми святую Церковь украсив, еюже честною си кровию и- //120об. скупив! даруй нам преподобных Ти память присно духовне призыва ю Ти, и в преподобии поминати святых пастырей и учителей наших, исправлеших слово истинны Твоея, просветивших нас, ихже наставил еси ко пристанищю хотений Твоих и прославил еси до- //121 стойне, яко и тии Та прославиша. Сподоби нас молитвами тех и молением, паче же еже во днешний день почитати светильниками учителя иже во святых отца нашего Николы архиепископа Мир Ликийскых [Так в публикации - О.Л.] чюдотворца! Сподобивый того по излишнему святительства паствы //121об. за труд мздовоздания венца, Сам жительства того светлостию осияй мя, грешнаго раба Твоего (имярек), и настави на путь повелений Твоих непорочне и непредкновенне жительствовати, яко да со страхом Ти работавшие обрящу с ними, еже от Тебе благодать и человеко- //122 любие, Ты бо еси податель да венец вечных Твоих благ, и Тебе подобает слава и честь и дръжава ныне и присно и в веки веком!

_________________________

"Сборник молитв" сер. XVII в. Росс. нац. библ., Общество любителей древней письменности, Q. 43. Л. 120-122. [Ср. ссылку в произведении № 15 - О.Л.]

МОЛИТВА В ЧЕТВЕРТОК ПО ЧАСЕХ

Владыко Господи! Твой есть день и Твоя есть нощь, //170об. Тебе вся тварь работает и всяко дыхание хвалит Тя! Аз же, окаянный, все житие мое скончав блудно, страхом одержим есмь, яко помянух дни первыя и доныне, в няже вся нечювственая сотворих злая и того ради не имам к Тебе дерзновения, яко беззакония моя велика и пристрашни //171 греси мои. Врази мои стужают ми, но, Господи мой Господи, отверзый устне немому, и моя уста отверзи, да глаголю в молитве угодная Тебе! Се бо душа моя, яко земля безводна оста, не может приносити плода; но даждь ми от семяне святаго Твоего, напои росою благодати Твоея, //171об. да принесу Ти плод покаяния. Господи Иисусе Христе, хотяй всем человеком спастися! услыши молитву мою молитвами святых апостол Твоих, яко тии молят за ны! И аз у Тебе прошу прощения, яко тех молитвы присно послушаеши, и молением их спаси мя, грешнаго, исцели болезни сердца моего и изврачюй //172 струпы души моея, разждези [? Так в публикации - О.Л.] утробы моя пламенем страха Твоего, да пояст терние грехов моих, и душю мою любовию прохлади. К Тебе бо желаю, ко истинному Свету, Подателю света, у Тебе единаго прошу милости, и спаси мя, напои жаждущую душу мою от безчисленнаго человеколюбия Твоего, //172об. да покрыет мя благодать человеколюбия Твоего от всякаго зла, да, Тобою храним, избавлюся многих сетей лукаваго, по вся дни на мя препинаемых, и да не похвалятся врази мои о мне, рабе Твоем, уповающем на Тя! И спаси мя по милости Твоей, да воздам обеты моя //173 до последняго издыхания, каяйся в своих прегрешениих, и прославлю пречестное имя Твое, Отца и Сына и Святаго Духа ныне и присно и во веки веков. Аминь.

__________________________________

"Молитвенник" XVII в. Рос. нац. библ. (СПб.), Q. 43. Л.97-225.

//173об. МОЛИТВА В ЧЕТВЕРТОК ПО ВЕЧЕРНИ

Крест души востание и живот вечный, свет Сын Божий; крест слава аггелом, крест супостатом победитель и избавитель человеком. Христе Боже наш, Иже нашего ради спасения от безначалнаго Ти Отца пришел от вышняго круга небеснаго в нижния части земли, //174 Бог сый непременен, в наше естество оболкся и бысть человек за многое и неисповедимое милосердие Твое данное Ти достояние языком да к Себе приведеши изятых от уст стараго врага и мучителя диявола, емуже поработихомся грехом чадо Твое суще и жребий желанный, //174об. о них же рече: Ины овца имам! И ныне не попусти ми, Господи, скончатися во гресех, яко к Тебе привержен бых от юности моея и от утробы матере моея. Бог мой еси Ты; не даждь о мне радости быти бесу, Ты бо свеси удобь прелестное человеческое естество; но имиже Ты све- //175 си судбами спаси мя! Несть бо во мне ни единагоже нрава, спасающаго мя, но весь нищь есмь и убог без Твоея помощи, напраснив родом, свиреп естеством, похотник греху, злу волю имый, поминатель злу и забыватель добру, преступник клятве, обидлив //175об. паче всех, скор на свар, на смирение разслаблен, ревнив на блуд, на молитву ленив, изобилуяй ядением и питием излишен, несыт немилосердием, вся благодеяния отвергох от себе и вся неподобная вселишася в мя. Но, Господи, Господи! туне поминаяй человеки, туне и спаси мя! //176 Вем Тя рекшаго: Приидите ко Мне, вси тружающиися и обремененнии и Аз упокою вы! Не презри мене, Господи, утруждьшагося в делех неприязненых, поревающагося тяготою безаконий, но возми бремя греховное от мене яко имеяй множество щедрот и сподоби мя, //176об. недостойнаго раба Твоего (имярек) в последний час дня сего поклонитися славе Твоей и вечернюю молитву приносити, еже обеща рабом Твоим в молитве просящим у Тебе, Ты бо свеси, Владыко, тайная сердец наших, егоже требуем. Даждь им, Господи, убежати //177 всякаго зла и диавольскаго искушения и прости мя от прежде сотворенных грехов и собери ум мой от плотских похотей, уклони сердце мое от человеческыя хвалы, да о согрешениих каюся, о падениих умилюся и о беззакониих прослезюся и да во приидущую нощь не объят //177об. буду греховым мраком и сном тяжким, но укрепи мя на всенощное пение силою Твоею неизреченнаго божества! И даждь очима моима легок сон и без мечтания, и без смущения, и ко утренему возстави мя хвалению, светом заповедей Твоих просвещаяй разу- //178 мне мои очи, отврати нозе мои от всякаго пути зла, настави мя в след повелений Твоих присно и поминати Тя в душевной ми церкви, в словеснем храме тела моего, да прочее время непорочно скончав десныя Ти страны причастник буду и со всеми от века угождьшими Ти, //178об. с нимиже введи мя в духовный Твой двор и причти мя избраннем Твоем стаде словесных овец, ихже ради кровь Свою излил еси. Ты бо еси Бог мой и аз раб Твой и Тебе славу возсылаю со Отцом и со Святым Духом ныне и присно и во веки веков. Аминь.

__________________________________

МОЛИТВА В ПЯТОК ПО УТРЕНИ

Како своего ныне восплачюся отпадения? Како ли явлюся //179об. лицу Твоему, Владыко всем Господи? Что принесу Ти, ихже требуеши или что воздам, полн сый всякаго безакония и нечистоты? Киим ли образом избавлюся муки, яко от рождения моего и доныне вся злая содеях, понеже ни во един день истинна покаяния показах? Но аще час //180 каюся, а время беззаконную, яко пес возвращаяся на своя блевотины, вся благая восприим, ко страстем нечестияуклонихся от Тебе, поработихся скверным похотем, приложихся неразумным скотем. Несть бо никтоже на земли прогневаяй Тебе, якоже аз, и несмь достоин во- //180об. зрети на высоту небесную от множества беззаконий моих. Аще бо и простру окаяннии мои руце, мню, яко воздух осквернится. Коим ли словом помолюся злоглаголивым языком? А егоже не имам, то како воздам? Ни слез, ни терпения не стяжах, чистоту же и правду от деть- //181 ства погубих, побежден быв от сластолюбия злокозненым врагом и впадохся в плотския похоти, погубих образ первыя доброты и весь ум мой в земная уклоних и отидох душею от Твоея воли далече и волею поработихся похотному бесу, о- //181об. ставил аггельское брашно и всех аггельских ядей лишихся, изволих паче со свиниями рожци временными страстьми питатися. Разумех бридость греховнаго вкуса, яко в час токмо насладит, а во веки мучит; мысленым гладом изнемогаю и доселе не возвратихся, //182 яко блудный сын; ни стяжах мытоимча стонания, ни блудници слез, ни ханаоныня веры, ни сотнича смирения, ни разбойнича исповеданиа, но яко Каин помыслих потаити души моея убийство, забыв испытающаго тайная сердца. Но аще аз умолчю, то дела //182об. возопиют, такова бо имамы клеветника диавола, не могуща молчати. Того ради не жду обличающаго мя, но яко Ламех исповедаю на мя беззакония моя злая. Время живота моего скратися, скверны же души моея умножишася, ибо вся прежде закона //183 и в законе чрез естество согрешившия уведех и тех дела нечестивно восприем, нечаянием весь одержим, люте потоплен бых и приях мщение злобы, якоже и при Нои блуд творящии народи. Оставих бо- [...] ковчег, доброе безмолвие и соградих, яко //183об. столп, высокомысленыя глаголы, клеветы же и лжи боговещанными словесы утвердих, имиже прогневах моего Творца. Размешен бых умом, не вем, что глаголю, отверг страх Божий, яко содомлянин беззаконновах, не восхотех верою избежати похотнаго за- //184 паления, но пребых и доселе любодейством одержим и боюся геенскаго огня, в немже ми есть сожжену быти, ни оставих обычнаго греха, да бых пришел на землю упокоения, юже Авраам наследова и друг Божий наречеся. Но приидох, окаянный, во мрак //184об. темен невоздержанием и тем осудихся и всякия добродетели чюжд бых, ни единагоже нрава праведных восприях: ни Исаакова послушания, ни Ияковля благоверия, ни Моисеевы кротости, ни Иовова терпения, ни Осифова воздержания, но //185 яко Дафан и Авирон прекоречествовав. Да что сотворю не веде, к кому прибегну, избавления просяй, токмо к Тебе, Творче мой! Вем бо Твое долготерпение и беззлобие и человеколюбие, и кто исповест от века чюдеса Твоя и услышаны сотворит //185об. похвалы милости Твоея, яко не радуешися о смерти грешничи, но о обращении и о животе его веселишися. Того ради покаяния образ показа исперва: и Исраиля древле прогневавшаго Тя в пустыни покаяния ради помилова, Ниневвитяны помиловав //186 спасе, Манасию от уз избави, Иезекию от смерти в живот возврати. Что бо более покаяния, на неже благоволит Дух Святый Твой? Вся бо правда человеча яко платно паучиное удобь раздираемо! Кто бо похвалится пред Тобою правым сердцем или чист быти без //186об. греха? Фарисей праведен сый похвалися, осужден бысть! Аз, окаянный, объят быв множеством грехов, что сотворю или в кую пропасть себе врину? Не имею бо силы слезныя, ни покаяния истинна, егоже ради, Владыко Господи, Давида освяти и пророка показа, //187 и мытаря оправда, и блудницу очисти и блуднаго сына потщався срете и божественыя трапезы причастника сотвори.

Того ради и аз биюся в перси и вопию из глубины сердца: Владыко Господи Иисусе Христе! легеон бесовский древле умоли Тя //187об. да не в бездну послеши их и, получив Твою милость, в стадо свиное устремися; тем же и аз молюся. Сыне Божий, да не послеши мя в дебри огненыя за множество зол моих, недостойна бо сотворих себе Небеснаго Царствия, но едину обитель Отца Твоего //188 подаждь ми, яко не праведных ради на землю сошел еси, якоже рече неложный Боже: Не прииде звати праведных, но грешных на покаяние, яко не требуют здравии врача, но болящии. Приими мя, кающагося о сотворенных ми делех, не презри мене //188об. в скверном пути и в греховней удолии в мысленныя разбойники впадша и всякия добродетели совлеченна и сластьми люте уязвленна и неисцельным боляща душевредным похотением. Но Ты Сам, Иисусе спасенное имя, безначальнаго Отца //189 безлетный Сыне и Святаго Духа единородная ипостаси, триличное Божество, Имже всяческая совершена быша видимая же и невидимая, Прясвятый Царю, едине безсмертне человеколюбче, нас ради грешных от Отческих недр от небесныя славы пришед, //189об. раны же и распятие претерпети изволил еси и непорочное Твое тело нечестно повешено презрев, побежден быв премногими щедротами и человеколюбием, в мертвых причтеся и таковым смотрением погубил еси мучителя диявола, разорив и- //190 мущаго державу смерти и все воинство демонское явлением креста Твоего разгнал еси и в преисподняя вшед, адово царство разруши и вся связанныя вечныя мертвецы и пророки воскреси и от сетования тленнаго на веселие приведе //190об. и на первое блаженство возведе, един бо еси чист и непорочен, за грешники пострадавый. Аз же осквернен душею и телом; но очисти мя из ребр истекшею Ти кровию и пригвозди страсе Твоем плоть мою и животворящим умерщвлением Твоим уме- //191 ртви уды телеси моего на зло подвижающыяся, взыщи мене яко заблуждьшаго овчате, егоже на рамо взем ко Отцу принеси и аггельския чины на радость призови, вся бо можеши, елико хощеши! Душелюбче, светодавче, осияй ми омеркшый ум //191об. многою [...] да не до конца обимет мя темный князь жаданием плотским к своему хотению нудит поработити, да не малыя сласти ради века сего от святаго чертога изгнан буду, но //192 обычною Ти милостию на мою молитву призри и приими моление раба Твоего (имярек) и не осуди мене со беззаконьми моими, ни по грехом моим воздаждь ми, яко беззакония моя аз знаю и ныне каюся о гресех моих. Ты веси немощь естества моего, //192об. Зиждителю мой; и даждь ми крепость и силу, постави нозе мои на камени исповедания и очисти душю мою от всякаго греха, отжени нечистыя помыслы от страстнаго ми сердца, даруй устом моим тихое глаголание и очима моима источник //193 слезам и весь злобный терн от ума моего отжени; слух же ушию моею да оградит мя божествеными Твоими заповедьми. Научи руце мои к Тебе простирати и всего мя учини Своего угодника, да и на мне удивится Твоя милость //193об. и вси уведят человеколюбие Твое, яко помилова и спасе мене грешнаго. Всесильне, беззлобиве, долготерпеливе Спасе! дел руку Твоею не презри, ни рци, Господи в день он: Не веде тебе! Ни, Господи: не отвратися со гневом от мене, не забуди, Владыко, труда ра- //194 ба Твоего, ни посли мене во огнь, егоже душа моя трепещет, к Тебе бо прибегох и очи души моея возведох и руце прострох и колене преклоняю, и из глубины сердца воздышю, и языком моляся вопию: Помилуй мя, Боже, по велицей милости Твоей, //194об. по многим щедротам Твоим очисти беззаконие мое, яко не мертвии восхвалят Тя, ни сущии во аде исповедят Ти ся, но мы, грешнии, благословим Тя и молимся, просяще Твоея милости! Сам бо рекл еси, Господи мой: Просите да приимете, яко //195 грядущаго ко Мне не иждену вон! Яко велико величество Твое, тако и милость Твоя безчисленна есть, Ты бо ни единому человеку погибнути волиши, но глубиною судеб Твоих спастися всем хощеши. Ей, Господи мой Боже, Пресвятый Царю! и еще молю Ти ся: помяни //195об. милостию рабы Твоя (имярек) и даждь им оставление грехов и соблюди мя от всякаго греха и огради мя силою креста Твоего, Ты бо еси Бог мой и аз грешный раб Твой, и к Тебе воп[...]ию спасения просяй, Твоя бо есмы тварь и создание, и Тебе славу воз- //196 сылаем Отцу и Сыну и Святому Духу ныне и присно и во веки веков. Аминь.

_______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В ПЯТОК ПО ЧАСЕХ

Что Ти воздам, //197об. Господи Иисусе Христе, Сыне Божий, за вся яже еси сотворил еси благая роду человеческому или кую мзду принесу Твоей милости? Ни небо, ни земля не может Тебе достойно воздати дар! Яко Сам изволил еси приити и спасти грешныя, во- //198 плотися бесплотен сый и волею обнища богатый. И аз отметник бых Твоих щедрот и прогневах Тя паче всех; но нас ради страсти прием исцели страсти сердца моего и изволивый осудитися, тернием венчан, души моея терние искорени; связавыйся волею //198об. и раны прием, разреши узы моих зол и от ран мя вечных избави; поругания претерпев на кресте пригвозди Ти ся изволив, ищущаго мя врага Своим крестом посрами, пригвозди страсе Твоем плоть мою; на трости губою оцта нуждею вкуси, заглади рукопи- //199 сание сладостнаго ми греха и в книги мя животная напиши; поколебавый основания земли и камение рассадив, утверди мя на камени веры Твоея и неподвижна мя прочее соблюди; солнце во тму преложив, язву копия в ребра прием, //199об. тму ума моего просвети и великую язву зол моих уврачюй; кровь и воду на очищение Своего создания источивый даждь слезы очима моима, да очищу скверну беззаконий моих; разбойника оправдал еси единою возопивша, помяни мя, Господи, во //200 Царствии Си! Ей, Господи Боже мой! и мене помяни, безпрестанно вопиюща к Тебе и тоя части сподоби; приемый Петра плакавшася и мое приими покаяние; во гробе плотию полежав, умерщвена мя злыми делы от гроба нечаяния //200об. воздвигни, да чистым сердцем прославляю креста Твоего силу: тем бо диавола победи и умершая с Собою воскреси. И за сия вся что Ти воздам аз окаянный? токмо покаяние и воздыхание и исповедание! Яко да сие приим, Спасе мой, конец благ даруй //201 ми и сподоби мя одесную Тебе стати в день судный и слышати глас Твой святый, глаголющу Ти: Приидите, благословеннии Отца Моего, приимите уготованное вам Царствие! Ты бо еси истинный Бог наш, Тобою надеемся избыти всякаго зла, славящий Тя со //201об. Отцем и со Святым Духом ныне и присно и во веки веков. Аминь.

_________________________________

//202 МОЛИТВА В ПЯТОК ПО ВЕЧЕРНИ

От нощи к вам, утренююще, святители, пророци и мученицы Господни, мысль мою прегрешений бури избавите и смердящую душю мою страстьми вашими заступлении исцелите, молюся вам; сердце мое колеблющееся от неприязни утвердите, воздыхание //202об. мое услышите! Пророцы Господни Иоанне Предотече, пророче и крестителю! в пути заповедей Христовых направи мя ходити благодатно! Моисею, Аароне, Илье и Елисею! яко столпи церковнии укрепите мя волю Божию деяти! Захарие, Иосие, Давиде, Науме, Нафане! //203 дайте мне просвещение и милость! Авдее, Софоние, Самуиле, Ионо, Аввакуме, Данииле, Иоиле, Варуше! молитеся за мя ко Господу! Михее, Малахие, Иезекие, Аггее, Амосе, Ахие и вси святии пророцы Господни! моя мольбы приимите и победника мя страстем //203об. явите! Славнии пророцы, верным поборницы и заступницы, святителие блаженнии и священномученицы и преподобнии отцы, постницы и черноризцы, пустынницы! молитеся за мя даровати ми прощение вашими молитвами! Святии мученицы, излиявше кровь Христа ради //204 и тело предавше мукам, со аггелы ныне предстоящи! молите за мя убогаго! И лик святых мироносиц и святая жены, мученицы же и постницы, преподобныя святыя девы! молитеся ко Господу за мя, грешнаго! Вси святии апостоли, пророцы и мученицы, святители, преподобнии и пра- //204об. веднии! молитеся Христови прежде усопшим верным отпущение согрешением даровати, избавите их будущаго оного огня и червия и вечныя муки и пищи райския прияти сподобите! Безначальный Господи, великий Царю, Творче веком и всему дыханию! покажи Твоя многия щедроты //205 на нас, да не постыдимся на суде Твоем! Ты бо рекл еси воистину призывающим имя Твое: Призови Мя и избавлю тя! Сам убо един милостивый и праведный, не отлучи мене стояния онаго Твоих овец одесную Тебе стати, яко Твоя держава и Твое есть Царство Отца //205об. и Сына и Святаго Духа ныне и присно и во веки веков. Аминь.

______________________________

"Молитвенник" XVII в. Рос. нац. библ. (СПб.), Q. 43. Л.97-225.

*

МОЛИТВА В ПЯТОК ПО ВЕЧЕРНИ

Владыко Господи Вседержителю, Боже отец наших, веком Творче и концени Сведителю, исчитая лета и времена измеряя, живущим на земли животу же и смерти имея власть! Не остави мене, Господи, отинудь растлети в беззакониих, ни гнева, противу делом достойна, не посли на мя, но услыши глас молитвы моея! Благоволив превести мя житейскую пучину мноземи волнами греховными погрязнути хотящаго, иже и сего дне долготу сподобил еси сконцати и к началу нощи приблизитися, еяже не чаю прейти, бесовьскым объят мечтанием и тмою греховною покрываем, в нюже спаси мя от всякаго совета вражия и всякыя скорби и напасти, нужа и печали и скверных мыслей, яже беспрестани стужают окаанней ми души! Ты бо еси Бог мой и всякаго добра податель, иже и преже прошениа дая, изобилова рабом своим благаа! помяни смирение мое и отверзи устне мои на славословие Твое, и приими вечернюю сию молитву, и дай же невозбранно ми тещи к заповедем Твоим, не вотще трудитися маловериа моего ради! Ты бо рече: Възови Мя и избавлю тя. Избави мя, Господи, от всякыя козни диявола и управи живот мой! Се бо с страхом предстою Ти, на множество щедрот Твоих взираю выну и умилением душа припадаю. От неполезных мыслей уклони сердце мое и ум мой к Тебе впери, дайждь [Так в публикации - О.Л.] ми, Господи, отныне время покаяния, яко пришлец есмь аз, якоже и все отци мои; се бо, яко трава, заутра процветох и на вечер отъпаду и исъхну. Исцели мя, Милостиве, зле уязвеннаго греховным жалом, преже даже не отъиду и к тому не буду, яко не мертвии въсхвалят Тя, в аде же кто исповест Ти ся! Ей, Владыко, Спасе душ наших, даровавый нам надежу въскресения верующим Тя! покой душу раб Своих отец и братию нашю (имярек) и всякаго племени Христианьскаго роду, мужеска полу и женьска, и всех елико в Тя вероваша Иисуса Христа, Сына Божиа! Ты бо рече: Веруяй в Мя не умрет, но имат живот вечный, егоже и мене причастника сътвори в земли кроткых, в селех святых, в неразоримых храмех, в горнем Ерусалиме, в немерцающем свете и нестареющемся блаженном оном веце, в бесконечней жизни, идеже несть болезни, ни печали, ни въздыханиа, ни дъявола на зло подвизающа, на греха тлю творящаго, но радость неисповедима и веселие неизреченное, и праведник множество, пророк чинове, апостол ликове, мученик полци, страстотерпец хоругви, святитель събори, преподобных толпы, пустынник совокупление и святых жен крепкодушие, и святых покоище, от века угодившим Тебе, единому истинному Богу нашему, Отцу и Сыну и Святому Духу и ныне и присно и во векы веком. Аминь.

_______________________________

Источник не указан. Публикация по кн.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.289-290.

МОЛИТВА В СУБОТУ ПО УТРЕНИ ЗА ВСЯ ХРИСТИЯНЫ

//206 Едине благий человеколюбче сый со Отцем и Святым Духом, Бог всесилен, едине милостиве, имеяй власть и послушаяй на всяком месте молящих Ти ся и подаяй всяко прошение рабом Своим еже ко спасению! Услыши мя, грешнаго раба Твоего (имярек), молящагося к Тебе в сокрушении //206об. сердца, просяща очищение грехов от Твоея благодати! Исправи, Господи, путь мой вслед Твоих повелений ходити ми, бежати же от всякаго путя вражия лукаваго. Ей, Владыко Господи Боже, Творче небес и земли, безначальне и невидиме, неодержиме, неисписанне, единадержава сый со Отцем //207 и Святым Духом! Моля, молю Ти ся Твоей воли быти на мне, да не яко свирепое животно о себе [вариант: "особе"] пасыйся, от злых хищник враг удобь уловлен буду! Пастуше добрый! не отлучи мене избранных овец ограды, но яко благ покрый мя Твоим заступлением и вся //207об. уды телесе моего честным крестом Твоим утверди; сердце чисто созижди во мне. Боже, и дух прав обнови во утробе моей, наполни радости уста моя, соблюди душю мою от крамолы лстиваго во вся дни живота моего и да зрита очи мои света судеб Твоих, //208 да не углебну в тине злых дел! Вем бо, Господи, яко не токмо дела, но и словеса и мысли к Тебе приносятся, да тем ужасаюся и трепещу праведнаго испытания, яко несть ничтоже утаено от лица очию Твоею, но того ради дерзаю, понеже Сам рече пророком Своим: //208об. исповеждь ты прежде грехи своя да очистишися! Но откуду начну глаголати моих грехов множество? Кое ли начало исповедания обрящу? О чем ли первое прощения просити дерзну? И несть ни единыя злобы и беззакония, егоже аз окаянный не содеях! Но надеяйся //209 на Твое великое безчисленное неисповедимое милосердие, молю Ти ся, пришедшему на взыскание погибших и на возвращение заблуждьших. Пострадавый за мя, недостойнаго, не за мое недостояние, но за Твою великую милость закон даст согрешающим, пророки //209об. пристави и апостоли посла, вся призываяй в жизнь вечную! Тя молю единаго благаго и благопослушливаго, от святыя Девы воплощшася и сообразен быв телесе смирения нашего, да ны сообразны слав[...] сотвориши, под законом быв и поживе в мире закону Творец //210 и всей твари Господь, обративый ны от идольския лести. Ей, Господи, молю Ти ся: помяни святую Твою кровь, юже излия на ны, грешныя, не предаждь мене в радость ненавидящим мя, ни истяжи от мене словес в день испытания! И ныне, Владыко Господи, услыши мя, недостойнаго раба //210об. Твоего (имярек), молящаго Ти ся о всех и за вся! Помяни, Господи, патриархи и митрополиты, архиепископы и епископы, архимандриты и игумены, иереи, диаконы и четцы и всякаго чина церковнаго, ихже постави пастыри словеснаго Ти стада и приими приноси- //211 мыя Ти молитвы от них за царя и князи и за вся.христианы! Помяни, Господи, великаго государя нашего царя и великаго князя (имярек), подаждь ему здравие телеси и души спасение, и державу его миром огради и укрепи его на сопостаты, землю угобзи, люди умножи, //211об. плененыя возврати восвояси, советуй благая о церквах Твоих и о иереех и диаконех и о всяком черноризческом чину. Помяни, Господи, ненавидящих и обидящих и любящих нас и творящих нам милостыню и кормящих нас и всех служащих нам и послужи- //212 вших, и посли им стократное воздаяние и даждь им в земных место небесная и в тленных место нетленная! Помяни, Господи, рабы Своя вся православныя християны (имярек) и не посрами ни единагоже нас, но подаждь нам всяко прошение душевное и телесное //212об. и не отврати лица Твоего от нас! Помяни, Господи, по множеству щедрот Твоих, и мене, недостойнаго раба Твоего (имярек); отпусти ми, Господи, всяко прегрешение вольное и невольное! И еще молю Ти ся, Владыко пресвятый: избави град сей и всяк град и страну от огня //213 и меча и потопа и от напрасныя смерти, от глада же и пагубы и труса и от нападения иноплеменник и от усобныя рати и от всякаго зла! Пресвятый Царю! припадаю Ти, моляйся: помяни, Господи, вся усопшия рабы Твоя, родители моя и весь род (имярек) //213об. и вся в православней вере почившая (имярек), и всех покой на месте светле, на месте покойне, и отпусти им всяко прегрешение волное и неволное, и сподоби их одесную Тебе стати и причастниками быти неизглаголаннаго веселия святых, Ты бо еси //214 Бог наш и Тебе славу возсылаю Пресвятей Троице: Отцу безначальну, всемогущу, вседержително безсмертну, неприступну, невидиму, веком творцу, единому премудру Богу, землю на водах основавшему и человека от земли создавшему! Слава Тебе, Сыну Божию, //214об. всесилну и пресвятому Слову, небеси творцу и присносущну начальному Свету, животному хлебу, обновителю мира, благому пастырю, прежде век роженну, Иисусу Христу, спасшему род человечь! Слава Святому Ти Духу, Господу самовластну, быстрообразну, огненосну, //215 крепку, невидиму, безначалну, животворящему, военачалнику безплотных сил, неразлучну от Божия существа, почивающему на верных, Ему же покланяние и славословие и молитвы возсылаем всегда ныне и присно и во веки веков. Аминь.

__________________________________

"Молитвенник" XVII в. Рос. нац. библ. (СПб.), Q. 43. Л.97-225.

МОЛИТВА В СУБОТУ ПО ЗАУТРЕНИ ВСЕМ СВЯТЫМ

Честнейши херувим и славнейши без сравнения серафим, Госпоже Владычице Богородице, рождьши Христа Бога нашего: в день печали моея услыши мя и помози ми грешному и окаянному! Святии ангели и архангели, херувими и серафими, престоли, господства, начала, власти и силы, Михаиле, Гавриле, Уриле, Рафаиле: подвигните с собою вся небесныя силы и молите Бога за мя грешнаго, дабы милостив был в час скорби моея. Святый и великий пророче Иоанне, Предтече и Крестителю Господень - в день беды моея помози ми скверному и безаконному. Святии первии праведници и велиции пророцы Еноше, Ное, Мелхиседече, Аврааме, Исааче, Иякове, Иосифе с единодесять патриархы, Моисею, Аароне, Исаие, Давиде, Илиа, Самоиле, Даниле, Иеремею, Иоиле, Захарие, Науме, Софоние, Аввакуме, Гедеоне, Иосие, Михею, Захарие, Авдию, Малахие, Елисею, Аммосе, Иезекиилю, Анание, Азарие, Мисаиле, Иона, Аггею, со всеми пророкы молитеся за мое окааньство и помилуйте мою душю, осквернившююся многыми злыми делы. Святии верховьнии велиции апостоли, избраннии Божии, Петре и Павле, Иоанне, Иакове, Аньдрею, Филиппе, Матфею, Луко, Марко, Фомо, Варфоломие, Иакове Алфеев, Иуда Иаковлю, Симоне Зилот, Варнава, Иаков, брат Господень, Прохор, Стефан архидиакон, Тимофей: подвигнете с собою все семьдесят ученик Христовых и молитеся за мя грешнаго и непотребнаго раба своего к милостивому Владыце и Господу Иисусу Христу. Святии страстотерпци и велиции мученици и исповедницы и безсребреници и чюдотворци и младенци Георгие, Дмитрие, Феодоре Тирон, Никите, Феодоре Стратилат, Гурие, Самоне, Авиве, Прокопие, Евстратие, Меркурие, Арефо, Мино, Акакие, Андрею Стратилат, Христофоре, Прове, Тараше, святии 40 мученик в Севастии, Александре, Сергие и Вакше, Борисе, Глебе, Михаиле княже, Феодоре, воеводо Трифоне, Нестере, Флоре, Лавре, Михаиле болгарин, еже есть святое детя, Козмо, Дамиане, Ермолае, Пантелеймоне, Кире, Иоане, Кириче трилетный, Мамонте, Саво Готфине, Галактионе, Хрисанфе, Стратонниче, Василиско, Кондрате, Кононе, Димитрие, иже в Даоде, и вси святии мученици, лик страстотерпец помолитеся Богу за мя лукаваго и лживаго к Богу и человеком, помилуйте мя грешнаго раба своего, избавите мя греховныя скорби. Святии святители и учители вселенной, столпи неподвижимии, утвержениа церковная: Деонисие Ареопагите, Иерофие, Игнатие, Лазаре, Климянтие, Василей Кесарийский, Григорей Богослов, Иоанне Златоуст, Николае, Силиверсте, Спиридоне, Григорие Милитенский, Петре Александрьский, Григорий Арменьский, Кирил Александрьский, Афонасей, Евстафие, Антиох, Анфиме, Амъфилохие, Григорие чюдотворче, Поликарпе, Ипполит папа Римский, Леонтий Ростовьский, Иона митрополит новый чудотворец - подвигнете с собою вся святыя святители и весь лик богоносных отец, молите Бога Спаса за мя недостойнаго и лениваго, разрешите мя от грех моих великих и тяжкых. Святии преподобнии отци и постници и велицыи пустынници, земнии ангели и небеснии человецы Антоние, Феодосие, Феодоре Студийской, Пимине, Сисое, Арсение, Иоанне Колов, Венедикте, Максиме, Ефреме, Ануфрие, Макарие Египтянин, Павле Фивской, Даниле Скитский, Паисие священный, Павел подруг его, Макарие Александрийский, Павле Простый, Агафон, Висарионе, Пахоме, Пафнутие, Авраамие, Василие Новый, Григорие ученик его, Акакие, иже в лествице, Архип, Агриколае, Ефросине, Филимоне отшельниче, Антоние, Феодосие Печерьский, Варламе Новгородский, со всеми преподобными снемшася подвигнитеся, молитеся за мене грешьнаго и худаго смиренаго могыыми грехи. Святыя праведныя и преподобныя жены и мученицы все вкупе: Анна, Елисавета, Мариа, Фекло равнаапостолом, Анно, Анастасие, Фетиное, Ирино, Елено, Марино, Марие, Евфимие, Евгение, Федоро, Пелагие, Таисие, Февроние, Евпраксие, Евдокие, Екатерино, Парасковие, Евфросиние, Матрено, Сусано, Домнико, Анфусо, Анастасие, Иулияние, Христино и Улито, Наталие, Епистимпе, Зиновие, Агафие, подвигнете с собою вся святыя жены избранныя преподобныя и мученицы и преже закона благоверно жившая, весь лик святых жен и с мироносицами молите Бога за мое окааньство и недостоиньство, да бых вашими молитвами избыл мукы вечныя и огня вечнаго негасимаго. Вси святии Божии, преподобнии и праведьнии иже от сотворениа миру подвигом великим угодиша Богу, и трудом многым победиша дьявола и попрали ни во что же створьше со всеми бесы его! Аз грешный раб Божий припадаю к вам всем святым, приимите мя грешнаго и сквернаго и сохраните мя во вся дни и нощи и на всяк час на пути и в дому и в всяком месте, и во исход душа моея на въздусе; помозите ми в день судный, молитеся за окаянную ми душю Богу вседержителю, Ему же слава, честь и поклоняние Отцу и Сыну и Святому Духу, всегда ныне и присно и в векы веком. Аминь.

__________________________________

В СУБОТУ МОЛИТВА СВЯТАГО КИРИЛА ЕПИСКОПА ТУРОВСКАГО ВСЕМ СВЯТЫМ

Владыко многомилостиве Господи Исусе Христе Боже наш, Сыне единородный невидимаго Бога Отца Сый равен Отцу и Духу святому, иже в вышних живущему и в Троици славимому Богу пришедшему с небесе на землю спасения ради человечя, въплощься от честныа неискусобрачна матере святыа Богородица и приснодевы Мариа, поживый в мире сем все творя нашу пльзу, мертвыя въскресивый, прокаженныа очистивый, болныа исцеливый и недужныя уврачевавый, грешным отпущение грехом даровавый! Ты, Владыко, сию власть дарова честным небесным силам: апостолом же и сущим по них всем святым, богоугодившем Ти, Господи! Тем и аз, многогрешный раб Твой (имярек), уповаю на милость Твою, молю всем честным небесным силам: всегда предстоите, святии Аггели, Архаггели, Херувими и Серафими, Престоли и Господьства, Начяла, Власти и многоочитаа и вся Силы небесныа! ныне молящагося не презрите // 316 молениа, иже просяще вашего заступлениа; молите за мя, грешнаго и недостойнаго раба вашего (имярек), яко да достойна мя покажите благодати и милости Святыя Троица и Матере Бога моего и всех святых, дабы ми милостив был в чяс исхода моего, и грехом моим прощение да обрящу вашим предстателством и заступлением. Святый Иоанне пророче Предотече и Крестителю Господень, иже покаанию проповедник! благоволи еже из среды сердца покаати ми ся и в чяс разлучениа моего помози мне, грешному! Святии пророци Енох, Ной, Авраам и Исаак, Иаков; Моисей и Аарон, Самоил, Давид, Илиа, Елисей; Исайя; Иеремея, Иоиле, Данииле; святии праведнии богоотец Иоаким и Анна! подвигните с собою весь лик пророческий, молите Бога за мя, грешнаго, и помилуйте мя, окааннаго! Святии Христови апостоли первопрестолнии Петре и Павле, Иакове и Иоане; Андрее и Филиппе, Фомо, Варфоломею; Лука, Марко, Матфею, Иаков Алфеев; //316об. Симон Зилот, Июдо, Варнаво, Прохоре! подвигните с собою весь лик апостольский и молите Бога за мя, грешнаго, и помилуйте мя, окааннаго! Святии Христови мученици, пострадавше за Христа: прьвый мученик и архидиакон Стефане; Георгие, Феодоре, Димитрие, Никито, Гурие, Самоне и Авиво; Маманте, Прокопие, Евстратие, Меркурие; Арефо, Мино, Акакие, Христофоре, Александре, Сергие и Вакхе, Фроле и Лавре, Пантелеймоне, Кире Иоанне, Козма и Дамиане; Борисе и Глебе и святии трие новии мученици Антоние, Иоанне, Евстафие! подвигнете с собою весь лик мученическый, молите Бога за мя, грешнаго, и помилуйте мя, окаяннаго! Святии Христови святители Иакове и Лазарю, Дионисие, Василие, Григорие, Иоанне Златоустый; Николае, Игнатие Богоносивый; Спиридоне, Петре, Селивестре; Кирилле и Афанасие, Евпатие, Перфирие, Нифонте; Анфилофие, Анфиме, Киприане, Генадие; Иоанне Милостивый, Григорие, Феодоре; // 317 новые чюдотворци Петр и Алексее, велиции мироточци и чюдотворци; Сава и Симоне и Арсение и Левонтий Ростовскый! подвигните с собою весь лик святительский, молите Бога за мя, грешнаго, и помилуйте мя, окаяннаго! Святии богоноснии отци наши Великый Евфимие, Саво, Ефреме, Иларионе; Феодосие, Феодоре, Пимине, Сисое, Арсение, Иоанне, Венедикте; Максиме, Ануфрие, Афанасие Афонскый и Петр Афонскый; Павле Фивейскый, Павле Аморейскый, Симеоне иже на столпе просиявый; Симеоне Новый Богослове, Данииле, Агафоне, Василие, Григорие Чюдотворець и Григорие Декаполитскый, Висарионе, Пахомие, Пафнотие; Аврамие, Иосифе; Дорофей Пустынный, Иоанне Рыльскый светилниче; Великий Антоние и Феодосие Печерскый; Аврамие преподобный, Сергие и Евфимие; Андроник и Саво, Варлааме Новгородцкий! подвигните с собою весь лик преподобническый, молите Бога за мя, грешнаго и по- //317об. милуйте мя, окааннаго! Святии уродивии Христа ради Симеоне, Андрею, Иоанне; Максиме и вси уродивии Христа ради! молите Бога за мя, грешнаго, и помилуйте мя, окааннаго! Святыа преподобныя Христови мученици жены Анна, Елисаветь, Мариа, Мариании, Фекла, Евфимиа, Анастасиа, Екатерина, Варвара, Елено; Марие, Евгение, Феодоро, Пелагие, Марино, Февроние; Еупраксие, Сусано, Домно, Анфусо, Анастасие, Афанасие; Сарро, Матрено, Аксиние, Иулиянии, Кириакии, Парасковии, Феодулии! подвигните с собою весь лик святых преподобных инокинь и всех святых дев и вся святыя жены, иже всякым подвигом угодиша Богови, труды же и болезньми победиша диавола и попраша всю силу козни его, и ни в что же сътворшеи с всеми бесы его. И всех святых вас молю иже от века угодившиа Богови: молите за мя, грешнаго, Господа Бога Вседержителя, яко да вашими молитвами прииму оставление бесчисле- //318 ных ми съгрешений, и съхраните мя в вся дни и нощи и на всяк чяс ото всякого пути лукаваго и злых деяний и в исход душа моея помозите ми и избавите мя иже на въздусе рук князь бесовскых и всех мытарств бесовскых съпротивных враг, и в день праведнаго суда Божиа помолитеся о мне, беззаконнем, яко да вашими молитвами избавлюся вечных мук и улучю Небесное Царствие о Христе Исусе Господе нашем, Емуже слава и дръжава, честь и покланяние с Святым Духом всегда и ныне и присно и в векы веком. Аминь.

______________________________

МОЛИТВА В СУБОТУ ПО ЧАСЕХ

//216об. На множество щедрот Твоих надеяся, припадаю Ти, Христе Спасе, на величество щедрот Твоих взираю всегда, прошю милости Твоея великия! Но не отверзи мене от лица Твоего за множество грехов моих, зане прогневах имя Твое святое! Рсх бо сохранити Твоя заповеди //217 и не сохраних, и того ради чюждь бых всякаго добра. Украдено ми бысть душевное богатство, и яко пленница душа моя уничижена есть. И к Тебе возвращаюся и отдания прошю многих ми согрешений, вем бо Твое человеколюбие! Аще хощеши, можеши мя очистити, понеже //217об. разслабленаго онаго иже в суботу со многою верою положеннаго пред Тобою, того словом возстави и грехи его отпусти. Господи Боже мой! и мене разслаблена суща многими грехи и отнюдь нечаянием одержима Твоею милостию возстави! Единый премудрый врачю //218 душам и телом, Иже словом Своим запретив волнам морским! устави бурю страстей моих и волны утиши нечистых помышлений, запрети бесу всегда стужающему мя, да отступит от моея немощи, да яже нечювственно изгубих, паки покаянием приобрящу! //218об. Поминаю блуднаго сына и блудницу, и разбойника, мытаря, хулника и отметника, егоже показа спасена покаяния ради; и мене, Господи, кающагося не презри! Ты бо свеси безумие мое и грехи мои от Тебе не утаишася! Но якоже величество Твое, тако и милость Твоя //219 безчисленна есть. Прости, отдай, очисти и избави от всякаго зла молитвами Пречистыя Богородицы и святых праотец и богоносных леввит и святых пророк и богоизбранных иереи, и прехвалных апостол и святаго (имярек) и всех святых, от века угодивших Тебе, яко свято и покланяемо есть //219об. имя Отца и Сына и Святаго Духа преблагаго и животворящаго ныне и присно и во веки веков. Аминь.

_______________________________

"Молитвенник" XVII в. Росс. нац. библ., Q. 43. Л. 97-225.

ЗАКЛЮЧИТЕЛЬНАЯ МОЛИТВА ВОСКРЕСНОЙ ПОЛУНОЩНИЦЫ

Всемогущая и животворящая Святая Троице, и светоначальная, Яже мирною всякую и премирную тварь, за едину благость от не сущих приведый, и промышляя и содержащи: иже по прочих Твоих неизреченных о земном роде благодеяниих, и покаяние нам ради плотскаго неможения до смерти даровавый: не остави нас окаянны в лукавых наших деяниих умрети, ниже злоначальнику, и завистцу, и губителю посмешство быти. Зриши бо благосердие, елик убо онаго на нас навет и вражда, елико же и наше страствование, и слабость, и небрежение. Но неоскудныя Ти благости соделай на нас, молим и на всякий день и час прогневающии Тя, честных и животворных заповедей преступлением: и вся убо всего прешедшаго живота нашего, и до нынешняго часа согрешеная нами в деяниих или глаголаниих, или в помышлениих, остави и прости: сподоби же нас прочее скончати житие в покаянии, и умилении, и соблюдении святых Твоих повелений. Аще убо сладостию прельстившеся, многообразне согрешихом: или мерзкими похотьми неполезными и вредными обольстившеся препроводихом: аще гневом и яростию подвигшеся безсловесною, кою брата нашего оскорбихом: аще языком неизбежных и стропотных, и крепких сетей объяхомся: аще коим чувств наших, или всеми, волею или неволею, ведуще или не ведуще, от восхищения, или поучения, безумно поползохомся: аще же лукавыми помыслы и суетными совесть осквернихом: аще ли коим другим образом прегрешихом, от предприятия и обычая томими злаго: прости нам и остави вся, всещедре, преблаже и многомилостиве, и даруй нам прочее бодрость и силу, во еже творити волю Твою благу, и благоугодну, и совершенну: да нощнаго и мрачнаго зла, световидным покаянием пременшеся, и яко во дни благообразно ходяще, и очищени объявимся человеколюбию Твоему недостойнии, воспевающе Тя и величающе во веки, аминь.

______________________________

Публикация по изданию: Октоих. М., 1981. Т. 1. С. 676-677.

МЕСЯЦА ТОГО ЖЕ 11.

УСПЕНИЕ ПРЕПОДОБНЫА КНЯГИНИ ОЛЬГИ, БАБЫ ВЛАДИМЕРЯ. КАНОН И СТИХИРЫ. ТВОРЕНИЕ КИРИЛА МНИХА

На "Господи възвах" стихиры.

Глас 4. Под "Яко добл".

Яко солнце возсия нам преславная память Ольги богомудрыа, матере князей рускых; Христова ученица, аггельскым учением въспитана, възможе на кумиры, паче же на диавола, силою Святаго Духа просвещаема, от тьмы неразумиа всю страну люди к Богу привела еси, Егоже моли о творящих твою память!

Разума духовнаго, им же посрамила еси в раи прельстившаго Евву, сего оружием сломльши, богосажденый рай церковный създа, в нейже древо животное крест въдружися и трапеза Божия брашна имущи, источник неисчерпаем крове Христовы, егоже пивъше, нетленна пребывши, за вся ны молишися!

Духовно възвеселитеся, рустии вси конци, память чтуще Ольги богомудрыа, молить бо ся выну к Христу с чюдотворци и мученики и помощницу имущи святую Богородицу избавитися от бед и печали верою поющим тя и кланяющимся раце нетленнаго ти тела.

Канон. Глас 5. Песнь 1. Ирмос:

Величаваго фараона в мори потопи с оружием и всадники, и Израиля же люди прослави, Спасе, посуху провед. Поим Христа, яко прослави!

Величие наше и похвала ты еси, Олго богомудрая! Тобою от идольския льсти свободихомся, и ныне молися за род и люди, ихже к Богу привела еси. Поим Христа, яко прослави!

Величаваго диавола из Руси прогна, нечестивыа кумиры отнюдь съкруши, вся люди от безакониа свободи, мудростию научающи. Поим Христа, яко прослави!

Ревность греховную банею крещениа отинудь омыла еси и тлениа скверну отвергши, Христа възлюбила еси, Ему же предстоиши. Молися за рабы своя, верою славящих тя!

Исаия тя жезл нарицает, пречистаа, Давид же тя престол Господень, Аввакум - пресенную гору, купину же тя Моисий, и мы же тя Матерь Божию нарицаем!

Песнь 3. Ирмос:

Дръжавною рукою и силным смыслом небо и землю сътворил еси, яже Своею кровию искупи. Церкви Твоя от Тебе утвержается, зовущи, яко несть свята паче Тебе, Господи!

Дръжавною рукою и мудрыми ти словесы учаше своего сына Христову закону и людем възбрани не жрети идолом, Олго преславная; в память ныне сшедшеся, тя прославляем!

Ныне, яко пчела доброразумива далече цветущее, Христовы веры възыская породным крещением, в Царьстем граде обретши, своему роду и людем предасть, егоже вси насыщени, горести греха отбегаем.

Всипохвалный глас и молбу ти, Олго, всылаем, тобою бо Бога познахом, Емуже ныне предстоиши, проси мира князем и на поганыя победы, проси оставлениа грехом поющим тя!

Приателище, явися Неприкосновеному Девице Богу, тем тя поют агельстии чинове и архаггели повинующеся владычице, ты бо роди Слово Отчее събезначалное без отца о чюдо Святый Дух просветити!

Седален. Глас 1. Под "Гроб твой":

Крилома богоразумиа вперивши свой ум, възлетела еси превыше видимыа твари, взыскавши Бога и Творца всяческым, и Того обретши, пакыпорожение крещением приала еси и, древа животного наслаждьшися, нетленна в векы пребываеши, Олго преславная!

Песнь 4. Ирмос:

Духом Божиим очищься, пророк дыхающе в нем Аввакум, бояся, глаголаше: Внегда приближатся лета, познан будеши, Боже, на спасение человеком. Слава Тебе!

Дух Божий почи на тебе, яко на дво пророчи прежде, имже просветивъшися, укрепляше Володимера, разумнаго Сисару, диавола низложити, все теши крещаеми, яко и Варака преже в помощи Кисове.

Ты Есфири подобящися, о богомудрая, скрушеным сердцем стамящися Богу избавити род свой и люди от озлоблениа кумирска, и от пленениа вражиа свободила еси, Христа призывающи на помощь новому Израилю!

В нарочитый день святаго ти представлениа, радости отпразднуем песньми, мольбы Христу всылающе, нетленным венцем венчавшу. Ольго богомудрая, проси нам оставления грехов, славящих тя с верою!

Тя от корене Иосеева процветшую Исаия яко Бого же рече, от тебе процвет прозябе, пръво началнаго плоть поношь, и жезл Божиа Духа. Хвалим тя яко матерь Божию и деву чисту!

Песнь 5. Ирмос:

Слово Божие всесилное! мир всему миру посли и светом истинным смиряй и просвещай вся, из нощи Тя славящая!

Яко голубице целомудренаа на финик добродетели взыде, криле крещением посребрене имуща, има же възлетевши в райстей пищи, въгнездилася еси!

Духовнаго прежде вне винограда царская маслина процвете, животный источи грезн, крещением насади в Руси, творящим плод покаяния, темже вси свеселитеся.

Окропите вси, яко пише, облаци, веселиа земным, Божиею бо детище Христос оцищая мира от грех, въплотися от Девы. и дан бысть нам!

Умилосердися, Владыко, на новопросвещеныа Си рабы, не предай же нас в руце поганым за множество прегрешений наших, но молитвами нашея наставници избави ны от всякоя скорби!

Песнь 6. Ирмос:

В Церковь святую Твою и небесную да приидеть ми молитва; въпию Ти, яко Иона из глубины сердца морскаго: От грех моих възведи мя! - молю Ти ся!

Ревность Святаго Духа в сердци приемши, оческое зловерие възненавидела еси, Христа истиннаго Бога възыскавши, чадо свету явися и с первенци святых на небеси ликуеши!

Новая ученица Христова в Руси явися, обходящи грады и села, кумиры скрушающи и люди учаше единому Богу кланятися, Егоже моли за поющая тя! О блаженая Олго, помолися за свое ищадие к Богу, мир неподвижим князем испроси и на поганыя победу и на отпуст грехов поющим тя!

Познавше тобою неисписанное Слово Божие, Сына единочаднаго Вседержителева, въпием ти: Радуйся, благословеная Богородице, упование душам нашим!

Кондак. Глас 4. Под "Явися днесь".

Въспоим днесь благодетеля всех Бога, прославлешаго в Руси Ольгу богомудрую; молитвами ея подай же грехов оставление!

Икос:

Рускому языку, Плесковской стране, богоизбранному от варяг княжьскому племени праматери наречеся Ольга: ходящим прежде неразумиа в тьме - всех честным озари крестом, паче же святым озари крещением, имже омый идольскую скверну, именити же людие нарекохомся Богу, к Немуже за ны, дръзновение имущи, молися!

Песнь 7. Ирмос:

Пламень погасиша, благочестнии отроци, тем выше естьства обросиша, готовыи опалимыи по естьству, но паче естьства мужескы вопиаху: Благословен еси на престоле славы Царствиа Твоего!

Подобно Удифи створила еси, посреди кумирскых телищ въшла еси, тьме началника скрушила еси и демоночетци посрамила еси, вся люди научи в чистоте внити Христови. Благословен еси на престоле славы Царствиа Твоего!

Похвалными цветы, аки царскый венец, богомудрей ти главе в память приносим, юже Христос нетлением венча. Ольго досточюдная! молися за твое стадо избавитися от всего зла вопиющих: Благословен еси на престоле славы Царствия!

Ливанскую гору наречем тя, на тя бо роса небесная сниде, Лифосонскую реку, добрейшая самфира камене - честнаго Володимера имуща, имже просветися Руская земля. Но молитася за нас, взывающи: Благословен еси на престоле славы Царства Твоего, Господи!

Киот тя позлащен Духом, спасъшую мира, Богом потопа разумнаго, дево Богородице, спаси ны, на тя бо надеемся и к Тебе прибегаем! Отчаянныа помилуй, от грех и напастей избави въпиющаа: Благословен Пречистаа паде!

Песнь 8. Ирмос:

Крепции отроци трие суще, силою оболкъшеся, тричисленыя отроци победиша халдеа, и дивно изменися естьство: яко огнь росою прелагашеся, бестугиа схрани яко пеленами. О проливавый мудрость на всех делех Твоих Боже! Тя непрестанно вся делы! Крепка яко ловца силою Святаго Духа оболчена, едина устремися всюду истерзати кумиры, дивно на небеси и на земли, како же на преже Бога позна. Еюже исперва всему роду падение бысть, тою же ныне спаси, - въпием, - о проливавый мудрость на всех делех твоих, Боже, Тя непрестанно!

Премудрость Божия прежде о тебе написала есть: Се есть искреняя моя, и похоти житейскыа несть в тебе; блеск лица ти, яко мира обоняние! Назнаменаше твое, Ольго, крещение, еже посреди кумирскыа льсти, на тебе обоня Христос и всех нас от смрада демоньскаго к покаянию привел есть.

Помяни мене, госпоже Ольго, убогаго твоего раба, окраденаго от враг, съгрешившаго паче человека! И молюся к Христу подати ми прощение от всех безаконий, яже нечювствено сдеях, окаянный, и да покаянием вопию: О проливавый мудрость на всех делех Твоих, Христе, Тя превъзносим!

Не презри. Богородице, Твоих рабов мольбы, о тебе похвалимся. Твое мало стадо мы есмы; потщися в заступление наше, изми ны от враг наших, ущедри знающая тя, Матерь Божию, к Сыну ти вопиюща: О проливавый мудрость на всех делех Твоих, Боже, Тя превъзносим!

Песнь 9. Ирмос:

Из Едема изъведе род наш прабабы ради. Призван же Тобою новым Адам, нам рождьши Христа в две естьстве, дево чистая! И взыграся Адам яко прадед, избыв первыа клятвы; мы же тобою хвалящеся, яко тебе ради Бога познахом и тя величаем. Веселися, Евва прародительнице, иже бо тя прельстив из Едема изведе, ныне же попран есть твоим ищадием! Се бо Ольга животное древо - крест Христов - в Руси въдружи, имже всем верным рай отверзеся. Мы же тобою хвалящеся, яко тебе ради Бога познахом, с мученикы тя възвеличим. Жену по естьству тя нарицаем, но паче силы женскы подвизася, тьмы свое злато истъщила еси, да Христов закон учителя приобрящеши, имже просвети землю Рускую. Мы же тобою хвалящеся, яко тебе ради Бога познахом, с Володимером тя величаем!

Законоположнице святая, ученица вере Христове! Приими хвалу от раб недостойных, молитву о нас к Богу створи, честно творящих Твою память, да от напасти и печали и бед, и лютых грехов свободимся, и еще же мук ждущих нас избави, Тя величаем!

Се Церковь, се дверь, се гора Божия святая, се жезл и съсуд златый, се источник печатленен, се рай святый новому Адаму, се престол страшен, се мати Божиа пречистая и заступница нам; тя величаем!

Празднуим светло память честнаго князя Владимера, приимшаго баню крещениа в Корсуни, просвещешаго землю Русску, егоже вси днесь песньми похвалим достойно, аки новаго Костянтина, с блаженою Ольгою! Подвигнета вся аггелы же и архаггелы, пророкы и апостолы и вся мученикы, молитеся за поющая вас!

Ни аггельскый ум может, ни человеческый, Богородице, страшно и неизреченно твое стаинство извещати. Ума перваго, дево, име в утробе, Имже тварь вся словом токмо разумеваеть, Емуже с Отцем и Святым Духом покланяющеся, Тебе въспеваем!

_______________________________

Публикация по изданию: Никольский Н. К. Материалы для истории древнерусской духовной письменности. СПб., 1907. С. 88-94.

КАНОН МОЛЕБЕН КИРИЛА ГРЕШНАГО

Глас 5. Песнь 1. Ирмос:

Моисейску поминающи, о душе, десницю, бежи грехолюбиваго Егупта и разумнаго фараона отверзися работы, да крестную приимеши палицю и страстное пройдеши море смереньем, вопьющи: Поим Господеви, славно бо прославися!

Аз есмь обличитель сущих во мне зол деяний, имиже прогневах Христа, вся Того преступив заповеди, и вся ныне Писанью предах помыслы моя, слове- //221 са же и делеса, скверны вся и безаконья на слышанье всему миру.

Доколе вязиши, убогая душе, обьята телесными страстьми, обидою и немилосердьем, гордынею и пьянством? Си суть вражья тенета, иже тя живу до ада сведут! Но возопи покаяньем: О Христе мой! расторгни ми съуз греховьный и спаси мя!

Якоже немолчно славят огнедохновеньными гласы серафимьстии полци тресвятую Троицю, всея твари Сдетеля, Той припадаю, прося отпуста многых ми грехов: О милостивый Творче! поне наконец спаси мя!

Яко уродивыя девы, не имам по- //221об. каялнаго светилника, ни стяжах масла милостивнаго, но всуе толку затвореном от мене двьрем. Но, о Мати Божия, избави от мукы лютыя убогую ми душю!

Песнь 2. Ирмос:

Вонми, небо, - рече Моиси, втораго написая закона перваго преступльшим. Разумей, душе, свое падение; Бог истинен, судяй праведно и въздая комуждо по делом его.

Адамьская помыслив, в бесовьская впадох, по законьная емъся, в беза[ко]ньная уклонихъся, свет възненавидев, во тьме греховней заблудил есмь.

Грехи моя, аки Ламех, пред всеми исповедаю, а своего зла о- //222 бычая никогдаже не остануся. О, люте мне, оканьному, всем мукам повиньному!

Яко Бог многомилостив, приими мя кающася и дажь ми оставление многих ми съгрешений, да в Троици прославлю Тя, Отца и Сына и Святаго Духа!

Яко всех сы грешней, на небо возрети не смею, но к Тобе припадая, вопью: Мати Божия Пречистая! умилосердися на мя и избави мя вечнаго мучения!

Песнь 3. Ирмос:

Яко Бог всесилен, изнемогьшюю грехъми душю мою и сердце, злыми запустевше, доброплодно створи: духом скрушеном молитву Ти принесу! //222об.

Аще въспомяну си дела, отинудь отчаюся, яко Божия не створих воля, но всю плотьскую похоть, прелщен врагом, сдеях; да кто мене не плачет, погибшаго люте!

Зело горка, о душе, темница и люта верига, яже о тебе злопомненья страсти. И аще сих не останешися, злым себе предаси бесом и теми люте, яко пленьница, томима будеши.

Яко человек сгреших, но яко Бог прости мя, Отче, Сыне и Святый Душе! Тобе верою покланяюся и Твоея требую милости и до последняго издыхания.

Явлена от века всех крестьян Заступнице и к Богу ходатаица //223 Марье, богоизбраная Владычице! Приими мою молитву и подажь отпуст многих ми прегрешений молитвами си!

Седален. Глас 6.

О всестрастьная душе! како уязвися, како зле осквернися и како люте неключима бысть! Подтщийся, покайся и припади, вопьющи к Богу, некли муки избавит тя!

Суд без милости, о душе, милости не створшим. Блюди, внимай [В рукописи: "виимай" - Прим. А.А.Мельникова], Христово слово делом покажи, масло щедрот въсприими и свещю покаянья сблюди неугасающю, побди, ожидающи Жениха, да внидеши в чертог спасеных!

Песнь 4. Ирмос:

Провидя духом Амбакум еже до моея нищеты Твое, Христе, схожень- //223об. е, укрепляяся смотрьно, вопьяше: Яростью напрязи на враги лук Свой, избавляя от плена рабы Своя, немолчьно вопьюща: Слава силе Твоей, Господи!

В мал час раб Христов нарекохъся, во вся же дни и доныне греховьный раб сведеся, делатель быв всякого безаконья, всеми нечистотами осквернивъся и всякой муце повинен быв, оканьный.

Горе, грешная душе: часто каешися и всегда сгрешаеши! Почто не бежиши змье, еяже губительство веси? Како не боишися скоропие, смертное жало имущи? Пролей сльзы преже смерти, да ти //224 угаснет вечный огнь!

Яже приях мнасу и тою купля не творях, но мысльную раскопав землю и леностьным обив платом, неверьем душа посыпах. Но Троице Святая! аще и взя от мене Свое, нъ в кромешнюю тьму, связана, не посли мене!

Явленых и неявленых, ведомых и неведомых и чресъестьствьных безаконий яко Бог прости мя молитвами Богородица, яже за вся молиться! Христе многомилостиве! Тоя ради възведи мя ис пропасти греховныя!

Песнь 5. Ирмос:

Огньный ум Исаия духодвижимо провъзглашаше, утрьнюя к Богу моляшеся приложити //224об. зло нечестивым, понеже истины не створиша на земли. Тем възникни, душе моя, от мрака греховнаго и озарися покаянья светом!

Бых подражатель Скариоту Июде неправеднаго именья ради, лика же апостол отпадох, продав истину на лжю, и бых давим отчаяньем. Но не презри мене, Христе Спасе, якоже Петра, плачющагося горко!

Не прелщайся глаголющи, о душе, яко просто кающися спасешися: аще не потерпиши преже конца, слезами горко смеряющися, то лукавым подобна будеши бесом, иже ведуще Бога злое деют, и //225 с ними вечно мучена будеши, аще не плачешися ныне.

Иже рече Господь вдовицю обидиму от суперника. в том же граде и судью неправедна. Град убо рече разумей свое тело, вдовицю же - убогую ми душю, обидиму сердечьными помыслы, и судью - Слово Божие, единого от Троица, ожидающа моего покаяния, и си вся учившиися видят.

Яко всех крестьян Заступниця и Помощница обидимым Мати Божия Пречистая! к Тобе припадаю, моляся, прося отпуста многих ми зол: очисти оскверненую люте убогую ми душю Твоими богоприятьными молитвами! //225об.

Песнь 6. Ирмос:

Яко Иона, вопью Ти, Христе, в ките зол моих одержим: Из глубины възведи мя греховныя, даже не искончается душа моя, в Церковь святую Твою приими мою молитву!

Аз к Тобе припадаю, Христе Спасе, прося прощенья моих грехов, иже от уности и доныне на убогую ми сдеях душю. Но яко милостив, дай же ми сльзы покаянья!

Зело милосерд еси, Христе, и смерти не хощеши грешнику. Вожьзи Свою великую милость и Свою обрящи мя драгму, и святыя съзови суседы, и всем створи веселье - ангелом и человеком!

Яко въсуе тружаешися, о душе, осо- //226 бе ищющи спастися, аще не от Бога даст ти ся помощь. Тем усердьно покланяю Ти ся, Троице Святая: спаси мя, на Тя надеющагося!

Яко всех преболши земных и небесных чинов, Дево Пречистая Богородице! к Тобе бо припадаю, моляся: Ходатай ми буди к Сыну си и всех Богу отраду ми подати в день судьный!

Кондак. Глас 8.

Душевнаго падения по вся часы в собе видя и Твое долготерпенье, Слове, преобидя, всех благых лишихъся и всякой муце повинен бых. Но възведи мя, уже отчаяна, Богородица ради, Многомилостиве!

Земная и временьная възлюби- //226об. в, вечных благ лишен бых. Приди, душе, и возпи Христу: Едине человеколюбче! грешником не отсек надежи, но милость кающимъся пролья, и мене, кающася, не презри! Разумею разбойника, исповеданием спасена, и мытаря, милостынею очищена; ту и блудьницю помышляю плакавшюся, яко во всех положил еси образы покаянья! Мощен же еси и моя отпустити прегрешения, имиже по крещении осквернихся, и чистоту яко Бог подажь ми, и спаси мя люди Богородица ради, Многомилостиве!

Песнь 7. Ирмос:

Ангелом отроки схранив в кипящи пламенем пещи и му- //227 чителя, опалив, посрами, яко Бог известуя силу свою, Емуже поюще рцем: В векы благословен еси!

Год покаянья, о душе, не отлагай, мысли прочее, еда яко на Настасья оного, гнев Божий скоро варит тя, и внезапу оставльши все, адьское постигнеши дно.

Феодосья великаго царя бодрое покаянье ты веси, о душе, и чим своя очисти сгрешенья; да и ты от унынья воспряни, омывающи сльзами своя прегрешения!

Якоже чту Бога Отца, тако верую в Сына Христа, единако молю и Духа Святаго, славлю в единьстве Троицю, //227об. покланяюся единому Богу и прошю грехов отпуста.

Яко едину имам, Богородице, утеху и прибежище, и Тя на помощь призываю: умоли Христа, Егоже еси родила, милостивому быти сде ныне и в день судный!

Песнь 8. Ирмос:

Царьских детий молитва пещный пламень прохлади и ярость мучителеву победи, и, яко в чертозе, поюще глаголаху: Благословите, вся тварь!

Без добродетели молящися, о душе, аще и въздух исполниши словес, судит ти Павел, глаголя: Пяти слов хощю в молитве с верою, неже тьму словес языком! //228

Господи многомилостиве! на мя, неспасенаго, призри и худую сию приими молитву, не хытростью слагаему, но от горести убогыя ми душа, о гресех приносиму!

Яко единому Богу в Троици из глубины сердца въпью и верою молю Ти ся, глаголя: Отче наш, иже еси на небесех! отпусти наша долги, ни въведи нас в напасть, но от неприязни избави ны!

Яко заступница сущи верою Тобе молящимся, тем к Тобе ныне припадаю: Не презри, но спаси, Богородице, и всякого избави зла Ты, и мою к //228об. Богу донеси молитву!

Песнь 9. Ирмос:

Тя, по естьству Деву и паче естьства Бога рожьшю, Евжину клятву потребивша и Адама от уз избавльшаго, Егоже ныне моли подати ми оставленье грехов, да Тя, Богородице, радостьным сердцем правоверно възвеличим!

Ангели и Архангели, Херовими и Серафими, Власти и Владычьства, Престоли, Господьства и вся Чиноначалья горних чинов молят Тя, Христе, Царю всего мира! Молитвами небесных сил помилуй мя, грешнаго! //229

Единому Тобе, Христе, съгреших и паче всех Тя прогневах и душю злыми оскверних. Но Своею милостью оцисти мя, послушав моленья божествьных Властий, окрест престола Ти стоящих и за весь мир молящихъся!

Како хощю, осуженый, предъстати Тобе, Судьи всех Богу, обличаем за вся злая моя, яже без ума сгреших, волею себе всего оскверних! Но щедротами Своими, Христе, помилуй мя, осуженаго!

Помилуй мя. Боже, помилуй! Егда хощеши ми судити, не осуди мене во огнь, ни обли- //229об. чи мене яростью Си, - молит Тя Дева Чиста, рожьшия Тя, Христе, и множьство ангел и мученик сбор!

Светален. Небо звезд. На "хвалит". Глас 4.

Престол тщеславьем собе поставих, ложным многословием на нем възлегох, самохвалением вся осужаю, пагубно омрачихъся, дым в солнца место держю, с горы закона уклонихся, яко тощь корабль, мысльными волнами ум погрузих в мирьстем любоименья мори, възлюбих нынешний век и гнусных наполнихъся //230 дел. Господи, потопа греховнаго избави мя!

Колесницю уготових си, похотьми греха утворену, акы коня въпрягох злую скверну и безаконья, имиже несом по широкому пути стыдкаго обычая в последнее сие спасеное крещенье темнаго огня. Не презри мене милостию Си, Иисусе, всего мира грехы въсприим, и настави мя на путь покаянья, да дело с разумом принесу Ти; яко и кадило, приими молитву мою!

Бежати греха помыслих и скоро многими постижен //230об. бых.; похоть греха удолжих и еще мысль прилежит ми на зло. Но уподобихъся свиньям, радующимъся сквьрне, и поревновах псом, поядающим своя бльвотины, и утолъстих плоть, и бесом игралище оставих. И како исповеде по числу, а не сведе моих зол? О Христе мой Слове! от греховныя мя работы яко милостив свободи!

Слава.

Богородице, о мире молитвенице и Богу нудителнице, человеком спасителнице и бесом лютая томителнице! хотению Ти, Дево, пресилна сила въсле- //231 дует, токмо въсхощи. Не мьне, Владычице, но имени Твоему дажь славу! Молю ти ся, милостивая, створи, да буду царь телу своему и господин вредом и естьству приставник, подражатель Сына Ти! От помощи Твоея утешение мое скорое!

На стих стихиры. Глас 8.

Еже ми подъкопа враг в первую годину храмину и душевную украде чистоту, понеже в третью годину старости дажь възъбнути на покаянье, да не в гресе и нищете сконьчаюся! Ищете, рекл еси, и просящему дати обещася, и толкущему ми отверзи двь- //231об. ри милости Твоея.

Шатание уности, лицемерье старости - обое без ума притяжах, в лестную одехся ризу и в[е]сь студа наполнихся, се, яко в зерцало приник дел моих, скверны душа моея узрех, и яко во окрине слез моих омыти подвигнуся; дажь ми время покаянию!

Века сего любовию многа имения желаю, а сам долго жити не могу, покаянию год отлагаю, в старости Богу послужити мышлю и лениве свою жизнь скончаваю, сластьными ласкосердуя, похоть- //232 ми побежаем, горд и величав, и самомнив. Господи, избави мя от смерти тела моего!

Разумное утро Богородице и заре безначалнаго света, въсток сияния славы Отча и чювьствьное солнце светом подарившаго, ангелскый ум разумом кормящаго. Сего многоочитии, видети не могуще, крилы закрываются, - о Мати светлыя чистоты! створи мене сына дни и чадо света!

Блажена, глас 6. Ирмос:

Разбойник оглагола - разбойник же благослови; сия оба на крьсте повешена. Но, о Милостиве, яко тому рци познавшему Тя, //232об. Господи, и мне отверзи двьри преславнаго Ти царствия!

Страшен еси, Господи, изливая бещестье на князя, на священикы гнев открывая и судия в плен посылая, по воли сгрешивших и волею не кающихся!

Горе лености моего спасения: людьская грехы присно изедаю, просимыя скоро приемля дары; но си праведничю приимут мьзду, аз же с лицемеры осужен буду! Имь же веси судом, Иисусе, спаси мя!

Падший ми ум въздвигни, Господи, да жертву словесную исповедания уст принесу Ти и душевное кадило - сердца възды- //233 хание. Послушай моего моления, яко отец своего чада немования, и приими мою молитву, яко мати младенца!

Божьство в Собе сый, Свой имея ум, бе присно ум светел, а ино ничтоже се единьство не обято мыслью: никый же ум достигнет, ни Сына кто весть, аще не Дух право сроден просветить приглашати. Троице Святая, спаси души наша!

Марие, небесное кадило! Божественый угль в Собе имела сей, Егоже Моиси в купине, Исаия от серафим, Езекиль в колесих видети сподобишася. Богородице, пресвятое имя, спаси душа наша!

_________________________________

"Обиход церковный" XIV в. Росс. нац. библ., Софийский сбор, № 1052. Л. 220об.-233.

КАНОН ПОКАЯНЕН К ГОСПОДУ НАШЕМУ ИИСУСУ ХРИСТУ, ПЕВАЕМ ПО ВСЯ ДНИ. ТВОРЕНИЕ ПРЕПОДОБНАГО ОТЦА НАШЕГО КИРИЛЛА.

Глас 5. Песнь 1. Ирмос:

Моисееву поминающе, душе моя, десницу, бежи грехолюбиваго Египта и разумнаго фараона отвержи работы, да крестную приимши палицу, страстное пройдеши море, смирением вопиюще Господеви поем, славно бо прославися.

Запев:

Слава Тебе, Боже наш, слава Тебе!

Чего ожидаю и что на время взираю, мимошедшая лета помы- //48об. шляю и разумею множество зол моих, от нихъже обрати мя, Христе, да пию судеб Твоих пелынь на прогнание греховнаго вреда, даже не затворятся двери покаяния и обличатся тайны, и испытуются дела и мысли, и осудятся грешницы.

Хощу ныне изглаголати пред образом Твоего подобия, Христе, души моея всю горесть и нерадство, и слабость тела моего, аще бо греси мои претят ми молчати, но от болезни сердца моего исповедаю Ти ся. Ибо делатель, погубив семена, не оста ролии, и купец, чужая заим, //49 страждет покаяния ради. Господи, спаси мя!

Слава.

Инех святаго житие хвалю, а своих грехов не остануся, яко инем подая закон, но паче всех беззаконствовах и самех христоубийц горей бых. Даный ми талант зле погубих, аще Ты, Господи, не воздвигнеши дому, суетно бо есть спасение человеческо.

И ныне.

Ныне убо к кому воззову, и кто ми плачь и болезнь приимет и от сердца воздыхание, но токмо ты, Пречистая Дево, упование христианом и всем грешным!

Песнь 3. Ирмос: //49об.

Яко Бог всесилен, изнемогшую грехми душу мою и сердце злыми запустении, доброплодоносно сотвори, да духом сокрушенным молитву Тебе принесу!

От пелен врагом в плен веден бых, и бесовским запален огнем, безаконием кипя, всяк грех совершаю, нимало не боли покаянием, и с погибаю величался. Христе мой, спаси мя, отчаяннаго!

Во юности беззаконие возрасте и нечистыя похоти, и во старости стыдная дела, и чрезъестественныя грехи, и доселе не остах скверны, //50 диаволом лстим. И отныне, Господи, каюся; избави мя вечныя муки!

Слава.

Век мой скончавается, а страшный престол готовится, и судий ждет, претя ми огнем и мукою и пламенем негасимым. Слез тучю подаждь ми и угаси его силу, Хотяй спастися всем человеком!

И ныне.

Мати Божия пречистая, стено християном! избави люди своя, обычно вопиющыя! Противящияся врагом гордым, и мыслем да вопием ти: Радуйся, обрадованная!

Седален. Глас 8. //50об.

Шествия лукавная тайно ходившу ми, не утаишася всевидящаго ока Божия, и ложную веру сохраних, и сохраних истинну в неправде. Аки бы искушая Бога, зло дею и всю чреду, аки волк, смятох, тем праведным осужден бых судом, отмщение моих беззаконий пред всеми прииму; геена болит и прочия муки чающи прияти мя, осужденнаго. Милостивным Твоим взором тогда видев, Христе, помилуй мя!

Песнь 4. Ирмос:

Провидя духом Аввакум еже до моея нищеты Твое, Христе, схо- //51 ждение, укрепляя смотрение, вопияше: Яростию напрязи на враги лук мой, избавляя от плена немолчно вопиющия: Слава силе Твоей, Господи!

Философ хитроречия и певец доброгласия, от юности не навыкох и о гресех прилежах, весь сквернен сведохся. Милостивеве Господи! приими мою худую молитву, но мудростию слагаему и от горести души о гресех приносиму!

Хитроглаголиво слово, уветлива уста, быстростружуща речь языка, но избавити мене от муки, зломыслена имуща сердце, оскве- //51об. рняющи ми в похотех душу и во глубине огненной погружаем. О милостивый Спасе! даждь ми время покаянию!

Слава.

По смерти убо тамо ни делати могу, ни молитва ми приятна, ныне прошу слезам тучю со упованием. Даждь ми, Христе, далети [Так в публикации - О.Л.] покаяния доброплодна ниву и пожди радостныя жажди, да принесу Ти спасения плоды!

И ныне.

Явленных и неявленных, видимых и невидимых и чрезъестественных безаконий яко Бог про- //52 сти мя молитвами Богородицы, иже за вся молится! Христе многомилостив! тоя ради возведи мя из бездны греховныя!

Песнь 5. Ирмос:

Огненный ум Исаиа духодвижимо провозглашаше, утрениа к Богу моляшеся: Приложи зло нечестивым, прежде истинны не сотвориша на земли! Тем возникни, о душе моя, от мрака греховнаго, озарися светом покаяния!

Заиде враг без студа, на мя нападе, воскрежета зубы завистию. Много брахся, и преможе мя. Впадох в сете его и, аки зверь //52об. на убиение, улови мя и стрелою безакониа устрели мя, и мечем греха порази мя. Иисусе, всех врачю, исцели мя!

Искусник моея веры прежде на зло пострычет мя, не егоже аз ненавижу, но любовными много вещми, аки узами, связан и в прочая влечет мя грехи и хвалится о моей погибели. Но кающася, Христе, приими мя!

Слава.

Ослаби ми, Господи, ослаби ми и не погуби мене со безаконии моими, но покажи на мне Свою богатую благость, еже утреневати и сла- //53 вити Тя, Единаго человеколюбца!

И ныне.

Мати человеколюбца Бога! Егда молитву приносиши к Богу за род христианский, помяни мене, грешнаго, да не препрен буду воздушными мытари, да не отягчают греси мои в мерилех на воздусе, и светолучным аггелом предай мя!

Песнь 6. Ирмос:

Яко Иона, вопию Ти, Христе, в ките зол мои одержим; из глубины греховныя возведи мя, даже не скончается душа моя, в Церковь святую Твою приими мою молитву!

Ревную душею в дело Господне, а телом //53об. низпадаю во грех; воздержим от единаго сердечнаго корения, аки древу ветви многи, помышления, от нихже, Христе, сухая истреби, сиречь греховныя, да не с ними во огнь ввержен буду!

Щаден бых и доныне, яко древо во ограде закона Христова, никогдаже не сотворих ми благоплодия моему Владыце и Благодателю, трепещу проклятия с посечением, аще покаяния плоды на оно лето не принесу.

Земля украшается цветы, древо похвалимо плод деля; аз же различными грехи осквернихъся //54 и, теми съблюдом, удалихся от Благодавца. Но яко милосердый омый мя от скверны прегрешений моих!

Слава.

Дреманием злым обьят бых, окаянный, и сон нечаяния покры мя, но бодрым милосердием, Господи, воздвигни мя и спаси!

И ныне.

Мысленныя двери жизни, Пречистая Богородице, припадаем ти верою; от напастей избави ны, яко прославляем твое рожество! Моли о спасении душ наших!

Кондак. Глас 8.

Душевнаго падения по вся часы //54об. в себе видя и Твое долготерпение, Слове, преобидя, всех лишихся и всяцей муце повинен бых. Но возведи мя уже, отчаянна, Богородицы ради, Многомилостиве!

Икос:

Земная и временная возлюбих, вечных благ лишихся. Христе Иисусе, Едине человеколюбче, грешником неотсекаемая надежда, но милость кающим съ пролия! и мене, кающася, не презри, Иисусе! Разумею бо разбойника, исповеданием спасена, и мытаря, милостию очищена, и блудницу помышляю плачущуся, яко во всех положил еси образы по- //55 каяния, претиши бо милостивно и милосердуеши тепле, кающася видиши и правду течеши яко Отец! Аще восхощеши, мощен бо еси и моя отпустити грехи, имиже и по крещеннем обете осквернихся и по обещании иноческаго жития, но чистоту яко Бог подаждь ми молением Пречистыя Ти и всепетыя Богоматере!

Песнь 7. Ирмос:

Аггелом отроки сохрани в кипящей пламенем пещи и мучителя, опалив, посрами, яко Бог известуя силу Свою, Егоже поюще рцем: Вовеки благословен //55об. Бог отец наших!

Чюжих грехов испытник, а своего беззакония хранитель, оправдаюся языком, а делы горее неверных, аз, окаянный, сведохся, инем треску во оке видя, во своем же бервна не чую. О милостивый Господи! имже веси судом и спаси мя!

Не могу изобрести от века подобна мне грешника, того ради обьят тугою и нечестива себе нарицаю. Лицемер пред человеки и пред Богом безаконен, о чем первее покаюся, аще не Ты, Христе Боже мой, милостию спасеши мя!

Слава.

Покрыв раб талант, иже в //56 делание от Тебе прият, аз бых то, окаянный. Что сотворю, егда приидеши судити, когождо дело взыщеши? Но пощади мя, Господи, а не во огнь посли, Милостиве!

И ныне.

Беседуя Евжински [? Так в публикации - О.Л.] с плотными похотми, аки безсловесным гадом прелщенны бых люте, и многа добра лишихся. Защитнице страшная, преславнаа Богородице Марие! избави мя брани диаволя!

Песнь 8. Ирмос:

Царских детей молитва пещный пламень прохлади и ярость мучителеву победи, яко в чертозе //56об. поюще, глаголаху: Благословите вся дела Господня и превозносите Его вовеки!

Никий же мир сего сан от вечныя избави муки преступающих Божия заповеди, не ложь бо есть Судяй не на лица. Но Тебе молюся, Владыко: очисти мя прежде конца!

И мало, и много зде поживши, никакоже избыти смерти, понеже тамо испытание делом; зде, Боже, прости мя, да не яко безбожен тамо мучим буду!

Слава.

Уврачуй ми ум сластолюбием жития уязвен, и укроти волнение страстей моих, и на путь покаяния возведи мя, да уми- //57 лным гласом вопию Ти: Господи, не осуди мене по делом Твоим, но милосердием спаси мя!

И ныне.

Богородице Дево! отреши ми язвы люте гниюща, неявлением масла слезами омый, и платом покаяния обвяжи, и здрава мя сотвори, и со одра нечаяния востави, и всякаго избави зла и козней, и к Сыну твоему донеси мою молитву!

Песнь 9. Ирмос:

Тя, паче ума естественную Деву и паче естества Бога рождши, Еввину клятву потребившаго и Адама от уз избавлшаго, Егоже //57об. моли непрестано подати ми оставление грехов, да тя, Богородице, радостным сердцем правоверно возвеличим.

Взях крест Христов, егоже до конца не понесох, како ли христианин нарекуся, ни единаго бо обета чисто сохраних, при всем солгах Владыце моему Христу. Бежит птица скоро орла, аз же скачю скоро ко греху! Аки рыба, пожер удицу, цепима есть, тако и аз множеством зол! Но, Господи, милостию Твоею спаси мя!

Царским нравом путем //58 ходити и Христова закона не изволих хранити, уклонихся к стези неблаги, на греховныя наступих терние, и тем сножен бых люте. К Тебе, Христе, вопию: Даждь ми слезы покаяния и омый мой душевный гной, и сотвори мя, Спасе, неимуща скверны!

Слава.

Хотяй всем человеком спастися и на первое достояние привести многим милосердием, убогую ми душу посети, Господи! Все жите блудно иждивша, яко блудницу, приими мя и помилуй мя!

И ныне. //58об.

Един от Троицы Христос, истинный Бог наш, молитвами святыя Богородицы, и предтечи Иоанна, и небесных сил: апостол же, пророк и мученик, святитель же и преподобных, - посреде всех святых достохвалный испусти глас: Отпущают ти ся греси твои, иди в вечный живот!

____________________________________

"Синодик" XVII в. из Вологодской епархии. Библ. Росс. Академии наук (СПб.), 32.16.5. Л. 48-59.

КИРИЛА ЕПИСКОПА ТУРОВЬСКАГО СТИСИ ДОБРЕЙШИ К ВИНЕ СЛЕЗНЕЙ ХОТЯЩИХ НЕПРЕСТАННО ПЛАКАТИСЯ ДЕАНИЙ НЕПОДОБНЫХ

По канонех покаялных мнозех и по молитвах и по съвръшеннем отпусте. По коемъждо стисе метание с умирением и с слезами, исповедаяся пред образом Господа нашего Исус Христа //330об. и Пречистыя Его Матере. Рци сие:

Исповедаю Ти ся, Господи Боже мой, Отче небеси и земли, елико в тайне сердца моего съгрешениа. В юности невъстягновенно неистовным безстудным възбешением страсти плотьскыа и душегубныя съдеях; в возрасте средовечиа студная дела чрезъестественныа грехы впадах, яже и безсловеснии скоти не творят; в старости же всякими делы нечистыми и помыслы скверными и хулными одръжим есмь, от нихже свободи мя, Владыко, даждь не предварит мя смерть не готова суща! Метание.

Христе Боже мой и Творче! помилуй //331 мя, много съгрешившаго, оскверненаго всякими плотскыми нечистотами мръзостных, и в безсловесных молю Тя, премилостиве: Отпусти ми сиа и чистоту подаждь ми! Метание.

О Владыко мой Боже и Господи Исусе Христе, иже благоволил еси прийти на землю на спасение грешных, пръвый в них аз есмь, превзыдох многыми бесчислеными грехы моими! Приими мя, обращающагося к Тебе ныне и спаси мя. якоже спасл еси Манасию, и блудницу, и блуднаго сына! Метание.

Всещедре и милостиве Господи! приими покаание мое, якоже прият разбойника, на кресте исповедавша Ти ся, и спаси мя креста ради Твоего //331об. и еже на том излиянныа пречистыа божественыа крове Твоея за мирьскый живот! Метание.

О Владыко мой Исусе Христе, Иже нас ради волею крест и смерть приим, и тридневно въскрес, и всего мира спасе! и мене, кающася, помилуй и спаси мя, благый, судбами Своими днесь въскресениа Твоего ради! Метание.

О Христе Царю, Боже мой, създателю мой! отпусти ми вся грехы моя и всели в мя любовь Твою и благодать Твою, посли ми в мысли моей о спасении моем имети всегда покаание же и плач о гресех моих и имени Твоего памят, заповедей Твоих даждь ми, страх Твой, яко остен, вонзи в сердци моем и сподоби мя лю- //332 бити Тя от всеа душа моея, и възненавидети лукавая дела, и творити волю Твою. Метание.

Господи! аще праведника спасеши и велика почести тому дарствуеши, ничтоже велико и ничтоже дивно достоин бо есть Твоея милости, и яко мъздовъздатель даруеши ему по обещанию Твоему. Но то есть велико и преславно, Христе Царю, и слышанию чюдесно, и всеми преудивлено не точию земным, но и тем небесным силам: превъсходит всяк ум Твое милосердие, аще мене, грешника, спасеши чрес спасения моего. Метание.

О небесный Царю Христе Боже мой! привлеци мя к Себе милосердным Ти чело- //332об. веколюбием, иже преже бывших Сам, милостив, взыска, якоже Павла, бывшаго гонителя, съсуда избраннаго того сътвори, и Матфеа от мытниця - благовестника того показа, и Плакыде на животном явлься, того к Себе приведе, и мнозех в первых родех и в последних и неволя приведе, быша пакы избраннии и тии Богу. Вся Тебе възможна, Владыко, и ничтоже не невъзможно! Привлеци и мене к Себе, разжезие божественым рачением, яко огня пламенем палящим, выну распалитися желанием любве к Тебе, да от всея душа моея и от всего помышлениа и от всеа крепости моея и силы //333 сердечным желанием и теплою верою отныне в чистоте послужити до скончаниа живота моего, и да прииму от Тебе милость в день праведнаго Ти суда. Метание.

Даруй ми, Христе Боже мой, Тебе, Царю вечному, по вся дни и часы прилеплятися, яко да ми пода си обетованиа Твоя святым благая и по чясти небесных венца предълежащих в царьскых Ти съкровищах в царствии Твоем въвекы бесконечныа. Метание.

Господи, многыя моя грехы Своим милосердием очисти; помилуй и спаси мя! Метание.

Человеколюбче Царю вышний! в пръвый чяс пришедшаго дне сего призри на мя милостивне //333об. и помилуй мя! А се глаголи вечер и полунощи. Метание.

Господи Боже мой! отпусти ми вся съдеянная мною съгрешениа в чяс сий, иже в словесех, и в деле, и в помышлении, и в ведении, и не в ведении, и съблюди мя от всякого ловлениа неприязнина сатанина дне сего, и в нощь сию присно огради мя святыми аггелы Своими! Метание.

Боже, помилуй мя, окааннаго, страстнаго, блуднаго, нечистаго пса! Метание.

О Пресвятая Дево Богородице! припадаю ти, Владычице: помилуй мя, многогрешнаго, и приими ныне сие моление из уст скверных раба твоего, //334 моли о мне, грешнем, Сына своего и Бога нашего оставление грехов даровати ми, яко да твоими молитвами обрящу милость в день судный! Метание.

О великий престателю и чиноначалниче Михаиле архистратиже! в разлучение телеси грешныа душа моея предстани ми с аггелы, яко от Господа поручена ти власть душя верных ис телесе приимати. Приими душу мою кротко с плачевным въздыханием моим, молю ти ся, и еще в жизни сей съхрани мя неуязвлена от всякого прилога дияволя до конца живота моего! Метание.

О великий мой заступник и хранителю //334об. аггеле Господень! буди молитвеник о мне, грешнем рабе твоем, к Христу и пречистей Его Матери, и помощник крепок от лица враг моих, внегда предстая в помощь мне, рци души моей: Спасение твое есмь аз! Метание.

О святый Иоанне, пророче, и предтече, и крестителю Господень, и покаанию проповедниче! благоволи и умоли Христа, иже от душа покаяти ми ся из среды сердца твоим ходатайством! Метание.

О святии апостоли, льсти искоренителие и благоверию учителие! благоволите умолити Христа Бога иже всегда имети память смертную и плачь по Бозе! Метание.

О святии святителие Христови и учителие //335 всемирнии Василие Великий, Григорие Богослов, Иоанн Златоустый, Игнатие Богоносивый! благоволите умолити Христа Бога имети ми страх Божий в сердци, нищелюбие и нищету паче богатьства! Метание.

О святии Христови мученици, пострадавше за Христа: пръвомучениче архидиаконе Стефане, Георгие, Феодоре, Димитрие и четыредесять мученик, святии мученици Борисе и Глебе! благоволите умолити Христа Бога иже любити ми Бога, якоже самый тъй грех, мною сътворенный, и възненавидети его. Метание.

О святии богоноснии отци наши //335об. Великий Антоние, Евфимие, Саво, Ефреме, Великий Антоние и Феодосие Печерскые, Сергие, Павле и вси преподобнии! благоволите умолити Христа Бога всегда имети ми съвръшеное смирение и съкрушение сердцу, и любовь нелицемерну! Метание.

Сыне и Слово Божие Исусе Христе Боже наш! Помилуй нас и помози и спаси душа нашя! Аминь. По конци коеждо правила глаголи сий стих.

____________________________________

"Псалтирь Татищевская с восследованием" XVI в. Библ. Академии наук России (СПб.), 16.7.2. Л. 330-335об.

Молитва святаго Кирила, глаголема по вся дни.

Владыко Господи Иисусе Христе Боже нашь, приклони ми ухо Твое, и услыши мя, припадающе имени Твоему и всем и всячески. Вонми ми, возопию к державе Твоей и к власти и силе, молю Ти ся, и припадаю. Господи Боже мой, даром божественым внимая мне, и услыши моего худаго моления (имярек), молящаго Ти ся о всех и за вся. Помяни, Господи, вся, плавающая по воде, и в путь ходящая, и тружающаяся. Помяни, Господи, вдовицы и сироты, и странствующая, и алчющая, и жажущая. Помяни, Господи, сущих в темницах, и во узах, и в бедах, и в плачех, и в болезнех тяжких одержимых. Великая Твоя милость да обыдет их, яко человеколюбец. Помяни, Господи, мучащихся, и в тесноте, и в бедах, и в напастех стражущих. Излей каплю сладости на сердца их от святаго Твоего и животворящаго Духа, да наслаждаеми и насыщаеми славят Твою благостыню. О Владыко Господи, услыши мя ныне, недостойнаго раба Твоего (имярек), со архимандриты и игумены, ереи и дияконы, и четцы и всякого церковнаго чина, ихже постави пастухи словеснаго Ти стада. Приими, Господи, приносимыя Ти от них молитвы за мир. Помяни, Господи, правоверныя цари и князи. Помяни, Господи, и благовернаго великаго князя нашего (имярек), подай же ему. Господи, здравие телеси и души спасение, и державу его миром огради, и на супостаты его укрепи, люди умножи, землю угобзи; даруй ему, Господи, в сердцы разум благ о церквах Твоих и о священницех и о мнишеском чину. Помяни, Господи, отца нашего игумена (имярек), архимандрита, строителя и стража душ наших; подай же ему, Господи, здравие и спасение, отпущение грехом, и управление в вечную жизнь; молитвами его очисти, Господи, согрешения. Помяни, Господи, всю, еже о Христе, отець и братию нашу сию (имярек), собравшихся во святую обитель сию, имени Твоего ради. Исполни, Господи, прошения их, яже ко спасению, и всех нас помяни во Царствии Небеснем, и причастники сотвори вечныя радости. Помяни, Господи, всякого инока и иконома, и служащая мнихи, и всякого черноризца и черноризиц, иже в монастырех и во особных местех. Молитвами их очисти, Господи, и мои [...]шения. Помяни, Господи, братию мою и сестры моя и все сродники моя, яже Сам веси и имена их (зде поминай еликих хощеши, имярек). Помяни, Господи, тех, иже колиждо мне добро сотвориша, или рекоша, или помыслиша. Помяни, Господи, тех, иже колиждо мне зло сотвориша, или рекоша, или помыслиша. Помяни, Господи, всяко православное християньство, уноты и старца, вдовица и сироты, рабы, свободныя, богатыя и нищая, и сущая во оклеветании, озлобленныя и томимыя по гневу. Еще молю Ти ся, о Владыко пресвятый, избави, Господи, град сей и страну сию от всякаго зла: от огня, и потопа, и напрасныя смерти, от глада, от усобныя рати, и от нахождения иноплеменник, и пленныя восвояси возврати. Помяни, Господи, яко благ и человеколюбец Бог, по множеству щедрот Твоих, и мене окаяннаго недостойнаго раба Твоего (имярек), и отпусти ми, Господи, всяко прегрешение, волное и неволное. Очисти ми, Господи, душу и тело от всяких скверных, и не мерзко Ти буди воздыхание убогая ми душа, без отчьствующа пред Тобою. Еще молю Тя, о Владыко пресвятый, избави, Господи, ограду сию монастырскую, в нейже пребываем, от всякого зла: от огня и потопа, от глада и от напрасныя смерти, и от усобныя рати. И подай же нам, Господи, всяко прошение, душевное и телесное, и не отврати лица Твоего от моления моего, ни посрами же единаго нас, но вся ны вьведи во Царство Небесное. Помяни, Господи, преставльшаяся рабы Твоя: вселенския патриархи, святейшия митрополиты, благочестивыя цари и царицы, благоверныя князи, и священноархиспископы и епископы, благоверныя княгини, и священноиноки, и иноки и инокиня, и вся православныя христианы. Помяни, Господи, отца моего, и матерь, и братию, и сестры и вся сродники, мужеска полу и женска (зде поминай умерших, имярек). Помяни, Господи, всякаго племени християнскаго роду, и вся, елика веровавша в Тя, Иисуса Христа, Сына Божия. Покой я, Господи, идеже вси праведнии почивают, и остави им, Господи, всяко прегрешение, волное и неволное, яже согрешиша на земли сей, в ведении и не в ведении, во всем животе своем, делом и словом и помышлением, и облегчи тяготу раб Твоих, неприемших Святых Таин Твоих. О Владыко пресвятый, приими молитву мою, недостойнаго раба Твоего (имярек), молящаго Ти ся о всех и за вся. И даждь ми, Господи, до последняго издыхания Тебе предстояти, и просити отпущения грехом. И во страшный он день, пред страшным престолом Твоим, одесную Тебе стати сподоби, молитвами пресвятыя Твоея Матере, Владычицы нашея Богородицы, силою честнаго и животворящаго Креста, и святых небесных сил, Михаила и Гавриила, и святаго Крестителя Твоего Предтечи Иоанна, и святых верховных апостол Петра и Павла, и обоюнадесяте, и святаго собора седмьдесять апостол, и всех святых пророк, и святых святитель: Василия Великаго, Григория Богослова, Иоанна Златоустаго, и святаго великаго Николы чюдотворца и святых отец триста и осмьнадесять, и святых преподобных отець наших: Антония, Савы, Еуфимия, Феодосия Иерусалимскаго, и преподобнаго отца Ануфрия, и иже во святых преподобнаго отца нашего Феодосия Печерскаго, всея Руси светилника, иже обещавшагося за нас слово отдати на страшнем Твоем суде, на немже, Господи, и мене неосужена сохрани, в мире управи жизнь мою, молитвами его и всех святых, иже от века Тебе благоугодивших, всегда и ныне и присно и во веки веком, аминь. (Та же по обычаю отпуст.)

Спаси, Господи, и помилуй ненавидящих и обидящих мя, и враждующих ми, и творящих ми пакость, и поношающих ми, такоже и оклеветающих мя: да никтоже, никакоже от них мене ради нечистаго зло некако постраждет, ни в нынешнем веце, ни в будущем. Но очисти их милостию Своею, и покры их благодатию Своею, благый. (Метание.)

Помилуй, Господи, и спаси милостию Своею и мене грешнаго и недостойнаго и еще, по Твоему благоволению, в жизни сей живущаго. Прости ми вся грехи моя, и спаси мя на всяком месте: или в пути ходящаго, или по водам плавающаго, или где пребывающа, избавляя мя от насилия вражия и от того находящися на мя, уязвляемых стрел греховных, и соблюдая мя от всякия противныя брани, во всяко время, в нощи же и во дне, от напрасныя смерти и бед, и скорбий, недуг и болезний тяжких. И безмятежен живот, и покаянию время, и исход мирен подай же ми.

________________________________

Публикация по изданию: Рукописи графа А. С. Уварова. Т. 2. // Памятники словесности. СПб., 1858. Вып. 1. С. 102-104.

В НЕДЕЛЮ ЦВЕТНУЮ ОТ СКАЗАНИА ЕВАГЕЛЬСКАГО СЛОВО КИРИЛА МНИХА

Велика и ветха скровища, дивно и радостно откровение, добра и силна богатьства, нескудно ближним даемии дарове, славна зело и честьна дому искуснии строители, обидны и преполнены царскые трапезы мнози останци, от нихже нищии препитаеми бываху негиблющею ядию, но пребывающею в живот вечный. Словеса бо еваггельскаа пища суть душам нашим, яже Христос образно глагола человеческаго ради спасениа, Егоже //94 славный и честный дом - Церкы - имеет искусны строителя: патриархи, епископы, иерея же и игумены и вся церковныа учителя, иже верою и чистотою ближнии Богу створишася и приемлют Святаго Духа благодатию различныа дары учению, исцеление по мере дара Христова. Тем же и мы, убозии, тоя же трапезы останков крупице въземлюще, являемся [вариант: насыщаемъся], киждо бо раб своего господина хвалит.

Радость же, братие, нам днесь и веселье всему миру пришедшаго ради праздника, о немже пророческаа писаниа сбытие приаша творимаго ради в нем Христом знамениа. Днесь от Вифаниа в Иерусалим входит, //94об. всед на жребя осле, да пророчьство Захариино свершится еже о нем: Радуйся зело, дщи Сионова! се бо царь твой грядет кроток, всед на жребець ун! Се убо пророчество разумеюще веселимся. Душа бо святых дщери вышняго Иерусалима нарицаются; жребя же иже от язык веровавшеи в он людие, ихже, послав апостолы, отрешь от льсти диаволя. Днесь народи противу Исусу изыдоша, ваия в руках держаще и тем почесть творяще, егда Лазаря от гроба возва и от мертвых его въскреси. Добро народа послушьство, емуже веровавше языци. Сына Божиа познавше: в жидех бо чюдеса створи и язы- //95 ком спасение [добавление: и благодать] дарова; они Его не показаша [вариант: познаша], а языци приаша; Израиль отречеся позвавши его в вечную жизнь, языкы веровавшаа в Небесное Царство введе; онем падение, съблазн, а странам [добавление: вера ] въстанье. Днесь апостоли на жребя своя възложиша ризы и Христос верху их вседе. Оле преславныя тайны явление! Христианьскыя добродетели апостольскыя суть ризы, иже своим учением благоверныя люди престол Богови, вместилище Святому Духу створиша: Вселю бо Ся, рече, в ня и похожю, и буду им Бог, и ти будут Мне людие! Днесь народи постилаху по пути ризы своя Господеви, //95об. друзии же от древ ломяще [вариант: резаху] ветви постилаху, добр убо и прав путь [добавление: миродержителем ] и всем вельможам Христос бысть, Егоже милостынею и безлобием постлавше, нетрудно входят в Небесное Царство. Ломяще же от древа ветви рядници суть и грешьници, и скрушеном сердцем и умилением душа, постом же и молитвами свой путь равнающе, Богови приходят: Аз бо, рече, есмь путь, истина и живот. Днесь предъидущеи въследующеи въсклицают, глаголюще: Осана, Сыну Давидов, благословен Грядый во имя Господне! Предъидущеи же суть пророци и апостоли, ониже преже прорицавшеи о Христове пришествии, а си пропо- //96 ведавше во всем мире Бога пришедша и во имя Его крестяща народы. А въследующеи - святители суть с мученикы, овии с еретикы крепко [добавление: по Христе] борющеся, и тех яко врагы от церкви изреюще, сии же и до крове за имя Христово пострадаша и вся уметы створше, въслед Его идоша да причастници будем страсти Его. Вси же "Осана!" възываху, рекъше: Сын Божий Ты еси, въплотивайся на земли да Адама преступлением падшаго възвигнеши; благословления деля и мы потщимся добраа творити дела во имя Господне! Днесь весь Иерусалим подвижася и пришествиа ради Господня: старци быстро шествоваху да Исусу яко //96об. Богу поклонятся, отроци скоро течаху да И прославят о чюдеси Лазарева въскресениа, младенци, яко крилати окрест Исуса паряще, вопиаху: Осана, Сыну Давидов, благословен Грядый в имя Господне! Бог Господь и явися нам! Оле тайн откровение и пророчьских писаний разрешение! Старца бо язычьскыа наменует люди: преже бо Аврама и Израиля языци суть: тогда прелщении, от Бога уклонившеся, ныне жа Сыну Божию верою покланяются. Образ же отрок всечестный девьство любящий и иноческый честный [вариант: отческый] чин нарече, беспрестани славящим Христа и чюдеса Божиею благодатию стваряющим. Младе- //97 нци же христианы прообрази, иже ничтоже пытают Христа [вариант: о Христе], но о Том же живуще и за Того умирающе и Тому обеты и молитвы въздающе. Днесь Анна и Каиафа негодуют: всем радость и веселие, а сим - скорбь и смущение. Подобаше иерейску чину радну [вариант: расудну ] быти, пророк пытати, - еда се есть Христос, о Немже заповеда Иаков сыном своим, глаголя: От племени твоего [добавление: Июдо] изидет Владыка небеси и земли, и Тъй упование языком, привязая лозе жребя Свое. Си [вариант: ни] помянуша Давида, о Немже пророчествова, глаголя: Из уст младенець и ссущих свершил еси хвалу! Си [вариант: ни] разумеша чту- //97об. ще Софониину писанию: Веселися, Иерусалиме, и уравнай путь Богу твоему, яко придет в Церковь Свою, творяй чюдеса и даа знамениа, - но совет творяху на Благодателя да не токмо Исуса, но и Лазаря погубят и не хотят с народы глаголати тако: Велий еси, Господи! глас Твой потрясе адова скровища и исторже от внутрьних душю умеръшаго, и изиде Лазарь пакы на бытие спасениа [вариант: спасен]! Днесь тварь веселится, свобожаема от работы вражиа, и адьскаа врата и вереа потрясошася [добавление: и бесовьския силы ужасошася]. Днесь горы и холми точат сладость, удолиа и поля плоды Богови приносят, горнии въ- //98 спевают и преисподнии рыдают, аггели въспевающе дивятся, видяще на земли Невидимаго на небесех и на жребяти - седящаго [добавление: сущаго] на престоле херувимьстем, обиступаема народы - неприступнаго небесным силам. Ныня младенци [добавление: радостно] хвалими бывает Егоже серафими в вышних с страхом славят, ныне же путь шествует в Иерусалим измеривый пядию небо и землю дланию, в церковь входит невместимый небесы. Днесь старейшины [добавление: жречьскыи] гневается на творящаго великая чюдеса, книжници и фарисии детем завидят с ветвеми на сретение [добавление: Христу] теку- //98об. щим и зовущим: Осана, Сыну Давидов! Чюдны вещи! како забыша пророк, писавших о Христе всячьскаа нашего ради язычьскаго спасениа! Уже бо, рече, несть Ми хотениа в сынех Израилевых; яве бых неищущим Мене, и реку не людем Моим: Людие Мои вы есте!

Тем же, братие, подобает нам яко Божиим людей сущем възлюбившаго нас Христа прославим! Приидете, поклонимся Ему и припадем, яко и блудница, мыслено пречистей Того лобызающе нозе; останемся, яко и она, от злых дел; излеим, яко мюро, на главу Его веру и любовь нашю! Изидем любовию, яко народи, в сретение //99 Ему, сломим гневодръжание, яко ветви, постелем Ему, яко и ризы, добродетели, въскликнем молитвами и безлобием, яко младеньци, предъидем милостынями к нищим, въследуем [добавление: смирением] постом и бдением и божественым покаянием и не погубим труда четверодесятедневнаго поста, в няже подвизахомся, очищающеся от всякоя скверны, да в нашь Иерусалим внидет ныне Христос, наше бо съставление [вариант: нашего бо телесе ставленье] Иерусалим речется, якоже Исаиа глаголет: На руку своею написах стены твоя, Иерусалиме, и вселю бо ся посреде тебе! Уготоваим, яко горлицю [вариант: горьницю] смерением душа наша да причастием внидет в ны //99об. Сын Божий и пасху с ученики Своими створит; поидем с идущим на страсть волную, возмем крест свой терпением всякиа обиды, распнемъся бранми к греху, умертвим похоти телесныа, въскликнем: Осана в вышних! благословен еси пришедый на муку волную, еюже ада попра и смерть победи!

До сде же слово окративше, песньми, яко цветы, святую Церковь веньчаим и праздник украсим, Богови хвалословение въслем и Христа Спасителя нашего възвеличим, благодатию Святаго Духа осеняеми да радостно праздновавше в мире достигнем тридневнааго въ- //100 скресениа Господа нашего Исуса Христа, Емуже подобает всяка слава [добавление: честь, держава и покланяние с Отцем и с Пресвятым и благым и животворящим Духом всегда и ныня и присно в веки].

___________________________________

"Синаксарь" XVI в. Росс. нац. библ., Собрание Титова, 522. Л. 93об.- 100.

Источник вариантов и добавлений у А.А.Мельникова не указан.

КЮРИЛА НЕДОСТОЙНАГО МНИХА НА СВЯТУЮ ПАСХУ В СВЕТОНОСНЫЙ ДЕНЬ ВОСКРЕСЕНИА ХРИСТОВА О ПРОРОЧЕСТЫХ ТАЙНАХ СКАЗАНИИ

Радость сугуба всем христианом и веселие миру неизреченно пришедшаго ради праздника днесь за скорбь преже бывшаго таиньства. Отшедшю бо мужеви в путь далече жена скорбна детем претит; пришедшю же мужеви жена веселие неисповедимо приемлет и дети радостию ликъствуют, паче естьства обогащаеми.

А яже [вариант: кая же бе] скорбь преже бывшаго таиньства? - Пред вчерашним днем Господь наш Исус //158 Христос яко человек распинаем бе и яко Бог солнце помрачи и луну в кровь преложи, и тма бысть по всей земли; яко человек възпив испусти дух, но яко Бог землею потрясе, и камение распадеся; яко человек в ребра прободен бысть, но яко Бог завесу [добавление: первяго] закону полма раздра; яко агнець кровь Свою [вариант: с водою] источи за кровь агнець закалаемых преже на жертву, и Собою жертву за спасение всего мира Богу и Отцю принесе; яко человек в гробе положен бысть, яко же Бог олтарь язычьскыя церкве освяти; яко царь стражьми стрегом и запечатленен в гробе лежаше, но яко //158об. Бог аггельскыми вои бесовьскым силам в твердыни ада прещаше, глаголя: Возмете, врата, князи ваши да внидет Царь славы! Но врата адова скрушишася словом Его и верея сломишася до основаниа; сниде Господь во ад и попра бесовьское царство крестом и смерть умертви и седящии во тме видеша свет, связании же нищетою и железом раздрешишася, и скровища вся его расхити, и изиде днесь в силе Божии и в славе святых аггел, и работныа душа человечя [добавление: свобожени] ведяхуся в рай, хвалящеся о Христе. Но церкы на пророкы плищует, но [вариает: не] уже въставшу //159 Христу от гроба: то бо суть чада церковнаа пророци. Воскресе внезапу целом печатем у гроба, и церквы неисповедимо веселие приемлет; пророци же радостию ликуют, глаголюще: Наша убо пасха, за ны пожреся Христос! Кде ти, смерти, победа, кде ти, аде, жало? Въста бо яко спя Господь и въскресе, спасая ны. Христос въскресе из мертвых и гробным живот дарова, и святых дуси паче естества обогатишася, от ада на небеса вселившеся. Тем сугубо и трегубо имя нынешний праздник приемлет. Пасха убо нарицается закалаемых ради Моисеом во Египте агнець, ихже кровию прагы, //159об. и подъя [вариант: подъбоя ] помазавше, вси ти [вариант: израильти ] избавишася смерти от убивающих егуптян глаголет [вариант: ангел]. Сий же образ нынешний праздник Пасхы: заклася ново [вариант: ныне от] священик Агнець Божий Исус за спасение всего мира и всеродна Адама от ада възведе: не бо единех ради праведных сниде, но и всего мира падша преступлением възведе, всех бо грехы въсприим на кресте пригвозди. Вси [вариант: мы] же верою божественыа пасхы причастимся, помажем уста Божиею кровию, еже суть душевнаго дому двери, да не приступят беси хотяще ны убити грехом. Израильтяне бо Его заклаша, и языци о- //160 бед Им створиша. И се зовет пророк вся верныа к Божии трапезе, глаголя: Тело Христово приимете, источника бесмертнаго вкусите! Сим бо телом глава адова съкрушена бысть и жало его притупися; сим телом держава его и власть погублена бысть; сим чрево его проторжено бысть: не бо пакы усты его изиде Христос, но само тело в гробе положено бысть, тогда медянаа врата сломишася [добавление: и верея железная скрушишася ], вратници въстрепеташа, и темница она распадеся, и мрътвии въскресоша. Се тело смерть умертви и тварь всю и- //160об. стлевшю обнови. Сего верою вкушающе христиане освящаются и вечную жизнь на небесех приемлют. Вкусим, братие, животнаго брашна и друг друга любовию целуим, пращающе от сердець своих прегрешениа. [Добавление: второе же] Въскресение бо Христово Великы день нарицается: поистинне же великый день сий есть, не множае часов имея, но великых ради чюдес яже от Спаса нашего створишася, днесь бо аггели с человекы ликуют и человеци с Богом освящаются, Святый приимающе Дух. Глаголет бо Лука еваггелист: Минувши суботе зело рано придоша же- //161 ны видет гроба, носяще ароматы да тело помажют Исусово. И обретоша камень отвален и гроб тощь. И недомышляхуся о сем. И явистася им два аггела в белых ризах и реста има: Что ищете Живаго с мертвыми? Несть зде, но воскресе; помянете глаголы Его, яже рече вам яко: В третий день въскресну! И ныне идете к учеником Его и рцете: Христос въскресе! О вас бо преже писа Исаиа пророк: Придете от видениа жены благовестниця и Сиону рцете: Приими от нас радость благовещаниа! Идете к апостолом и рцете: Уже не крыйтеся, се бо // 161об. събысться слово к вам реченое Исусом: Вмале к тому не видете Мене, и пакы вмале узрите Мя и возрадуетеся; поменете пророка, о Христе и о вас писавша: Поражу пастыря и разидутся овца. Но по мале простру руку и съберу я, и сътворю я малыя пастыря. Идете и рцете учеником: Разумейте о времени сем, глаголавша Иосию: От безаконник побиен бысть Спас и по двою денью [добавление: ицелив мир, и во трети день] въскреснет [вариант: воскресит], и живи будем пред Ним. И пакы Софониа: Потерпите Мене, глаголет Господь, в день въскресениа Моего, в послушьство Мое, зане милость Моя уже на языцех. Идите и рцете апостолом: Есть //162 день о немже рече Давид: Ты, Господи, воскрес, ущедриши Сиона, яко прииде времяне сего Сиона попираемаго от вои глаголю, но церковь язычьскую, юже Своею искупи кровию, ейже никтоже удолеет. Не мните, акы Евзе прельститися вам: она бо от змиа свет [вариант: совет] приа, вы же от аггела слово слышите, бе убо радость вам глаголеве, вы же спасение миру проповедите!

Тогда възвратишася жены от гроба и възвестиша вся си единомунадесят. И не имяхут им веры, не беша бо и еще Святаго Духа приали, тем и страшливы и бегуни и неимовериви беаху. Обаче Петр и Иоан въставша //162об. текоста к гробу. Иоан же скорее Петра притече, но не вниде во гроб, дондеже Петр притек, вниде первое в гроб и виде ризы едины лежаща. Се не за страх не вниде первое притек, за смотрение Божие и за писание книг, но прообразиста бо собою ветхий и новый закон: Иоан образ ветхаго закона, а Петр новаго. Рече [вариант: тече] бо преже ветхий закон, по писанию чаа Христа; пришедшу же Ему, но не вниде в веру Его. Новый же закон последи пришед, но преже в Христа верова, и видит уже тщю надежю ветхаго закона, не могуща держащихся понь спасти. Пте- //163 нець бо отлете, и безумнии тщю гнезду приседят: Христос въскресе, а жерци фарисейстии [вариант: и фарисеи] стражем здят [вариант: молвят], оболгати веляще Христово въскресение. О горе, языче грешен! како прельстися! Почитаа пророкы писавшаа о Христе не разуместе, и чаявшем света и бысть им тма! О люте души их, яко свещаша съвет зол о Бозе живе!

По сем некая два от ученик идяста в весь подаль от Иерусалима и беседоваста о сих всех, и Сам Исус постиже я. Якоже пастух егда мало поспит и въстав видит рашедшюся чреду, и скоро всюду рищет да свое сберет стадо, тако и по //163об. воскресении и Тъ аггелы и человекы в едино [добавление: сбирает] стадо, рече: Что съвъпрашаетася и еста дряхла? Она же реста: Яже о Исусе Назарянине, Егоже распяша жидовьстии жерци; и о женах Ему сказаста, иже глаголют жива от аггела даве слышавша, не бо Его знаяста: беста бо и еще плотян зрак имуща, не уже бо бе Христос на ня дунул глаголя "Приимете Дух Святый!", ни и еще ума их отвръзе да быша разумели яже о Нем писаниа. Тем нарек ею неразумнаа сердцем, нача има сказати от всех книг яже бяху о Нем, о страсти и о въскресении. Не о сем ли, рече, писа Моисий: Узри- //164 те живот вашь висящь прямо очима вашима! Давид же о распятии Его: Пригвоздиша руце Мои и нозе Мои! И [добавление: о золчи]: Вдаша в ядь Мою золчь и жажю Мою напоиша Мя оцта. И о гробе Его: Положиша Мя во рве преисподнем в темным и в сени смертней. Таже о въскресении Его: Да въскреснет Бог и да разидутся врази Его. И пакы: Въскресни, Боже, суди земли! Исаиа же о ученицех Его: Въстав, рече, сберу братию Мою и узрят славу Мою, и ти възвестят имя Мое в странах, и будут Ми людие от язык мнози. И се Ему глаголющю, приближишася ко вси, в нюже идяста. И моляста И //164об. облещи с ними. И яко възлеже приим хлеб, благослови и даяше има. И отвръзостася очи ею, и узреста язвы гвоздинныя на руку Его, и познаста И, яко Сам то есть Христос. И Тъ невидим бысть от нею. Они же възвратистася в Иерусалим и поведаста вся си апостолом, яко въистину въскресе Христос и явися нама, и познахове И по язве гвоздиней.

Мы же, братие, въскресение Христово видевше, поклонимся глаголюще: Ты еси Бог наш, развее Тебе иного не знаем. Человече видемый, Боже разумеваемый, вся земля да поклонит Ти ся и да поет Тебе: Помилуй нас в Тя верующих! Тебе молимся и //165 мили ся деем: Оцести грехы наша, отпусти долгы душь наших, славящих Тя, за ны пострадавша распятие и смерть; Тебе ныне раболепно служим! Вчера с разбойником съраспинахом Ти ся, днесь с Тобою въскресохом. Вчера с Логином возвахом: Воистину Сын Божий Ты еси!; днесь с аггелы глаголем: Воистину въскресе Христос! Вчера с Никодимом с креста снимахом Тя, днесь с Магдалынею въекресша Тя видехом. Вчера с Иосифом в гробе Тя полагахом, днесь яко и Мариа радостныа глаголы слышим: Иди к братии Моей и к Петрови, и шед рци им да идут в Галилею //165об. и ту Мя узрят. Се ныне, яко в Галилею, в святую церковь собравшеся и веселящеся глаголем: Сий день, иже сътвори Господь; възрадуимся и възвеселимься в он, яко Твое есть Царство и Твоя, Христе, держава с Отцем и Святым Духом ныне и присно и в веки веком. Аминь.

________________________________

"Синаксарь" XVI в. Росс. нац. библ., Собрание Титова, 522. Л. 157об. - 165об.

Источник вариантов и добавлений в публикации А.А.Мельникова не указан.

СЛОВО КИРИЛА МНИХА НЕДОСТОЙНАГО О ПОНОВЛЕНИИ ВЪСКРЕСЕНИА, И О АРТУСЕ, И О ФОМИНЕ ИСПЫТАНИИ РЕБР ГОСПОДЕНЬ

Велика учителя и мудра сказателя требует Церкви на украшение праздника. Мы же //177 нищи есмы словом и мутни умом, не имуще огня Святаго Духа на слажение душеполезных словес; обаче любве ради сущее со мною братиа мало нечто скажем о поновлении [в рукописи: "о поновелении" - Прим. А.А.Мельникова] въскресениа Господня.

В минувшюю неделю святыа Пасхы удивление бе небеси и устрашение преисподним, обновление твари, избавление миру, разрушение аду и попрание смерти, въскресение мрътвым и погубление прелестныя власти диаволя, спасение же человеческому роду Христовым въскресением, обнищание ветхому закону и порабощение суботе, обогащение Церкви и въцарение //177об. недели. В минувшюю неделю всему пременение бысть: створи бо ся небом земля, очищена Богом от бесовьскых скверн, и аггели с женами раболепно служаху Христову въскресению. Обновися тварь: уже бо не нарекутся богом стихиа: ни солнце, ни огнь, ни источници, ни древеса. Отселе бо не приемлет ад закалаемых отци младенец, ни смерть почьсти, преста бо идолослужение и погубися бесовьское насилие крестным таиньством, и не токмо спасеся человечьскый род, но и освятися Христовою верою. Ветхый закон отнудь обнища отвержением //178 телча крове и козлиа жертвы, един бо Христос Собою Сам к Отцю за всех жертву възнесе. Тем и праздник суботе преста, а недели благодать дана бысть въскресениа ради, и царствует уже в днех неделя, яко въскресе Христос из мертвых. Венчаим, братие, царицю днем и дар честный той верою принесем, дадим по силе, якоже можем: ов милостыню и безлобие и любовь, другый девство чисто и веру праву и смерение нелицемерно, и ин псаломьское пение, апостолское учение, молитва со воздыханием к Богу. Сам бо Господь Моисеом глаголет: Не являйся предо Мною тощь в день праздника! Принесем //178об. Ему прежереченныа добродетели, да въспримем Божию милость, ибо не лишит добра приходящих с верою, "Славящая бо Мя, рече, прославлю!" Похвалим красно новую неделю сию, в нюже поновление въскресениа празднуем! Не бо есть та же Пасха днесь, но Антипасха речеться. Пасха бо избавление миру есть от насилиа диаволя и свобожение мертвым от ада преисподняго; Антипасха же есть поновление въскресениа, образ имущи ветхаго закона, иже завеща Бог в Египте Моисеови, глаголя: Се избавляю люди Моя от работы фараоня и свобожаю я от мучениа приставник его, [добавление: да понавляеши день спасениа твоего], в онже //179 победих врагы твоя, Израилю! Се ныне и мы понавляим празднующе победный день Христов, в оньже спасение всему миру сдея, победив начала и власти темныа. Того ради и артусный хлеб от пасхы и доныне священ бысть и днесь на иерейскых версех ломиться за опреснъкы, несеныя на главах левгит от Египта по пустыни, дондеже и Чермное море проидоша и ту того хлеба освятиша Богови, егоже вкушающе здрави бывают и врагом страшни. Они же убо избывше телесныа работы, понавляху празднующе день опреснок, мы же Владыко спасени от работы мысленаго фараона диавола, понавляим //179об. победный на врагы день и сего освященнаго ныне приимающе хлеба, тако вкушаем, якоже и они хлеба небеснаго и аггельскаго брашна, и храним его на всяку ползу благу: на здравие телесем, на спасение душам, на прогнание всякого недуга.

Днесь ветхаа конец приаша и се быша вся нова видимаа же и невидимаа. Ныне небеса просветишася, темных облак, яко вретища, сволкъшася и светлом въздухом славу Господню исповедают. Не си глаголю видимыа небеса, но разумныа: апостолы, иже днесь на Сионе вшедша к ним познаша Господа и всю печаль забывше и //180 скорбь июдейскаго страха отвергоша, Святым Духом осенившеся, въскресение Христово ясно проповедают. Ныне солнце, красуяся, к высоте въсходит и, радуяся, землю огревает: възыде нам от гроба праведное [добавление: солнце] Христос и вся верующаа Ему спасает. Ныне луна с вышняго съступивши степени болшему светилу честь подавает, уже бо ветхий закон по Писанию с суботами преста и пророкы Христову закону с неделею честь подаются. Ныне зима греховнаа покаянием престала есть и лед невериа богоразумием растаяся: зима убо язычьскаго кумирослу- //180об. жениа апостолскым учением и Христовою верою престала есть, лед же Фомина невериа показанием Христов ребр растаяся. Днесь весна красуется, оживляющи земное естьство, и бурнии ветри тихо повевающе плод гобзуют, и земля семена питеющи [вариант: питающи] зеленую траву ражает. Весна убо краснаа - вера Христова, яже крещением поражает человечьское естьство; бурнии же ветри - грехотворнии помысли, иже покаанием претворшеся на добродетель; душеполезныа плоды гобзуют, земля естьства нашего, аки семена слово Божие приимши и страхом Его присно болящи, //181 дух спасениа ражает. Ныне новоражаемии агньци и унци быстро путь перуще скачют и скоро к матерем възвращьшеся веселятся, да и пастыри свиряюще веселием Бога хвалят. Агньца глаголю кроткыа от язык люди, а унца - кумирослужителя неверных стран, иже Христовым въчеловечением [добавление: и апостольским учением] и чюдесы скоро по закон емшеся, к святей Церкви възъвратившеся, млеко учениа ссут, да учители Христова стада о всех молящеся Христа Бога славят, вся волкы и агньца в едино стадо събравшаго. Ныня древа леторасли испущают и цвети благоуханиа процвитают, //181об. и сеи уже оград сладку подает воню, и делатели с надежею тружающеся плододавца Христа призывают. Бехом бо преже акы древа дубравнаа не имуще плода, ныне же присадися Христова вера в нашем неверии, и уже держащеся корене Иосеова, яко цветы добродетели пущающе, райскаго пакибытиа о Христе ожидают. Ныне ратаи слова словесныя овця [вариант: уньца] к духовному ярму приводяще, и крестное рало в мысльных бразнах погружающе, и бразну покаяниа прочертающе, семя духовное //182 въсевающе, надежами будущих благ веселятся. Днесь ветхаа конець приаша, и се быша вся нова въскресениа ради. Ныне рекы апостолскыя наводняются и язычныа рабы [вариант: рыбы] [добавление: плод] пущают, и рыбари глубину Божия въчеловечениа испытавше, полну церковную мрежю ловитвы обретают. Реками бо, рече пророк, раседеся земля, узрят и разболятся нечестивии людие. Ныне мнишьскаго образа трудолюбиваа пчела свою мудрость показающи вся удивляет, якоже бо они в пустынях самокормием живуще аггелы и человекы удивляют, и си на цветы изле- //182об. тающе, медвены сты стваряют, да человеком сладость и Церкви потребнаа подаст. Ныне вся доброгласныа птиця церковных ликов гнездящеся веселятся: И птица бо, рече [добавление: пророк], обрете гнездо себе олтаря Твоя, - и свою каяждо поющи песнь, славят Бога гласы немолчными. Днесь поновишася всех святых чинове, нову жизнь о Христе приимше: пророци и патриарси трудившеся в райстей почивают жизни, и апостоли с святители пострадавшеи прославляются на небеси и на земли, мученици и исповедници за Христа претерпевшеи страсть с аггелы венчаются, цари и //183 князи благовернии послушанием спасаются, девьствении лици и иночьстии състави, свой крест терпением понесше, первенцю Христу от земля на небеса последуют, постници и пустынници, от руки Господня трудом мьзду приимше, в Горнем Граде с святыми веселятся. Днесь новым людем въскресениа Христова поновлениа праздник, и вся новаа Богови приносятся: от язык вера, от христиан требы, от иереи святыа жрътвы, от миродержитель боголюбныа милостыни, от велможь церковное попечение, от праведник смереномудрие, от грешник истинное покаание, от нечести- //183об. вых обращение к Богу, от ненавидящих духовнаа любы.

Възидем и мы, братие, мыслено в Сионьскую горницу, яко тамо апостоли събрашася и Сам Господь Исус Христос, затвореным дверем, посреде их обретеся, и рек: Мир вам!, исполня я радости. Възрадоваша бо ся, рече, ученици, видевше Господа, и всю печаль телесную и страх сердечный отринуша, даст бо ся душам их духовнаа дерзость познанием своего Владыкы, яко обнажи пред всеми Своя ребра и гвоздинныа язвы на руку и на ногу показает Фоме. Не бе бо Фома в первый приход [добавление: с ученики] видел Господа и слышав Его въскресша не яко //184

[добавление: лжю мня не вероваше, но и самовидець хотя быти Христу, тако глаголаше: Аще не вложю руки моея в ребра Его и в язву гвоздиньную перста моего, не иму веры! Тем и Господь не понося ему сице глаголаше: Принеси руку твою и вижь прободение ребр Моих и веруй, яко Аз Сам есмь. Мне бо и преже тебе патриарси и пророци разумевше, вероваша Моему въчеловечьнию. Испытай первое Исаино о Мне писание: Копьем бо, рече, в ребра прободен бысть, и изиде кровь и вода; в ребра прободен бых, да ребром падъша Адама въскресих. А тебе ли не верующу Ми презрю? Осязай Мя, яко Сам Аз есмь, Егоже преже осязав Семеон и верою прошаше отпущения с миром, и не буди неверен, якоже Ирод, яже слыша Мое рожество, глаголаше волъхвом: Кде Христос ражаеться, да и аз шед поклонюся Ему? - а в сердци о убийстве Моем мысляше, нъ еще и младеньци изби, но искомаго не обрете: Взищут бо Мене злии, нъ не обрящут. Веруй Ми, Фомо, и познай Мя, якоже и Аврам, к немуже под сень с двема ангелома придох, и тъ познав Мя, Господа Мя нарече, и о Содоме моляше Мя ся, да его не погублю аще и до десяти было бы в нем праведник. А не]

буди неверен, акы Валам, иже Духом Святым прорек Мое за мир умертвие и въскресение, и пакы мьзды ради прельстився погибе. Веруй Ми, Фомо: Сам Аз есмь, Егоже виде Иаков в нощи на лествице утвержающася, тъже и пакы позна Мя духом, егда боряхся с ним в Месопотамии: тогда бо обещахся ему въчеловечитися в племени его. И не буди неверен, яко Навходоносор, иже видев Мя в пещи отрокы от огня спаса, истинною Сына Божиа нарече Мя и пакы к своим прелстем уклонився, погыбе. Веруй Ми, Фомо, яко Аз есмь, Егоже образ виде Исаиа на престоле вы- //184об. соце, объстоима множеством аггел Аз есмь явивыйся Езекию [вариант: Езекилю] посреде животных образом [добавление: человеческом], емуже и вас прообразих колесы, животными придержащихся, въздвизающихся со Мною: то бо животный бе дух тогда в колесах, егоже и ныне в вас дунух Дух Святый. Аз есмь, Егоже виде Даниил на облацех небесных подобием Сына человечя, съшедша до Ветхаго днем, и тъ написа даную Ми от Бога Отца власть и царство на небеси и на земли нынешняго и будущаго бесконечнаго века. Принеси, о Близньче, твой перст и вижь руце Мои, //185 имаже очи слепым отверзох и глухым слуха даровах и нема доброглаголивы створих. Вижь нози Мои, имаже и пред вами по морю ходих, и по въздуху явьствено ступах, и в преисподняя вшед, тема ада попрах, и с Клеопою и Лукою до Еммауса шествовах, и не буди неверен, но верен.

Отвеща Фома глаголя: Верую, Господи, яко Ты Сам еси Христос Бог мой, о Немже писана пророци дозряще духом, Егоже прообрази в законе Моиси, Егоже отвръгошася жерци и фарисеи, Емуже поругашася с книжники завистию жидове, Егоже с Каиафою на ра- //185об. спятие Пилат [добавление: преда], Егоже Бог Отець из мертвых въскреси. Вижю ребра, от нихже источи воду и кровь, водою да очистиши оскверньшуюся землю, кровь же да освятиши человечьское естьство. Вижю руце Твои, имаже преже створи всю тварь, и рай насади, и человека създа, имаже благослови патриархи, имаже помаза царе, имаже освяти апостолы. Вижю нози Твои, еюже прикоснувшися блудница грехов отпуст прият, на неюже припадши первое вдовица от мертвых своего сына с душею жива приат; над сима ногама кровоточиваа подолку //186 ризы прикоснувшися ицеле от недуга. И аз, Господи, верую, яко Ты еси Бог. И рече к нему Исус яко: Видев Мя и верова; блажени невидевшеи и в Мя веровавше!

Тем же, братие, веруим Христу Богу нашему, распеншомуся поклонимся, въскресшаго прославим, явльшомуся апостолом веруим и своя Фоме показавшому ребра въспоим, пришедшаго оживити нас похвалим, просветивъшаго ны исповедаем, и всех благ подавшаго нам обилие възвеличим, от Троица единого познаим Господа Бога и Спаса нашего Исус[а] Христа, Емуже слава с Отцем и с Святым Духом!

_______________________________

"Синаксарь" XVI в. Росс. нац. библ., Собрание Титова, 522. Л. 176об. - 186.

Источник вариантов и добавлений в публикации А.А.Мельникова не указан.

ТОГО ЖЕ КЮРИЛА МНИХА СЛОВО О СЪНЯТИИ ТЕЛА ХРИСТОВА С КРЕСТА И О МЮРОНОСИЦАХ ОТ СКАЗАНИЯ ЕВА- //6 НГЕЛЬСКАГО И ПОХВАЛА ИОСИФУ В НЕДЕЛЮ 3-ЮЮ ПО ПАСЦЕ

Праздьник от праздьника честный приспел есть, подавая благодать Божию святей Церкви. Якоже бо и пленица златы, растворены жьньчюгомь с многоценьнымь каменьемь, веселять зрящиих на ня очи, нъ паче сих духовьная нам красота - праздьници святии, веселяще верьныих сердца и душа освящающе. Пьрвое бо въскрьсениемь Христовом просветися мир и нас [добавление: Пасъка] бысть, вся верныя освящающи; таче Фоминомь испытаниемь ребр Господень обновися тварь: коснувшю бо ся ему рукою язвах, всем известо бысть телесьное въстание.

Ныня же Иосифа благообразьнааго с мюроносицами похвалим, послуживъшааго по распятии телу Христову, егоже евангелист богата нарицает, пришьдъша от Аримафея. Бе бо, рече, и тъ ученик Исусов и чая Царствия Божия. И в время страсти вольныя Спасовы виде страшьная в твари чюдеса: солнце помь- //6об. ркъше и землю трясущюся, страха исполнивъся и дивяся приде в Иерусалим. И обрете тело Христово на кресте наго и прободено висяще, и Марию матерь Его с единемь ученикомь Тому предъстоящю, яже от болезни сердца горце рыдающи сице глаголаше: Тварь съболезнуеть ми, Сыну, Твоего зрящи бес правды умьрщвения. Увы мне, чадо, мой свете и Творче тварем! Что Ти ныня въсплачю? Заушения ли, ци ли за ланиту ударения и по плещема биения, уз же и тьмнице, и заплевания святаго Ти лица, яже от безаконьник за благая прият! Увы мне, Сыне! не повиньн Сы поруган бысть и на кресте смерти въкуси! Како Тя тьрниемь венчаша, и зълчи с оцтомь напоиша, и еще и пречистая Ти ребра копиемь прободоша! Ужаснуся небо и земля трепещеть, июдейска не тьрпяще дерзновения; солнце помьрче и камение распадеся, жидовьское окаменение являюще. Вижю Тя, милое мое чадо, на кресте нага ви- //7 сяща, бездушна, безрачна, не имуща видения, ни доброты, и горко уязвляюся душею. И хотела бых с Тобою умрети, - не тьрплю бо бездушьна Тебе зрети. Радость мне отселе никакоже прикоснеться, свет бо мой и надежа и живот, сын и Бог на древе угасе. Кде ми, чадо, благовестование, еже ми древле Гаврил глаголаше: Радуйся, обрадованая, с тобою Господь! - царя Тя и Сына Вышняаго нарицая, Спаса миру и животворца всем и грехои потребителя. Ныня же зрю Тебе, акы злодея, межю двема повешьна разбойникома, и копиемь прободена в ребра мьртвьца, и сего ради горко изнемагаю. Не хощю бо жити, нъ варити Тя в аде. Ныня моего чаяния, радости же и веселия, Сына и Бога лишена бых! Увы мне! О страньнемь Ти рожестве тако не болех, якоже ныня, Владыко, растьрзаюся утробою, Твое видящи тело пригвождено к древу. Твое бе преславьно рожество, Исусе, и ныня страшьно умерщвение: един от несеяныя [вариант: неспанныя] проиде утробы, целы печа- //7об. ти моего съблюд девьства, и матерь мя Своего въплъщения показав, и пакы девою схрани. Знаю Твое за Адама пострадание, нъ душевьною рыдаю объята горестию, дивящися Твоего таиньства глубине. Слышите, небеса и море с землею, внушайте моих сльз рыдание: се бо Творець вашь от священик страсть приемлеть, един праведьн за грешникы и безаконьники убиен бысть! Днесь, Симеоне, постиже мя проречение: Копие бо мою ныня проходить душю, Твоего от воин зрящи поругания. Увы мне! Кого к рыданию призову! или с кымь моих сльз излею потокы! Вси бо Тя оставиша ужикы же и друзи, Твоих, Христе, насладивъшеся чюдес! Кде ныне лик седмьдесятных ученик? Кде ли верховьнии апостоли? Ов бо Тя льстью фарисеом предасть, другый же страха ради пред архиереи с клятвою отвержеся, не зная Тебе человека. И едина, Боже //8 мой, раба Твоя рыдающи предъстою с хранителемь Твоих словес и възлюбленымь Ти наперсьникомь! Увы мне, Исусе, мне [вариант: мой], драгое имя! Како стоить земля, чюющи Тя на себе на кресте висяща, иже на водах ту в начатъце основал еси, иже многыя слепьца просветив и мьртвыя словомь въскресивъша Твоего Божества мановениемь? Придете, видите Божия смотрения таиньство, како оживлий вся проклятою умерщвен бысть смертию!

И си слышав Иосиф, приближися к горко рыдающий матери, егоже видевъши мольбьными тому оплеташеся глаголы: Потъщися, благообразне, к Пилату безаконьному судии, и испроси с креста съняти тело учителя своего, моего же сына и Бога. Подвигнися и предъвари, причастьниче Христову учению, тайный апостоле, обещьниче Божию Царствию, и испроси уже бездушьное тело, пригвожденое к древу и прободеное в ребра! Спостражи благоверьно [вариант: благоверне] сугу- //8об. баго ти ради венца, егоже по въскрьсении Христове въсприимеши, от всех конець земля честьную славу и поклонение и на небеси бесконьчьную жизнь!

Умилив же ся Иосиф плачевьными тоя глаголы, не рече: Жьрци на мя въстануть и озлобять, июдеи въскрамолять и побиють мя, фарисеи разграбять мое богатьство, буду же и сборища отлучен. Ничтоже сих не рече, нъ вся уметы створи и о своемь бо не родив животе, да Христа приобрящеть, дерзнув въниде к Пилату и въпроси, глаголя: Дажь ми, огемоне, тело страньнаго оного Исуса, распятаго межю двема разбойникома, оклеветанаго от архиереи завистию и поруганаго от воин [добавление: завистию же] бес правды. Дажь ми тело оного Исуса, Егоже Сыномь Божиемь нарицяхуть книжьници и царьмь поведаху фарисеи, Емуже ты повеле над главою дъску прибити, имущю писание: Се есть Сын Божий и царь Израилев.

Въпрос: Дажь ми те- //9 ло, Егоже Свой ученик жьрцем льстию на сребре предасть, о немже провидя Захария тако написа: Дадите ми цену Мою, ли отрцетеся; и поставиша 30 срьбръник цену ценьнаго от сынов Израилев. О томь молю ти ся телеси, о немже прорече Каияфа, тому единому за вьсь мир умрети; не просто сего прорече, нъ жрьць бе сего лета, о нихже рече Иеремия: Пастуси мнози просмрадиша виноград мой. И пакы псалом глаголеть о них: Князи людьстии събьрашася на Господа и на Христа Его! Си бо рече Соломон: Помыслиша и прельстишася, ослепи бо я злоба их; рекоша бо: Уловим правьдника, руганиемь и ранами истяжем его и смертию безлепотьною осудим его.

Сего прошю Исусова телесе, иже противу твоему отвеща въпросу: Аз есмь живот и истина. И: Не имаши на Мне власти никоеяже, аще не бы ти дано съвыше! Его- //9об. же ради и тебе моляше своя жена, глаголющи: Ничтоже не створи праведьнику тому: много бо пострадах Его ради в сне. Дажь ми сего распятаго, Емуже въходящю в Иерусалим, с ветвьми младеньци съретахути и глаголюще: Осана, Сыну Давидов! Егоже глас слышав, ад отпусти душю Лазоря, уже червьродневна [добавление: в гробе] умрьша; о Немьже писа в законе Моиси: Узрите живот вашь прямо очима вашима висящь! Сего хощю мьртваго телесе, Егоже мати не познавъши мужьска ложа девицею породи; о Немьже Исаия к Ахазу глаголаше: Се девица зачнеть в чреве и родить сына, Емуже имя: С нами Бог; о Немже Давид прорече глаголя: Прогвоздиша руце мои и нозе мои и вся кости моя ищьтоша. Дажь ми сего умьршаго на кресте, о Немже ты рече к просящим Его у тебе на смерть жидом: Чист есмь от кръви праведника сего, - умыв же руце и бив предасть Его; о Немже глаголеть пророк: Аз же не противлюся, ни //10 прекы глаголю; плещи мои дах на раны и ланите на ударение; лица же Моего не отвратих от студа, запльвания.

Сего прошю Назарянина телесе, Емуже от изумевъшихъся избегающе въпиаху беси: Что есть нам и Тобе, Исусе Сыне Божий? вемы Тя, кто еси: Святый Божий; пришьл еси преже времене мучит нас! О Немже и Сам Бог Отець с небесе, на Иердане крестящюся Ему, послушьствоваше глаголя: Се есть Сын Мой възлюбленый, о Немже благоизволих; о Немже Дух Святый Исаиемь глаголеть: Яко овча на заколение веден бысть, от безаконьных людий предан бысть на смьрть. Дажь ми тело съняти с крьста, хощю бо его в своемь положити гробе. Уже бо вся о Немь испълнишася пророчьства: Сь бо наша болезни понесе и за ны пострада; раною Его вси ицелехом, зане предана бысть на смерть душа Его и с безаконьникы вменен бысть; истребим бо, реша, память Его //10об. от земля живущих и имя Его не помянеться к тому; сего ради хощеть Бог отъяти болезни от душа Его и дати Ему крепкых користь, пишеть бо ся о Немь: И ты в кръви завета своего испустил еси ужникы своя от рова неимуща воды!

И си вся слышав от Иосифа Пилат, дивися, и призва сътника въпроси и: Аще уже умреть пропятый Исус? И, уведав, дасть тело Иосифу да его погребеть якоже хощеть. И купив плащаницю, сънят тело Исусово с крьста.

Приде же и Никодим, несый смешение изъмюрно и алойно, достойно цены литр [добавление: злата] ста; обиста тело Христово, помазавше с мюромь. Въпияше же Иосиф, глаголя сице:

Солнце незаходяй, Творче всех и тварем Господи! Како пречистемь прикоснуся теле Твоемь, неприкосновьньну Ти сущю и небесным силам, служащим Ти страшьно! Кацеми же плащаницами //11 обию Тя, повивающаго мьглою землю и небо облакы покрывающаго! Или какы воня възлею на Твое святое тело, Емуже дары с вонями пьрсьтии принесъше цари, яко Богу покланяхуся, прообразующе Твое за вьсь мир умьрщвение! Кыя ли нагробьныя песни исходу Твоему въспою, Емуже в вышьних немолчьными гласы серафими поють!

Како ли понесу Тя на мою пьрстьною руку, носящаго тварь всю, невидимаго Господа!

Како ли в моемь худемь положю Тя гробе, небесный круг утвердивъшаго словомь и на херовимех с Отцемь и с Святымь почивающаго Духомь!

Обаче си вся смотрениемь твориши и вся си Своею волею претерпел еси; идеши бо в ад, [в рукописи стерто добавление: "да" - Прим. А.А.Мельникова] Адама от ада с Евгою, падъша преступлениемь, пакы въведеши в рай и прочая с нима въскресиши мьртвьца Твоего божества силою! Темьже сице възглашая, погребу Тя, милостиво, я- //11об. коже Святымь научен бых Духомь: Святый Боже, святый крепъкый, святый бесмьртьне, помилуй нас! И положиша И в гробе, и привалиша камень велик к дверем гробу. Мария же Магдалыни и Мария Ияковля зряста, кде и полагаху.

И минувъши суботе, и сълнцю уже въсиявъшю, вся вкупе жены с мюромь, се уже чьтвьртое, придоша. Пьрвое бо, якоже глаголеть Матфей, - вечер в суботу придоша две жене видет гроба; при неюже трус бысть, егда ангел отвали камень от двьрий, и от страха его омьртвеша стрегущеи; тема тъгда и Сам Исус явлься рече: Радуйтася; идета к братии Моей, да идуть в Галилею, и тамо видять Мя! И пакы полунощи ины придоша испытат бывъшаго, яже от Магдалыне о въскрьсении Христове слышаша; о тех бо Лука написа тако: Зело рано придоша жены к гробу и обретоша камень уже отвальн, и два ангела в них ставъша глаголаста: Что ищете //12 живаго с мьртвими? несть сде, нъ въскрьсе! По семь пред зорями друзеи придоста жене, и те видеста утрь в гробе два ангела, идеже бе лежало тело Исусово; темьже Иоан Фелог рече: От тою слышав, Петр с другым учеником тече к гробу и еще сущи тьме.

Марко же о всех поведаеть мюроносицах, яже с вонями в суботу придоша: И вълезъше в гроб, видеша уношю, одесную седяща, и ужасошася. Он же рече им: не ужасайтеся! не вам бо есть страх, нъ безаконьным жьрцьм с стерегущи сде воины. Вы же видете тъщь гроб и рьцете апостолом: Христос вьскресе! Видите: без телесе есть плащанища, и о плотьномь Исусове хвалитеся въстании; будете благовестьце человечьскому спасению, рьцете апостолом: Днесь спасение миру! Уже не скърбите, ни сетуйте, яко мьртвьца, нъ радуйтеся и веселитеся о Бозе живе! Вам хощю тайны поведати Божия человеколюбия, яже за Адама в тлю падъ- //12об. ша пострада; того бо ради с небесе сниде и въвплътивъся, бысть человек да истьлевъшаго обновить и на небеса възведеть. Он послушав света вражия, въсхоте быти Бог и проклят бысть; Сь же послушав Отца, Бог сы бысть человек да змия погубить и человека обожить. Он простер руце к древу възбраньному, смертьное утърже ядро, и быв раб греху, съниде от Едема в ад; Христос же на кресте руце простер, осужения греховнаго и от смерти человекы свободи. Неповиньн сы продан бысть да проданыя грехомь от дьяволя работы да избавить. На тръсти губою оцьта с золчию въкуси, да загладить рукописание человечьскых съгрешений. Копиемь в ребра прободен бысть, да пламеньное оружие отложить, бранящее человеком въхода в рай. Кръвь с водою изд ребр источи, имаже телесную всю сквьрну очистив и душа человека освятил есть. Съвязан бысть и тьрниемь венчан, да раздре- //13 шить от уз дьяволь человекы и тьрние прельсти вражия искоренить. Солнце помрачи и землею потрясе, и твари всей плакатися створи, да адьская раздрушит скръвища, и тамо сущих душа свет видеша, и Евжин плачь на радость преложи. В гробе яко мьртв положен бысть, и от века умьршим гробьным живот дарова. Каменьмь с печатьми утвьржен бысть, да адова врата и верея от основания скрушить. Стражьми стрегом бе всеми видимо, нъ невидимо съшьд в ад, съвяза сотону. Ангельская бо воиньства с Нимь текуще зъваху: Възмете, врата, князи ваши, да вънидеть цесарь славы! И ови съвязаныя душа речаше от тьмниць пущаху; друзии же противныя силы вяжюще, глаголаху: Кде ти, смерти, жало? Кде ти, аде, победа? К нимже оцепевъше беси въпияху: Кто се есть цесарь славы, с толикою на ны пришел властию? Погубил есть князя тьмы и вся его въсхытил скро- //13об. вища, разби смертьный град, адово чрево, извоева пленьникы, иже с Адамомь съде, сущая грешных душа! Въскрьсе целом печатем у гроба, тако бо и рожься: не вреди матьрня девства печати. Да несть вам страха, нъ омьртвевъшим воином! Уже бо вся съвьршив Исус, въскрьсе боголепьне, и показася преже вас приходивъшим женам, възывая красно: Радуйтася! И апостолом Своим в Галилею ити повеле, да вся тамо с вами освятив с плътию на небеса възидеть, с неюже и пакы придеть судит мирови. Си же вся от ангела реченая к мюроносицам о Христе съказахом.

Похвалим ныня Иосифа приснопамятьнаго, благообразьнаго же и досточюдьнаго! Блажен еси поистине, преславный и досточюдный Иосифе, толика блага и велика богатьства на земли и на небеси сподоблься! Достойно послужив, яко и херовими, Божию телеси; нъ они невидимо на своею дьржаще ра- //14 му, страхомь своя покрывають лица; ты же, радуяся, на своею руку Христа Бога носил еси. Блажен еси, Иосифе, паче патриарх Аврама, Исака, Иякова! Егоже бо они глас тъчию слышавъше, чьстъни и славьни паче всех явишася. Того же ты в плащаницю обил еси тело! Блажю руце твои, Иосифе, на неюже Сына Божия и всех Творца дьржал еси тело, Егоже образа не тьрпя зрети в Хориве Моиси, под каменьмь скрывъся слыша: Задьняя Моя узриши! Тем и на Фаворе с Илиею видев Христа, послушьствоваста того суща Бога и человека. Блажен еси паче Давида цесаря, великый Иосифе! Давид бо от Силома кивот с Божиемь словомь принесе, нъ в своемь убояся поставити его дому; ты же не скинию с закономь, нъ Самого Бога прием от крьста, в своемь гробе, радуяся, положил еси! Блажен и преблагословен тобою, Иосифе, ископаный гроб, в немьже полежа Христос Спас нашь! У- //14об. же бо несть гроб, нъ престол Божий, олтарь небесный, покоище Святаго Духа и одр Небеснаго Цесаря, о Немьже, рече Соломон, стоять сильнии ратоборьци, изучени брани, имуще оружия обоюдуостра; си глагола, назнаменуя святых чины, борющихъся с еретикы и с жиды по Христе. Блажен еси, Иосифе, съвершителю Божию таиньству и пророчьскых гаданий раздрешителю! О Немьже бо закон и пророци притчами написаша, Сего ты явьствьно измюрною по святым мазаше язвам. Блажен еси, Иосифе, иже вся ожививъшаго словомь и водами покрывъшаго твердь небесную, - Сего яко мьртвьца каменемь покрыл еси в гробе, чая тридневнаго въскресения! Блажен убо и град твой Аримафей, из негоже ты приде послужит Сыну Божию! Кую похвалу створим достойну твоего блаженьства, ли кому уподоблю сего праведника! Како начну или како разложю? Небомь ли тя прозо- //15 ву? нъ того светьлей бысть богочестьемь, ибо в время страсти Христовы небо помрачися и свой свет скры, ты же тогда, радуяся, на своею руку Бога носяшс. Землю ли тя благоцвьтущю нареку? нъ тоя честьней ся показа: тъгда бо и та страхомь трясашеся, ты же с веселиемь Божие тело с Никодимомь в плащаницю с вонями обив положил еси. Апостоломь ли тя именую? нъ и тех вернее и крепъче обретеся: егда бо они страха ради жидовьска разбегошася, тъгда ты без боязни и бе сумнения послужил еси Христови. Святители тя старейшину прозову? темь бо образ своея служьбы предал еси, обиходя и кадя и кланяяся с молитвами пречистому телу Христову, глаголя: Воскресни, Господи, помози нам, избави нас имени Твоего ради! Священомученикомь ли тя нареку, яко толику показал еси любовь к Христови? аще бо и не въгрузися в твоя пьрси оружие, ни прольяся твоя от меча кръвь, нъ изволе- //15об. нием и верою по Христе положил еси душю. Поразили бо тя быша и на удеса расекли, нъ съхрани тя от тех Исус, Егоже ты храняше тело, не убоявъся гнева жидовьска, не прещения жречьска, ни напрасно убивающих воин не устрашися, не пожали си по мноземь богатьстве, не родив ни о своемь животе, чая тридневнаго въскресения, нъ паче всех святых подвизалъся еси, богоблаженый Иосифе и паче всех имаши дерзновение к Христу, к Немуже молися и о нас, хвалящих тя и чтущих твою с мюроносицами памят и твой украшающим праздьник!

Подажь, святе, всем нам твою помощь, буди покръв граду нашему от всякого зла, подавая князю на противныя победу и заступаяй его от всех видимых и невидимых враг, мир же глубок и съдравие телеси, купно же и души его проси спасения! //16 И нас избави от всякоя нужа и печали и беды и всех лютых напастий, и многых грехов отпуст испроси своими к Богу молитвами, да избавить ны от бесконьчьныя мукы и причастьникы створить будущая жизни благодатию и человеколюбиемь Господа и Бога и Спаса нашего Исуса Христа, Емуже слава с Отцемь и с Пресвятымь и благымь и животворящимь Духомь ныне и присно и в векы.

___________________________________

"Соборник", нач. XIII в. Росс. нац. библ., F.n.I. 39. Л. 5об.-16.

Источник добавлений и вариантов у А.А.Мельникова не указан.

*

ТОГО ЖЕ ГРЕШНАГО МНИХА СЛОВО О РАСЛАБЛЕНЕМЬ ОТ БЫТИЯ И ОТ СКАЗАНИЯ ЕВАНГЕЛЬСКАГО В НЕДЕЛЮ 4-Ю ПО ПАСЦЕ

Неизмерьна небесная высота, ни испытана преисподняя глубина, ниже сведомо Божия смотрения таиньство, велика бо и неиздреченьна милость Его на роде человечьстемь, еюже помиловани быхом. Того ради дължьни есмы, братие, хвалити и пети и прославляти Господа Бога и Спаса нашего Исуса Христа, исповедающе великая Его чюдеса, //16об. еликоже их створи - неисповедима бо суть ни ангелом али нъ человеком.

Ныня же о раслабленемь побеседуим, егоже днесь Сам Бог въспомянул и призрел и помиловал, егоже и врачеве небрегома створиша, егоже презряху въметающеи в купель, егда бо възмутяшеться вода, вьси о богатых пекущеся сдравии, сего отреяху, егоже ныня Христос благий человеколюбець словомь ицели, врачь бо есть душам нашим и телом, и слово Его деломь бысть.

Глаголеть бо евангелист: Възиде Исус в Иерусалим в преполовление жидовьска праздьника, егдаже множьство народа от всех град по обычаю събирахуться в Иерусалим, тъгда и Господь приде, всячьскы угажая Своим рабом и неистовьство противьных обличая июдей, поистине бо приде, ища заблужьших и спасть погыбъших. Многа бо по всей Палестине створи чюдеса, и не веровахуть Ему, нъ противу благодати //17 хулять, лестьца и блазнителя нарицающе Его. Того ради при мнозе приде народе к Соломони водедьрьжи, иже нарицаеться Вифезда, сиречь Овьча купель, понеже ту полоскаху жьртвьных овець утробы. Над симь бе храм, пять притвор имея, и ту лежаше множьство болящих: хромых же и слепых и инеми недугы болящеи, чающе движениа воде, ангел бо Господень, приходя, възмущаше воду, и по возмущении первое вълезый цел бываше. Си же бе образ святаго крещения, понеже не всегда вода та ицеляше, нъ егда ю ангел възмутяше. Ныня же к крещения купели Сам ангелскый Владыка Святый Дух приходя освящаеть ю, и даеть сдравие душам и телом, и грехом очищение; аще кто слеп есть разумомь, ли хром невериемь, ли сух мнозех безаконии отчаяниемь, ли раслаблен еретичьскымь учениемь - всех вода крещения зсдравы творить. Она купе- //17об. ль многы приимающи, а единого ицеляше, и тоже не всегда, нъ единою лета; а крещения купель по вся дьни многы оживляющи створить к крещению, бо аще и всея земля придуть человеци, не умалиться Божия благодать, всем дающи ицеление от греховных недуг. Рьцем же о Господни благодати, како приде к Овчи купели и виде человека раслаблена, долго время на одре в недузе лежаща, и въпроси его глаголя: "Хощеши ли сдрав быти?" - "Ей, - рече, - Господи! хотел бых, нъ не имею человека, дабы по възмущении ангелове въвергл мя бы в купель. Нъ аще мя еси о сдравии, Владыко, въпросил, то крътъце послушай моего ответа, да Ти своея болезни напасть исповеде. 30 и 8 лет на одре есмь недугомь пригвожден слежю; греси мои вся уды телесе моего раслабиша, а душа моя преже страсть [вариант: смерти] поношении бодома бысть. Богови молюся, и не послушаеть мене, зане превзидоша безакония моя главу мою. Врачем и- //18 здаях все мое имение и помощи улучити не възмогох, несть бо зелия, могуща Божию казнь пременити. Знаемии мои гнушаються мене, смрад бо мой всякоя утехы лиши мя, и ближьнии мои стыдяться мною, яко чюжь бых страсти ради братии моей. Вси человеци мною кльнуться, а утешающаго не обретох. Мьртва ли себе нареку? - Нъ чрево ми пища желаеть и язык от жажа исыхаеть. Жива ли себе помышлю? - Нъ не тъкмо въстати с одра, нъ ни подвигнути себе не могу: нозе имею непоступьне, руце же не тъчию безделне, нъ ни осязати себе тема съвладею. Непогребен мьртвьць разумеюся, и одр сь гроб ми есть. Мьртв есмь в живых и жив есмь в мьртвых, ибо яко жив питаюся и якоже мьртв не делаю. Мучим же есмь, акы в аде, бестудиемь поносящих ми; смех бо есмь унотам, укаряющимъся мною, и старце- //18об. м же лежю притъча к наказанию. Мною вси глумяться, аз же сугубо стражю: утрьуду болезнь клещить мя, вънеуду досадами укоризньник стужаю си, от всех бо пльвание слин покрываеть мя. Двое сетование объдержить мя: глад паче недуга преодаляеть ми: аще бо и брашно обрящю, нъ в уста рукою въложити его не могу; всем молюся, дабы мя кто накърмил, и бываеть делим мой бедный укрух с питающими мя. Стоню с сльзами, томим болезнию недуга моего, и никтоже придеть посетит мене, един злостражю никымь же видим. Егда же останъци тряпез богобойных юдий принесени будуть сде, скоро притекуть приставници Овчая купели, и не тако пси Лазоревы облизаху струпы, якоже си моя помилования пожирають. Не имею же ни имения, да бых си единого умьздил о мне пекущася //19 человека, яко зле расточих даное ми в раи богатьство, и змьемь в Едеме украдена ми бысть чистоты одежа, и сде лежю наг Божия покрова. Не имам человека, иже бы не гнушаяся послужил ми: Енох и Илия не обретостася на земли, възята бо быста на колесници огньне и пребываета идеже Бог весть; Аврам с Иовомь, мало послуживша мне подобьным, преставистася в бесконьчную жизнь. Господи, человека не имам верна к Богу: Моиси боговидець и законодавець послеже съгреши к Богу и не въниде в землю обетованую; Соломон премудрый трикраты с Богом беседовав, на старость прирази к Богу и, женами прельстивъся, погыбе. Господи, человека не имам, въложаща мя в купель, вси бо уклонишася и неключими быша, и несть творящаго блага, несть единого, и не разумеют вси творящий безаконие".

И си вся от уст раслабленаго слышав, благый нашь врачь Господь Исус Христос отвещав к раслабленому: //19об. "Что глаголеши: Человека не имам! Аз тебе ради человек бых щедр и милостив, не сългав обета Моего въчеловечения. Слышал бо еси пророка глаголюща, яко отроча родиться, Сын Вышняго, и дан бысть нам, и Тъ болезни и недугы наша понесеть. Тебе ради Горьняго Цесарьства скипетры оставль, нижьним служа объхожю, не придох бо, да Ми послужать, нъ да послужю. Тебе ради, бесплътьн сы, плътию обложихъся, да всех душевныя и телесныя недугы ицелю. Тебе ради, невидим сы ангельскым силам, всем человеком явихъся, не хощю бо Моего образа в тлении презрети лежаща, нъ хощю и спасти и в разум истиньный привести. И глаголеши: Человека не имам! Аз бых человек, да Богом человека сътворю, рех бо: Бози будуть и сынове Вышняго вси. И кто ин Мене верней служай тобе? Тобе всю тварь на работу створих, небо и земля тобе служита: оно влагою, а си плодомь. //20 Тебе ради солнце светомь и теплотою служить, и луна с звездами нощь обеляеть. Тебе деля облаци дъждьмь землю напаяють и земля всяку траву семениту и древа плодовитая на твою служьбу въздращаеть. Тебе ради рекы [добавление: рыбы] носять и пустыни звери питаеть. И глаголеши: Человека не имам! И кто есть Мене верней человек, яко не сългах обета въчеловечения Моего, кляхъся Аврамови глаголя: О семени твоемь благословяться языци, в Исаце же будеть ти племя, и в томь въплътивъся, отложю обрезание, створю же брежю воду, многа чада [вариант: чюдеса ] поражающю крещениемь, о нейже глаголеть Исаия, яко протържеся вода в пустыни; жажюще, на воду живу идете! Аз есмь животьное озеро, и се породьный источник от уст Моих на тя изливаю; а ты Овчая купели жадаеши, помале пресъхнути хотяща! Въстани, възми одр свой, да слышить мя Адам и обновиться //20об. ныня с тобою от истьления, в тобе бо пьрваго преступления Евъжину клятву исцеляю, Лазоря, уже раскысевъша в гробе и четыри дни имуща в мьртвых, словомь жива створих, и тобе ныня глаголю: Въстани и възми одр свой и иди в дом свой!"

И скоро въскочи раслабленый с одра, съдрав всеми уды телесе и силою мощьн, и взем носивъшаго и одра, посреде народа хожаше. Бе же в тъ день субота, и видевъше его жидове, не порадовашася о съдравии немощьнаго, ни въздаша хвалы Богови, въздвигнувъшоому раслабленаго от одра немощи, ни реша: Како ти ся, брате, жилы укрепиша и телесныя уди утвьрдиша? Нъ акы зверие на оружьника нападъше, отбегоша и богохульная словеса, акы стрелы к камени пущающе съламахуся, изволиша бо неправду паче нежели глаголати правьду. И начаша претити носящему одр: "Субота есть и //21 недостоить ти взяти одра. Почто въстал еси от немощи? Почто ицелел еси от недуга? Почто пременилъся еси от болезни? Не лепо ти бе ныне одра своего носити!"

И рече им ицелевый от недуга: "Что се глаголете, о фарисеи! Мудри суще злобою обуродесте! Не насытисте ли ся 30 и 8 лет, зряще мене на одре исполумьртва лежаща? Ныне же, въставъшю ми Божиемь словомь, осльпосте умомь и о своей храмлюще претыкаетеся неправде. Аще не бысть добро, а зло не есть мое въстание! Аще не радуетеся преславному чюдеси, поне не завидите даному мне съдравию [добавление: и въстанию]! Не будете, яко мъск конь, имъже несть разума! Господь поможеть мне на одре болезни моея и весь недуг мой обратил есть в съдравие. Рцете же ми, старци и судие Израилевы, в чьей вас клети украдено бысть даное мне [добавление: богатьство и] съдравие, да тако жаляще си претите ми? Никтоже вас преобиден, никогоже вас уем мне дарова, нъ иже //21об. мя есть створил цела, Тъ мне рече: Въстани, възми одр свой и ходи! - И се есмь весь сдрав!"

Отвещаша книжьници: "Кто есть Он, Иже тя створи цела?" Носяй же одр не ведаше, Исусу уклоньшюся от народа, обаче глаголаше: "Несть вълхв, ни чародей, ни есть ходатай, ни ангел, нъ Сам Господь Бог Израилев, понеже не осяза мене рукама, ни приложи былия к вредом удов моих, нъ слово Его деломь бысть, рече бо ми: Въстани и ходи! И въследова слову дело и сдравие телеси. Темже не судите на лица, ни хулите Божия благодати, нъ праведный суд судите, рцете Богу, яко възвеличишася дела Твоя в Израили! И Господнемь чюдесьмь суботу почьстите, и Бога прославите, праздьник украсите!"

Нъ жидове не умълъкняху глаголюще: "Кто есть ицеливый тя в суботу? Покажи повелевъшаго ти носити одр в праздьник!" Обрете же его пакы Исус в церкви и глагола ему: "Се цел еси, ктому не съгрешай, да не горе ти что будеть!" Нъ //22 да не мним, яко тому единому се глагола Христос, нъ всем нам, приемъшим крещения благодать, имьже праотечьскыя очистихомься сквьрны и ицелени быхом от растьлевающаго ны греха. Нъ яко се бы рекл к ицелевъшему тому Господь: "Се в тобе всего Адама мозоли исцелих и падъша преступлениемь възведох, и всеродьную того клятву ныня отъях, отмых сквьрну всякого прегрешения крещениемь, възискав обретох шьдъшаго в пути неблагы кумирослужения, обязах раны уязвьнаго бесовьскыми разбойникы, възльях на язвы его Моея кръве вино и масло, и възьм на тела Моего скот, вънесох в гостиньницю - святую Церковь, дах два сребрьника гостиньнику - новый и ветъхый закон святителем, да прилежать учениемь людем, обещах и мьзду по възвращении Моемь спасъшим грешьникы [вариант: разбойникы]. Се цел еси и ктому не съгрешай, горе бо, рече, в разуме съгрешаю- //22об. щому!"

Разумейте же вси слова силу, яко по крещении не велить нам Господь съгрешати, да не пакы истьлим обновленаго Богом человека; по въсприятии же всякого священаго сана горе съгрешающому, реку же, по мнишьствс и по иерействе, и в самомь епискупьстве не боящимъся Бога. А человек тъ верьн бе, ибо по исцелении не въдасть себе в телесныя сквьрны, ни похули же Исуса пред июдеи, нъ в церкви пребываше, идеже и обрете его Христос. И тъ познав ицеливъшаго и глагола: "Праведьн еси, Господи, и слово Твое истина! Отныня причастьник есмь всем боящимъся Тебе и хранящим заповеди Твоя!" И иде по всей стране поведая, яко "Исус есть, иже мя створи цела".

Да и мы, братие, Исуса Христа, Бога нашего, прославим, ицеливъшаго нас от недуг греховьных, и к Нему верою припадем, глаголюще: Не помяни пьрвых безаконий наших и нынешьняя очисти съгрешения! Ты бо еси все- //23 х Бог, небесных и земных, человечьскый зижителю, ангельскый Творче, Цесарю мира всего, архангельскый владыко, херовимьскый сдетелю, серафимьскый украсителю! помилуй нас, на Тя уповающих, да спасени Тобою, славим Тя с Отцемь и с Пресвятымь Духомь и ныня и присно и в веки.

__________________________________

"Соборник" XIII в. Росс. нац. библ. F.n.I.39. Л.16-23.

Источник вариантов и добавлений у А.А. Мельникова не указан.

ПОУЧЕНИЕ В НЕДЕЛЮ 5-Ю ПО ПАСЦЕ. ГОСПОДИ, БЛАГОСЛОВИ, ОТЧЕ!

Аз убо, о друзи и братье, надеяхъся на всяку неделю боле собрати в церковь людий на послушание божественых словес, ныне же мне приходить. Нъ аще бых о собе глаголал, то добре бысте творили, не приходяще; ныня же Владычня възвещаю вам и грамоту Христову прочитаю вам. Якоже бо кто грамоту цесареву или княжю принесеть в град под рукою его сущим, не пытають житья принесъшаго ю: богат ли есть или убог, ли грешен, ли праведьн, нъ тех точью чтомых послушають и тщиться, абы ничтоже их не //23об. забыло. Аще ли котораго слова не гораздо услышить, то прашаеть слышавшаго. Аще ли безъчинен человек голку створить, то, бьюще, отгонять и акы пакость творяща. Да аще от земьнаго князя толико внимание будеть, колми паче сде внимати подобаеть вам, идеже ангелом Владыка беседуеть! Темь молю вы, пришедъших сде: да поучаете неприходящих и увещаете я приходити к церкви, вы бо вкусите от меду учения, они же никакоже. Вкусите, рече, видите, яко благ Господь! Весте бо, яко изводяй достойнаго от недостойнаго, яко уста суть Христова. А понеже убо сия изрекох, послушайте же, да поучю вы о молитве: тою бо исправляеться всяко доброе, аще от умилена сердца исходить, яко благоухание к Богу въсходить. Того ради и пророк глаголеть: Да ся исправить молитва моя, яко и кадило пред Тобою! Почто же, яко и кадилу, молиться исправити молитве? Имьже темьян имееть в собе //24 благоухание, егда на огни будеть, тако и молитва - егда от горяча сердца будеть, то яко благоухание к Богу въсходить. Не разуместе ли поемаго, аще и на болшая поучю вы. Аще и внимаете и хощете научитеся, аще ли не внимаете, аз убо умолкну и не хотя, вы же осужени будете, имже и учащаго имеюще, не внимасте. Како бысте хотели, толик путь ити, елико же ужьская царица приде да слышить премудрость Соломоню; и се боле Соломона сде. Не мене деля, аз бо грешник есмь, нъ евенгельскаго [Так в публикации - О.Л.] ради проповеданья и апостольскаго учения. Поведите ми, братие, аще въсходящю солнцю, съмьжарить кто очи свои, не хотя видети света сего и глаголя: Лучьши есть тма света! - или помилуеть его кто, а не паче возненавидить и отвержется его? То же и словеси учения имать, свет бо слово Божие в Писании наречеться, и тъ есть болий видимаго сего света. Се бо плъ- //24об. тьстеи очи просвещаеть, а он душевнеи. Того ради и пророк Давид глаголеть к Богу: Светилник ногама моима закон Твой и свет стезям моим! И пакы Исаия: Людье седящии в тме видеша свет велий! Кто убо помину нехотящаго света видети, еликоже вас приходить в церковь, понужайте нехотящих приходити, и никтоже не глаголеть, яко: непраздьн есмь инех делех. Нъ помысли оны званыя на цесарьскую вечерю, иже многы такоже изветы створиша: ов рече: супруг волов хощю искусити; ов же: села купленаго съглядати; ин: жену поят. И про то разгневася на них цесарь. Единого часа не можете ли отлучити Богови? Въпрошьшю же вы и отвещаете ми: аще злато или сребро по вся дни раздавал бых, или мед любо си пиво, - не бысте ли приходили сами и непризываеми и друг друга бесте варили? - Ныне же словеса Божия разда- //25 ваю, лучьша паче злата и каменья драгаго и слажьша паче меду и ста - и лишаетеся их, не приходяче к церкви! Тех же и злословлю и укаряю, якоже вас, приходящих, хвалю и благословлю. Кождо же вас молю вы, приходящих сде и въкушающе духовнаго сего меду: аще суседа имате, или родина, или жену, или дети, то позывайте к церкви вся и поучитеся душеполезным словесемь, да и сде богоугодно поживше и вечных благ наследници будем о Христе Иисусе Господе нашемь, Емуже слава.

________________________________

"Соборник" XIII в. Росс. нац. библ. F.n.I.39. Л. 23-25.

КЮРИЛА МНИХА СЛОВО О СЛЕПЬЦИ И О ЗАВИСТИ ЖИДОВ ОТ СКАЗАНИЯ ЕУАНГЕЛЬСКАГО В НЕДЕЛЮ 6-Ю ПО ПАСЦЕ. ГОСПОДИ, БЛАГОСЛОВИ, ОТЧЕ!

Милость Божию и человеколюбие Господа нашего Исуса Христа, благодать же Святаго Духа, дарованую обильно человечьскому роду, сказаю вам, братие, добрии христолюбивии послушьници, чада церковная, сынове света и причастьници Царствия Не- //25об. беснаго. Нъ не от своего сердца сия изношю словеса, - в души бо грешьне ни дело добро, ни слово пользьно ражаеться, - нъ творим повесть, въземлюще от святаго Еваньгелия, почтенаго нам ныня от Иоана Фелога, самовидьця Христовых чюдес.

Глаголеть бо: В оно время мимоида Исус обрете человека слепа от рожества, и не преже помолися Ему слепець, ни въследуя просить прозрения, нъ по въпросе Своих си ученик дивьно чюдо творить, известо указая Себе благыми делы, яко то есть Бог.

Приде ныня в Иерусалим и обрете человека слепа тако и от рожена. Того ради рече апостол: "мимоидый", миноваше бо уже ветъхый закон с требами козьих жьртв и с предании старьчьскых заповедий, не могый ицелити человечьскых недуг; ничтожо бо закон Моисеев съвьрьши, нъ всех предасть под гре- //26 х. Сам же Творець твари и Законудавець приде обновит твари и спаст человека, якоже пророк о Немь глаголеть: Не ходатай, ни ангел, нъ Сам Господь спасе ны. Темь и к въпросу апостольскому глаголеть о слепьци: Ни сь съгреши, ни родителя его, нъ да ся явять дела Божия на немь. И си рек, плюну на землю и съмяте прах от плюновения. Вижь како показаеть Своего Божества исконьнаго дела образ: тако бо и в начало твари възьм персть от земля и створи человека. Сице и ныне помазав каломь слепьцю [добавление: очи ], посла его к купели Силуамьстей да умывъся прозрить, [добавление: и не токмо прозрит, ] нъ и сквьрну прадедьняго очистить греха, крещениемь же породивъся сын света будеть. Оле мудрость Божия и неиздреченьное человеколюбие! Кая душа не веселиться о милости Его, еюже ны възлюби и далече суща близь //26об. к Собе приведе, всего человека сдрава створив, раслаблена въстави, хромыя убыстри, прокаженыя очисти, слукыя исправи, глухыя и немыя добре слышаща и глаголивы створи, сухорукыя укрепи, бесы от человек прогнав и слепыя просвети! Нъ жидове на Благодателя гневають, июдеи ръпъщють на чюдотворца, израильтяне съвет творят на Спаса своего, сынове Ияковли погубити мыслять пришьдъшаго спасет всего мира, садукеи прозревъшаго на судище влекут, иродьяне съборище съвъкупляють: не верують бо человеку, яко тъ есть бывый преже слеп. Книжници изумевъшеся пытають родителю прозревъшаго: Аще то есть, глаголюще, ваю сын? Левгити дивяться, видяще яснозрящею зеницю уродивъшагося без очью, старьци укаряють в суботу отвь- //27 рзъшаго очи слепьцю. Народи, хваляще Бога, преславьному дивяться чюдеси и вьсь Иерусалим радуеться, Исуса Христа величающе. Нъ фарисеи льстяще народы хулять чюдотворца, жьрци изгонять от съборища помилованаго Богомь, археереи претять прозревшему, да похулит просветивъшаго и, глаголюще: Сий человек несть от Бога, понеже суботы не хранить. Сами межю собою злохытрьемь пряться, а не радуютъся о преславных Божиих чюдесех, иже не в иномь языце съдевахуся, ни иноплеменьникомь в мьчте [вариант: честе] творима бяху, нъ в племени Аврамли, в сынох Израилевых, в граде Давидове, своего языка человекомь, Егоже вси нарицаху сыномь Иосифовомь, о Немьже мнози послушьствоваху: Прокажении очищени и бесьнии от злых избавлении дух, и от мьртвых темь въскрешении, и всея Пале- //27об. стины людии, боле пяти тысящь [добавление: муж], иже пятью хлеб до избытъка насытивъшеся от Христа в пустыни. И все се съведаху жидовьскыя старейшины, нъ зависть не дадяше им познати Божия благодати, да быша глаголали тако: Велий еси, Господи, и чюдьна дела Твоя, яко посетил еси нас милостию и створи избавление людем Своим! Нъ изгнавъше от сбора прозревъшаго, к собе сами прю сътавльше, глаголаху: Что створим галилеянину сему Исусу? яко уже отврещи хощеть богоданый Моисеев закон и старьчьская предания в посмех положил есть, а рыбаре Тивериадьскаго езера невегласы суща яже по Собе ныня водить, честьнейше архиереи и фарисеи створил есть. Ис церкве продающих овца и голуби изгонить, а мытаре и грешьникы приимая в жьртвеник въводить и с нимь ясть же и пиеть //28 бе[с] сумнения. На архиерее и книжьникы Господьскы грозиться и фарисеем с левгиты акы властель претить, глаголя: Горе вам, книжьници, фарисеи, лицемери! А блудьнице, от любодеець отводя, святы нарицая, глаголеть: О жено! вера твоя спасе тя, иди в мир! Церковь же Божию разорити велить и трьми деньми пакы въставити ю хупеться. Се же яве есть, яко ругаеться чюдней сей церкви, ибо в Сухоме блудьници рекл есть: Настанеть время, егда ни в горе сей, ни в Иерусалиме поклоняться Богови духомь. И еще же все злато кесареви поущаеть ны отдати, и всем по Своему следу ходити в нищете велить. А Моиси у егюптян при исходе повеле отцем нашим с льстию златыя тех съсуды поимавъше усвоити. И се же несть ли Его смертьная вина, яко и Сыномь Божиимь нарицаеть Ся! А Писание глаголеть: Слыши, Израилю: Господь Бог твой един есть! Друзии же глаголаху: Ни, братие: не хулим Бога, ни творим сурово //28об. съвета; аще не бы от Бога был, не могл бы сих творити знамений! Нъ еда Сь есть, о Немьже писа Моиси, глаголя: Пророка вам въставить Бог от братия вашея, и яко мене тако и Того послушайте! Исаия же: Радуйся, земле Июдова, яко в тебе явиться Избавитель твой, и тогда отверзуться очеса слепых и ушеса глухых услышать. И пакы Иеремия: Се Бог нашь на земли явися и с человекы поживе, и вси дьржащеися по Нь живуть и оставльше Его умруть. Нъ испытаим, реша, добре, възовем и еще второе прозревъшаго, приведем и родителя его в събор: познаета ли, аще то есть тою сын, егоже слепа родиста. Еда не то будеть тою сын, и обличим галилейскую лесть, и осужена будета оба на смерть.

И пакы възвавъше человека бывъшаго слепа, глаголаша: "Дажь славу Богу! Мы вемы, яко тъ человек грешен есть". Нъ прозревый не обинуяся истину им глаголеть: "О роде неве- //29 рьн, пълн неправды и всякого безакония! коему Богу славу поущаете мя въздати! Понеже давъшаго мне очи похулити нудите, льстите мя акы безумьна, вашемь причаститися гресе, томите паче мучитель, отвергъше истину, глаголати лъжю. Несть слышано от века, яко отверзе коли кто очи слепу рожену, якоже се мне ныня Бог Аврамов створи! И кто есть ин Бог болша Сего показал в Израили чюдеса? Еда телчи главе славу велите ми въздати, ейже в пустыни отци ваши поклоньшеся, погибоша: Бога бо, рече, родивъшаго я, оставиша и забыша Бога Спаса своего. Еда ли Вефильскыма пожру телицама [вариант: телцема ], имаже вы с Еровамомь пожьрше в руце оружия предани бысте Богомь? Раздражиша бо Мя, рече, въ щюжих и в мьрзостьх своих прогневаша Мя. Ци ли на высокыя холмы хощете мя повести [вариант: посадити ], идеже вы своя дети бесом закаласте? Пожроша бо, рече, демоном, //29об. а не Богу, - богом, ихъже не ведаша [вариант: видеша] отци их. Что же и еще от мене хощете слышати, понеже рекох вам и не веруете? Еда и вы ученици Его с мною хощете быти?"

Фарисеи же укориша и, глаголюще: "Ты ученик еси Того, а мы Моисеови есм ученици!" Отвещав и рече им бывый преже слеп: "Аще бысте были Моисееви ученици, не бысте избивали посланых к вам от Бога пророк, язычьскым покланяющеся рукотвореным богом! А Моисий тако заповеда: Да ся не поклониши богу чюжему, ниже послужиши делом руку человечю! Не вы ли Иеремию каменьемь побисте и еюпьтьскому козлу с кадиломь полагающе требы, ихъже деля възъяривъся на вы глагола Господь: Съберу на ня злая и стрелы Моя сконьчаю на них! И пакы Исаию древяною претросте пилою, с Манасиею бездушьным служаще кумиром, о нихъже речено бысть: бози, иже не створиша не- //30 бесе ни земля, - ти да погыбнуть с работающими им! И еще же Иосию поразисте в Самареи, с Ахавомь не сущему богу молящеся Валу; и се видев, зело разгневася на люди Своя Господь, и омьрзе Ему достояние Свое, и расточи десять скипетр Израиля в страны язык, и на прочая посла зубы зверины, с яростию пресмыкающихъся по земли. Такоже и великаго Иезекиля пролиясте кръвь, бранящю вам вавилоньскым не кланятися капищем, ихъже Данил на срамоту вам съкруши. Нъ молю вы: не глаголете на Бога неправды, нъ смотрите пророчьскых писаний, еда се есть Христос, пришьдый от Бога на спасение Израиля! Аще бо Сий не бы от Бога был, не бы могл творити ничтоже!"

Отвещаша жьрци с фарисеи: "В гресех родилъся еси весь, и ты ли ны учиши?" И изгнаша и от съборища своего вън, изгнаша и от ненавидимаго Богомь съборища жидовьскаго, нъ святая Христова отвьрзеся ему Церкы. Издринуша и от фарисейскаго лъ- //30об. жесловеснаго учения, нъ от апостол Святого Духа душепользных поучений насладися. Не окропиша его завистивии жьрци попеломь уньца с кръвию козлею к плътьстей чистоте, нъ ангельскый [вариант: апостолскый] святый ефилиел на того вьрх крьщениемь излияся. Не утешиша его богохульнии старьци Израилеви, нъ архиепископи новаго закона, с нимь веселящеся, Христа славять. Отвьргошася его плътьскыя ужикы, нъ духовьная о Христе братия прияша его, ихъже водою и духомь язычьская породи церкы. Чюжа его собе створиша друзи и знания, нъ святии ангели на небесех друголюбьно с нимь радуються. Не даша ему жьрци в Соломоню вълести церковь, нъ горняго Иерусалима святая святых с богоугодьными патриархы акы пьрвеньца приат его. Не огласиша его богомьрзъции жидовьстии архиереи, нъ Сам Исус Христос Сын Божий пакы по изгнании обрете и, и не тъкмо огласи, нъ и о- //31 святи его, рек: "Ты веруеши ли в Сына Божия?" То бо есть глаголяй с тобою! Он же, припадая на земли, сице въпияше: "Верую, Господи, и кланяю Ти ся! Верую в Тя, Сыне Божий, и [добавление: кланяю Ти ся] прославляю Тя! Верую, Владыко, и проповедаю Тя, Спаса миру Христа! Верую, милостиве, Твоему на землю пришьствию и Тобою на небеса человеком въшьствию! Ты бо еси о Немьже писаша пророци, дозряще духомь Твоего въчеловечения! Ты еси Егоже прообразиша патриарси Агньца Божия, всего мира грехы взяти хотящаго! Ты, Господи, Сам еси о Немьже учиша законодавьци: Егда придеть Месия, упразнить закон и подасть благодать! Тобе бо дасться всяка власть, всяка и сила на небеси и на земли! Тебе вся тварь бездушьная послушаеть раболепьно, и всяко дыхание видимое и невидимое знаеть Тя, своего Творца и Владыку! Нъ израильтьстии людие окаменеша на Тя завистию и свои очи от Твоих отьвратиша чюдес! Видеша бо дивна и пресла- //31об. вна Тобою творимая, Христе, знамения, нъ не познаша завистию Божия силы в Тобе являемыя. Завидеша бо пьрвое Твоему рожьству, егоже небеса поведахуть звездою, а они к Ироду о убийстве Ти клеветаху; завидеша и творимым Тобою чюдесем и глаголаху: О Вельзауле, князи бес, изгонить бесы! И не почивають, акы пси лающе на своего благодателя [вариант: Владыку]!"

Нъ мы ныня, оставльше июдейское злобесование, похвалим помилованаго Богомь человека. Сий бо не тъкмо тельсныма прозре очима, нъ и душевьныма просветися зракома; на земли проповедьник бысть Сыну Божию и на небесех апостольскаго сподобися венца. О крепкый Христове воине, доблий на лесть въоружниче и дьрзый лъжи обличителю, непобедимый страстотерпче, искусьный Сына Божия поборниче, посрамителю безаконьных фарисей и проповедниче истины, добрый прежеприи- //32 мниче новому закону, пьрвый поклоньниче Господа и Бога и Спаса нашего Исуса Христа, Емуже слава с Отцемь и с Святыимь Духомь и ныня и присно.

________________________________

"Соборник" XIII в. Росс. нац. библ., F.n.I.39. Л. 25-32.

Источник вариантов и добавлений у А.А. Мельникова не указан.

*

КЮРИЛА НЕДОСТОЙНАГО МНИХА СЛОВО НА ВЪЗНЕСЕНИЕ ГОСПОДНЕ В ЧЕТВЬРТОК 6 НЕДЕЛИ ПО ПАСЦЕ ОТ ПРОРОЧЬСКЫХ УКАЗАНИЙ И О ВЪСКРЕШЕНИИ ВСЕРОДЬНА АДАМА ИЗ АДА

Приди ныня духомь, священый пророче Захарие, начаток слову дая нам от своих прорицаний о възнесении на небеса Господа Бога и Спаса нашего Исуса Христа! Не бо притчею, нъ яве показал еси нам, глаголя: Се Бог нашь грядеть в славе, от брани и опълчения Своего, и вси святии Его с Нимь, и станета нозе Его на горе Елеоньстей пряму Иерусалиму на въсток. Хощем бо и прочее от тебе уведати. А о брани, бывъший на обьщаго врага диявола, от Исаия, серафимьскаго видьца, разумеем. Сам бо Господь нашь Исус Христос един въпълчися на вся бесовьскыя силы и //32об. власти тьмныя испроверже. Попрах бо я, рече, в ярости Моей, и истлих я в гневе Моемь, и вся ризы Моя окръвавих побеженьемь; снидох и до скровищь пленьник Моих, и вся избавих крепостию мышца Моея, и рек: Не людие ли си суть и чада Моя? Си вся о страсти Господни и о съшьствии Его в ад речена быша. Тамо бо победи власти тьмныя крьстомь и изведе всеродьна Адама с всеми отечьствии язык. Люди же наричеть вся языкы, грех своих ради съведеныя в ад, а чада наричеть иже в законе кончашася. Нъ на вся въцарилъся бе грех властию смертьною от самого Адама даже и до Христа; низъвед в преисподьних ада посади, окованы нищетою и железомь, безаконий бо ради своих смеришася. Нъ скрушив врата адова Христос, от бед их избави я и узы их претърже, изъведе я ис тьмы и сени смьртьныя. А за четыридесяте дни сия разделил есть користь радости Своея: //33 Радуйте бо ся, рече, с Мною, яко обретох изгыбъшюю драгму, сиречь душа всех человек по отечьствием язык, яже в разная места своих обителий въведе: овы в рай с разбойникомь, а другыя с Адамомь в пищьный едем, ины же с Аврамомь в вечныя жизни пребывания, и всех же язык душа в своемь свете на водах покойных усели. По всех бо в телеси падъших прельстию змия, тою же плътию Исус пострада, а по делом комуждо в последьний день въздасть, егда приидеть судит всему миру. Си же от ангел к апостолом на Елеоньстей речена быша: Мужи бо, реша, галилейстии! что стоите, зряще на небо? - Тъй пакы придеть в славе Своего Божества судит миру всему и въздасть комуждо по делом его. Святыя же пророкы и преподобныя праведникы с Собою на небеса в святый въводить град, ихъже влаз от богодъхновеньных скажем книг. Мы бо слову не- //33об. см творци, нъ пророчьскых и апостольскых въследующе глагол, иже послушьствоваша о Бозе живе, имъже Дух Святый въписати тако повеле: верующим на спасение, а неверующим на погыбель.

Поидем же и ныне, братие, на гору Елеоньскую умомь и узрим мысльно вся преславьная створивъшаяся на ней! На ту бо гору Сам Христос Бог нашь днесь пришел есть и всех святых чинове тамо събрашася: праотечьстии събори, патриаршьское множьство, пророчьстии пълци, апостольстии ликове и верных тълпы с седмьдесятьными Христовы ученикы, о нихъже рече Павел: Боле пятисот братия явися Господь. Си же глаголеть бывъшая на горе Елеоньстей, пред нимиже, възнесеся Господь. А ихъже възведе на небеса Христос в горьний Иерусалим, слыши Матфея глаголюща о них: И многа телеса почивших святых въсташа и внидоша по въскресении в святый град, сиречь в небесный Сион. Видьць же сим бысть Павьл, егда //34 до третияго въсхыщен бысть небесе. Нъ си оставльше, о възнесении Христове побеседуим и яже быша на горе Елеоньстей.

Тамо бо ангельскыя силы и архангельская воиньства: ови облакы крилы ветрьними приносять на възятие от земля Христа Бога нашего, друзии же престол херовимьскый готовять. Бог Отець жидеть Егоже преже име в ядрех с Собою, Дух же Святый велить всем ангелом Его: Възмете врата небесная, да вънидеть Цесарь славы! Небеса веселяться, своя украшающе светила, да благословяться от своего Творца, с плътию сквозе тех врата на облацех възносима. Земля радуеться, видящи на собе Бога явьствьно ходяща, и вся тварь красуеться, от Елеоньскыя горы просвещаема, яко на той ангелы с святыми апостолы по повелению Бога Отца съвъкупишася, ожидающе Сыновьня пришествия.

Темь сий праздьник паче инех чьстьней бысть нам, и си гора святейши есть Синай- //34об. скыя горы: на ону бо невидимо съниде, а на сей явьствено Ся показа. На Синайскую бо съшьд, вся устрашаше, зане гора вся горяше огньмь, молния же и громи приступающая к горе умьрщвяху, тъчью с единемь Моисеемь Бог беседоваше, а на Елеоньскую с тьмами святых въшьд Христос, вся освящаеть и вся утешаеть, свьтить бо ся Елеон, яко солнце, святых чины с Христомь на собе имея. И за оны громы и мълния пророчьстии слышатся гласи, яже радостьно ликъствують, глаголюще: Възнесися силою Твоею, Боже! поем и въспоем силы Твоея! Ангелы вся поущають, глаголюще: Въскликнете Богу вся земля, пойте же имени Его! Патриарси начинають песнь: Се Бог нашь възноситься, смирив обоя в едино и съвъкупив земныя с небесными! Преподобнии възглашають: Възнесися на небеса, Боже! по всей земли слава Твоя! Праведници велегласують: Възнесися, судяй земли, //35 да и мы в свете лица Твоего, Господи, поидем!

Давид же, акы старейшина ликов, уяшняя песьныя глаголы глаголеть: Вси языци, въсплещете руками, въскликнете Богу гласом радости, да възидеть Бог в въскликновении и Господь в гласе трубне! Всех же глас оконьчеваеть Павьл, глаголя: Кто възиде на небеса Христа съвести? кто ли сълезе в бездьну Христа възвести? - Нъ Тъ есть съшедый и пакы въшедый превыше всех небес! Ту же бе и язычьская церкы, уневестивъшияся Христу. И Того ныня възносима на небеса зрящи, скърбить и стонющи от сердца с Соломономь въпиет: Уязвена есмь аз любовию Твоею, Женише небесный! не трудихъся въслед Тебе и дни [вариант: идый] человека не възлюбих! И акы проводящи любимаго, въпиеть: Да целуеть мя от лъбъзания уст Его! С нею же и апостольскый лик, зряще на своего Учителя и Господа, акы чада церковьная жалостьно глаголаху: Владыко, не о- //35об. стави нас сир, ихъже волею възлюбил еси яко милостив, нъ посъли, якоже обещал еси нам, Твой Пресвятый Дух!

К ним же отвеща Исус, милостию утешая: Сядете в Иерусалиме! Аз бо въсхожю к Отцю Моему и Богу вашему, и посълю, яко обещах вам, иного Параклита - Духа Моего и Отча! - И въздвиг руце, благослови я. И се рек, възношашеся на небо. И ти же поклонишася Ему, и облак светьл подъят И от очию их. Възиде бо, рече, на херовим и лете на крилу ветрьнюю. Имеяшеть же с Собою Господь и душа человеческы, яже възнесе на небеса в дар Своему Отцю, ихъже в горнимь граде усели. Си же от Иеремия разумей глаголюща душа, яже враг в преисподьняя съведе, - тыя же Господь на небеса възведе рек: Въстанете, взидем в вышний Сион, се же есть небесный Иерусалим! Преди же течаху ангельскыя силы с страхомь и радости- //36 ю, отврести хотяще врата небесная. Нъ вышьнии вратьници възбраняху, въпиюще: Си врата Господня, да никтоже земных суду проходить; нам бо положи Бог, яже не мимоидуть! ныня же дивимъся, зряще человека на херовимьстемь престоле седяща и преже серафим тъщащася врата си пройти! Ангели же поведаху Сына Божия силу и сан, человечьскымь обложена телесемь, и не пререковати Божии воли, вся мудростию творящому: Съниде бо, реша, на землю, никомуже не чювъшю, и се рабий нося образ въсходить. Они же реша: Не бедем покори, аще не услышим слова Божия!

Тъгда възгласи Христос: Отвьрзете Мне врата правьды и въшьд в ня възвещю Отцю Моему яже на земли съдеях и пострадах! И познавъше глас Господень вся силы небесныя, падъше поклонишася, глаголюще: Аще не видехом, Владыко, Тебе сходяща, се покланяем Ти ся въсходящю в славе! И Дух Святы-//36об. й на сретение ишьд, въводить равьна Собе Сына Божия и почесть творя глаголеть: И да поклоняться Ему вси ангели Божии! Сам же Бог Отець възгласи к грядущему в плъти: Сын Мой еси Ты, сяди одесную Мене; се престол Твой, Боже, в векы веку; Твоя суть небеса и Твоя есть земля [добавление: вселеную] и конець ея Ты основа! И посадив Отець Сына на престоле и Своею венча Его десницею, въспевающем сице серафимом: Положил еси на главе Его венець от камения драгаго, славою и чьстию венчал еси Его, славу и вельлепоту възложил еси нань! По семь съвьршають помазаниемь Божия сущьства, якоже Давид послушьствуеть: Сего ради помаза Тя, Боже, Бог Твой олеемь радости паче причастьник Твоих!

Да поистине сий праздник пълн есть радости и веселия! Радость на небесех, възнесъшюся Христу к Отцю, и на земли веселие всей твари, обновльшися от истьления.

Темже и мы, братие, придете, //37 възрадуимъся Господеви, въшьдшему на небо небесное, на въстокы, седящему одесную Отца поклонимъся, приимъшему всяку власть на небеси и на земли, и помолимъся цесарьствующому с Отцемь, принесем веру, яко дары, не явимъся пред Нимь тъщи в дьнь праздьника, да приемем Божию благодать. Днесь бо Своя Христос всем раздаваеть дары: даеть Отцю принесеную Имь в жертву плъть, посылаеть апостолом Святый Дух, въводить душа святых пророк в Небесное Царьство, разделяеть Своим угодником горняго града обители, отверзаеть праведником рай, венчаеть страдавъшая за Нь мученикы, посылаеть страстотерпцем чюдес благодать, даеть святителем душеполезная прошения, отпущаеть грешником прегрешения, милуеть вся творящая волю Его и хранящая заповеди Его, посылаеть благоверным князем нашим съдравие телесем и душам спасение и врагом одоление, утвьржа- //37об. еть церкви, обогащаеть церковьникы, чьстьны творить служащая Ему иерея и дияконы, освящаеть манастыре, прославляеть игумены, укрепляеть на тьрпение мнихы, благословляеть вся крьстьяны малыя с великыми, нищая с богатыми, рабы с свободными, старьце с уношами и женимыя с девицами, матери с младенци, сироты с вдовицами.

Придем и мы, братье, в святую церковь, възвеличим Христа Бога нашего, давъшаго ны живот прославим и по сих обещавъшаго Небесное Царьство; възнесем имя Его въкупе, да послеть и нам Пресвятый Свой Дух, Того бо есм раби и Тому славу, чьсть и покланяние въсылаем с Отцемь и с Пресвятымь благыимь и животворящимь Духомь ныня и присно и в векы веком. Аминь.

____________________________

"Соборник" XIII в. Росс. нац. библ. F.n.I.39. Л. 32-37об.

Источник вариантов и добавлений у А.А.Мельникова не указан.

В ЧЕТВЕРТОК 6 НЕДЕЛИ ПО ПАСЦЕ СЛОВО КИРИЛА МНИХА НА ВОЗНЕСЕНИЕ ГОСПОДНЕ. ГОСПОДИ, БЛАГОСЛОВИ!

Трие преславная Господня чюдеса ис пръвых времен: первое на землю сниде, второе - из мертвых въскресение, третее - на небеса възнесение. Илиа бо аще на небеса взят бысть, Илиа бо место измени от места, а Христос взыде отнюдуже и сниде. Пророк бо Давид о вознесении Господни рече: Взыде Бог воскликновении, Господь в гласие трубнем! - и паки взыде на херувим и лете, лете на крилу ветренюю. О сем и Аввакум рече: Възнесеся солнце и луна ста в чину своем,- Христа солнцем нарече, а луною Церкви именовася. Милосердый же, усмотрив тацех дел высоту, и рече: Се Христос приде, скача по горам и прескача холмы,- скачание именити: с небесе бо в чрево Девы сниде, от чрева в ясли, от яслий же на крест, с креста же в гроб, от гроба же Бог воста, възнесеся на небо. Вся нас ради и Христос створи. Енох и Илиа взята быста на небеса, Господне възнесение назнаменаста. Днесь на небеса Господь сниде. Блаженный Иов птицей Господа нарече, яко тело пръстное от земля вознесе, яко возношениа тайн не разумеюще Июдеа, виде Господа Бога и Спаса нашего вознесение на небеса. Всех чюдние праздник днесь, бо небесный круг ликовстьвуа, облаком подъемлеть Господа на неизреченый Отчь престол с плотию въсходяща, и вся лики аггельскиа на веселие събрав, единогласно трисвятую песнь повеле воспевати, глаголя: Слава в вышних Богу, и на земли мир, в человецех благоволение! Днесь невидимых бес вся лесть низложися, днесь ликуа и веселяся, пророк Давид вопиет, глаголя: Вознесися на небеса, Боже, по всей земли слава Твоя! Днесь апостольский лик без сумнениа со аггелы беседуеть, понеже Христос человеческую плоть приим и обожи ю воскресением Своим, на небеси одесную Отца посадив, якоже рече еваггелист Лука: Поимый си ученики Своа, изведе а вон до Вифаниа и рече им: Се Аз послю обетование Отца Моего на вы, вы же сядете во граде Иерусалиме, дондеже облечетеся силою свыше. И въздвиг руци Свои, и благослови а, яко отступи от них; и се облак светел подъят И пред очима их. Не токмо ученицы едине бяху зряще, но и рождьшиа Его, ини народи мнози з боязнию зряху Христа на небо с плотию възносима. Чюдо бо бе всех чюдес предивнее и грозднее, егда от земля взяся, аки человек бе видим, а егда же на высоту к небеси восхожаше, боле видетя бяше; егда же доиде до небеси, и вся заиметь небеса славою Божества. И неисповедимо бе величествие Его, яко и небеси не видети в заре лучь славе Его; аггелом же послушествующим о видении и второе поведающе приход Христов. Два аггела сташа в одежи светле и реста ко апостолом: Что дивитеся, мужи Галилейстии и что зрите на небо? Се Исус, вшедый от вас на небо, тако приидет, якоже видесте возносящагося, паки бо приидеть, хотя судити живым и мертвым, и воздасть комуждо по делом, Тому предасть Отец суд весь!

О, колко благодатный Владыка Христос спасениа ради нашего здея! С небеси бо приде и паки възнесеся на небеса во славе, а не яко на карабли спя, ни яко у кладезя трудом жажа, ни яко на жребци осле седящаго, но славно на крузе облачне нося, взыде бо на небо и седе одесную Бога, а не аки пред судиами на торжищи стоя, но Сам всей судя вселенней и апостолом судийску власть преда, глаголя им: Егда сядет Сын человеческий на престоле славы, и вы на двунадетеся престолу будете судящу обеиманадесять коленома Израилевыма. Яко подъя облак Христа, тако и мы по речению апостола Павла "в облаце восхитимся". Якоже Господь взыде восклице и в гласи трубне, да и мы, братие, смертный облак отъимше и останемся злобы и неправды, да всегда с Господом будем. Днесь, вернии, Възнесение Господне духовней божествене почтем, яко лепо христианом, а не яко невернии - ядьми и пианством, играми и пустошными и песньми. Но празднуем, вернии, к церкви текуще без злобы, нищая же и сироты милующе, бедным помагающим, церковным слугам честь творяще: аще бо земных князий слугам честь воздати, колми паче достоить служителем Небеснаго Царя честь и дары даяти! - То бо въжове суть к Богу! Мир же и любовь межи собою имейте, се бо глава добродетели; смирение же всяк грех побежаеть. Сам бо Господь Бог смирився нас ради и бысть человек плотию, страсти волею прият и смерти вкуси, в третий день въскресе яко Бог и възнесеся на небеса. Смиримся и мы, вернии, да вознесемся! Нас ради Господь рече яко: Възносяйся смирится, а смиряйся вознесется. Милостыню же по сим да створим, яко бо вода огнь гасит, тако и милостыня грехи. Богу нашему слава ныне и присно!

________________________________

Публикация по изданию: Никольский Н. К. Материалы для истории древнерусской духовной письменности. СПб., 1907. С. 83-85.

КЮРИЛА, ГРЕШНАГО МНИХА, СЛОВО НА СБОР СВЯТЫХ ОТЕЦЬ 300 И 18, ОТ СВЯТЫХ КНИГ УКАЗАНИЕ О ХРИСТЕ, СЫНЕ БОЖИИ, И ПОХВАЛА ОТЦЕМ СВЯТОГО НИКЕЙСКАГО СЪБОРА, В НЕДЕЛЮ ПРЕЖЕ ПЯНТИКОСТИЯ. ГОСПОДИ, БЛАГОСЛОВИ, ОТЧЕ!

Яко же историци и ветия, рекше летописьци и песнотворци, прикланяють своя слухи в бывшая межю цесари рати и въпълчения, да украсять словесы и възвеличать мужьствовавъшая крепко по своемь цесари и не давъших в брани плещю врагом, и тех славяще похвалами венчають, колми паче нам лепо есть и хвалу к хвале приложити храбром и великым воеводам Божиям, крепко подвизавъшимъся по Сыне Божии, своемь цесари, и Господе нашемь Исусе Христе. По немь же опълчишася на еретикы святии наши отци архиепископи, епископи, их же число 300 и 18, по числу древняго Аврама. Нъ Аврам телесьную створи победу видимым воем, а си в духовней съдолеша рати и невидимыя побе- (л. 38об.) диша бесы. Аврам пять цесарев с силами их погуби и Лота, сыновьца своего, възврати, а си вся еретикы духовьными исекоша мечи и церковь Христову възвратиша от кумирослужения. Аврама възвращьшася от сеча цесарьскы благослови Божий иерей Мьлхиседек и хлебы с виномь изнесе, а святыя наша отца, по низложении и проклятии богоборець еретик, сам Бог Отець благослови и прослави, и Святый Дух веньча и освяти, а Сын Божий, за он хлеб и вино, Свое честьное тело и святую кръвь тем предъложи в бесконьчный живот, не тъкмо же тем единем, нъ и всем верным. Нъ молю вашю, братие, любовь, не зазрите ми грубости; ничто же бо от своего ума сде въписаю, нъ прошю от Бога дара слову на прославление Святыя Троица; глаголеть бо: Отвьрзи уста своя и напълню я. Темь приклоните ума вашего слухы, о Христе бо начинаю слово (л. 39) Его же Арий от Бога Отца отсещи мысляще.

Сий Арий поп бяше александрьскыя церкве, паче же рещи съсуд бе сотонин и вълк овчею покровен кожею. Сему бе поручено учити Христове вере люди, нъ понеже не бе от делатель винограда Христова, начат злое семя сеяти, по немь же тьрние и вълчьць прозябаше. Хульник то бе, а не благовестьник, и глаголаше: Несть Христос Сын Божий, нъ вся тварь чада суть Божия, и Сынъмь Божиемь нарицаеться тварь. Се уведав архиепископ Петр, издрину его ис церкве. Арий же съвъкупляя съборище, своей ереси учаше народы, Богови попустивъшю таковому искусу от диявола на святую церковь прити. Се бо бывъшю сему надълзе времени, распространяшеся душегубьная та ересь, доиде злое то учение до Антиохия и до Вузантия, и мнози оставляюще Христову веру, присташа ереси его. Богоизъбраный же и правоверный цесарь (л. 39об.) Костянтин, видев церковь Ариемь възмятену, нехуде опечалися, и повеле от всея вселеныя събрати епископы и прити всем в Никею. Помянув бо блажены пророчьское слово глаголюще: Съберете ему преподобныя его, да ся прославить Бог в съвете святых Своих. И скоро съвькупишася святии отци, по суху же и по морю нетрудьно путь шествующе, яко корабли пълин духовнаго богатьства, ли яко орли апостольскымь въкриливъшеся учениемь, льгъци суще теломь, постьници бо беша, и съмерени духомь, утвержени бо бяху Христовомь Евангелиемь. Приведен же бысть и Арий с единомысльникы своими, и вси вънидоша в дом на то устроен. Цесареви же седъшю на престоле, старейшины святитель Христов одесную его на престолех посажены быша. Арий же с своими пособьникы противу въшьд ста, крепъко въоруживъся на Святую Троицю, и начат (л. 40) яко стрелы пущати богохульная своя словеса, яко льв злохытрьемь неукротимо рикая; ему же клятвы уста его пълна суть горести и льсти. Изволи бо тьму паче, нежели свет, ни въсхоте благословения, нъ възлюби клятву, и приде ему. Остави небеса и позвавъшаго на ня Христа, и обратися в преисподьняя ада с прельстивъшимь его змиемь, имь же тъгда сам дьявол неподобьная глаголаше. Велик бо бе воевода сотонин Арий, нъ цесарь его уже бе связан, темь и воиньство его не твьрдо боряшеся; бяху бо философи и книжьници горазди по Арии на Христа власфимисающе. Повеле же цесарь Ариеви преже своя учения глаголати, ими же льстяше мир, к своей обращая пагубе. И начат оканьный сице догматисати: Что ся вам мнить о Христе, яко от не искони есть с Богомь, ни единосущьн Богу Отцю, ни равьн Святому Духу сущьствомь, ниже есть Слово Божие в есть- (л. 40об.) стве, ни темь видимая створена бысть тварь, ни видим есть Отець Сынови, ни въплътилъся есть Бог в человече естьство, нъ вся тварь небесная и земьная Сын Божий речеться. Се же ему изъглаголавшю и множайша к сим, их же не леть нам писати, ни вам слышати, к нему же възгласивъше святии наши рекоша отци: Слыши, Арию, безглавьный зверю, нечистый душе, оканьный человече, новый Каине, вторый Июдо, плътяный демоне, прельстьный змью, церковьный всеми ведомый тати, необратьный разбойниче, нераскаемый грешьниче, неукротимый на Христова овчата волче, безбоязньный святыя веры разорителю и хотящимъся спасти пакостьниче, Божий враже и сыну погибели! Си от своего ума, а не от святых книг извещал еси, и глаголеши еже твое сердце умысли, а не еже Бог пророком и апостолом о своемь Сыну въписати повеле, Нъ да увеси и навыкнеши о Христе, яко (л. 41) то есть Сын Божий, един сы от Троица, и нашего ради спасения в последняя лета въплътися. Сам Бог Отець пьрвое поведаеть о Своемь Сыну, яко присносущьн Ему есть: Ищрева бо - рече - преже деньница родих Тя. Вижь, како роди! Не таить от своих раб единосущьнаго Своего Сына рожения, о Нем же на Иердане и Фаворе двократы послушьствова глаголя: Се есть Сын Мой възлюбленый, о Немь же благоизволих. А о твари не рече: Родих ю. Нъ Моисий тако въписа: И створи Бог пятью ден всю тварь видимую, елико на земли и елико на небеси. Пакы же о въчеловечении Бога слова ангели послушьстоваша, к пастырем глаголюще: Слава в вышних Богу, на земли мир, в целовецех благоволение! Се бо нам благовестуем радость велию, яже будеть всем человеком, яко днесь родися вам Христос Спас Сын Божий в граде Давидове. Сих же не зле разумей, нъ добре навыкни, яко (л. 41об.) Сын есть Божий въплътилъся. О семь бо и евангелист написал есть рекый: Искони бе Слово, и Бог бе Слово. И Слово плъть бысть, и въселися в Ны, и видехом славу Его, яко единочадаго от Отца, испълнь благодати и истины. Тако же и Павел, посъл Божий и учитель языком, о Христе глаголеть: Велика есть благоверия тайна: Бог явися в плъти, оправьдася в дусе, показася ангелом, проповедан бысть в языцех, верьн бысть в мире, възнесеся в славе. И си вся истина суть: вся бо от Бога повелена суть глаголати. О твоей же ереси сам Святый Дух темь же апостоломь прорече, егда призва в Милит ефесьскыя священикы: Ведите, - рече - яко по ошьствии Моемь внидуть в вы въльци тяжьци, стада не щадяще Христова, истъргати ученикы въслед себе. И пакы к Тимофею о вас же глаголеть: Яко в последняя времена отступять неции от веры Христовы научениемь демоньском и духом не- (л. 42) приязниномь, лъжесловесници, лицемери, их же конець пагуба. Да убо повинетеся толиком съведителем, о въчеловечении Сына Божия поведающем. Аще ли от апостол своя откланяете слухы, поне пророк послушайте, преже глаголавъших о Христе, яко искони бе с Богамь Отцемь, и вся темь быша, и како в последняя лета сниде на землю и с человекы поживе. О семь убо препрять тя пророци, Святымь Духомь гласнее трубы поведающе, яко Христос есть Сын Божий, Бог и человек и присно Бог, сияние славы и образ невидимаго Бога. Его же въчеловечения дозряще ти святии мужи, вси вельгласно к нам въпиють о благовещении посланаго к девей ангела, и о зачатии от Святаго Духа, о знамении звезды, ведъшии персы к рожьшемуся Богу, о младеньстве ветъхаго деньми, и о крещении Его, очищающимь грехы, о отвержении ветъхаго закона, о преславных Его чюдесех, о предании от учени- (л. 42об.) ка и за вьсь мир умьртви, о съшьствии в ад и въскресении от мьртвых, о Святемь Дусе, его же дасть апостолом, о възнесении Его на небеса и о седении одесную Бога, и о вторемь Его пришьствии, егда придеть судит миру и въздасть комуждо по делом его. О сих же всех препреша и пострамиша еретикы, и прокльнъше богохульника Ария, издринуша и ис церкве, и прославиша Исуса Христа, Сына Божия суща, и утвьрдиша церковь апостольскыми заповедьми. Научиша же вся веровати в Святую Троицю, единосущьну и нераздельну, Отца и Сына и Святага Духа, и повелеша покланятися в Троици единому Богу. Бысть же сий пьрвый събор при Костянтине святемь цесари, в 20-ное лето цесарства его. И тъ заточи Ария, хуливъшаго Христа, Сына Божия. И възвратися болезнь на главу его, и на вьрх ему неправда его снидеть; тому бо, рече Господь, не бу- (л. 43) деть прощения ни в сий век, ни в будущий, нъ и сде проклинаем есть, и тамо горце мучим улютаеть. Събор же святых отець трий сът и осминадесяте освятиша и праздьновати повелеша. Бяху же старешины събору мужи святии чюдотворци: Силивестр папа римьскый, иже крьщениемь Костянтина цесаря от проказы очисти и многа ина створи чюдеса, Митрофан патриарх Цесаряграда, иже слепьцю очи словомь отъвьрзе и немому молитвою проглаголати створи, Олександр архиепископ Александрия, пророчьскымь украшен даром, Евъстафий от Антиохия и Макарий от Иерусалима, патриарха суща и знаменоносьца, Вит и Викентий, и с Пафнотиемь Николае, чьстьнии митрополити и чюдотворци, и инии мнози святии епископи. В них же бе и богоблаженый Спиридон, имь же створи Бог чюдо в съборе: начьнъшю бо е- (л. 43об.) му глаголати к философом, иже по Арии пряхуся, видеша огонь из уст его исходящь, и отвьргъшеся Ария, вероваша в Святую Троицу и быша крестияне Божиею благодатию.

Да коея чести и похвалы не суть достойни велиции си Христови святители, тако подвизавъшеся по Христе, яко и апостоли, и того же апостольскаго престола и веньца сподобльшеся! О богоблажении отци, правоверныя веры правителе, вернии недремлющеи святыя церкве стражеве, за ню же и до кръве противу врагом брань постависте, не убоявъшеся цесарь человечьскаго страха, ни мучитель претящих обьщею смертию, ни пакы же временьныя ради чьсти ослабевъше, не превратисте Господня Слова, ни предасте на лъжи истины, нъ яко научени бысте от апостол, тако и пожисте, яко начасте, тако и коньчасте! Добрии Христова стада пастыри, за не же и душю свою положисте, не дадуще вълку (л. 44) к агнецьм приближитися, нъ на пажить Божия закона целы и многоплодьны упасъше, дондеже и в ограду горняго Иерусалима жьзломь вашего учения допровадисте! О блажении святители, богонасаженаго винограда добрии делатели, от него же всельстьное искоренисте тьрине, богоразумие въ вся человекы присадисте и олядевшюю грехъми наших сердець землю евангельскых словес раломь възделасте! Вы есте рекы разумьнаго рая, напоивъше мир вьсь спасенаго учения и греховную сквьрну струями вашего наказания омывающе! Земнии ангели, Божию престолу присно предъстояще всему миру, и благоверным князем нашим сдравие телесом и душевнаго просите спасения, и за вся крестьяны прилежно Христу помолитеся! О богоблажении архиереи, высокопарящеи орьли, иже не у трупа, нъ у живаго тела Христова съ- (л. 44об.) бирающеся, его же ядъше в бесконьчьныя векы на небесех живете! Мало потрудистеся на земли и въ вься векы в небесьнемь почиваете цесарствии! Органи Святаго Духа, вся верныя душеполезными и спасеными наслажающе гласы! Богоносьнии облаци, иже чюдотворьными каплями одъждяюще верных сердца, и вся плодоносьны покаяниемь створисте! Вы есте необоримии гради, вся к вам прибегающая спасъше, непоколеблемии стълпи, к ним же приразивъше вси богохульнии еретици погыбоша! О богоблажении наши учители, светилници миру, неставьници заблужьшим, вожи душевьныма осльпъшим очима, поручьници кающихъся спасению, безмьздьнии врачеве душам и телом, богоучении целители, избавители обидимым и сущим в бедах скории помощници, от уз раздрешители, кумиром раздруши- (л. 45) тели и льсти всякоя обличители! О блажении и преподобнии святители! Чистии съсуди, Божие Слова в собе носяще! Красныя обители, в них же Святая почиваеть Троица! Неувядающии цвети райскаго сада! Небеснаго винограда красныя леторасли! Благоплодьная древеса, наслажающе верных душа же и сердца! Премудрии ловьци, мир вьсь богоразумиемь обуемъше, и полну церковьную мрежю к Христови привлекосте, достойну труда мьзду прияли есте! Прославили есте на земли Христа Сына суща Божия, и Тъ прославил есть на небесех: Славящая бо Мя - рече - прославлю. Сам бо Исус Христос, яко фюникы доброплодьны, в мирьскых удолих избьрал вы есть и в церквах дому Своего посадил, на украшение апостольскаго престола, на утвержение святыя веры, на поновление обетьшавъшим грехом, на възведение падъшимъся в ересь, на исправление помятъшимъся (л. 45об.) в съблазнех, на исцеление недугующим в законе, на укрепление борющимъся по Христе, на порушение дьяволь сетий, на издрешенис вязящим в злобе, на съмерение на ся вражьдующим, на извълчение топящимъся в телесных похотьх, на спасение погибающим безумиемь, на пищю алчющим и нагым на одение. И ина многа суть святых отець наших богоугодьная исправления и добрыя детели, им же Сам Господь Бог съведитель и мьздовъздатель.

Мы же, груби суще разумомь и нищи словомь, не по чину, нъ щербопохваление вашему празднику списавше, молимъся и мили деем, святии патриарси, архиепискупи, епископи, преподобнии архиереи, пречистии презвютери и вси священии праведнии учители! Приимете наша худая словеса, акы Бог две медници оноя убогыя въдовица. Просите нашим душам (л. 46) отпуста грехов, да и прочее лет живота нашего в чистоте поживше, в руце Божии своя душа предамы. И да отверзеть нам небесная врата и тамо сущих сподобить ны благ, милостью и человеколюбиемь Господа Бога и Спаса нашего Исус Христа, Ему же слава, честь, и держава, и покланяние.

________________________________

Публикация по изданию: Еремин И. П. Литературное наследие Кирилла Туровского // Труды Отдела древнерусской литературы. М.; Л. 1958. Т. 15. С. 343-348.

ПОУЧЕНИЕ НА ПЯНТИКОСТИИ. ГОСПОДИ, БЛАГОСЛОВИ, ОТЧЕ!

Присно жадаяй Бог нашего спасения, въсхоте Своимь милосердиемь обновити естьство наше, грехъми суще обетшано. Темь и в нашю плоть истиньно облечеся, хотя направити ногы наша на путь истиньный, не терпяше бо Своего образа в тленье впадъша зрети, егоже испьрва в райстей пище владыку всей твари устроил бе, завистью же дьяволею прельщена и волею за ны пострада, умерщвяя прегрешения наша, и въскрес из мертвых, възиде пакы на небо и седе одесну- //46об. ю Отца и в 50-ный день днешний Святый Дух присла огньны языкы учеником Своим раздая, якоже им обещал по въскресении Своемь, глаголя: Въсхожю к Отцю Моему и Отцю вашему; у небо есть вам, да Аз иду, аще бо Аз не иду, Параклит не придет к вам, еже есть Утешитель; аще ли иду, то умолю Отца иного Параклита дасть вам, и в вас будеть Дух истиньный, и Тъ научить вы и въспомянеть вся, елико аз глаголах вам. И въздвиг руце, благослови я и рече: Шедъше, сядете в Ерусалиме въкупе, дондеже облечетеся силою свыше. И се рек пред ними, възнесеся на небо. Днесь же прияша силу Святаго Духа апостоли, и начаша глаголати всеми языкы, якоже Дух даяше им провещати. И шедъше, проидоша всь мир, яко молния, учаще и наставляюще вся на разум Божий когождо языкомь своим; така ти есть милость Божия на нас и честь //47 сего дне, яко не хощеть смерти грешником, нъ паче обращению и покаянию. Рече бо Сам: Не требують сдравии врача, нъ болящии; не придох бо призвать праведьных, нъ грешных на покаяние.

Темьже и мы не ленимься такого милостива имуще Владыку, нъ всяку злобу отвьргъше от себе: зависть, клевету, студодеяние и все неподобное деяние, - и с чистою свестью придем в Божию церковь, и, страхомь в ней стояще, просим от Него отпуста грехов и вечныя жизни, да достойни будем приступити к пречистым тайнам Телу и Кръви Господни, темь достойни творить Обещника Небеснаго Царствия. А иже неочищьшеся приемлють, то повиньни суть огневи вечному, Сам бо рече Господь Бог нашь: Ядый плоть Мою и пья кръвь Мою жив будеть въвекы, и егоже с верою просите дамь вам!

То вси слышавше, братье, въспрянем и не точью сло- //47об. вомь крестьяни нарицающеся, нъ подвигнемься добрая дела стяжати: смерение и любовь к всем, кротость, пощение, - то бо очищаеть душю и тело и ангелом равны стваряеть и на небо възводить. Милостию же беспрестани творите, та бо омываеть вся прегрешения от нас и небесная врата отверзаеть, и ярость Божию на кротость и на милость претваряеть, милостыни бо бес труда на небеса възводить и с дерзновениемь у престола Божия поставляеть; милостыни бо, рече, на суде хвалиться, и блажени милостиви, яко ти помиловани будуть, и немилостивен суд не створшему милости.

Темьже подвигнемъся богоугодная дела творити, теми бо делы сынове Божии наречемъся и, сию жизнь добре поживше, и будущих благ сподобимъся с всеми от века Богу угодившими о Христе Иисусе Господе нашемь, Емуже слава и ны- //48 ня и присно и в векы веком. Аминь.

________________________________

"Соборник" XIII в. Росс. нац. библ., F. n. I. 39. Л. 46-48.

КИРИЛА НЕДОСТОЙНАГО МНИХА СЛОВО В НЕДЕЛЮ 1-Ю ПО ПЯНТИКОСТИИ НА ПАМЯТЬ ВСЕХ СВЯТЫХ И ПОХВАЛА СВЯТЫМ МУЧЕНИКОМ

Благодать Богови отвръзающему наша уста и дающему нам слово на похвалу всех святых, иже во всем мире от века и доныне добрым житием и благоверным тръподушием Богу угодивших: великих праотец и блаженых патриарх, богодухновеных пророк и непорочных праведник, в царех же и князех и во всякой власти, и судиах, святых же и връховных апостол и преславных евангелист, благовестник же и великих исповедник, честных святитель и крепких священномученик и преподобных черноризец, постник же и пустынник, и за имя Христово пострадавших святых мученик и крепких страстотерпец и достохвалных и непобедимых жен, яже в немощи плотстей всю диаволю попраша крепость, уповаша бо на Христа Сына Божия, и Того крестом въоружившеся, необорими от враг пребыша. Там днесь всяка церкви празднуеть память святых мученик, Бог бо их прослави, за Негоже пролиаша своа крови, еюже злодеа и грехотворца змиа потопиша, и всю приносимую идолом уставиша кровь: ови главами усекаеми и очима избодение тръпяящи, и света без правды лишаеми, желаху бо света невечерняго зрети на небесех, и не хотяху ни слышати безаконных мучитель ласканиа лестнаго, ни приаша даемых от них даров, но обещанных им от Христа с надеждею чааху, ни въсхотеша земное скороминущее чести, но небесное искаху, не возлюбиша маловременныа света сего славы, но к безконечней тщахуся, юже приаша от Бога. Не прельстишася помыслом, ни ослабеша умом, помня убо апостола глаголюща: Никтоже вас да не прельстится ласканием мира сего, тщими словесы, мир бо си мимоидет и слава его погибает. Да ни словом тех повинушася повелению того ради и своа на идежежение предаша плоти, и слухи и язык на отрезание, да не слышат богопротивных царь хулу на Святаго Духа глаголющем, твердо бо Господне слово в своем дръжаху сердци, иже речет: Хулу на Дух Святый не отдастся ему ни в сий век, ни в будущий. Друзии же и кожи съдрание мужески тръпяху, да ветхаго человека с грехом съвлекутся и в новый освященный Христом облекутся человек, по Павлу глаголющу: Аще съвлекшеся плоти, не нази обрящемся; толико бо к Христови имеху любовь и веру, яко не токмо о всем света сего не радиша житии, но и своа телеса по удесом на раздробление даша и яко на честь, тако на мучение по Христе друг друга преспевающе, глаголаху: Ничтоже нас от любве Христовы разлучити възможет: ни скорбь, ни беда, ни изгонение, ни раны, ни живот, ни смерть, ни настоящаа, ни будущаа, вемы бо рекшаго: Не убойтеся от убивающих тело, а души не могущим зла что сътворити! Да аще наша отсекаете уды, имамы Христа врача телесом и удом давца, и се ведуще, крепко дръзаем: Луче бо есть клосну внити в Царство Небесное, нежели с целыми уды въвръженому быти в огненое озеро, ибо любящей тленное се тело удаляются от Бога. Тем благоволихом паче отити от тела и взыти к Богу! Аще ли имение наше въсхищаете - с радостию и благодарением все терпим, ведуще приати себе лучшее имение на небесех во веки пребывающе. Ныне же подвигу есть время и тръпению потреба, да за Христа пострадавшаго за ны потрудимся и приимем в день он обещаннаа нам от Него благаа! И еще бо мало и Той Сам приидет в силе Божий и в славе святых аггел и въздаст комуждо по делом его. Аще ли разлучаете ны от братиа, от чад же и родитель, или изгоните от отечества и града, и в заточение посылаете, - не стужаем си, "не имамы бо зде града пребывающа, но грядущаго взыскаем". Пришелци бо есмы вси и телеса, от нихже внезапну и не хотяще отидем, да аще не ныне за Христа славно умрем, обаче всяко и помале умрети имамы; того ради и нынешнею за Христа смертию безконечнаго живота купим! Наше бо житие на небесех, отнюду же и Спасителя чаем - Господа нашего Исуса Христа, и тамо имамы отечество - Гръний Иерусалим, и за братию и чад - святыа аггелы, иже нашу ныне на подвиги укрепляют немощь. Да не погрешим небеснаго венца и тамо сущаа славы, еаже ради все отвръгше с надежею стражем, ждуще установлениа от Бога, известо в души апостольское имуще слово: Сыне бо, рече, не пренемогай показанием Господнем, мало бо зде искушени, болше в будущем веце от Него въсприимем. Аще ли в водах ны погружаете или огнем съжигаете, мы не устрашаемся, сих бо мук днесь или утро конец будет, вечной же муце несть конца, в нюже грешници с богоборци и вси отвръгшеи Христа въвръжени будут. Огнь бо их - рече пророк - не угаснеть и червь их не умреть, и луче бы им да ся быша не родили, егда услышат с прещением глаголюща к ним Христа: Отъидете от Мене, проклятии, в огнь вечный, уготованный диаволу и аггелом его! Того ради не поклоним капищем колену, пишет бо ся: бози, иже не сътвориша небеси, ни земля - тии да погибнут; и с несмыслеными человеки работающими им. Но живому Богу верою поклонимся, Имже створена быша вся видимаа же и невидимаа! Ни жрем бездушным идолом: идоли бо языческии - сребро и злато, дела рук человеческих, николи же бывши в чювстве; имже подобни суть вси надеющиися на ня. Но пожръшемуся за ны Сыну Божию събою жрътву принесем! Не служим бо твари паче Творца, не чтем огня, не работаем солнцу, не даем требы горам, ни кладязем с источники Божия славы, си бо вся на работу человеком Богом сътворена быша. А Бог един есть. Его милость безчислена и человеколюбие неизреченно, иже не требует от человека ничтоже, но Себе устрои на благотворение, даай дождь с небесе, и времена обилнаа, о Немже прославишася древнии праотци Енох, Ной, Сим и Авель, иже не повинушася вражий душегубней льсти, Его же патриарси видети желаху Авраам, Исаак и Иаков, иже верою победиша царства и не погрешиша обещанных им от Бога даров. О Нем же прорицаху пророци Моисей и Давид и с Еремиею Исаиа, въплощениа Его дозряще, имже съдеа всему миру спасение. Его же проповедаша во всех странах апостоли, и Того именем велика в языцех знамениа и преславнаа съдеашася чюдеса. Его же любяще преподобнии мужие, оставиша мир, домы и богатство "и едини в пустынях скитающеся, в горах, врътепах же и пропастех земных", богоугодно пожиша. За Него же страстьтръпци и святии мученици руганием и ранами искушени быша, в узах же и темницах озлобляеми и убийством меча умръше, своа к Богови възнесоша душа, прославиша бо Е на земли, и Той прославит их на небесех.

Тем светла есть днесь всех святых память и многи чести достойно тръжество. Небеса с аггели веселятся и земля с человеки освящается. Их же и мы похвальными гласы, яко цветци венчающе, глаголем: Радуйтеся, богоизбраннии святии мученици Георгие крепкий, Феодоре пресловущий и великий Димитрие, Христова плъка непобедимии воеводы, помощници и заступници всем христианом, силнейше меди и железа твердейше! Огнь вас не съжже, вода вас не потопи! Вашего мужества и крепости дозря, пророк глаголаше: "Чада Божия, укрепитеся о Господе Бозе вашем, яко не имат вас коснутися мука, аще бо в злобе безумных страсть приасте", но в руце Божии душа ваша пребудет, Сам бо яко злато в гръниле искусил вы есть и обрете вас достойны Себе. Вам же есть глас: Проидохом сквозе огнь и воду, и вселистеся в нестареющуюся жизнь, юже смертию куписте. Не яко искры по стеблию текосте, но яко солнце чюдесными лучами мир освящаете! Радуйтеся, славнии священномученици Клименте великий и блаженый всеми Игнатие с премудрым Дионисием, иже ризу тления съвъргше и нази въоружившеся о Христе, попрасте биющих вы всю силу раздрушивше, диавола поруганна и посмешна показасте. Камение безценное, Господни подражатели, иже на Того вере своа утвръдивше душа и Того нетрудно последовавше стопам! И яко краснаа украшениа Христовы язвы на теле носяще, величастеся, светлыа и немръцающиа звезды, всю церковную украсивше твердь, целии голубие, иже не птенца, но своа уды на отсечение за Христа предасте! Вы и змий бысте мудрейши, все тело на муки без пощадениа предавше, точию главу - Христа - невредно съхранисте, Егоже пред многими исповедали есте послухи: Бога вкупе и человека распята плотию и погубившаго крестом мучительство диаволе о твердыа вашеа веры и зело великия к Богу любве, еюже и по смерти живи есте, всех земных миродержителей силнейше и честнейше, Церковь и князей славнейше и всего священническаго чина святейше; ваша мощи истачают чюдес реки, и ваша святаа имена, верою призываема, человеческиа врачують страсти, исцеляют различными болящаа недуги, прогоняют злодейца пакости, творящаа нам демоны, избавляють от всякоа нужда, беды и печали, и от уз дръжимы раздрешают, и в темницах томимыа изводят, в бранех помогают всем верою призывающим вы; плавающих в мори спасают и на путех съблюдают, и на всяком месте от всякого заступают зла. Вся бо можете данною вам от Бога благодатию! Си же о мученицех речена быша, а еже о апостолех - кто доволен сказати тех труды и преславнаа по Христе подвизаниа! Кътораа уста по достанию похвалити възмогут богоизбранныа законодавца, Христовы други и приставники святыа Его Церкве, прежде сътворениа всего мира Богом нареченныа святыа, яко быти им непорочным в любви Христове, яже бо им бяху нарекованна Отцем Господа Бога и Спаса нашего, сиа Сыном Его Исусом Христом с известием обещанна. Вы бо - рече - друзи Мои есте, и не оставлю вас сиры, но прежде иду и уготоваю вам место на небесе; да идеже буду Аз, ту и вы будете, да асте и пиете на трапезе со Мною в Царствии Отца Моего! Тем же огнен подобно имети было язык к похвалению святых връховных апостол, яко на тех Дух Святый в образе огненем сниде и освяти тех душа и телеса, дасть им всеми глаголати языки и посла их во вся концы земныа, вся человеки от прелести диавола избавити, ихже очистивше от скверны греховныа водою божественнаго Крещениа, в пакибытие породиша и сыны света сотвориша, и вся ны верою к Богу приведоша. Радуйтеся, святии преславнии връховнии апостоли Петре и Павле, мнози бо изгоними, яко Тебе ради многи искупишася. Богу нашему слава честь!

__________________________________

Публикация по изданию: Никольский Н.К. Материалы для истории древнерусской духовной письменности. СПб., 1907. С. 75-80.

НЕДЕЛЯ 18. СЛОВО О ЧЕЛОВЕЦЕ И О НЕБЕСНЫХ СИЛАХ, ЧЕГО РАДИ СОЗДАН БЫСТЬ ЧЕЛОВЕК НА ЗЕМЛИ

Понеже тайна сии не всем откровена бысть и многыми человекы недоведома, но яже рече Кирил философ: Не того бо ради сотворени быхом, да ямы и пием и облачимся, но да угодим Господеви и будущая получим благая. Но понеже не испытаем божественых писаний, да сего ради заблудихом от пути истиннаго, ни помышляем, како ны есть почтил Бог. И создал ны есть Бог во утробе матерне, и душю вложил и пакы оттуду ны изведе; небо и земля сотвори, времяна летом, солнце же и месяц и звезды, рекы же и море и источницы, зве- //332об. ри же и птица парящия по воздухохом и рыбы в водах, и древа польская и плод животный и траву семениту, и аггели хранители на соблюдение дал нам, и си вся создав и надо всеми царя ны постави. Но аще бо ведал человек, каковаго царства отлучену быти лености ради своея! От какыя славы и радости отлучену быти еже от Бога и от святых Его и в какыя внидут мукы! - То много бысть плакал в день и в нощь всяк человек к Богу, моляся со слезами, кланяяся беспрестани. Но понеже многими лестьми диявольскыми окраден быхом, понеже дьявол многы льсти имь ть, аще бо не возможет нас в муку воврещи, да леностию вы окрадет и чюжа ны сотвори вернаго царства, и будем забвени от лица Божия. И се бо не просто есть, но и велми тяжко еже инех видети в славе и в покои и в радости радующихся, себе же видети всего лишена! Лутче бы изволил не родитися, ниже в таком студе быти. Аще бо выскажю по видному образу о Царстве Небеснем //333 сею притчею. Аще бо который царь или велможа обед устроили вся бы почтил угодная ему, единому же чести не подал за некую вину и пред собою поставил, оному же предстоящу и зрящу сих, онем же ядущим и пиющим и веселящимся, - что убо таковый помышляет? Отлучен того видимаго веселия - таковый лутче бы изволил не видети сего; тако пребывая в лености в веце сем - то таковому лутче бы не родитися, нежели от таковыя славы отпасти. Слышал еси убо но аще и цел есть яко един день во свете оном Царьства Божия, лутче бы тысяща лет века сего.

Хотяй человеколюбец Бог всего мира сотворити от небытие, прьвое помысли небесныя силы созда, и помышление дело бысть. Бысть же всех чинов 12; устрои же коемуждо чину чиноначалника воеводу, и овы постави от них во славословие несть ихже [пав.б.: песнь же их] сице есть: Свят, свят, свят Господь Саваоф! исполни небо и землю славы Твоея! Един же от них стоих день и нощь, инии же приставлени быша на слу- //333об. жбу, служат Богу мыслию, и еже старейшим вниде во ум, той повелевает задним. Шествие же их скорее молния или яко мысль человека. Суть же ови на соблюдение и хранение человеком. посылаеми суть хранители душам, друзии же на помощь суть посылаеми, а инии же на казнь согрешающим. Зрака же аггельскыя красоты невозможно есть како усты человеческими исповедати. Бога же не видят [добавление: каков есть, славу же видят] по учястию. Бе же старейшина реченый Сотонаил, первый воевода, и заповеди [пав.б.: завиде] Господни и Божии славе, и помысли глаголя в собе яко: Поставлю престол свой над звездами и буду подобен Вышнему и да мя славит чин сущий подо мною! Бог же виде яко сице помышляет и предаст Михаилу старейшинство на всех. Небесный же ангел бысть вторый воевода Богом поставлен. Тогда повеле Господь Михаилу преступника соврещи со отступными его силами, и той звержен бысть началник соблазну лукавый Сотона и со отступными его силами, еже в бесы претворены бысть //334 гордыня их ради. Не суть же тацыи беси якоже видим черны суть и огнемрачни. И по сем собрав я Михаил все небесныя силы и рече: Вонмем! - еже нарицается: внимаем себе. И да не такоже отпадет, понеже еретицы глаголаша, яко не хоте поклонитися Адаму диявол, преже создания Адамля треми деньми. И пакы помысли Бог создати вторую тварь в мале велику, еже есть человека созда втораго, аггела на земли и поклонника: на се бо создан бысть всяк человек иже душею славит Бога, а телом поклонятися Ему. То аггели на небеси Бога поют, а человецы на земли. Вся бо дела разно суть агелом и человеком, молитва же едино дело есть аггелом и человеком. Тело же токмо едино лише человеком, а душа - подобие аггельское: невидима и бесплотна и неосязаема, исполнена на всех удов человеческых, разве мужества и женьства, и светлы паче солнца седмерицею велми. Таковыи суть посылаеми души человеком, но не тако из всех исходит. Прежде бо Адам создан бысть Богом от земля со Еввою, и о Себе има душу вдохнув, и въведе ю в рай пища, и даст //334об. има заповедь и да сохранит. Завидев сотона диявол Адаму, дабы ему как соблазнити и прельстити, заповедь Божию да быста преступила, якоже бо и Сам рече: Бесмертьна беста, и нага не стыдишася, и без всякоя печяли беста. А никоегоже бе има дела, разве молитвы. Адама же не возможе как прельстити, яко крепок бяше, но обрет Евву слабу сущу и прельсти ю. И Евва Адама прельсти, и оба прельстистася, и заповеди Божиа не сохраниста. И тогда Адам и Евва изгнани быста из раю и в смерть осужени быста, и по сем сшиваста себе ризы кожаны, зане нага явистася, беста в печали и в скорби велице, и землю осужена делати, и в печали породиста чада, от сих исполнися весь мир. И постави Бог заповеда Адаму и роду его, яко не имети иного бога разве Мене. Устави же рок житию человеком на земли седмь тысящь лет, еже есть что их соберут в ту 7000 лет святых по закону Божию живших, то теми исполнит чин аггельский, спадший с небеси. Аще ли кто со- //335 грешит, да положит ему Бог покаяние, и аще покается истинно - и тогда приимет и Бог. Аще ли, согрешив, не покается и не возвратится от пути безаконнаго, тои таковыи приимут бесконечную муку с бесы. Да сего ради велми завидит роду человеческому диявол, не останет прельщая: овы человекы в тварь прельсти веровати: в солнце же и в месяц и в звезды, ини же в море и во источникы и в древа польская, и в звери, и в огни и во иныя вещи многоразличныя яже возможно изрещи всех, - и врагы Богу сотворил; и да якоже сам отпаде от Бога, тако и нас хощет видети отпадша от Бога. Аще бы ему вся человекы возможно прельстити и отлучити от Бога и дабы ему не единому во огни негасимом быти и своею завистию преступникы Божию закону многы человекы сотворил и отлучил и муце вечней повины сотворил. Первый мир водою потопи Бог за грехы, токмо единого Ноя праведнаго соблюде с женою и с трема сынъми и с женами их. А на Содома и Гомора огнь и воду приведе //335об. Бог за грехы их, а на околныя сущия грады камение огненое посла на ня и тако погуби я. А Лота праведнаго избави от смерти и две дщери его. А израильтянин в пустыни и егда изведе я Бог из земля от работы фараоня, Моисеом ведяше я по пустыни в землю обетованную, и многа чюдеса сотвори у них: манною с небесе питая их и крастельми и водою ис камени, яко 40 лет ни ризы их издрася, ни сапозе их истоптася. И море Черьмное проведе яко посуху, якоже и нога не омочится; фараона же в нем погрузи и с вои его. Амалика же оружием погуби, а сих потопи водою, сих же в море проведе и победи полки Амалика, и от сих всех избави я Господь. И по том всея [добавление: забыша] благодати Божия и чюдеса яже в нем [пав.б.: яви им], и по сем восташа и грады соблюдишася и со странами [вариант: соблюдиша со ближними сестрами], и по том чясе разступися земля и пожре их 20000 и 600, и погыбоша. Се же показа образ мучению согрешающим и всем верующим учению некающимся. И по сем виде Бог род человеческий от диявола мучим, и милосе- //336 рдовав не презри, иже преже пусти пророкы проповедати Божие Рождество на землю и въчеловечение, и по сем посла единочаднаго Сына Своего в мир, и по сем пусти архаггела Своего Гавриила в Назареф град к девици Марии пречистей благовестие Сына Божия, зачатие и рождество от Святаго Духа без семени на спасение человеком. И приим плоть от девы Господь, и образом бысть человек и Бог. И вся претерьпе нашего ради спасения: и на земли поживе, и страсти претерпе от Своея твари, и за ланиту ударение прият, и поругание, и оплевание, и тростию по главе бием, и венец от терния возложиша нань, мняше бо Его диявол сущая не Бога. И по сем научи жиды распятие; фарисеи же книжницы ведуще, яко Сын Божий есть, завистию распяша. И ко кресту пригвоздиша, и желчию оцта напоен бысть, и копием в ребра прободен бысть, и смерти вкуси яко человек, и во гроб положен бысть, и воскресе в третий день, и увери ученикы Своя. И по сем вознесеся на небеса и седе одесную Отца, и пакы приидет судити живым и ме- //336об. ртвым: живии же суть иже в добрых делех пребываяй, а мертвии - грешницы. Тогда бо Моисеом спасе Израиля от работы фараоня и море проведе, ныне же нам Сам был Христос в Моисея место, изводя ны от работы вражия новаго Израиля от моря жития сего, возводя ны на первое сыновьство, иже бе изгубил праотец наш Адам, и созда бо Бог человека и дасть ему закон, понеже нань диявол постави. Бог сы естеством милостив и человеколюбець подаст нам на диявола честный крест, на сети его помощи святыя книгы, яже обнажают всю неприязненую лесть Богу [нашему слава...]

________________________________

"Златоуст постный и недельный" с добавлениями, 1607 г. Библ. АН России. 33.10.1. Л. 332-336об.

Источник вариантов и добавлений у А.А.Мельникова не указан.

НЕДЕЛЯ 19. СЛОВО СВЯТАГО КИРИЛА. БЛАГОСЛОВИ, ОТЧЕ!

Понеже убо тайна си не всеми откровена бысть и многыми человекы несведома, но якоже Кирил философ: Не того ради сотворени быхом, да ямы и пием и во одежда многы и различны облачимся, но угодим Господеви и будущая благая получим. Но понеже не испытаем Божественых писаний, заблудихом от истинаго пути и не помышляем, каковы его почил Бог и создал во утробе матерне, душу вложил и пакы оттуду ны изведе. Еже егда бо, рече, всяк младенец крещен бывает, тогда посылаем есть от Бога ангел на сохранение в житие человеческое и лукаваго сотоны аггелы даем бывает, егда в смысл и в разум будет о сем //299об. о добре и о зле. Да егда же начнет в правде пребывати человек, той приемлет старейшиньство аггел Божий над ним и сохраняет его от всякаго лукавьства дияволя во дни и в нощи. Имат же с'вещание в собе и душа та со аггелом, и написает аггел вся дела его благая от уности и до старости. Егда пакы начнет человек в злых делех, тогда приемлет власть и старейшиньство лукавый диявол сотонин над таковым человеком и, вослед его ходя, вся грехи написает дневныя и нощныя; аггел же Господень плачет таковаго человека. Аще ли покается и приемлет власть старейшиньства Божий аггел, аггел же сотонин плачется его. И пакы же мнози суть [добавление: неверующе святым книгам, но не хотяще их и послушати и в басни вменяюще] неверующи, ни послати хотяще яко испытаеми суть душа человеком у смерти, егда же отходит от тела, понеже поставил есть Бог три испытания всякому человеку: первое испытание - егда хощет разлучити душа от телесе; и преди бо приидут беси и приставят ей вся дела, яже будет согрешила от уности и до староста, и отвивающе харатию, //300 и начнут обличяти душу, исповедающе грехы ея яже во всем житии согрешила, рекущи: Енци забыла еси, яже согреших во всем житии, но мы их не забыхом, но исписахом ясно! И по сем предстанета два аггела, посланныя по душу от Бога; егда же узрит ею душа, и ужаснется, и образ весь, и лепота лицу изменится, и руце и нозе премолъкнета и слух с нима, и язык молчанием заградится, и очию зрак изменится, и будет весь уныл и скорбен, и за сим явится смерть. И тако нужею страшною душа от телеси изыдет и станет держима, зрящи на свое тело, от негоже изыдет, умилно ко аггелом взирающе и видяще вся дела своя пред собою поставлена: добрая или злая, и яко во извесех извещаема. И по сем вземше душу, понесут на воздух ко второму испытанию, иже есть двадесять мытарьств поставлени Богом на воздусе пред враты небесными на испытание всякой души, исходящей от телеси и грядущей к небеси. Первое мытарьство - оболгание, елико //300об. будет солгали от уности до старости. Второе мытарьство - оклеветание, елико человек оклеветах. 3-ее мытарьство - зависть; 4-е мытарьство - гнев; 5-е мытарьство - ярость со гневом; 6-е - гордость; 7-е - буесловие, срамословие и безстудная словеса, и плясание в пиру; 8-е мытарьство - резоимание и грабление, насильство и мздоимание; 9-е - тщеславие хвалы ради славы человеческыя; 10-е - златолюбие; 11-е - пияньство и запойство; 12-е - злопоминание, елико глаголахом: Не забуду ти до смерти; 13 - волъхвование и потворы, наузы; 14 - объя[де]ние и раноядение и полуденьное и тайное; 15 - всякая ересь и еже веруют в стречю и в чих и в полаз и во птичей граи и в ворожу и еже басни бают и в гусли гудут, иже убии блуд творят; 16 - прелюбодеяние, еже мужи блудят от жен своих и жены от мужей своих; 17 - убийства и всякыя раны и рвания за власы и до крови; 18 - татба и всяко крадение; 19 - всяк блуд и со скотом и со блудницами, еже и ручным блудом; 20-е - немилосердие, скупость, зде бо обличают //301 душу беси. Аще будем коли брату досадили нищему или изгнали из дому въ своего, или грызающеся на кого - то ту обличающе ны беси и препирают, аще бо и вся заповеди Божия исправим, а будем немилостивии на нищая и немилосерди или на рабы своя, и не подающе им доволно одеяния и пища, делом же насилующе или инеми бедами. Да егда будет испытание души истязаема от воздушных бесов, дающе имать душа добрая дела истинное покаяние, то тем искупящися, вся си пройдет и по том во врата небесная, радующися, яко избывши лукавых и воздушных бесов. И по том усретают ю друзии аггели, посылаема по душа инех человек, и веселятся о ней и радуются, яко избежа лукавых бесов, и целуют ю, обымающе. И по том принесена бывает ко престолу Вседержителя Бога, и поклонится подножию Господа. И по том предаст ю Михаилу, завеща глагола: Веди душу сию и покажи ей обители святых и Небеснаго Царя полаты райскыя, и душа праведных, а сущая во аде и вся мукы различныя в бездне //301об. сущая на мукы грешником, в нихже имут быти мучими в день великаго Суда. И носима бывает преже по небеси, показает ей полаты святых и Град горний Иерусалим, егоже Сам по вознесении созда, по том носима бывает в рай к праведным душам. Исходящи же праведных душа, и сретают ю, обымающе, целуют, и по том ведет ю во адъскую пропасть, идеже затворени суть грешных душа от века, и показует ей мукы вся, понеже мука дале есть на западе. Си же вся места обходит душа праведная за 40 дний, и по том внесена будет в рай в место покойно и до последняго воскресения. Всех же грешных душа и егда же изыдет ис телеси, и предстанут бесове, и принесут пред ню вся прегрешения, яже будет согрешила от уности и до старости, написаны во свитцех, и начнут обличати ю, да не мощно ся будет запрети, понеже вся исписая же, когда согрешихом или в которое лето, или в который месяц, или в которое время и в чяс, или в который праздник, или до обеда, //302 или по обеде, или в день, или в нощь. Да аще исповедал будет отцу си духовному и покаявъся, пакы не возвратился к ним, будут такого обретаются согрешения заглажены, тои заглажет у них Святый Дух. Беси же ведают, яко истиным покаянием заглажаютъся, скорбят, не улучивше; аще будет утаил своих грех, а не исповедал отцу, то не заглажаются тех во свитцех. Аще ся будет исповедал отцу, отець же, дара деля стыдяся, не положил ему будет опитемьи за те грехы, рекше на добрая дела не научил: на молитву и на поклонение и на пост и на милостыню и на прочая добродетели не учил, но востягнул, дабы не творил зла, ни согрешил, - тои таковая приимут бесконечную муку, понеже ведая он грехы его, и не положил ему за то опитемьи. А сий такоже: ведая, изыска себе отца потаковника и покая вся у таковаго, - и оба осудитася. И по том восхитима бывает душа лукавыми бесы, и бьема люте, не дадуще ни перваго мытарьства //302об. взыти, и затворима бывает люте во аде и во тме и в сени смертней, идеже души грешных от века суть держимы, и ту седят, плачющеся, ожидающе дни великаго и суднаго. Но на прежереченая взыдем.

Понеже соблажняются, глаголюще яко: Уже несть святых на земли, и тако глаголюще: Мнози заблудивше погыбоша, многы иныя в слабость сведоша; они же от них слышавше и на них взирающе съступишася и со истиннаго пути и заблудиша, послушающе таковых и не виде, и глас понеже невидения злее есть согрешения. Аще быша пытали божественых Иеваггелий святых книг, яже усты Божии наречена быша: Не приидет Сый дондеже вся си будут; аминь - глаголю вам - небо и земля мимоидет, а словеса Моя не имут прейти и не изменитися. Се толкует Лука еваггелист, глаголет: От святых же весь приидет род сый, и не оскудеют святии и праведнии до скончания миру. Матфей такоже свидетельствует, Иаан Богословец такоже известует и Павел апостол рече: Не вси умрем, вси же //303 изменимся в мегновении ока, рекше вборзе. Егда бо человеци изомрут, тогда мнози человеци останутся праведнии живи, храними Богом и не разлучивше души с телом; и ини мнози о сем порекоша. Аще убо о сем кто испытати восхощет, обрящет. Се уже рек приближающися и уже мало нашего жития и века, якоже рече Господь, вся си събышася: и востати имат язык на язык и царство на царство и страна на страну и царь на царя и князь на князя, епископ на епископа и чернец на чернца и брат на брата; будут глады и пагубы по местом и трусы; вся же та в начяло болезнем. По том же солнце и месяц померькнет, небеса совиются во свиток и силы небесныя явятся. И по сем судия Божий приидет судити всему миру, скончавъшу бо ти ся уроку жития и остав'шим же ся трем летом седмыя тысящи; будет в та три лета царьство антихристово. По скончании же триех лет царьства его послет Господь Михаила и Гаврила, и вострубят в рога овня, и в мегновении ока воскреснут. Мертвии же праведницы //303об. по добродетели их прежде воскреснут, последи же грешницы омрачении по злым их делом, по сем огнь неугасимый потечет от востока и до запада, поядая горы и камение и древа, и море иссушая; твердь же яко бересто свертится и вся видимая сущия вещи развеет; человек вся от ярости огненыя яко воск растает и згорит вся земля, и сквозе тый огнь подобает итти всякому человеческому роду, и не будет где укрыти его, но будет болезнь и скорбь паче же грешным непокаявшимся и не единоя же скорби имевши о души своей, но точию в покои мнозе, в пищи и в питии, но во блуде и в прелюбодеянии и в прочих инех согрешениих, да тем явится им яру беду отмщения носящи, не явит бо ся им яко трием отроком хлад: явится праведным хлад, а не огнь - всех же суть нецыи мало имуще согрешений не исправленна яко человецы, понеже есть Бог един без греха, Иже плоть взя нашего спасения, да сий огнь искусивый очистит я, и просветятся те- //304 леса его яко солнце; праведным же дает хлад, а грешным - опаление и омрачение. Прешедшим же им огненую реку ону, огненая же река си по Божию велению послуживъша, отшедша к западу и учинится во езеро огненое на мучение грешным. И по сем будет земля разна, яко же бе искони, и бела паче снега, и пакы из нея трава и цветы мнози различнии и древа не яко видимая суще, но высотою и величеством невозможно изглаголати усты человеческими, понеже суть духовна о Христе Исусе о Господе нашем.

________________________________

"Златоуст постный и недельный" с добавлениями, 1607 г. Библ. АН России. 33.10.1. Л. 299-304.

Источник добавлений у А.А.Мельникова не указан.

МЕСЯЦА ГЕНЬВАРЯ В 6 ДЕНЬ. СЛОВО НА ПРОСВЕЩЕНИЕ ГОСПОДА НАШЕГО ИИСУС ХРИСТА КИРИЛА ЕПИСКОПА ТУРОВЪСКАГО. БЛАГОСЛОВИ. ОТЧЕ!

Христос Господь, свет великий, в сей светлый день пришел есть к Иордану. Благовещу вы, братие: Аз бо есмь свет, - рече Спас. Приимем убо Его с радостию, хвалящи и веселящеся духом. Днесь бо есть пришел в Иордан, хотя погрузити врагы нашя и супостаты, а нас крещением омыти и очистити от грех, Сей бо грехы нашя на Ся взя и тако врага миру сему потопи и очистив водныя источники, очисти душя человеческыя и к чюдесем приложи болшаа чюдеса. Днесь бо земля и море Христа Владыкы благодеание разделиста, и весь мир радости наполнися. И минувшаго праздника честнаго днешний праздник показаеть болшаа чюдеса. В минувший бо Рождества Господа и Спаса нашего земля радовашеся, в яслех держащи Владыку всея твари, а в днешний праздник святых богоявлений море зело ся радуеть с Иорданом, священнаа благословениа приемля. В минувший праздник несъвершен младенец видети беаше, наше несъвершение сведетельствуя, а в днешний день праздник съвершен ся явить, иже от съвръшена съвершен показает. Отнуде родившагося яви, на востоце звезда показавшися, а зде крестящемуся сведетельствуеть с высоты родивый Отец. Отнуде влъсви от востока пришедше, акы царю дары принесоша, а зде аггели с небес пришедше, акы Богу подобну службу послужиша. Тамо вязаху Его пеленами узы, а зде отрешаеть греховныя съузы. Идете убо видите преславнаа дела: солнечнаго солнца в Иордане омываема и огнь, в воде куплющься, и на Бозе человек руку си полагающь! Днесь тма всех бед отгонится, днесь прелестнаа мъгла расходится, днесь бесветный мир спасеным светом освещается. Днесь бесплотный фараон погружается, днесь бесовьскаа оружиа топнут, днесь разумный Моиси станы вся преводит сквозе воды. Днесь человечество страстий бернотвореных свобождаеть, днесь отходит от Египта, еже есть тма и ад, в немже есть многостенание, пусто оставляет. Днесь Давид истинуя и достойне хвалится, рекый: Омыеши мя и паче снега избелею! Поистине бо днесь Христос, в водах крестяся, омывает ны, паче снега убеляа! Да сего ради вся тварь днесь хвалящи Крестящагося, вопиет глаголющи: Благословен Грядый во имя Господне! Бог Господь и явися нам! Благословен Грядый всегда, а никогдаже не оставя нас; небо се первее ныне прииде, благословен Приходяй во имя Господне! Иже И, знаем, промыслене приходя, небесную бо высоть неподвижну соблюд, солнцу же течение хытростию правя, звездное множество неизмутом чины набдя, въздух на дыхание добре растваряа, земныя бокы на ращение всякому семени и овощу разгреваа, море многовлънное дробным песком обьдержа, источникы из глубины невидимо и зрея, речныя быстрины незаблудне водяй. Се все убо видяще, и мы глаголем: Благословен Грядый именем Господним! Кто есть Сей? Рци яве, о блаженый Давиде! - Бог Господь и явися нам! И якоже явися нам не точию пророк Давид глаголет, но и Павел апостол, сведетельствуя Ему, глаголет: Явися благодать Божиа спасителнаа всем человеком, наказующи нас. Не овем есть, но всем убо июдеом и еллином крещением спасение даеть, обще благодание крещение сътворив! Идете убо вси от Галилеа в Июдею! Да идем с Иисусом, блажен убо иже в путь грядет с жизненым путем! Грядете убо мысленыма ногама и доидем Иордана, и крестителя Иоана и Крестящагося видим! Ему же крещение несть требе, да нам крещениа благодать дасть. Поидете, видим нашего рождениа образ назнаменаем - Крестящеся в тех водах. Идете, видите дивен потоп, зело вящий болий, иже при Нои бысть: тамо вода потопнаа человеческое естество погуби, а зде вода крещениа крестившимся Христом, умершаа грехми, оживи. Тамо Ной древом негниющим корабль съдела, а сде Иисус Христос, разумный Ной, от святыя Мариа плотный корабль съдела. Но и дивлюся Спаса нашего излиха смерению и поубожению, како Ти не довлеему от совершению, съвершену сущу младенцу родитися от жены, не довле точну престолом сущу и единосущну Отцу приати рабий образ, но аки грешник приходить ко крещению. Но не буди общаа благодать слышащим на съблазну! - Крести бо Ся всеми владый Христос и не требуя крещениа, но двояческы на ползу ны творя: первее да и водам святящую благодать дасть и всякого человека на крещение приведет.

Прииде Иисус от Галилеа на Иордан к Иоану креститися от него. Еже ся ту творяше, братие, помыслити не мощно есть, мысли бо человеческы выше есть, еже ся ту деаше. Трепещеть ум, язык бежить из уст, не смея глаголати недоведомаго. Да тем видев Иоан Владыку грядуща к себе, трепетом многым обьдержимо имы сердце, кланяяся и припадаа и за нозе емля, моляше глаголя: Что твориши, Владыко! гордо ми дело въручаеши и страха полно повеление! Иордан видев Тя, Творца, ужастию ищезает! А аз ли, кал сый и прьсть и пепел и червь по земли ползя, смею такой тайне обещник быти? - Ни, Владыко: не нуди мене, творити егоже не могу! Трепещет ми плоть вся, раслабеша ми кости вся, ужасно ми есть сердце, весь в страсе есмь и в боязни! Почто нудиши мя, немощнаго, о Всемогущный, творити ми еже мне чрес силу есть! Како дръзну креститися! Како огнь сеном может ся очистити, како кал омыет источника! Како окрещу Судию, осужденный, како Тя крещу, Владыку, скверы не видя на Тебе: клятве Адамове не бысть повинен Ты, греха бо не сътвори! Како простру десницю на Тя, пропеншаго небо и землю! Како простру, раб сый, на Господень верх свои длани! Како ли освещу Тя, притраный свет сущь! Како ли сътворю молитву о Тебе, иже приемлеши незнающих Тебе молбы! Иныя крещаю, во имя Твое крещаю да веруют к Тебе, Грядущему со славою! Тебя крестя, како нареку в чие имя крещу Тя? В Отчее ли? - Но Отца имаши в Себе и весь еси в Отци! Но в Сыновне ли? - Но несть разве Тебе ин естеством Сын Божий! Но или в Святаго Духа? - Но присно Той есть с Тобою, якоже единосущен с Тобою и единомыслен и всемощен и единочестен, и с Тобою приемлет от всея твари поклон! Крести мя убо Ты, аще хощеши, Владыко; крести мене, крестителя! Простри притраную си десницю и венчай присяжением мою главу, да пред Твоим Царствием текый с венцем аки предтеча благовещу по обычаю, вопиа: Се же Агнец Божий, въземляй грехы мира сего! Иордане реко, ликоствуй со мною и веселися, и вчини быстрины своя и струями потеци, твой бо Творец пришел есть к тебе со плотию! Виде бо ты иногда Израиля сквозе себе минующа, и разринув воду свою, дал есть проход мимо ся; а ныне разлиався светле, обойми пречистое тело Сего, иже Израиль ты тогда проведе чрес тя! Горы и прегыня, холми и весцели, равнины и поля, дубравы и потоци, ломи и дрязгы, море и рекы! благословите Господа, Иже крестися в Иорданьстей реце! Се бо Владыка сею водою святить вся воды!

Отвещав же Иисус рече к нему: Не брези ныне, сице бо лепо нам исполнити всю правду! Помолчи ныне, Крестителю: Мне сице строящу, з руа Моей, и хощи еже Аз творю! Навыкни послужити Ми еже Аз творю ти, не въстязай еже Аз мышлю! Не брези ныне, единако не поведай Моего Божества, единако не испущай из уст своих Моего Царства, да не уведев мучитель сатана, отбегнеть, не хотя яти Мене ратию; не брези, да приидет диавол яко на простаго человека и имется по Мя и приимет рану и язву сетную! Не брези Мене да скончаю егоже ради есмь пришел на землю и воплотился! Тайна се есть, еже ся днесь творит в Иордане о Мне и о Моих, тайна се есть. Не Мое требование скончевающу, но и целити мыслящи и язвеныя и грешныя. Тайна се есть великая и тайны назнаменание и предварение: в сих водах начертаемо человеческо пакипорождение. Не брези ныне, егда Мя видиши боголепне в Моих тварех; егоже изволша тогда творяща - к тому бывающу хвалу приложи. Егда Мя видиши пеготивыя чистяща, тогда Творца Мя естеству нарци; егда Мя видиши хромыя ристати творяща, тогда с текущима тема ногама и ты на похвалу свой язык простри; егда же видиши Мя мертвыя из гроб испущающа, тогда с въставшими славослови яко животворца; егда видиши Мя бесы изгоняща, тогда Моему ся Царству поклони; егда видиши Мя седяща одесную Отца, тогда благослови акы единого престолника, единолетника и присносущна с Отцем. Не брези ныне, сие бо лепо есть исполнити всю правду; закон уставляа есмь и закон уставлешаго Сын, да подобает Ми уставный закон прежде Самому скончяти, та же дати инем. Подоба бо Ми есть прежде назнаменати и потом истину явити; лепо Ми есть скончати первый завет, та же новый положити и в человеческаа сердца написати Моею кровию и печатати Духом; подобает Ми на крест взыти и гвоздии прибиену быти и страсть прияти такову, якоже мощи страсть ону целити и язву, яже о древе бысть ослушавшуся Адаму; подоба Ми есть снити и в адово само то место держимых ради тамо мертвец. Подобает Ми три дни мертвостию Моея плоти многолетныя смерти держание, подоба Ми есть плотную свещу вжещи иже во тме и сени смертней седящим. Лепо Ми есть к Отцу привести Адама во Мне царствующаго. Подоба Ми есть все то съделати, того бо ради и приидох в Свою тварь. Подоба Ми есть креститися се крещение, а последь единосущныа Троица крещение всем человеком дати. Даждь Ми крещение, яко девы Марии млеко; имися по Мою главу, юже чтут серафими, имися по ужику твоея деснице, имися яже есть сего ради сотворена Мною и Духом и Отцем Моим; имися по Мою главу, за нюже держайся доброчестием николиже не утопнет в зле. Крести Мене, Емуже есть крестити верующаа водою и духом и огнем: водою же иже может омыти грешныя скверны, духом могущим земныя претваряти, огнем иже может ижещи безакониа терние!

Се же все слышав Креститель, и внем си в ум разум Спасов и въмести в тайное все еже прият, послужи божественому повелению, беаше бо сумнелив, а и послушлив. И свою десницу простер трепещущу и велми радующуся Владыку крести. И ту сущим иудеом помышляющим в себе и к себе беседующим, еда без ума помышляхом в Иоана больша суща сего Иисуса, еда впустьшь разумевахом Оного унша сего: А не се ли се само крещение Крестителя Иоана больша сказает? Не сей ли крестит якоже вящьший сый, а Сей крестится от него якоже хуждьший сый? - Тако и ся пронесши славе всюду от неведущих строимыя тайны. Единый Бог естеством Отец единороднаго Сына, иже Един весть изряд испытане, егоже Един роди без вреда, управляа блазнящихся мыслию иудейскы, отверзе двери небеснаа и посла Святый Дух видом голубином на главу Иисусову, акы пръстом показуа новаго Ноя и Творца Ноева, истопнути хотяща человечя естества добраго правителя и кръмника. Се же и Сам с небесе възглашаше велми зело: Сей есть Сын Мой възлюбленый, Иже изволих! Сей, а не он; Сей и не Иоан Креститель; Сей же отМене рожден есть прежде век всех, а не иже прежде от Захариа прозябну, но Иже от Мариа Ся роди плотию, а не иже от Елисавети ся яви, не начающися ей, но иже с вами възрасте, но Иже со Мною посла Дух Святый к Себе и паки Иже посла, тожде приат Дух. Сей есть Сын Мой любимый, Иже изволих! Сын Ми есть присный, а не чюждь, Сын единосущен, а не разносущьем: единосущен со Мною по невидимому, а единосущен с вами по видимому, разве греха. Сей, есть Иже со Мною, сотвори человека, иже не извратен бы человек. Сей есть Сын Мой възлюбленный, Иже изволих! Не ин есть Мой Сын, а ин Мариин Сын, не ин, иже во яслех лежа, а Ин, Емуже ся вълсви поклониша. Но Той есть Сын Мой любимый, Той невидимый и разумеваемый. Не ищи Ему плоти и отца на земли, без отца бо есть доле; не ищите Божеству Его матере на небесех, без матери бо есть горе. Не отлучайте Божества Ему от человечества Его, неразлучно бо то есть и неизмесно по единьствении. Ни Бога нага, ни человека съвершена с гола зовете Христа, но и Бог и человек Сей есть Сын Мой, Егоже изволих! Сего послушайте!

О великое чюдо притранное! Сын Ся крестит, Отец с небеси сведетельствуеть, Дух акы голубь прилетев показает, к Кому глас той есть! Поистине бо велика есть строимаа тайна, велика и пречюдна и преидущи всяк ум: Троица Ся в Иердане реце являеть и ту Ся утверди едино существо Божества, паче же рещи: едино Божество в трех Ипостасех уведено бысть. Сущеи ту июдеи ужасошася страхы, Иоан ся дивить, Иордан ся освяти и вся тварь ся обнови, Христу всех нас Богу крестившуся Иоаном и все естество съвершено освятившу. Сей глас по крещении о Единороднем Сыну бысть на Иордане Отцем възглашен, а егда преобразися Иисус зрящем учеником: просиа лице Его яко солнце. Сей же паки глас спусти: Сей есть Сын Мой възлюбленый, Иже изволих! Того послушайте, аще речеть: Аз и Отец едино есве; Того послушайте, аще речеть: Видевый Мя виде Отца; Того послушайте, аще речет: Отец во Мне и Аз во Отци; Того послушайте, аще речеть: Пославый Мя болий Мене есть! То к строю плотному сей глас приложите, аще речеть: Се есть Моа плоть и Моа кровь, юже за вы проливаема на оставление грехом! То показаемо видите, аще речеть: скорбна Ми есть душа до смерти! - к души Его, а не к божеству Ему печалное то приатие приложите. Аще речеть: Кого Мя глаголют, человеци суща Сына человечя - отвещай со Петром великым к Нему: Ты еси Христос, Сын Бога живаго, и Тебе подобает слава, честь и покланяние в бесконечныа векы. Аминь.

___________________________________

Публикация по изданию: Никольский Н. К. Материалы для истории древнерусской духовной письменности. СПб., 1907. С. 67-74.

КИРИЛА МНИХА В НЕДЕЛЮ МЯСОПУСТНУЮ СЛОВО О ВТОРОМ ПРИШЕСТВИИ ГОСПОДА НАШЕГО ИСУСА ХРИСТА

Братия возлюбленная! Съберетеся и послушайте умно и прилежно страшных и грозных словес на спасение всего рода человеческа глаголющих, и узрим хотящий быти суд всему миру! //85об. Вообразим, какова блаженства тогда будут, съхраним чисто и без порока заповеди Господня; каковы же клятвы приемлют нерадившеи о своем житии, несъхранившеи словес Христовых! Ту бо сберется, якоже на торжищи или на позорищи, весь род человеческий, не точию християне тамо станут, но и не причастницы святыя веры. Темже уготовимся не точию послушати, но и сотворити плод извещаемыя заповеди. Ей, понудимся, зело бо возведут ны на крайний степень добрыя детели и полезны будут душам нашим. Се бо и аз паки прийдох к вашей, любви, Златоуста наставника предлагая, Христова словеса раздавающа альчющим душам, и якоже брашны ухлебяща, не греци бо точию обогатишася отцем сим, но и сло- //86 веньскый род, мнимый попран быти всеми.

Но о немже ся собрахом, то скончаем.

Се бо рех ныне и начях, Бога призвавше, молитвами вашими подающему немому язык, начинающему сице, понеже убо в безчестии и в досаждении и в поношении приде Сын Божий, истинный Бог наш. Сего ради рече: Егда приидет Сын человеческий во славе Своей и прочее. Си рече во второе пришествие Свое, еще бо и понеже распятие близ бе, вещми мнима и поносима быти, судище оно пред лице приводит и всю вселенную представляет и небеса истощима, вси бо святии аггели приидут с Ним. Рече: Что ради и тии сведетельствующе тогда, елико послужиша различно шлеми Спасом на спасение человеком. И всюду страшен будет день той, и сберутся, рече, вси языци, сиречь весь //86об. род человеческий, и отлучит я от Себе, якоже пастырь овца. Ныне не суть разлучени, но смешени. Разлучени же тогда будут со всяцем испытанием, обаче и от стояния разлучит и являет. Явль же и от имен образ коегождо показает: овы козлища нарицает, овы же овца; да овех покажет неплодие, овех же мног прибыток, от овец бо много прибытка: от волны, и от млека, и от природа, того же всего лихован козлищь. Но скот естеством есть плоден и неплоден, они же волею, да того ради мучими суть они, сии же венчаеми. Не прьвие же сих мучит, даже не прится с ними; темже и поставив я, начинает вины: еже взалках и не дасте Ми ясти и прочее. Они же со умилением ве- //87 щают, но уже никаяже полза бывает, и зело же в лепоту, яко сицеву вещь преминуша на тще. Пророци бо везде о сем глаголаху: Милости хощу, а не жертве; и Законодавец всеми на се нудяше, и глаголемы вещми, и само еже естество сказаше: Подобает же смотрети и блюсти заповеди. Не рече бо, яко в темници бех, и но [пав.б.: не] избависте Мене, но яко: не посетисте Мене и не приидосте ко Мне. Почто же и братию умаленныя нарицает нищая, понеже смирени нищии и отвержени суть, таковыя бо пасть в братство наричет. Неведомыя, небрегомыя не инокы точию глаголю и в горах живущая, но всякого верна, аще бо иже натец будет; алчен же, и жажден, и наг, и странен - всего сего прилежания велит наслаждатися ему, // 87об. брата его творит кре[...] святых тайн. Приидете, глаголя, благословении Отца Моего, наследуйте уготованное вам царствие от сложения миру.

Оле коликих благ достойно есть имя се, еже благословенным быти Самем Отцем! Еще бо не начнут они прьвие осуждаеми глаголати, яко не ве николиже, емуже быхом добро сотворили, сего ради клевретми я осуждает, якоже и буяя девы мудрыми девами, и пьянаго раба верным рабом, и погребшаго талант усугубившим. И когождо от грешник праведными, богатых богатая и убогих убогая претыкаять. Не рече же: Приимете уготованное вам царство, но: наследуите, да покажет преспеющий дар благодати, якоже бо Свое рече, и яко Отчее, //88 и яко ваше, и яко свыше должно суще вам, тако наследуйте е. Еще бо вы не бесте уготовах е, и приготовах вам, понеже ведах вы таковы быти. Смотрим же, за что толико приемлют: за поятие нища, за ризы, за хлеб, за воду студеную, за посетительство, за вхождение в темницу.

Онем же рек: Отидете от Мене, проклятии! Не рече: Отцем Моим, не Той бо их проклял, но своя их дела. Но не сего же рече: во огнь вечный, уготованый вам, но уготованый дияволу и аггелом его. Царство бо, рече, вам уготовах, а огнь не вам, но диаволу и аггелом его, понеже бо вы сами ся отвръгосте, занеже несте напитали, сами себе вину напишите.

Убоимся, возлюбленнии, сие слышавше и разумевше, колико и како во благоуготование и нестерпимыя //88об. муки осуждение, потщимся честною и богатою милостию вечных и неисповедимых благ наследници быти, некончаемых мук искушения не прияти. Аще и не сведали быхом себе грехи и тако не достояше между собою не сотворити милости, а понеже многим грехом есмы повинни, милостию отребим я от себе, понеже и других заповедей дръжащеся, не мозем же милости единой надеющеся вдатися пищи и пиянъству, и любодеянию, и лихоиманию, и гневодръжанию, и зависти, и клевете, и инем грехом, занеже все елико святими еваггелии учими есмы, то повелени есмы блюсти. Темже и аз наказаем отцем сим, молю вы, отцы и братия и сынове: блюдем заповеди Божия и не мозем уныти противу им, заповеди бо Его тяжкы не суть... [тут текст обрывается - Прим. А.А. Мельнікава].

__________________________________

Сборник XVI в. Библ. АН России. Доброхот. № 39. Л. 85 - 88об.

КИРИЛА ЕПИСКОПА ТУРОВЬСКАГО СКАЗАНИЕ О ЧЕРНОРИЗЪЧЕСТЕМ ЧИНУ ОТ ВЕТХАГО И НОВАГО: ОНАГО ОБРАЗА НОСЯЩА, А СЕГО ДЕЛЫ СОВЕРШАЮЩА

Первое речем о исходящих из мира в манастырь и взимающих искусныя ризы мнишескаго образа. По уставу от обою закону исправлено бысть то, ле- //514 по есть первее в искусе быти. Но внимай своему образу и житью, мнише, и осмотри своих риз оболчения, и познай себе во двою естеству имуща слог.

По ветхому закону жертву Собе сотворил есть оне агньца, закалаема в пустыни на пасху Богови: да не будеши коростав и хром и слеп и ранну - си бо вси повержени бывают порока ради псом и птицам на снедь. Ты же нерадъством собе принес зде быв, блюди опасно, да не бесом покоище зде быв и душу свою геонъским повержеши птицам, коростав быв творением грехов, хром же прилежанием житейских вещий, слеп же неплодъством //514об. живя, о чреве токмо пекийся.

По оному закону исправлено бысть приношение волнаго Богу обета в велице и мале вещи воздаемо чисто, да не буди порочно расужением твоих мыслий и услыши аки Каин: К тебе возвращение твое, ты им обладаеши. Свеща ли есть, токмо до церковных дверей в своей воли буди и о том не расмотряй и како и чим тя потворяет. Риза ли еси да приемлющаго тя в руку знай себе, кто [вариант: к тому ] не помысли, аще и на онучи растерган будеши. Точию до монастыря имей свою волю, по восприятьи же образа всего в собе поверзи в покорение, нимало своевольство утаи в сердци твоем, да не умреши душею, аки Анания услышав Пе- //515 тра глаголющаго ти: Почто восхоте искусити Дух Святый, не человеком бо солга [добавление: но Богови]! Да не нерадиши о своем обете и да не збудет о тебе писание глаголющее: Луче бе не познати истины, нежели и познавши уклонитися от нея, и протчая, да пса и свинии прилагаеми будут аще не ползуеши своей души, но паки возвратишися в мир.

[добавление: Сказ о пострижении мних в малый образ от Ветхаго Закона и ина мера.

Рече Бог Моисеови: Изъведи из Еюпта люди Моя, Израиля, да вшедъше наследят землю, юже обещах Авраму. И се слышавше людье от Арона, тъщахуся изити: ов радощами Божия обета, а другии не терпя нужные работы фараоня; ин не мога плит творити и не собе град създати, ин же погоничев прещения не терпя. И кости же Иосифовы въземъше изидоша. Замешано же тесто несяху, понеже не даша им испечи борзаго ради шьствия възложиша опреснъки на главы своя и тако от солнца испекошася. Исползъшем власом, и быша на всех плеши; по сему образу черньцем гуменце. Прошедъше море, маною вси без труда питахуся и ризы же на них растяху, дондеже под Синайскую гору придоша.

В ту же меру по Новому закону посла Бог Сына Своего избавити человечь род от плена дьяволя и привести от тьмы на свет и въследующих Ему терпению в Небесное Царство въселити.

Начало. Си же слышавша Акула и Прискула от Павла, яко верою и чистотою и смерением в Небесное Царствие внити есть, та 1-е от Паула свои постригоста главе и черны от сукна [с]отвориста си ризы.

Ты же, брате, въследовати хотя Христу, ведущему тя на небо, имей на своем уме чего ради разумнаго Еюпта - мира - отбегаеши: или обещанаго ти царства желая, ли дьяволя греховныя работы не хотя, ли житийския печали не любя, от неяже нест ползы, токмо души погибель, ли женою и детми смущаем. И старца же и болящаго уже умьртвити хотяща подобает остричи в мнишьство хотяща: се кости Иосифовы.

Носи же мысльное тесто точью, дондеже на главе ти плешь будет, и верою проиди море, сиречь: забуди мирьскаго жития вещи и нетрудьный хлеб, яко ману, от келареву руку приимая, питайся. Ризы же не славны и мякъкы люби, но растуща, сиречь: многыми пошивая заплатами, дондеже к горе боголюбных добродетелий доидеши, нъ и тогда не раслаби собе, нъ потрьпи, дажь тя Моиси с горы сънидет, неса скрижали с заповедми.

Привод. И не ревнуй мужем бе[з] страха Божия живущим в манастыри, точью о чреве и одежи мыслящем и велеречьем гордящеся, свары же и укоризны всем бещино укидающем, земныя чести и власти о собе въсхитающа, имьже мнози Христи, по Писанию, иная учения и заповеди предающе, по воли их, якоже хотят.

Ты же Христа единого заповедь и житье, иже от рожества и до растпятия досады и клеветы и поношения и раны тобе ради претерпе, - Сего послушай, о мнише, и приготови собе на терпение скорбий. Подвизайся, не раздруши своего обета, мужайся, егда укоризны приемлеши, не поверзи собе супротивьем, аки некий бещестьный суд, смрад испущая. Нъ и собе истрижения главы твоея въспомяни, яко образ търноваго венца Христова носиши, и с Тем крест свой злостраданием понеси и распен собе въльным терпением, и тако врага победиши. Нъ и тако не уповай собою, нъ пожди, дажь Христос из ада Адама изведет.

В 1-ю меру о самовластьи чьрньць от Закона.

Заповеда Моиси всем в чистоте пребывати, взиде на гору, идеже Бог съшьд огнь окружи гору, и написав скрижали Своим пьрстом, закон даст Моисею, и уем от духа его, вложи в избраные старце, и ущедри и помилова ихже Сам въсхоте. Нъ вижь, что быст! Ни чюдеса бо слабых от погибели изяша, нъ пришедъше належаху Арону дати им Бог, и бывши воли их; седоша ести и пити, дондеже възгорешася огньмь и мнози гневом Божием погибоша. И вси быша погибли, аще не бы Моиси стал в скрушении пред Ним възвратити ярость Его, да не погубит их, дондеже съделана будет скинья ].

В ту же меру от Новаго Закона о черньцех.

Ты же, мнише, аще веруеши на небесех жизнь прияти по реченному: Наше житие на небесех, - держи заповеди, яже Христос восходя во Иерусалим учеником глаголаше: Хотяй в вас быти болий да будет всех менши и всем слуга. Помни, еже при твоем пострижении слыша: Се зде Христос невидимо пред- //515об. стоит! Блюди кому обещаваешися; помысли: не паче ли горы Синайския страха Божия огнем окружил бе тя тогда, и паче ли скрыжалий обета твоего словеса вписана быша Божиим словом в плотяных твоего сердца скрыжалех, - да не сокруши худоверием! Но аще и не сияеши с Моисеом чистотою, поне воздыханием о гресех, яко гора, курися. Блажени убо бяху тогда со Исусом Наввиным единомышляху, - да и ты, брате, потщися обрести мужа духовны имуща, украшена добродетелми и послушество имуща, от своего жития паче всего ко Господу имуща [добавление: любовь и к игумену послушание и к братии безлобие разум имуща] божественных писаний и тем наставляюща к Богу на небеса идущая. Тому //516 преже [вариант: предаждь] себе, акы Халев Исусови, всю свою волю отсек, и будеши акы чистый сосуд, соблюдая влива в него благая, дондеже скиния будеши Святыя Троица, по реченому Богом: Аз и Отец приде бе и обитель в тобе сотворим!

От первыя меры. Аще ли прилепишися, аки ко Авиронъскому соньму, к милующим тело свое мнихом и ризы изменяющих, изветом праздника особную ризу и трапезу с пивом творяща, и тамо на лицы събирающася и до западнаго [вариант: поздьнаго] пребывающа, и ищюща над старейшинъствы взяти свою волю, а не Бога ради, ни о ползе совет творяща, яростный держаща супруг и бестудно на иконома и на келаря //516об. нападающа, аки Кореи и ини с Дафаном на Моисея и Аарона, имже бог чрево, по апостолу, и слава с студом их, - сих бо ради приходит гнев Божий на сыны непокоривыя и противныя, сиречь на мнихи, отметающая свой обет, имя же в монастыри сотворяющи. И не видят о них писанаго: Аз рех: Бози будете и сынове Вышняго вси! Вы же аки человецы умираете, мертви бо суть такови душами, но и телесы бяше умерли.

А се за Моисея Христос. Аще не бы Христос по все дни Собою жертву Богу Отцу за грешники возносил, покаяния нашего ожидая, обаче аще и обещаннаго нам Царствия Небеснаго слабостию не насле- //517 дуим, луче нам есть да телеса наша с падшими в пустыни падут, нежели не остатием грех творения к египетьским возврастимся страстем. Аще бо и студ сий сотворим по вся дни, кающися частых согрешений, но и тех адъских приставник не постражем мучений.

О Ааронях ризах, и о скимном образе, и о стихари, и о поясе, о подирии и обедех, и о ефуде, и о четвероскутней ризе, и о ометии, и о кидари.

По сотворении же скинии его сготованне бывши жертве и крупичной муце от князь приносим с древяным маслам и чистым салом, по сиклу святому, сиречь по весу правды Божия, - повелевает Господь обле- //517об. щися Аарону со всем племенем чистых левгит во священныя ризы, по детели дву естеству: Адамова преступления и Христова вочеловечения, на мнишеский приводя чин.

Стихарь убо от багра - по образу смоковных лист, имиже, съшив, покры себе Адам.

Пояс же усьян кожныя ризы являя мертвость.

Подирь же есть преступный Адамов грех.

Обеде же сии возложи златы - се же есть нужное из рая изведение, аки скоту уздами поверзъши.

На персех же положи пяди уткано и со двеманадесять камени ефуд - обоюнадесят колен израильтян пророчество.

Четвероскутную же возложи ризу - по образу //519 распростерщаго над Израилем в пустыни облака, из негоже исхождаше манна на них: Распростре бо, рече, облак в покров им.

Виждь: твоя, мнише, память [вариант: по имени] манны мантия, еже [вариант: а мятля] на ся возлагаеши [вариант: не възлагай ].

И кидарь же - наглавный ушев: се же есть Святаго Духа осенения.

Омет же - Адам, иже с высоты райския жизни в преисподнии ада сниде мрак, - егоже образ повеле Бог иереом и левгитом, на ся вземшим, измолити сущаго во аде. Но понеже ти сами патриарси и пророцы ветхаго закона не сохраниша до конца Божия повеления и в законе Его не изволиша ходити и всех иже в ветсем законе затвориша книги под грехом. О сем бо рече //519об. Господь притчею о впадшем в разбойники и от них одежду обнажену и язву приимшу, исполу при пути повержену мертву: Иерей, рече, и леввитянин сходя путем и виде ранами боляща, не могий его исцелити и мимоиде. Того ради подобает и тому востати иерею, весь образ имуща Аронь и не по чину Аароню глаголатися, иже изо ада измет падшаго ранами, на свой скот взем, в гостинницу принесе.

Разум о сложении обою закону Христова иерейства и образа скимнаго.

Послушай апостола Павла глаголюща к галатом: Посла Бог Сына Своего, ражающася от жены, бывающа под законом. Виждь како ти по первому образу от небеснаго злата скинию бо //520 Собе створи, и по сем Собою жертву уготовит. Князи бо, рече, [добавление: людстии] собрашася на Господа и на Христа Его, в крупичныя место муки хулу на Нь глаголаша, в масла место плеваху на святое лице Его, и за сало по ланитома бияху, ценою же купиша Его от Июды весом сребра по образу сикла оного. Сим образом и мних творение закона и добрых дел свое тело скинию Святому Духу сотворяет и живу жертву себе Господеви приносит, от чиста ума, яко муку, молитву Господеви принося, в масла место слезы, в сала место воздыхание от сердца.

И по сем смотри оболчения Христова. Да будет иерей по повелению Божию, по сбытию пророческих глагол: Совлекоша бо с Него ризы Его и облекоша И в ризу че- //520об. рвлену: се Ааронь стихарь за Адамов смоковный лист одеяние., - то же и чернецы кадман по совлечении своея воли, о сей бо пишется: Се красен во одежди нужней своей!

И пояс же - крестныя смерти осужение, еюже Адама обожи, за иже связан водим бысть по писанию: Есть поясана правдою и истинною обвит в ребра своя, - по сему образу схимный с праздникы пояс от Адама и до Аарона и обою закону Христом совершен.

Обеди же суть приводни на царьский сан: ведоша бо Его к Пилату связана, глаголюще: Распнийся, яко Сей Себе царя творит! И се же быст по человечеству [вариант: пророчьству]: Связати царя их путы, - да Адамова изгнания поносив у- //521 зды царем предаст, те бо на своем сану сия обеди носяще спасаются.

Се же и мнихом аналавы предани носити, рекше плетцы, творяще делом послушание.

Ефуд же есть - егда Христос при архиреи ста и рекшу Каияфе: Вы не весте, единому подобает умрети за люди, - се же глаголаше, в ефуд зря.

И тогда закрывше платищем лице Его, бияхут и глаголюще: Прорцы нам, Христе, кто есть ударивый Тя! - в ефуд бо зряще прорицаху; и по сему образу чьрньцу малая переманатка, да не на персех, ни на лицы, но за плечима ветхий закон держит.

За кидар же - егда поведоша И на распятие и возложиша тернов венець на главу Его; //521об. се же есть мниху малых влас куста.

Четвероскутная же риза Ароня, бывшия на Христе - се есть: егда распенъше и разделиша ризы Его воини, и тем четвероконечнаго мира покрыв; воини же Христови суть мниси, иже четвероскутну же мантию носят. Манатия бо покров Божий речется по образу распростертаго над Израилем в пустыни облака. Мниси же суть новый Божию отрок Израиль.

За подир же взем на Ся мира грехи на кресте пригвозди - се есть мнишеский куколь; по ветхому закону - Адамов преступный грех, по новому же - Христова смирения образ.

Заушение же иерейскаго новоплодия по образу Адамо- //522 ва от древа возбраненаго вкуса, вкушает желчь со вкусом. По сему образу черньцу вседневный пост держати и от всего воздержание.

За всесожагаемый иже по законе иереи агнец, иже по образу Адамовы смерти прободаеться в ребра и съжигает Духом Святым, излитием крове и воды; да и ты, мнише, пожри свою волю и сожги грехы излитием теплых слез.

Омет же есть Адам, егоже взем Христос на Свои раме, изо ада на небеса возведе. Виждь, како ти вземлет на Свой скот впадшаго в разбойники, егоже закон и пророцы не могоша исцелити! По сему образу епископи амфор носят на раму и душу свою полагают за по- //522об. рученыя им люди, взимающа я учением от ада греховнаго. Аще ли будет мних епископом, подобает ему снимати манатку, егда с полицею служит: един бо ефуд, а не два и Аарон и Христос прия, не мощно бо при службе с Адамом равно на плещу носити ветхаго бо закон, не могша бо вознести лежащаго, но акы на послушество доле зачнен имети. Такоже и игуменом с полицею служащим снимати манатку с плечю.

Чин како подобает пог[ре]бати по уставу монастыря Студийскаго.

Аще мних почиет, недостоит телеси его видети, ни измывати, иже на то устроены потрет тело его //522 губою и теплою водою. Первое творит крест губою на челе, умершаго по сем на персех и на руку и на ногу, и потом влож руку и на ногу внутрь риз и потре тело его благообразне. По потрении совлечет мертвеца на назе и части пол и облечет и в новую свитку, никакоже ни сам, ни ин того наготы не видев. И по облечении аще будет великий схимник, возложит на нь куколь и наглавие верху главы, покрыв и до брады, яко не видену быти лицу его. А малаго образа клобук обема бо едина различие, и по сем возложит на нь плети и препояшет и обует и. И вынес одры устроеный погребанию //522об. прострет верху его пополому и положит возглавейце мало, и манатейныя краи все ножем обрезав, и покроит мантию по крайней стране, простирает ю на одре верху пополом, напереки якоже в ней ходил напросто наподлежи, и положится на ней мертвый и укрои разделив надвое, десную и левую страну манатии аки ременем митусь пременяя свивает, а прокрои манатейный возлагает на главу, свивая, сотворяет три кресты: един над главою, второй на персех, третей - на колену, и оставшеюся частию обою узгу свяжет нозе верху мертвеца, и простирается два пополома. Вземше //523 одр и поставляют внутренней паперти прямо царьских дверей, понамареви дващи ударивши в великое било, и братия вся собираются в паперть. И дадят им по свещи, и вжегше и окрест ставше, и абие поп кадит окрест одра, начен от главы по три кресты на четырех частех. И по сем покадит братию и станет у одра и сотворит три кресты в головах и речет: Благословен Бог наш. И поют "Блажени непорочнии", якоже уставлено есть по правиле; несут и ко гробу, поющи уставленые тропари, и вложивше во гроб и взем в сосуде масло поп, и возлиет верху телеси, творя три кресты: на лицы, на персех //523об. и на колену, поюще "Аллилуя" на глас первой. А предстоящии поют: Изчезох от ближних моих. И по сем поп молитву разрешенную, и тако погребут и. И по сем поют "Святый Боже" и октенья, в нейже поминается усопший брат, и глаголют "Господи помилуй" четырдесят. И по сем отпущение. И се аще великий схимник или малый образ умрый - едино погребение.

Аще ли поп есть, ино все такоже бывает. Обаче по потрении губою и по облачении в новую свиту и протчая вся мнишескаго образа и в манатью и в калиги обуть и в чисти телны ипатрахиль, и по сем свяжут руце его крестом и облекут и верху в фелон просте- //524 рши паполому, на одре положит и. Во время же погребения влагают главу его внутрь устья фелоня и иглою сошьют и. И оно возберут весь подолок фелоня, и свяжут и вервию полы стома. И поливают и маслом, и погребут, и по прежеписанному вся без скудости поемым. Аще ли дьякони погребаеми бывают, яко и велицыи схимники без стихарей своих.

Кирилом поучение к попом.

Слышите, иерейский преподобный собор, к вам ми слово! Понеже вы нарекостеся земнии аггели и небеснии человецы, вы со аггелы предъстоите у престола Господня, вы с серафимы носите Господа, вы сводите Дух Святый с небес и претво- //524об. ряете хлеб в плоть и вино в кровь Божию. И человеком невидимо мнози же святии видеша, и ныне достойнии видят. Вы просвещаете человеки божественным крещением и вы связываете на земли, а Бог не разрешает на небесех. Ваши совершает Бог тайну на спасение роду человеческому; вас Бог стража постави и пастухи Своих словесных овец, понеже Бог наш пролия Свою честную кровь, вам предаст Свой талант, егоже хощет от вас истязати во вторый Свой приход. Како будете умножили данный вам дар и како будете соблюли святыню вашу неосквернену, или како будете соблазнили //525 верных! Господь бо рече: Луче бы навязати жернов на выю, имже осел мелет, и погрузити в море, неже соблазнити от человеков души человечестей, единой бо не точен весь мир. Како же многи душа соблазнивый не погрузится во огни негасимом! Простец, согрешив, за свою едину душу ответ даст Богу; иерей же, согрешив, соблазнит многи и за тех душа осужен будет от Бога. Отселе блюдитеся всякого греха, не работайте плоти и отверзите от себе пьянетво, обьядение, и лишитеся рот и сваров, вражды и хулы на друга, и сквернаго резоимания и всякого порока злаго, и гордости и многоречия, мерзости и ярости, //525об. клятвы и лжа, скупости и немилосердия, зависти и ненависти, льсти, лукавъства, от всех дел сатаниных соблюдъши себе; блюдите же и всех человек православных християн, како бы им непорочным на суде Господни стати. И како речете кийждо вас: Се аз и дети, яже ми еси дал Бог! И сего ради умножите талант, данный вам от Бога.

Почто, рече Господь, не растите влас главы своея, ниже бреите брад ваших? Понеже Бог, отводя верныя от бесовъския козни, то бо рече: Еллини не остригаху влас детем своим, приводяху бо их на жертву бесом велики власы имуща, честь деющи идолом. И по мертвецех //526 бо своих брады своя бросняху и торгаху, и лица драху ногты до крови и телеса стрекаху иглами и сажею натираху. Того бо не лепо есть деяти християном, и да не с теми осужени будут.

[Добавление: Подобает же и болшим и меншим игуменом с полицею служити и не просити того у епископа, то бо есть черньцю, епископу чюже, а игуменом свое: на плотней бо чистоте держиться ефуд, а не по власти сана. А и сам веси, яже не епископ всем черньцем малую манатку възлагает на плещи].

О агельстем образе мнишьстем указ.

И о сем подобает ти сказати, почесому аггельскый образ носяще нарицаются мниси. Аще бо и вси ведят о сем, но аз младых ради и неразумных написаю.

Не небесных аггел се ест образ, ни бесплотных существо: они бо светообразни, существом невидими, не имуще меры качеству; но земных аггел, сиреч преподобных муж законодавець, иже в ветсем и новем законе в телесней чистоте богоугодно послужиша: таковии бо человеци аггели нарицаются.

Слыши Давыда глаголюща: Персти мои съставиша псалтырь! И кто възвестит Господеви моему? - Той Сам слышит. И Тъй посла аггела Своего, и поят мя от овець отца моего, и помаза мя милостию помазаниа Своего. Не мни, с небесе посла, нъ Самоила, помазавшаго и, аггела нарицает. Такоже и Павел пиша к еуреем глаголет: Аще глаголанно аггелы слово быст известно. И тъй пророкы и законодавци аггелы наменует, якоже и Стефан к фарисеом глаголаше, иже приимше законоповелениа аггельска и не съхранисте; се Моисея нарицает, егоже закона не съхраниша жидове. И пакы Павел сущим в новем законе глаголет: Должна ест жена молящися в церкви имети покров на главе аггел деля. Виждь, яко священникы по чистоте живущаа телесне, бес порока служащая Богови в ветсем и новем законе аггелы бо книгы нарицают.

Се же и ты, о иноче, изволил еси аггельское священное и чистое житие. Да не держи его словом точию, но и добродетелию украси е. Ветхаго бо закона вес Ааронь образ священных на собе носищи, Адамова преступлениа грехи себе обложив, да подщися Христовым терпением сын Божий сътворитися, да не токмо спасешися, но и впадшаго в греховныя разбойникы исцелиши. Не ризами светлыми буди славен, но делы добрыми. Терпелив подвизайся, всякы скорби мужскы терпя, ретуяся мучеником, за Христа свою изливавшим кровь. Ты же аще не извну, то внутрьюду иссуши ю, токмо нужней потребе телеси касаяся, да и ты преподобных чясти и аггельскому венцу и Небесному Царствию наследник будеши.

Си глагола мне о сих от книг, а не о собе сказавшу. Аще не кто мудр, тъй инако протолкует, мы противу не вещаем. Несмь бо женьци, но класосъбиратели, ни хитреци книгам. Мы, грубая чадь, паче всего от старейшиньства вашего требуем святыа молитвы о Христе Исусе о Господе нашем, Емуже слава с Отцем и с Святым Духом ныне и присно и в векы веком. Аминь.]

___________________________________

"Служебник" нач. XVII в. Росс. нац. библ. Q. I.223. Л. 513об.-526.

КИРИЛА ИНОКА СЛОВО УКАЗАНИЕ, ОТКУДУ ЖИТИЕ В ЛЮДЕХ БЕЗЖЕННОЕ, СИРЕЧЬ ДЕВСТВЕННОЕ И ПОСТНИЧЕСКОЕ, НАЧАЛО ИМАТ

Аще пытаеши, испытателю, почто таково житие приемлем, еже быти кроме жены и чад плотских, и в пощении мяс, и в нищете, и в чръных одежах, и во вретищи власяне, и в отлучении мирских деланий и глаголании, блажу тя о сем, яко добре твориши благое пытание о Божиих рабех, и аз тебе не философиею отвещаю, ни красноречием //1об. диалектычнаго гадания, точию истинною простотою от Святых Писаний.

Слыши, молю тя, Бытейския книги, како бысть пръвый житель на земли - от Бога създанный Адам кроме жены, и се бысть безженнаго жительства начало. Егда же дана бысть ему жена, се втораго брачного жития начало и знамение. И преже жены был Адам, яко мы, иноци, по греху же и со женою чадородне - по-мирски, яко вы, миране. И бысть Богови любим, в девъстве суще, бысть Богови любим и с женою суще, дондеже грехом не прогнева Бога. Темже вы, женящиеся, плотолюбныи, безженства ради иночьства не облыгайте, ниже бо мы вас укоряем брака ради, не погибнете бо жен ради, точию греха ради, ниже спасетеся жен ради, но добродетелей ради. Жены бо вам точи- //2 ю до гроба, спасение же и душа въвеки. Жена вам смертию отлучится и чада, добрии же дела на суд Божий въстанут з вами. Наше бо есть первое житие старейшее девъственное, от негоже и ваше претворяется брачное, и вы бо есте кроме жен во свободе, второе же - по работе, сиречь во тяготе брака. Сие же ми чюдно, почто ти жена точию до смерти во веце сем, в будущом же несть, еда зде житие токмо требети есть. Возлюбленне! не умер ли Авраам праведный от жены, не кроме брака ли есть ныне у Бога? Тако и ты надейся отсюду прейти от земля ко Богу, от жены во безженство, от временных в вечнаа жительства! Разумей же сие и разсуди, яко от Бога сию дельбу имамы: Того бо есмы творени и мы, и вы. И аз бо реку з безженным апостолом Павлом //2об. слово, яко: нужда ти пещися угодити жене, нам же нужда угодити Богови и души. И понеже Бог есть законоположник обоим житиям, веруй сему, яже ти глаголю, обрящеши бо в Писании Авеля безженна преже еще потопа, Адамля сына, иже жрътву Богови приношаше чисту точию прочести люби. И еще сему и паче в лепоту почюдися слышаще глаголемое. Кто бысть болъший: Авраам ли брачный или Мелхиседек безбрачный, девъственник, подобный Сыну Божию, священник Бога вышняго, иже благословляаше Авраама, вопиет бо апостол без всякого прекословия: Менший от болшаго благословляется. И аще мимоидый святых увидети хощеши полк, виждь Самоила пророка, от юности во девстве служаща Церкви безженна. //3 Зри же триех отрок и блаженнаго Даниила пророка во житии безженном, како прославиша Бога суще во Вавилоне. Еда кто возбрани им не имети жену, яко все израильтяны? - избраша бо лучшее пръвое житие и прияша славу паче плотских чад. Кто же еще возбрани на яво представити седмолучный свещник веры честно пострадавших по законе, - седм отроков Маккавейских, како в чистоте и целомудрии воспитани бяху паче царских детей и, поистине реку, яко вышшее житие их над царя Соломона: сей бо златом и камением и сребром церковь украси, овии же душами возсияли суть паче солнца во мире сем, иже добродетелми украсившися, доступили венец мученический во правду.

О красная славо девства! О духовный роде паче телеснаго плоднейший! О семя веры всечестное, яже //3об. възрастаеши во безсмертие!

Но речеши ли "честный есть брак", добре глаголеши, научи бо тя святый Павел. Въпрос: Что есть честен? Ответ: Уцтив еще же не свят: святость же выше чести. Девство же свято телом и духом, аще в нем славится Бог. Прийди же прочее, приникни жития святых многих и виждь Илию пророка огнепальна словесы, Божия ревнителя сильна во делех, иже небо затвори, девствующа, обитель же ему бысть дубровы пустынь. Зри ми по сем пророка Иелисея, яже живяше во горе и в безмолвии Богови беседоваше, иже ангелъскими полки обстоим бысть, таже крестителя Господня, во плоти ангела Иоанна Предтечу: той да преприт тя власяною одеждою и поясом кожаным, и безмясными брашны, еже бысть служитель велий пред Богом и всеми людми //4 и вышшей всех пророков. Что убо Крестителеви возбрани ясти мяс? Закон ли? - Ни, не бе ли во царьских домох, идеже мясоядьци и кровоядьци, и женолюбьци паче, нежели боголюбци бяху. Когда обличаше Ирода царя, которогоже к сему сведительства требе Самого Христа, о немже реченно: Масло и мед снесть: Иоанна же и Павла, апостолов верных Христове последователе.

Темже увежд прочее и накажи ся, откуду начало прияхом безженаго жития, черного и постнического жития. Древле бо в раю ниже слышашеся заклание животных на снедь и пролитие крове не бе, трапеза же бысть Адаму саморасльна семена и плоды древес. А понеже апостол глагола о еретикох, возбраняющих женитися и удалятися от брашен, - на себе ли сие рече или на постников, иже бысть им друг, //4об. на девствеников ли, иже им похвалу списа: Не оженивыйся, рече, печется, како мает угодити Господеви. Но аще кто глаголет: Скверънен брак и брашна сицевыи, - Духа Божиа чюжд есть. Не прелъщайся, плоти угодниче: не во мясе спасение - чревьном гною, ни во ризах многоценных обрящеши Христа, ниже браком любяй жену или чада паче Христа достоин будеши Христу. Видиши ли, яко Христос не брака учит тя, но девства и поста и смирениа, не чадородиа, но воздръжаниа, ведяху бо прежде все родитися и посягати; житие же будущаго века прописует тобе Своим житием: Во воскресение бо, рече, мертвых ни женятся, ни посегают, но яко ангели Божии суть. Ты же приими дар Его, възлюбленне, лучшая бо ти Христос дает, ихже //5 имел еси и имаши жития сего вещи. Слыши апостола глаголюща: Плоть, рече, и кровь Царствия Божия не наследят. Не глаголю ти, иже сквернен есть брак, но тяжек есть и многопечаловен. Не глаголю ти: греха поять и жену, но щажду тя житию апостольскому быти подражателем. Лучше бо не воздръжателному жити во браце, неже вопадати во грех. Блаженне, еже победити похоть и освящати душу; позная познай, яко духовнаго тя хощст быти Христос и свободна от ярма мира сего. Не пръваго Адама, преступльшаго заповедь, буди ученик, изгнан бо будеши из рая пища, но второму Адаму небесному последуй, во Егоже имя крестился еси, да вниидеши во живот вечный: Иже любив, рече, отца или матерь или жену или чада //5об. паче Мене, несть Мене достоин, но иже хощет по Мне ити, да отвръжется себе и возметь крест свой и по Мне грядет, иже бо хощет душу свою спасти, погубит ю, аще погубит душу свою Мене ради и Евангелия, то спасет ю. Кая бо полза человеку, аще приобрящет мир ввесь [Так в рукописи - Прим. А.А.Мельнікава] и отщетит душу свою? Или что даст человек измену на души своей? Откуду ж христианъства чаеш прияти славу: не за Христом ли шествовати повеленно ти есть, рци ми. Тесен бо, рече, и прискорбен путь, воводящий в живот вечный, широка же и пространная врата, воводящая во пагубу. Паки реку ти: внимай себе, внимай Царю силам: обещался еси в руку Его ты и конци земля, Иже грядет судити всего мира, имый мзду его со Собою, Иже есть правосудный всем.//6

Аще же пытаеши о черных и худых наших, и нищетных, и власяных одеждах, о сем ти требе есть, понеже ни аз зазрювашим цветным ризам, имиже украшает вас мир, ибо вся хотящеи умолити Бога и плакатися о гресех съвлекаются з светлых одеаний и влачают на ся власяныи вретища - одежду плача и смирения, одежду самозделанную, честну же от грабления и лихоимания, яже не стяжана слезами нищих, якоже Давид цар Израилев в время падения его ижи написа: Облачахся, рек, в вретище и смирях постом душу мою - сиречь милости Божия искаше за грех в вретищи, и плачи, и сетовании, и якоже цар в Ниневии граде, и якож многострадалный Иов в время обнищания его и умрътвиа чад остриг главы власы своея и сед на гноищи, и въпия жальбы ко Богу. //6об. И якоже они уставляху и имяху время покаателное во смирении, в немже помянул их Господь и оцистил грехи их, и отвращал от них гнев Свой, и услышал молитву их. Тако и черноризци во иночестве обещаваются Богови в вся дни плакатися о гресех, и приемлют пострыг главы от руки иерейской, да разнъствуют в всем от мира. Образ же есть влас пострыжения - отрезание своих волей мирских и грешных обычаев, и знамение на главе: на връсех выстрыгается венец, остают же ся окрестныя власы, да пострыженный подвизается о Господе с упованием паметствующе небесный венец приимут, вы же нетленен тако тецете да постигнете.

Слыши же к сему Божия словеса о пострызе, к Моисею реченныии: Да //7 пострыжется, рече, обещавыйся Богови пред дверми храма сведениа глава молбы его и да возложат власы на огнь, иж есть у требы спасениа. Та же в Деяниих апостольскых слыши о том же: Павел же, пребыв дни доволны во Коринфе и целова братию, отплы во Сирию, и с ним Ахилла и Присхилла, острыг главу в кеггреих, обрие бо ся бе приста еже во Ефесе и Тихика остави ту, и паки о том же старци рече: Съшедшеся сущии в Иерусалиме со Иаковом, глаголаху ко Павлу: Что убо есть всяко подобает народу съниитися, услышат бо, яко пришел еси, сия бо твори, яже ти глаголем: суть у нас мужие четыри, обещавшии себе Богу, сих моим, оцистися с ними и иждиви на нах, да острыгут си главы. Тогда Павел прием мужа наутрие с ними, //7об. очищся, внииде во святилище, завещавая скончание очищения днем, дондеже принесено бысть за единого коегождо их приношение. Аще ли глаголеши: Се закон Моисей написа, но Бог повеле и путь покаания нам показа, и сицевых нарекоша назореи, и Самоил бо, и Илия, и Самсон, и Предтеча, и Христос власы растяше, ибо имяху главы своя освященны. А яже глаголет апостол: Растение, мовит, мужеви влас безчестие ему есть. Безчестие, глаголет, но не грех, яже убо у мирян безчестно, сие честно у Бога. Якоже посмеяшася дети пророку Иелисееви, о немже писано в книгах четвертых Царств Израилевых, глава 2: Взыйде, рече, Иелисей в Вефил, и входящу ему путем, и се, дети малыи изыйдоша из града и ругахуся, и реша ему: //8 Гряди, плешиве, гряди! И озвреся въслед себе, и виде я, проклят и именем Господним, и се, изыйдосте две медведици от луга и растръгуща и от них 42 отрочищ, и иде оттуду в гору Кармилскую, и оттуду възвратися в Самарию. Видиши ли, иже бесчестяху пророка плеши ради, но их Бог погуби! И тако бесчестящии и днесь гневают Бога и досаждающ чину и пострыгу иноческому. Разумей ми, възлюбленне: малую вину, велию же казнь на детех сих, ниже биша его, ниже камением връгоша, ниже тело ураниша, но словесы чин пророчей главы, яже бяху освящена, обесчестили неразумнии отроци. И аще Бог юных, иже не имеяху разума, погуби, блюдет еже ся в разуме сущии хулити Елисейскаго чина, сущаго на иноцех, да не лютейшая постра- //8об. ждете. Блажен бо есть инок, иже миром безчестим, да будет достоин у Бога вечной чести; окаянне же иже ищай чести на земли. Достоит же иноком почитати всех человек, да съвръшени явятся в любви, сами же и даемая чести да не приемлют, дело же иже и устав хранити правило молебное ко Богу, въздающе Ему плод устен, исповедающеся имени Его, якоже пророк глаголет: Възнесу Тя, Боже мой, Царю мой, и благословлю имя Твое въвеки и в век века, - милости просяща у Бога о своихь гресех и о всем мире, глаголет бо апостол: Непрестанно молетеся, якоже бо анъгели в дни и в нощи непрестанно поют Бога. Тако и чръноризцем быти подобает, иже хотят приближитися ко Господу своему, все бо святии пророцы и апостоли часто творили молитву и похваляли Бога //9 в псалмех и пениих и песнех духовных, пели и въспевали во сердцех своих Господеви. К Моисею глагола Господь: Святи будете, яко Аз свят есм. Видиши ли, о миролюбнику человече, яко мир и вся, яже на нем, не вечна суть, и яко вся его благости мимотекут; чюжду же ти зело, почто мниши пребыти лета века сего, ихже Бог кончину токмо весть! Не слыша ли апостольскаго словеси: Вси святии, рече, яко странни и пришелци на земли, не мели обитающаго града, но грядущаго взысковали. И паки: Скитающеся в горах и в вертепах и пропастех земных, пройдоша в милотех и в козиях кожах, имже не бе достоин мир. Ты же и злата и сребра и многоценных риз не оставиши ли в руце иным по тебе, аще Христу и Его нищим сия не отдаси? Кая ти полза в гробе от них, рци ми! Иноци же вся сия оплевают, яже ты лобызаеши //9об. и храниши. Хвалишися христианством, рци со апостолом: Яже ми бяху приобретениа, сия вмених Христа ради тщету, и мню вся уметы быти, да Христа единаго приобрящу. Разумей ми, что глаголет святый нищий и необувен Христа ради, иже сый усмотворець, шило в руку имея, всю вселенную обтече, обыйде, яко пернат, поднебесную, заблуждъшая ко Христу обрати, мир весь спасти желая, мирских же ничтоже требуя, наказуя тебе, да навыкнеши сице жити, якоже ко Тимофею пиша, глаголет: Никтоже, воин бывая, обвязуется куплями житейскими, да воеводе угоден будет - сиречь еже свободитися житейских млъвъ. И о сих глаголет пророк Богови: Сокрыеши их во тайне лица Твоего, от мятежей человеческих покрыеши их во крове, от пререкания язык, сокрывает бо Бог воистинну //10 благочестивых иноков от миръскаго мятежа и вражия, к нимже и ты прибегни. Возлюбленне! не гражданство бо ти Христос завещав, христианине, ниже куплетворство, ниже имений притяжания, ниже купление рабов, ниже стены камяныя возвышати, но духовный живот, егоже мир не может воместити, понеже бо ни Духа Утешителнаго мир прияти не мог, посланнаго на святых апостолов. Глагола Бог: Приидох, не да послужат Ми, но да послужу Аз. Сия вся иноци навръшати обрекаются на пострызе, яже святое Евангелие завещавает, к нимже глагола Писание: Воздаждь Господеви обеты твоя!

Прочее о меньших чинах слыши: опоясуют бо пояс кожан широкше, стягающе чрево на воздержание, от объядения и многопития, якоже Иоан, //10об. закрывают же слухи, да не слышат праздных бесед и глумных словес, да не оскверняют душе, завешают же очи не видети мирского безчинъства, влагают на главу и плещи крест от власяна плата, сиречь клобук, яко да по видимому и внутренему образу будут крестоноснии людие, се бо бысть честь Христу, егда крест Свой понес, идый на распятие, на немже распят бысть; тако же де и иноком честь есть образ креста носити на собе. Зачало 125. Кор. 1: Слово бо крестное погибающим убо юродство есть, - мовит апостол, - мне же не буди хвалитися, токмо о кресте Господа моего Исус Христа, имже Мне мир распятся и Аз всему миру. К сему же одевают мантию вместо риз иерейских, и обручение святаго евангельскаго образа приемлюще, понеже на жрътву са- //11 мих себе дали Богови душею и телом работати до кончины издыхания своего в тръпении и скорбех. Сия бо мантия - памят гроба, в немже молимся и погребаемся, вместо гроба еже глаголется плачевная одежда, и якоже несть седящим в темници юзником веселия чаания ради смерътнаго, тако истинным иноком несть на земли праздника. Завешают на плещи параман - образ щита веры приемлюще; на пръси же крест, яко печать Христову, на враги оружие предносяще. Хотяй же известнее ведати чръноризский чин прием, пострыг написаный прочти, и тамо суть обеты на тръпения, яже отдаются Господеви от пострызающагося. Исходят же из градов или в пустыню, или во горы вон из мира ко подобней себе дружине, да обучатся //11об. служити Богу, да навыкнут Господеви приносити оферу, пот чела своего на поклонение до лица земли припадающе, якоже и Господь кланяшеся на молитве, Емуже бысть пот, яко капля крови от чела, да понудят тело питати в меру, не якоже чревообъястници, да обуздают язык от всех сквернословий и клевет, приготовят же ся и очистят сердце и уста достойно славити Творца своего и благодарити во дни и в нощи, ниже лице свое красят, ниже тело умывают, ниже свою нагость видят, тих ангелов и сами себе не посрамят пред собою, спят же мало время опоясани и обувени и в ризе, скоро поревающеся на молитву полунощную, не во мякких же постелях, доволъствующе рогозиною или полъстию или тельнаго костем постелю иму- //12 ще, возглавне имуще камень или древо. Трапеза же от семен и елея, и питие не помрачающе ума: или вода, или варен укроп скишеный. Ниже закалают животнаго. ниже проливают крови, и лучшее избирают молчание, плач [Так у рукапісе, павінна быць: паче - Заўвага А.А.Мельнікава. ] многоглаголания и прочее. Тако ми разумей чернечество: долу очию зрение имуще, горе же душу, и се есть устав покаания и путь спасения житие сие, еже есть вторый мир на земли духовных гражан, имже всем, Господи Исусе Христе, помози угодити Тебе молитвами святых Твоих. Аминь.

До черноризцов.

Слыши, о черноризче, что есть чернечество, сиречь иночество или мнишество, и каково есть, и откуду есть. Сия же виде, веждь, яко образ ангельскый приял еси на земли, якоже преда святому //12об. великому Пахомию от Бога ангел. Темже молю тя, любимиче: не рци, яко зло есть чернечество, не рци, яко непотребно есть, ниже досажай чину, в немже тя Бог избра работати во славу Его. Глаголют бо нецыи: черная риза не спасет, белая ж не погубит. Тако есть, яко не риза спасает, но ниже красование ризное мило есть Богови. Спасение же во смирении обрящеши, смирению же смиренныя ризы благолепие. Глаголет бо святый Иоан Лесвичник: И вжды нехай тя понужает, сня плачевныя ризы, на молитву, и подвиг, и слезы, в нейже грехи омыти обещался еси. Поминай пророка глаголюща: Смирихся, рече, и спасе мя! И паки: Благом не рече, яко смирил мя еси, да научуся оправданием Твоим. И ты убо, любимиче //13 мой, поревнуй преподобным отцем всем, прежде почившим тебе во святом сем иноческом чину, в немже суть спаслися и угодили Господеви добре пожившии во христианстве, иже просияша во посте и трудишася в молитвах и поклонениих, иже не красовахуся ризами, ни угодиша плоти, ниже славу мира сего требоваху, ниже о сродстве и имении попечение творяще, но о души подвизашеся, и вся прелести мирьския презрели, и во худости, нищете и скорбех пожиша на земли. И ты убо, брате мой, веси, яко всех отрекся еси, яже ти на пакость души приносит враг: гордыню, тщеславие, кичение, злобу, сласть, златолюбие, тайноделание греха, тайно- //13об. ядение, - и блюдися от лености, от многа сна, блюдися от празднословия и клеветы, и от зависти, и от лукавъства, ниже власти желай, ниже игуменъства в манастыри, ниже тщися повелевати, но всем послужити прилежно возлюби, да от всех приимеши молитву, яко да услышит их Бог и помилует тя, и многая ти приложиться мзда от Господа нашего Исус Христа смирения ради. От всякого человекоугодия удаляйся, яже любит мир, да не погубиши вечно твою душу, и несть бо достоин мир ввесь единой души праведнаго, ниже ценою искупиши душу перед Богом во день судный. Поминай твоего ангела хранителя, иже приставлен при тобе от Бога, да не безчинуеши //14 пред святым его лицем, и помышляй в чистоте ума Богови угодити и во простоте душа твоея, яко да твоя молитвы святый ангел чисты приносит пред Бога в день и в нощи и на всяко время. Не вокушай же никогдаже брашна, поколя отпоеши часы, да не утеши врага, несть бо благо души не молящагося и рано ядущаго.

Горе, горе мне, брате мой, яко и аз во вся дни сия в последьний век чернечествовах, но зело в беде и скорби и в наваждениих от враг и ненависти мира сего, и велие помышляю и вижду чернечество болшей, неже царствовати, болшее, нежели градами владети, болшее, неже много чад родити, болшей, неже мира сего слава. //14об. Начах бо плакатися о гресех и всегда начинаю, себе же ничтоже свем благосотворша пред Богом, ниже от Него мзды коея достоин есмь. Съветую же ти совет братолюбив: добре чернечествуй, брате мой: чернечествуй словесы, чернечествуй очима, чернечествуй устами, чернечествуй языком, чернечествуй ушима, чернечествуй мыслию, чернечествуй рукама, чернечествуй хожением, чернечествуй телом и душею, чернечествуй одеждею, чернечествуй в брашнех, чернечествуй во малоспании, чернечествуй не во спеси, но в сетовании и болезни сердца, и воздыхании, и слезах, чернечествуй послушанием, чернечествуй въ- //15 зъдръжанием, чернечествуй трезвением, чернечествуй тръпением, чернечествуй братолюбием, чернечествуй Господеви, а не людем, чернечествуй Христови, а не противному, събирай молитвы, яко злато, и храни безмолвие, яко бисер, вся яже видиши красная мира презирай, и самую плоть, ожидая вечных обителей небесных, идеже честь и слава, и богатество, и радость уготованно есть, токмо веруй, претерпи вар в весь день твоего чернечества, и вниидеши в вечер со делавшими в винограде прияти мзду за труды от Господина винограда, и речет ти Господь: Благий рабе, верный! во мале бысть верен, над многими тя //15об. поставлю; внийди в радость Господа своего, из котому [Так в рукописи - Прим. А.А.Мельнікава] подобает слава и поклонение, честь и держава с Отцем и Святым Духом и ныне и присно и в веки веком. Аминь.

________________________________

"Сборник" XVI в. Библ. АН России. Доброхот. № 39. Л. 1 - 15об.

ПОВЕСТЬ КИРИЛА МНОГОГРЕШНАГО МНИХА К ВАСИЛИЮ, ИГУМЕНУ ПЕЧЕРЬСКОМУ, О БЕЛОРИЗЦЕ ЧЕЛОВЕЦЕ, О МНИШЬСТВЕ //304об. И О ДУШИ И О ПОКАЯНИИ

В некоем граде беаше царь зело кроток, благ же и милостив, добре смотряше о своих людех; сим же точию единем не бе разумен, понеже не бояшеся бества, ни ратнаго держаще оружиа, не мневше иному нань въстати. Имеяше при собе царь тъй многы другы и светникы и едину дщерь мужеумну, в техже съветницех един бе мудр и благоразумен, иже скорбяше присно о небоязньстве цареве, обаче искаше времене потребна, како бы ему глаголати к царю, дабы ся готовил на рать. В един же час нощи внезапу //305 бысть молва по граду велика, и рече царь к своим светником: Изидем и походим по граду; некли обретшс имем творящаго в нашем граде мятежь, зело бо в велице есмь ныне страсе. И шедше же и всюде походивше, ничтоже обретоша, но точию движение граду. Всем же светником в унынии бывшим и о сем недомыслящимся, он благоразумный светник поем царя и с дщерью его, к велицей приведе горе, имущи многоразличная оружиа, в нейже узреста светлую зарю оконцем от пещеры исходяща. И к тому приникнув оконцю, //305об. видеста внутрь вертьпа жилище, в немже седяще мужь в последний нищете жива, худыми оболчен рубы, емуже приседяще искрь своя жена, слажьша брашна поющу песнь. Предстояшеть же ему некто красен и высок на твердом камени, питая и вино черпля, и мужю чашю приемшю, тогда похвалами венчаху многою радостию святою мужа. Сии же вся соглядав царь, призва своя другы и рече к ним: Оле чюдо, мои друзи! видите, како худое се и потаеное житие честнее нашея державы веселится и светлее внишних внутрьняя //306 сияють!

Сде бо слово поставлеше и на предреченаа възвратимся, разрешающии притче съуз; успеша ради простейших, а быстрии умом преже сказаниа си ведят. Последок же слова подробну речем.

Град убо есть, братье, съставление человечьскаго телесе, емуже Творець и Зижитель — Бог.

А иже в нем людие — чювьственыя уды нарицаем: слух, видение, обоняние, вкушение, осязание и нижняя теплоты сверепьство.

Царь же есть ум, обладаай всем телом. Зело же есть благ и кроток и милостив — о своем бо телеси паче всего печется, тому ища потребных и крася его одежами. Добре же смотрить своим людем — от слышаниа бо добра высится, а от зла мятется; очима же похоть створить, а обонянию желание исполнить; устом же обьядение дает, а рукама несытьство бранья богатьству створит; с теми и нижняго сверепьства свершаеть похоть.

Чим же единем неразумен? — Понеже не тако печашеся о души, якоже о телеси: ни помышляет бо бесконечныя зле сде живущим мукы, ни готовится на будущаго века праведником уготованую жизнь. Того ради и Павел глаголет: //307 Мир весь в зле лежить. Не слышить бо Соломона глаголюща: Блажены, иже обрете мудрость, и смертьн [вариант: смыслен], иже уведа смысл житья сего.

Светницы же суть и друзи житийскиа мысли, не дадуще ны о смерти помыслити.

Бегство бо книгы смерть нарицають, ибо и Христос жидом глаголаше: Да не будет бегство ваше зиме, ни в суботу, сиречь: да не достигнет тебе смерть в гресех, ни в праздник бес покаяниа.

Ратьнаа оружия пост, молитва, въздержание и телесную чистоту апостол нарицаеть: Възмете бо, рече, вся оружиа Божиа да възможете противитися в день лют! //307об. Но сего мирьстии человеци не любят держати.

Нощь же есть света сего мятежь, в немже акы в тме мятутся, друг чрес друга в погибель сами себе пореваем, ли яко сном одержыми, не въздержимся от греха.

А еже в един час бысть велика по граду молва — то есть нечаемая на человека напасть: ли недуг, ли потоп, ли язва, ли к власти обида зла. То бо тогда все житийскыя остануть мысли и иступление бываеть уму, — еже есть царев страх и шествие по граду и необретение творящаго плищь, никоторая же бо хитрость пременити възможет //308 Божиа попущениа, точию святых мужь молитва. Истина же се есть: Петра бо от церкве зань бывающия молитва от темници и вериг избави. Слышим же и Павла к римляном глаголюща: Паче силы оскорбеша ны в Асии, яко не надеятися нам и живота, но Бог избави ны вашими молитвами! Аще ли не будут достойни живии о вещи Бога умолити, призываем препочившая святыя. Сведетель же сему Исаиа, иже смерть Иезекии от Бога подав и пакы не токмо сдравие тому же Иезекыи принесе от Бога, нъ и граду избавление; Но се ти, рече, дарова Бог Давыда ради отрока твоего. //308об. Такоже и трие отроци моляхуся глаголюще: Авраама ради възлюбленаго и Исака раба Ти и Израиля святаго Твоего, — того ради и в пламени неизгоревше изидоша.

Да се есть подобно время оного благоразумнаго светника, еже не искати чаров, ни волхвов, но верою глаголати: Благо мне, яко смирил мя еси, да научюся оправданием Твоим! И пакы: Яко годе бысть Господеви, тако и бысть! Господь живить и мертвить, богатит и убожить, смиряеть и высить и от болезни устрабляеть немощна.

Гора же есть манастырь, в немже духовнаа оружиа на противнаго дьявола си суть: по- //309 ст, молитва, слезы, въздержание, чистота, любы, смеренье, покорение люботрудне и несъние.

К той горе благоразумный съветник приводить царя — сиречь печаль ума к манастырю: то бо есть гора Божиа, гора тучна, гора усырена, гора, юже благоволи Бог жити в ней. Придох же к горе — се есть обетное к Богу слово: Обещайте бо ся, рече, и въздадите! И пакы: Въздам Тобе обеты Моя, иже изрекосте устне мои и глаголаша уста моя в печали моей.

Приничение же к оконцю — еже слышати душеполезное учение: Сказание бо, рече, словес Твоих просвещаеть и разум даеть //309об. младенцем. Пишеть бо ся: Възведох очи мои в горы Твоя, отнюдуже приде помощь мне. Яко ту рещи с Давыдом: Господь съхранить вхожение мое и исхожение отселе и до века. Никого же бо Христос к покаянию нужею влечеть, но вещми разум дает, да от тех познавшим Его и в Небесное вводить Царство.

Пещера же глубокаа церкы есть манастырска пророкы дозрима, апостолы устроена, еваггелисты украшена.

А иже от нея светлая сияющи заря — богохваленаа жертва, немолчьная алилугия псаломьстими гласи: В нощех бо, рече, въздежете рукы ваша в святая и благословите Господа! И пакы: //310 Полунощи въстах исповедатися Тебе; тако, рече, да просветится свет ваш пред человекы, яко да узрять дела добрая ваша и прославять Отца вашего, Иже есть на небесех!

Внутрений же вертеп устав глаголю апостольская преданиа келейнаго житья, в немже никтоже своевольство имать, но всем вся обьща суть. Суть бо вси под игуменом, акы уди телеснии под единою главою съдръжыми духовными жилами.

А иже в нем седяй мужь в последний жива нищете, се есть весь чернечьскый чин. Седение же безмолвие являеть: Рех бо, рече, схраню пути моя, да не съгрешу язы- //310об. ком моим; онемех и смирихся, и умолчах от благ. И пакы: Аз же глух и не слышах, и акы нем не отверзох уст своих, — и прочаа подобна сим.

А последняя нищеты житье сиречь от белоризець осуженье, досады и укоризны, хулы и посмеси, опытаниа, не бо тако мнят, яко Богу работающа мнихы, но аки прелестникы и свою погублеша душю. Того ради Павел глаголаше: Бог ны апостолы последняя яви, акы на смертникы, яко позору быхом всему миру. И паки: Уроди мы Христа ради, вы же мудри о Христе.

А иже худыми оболчен рубы — се бес притчи слово: ту бо яриг и власяница и су- //311 княныя одежа и от козьих кожь оболченья. Всяка бо добра риза и плотьское украшенье чюжь есть игумена и всего мнишьскаго уставленья: Иже бо, рече Христос, мякъкая носять, си в домех царскых суть. Но суть целомудрием оболчени и правдою поясани, смерением украшени.

Приседящиа же искрь своя ему жена — се есть неотлучающаася смертнаа памят. Сию сладкую поющи песнь — глас радости и веселиа в селех праведник: Праведници в векы живут и мзда им от Господа; смерть праведнику покой; богатьство, иже мимотечеть, не прилагайте сердца; не помилую бо всех творя- //311об. щих беззаконие; того ради, рече, забых снести хлеб мой от гласа въздыханиа моего!

Предстояй же ему он красный — Христос есть, близ бо Господь всех боящихся Его; хотение их исполнить и молитву их услышить. Се красен добротою паче сын человеческ, щедр бо есть и милостив Господь. Не придох бо, рече, да Ми послужать, но да послужу и положу душу Свою избавление за многы.

Зело же высок есть, понеже Сын сый Божий, съшедый с небесе и воплотися нашего ради спасениа, и бысть человек да человека обожить.

Стоить же на твердем нашея веры камени. О сем бо Амос, Иеремея послушьству- //312 ета. Он глаголет: И се человек высок стояше на твердем камени, призывая страны и питаа своя. Иеремия же рече: Человек есть, и кто увесть и? но да явятся странам, яко и есть.

Питаяй же и черпляй вино — всем верным подаваяй честное Свое тело в оставление грехов и святую Свою кровь в живот вечный.

Възбраняющия же другы своя — комуждо свесть. Въпиеть бо Павел, иже: Кто ясть хлеб сь и пиеть чашю Господню, недостоин сый, грех собе ясть и пиеть, повинен есть телу и крови Господни.

А егда прииметь мужь чашю, похвалами венчають его — се //312об. разумей очистившихся покаянием и приимших животворную чашю в освящение души и в очищение телеси. Тогда бо Бог Отец хвалить пророческими гласы: Блажени, имже отпущена суть безакониа, имже прикрышася греси, имже не вменить Господь греха! И пакы: Веселитеся о Господе и радуйтеся, праведнии! Венчаеть же Святый Дух, яко почиваеть на честных причастньцех, уже бо я обрете достойны Собе ссуды и вселися в ня, измыша бо храм Его слезами, постлаша люботрудными молитвами, украсиша добродетелию, накадиша бо жерелеными [вариант: жертвьными] въздыхании. Мно- //313 гою же радостию Христос с святыми аггелы веселится: Радость бо, рече, бываеть на небеси о едином грешници кающимся; радуйте бо ся, рече, со Мною, яко обретох погыбшюю драхму!

Се же вся согладав царь, призва своя другы. Съгляданье — помышление есть благо, еже остатися от греховных обычай и научитися благоугодных, собрати же сего суетнаго житиа помыслы и окаяти сего светлостнаго [вариант: света лестнаго] красная и речи Соломоньскы: О суетие, суетою буди! Всяк бо человек сих ради нудяй себе трудом, изножай себе в погыбель и чудится аггельскому богонабдимому и- //313об. ночьскому житию, и вся оставляеть, и ту саму телесную печаль, и тщится всяк человек по искушении телесных вещий о души попещися.

Сим же сице сказаном и прочее без разума да не останеть. Не бо мы сей повести творци есмы, но от богодухновеных вземлюще писаний, акы от постава уимице, и сия презък плетем, акы детищь пред вашим отчьством немующе, вашю веселием любовь.

А се похвала мнихом и познание Христовы благодати и вшествие в вертеп, сиречь пострищися, — от пророческых писаний скажем.//314.

Рече царь: Како худое ее и потаеное житие честнее нашея державы веселится и светлее внутрьняя внешних сиають? Се же есть умных человек помяновение души. Не спасеть бо ся, рече, царь многою силою, и всяка власть к греху причтена есть. А торгующим, егда купля сдеется, ту и грех свершится и ины вся житийскыя вещи: в нищете же и в богатстве спону имуть к спасению: семью и дом. Того ради глаголет апостол: Оженивыйся печется женою, како угодити жене, а неоженивыся печется, како угодити Богови; она печаль ведеть в муку, а си пе- //314об. чаль в вечную жизнь.

Худое же и потаеное житье мнишство являеть, на смирение бо и на покорение кождо вне грядеть, токмо о Бозе веселится, честь по своим трудом от Бога и человек въсприемля. И древо бо не възраста деля высока, ни листвиа, но плода деля хвалимо бывает; тако и мнихы не манастырь славныи творить, но добрадетсль мнишьскаа манастырь славен творить. И се яве есть от Феодоса игумена Печьрскаго, иже в Киеве, понеже нелицемерно мнишьствова, възлюбив Бога и братью свою, акы своя уды, тем же и Бог възлюби и, и место его ради //315 прослави паче всех иже манастырь в Руси.

Сиа внутреняя добродетели святых калугер житиа паче мирское власти сияють чюдесы, и тех ради мирьскыа велможи свою покланяють мнихом главу, яко Божиим угодником достойную въздающе честь, по Господню словеси глаголющю: Приемляй праведника во имя праведниче мьзду праведничю приемлеть и прочая. И пакы: Приемляй, рече, вас Мене приемлеть. И прирече: не бойся, малое стадо, яко благоволи Отец Мой дати вам Царствие Небесное; иже бо оставить, рече, отца и матерь и имение имени Моего ради, стократицею приимет //315об. и жизнь наследить. Сих ради обещаний всяк крестьянин нудится понести ярем Господень, рекше иношьскый чин на ся взяти.

Да речем уже оного царя вход. Поем бо свою единородную дщерь, внутрь вертьпа входить. Дщерь же уму разумей душю: умородителна бо есть и обьщена аггельскым чином. Творяй, рече, аггелы своя духы и слугы своя — огнь полящь. Дух бо на всю добродетель бодр и скор на теченье богоугоднаго подвига, но плоть немощна. Обаче вся служба аггельская и мнишьская одино есть: они бо и си, всю свою оставльшс волю, Божию и игу- //316 меню повинуются повелению, имже Сам Господь мьздовъздатель противу трудом бысть: Иже бо, рече, душю свою погубит Моих ради словес, обрящет бо ю в вечном животе.

То уже сам глаголет к внутрьстоящему: Отверзи мне врата правды, и вшед в ня исповемся Господеви, яко взискающии Его не лишатся от всякого блага. Отвеща предстояй он: Си врата Господня; праведнии внидуть в ня, и Господь не лишить добра ходящих незлобою зде. Ты же кто еси, тако дръзающий? И та рече: Дщи убо есмь царева, и приведутся царю девы по ней. Отвеща стояй: Слыши, дщи, и вижь, и приклони ухо твое, и забуди //316об. люди твоя, и дом отца твоего, и въсхощет царь доброте твоей, аще и черна еси. — Сиречь, дондеже бо человек не останется телесных похоти и житийскых печали, душа его с Богом не смирится; не можете бо Богу работати и Мамоне. Черность же есть грех. Смагла, рече, есмь, но добра; смагла убо первых деля съгрешений и яже в миру житийскых вещи; добра же бых скораго ради покаяниа. Черна есмь миродержителнаго сана властию; добра есмь мнишьскаго ради пострижениа. Вся слава дщере цареве — внутрьуду. Ты же кто еси? Аз есмь, рече, пастух овцам. Оставивы, рече, на горах 90 и 9 //317 и снидох погибъшие сде ища; но аще мене послушаеши, лицу твоему помолятся богатии людье. Отвеща: Обещах Ти ся, овца бо есмь словеснаго Ти стада, и к Тобе прибегох, доброму пастырю; взищи мене заблужьшаго и целуй мя от лобзаниа уст его.

Вижь порядниих словес слугу, и не мните мене кроме святых книг сих вземлюща.

Аще быхом обет постризаниа нашего схранили, то не токмо грехов оцещение, но и земную честь приали быхом, якоже святии ваши отци и чюдотворци, имже цари и князи падше поклонишася, — но и в Небеснем Царствии видели быхом Божие ли- //317об. це; — сиречь елико быхом в молитве просили и скоро сугубо прияли.

Обаче и еще стоящаго въпрашаеть глаголющи: Аще пастух еси, не остави мене, ни отступи от мене, яко скорбь близ; слышах бо Исаию о тебе глаголюща: И Ть, яко пастух, упасеть стадо Свое, и в руце Свои сбереть агньца, и в утробе имущая утешить. Се новоосвященных мних аще не словеса, то мысли. Держаще бо ся обета и слабости не сдолевше святыне просят, писаниа почитающе, бес подвига велят Богови спасти я; не бо разумеем Павла глаголюща: Бес подвига никтоже венчается, никтоже бо спя победит, ни //318 ленийся спасти может. Обаче нераскаянни суть Божии дарове; послух бо сих на небесах верен — Господь наш Исус Христос, Иже туне спасаеть мнишьскый чин; Сам бо за ны молится глаголя: Отче святый, не о мире молю, но о сих, иже дал еси Мне; съблюди а во имя Твое: да идеже буду и Аз, ту и си будуть с Мною; никтоже от них погибнет, токмо сын погыбелный.

Си же имущи обещанья, о мниси, подвизайтеся! Подобает же и в нынешних апостолех Июде быти, но кождо вас съблюдеть себе: не продадим Божия слова на лъжи, крадуще, грабяще, обидяще, на игумена злое мы- //318об. слящи, клятвою ся оправдающе, ниже распнем Христа, недостойне приступающе, по апостолу, яко Божия слугы, в трьпении мнозе свое сдевающе спасение. Якоже бо кони, текуще в стаде, друг другу ретящеся, преспевають, — тако и вы ревнуйте святых отец подвигу и друг друга преспевайте в алкании, и в бдении, и в молитвах, и в служебних трудех, да не раслабевше обьядением, и пьянством, и плотскыми похотми да не в адьстей устанем пустыни и тамо геоньскыми растерзани бу- //319 дем зверми, и яко толща земная телеса наша просядутся, огнем мучима, и расыплются кости наша при аде. Но вперите си разумнеи криле и възлетим от губящаго ны греха. Възмем от книг пищу и рьцем с Давыдом: Коль сладка гортани моему словеса Твоя, паче меду устом моим!

Си же глаголя, не величаюся, но себе теша, от неразумиа глаголю. Человек бо есмь грешен, кален уд имея мой язык. Аще бо в глубину Божиих книг внидох, но грубом языком ума просты изношю глас. Бог же мира многою милостию да створит вашему отчьству сему прияту бы- //319об. ти сказанию, и Тъй ваша съблюдет душа чиста и телеса бескверньна, и житие непорочно, девьство неокрадомо, непретыкающееся чернечьство, несъблазньну веру, непременно о души попеченье, братолюбье нелицемерно и вашь покой украси знамение, и небесныя отверзеть двери, и огненое отложить оружье, и в горний ведеть в Иерусалим, и десницею венчаеть, и трапезу представить, и чашу веселиа и радости подасть.

Мене же, аки пса, молю вы, не презрите, но и сде в святых помянете молитвах, и тоя святыя трапезы крупице поверзете, еяже буди всем //320 крестьяном сподобитися жизни о Христе Исусе Господе нашем, Емуже слава с Отцем и с Святым Духом и ныне.

___________________________________________

Росс. нац. библ. Собрание Титова. 522. Л. 304—320.

ПОСЛАНИЕ НЕКОЕГО СТАРЦА К БОГОБЛАЖЕННОМУ ВАСИЛИЮ АРХИМАНДРИТУ О СХИМЕ

Поклоняние от моего недостоиньства к твоему преподобьству, милый мой господине, всечестный богоблаженый Василие, воистинну славный, великый в[о] всем мире архимандрите, отче отцем, велики во всем мире, вождь вышняго пути, тонкоразумноя душе, умом вся богодухновенныя книгы пронорящи, вторый печерьскый игумене Феодосие, аще не именем, но делы и верою равен сый оного святости, но и паче того провозвеличил тя есть Христос яко угоднаго Своего раба и Своеа Матери слугу: он бо начен церковь познан бысть Богом и к Нему отъидет бо юже [пав.б.: отъиде, тобою же] не точию церковь бо содела, но и стены каменыа около святыа Лавры созда, идеже святых жилища и преподобных дворы, беспрестанно поющих Бога в Троици, славящих во двою существу воплощьшася, от Духа Свята и Мариа девица вочеловечьшася, за грехы наша пострада в распятие и смерть.

А о немъже, господине, прислал ми еси грамоту, аки прошая великаго и святаго скимнаго образа, вънже издавъна облещися желаеши, но не яко неведы ищеши, но пытаеши моея нищеты, аки достоить учителю ученика и господину раба. Аз же не о собе скажю ти о святей скиме, но от святых книг, паче же от Самаго Христа, притчю извещю оного человека о создавшем на камени храм свой и создавшем на камени свою хлевину. Не песка разумей, ни здание храмины, ни рек, ни дождя, ни лютых ветр преражающих създаниа. Да слышить мой господин Василие о святей скиме, юже хощеши приати.

Ты создал стены каменьны около всего печерьскаго монастыря на тверде основе высокы и красъны, и перьвое же изобрел еси свое богатьство, такоже огнем и плиту устроил еси, водою же и калом свершиль еси. Но оно святое создание не тако, еже съделатися в храм Богу, вселитися в ню Святому Духу. Но оно святое хощеши ли створити обитель Святей Троици, мыслиши положити основу, сиречь обновитися святую скимою, разсчести си имение, рекши прежь помолися Богу и сед напиши свой обет смыслене, что хощеши до смерти хранити: в недели или в месяци день или два хощеши поститися от брашна или от питиа, или обнощевати в молитве, или не беседовати с человекы, или из манастыря в обетный день не исходити, или милостыню ручную творити, или всяко прошение к человеком подати, или гнев отдати. Да аще ты створиши свое первое, а Бог готов отдати Свое; аще ли хощеши взяти без расмотрениа аналаву и куколь, зря инех, ожь точию величаются скимою, — аще бо и тружаются в посте и в молитвах, но понеже не имуть тверда основание, да ни дождем, ни ветром, но своим злоумием тех падает храмина; овогда же от всякого воздержатся, овогда же слабо живут, глаголют: Праздник бо есть, или дружца деля ясти хощу или пити, или крестьяне звали, а паки заговею, се есть един зижя, а другый разоряа, или омывая от мертвеца и пакы прикасаяся ему, мнози бо, рече, усушиша тело от поста и от воздержаниа, а уста их въсмердеша, но понеже без расмотрениа си творяху, тем далече быша от Бога. И Лот бо не соблазнися в Содомех со беззаконники, а в Сигоре с дщерми осквернися, а ты в белцех и во иночестве Богу угодив и душеполезно пожив, а в калугерьское иго иды, апостольскы, вся задняа забуди, а на преднея простирайся. Земную печаль акы поделие имей, а о небесней жизни всегда печися по правилу твоего обета. Не яко Лот пианьством печали уставити повосхощи, но Христово житие со опьстанием подражай. Господь бо обеща Себе всем апостолом подаст: а ты всей братии обьща сътвори, обьще ти будеть Бог, и обще любы, обще дание, обще веньци, да во мнозех телесех едину створи душю, всех [...] мъзду приимеши.

Се аз во твой раль сею семена, еже суть о боготруды словеса. Ты смотри, да и плевелы зде будут; злое же семя искорени, исторгъни, а мене накажи; аще ли есть пшеница, абы не при пути, ни на камяни, ни в тернии сеял. Обаче аще причасти [пав.б.: три части] погибнуть, но надеюся от единоа ты можеши во сто приплодити, Богу ти помогающу, аще с Ним о скиме общенути съвещаеши.

Все бо веси святых отец житие, яко с обетом подвизавши венчашася, ничтоже бо тех храмины не возможешь их порушити: ни честь, ни сан, ни богатьство, ни слава, ни скръбь, ни нужда, ни гонение, ни леность, ни сам диавол всяческии тех приразуа, ни возможна обетнаго свести дела, но акы медяна секира от суха древа сама ся кажить, диавол бо собе зол, а твердии верою многою венъца искушениа собе приобретають, а слабый ни диаволом падаеть, но своим зломысльством, подвершая добраго начатка дело, аки песок, злыми мысльми.

Тебе же хотящу здати духовную храмину, на вере оснуй и зежди надежю, любовь, аки плиту; смеси целомудрием, акы водою, телесе твоего кал, да возвысится, акы храм, душа твоея. Подпри ю, акы столпом, Божиею помощью, да аще снидеть различными вещьми дождь и рекы, пребедет, аки наковальна, противу добрым же и злым человеком. Введи в храмину матерь и жену, еже есть кротость и смирение, кротость бо угожает Богу, а смирение на небеса возводить; оградите же ся отвсюду татей ради, рекше страхом Божиим и молитвою, и стража пристави любомудриа ума, да аще случить ти ся во граде быти, или в народе, или в веси, или на торгу, не дай же сердцу в тех поплевати мысльми, но акы внутрьуду келиа, поучаяся о разлучении душа от тела. Се пребудеши внемля себе, акы в пустыню отшед. Аще си с Божиею помощию управиши, да не надмешися величаниемь, инех оглаголивая. И тогда свободным оком к умному возрев свету и узриши Отца светом, яко Иов, возглаголеши: Прежь убо слухом слышахом, ныне же око мое видить Тя, не телесное, но духовное; в свете лица Твоего, Господи, поидем и о имени Твоем възрадуемся в векы.

Бог же, господине, утвердит твою душю не соступити обета: Обещайте бо, рече, и воздадите. И паче: Луче не обещатися, нежели обещавшися не воздати. Тако Апостол осужает ны, глаголя: Почто единаче не до крове противистеся к греху подвизающися?

О всем же сем, мой милый господине и благодетелю, не прогневайся, не возненавиди, не ума, но от безумиа сиа написавшу, но раздрав поверзи, моа бо словеса, аки поучина, сама ся деруть, не бо могуть к ползе съльнути, не имущи власы [пав. б.: влагы] Святаго Духа, не бо, яко учитель отьческы, и стройно заповедаю, но всею простотою беседую с тобою, твоей любви и моа отвръзающи уста. Ты же избери, что хощеши, писания, еже ти будет лутче, вем бо о всем богоразумно, милый мой господине, честный Василий.

Аз же, аще грешен есмь, молю Господеви здраву ти быти, мирно долгоденствующу, строящу дом святыя Богородица и служащу Богу достойно, и всегда достигнеши мзду с всеми святыми праотцы и отцы с апостолы и патриархы и преподобными игумены, молитвами пресвятыя Богородица и святаго Феодосия, егоже бысть сын и настолник о Христе Иисусе о Господе нашем.

_______________________________________

Публикация по изданию: Прибавления к изданию творений святых отцев в русском переводе. М., 1851. Ч. 10. С. 346—357. (Из рукописи сборника 16 в. Синодальный сбор, 935. Л. 11—18.)

КИРИЛА МНОГОГРЕШНАГО МНИХА ПРИТЧА О ЧЕЛОВЕЧЬСТЕЙ ДУШИ, И О ТЕЛЕСИ, И О ПРЕСТУПЛЕНИИ БОЖИИХ ЗАПОВЕДИЙ, И О ВЪСКРЕСЕНИИ ТЕЛЕС ЧЕЛОВЕЧЬ, И О БУДУЩЕМ СУДЕ, И О МУЦЕ. ГОСПОДИ, БЛАГОСЛОВИ!

Добро убо, братье, и зело полезно еже разумевати нам божественых писаний ученье: се и целомудрену душю стваряет, и к смирению прилагает ум, и сердце на реть добродетели възъстряет, и всего благодарьствена створяет человека, и на небеса к горним обещанием //320об. мысль приводит, и к духовным трудом тело укрепляет, и преобидити сего настоящаго житья, славы и богатства творит, и всея житийскыя света сего печали отводит. Того ради молю вы: потщитеся прилежно почитати святыя книгы, да ся Божиих словес насытившеся и будущаго века неизреченных благ жадание стяжете; она бо аще и невидима суть, но вечна и конца не имуща, тверда же и недвижима. Да не просто предкнем языком пишемых глаголюще, но с расмотрением внемлющс, потщимся делом створити а. Сладъко медве- //321 ный сът и добро сахар, обоего же добрее книжный разум: сия убо суть скровища вечныя жизни. Аще бо кто обрел бы земное скровище сде, то не бы нань дерзнул, но един точию бесценный камень взял бы от него, да уже бес печали питается, яко до конца имы богатьство. Тако обретый божественых книг скровище — пророчьскых же и псаломьскых и апостольскых и Самого Спаса Христа спасеных словес истинный с рассужением разум, — уже не собе единому есть на спасение, но инем многым послушающим его. Сему же случится еваггельская притча глаголющи: всяк книжник, //321об. научися Царствию Небесному, подобен есть мужю домовиту, иже износит от скровищь своих ветхаа и новаа; аще ли тщеславием сказает болшим угажая, а многы меншая презрит, буестию крыя Господню мнасу, не дадый жизньным торжником да удвоит царское сребро, еже суть человечьскыя душа; и видев Господь гордый его ум, возмет Свой от него талант, Сам бо презоривым противится, смеренным же дает благодать. Аще бо мира сего властели, в житийскых тружающеся вещех человеци прилежно требуют книжнаго почитаниа, колми паче нам подобает //322 учитися в них и всем сердцем взискати сведениа словес Божиих, о спасении душь наших писаны. Но тружается мой мутный ум, худ разум имея, не могый порядних словес по чину глаголати, но акы слеп стрелец смеху бывает, не могый намеренаго улучити. Но не буди нам особь подвигнути ненаказаный язык, от божественых вземлюще писаний с многою боязнью еваггельскых касаемся беседовати словес, преводне Господню притчю сказающе, юже Матфей Церкви предасть.

Начало. Рече Господь: Человек некый //322об. домовит беаше, иже насади виноград и остени его оплотом, и ископа точило, и остави вход, и створи врата, но не затвори входа. И отходя в свой дом, "Кого, — рече, — оставлю стража моему винограду? Аще оставлю от служащих ми раб, то, сведуще мою кротость, истеряют благая моя. Но сице створю: приставлю к вратом хромца и с ним слепца; да аще кто от враг моих въсхощет окрасти моя винограды, то хромець убо видит, а слепець чюет. Аще же въсхощет от сею внити кто в виноград, хромець убо не имает ногу дойти внутрьних, слепець же //323 аще и поидет, то, заблудив, в пропастех убиется".

И посадив я у врат, даст има власть на всех внешних, пищу же и одение нетрудну съготова. "Точью, — рече, — внутрьних без моего не коснетася повелениа!" И тако отиде, поведев има свой по времени приход и тогда мзду стражбы ради обеща има взяти, попрети же има и мучением, аще его преступят заповедь.

Си же до зде оставльше, пакы въсприимем еваггельскос слово, плод устен на умней трапезе вашего ока предлагающе.

Сказ. Человек есть домовит Бог Всевидець и Вседръжытель, створи- //323об. вый вся словом видимая же и невидимая. Домовит же ся именует, як не один дом имат по Писанию, глаголет бо пророк: Твоя суть небеса и Твоя есть земля; вселенная и конець ея Ты основа. И пакы: Небо Ми престол, а земля подножию ногама Моима. Моисей же пол вод под тварию сказует, а Давид превыше небес воду поведает. Но смотрите в Писаниа, разумейте: везде сы домы Божия, не токмо в твари, но и в человецех. Вселю бо Ся в ня, рече, якоже и бысть: сниде бо и вселися в плоть человечю и възнесе ю от земля на небеса, да престол есть Божий человеча плоть, //324 на вышнем же небеси престол Его стоит.

А еже насади виноград — рай глаголет, Того бо то есть дело. Пишет бо ся: И насади Бог рай в Едеме. А иже остени его, рече, оплотом — Своим страхом. Страхом бо Его, — рече пророк, — движится земля, раседается камение, животная трепещет, горы курятся, море и с сущими в нем повинуется, светила раболепно служат, облаци и вся въздушная тварь повелениа творят. Стена бо — закон ся речет. Закон же всему заповедь Божиа есть, предел бо, рече, положи, егоже не прейдут, ни обратятся. Постави же //324об. вход — сиречь сведениа разум, вся бо тварь не преступает Божия повелениа, вся бо, рече, от Тебе чают, даси им пищю в время. Пища же не брашно речеться, но слово Божие, имже питается тварь. Глаголет бо Моисий: не о хлебе едином жив будет человек, но о всяком глаголе, исходящим из уст Божиих. Незатвореная же врата — дивныя твари Божия устроение и над теми Божиа сущьства познание. О твари бо, рече, Творца разумей: не качьство, но величьство и силу, славу же и благодать, юже творит, угажая всем вышним и нижним, видимым же и невидимым. //325 Аще бо и нарицаеть его Христос человеком, то не образом, не притчею: ни единого бо подобия Божиа имеет человек. Не сумнит бо ся Писание аггелы человекы нарицати, но словом, а не подобием. Аще бо блазнятся и етери, слышаще Моисия глаголюща: Рече Бог "Створим человека по образу Нашему и подобию", и прилагают к бесплотному тело, не имуще стройна разума, и есть си ересь и доныня человекообразном глаголющим Бога, иже никакоже описается, ни меры качьству имат.

Но си оставлю, о первем възглаголю.

И отходя в свой дом, "Кого, — рече, — оставлю стрещи моего труда?" //325об. Сия съвпраша Отца и Сына и Святаго Духа не о твари, но о владущем тварию, сиречь о человеце, емуже въсхоте предати землю и всяко дыхание поработати, не аггелом бо покори вселенную и прочая. Оставлю, рече, у врат хромца и с ним слепца. Что есть хромець или слепець? Хромець есть тело человече, а слепець душа. Преже Бог създа тело Адамле безъдушне, потом душю. По създании бо тела, глаголет Писание: И дуну на лице его дух животен. Тем же тело без душа мертво есть и не наречется человек, нъ труп. Смотри сде и разумей от Бытийскых книг. Створи Бог тело //326 вне рая и внесе е в Едем, а не в рай. Едем же речется — пища. Якоже се кто бы на пир зовый преже уготовает обилную пищу, тий потом приведет званаго, тако и Бог преже уготова ему жилище Едем, а не рай. Рай бо место есть свято, якоже се церковный олтарь. Церквы бо всем входна, та бо ны есть мати, поражающи вся крещением и питающи живущиа в ней нетрудно, одевающи же и веселящи вся вселшаяся в ню. Глаголет бо пророк: Се работающии Церкви ясти имут и насытятся. И пакы: О чада Церковная, съсущи от сесьцю ея тук и масть, помажете веселием //326об. главы своя! И Давид: Упиются, — рече, — от обилиа Дому Твоего, и потоком пища Твоея напоиши я. И пакы о одежи священник и оболочений мних: Иереи Твои, Господи, облекутся в правду, и прокая. Мниху же: Съодел мя еси нужныя и нелепыя одежа и оболк мя в спасение и препоясал мя еси веселием. Въспойте же, — рече, — Господеви песнь нову, хвалениа в церквах преподобными Его! И се яве есть: от клиросник епископа и от манастырю мних. Вижь, яко епископия и манастырь Едем есть, сиречь нетруднаа жизнь; олтарь же свят, сиречь Едемьскый рай, неудобь входим, аще и врата неза- //327 ключена имат. Тако бе посажен он хромець с слепцем у врат стрещи внутрьних, якоже приставлени суть патриарси, архиепископи, архимандрити межю церковью и олтарем стрещи святых тайн от враг Христов, сиречь от еретик и зловерных искусник и нечестивых грехолюбець, иноверных скверник.

Послушайте же со вниманием, да по ряду беседу скажем, и вы со вниманием усмотрите. Аще бо и мутен имею мой ум и язык груб, но ваших надеяся молитвах, прошу дара слову. Аще и недостоин есмь о сих глаголати, но ползы ради послу- //327об. шающих пишем. Аще ли кто зла слуха имат, то не ищет, что бы ему на ползу обрести, но зазирает, чим же бы нас потязал и укарял.

О помыслех греховнем. Седящима же има етеро время, рече слепець к хромцю: "Что убо благоухание изъутрь врат полетает мя?" Отвеща хромець: "Многа благаа наю господина внутрь суть, ихже вкушениа — неизреченна сладость. Но понеже премудр есть наю господин, посади сде тебе слепа, мене же хромаго, и не можеве никакоже тех дойти и насытитися благинь". Отвещав, глагола слепець: "То почто давно не си ми пове- //328 дал, да быхове не жадала, но к сим даным нам в область и она особь въсхытиве? Аще бо аз слеп есмь, но имам нозе и силен есмь, могый носити тебе же и бремя". Вижь душевное бремя грех: того ради глаголет пророк, яко бремя тяшко отягтеся на мне. Рече же слепець: "Возми убо кошь и всяди на мя, и аз тя ношю, ты же показай ми путь, и вся благая господина наю объемлеве, не мню бо, яко придет семо наю господин!" Се помышлениа суть ищущих не о Бозе света сего санов и о телеси такмо пекущихся, ни чающих ответа о делех въздати, но акы суе- //328об. тную пара свою душю в ветр полагающи. Того ради глаголет Исаиа: Зависть приимут люди ненаказаныя; завидим бо мы, грешнии, чьсти и славе праведных, а не преже творим делес их. "Аще ли, — рече, — придет наю семо господин, укрыется от него наю дело: аще бо мене въспросит о татьбе, аз реку: Ты веси, господине, яко слеп есмь; аще ли тебе впросит, ты рци, яко аз хром есмь и не могу тамо дойти. И тако премудруеве наю господина и приимове мъзду наю стражбы". Въсед же хромець на слепца и, дошедша, окрадоша вся внутрьняя господина своего благая.

Нъ не во- //329 юйте, братье, на мою грубость, нелеп образ писания поставляющи ми! Якоже бо и по ногу вязящи птица несть мощно на аерьскую възлетети высоту, тако и мне, в телесных вязящему похотех, невъзможно о духовных беседовати: не солнут бо ся грешнича словеса не иму влагы Святаго Духа.

Обаче на предреченая възвратимся, разрешающа притча съуз.

Тълк. Седящима же има долго время, рече. Что есть долго время? — Бестрашие Божия заповеди и о телеси печение, нероженье же о своей души. Никто же бо, страх Божий имея, в плотьскых прельстится, ни- //329об. кто же правоверен чрес закон священничьскаго ищет взяти сана, никто же смерти чает и по смерти пакы въскресениа, ти в злых пребывают делех. Но пакы то же реку разума делма.

Рече слепець к хромцю: "Что убо благоуханье изнутрь полетает мя?" и прокая. Се надъмение Адамова высокомыслья, яко, всеми обладая земными животными, морем же и в нем сущею тварию и в Едеме благих насыщаяся, преже освященья на святая дерзнув, из Едема бо вниде в рай. Сего ради Писанье глаголет: Изгна Бог Адама из рая и осуди его делати землю, от неяже //330 взят бысть. Вижь, яко не тамо повелено ему бе жити, отнележе его изгна. Тако бо вниде, якоже се церковник недостоин — недостоин ерейства и, утаив свой грех, не брежет о Божии законе, но имене деля высока и славныа житья на епископскый, дерзнув, взиде сан.

Слугы [Так у рукапісе, павінна быць: слогы. – Заўвага А.А. Мельнікава.] подобны. Того ради смертию осуди Адама, понеже коснуся древа разуменья добра и зла. Древо бо разуменья зла и добра — се есть разумный грех и волное богоугодья детель. Пишет бо ся: Горе в разуме съгрешающим! Сего ради погуби вдуновение духа животнаго, егоже въздхну Бог на лице его, еже //330об. есть несвершен дар священья. Пишет бо ся: И дуну на лице его дух животен. Тако бо и Христос дуну на лице апостолом, "Приимете, — рече, — дух святый" — несвершен дар, точью обет священиа; ждати бо им повеле самого Духа Святаго, "Иже пришед, — рече, — до конца освятит вы". Сице и святители святят падъяки и четце и дьяконы несвершен дар, но обет священья, да ся приготовают на свершено святительство. Ничто бо Богови тако любо, якоже не възноситися в санех, и ничтоже тако мерзит Ему, якоже самомнимая величавая гордость.

О взятии сана не о Бозе. //331 Смотри же оного слепца с хромцем, како преобидеста господина своего заповедь и прещенье. Възем бо хромець и бремя понесе, и дошед внутрьни, приближися к древу и вкуси плода, и добро се зело, и тако окрадоста ихже повелено бе има стрещи.

Привод. Того древа вкуси Каин, не сы священ и на священичьскый дерзну чин, поревновав священному Авелю, егоже и уби завистию. Того древа вкусиша сынове Кореови, иже с Дафаном и Авироном, вземше бо кадилницю, пойдоша в скинию неосвящении суще, и пожре я земля. Того древа [добавление: вкусиша] Илий жрець, иже ве- //331об. дый своя сына безаконьствующа в иерействе, не отлучи ею священья, дондеже и сам ею ради погыбе. Того древа вкусиша еретици, иже злохитрием, акы ведуще душевный путь, заблудиша и не приимше покаяния заблудиша [вариант: погибоша].

Нъ сия ократив, на первое възвращюся сказанье. Аще и отнемогл есть моего глагола уд, но пророк възущает мя, такоже глаголя: Утрудихся въпиа, измолче гортань мой.

Обличении грех. Слышав же господин, яко окраден есть виноград его, повеле изринути от врат хромца и изгнати от стражбы слепца.

Разумейте же ныне, безумнии //332 в людей сановници и буии в иереех! Когда умудритеся? Всажай ухо не слышит ли и создавый око не смотрит ли? Наказяя языкы не обличит ли, учай человека разуму не уразумеет ли нашего грехопадениа? Господь бо свест злохытрых помышленья, яко суть лестна, и Тъ изметает неправедныя из власти и изгонит нечестивыя от жертвеника. Никый же бо сан мира сего от мукы избавит преступающих Божия заповеди! Но молю вашю любовь: со вниманием пишемых смотрите и яже слышите разумейте!

Раздрешение. Повеле Бог изри- //322об. нути из рая Адама, понеже неповеленаго ему коснуся, сиречь преже повеленья вниде в место святое. И усели его противу райстей пищи, "Еда како, — рече, — прострет руку и възмет от древа породнаго и жив будет в веки", сиречь некли помянется и, смирився, покается о нихже согреши. Оле многое Владычне человеколюбье! И казнит ны и милует, грех ради озлобляет ны, покаяниа пакы деля приемлет, не хощет бо смерти грешничя, но обратитися велит и живу ему быти.

Сказ. Что есть древо животное? — Смереномудрие, емуже корень и- //333 споведание. Исповем бо, рече, на мя безакониа моя, и Ты отпустил еси нечестье сердца моего. Того корень стебло — благоверие, вера бо твоя спасет я, все бо верующему дасться. Того стебла многоразличны ветви — мнози бо, рече, образи покаяниа: слезы, пост, молитва, милостыни, смиренье, въздыханье и прочая. Тех ветвий плод добродетели: любы, послушанье, покорение, нищелюбье — мнози бо суть путье спасенья. Вижь, яко не в раи бе животное древо, ни во Едеме, но в оземьствии, рекъше отлучении сана. Изрину пакы и Каина, въпро- //333об. сив его убийства братня, и по обличении показа ему животное древо, рек сице: Буди стеня и трясыйся, сиречь: покайся о злобе, о зависти, о льсти, о убийстве, о лжи, смирися, постися, бди, на земли лежи. Но понеже сего не створи, но изиде от лица Божия — не дальством земля, нъ неимением страха Божиа при своей души. Благым делом не сущим в нас, ни покаянию о гресех, в коем си сану будем, далече Бога есмь. Близ бо Господь скрушеных сердцем; смиреныя духом спасает, волю боящихся Его створит и молитву их услышит. Лице же Господне на творящая злая: потребити от земля память, их. //334

В ту же меру изгоне. Сице и Павел изрину от святаго жертвеника Умнея и Филита и съблудившая в Коринфе священикы и оземьствова а святому олтарю, сиречь постави а с клирикы, рек: "Имейте таковыа на студ, нъ утвердите к ним любовь, да не погрязнут злою печалию, но да ся покают и живи будут".

О древе животнем. Не въсхоте сего животнаго древа вкусити Александр ковачь, о немже рече Паул: "Да въздаст ему Господь в День Судный по злобе его!" Не вкуси того древа Триефис Ефисеянин и Николае, бывый от седми диякон, иже отвергъся Христа и бысть кумиро- //334об. жрець в Селуни, а он предааше мучителем крестьяны, о неюже пишет Иоан, глаголя: От нас изидоша и на ны быша. Того породнаго не приимше еретици, прокляти быша и умроша душевною смертию, не разумеша бо пророка глаголюща: Вкусите и уведете, яко благ Господь, несть бо греха, иже съодолеет Божии милости. Точию не отчаим себе, яко Июда, ни неверуем телесному въскресению, акы садукеи, но покаянием толцем в Божиа двери, дондеже отверзет нам райскаа врата. Не ложь бо рекый Господь: Толцете и отверзется вам; ищете и обрящете, просите и дасться вам.

Но да не про- //335 должением словес умножю писание и зело предолжу беседу, но на предреченаа възвратимъся.

О теле и о души и о смерти. Видев же он человек свой окраден виноград, въсхоте разлучити слепца от хромца, и повеле первое привести слепца, да его опытает, кто есть преслушал заповеди его и присягл к невходным бес повеленья его, ничтоже бо может Божия таитися ока, и никтоже нас тако свест себе, якоже Бог всех нас свест.

Толк. Повеле разлучити Бог душю от тела, словом бо Божиим исходит от тела душа: И отимеши бо, рече, дух их, ищезнут и в персть свою въ- //335об. звратятся. Да егда видиши тело погребено в земли, не мни ту суща и душа: не от земля бо есть в душа, ни в землю входит. Но аще и святых чюдотворныя видиши мощи, не ту их твори и душа, но Божию разумей благодать и прославляющю Своя угодникы: Славящая бо Мя, рече, [добавление: прославлю ].

Разум. Повеле привести слепца: во ищезновении бо от тела душа всякого человека пред Бог приходит с приставленым к ней аггелом, вернаго же и невернаго, сущаго в законе и всякого безаконика. Господь бо, рече, испытает праведнаго и нечестиваго; вси бо роди язык от единоя быша крове рожени и //336 расеяшася жити по лицу всея земля, имже Бог створи Себе благотворити, дая дождь с небесе и времена обилна: Сиает бо, рече, солнце Свое на добрыа и на злыя и прокая. Нъ никтоже о глаголех сих да не зазрит ми, но испытайте Писаниа, и обрящете мя от Божиих вземлюща книг. Пишет бо Моисий: Постави предел языком по числу аггел Божии. Иеремия же: Един есть, рече, Господь всех иже под небесем язык; аще бо остави я в своей когоже прелсти, но душа их пред Ним явится, и Тъй судит по делом их. Павел же: Что бо мне, рече, внешним судити, но утреним и вы судите, а внешним Бог судит. //336об. А утрене глаголет в законе, а внешныя — безаконныя языкы. Слышати бо подобает Божие имя ныне разлучающимся от телес душам, да и в последний день въскресъше с телесы неблазньно поклонятся Богови, а не имже ныне работаша прелщеным бесом, по апостолу глаголющу: Тогда уведети всяко око, и всяк язык поклонится, исповедаа, яко Господь Исус Христос в славе Бога Отца един. Но си вся учившеися ведят; аз же о слепци почитую беседу противу силе по вмещенью ума въкратце скажю, аще и поимы творящих ми дозрю: виде бо, яко не суть от премудрости, но //337 от грубости сказаниа, обаче на основании пророчьстем и апостольсте зижем, имуще уголника [Так в публикации – О.Л.] Самого Христа.

О отшествии души от тела и стати и пред Богом. Приведену же бывшю слепцю, бысть опытание: "Не добра ли тя, — рече, — стража створих моему винограду? То почто еси его окрал?" Отвеща слепець: "Господи, ты веси, яко аз слеп есмь и не вижю без водящаго мя камо ити, не виде ни единого места, аще и хотел бых. Не чюх же никогоже мене минующа враты, да бых крепко вослед его видил [необходимо: въпил – А.А.Мельников]. Но мню, господи, яко хромець есть крал". Вижь ложное ныне испирание души пред Богом и клеветание на тело!

Толк. Сице же есть //337об. душевный аггел [необходимо: глагол – А.А.Мельников]: Господи, аз дух есмь, да ни ясти, ни пити хотел есмь, ни чти славы земное искал есмь, ни телесное не разумеях похоти, ни дьяволи створих воли, но та вся тело есть створило!

Разум книг. Тогда повеле господин блюсти слепца в укромне месте, идеже сам весть, дондеже придет сам к винограду и призовет хромца, и тогда судит обема.

Того ради до втораго пришествиа Христова несть суда ни мучениа всякой души человечи, вернаго же и невернаго. Веруйте же в правду въскресению человечьскых телес!

Послушьство. Послеши бо, рече, дух Свой, и съзижутся, //338 и обновиши лице земли. И в Иезекили бо въскресениа надежю нам показал есть: Прорци, рек, сыне человечь, на мертвыа сия кости, да будут на них телеса и опнется на них кожа, да придет дух от четырь ветр и внидет в мертвыя си, да оживут. Се же все Сам Творець действует, не инако чина превращаа, но инако исконное дело Свое поновляя. Преже бо созда тело Адамле, ти потом вдуну душю. Тако в утробе женьстей: первое от семени зижет тело, по пяти месяць творит душю. В крещении же первое поражает водою, потом же обнавляет духом //338об. от тленья греховнаго. Тако и в последний день: первое обновит землю и сберет персть человечю и съзижет всех нас телеса в мегновении ока, потом душа наша в свою кождо внидут храмину по апостолу глаголющу, яко Сам Господь в гласе архаггелов, в трубе снидет с небесе, и мертвии о Христе въскреснут преже, потом же, рече, и мы, живии. Кто суть мертвии? — Вся языци, не бывшеи под Божием законом, не приимше крещениа, елико бо, рече, безаконно съгрешиша. Живыя же крестьяны нарицает. Вижь всех человек телесем въскреснути, и веруем Павлову послушьству, словем Господнем //339 глаголющю: Иже ли не творит искони Богом създана человека, то не разумеет и крещением в живот порожениа, темже и не чает последняго с телесы въскресениа въстающим всем человеком в бесконечный живот — овем в честь и славу, овем же в студ и муку.

Но и да прокое речем.

Приход Христов на суд всем человеком. Егда приде господин взяти плод от винограда и видев его окрадена, призва хромца и съвкупи с слепцем, и нача сама ся обличати. Хромець глаголаше слепцю: "Аще не бы ти мене носил, никакоже аз могл бых тамо дойти, понеже хром //339об. есмь". Слепець же глаголаше: "Аще не бы ты мне пути казал, не бых аз тамо дойти могл". Тогда господин сед на суднем столе и начат има судити, и рече: "Якоже еста крала, тако да всядет хромець на слепца!" Вседшю же хромцю, повеле пред всеми своими рабы немилостивно казнити а и в кромешний мучити а темници.

Разумейте же, братие, сиа притча сказание! Человек есть домовит — Бог Отец, всячьскых Творець, Егоже Сын добра рода — Господь наш Исус Христос. А виноград землю и мир съй нарицает. Оплот же есть закон Божий и заповеди. Слугы же сущаа с ним аггелы глаголет. //340 Хромець же есть тело человече, а слепца душю его меним. А иже я посади у врат — человеку бо предаст в область всю землю, дав ему закон и заповеди. Преступившю же человеку заповеди Божиа и того ради смертию осужену бывшю — первое душа его к Богу приводится и испирается глаголющи: "Не аз, но тело есть съгрешило!" И того ради несть мучениа душам до втораго пришествиа, но блюдомы суть идедже Бог весть. Егда же придет обновити землю и въскресити вся умершаа, якоже Сам Христос преже глагола, тогда вси сущии в гробах услышат глас Сына Божиа и о- //340об. живут и изидут створшеи благаа в воскрешение живота, а створшеи злаа — в воскрешение суда. Тогда бо души наши в телеса внидут и приимут въздание къждо по своим делом: праведници в вечную жизнь, а грешници в бесконечную и бесмертную муку, имиже бо кто съгрешит, теми и мучен будет.

Сице ми о сих сказавшю не от умышленья, но от святых книг. Да несть се мое слово, но беседа: несмь бо учитель, якоже они церковнии мужи о Христе Исусе Господе нашем, Ему же слава с Отцем и с Святым Духом ныне и [присно и во веки веков. Аминь].

______________________________________

Росс. нац. библ. Собрание Титова, 522. Л. 320—340об.

Источник вариантов и добавлений у А.А.Мельникова не указан.

СЛОВО О ИСХОДЕ ДУШИ И О ВХОДЕ НА НЕБЕСА ПО СМЕРТИ

Блаженьный Иоан милостивый о памяти смертьней присно глаголаше, яко бе ему откровено от святаго Семеона столъпника. Исходящи бо души ис //99об. телесе и хотящи ей взити на небеса, и устретають ю лици бесовьстии и пытают аще елики клеветы. Аще от того не покаялася будет, то удержана будеть от бесов. И паки выше устретают беси душю, и пытают блуда, и величанья; аще сих не покаялася буде, то не избавиться от них, и многа запинанья души той от бесов. Потом пытают зависти и ярости, гнева, гордости, срамословья, непокоренья, лености, сребролюбья, пьянства, злопоминанья, чародейства, потворенья, обьяденья, братоненавиденья, //100 убийства, татбы, немилосердья. Егда окаянная та душа от земля до небесе иде, кроме ея святии ангели суть не помагают ей, но сама душа о собе ответ дает покаяньем, добрыми делы, и боле всего милостынею, егоже бо греха зде забовеньем не покаялася, то милостынею избавиться от насилья бесовьскаго. Да се ведуще, братья, убоимъся горкаго того часа, егда стращають ны суровии они немилостивии мытари, к нимъже недоумет начнем, что рещи, да тем покаемъся всякаго зла, и по силе нашей створим //100об. милостыню, могущюю ны проводити от земля до небесе и от бесовьскаго удержанья; и многа есть убо ненависть на нас от них, и велика беда воздуха того, ибо от град воин [или: «во ин»? – О.Л.] град на земли идущи. Требуем проводящаго ны, да не заблудившеся во злыя впадем или в реки непроходимыя, или в разбойники неизмолимыя, колико паче наставники божественых рук вожь требуем, идущи на он долгий путь вечный, еже есть смертный день он, и от тела души исход и к небесе вход, егоже никудаже не можем минуть.

О душе //101 моя убогая! егда ангели лютии и грознии придут по тя и восхитять тя в тъ час в онже не чаеши, во время в неже не веси, и которая дела послеши пред собою по аеру? — Како испытати тя хотят врази твои о твоих делех, сущих на вздусе. Како стерпиши страшное оно пришествие Господне на испытанье вселеныя, идеже небо от сквары Божия воскуриться, идеже звезды спадут, идеже солнце померькнеть, идеже ангели возмятуться, идеже Силы предтекут, идеже Хиравими возопиют и Сирафими воскричат, идеже вся тварь //101об. речеть: Благословен Гряды во имя Господне судити живым и мертвым! Тогда поставяться престоли и книги разъгнуться, и Сам Господь на суде сядет, обличая наша дела нощная и дневная, река огненая потечет, поядая грешники, идеже предстануть нази, когождо пред собою имый своя дела. И повелит Господь ангелом, и разлучат праведники от грешники.

Како ты, душе, не сжалишися а слышащи глас Господень, глаголющь праведником: Придете и царствуйте со Мною, творивъшеи волю Мою! Како ли не вострепещеши а слыша- //102 щи глас на грешники: Идите с дьяволом мучитися во огнь вечный и творившия волю его! Ох, душе моя! сего суда в ум приими си и положи на сердци своем, ходящи и лежащи! Не жадай же сна очима своима, но покаянье, и слезы, и бденье, и не престай вопиюще к своему Творьцю, рькущи: Владыко Царю! помилуй мя, падшаго, воздвигним угрязшаго в кале греховнем! Аще бо грешен есмь паче всех, но тварь есми Твоя и верую в Тя, могущаго нас спасти, милостив бо еси. Да не престаю вопия к Тобе, донележе //102об. убелиши мя, яко снег, оцистиши мя, яко зерцало, и непорочну предам душю свою в руце Твои, яко благ еси и милостив во вся веки. Аминь.

_____________________________________

Паисиевский сборник конца XIV — нач. XV в. Росс. нац. библ. Л. 99—102об.

СЛОВО СВЯТАГО КИРИЛА О СТРАСЕ БОЖИИ

Всегда, любимии братие и сестры, имеем страх Божий пред очима своима, и час смертный воспоминайте, ины страшныя муки, уготованныя грешником. Боим же ся огненаго родства, яко вечен есть огнь неугасим. Боим же ся грозы студени, яко не прелагается в теплоту, а тмя, яко не бывает свет; боимся черви, яко не усыпают и безсмертни суть, аггели же над муками злии суть //220 и немилостиви, всем не творящим воля Божиа люто осуженье. Братие, или мук боящися, останите зло деяти, иже есть на пагубу души, или Царства Небеснаго желающе, потщитеся пожити добродетелно во прелестном веце сем. Вся бо света сего прелестна и временна суть: богатество и слава; человеки смерть приемлет, а онамо все нетленно и конца не имат, ни летом числа, ни времени пременениа. Убоимся, братие, вечных мук, иже уготованны диаволу, негасим бо есть огнь и ядовитый червь! Аще бо зде банныя теплоты горящиа укропныя не может плоть наша терпети, то како стерпим оны лютыя муки: огнь и смола кипящая мучение! Аще бо комара или мухи не терпим, страшащеся, //220об. то како, братие, неусыпающаго черви лютость претерпим! Потщимся убо вечных мук избыти добрыми делы, чистотою и милостынею и любовию нелицемерною! Сии лицемерство нарече иже богатых стыдится, аще неправду деют, а сироты озлобляти. И имейте убо истинну ко всем — то Божиа любовь есть; всяку же вражду и гнев отверзите. Пиянства бегайте, в питие бо мнозе всяка злоба бывает; зависть же и клевета и прочая злобы покаянием отрините, да наследницы Царства будете. Любимицы! и кождо вас век скоро скончевается: друзии же легше на одре вечер, а утро не всташа, отидоша бо жития сего. Тогда что уже может человек добро створити: исповедати ли ся, или прияти те- //221 ло и кровь Сына Божия, но в немже приимет ны смерть, в том Бог осудит ны: или в добре, или во зле. Темже внимайте себе кождо час, а чюжих грехов не осуждайте, да не осуждени будете. Кто же бо о своих делех ответ даст пред Богом, а не поможет тамо никто: ни отец сыну, ни сын отцу, ни брат брату, но дела когождо или осудят, или спасут.

__________________________________________

"Измарагд", 1-я пол. XVI в. Библ. АН России. 13.2.7. Л. 219об.— 221.

СЛОВО СВЯТАГО ОТЦА КИРИЛА, АРХИЕПИСКОПА АЛЕКСАНДРИЙСКАГО, О СТРАСЕ БОЖИИ

Боюся смерти и ужасаюся; бою же ся роства огненаго, яко вечен есть и неугасаий, бою же ся грозы и тмы, яко не прелагается в свет; бою же ся червий, яко безсмертен есть; бою же ся аггел, иже на Суде яко без милости суть. Горе мне, яко въпияху ми, и не послушах; глаголаху ми: отстани от всего съквернениа и всяческых вещей, яже суть от мене мерзьци. Горе мне, яко Твой храм. Господи, осъкверних, и Святый Дух оскорбих. Боже, праведна дела Твоа и суди, за мал грех пища не кончающаяся, и жизнь, и Царства небеснаго лишаюся, и не умирая мучюся, за плотъскиа сласти огневи предаюся: праведен суд Господень! учаху мя, и не послушах; послушествоваху ми, аз же ругахся. Тако начнеши глаголати, человече, аще ключит ти ся преже покааниа отити света сего, или геоны убойся, или к Царству потщися.

_________________________________________

Рукопись Росс. нац. библ. № 252. Л.316об.—317.

СЛОВО О ПРЕМУДРОСТИ ПРИТЧА

Первое, брате, коея мудрости ищеши? Господь рече: Луче есть искати кротости, нежели мудрости. Кротость бо есть мати мудрости, и разуму, и помыслу благу, и всем добрым делом. Да аще обрящеши первое матерь, тогда мати дети к себе привабить, и тебе будуть братья; с тою же братьею обрящеши собе Отца, то же ся Отець родил от Своего Отца преже всех век и пакы пришед в последняя лета, нас породи святым крещениемь и верою сыны себе створи, и облече ны в чистыя и красныя одежа. Да аще будем разгневали Отца, искалявше одежа крестьныя; ты же ли рци, кая искаляхом, и аз ти отвещаю: отбиахом от себе матерь, а мачеху прияхом, ейже имя величанье. Дети же //48об. ея суть: гордость, непокорение, прекословье, презорьство, хула, клевета, зломыслье, гнев, вражда, пьянство, игры неприязнины и всякая злоба. Да аще хощеши матере ся лишити, а мачеху любити и ея дети, то с теми обрящеши собе гордаго дьявола, вязящаго в тме кромешней и в огни негасимемь, идеже и ты будеши привязан с нимь. Аще не отженеши от себе мачехы и ея дети и то не приимеши матере с детми ея, то будеть ти последняя горша первых. Ты же ми рци: како могу прияти матерь, а отца разгневив, а порты хрестьяныя искаляв? — Аз же тя, брате, научю: порты искаляныя измый, и тогда тя прииметь отець и начнеть тя любити паче первыя любве. Порты же суть крещение, вера, а кал — клевета, хула, осуженье, гневь, //49 прекословье, сваръ, бой, зависть, вражда, злу поминанье, непокорение, злосердие, злии помысли, смехотворение и вся игры бесовьскыя, таже пакы запойство, резоиманье, грабленье, разбой, татба, душегубьство, потвори, поклеп, вълхвования, чародеяния, прелюбодеянья и всяка злоба; всего же того горее есть гордость, и еже есть всему тому мати.

Аще прииму матерь, реченую кротость, то чимь могу искаляныя порты омыти? И аз тя научю: омыеши страхомь Божиемь, и верою чистою, и смерениемь, покаяниемь и молитвою, слезами и постомь, поклономь и милостынею, и любовию, к всем мир, въздержание, терпенье, послушание добраго учение, покоренье, бденье, трезвьствомь и всеми добрыми делы; паче же всего того луче есть //49об. кротость добрая, еже есть всему добру мати. Да аще будеши послушлив и умякчиши землю сердечную и приимеши малое семя и расплодиши в собе многоспасенаго жита, яко будет не мочи в душевнемь дому всего того положити, нъ инем будеши раздавая требующим того же: первое — притчам разрешение книжным, потом — неразумным словомь разрешение и всему Писанью толкование; та же, аще хощеши, недоведомомь числом съчтанья, та же обилья телесней кормли и здоровья, та же будущаго века се есть спасеное жито, егоже, рече, очи не видеста, ни уши слышаста и на серце человеку не взиде, еже уготова Бог любящим Его о Христе Иисусе Господе нашемь, Емуже слава въвек!

__________________________________

"Соборник" XIII в. Росс. нац. библ. F.n.I. 39. Л.48—49об.

ТОГО ЖЕ КЮРИЛА НАКАЗАНЬЕ

Приимем, братье, от хранилнице сея некое чювьство ползы духовныя, сия книги приемше, научимъся, что убо речеся, что ли остася. Благонаучите разум вашь к покаянью святых книг. И о сем молю вы, да часто послушайте святых книг и в церквах, и в домах.

Не глаголите: жену имам и дети кормлю, и дом строю, ли князю служю, ли власть держю, ли ремество; да не наше есть дело почитанье книжное, но чернечьское. Что глаголеши се, о человече буе, разумееши? в толице бури и мятежи жива, и в печалех буда мира сего пустошнаго, и не отгониши от себе печали мира сего лестнаго почитаньем книжным! Черньци, убежавше мирьскых мятеж, в затишье седят, много утверженье приемлют; мы же, живуще в велице бури мира сего, тмами грехи творяще: да тем требы вы, братье, часто почитающе святыя книги, отганяти печали, и теми искати спасенья. Капля бо часто каплющи и камень вдолит, тако и почитая часто книги с разумом, разрешит греховныя сузы.

Ты же, брате, друже, глаголеши: аще и чту, но не разумею; но аз ти повем, что ради не разумеем чтомых. Аз мню, яко имам сердце величаво и гордо, непокориво и гневливо, и самомниво, и пьянчиво: того ради не разумеем писания. Рече бо пророк: В злохытру душю не внидет премудрость, ни можеста укоренити в сердци лукаве и скверньне пьянcтвом и блудом. Сирах рече: Господь созда мудрость, и дасть ю любящим ю. Да поне прилежи почитанью книжному, и Господь даст ти разум и освященье: сего бо ради устроися дар духовный да вси разумеют; се бо мытаря, и рыбаре, и пастухи, невежи и некнижники умудри, да не единже от невеж глаголет или прибежит в то непщеванье, да вси, веже и невеже, приимут спасение от почитанья книжнаго. Рече бо пророк: Будут вси учими Господом; и паки рече: Вси уведят мя от мала и до велика. И Павел апостол рече: Аз, братье, придох не смыслом, но силою человеческою, ни мудростью, но указанием Святаго Духа! Кому бо не яве суть евангельская словеса, братье и отци и господье мои? кто ли в них не слышит Господа, глаголюща: Блажены кротци, блажени милостиви, блажени чисти сердцем, блажени изгнани и поносими Господа ради. Елико таковаго ученья требуете, якоже разумети глаголемая, но не разумееши лежащих: како бы разумети хощеши, не хотя приникнути простотою сердца, не приимая книг?

Но молю вы, любимици мои о Господе: чтите святыя книгы; разумно же внимай, а неведомаго — иди к мудрейшим собе, и от тех увеси. Аще ли не приимеши от человек ученью разума, да Бог видит подвизанье твое к святым книгам, и тако вразумит тя, не презрит бо твоего хотенья. Ибо он скопець, седяй на колесници, чтяше книги и не ведяше, что чтяше; аще толико тщанье на пути показаше, разумей, колико, дома седя, не терпяше бес почитания книжнаго; видя Бог его прилежанье, посла к нему учителя въскоре, не предстоящю ту Филипу, но Дух Святый въсхити и предъстави ему.

Възлюблении, не преобидим спасения нашего: вся бо писана быша нас ради, на наказанье нам; велика полза сгрешающим нам слышати писания: мнози бо невегласи богопослушливи явишася, и многу ползу прияша от послушания книжнаго, и дойдоша Царства небеснаго, да ныне благодарим Господа. Того ради сия книжная глаголания писана быша, да не сия постражем. Аще бо бы хотел мучити, то не бы си глаголал; того ради, преди глаголет муку, да книги почитающе кроме будем всякоя злобы.

Егда убо видиши кого жизнь сию в злобе живуща, без страха Божия, сущю ему в богатстве, и ничтоже зде приемлющю зла, не блажи его, но паче плачися о нем, понеже тамо приимут его злыя муки. Такоже и добре живущаго видиши и во всем творяща волю Христову, но тмами беду приемлюща в мире сем лестьнем, блажи его и завиди ему, яко зде разрешаются вси греси его, а тамо пойдет к велицей радости. Сего ради Павел рече: Вси, иже хотят жити благоверно о Христе Исусе, мучими бывают зде, от человек, ли от князь, изгнаньем и ранами, заточеньем и многими бедами, узами и темницами, и прочими скорбьми. Господь бо рече: В мире сем скорбни будете, и дерзайте, яко Аз победих мир; Но печаль вам радость исходатает. Да аще жестоко и болезньно и скорбьно приимеши зде, но еже о Бозе, то в будущий век — славу и честь и покой. Въскоре бо, братье, житье се мимоидет. Что бо Давид рече: Днье лет наших, в нихже 70 лет, аще ли велми, а 80 лет, боле в них труд и болезнь. Что же Иеремия и Иов? кленяшьта дни своя. Илья такоже, постяся, моляшеся, река: Господи, изми душю мою от мене; и Иона такоже, скорбя о Ниневгии граде, просяше смерти души своей. Апостол рече: Ходиша в овчинах и в козьях кожах, лишени, скорбяще, озлобляеми, имже не бе достоин весь мир. И се паки яве пишем: да никтоже венчается, аще незаконьне мучен будет. И паки: ни законьне потерпит, постом и поклоном и моленьем, разрешая всяк суз неправды.

Но упражняимыся от клеветы и от зависти, паче же и от пьянетва; о упивающих бо ся рече Господь в Евангельи, яко таковии Царства Божия не наследят; ни внидет пост и моленье во оскверньшююся душю от пьянства нечиста и скверньна. Не приимет Бог, аще бо придет в церковь заут, питьем смердя и калями прогнив. Кде тя учиню, во пьяницах ли или в постницех? яве есть, яко пьяници Царства Божия не наследят. Но и о сем смотри разумно, како ти Самсон, постяся, колико избиваше иноплеменьник, яко по тысящи на день, и врата каменая въстергаше, яко былье, и львове крепости руку его не терпяху: егда же прият его пьянство, тогда от жены побежен, и враги своими ят бысть, и очью лишен бысть, и в поношенье бысть детем иноплеменьничем. Но бежим, братье, недуга того, да не будем в руг бесом, и в оплакание верным и разумным, но чистым сердцем и трезвом умом попрем дьявола и козни его о Христе Исусе.

____________________________

Рукопись Росс. нац. библ. Q. № 589. Л. 283—286.

СЛОВО СВЯТАГО КИРИЛА О КНИЖНЕМ ПОЧИТАНИИ И О УЧЕНИИ

Послушайте, братие, и разумейте, чада, каковы есте веровати в единого Бога сущаго в Троици — в Отца и Сына и Святаго Духа, и на Того единого уповати и поучатися, приничющи в реченыя святыа книгы и яже суть Евангелие, Апостол, Паремиа, Псалтирь и прочая святыа книгы, а в отреченыа не приникати отинудь. Отреченыа же книгы се суть: Астрономия, Звездочетья, Сонник, Волховник, Зелейник, Птичи чарове, Колядник, Громник, Метание, — в нем лжюще пророчествуют и на святыя лжу възлагают, — и прочаа книгы, имиже беси привабливаючи, беседуют с ними суть, иже в святых книгах писана словеса ложнаа на соблазну невежам и вся яже суть им подобны. То бо суть книга халдейскыя кощуны, еллиньскыя басни. Да аще кто от безумных речеть, да чему святыи ты книгы дръжали, ты же отвещай сице: Святии бо имели ум добр и не превратен и разум, даный Богом, да и ты книгы имуще не превратишася, ни по учению тех книг ходиша, но ходили по учению пророческу и апостольску. А еретици святыя книгы имели, но разума добра не имели, данаго Богом, да того ради превратишася и нарекошася еретици, отступницы Божии. Въсмердела бо ся бяше душа их от сикеры винное, и тако ослепоша очеса их сердечнаго разума, понеже бо престол пался подгнив, стоя прокисли, истлев от злаго того сморода, на немже почивает разум; разуму же негде бысть почивати и избеже вон, а диавол разум всели. И расплодися в них учение диаволе, быша еретици, и нача хулы многы приносити на Бога, не разумеюще приточь книжных, ни разумных слушающе, ни покаряющеся, ни послушающе учениа истиннаго и учащих ненавидяще, ведущих учением в жизнь вечную, а неслушающии и непокоривыи идуть в муку вечную. Преже бо того Павел апостол непокоривыя и непослушливыя веляше сотоне на казнь, сих же еретик святии отци, не могуще ума их безумнаго и непокорливаго наказати учением книжным, не предаша их на казнь сотоне, но прокляша а, ведуще, яко сотона их не казнить, но ждуть их вечныя мукы, идеже будуть привязани с учителем своим диаволом, но тъй есть учитель непокоривый непокоривым. Тако бо и Павел пиша к святым и епископом и попом: Аще кто вас съблазнится невидением книжным, да поучите его; али не послушает, ни покорится по первем и по вторем наказании, да отвержется на проклятие и проклят да будет. Да се ныне мнози суесловци непокоривии и по десятнемнадесят наказании не послушают, что убо будет таковым! Не тем же ли будуть обещници проклятым?

Мы же, братие, будем покорливии и послушливы, творяще Божественаа повелениа святых книг, приничюще в ня, не пианым умом, но трезвым умом чтити жизнь вечную со всеми праведникы покоривыми о Христе Иисусе, о Господе нашем, Емуже слава!

___________________________________

Публикация по изданию: Никольский Н. К. Материалы для истории древнерусской духовной письменности. СПб., 1907. С. 81—82.

ПОУЧЕНИЕ КУРИЛА МНИХА ВЕЛМИ ПОЛЕЗНО

Аще человек убог ходит или алчет и жаждет Христа ради, то на небесех обогатеет и милости Божиа насытитися имат и райская пища. Аще ли человек зде скорбеть будеть, и поносим, и оклеветаем, презрим и изгоним правды ради, то почестим будеть на небесех от аггел и радоватися и веселитися имат с человеки праведными. Аще ли человек зде ненавидим бывает от человек или бьють его Христа ради, то възлюблен будеть Отцем небесным на небесех и радоватися имат с аггелы и почивати в раю.

Аще ли человек печален пианица был будет и неподобный ядьца, то онамо алчен будет и жаден райскыа пища. Иже кто зде немилостив был, страннаго не въведе в дом свой и беднаго не помиловал, то онамо сам не помилован будеть от Бога и от аггел не приятен в Царство Небесное. Иже кто человек зде блуд творил и прелюбодейство, то онамо не имать видети лица Божиа, ни Царства Небеснаго наследити, но в огненую реку възвръжен будеть. Аще человек вся сиа грехы непобедныя творить и не покается чисто от сердца с верою и с плачем, то неизмолим суд обрящет в Страшный день от пред [...] Горе будет не послушающим книжнаго учениа ни отцы своих духовных, горе пиющим вино с гусльми и плясанием, горе сопелником и слушающим их: дьяволу есть величание, а христианом пагуба.

_______________________________

Публикация по изданию: Никольский Н. К. Материалы для истории древнерусской духовной письменности. СПб., 1907. С. 86—87.

СЛОВО СВЯТАГО КУРИЛА ЕПИСКОПА О ТОМ, ЕЖЕ НЕ ЗАБЫВАТИ УЧИТЕЛЕЙ СВОИХ

Аще кто велик святитель или малы, рекше попове, душеполезному разуму и хитрому сведению навык, и в разум истинный прийти и иных научити, то аще будет научился и от мужа проста, рекше не от иереа, то держать ему его в своем сердци и в души и уме в незабывную память до исхода души своея, имя его со своим именем в молитвах и в всяком святом поминании, не токмо в дневных, но и в нощных молбах. Аще ли того в забыть положит или небрежением не въсхощет поминати в молитвах яже к Богу, или некыя ради зависти, то своя ему молитва неприатна есть, аще таковый свят есть, понеже ему путь показал есть, ведущий в жизнь вечную, и дверь отворил райскую видением поведаниа, и ключа дал разума книжнаго. Да не мози никтоже имай разум сверьшен сея заповеди преступити, да и сам не преступиши того пути учениа, и в погибель не внидеши, мнози бо не въсхотеша рченаго деяти и погибоша. Нужа де же есть исповедати о инех слово велико; мы же научимся от Павловы повести, иже рече к Тимофею: Благости навык, трезв сый в[о] всем доброю совестию, и в святительскую подобу облечеся, почерпъл еси от сосуда избраннаго неизреченнаа. И ведый буди, от кого навыкл еси, яко измлада святаа книги умееши, могущаа тя умудрити в спасение, верующаа в Святую Троицу — Отца и Сына и Святаго Духа. Добрый бо человек от добраа сокровища износит добраа, а злый — от злаго злая. Яже не помянет, откуду что добра приемще, ти подобни суть псу гладному и зимою измеръзшу, и потом согрет и накорьмлен, и нача лаяти на съгревшего и накормившаго и.

________________________________

Росс. нац. библ. Рукопись Царск. № 371. Л. 346об.— 347.

Молитва к читателям, сохранившаяся в переводе на совр. русск. язык

Молю всех христиан и благоверных черноризцев и преподобных иереев и весь возраст христианского рода: отцы и братья и господа! Кто из вас увидит это мое написание, не порицайте меня грубости ради, но помолитеся обо мне и всех Владыке Богу, дабы принял отпущение многих моих зол, грешный ибо я человек и многих молитв нуждаюсь воистину дабы Владыку милостиваго обрести.

__________________________

Источник не указан. Публикуется по изд.: Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. С.450.

МОЛИТВА 1-Я АВВЫ КИРИЛА ТУРОВЪСКАГО К ГОСПОДУ НАШЕМУ ИИСУСУ ХРИСТУ ВО ИСХОДЕ ДУШИ

О Владыко Царю Христе Боже мой, молюся человеколюбней Твоей благости, милостив буди ми, Господи, недостойному рабу Твоему, и еще в сей настоящей жизни преже житиа конца моего вся грехы моя отпусти, покаянием съвершена очищена мя яви... и да приидут аггели твои светлии, разгоняща темныа помрачениа лица бесов и да не видит душа моя мрачнаа тех образы, но да приимут ю аггели Твои световиднии и покрыют ту священными своими крилы, преводяща ю мытарства воздушнаа возносяще ю горе поклонитися престолу Твоему, и да ведут ю в светлости праведных до дне, егда паки хотяй в славе со аггелы приити на землю судити; тогда, Милостиве, не посрами мене в пришествии Твоем. Грех юности моея и беззакониа не помяни, преблагий Господи... да не воздаси мне, Господи, по делом моим, но по щедротам милости твоея... и сподоби мя одесную Тебе стати и слышати гласа Твоего, благословенных зовуща в Царство Твое, в свет невечерний.

_________________________________________

Публикация по изданию: Известия Императорской Академии наук по Отделению русского языка и словесности. СПб., 1856. Т. 5. С. 308—309.

_________________________________________

[В некоторых рукописях есть следующая вставка. Публ. по изд.: Рукописи графа А. С. Уварова. СПб., 1858. Т. 2. С. 66.]

И праздник убо, братие, вмале помудруим, да духовно празднуим, а не пияньством, ни играми, якоже невернии, но праздновати, рече, духовне любящему праздники. Аще ли в святыя праздники упитаетеся, повежьте ми, чимь есте отлучени поганых: они бо служать созданию, и питие несть ли создание Божие? Останитеся, братие, окааннаго пияньства, а не пития, иже в закон и в славу Божию, яко на веселие нам Бог питие дал есть, и того в подобно время, еже бо не отци, но сице вещаша: да не въпиваються в пияньство. Мнози бо невегласи глаголють, яко тъй праздник честен есть, да пиемь и веселимся. Разумейте и сами, безумнии, что се глаголете, яко оставльше праздник Божий, и дияволу угажаете, яко паче Христа изволисте дияволу работати: празники бо не Божия чтете, но дияволя, егда ся упиваете и блудите. Аще бо в церковь входите, како Бога прославите, поведите ми? Як пияна и смрадом отрыгающаго толма бо не видит Бог, якоже ся мы гнушаем пса мертва, смердяща. Празнует же и жидовин, но плоти плотьское угодие свершая, духовнаго же празднования не постигнет. Празнует же и елин, но по плоти же и по своим богом — бесом, яко о вас мню Господу глаголющу: Не пребудет Дух Мой в человецех сих, плоть бо суть. Како бо вселится Святый Дух в пиянаго? Якоже бо дым прогонит пчелы, тако и Святаго Духа пьяньство много и смрада отрыгание, пияница бо всь плъть есть и ничтоже добра не помышляет. Веру имете ми, яко устрашаюся, яко Святый Дух стужаеть си пияньством вашим: Дух бо Святый в достойныя вселяеться, пияница же не весть, что есть угодно Богу. Молю вы, братие: истрезвитеся страхом Божиим, да прииметь Дух Святый, яко апостоли. Многа бо и неисповедима милость Божия на нас и честь дне сего, яко не хощет Бог смерти грешником, но обращения и покаания.