ГРИГОРІА МНИХА И ПРОЗВИТЕРА, ИГУМЕНА ОБИТЕЛИ ПЛИНАИРСКЫА, [СЛОВО] НАДГРОБНОЕ, ИЖЕ ВО СВЯТЫХ ПО ИСТИННО, КИПРІАНУ, АРХІЕПИСКОПУ РОСІЙСКОМУ

Впервые оп.: Леонид арх. Надгробное слово Григорія Цамблака российскому архиепископу Киприяну. — Чтения в обществе истории и древностей российских. М., 1872, кн. 1, с. 25 — 32;

Ниже реконструкция текста, сделанная болгарским историком Н. Дончевою-Панайотовою по рукописному сборнику XVI ст., № 235 (384) (ГИМ, Синодальное собрание). — Оп.: Русев П. Естетика й майстерство на писателите от Евтимиевата книжовна школа. София, 1983, с. 230 — 237. С сайта: http://litopys.org.ua, 2005.

Настояше убо и сіє нам пострадати, о друзи, єже пострадахом єгоже от скорбных мню ничтоже ино лютЂише. Что бо и будет ино от иже печалію, касающих ся сердцю, таковыа тщеты равно? Не бо имЂнием отятие, не славы, не села или стяжаніа, не стада или чреды, не отечества, не домов и сродник или суседствующих, но самаго отца отятие пострадахом. И отца такова, єгоже не вЂм которым слова указом слышащим представлю. Якоже бо в добродЂтели бяше несточнЂваем блаженный Кипріан, тако и в словесных указаніих неприудоблеваем. Єгоже убо наше отечество изнесе, вам же того бог дарова; єгоже вы на мнозЂ наслаждаете ся, мы же лишихом ся. Им же вы красуясте ся, мы же того желанием сЂтовахом; им же вы прЂспЂвасте, растуще в заповЂдех господних.

И мы того писанием подвигше ся, тщахом ся достигнути вашеа страны, яко да пастыря узрим, о стадЂ пекуще ся и отца о чадЂх веселяща ся. О ненадЂжнаго гласа, стрЂлЂ подобно коснувшаго ся сердцю; о яд раствореннаго возвЂщеніа, сквозЂ уши волявшаго ся во внутреняа!

И понеже радости вашей не быхом спричястницы, всякоа ко скорбем достойни. Вам же и нам обща печали предложи ся. Трапеза и питіе с плачем раствори ся, ибо другаго Іосифа лишихом ся. Єгоже препитаніе не пшеницею бяше, но словом учительства и нрава благодатію. Єгоже цЂломудріе — не по оному, но много высочайше — и не до того стану и иным преподаде. Сице бо мужа показа єстество — яко не свое вмЂнити держащее благо, аще ни иных причястникы тому устроити.

Како бо хотяше велик обрести ся в царствіи небеснем, сотворив токмо, а не научив. И понеже толико патріарха Якова плакаше ся єгиптяне — язык иноязычнаго и племя иноплеменнаго — яко и на седемдесят дніе плачю сопротягнути ся. И сего ради, иже окрыст языком явлено быти, тЂх єже к мужу усердну и воздаанію чести, єя же должни бяху о таковом мужи, с ним же бЂ бог. Како мы не плачем ся толикаго и таковаго добра: не учителя токмо, но и родителя, иже благодатію простаго духа вас породи, воспита же євангеліем, наказа же учением отеческым, упремудри страхом господним, огради отвсюду молитвеным дЂйством и проявленны вас створи и желателным всЂм чловЂком.

Сего ради и мы желаем вас нынЂ паче, неже первіе; слышахом бо ваше, єже к святому любленіе, яко не токмо дондеже жив бяше, в того сердци крыасте ся мыслено, но и по смерти того души ваша сердца прилЂплена суть. И того блаженнЂй памяти вашаа спребывают разуменіа.

Блажен убо он, яко такову любов изостави всЂм вам, якову нЂсть в чловЂцех нынЂ обрести. Блаженіи вы, яко сію пріемши, сохраняете совершену; и не доздЂ токмо, но и уживати тщите ся, яко чада отцелюбнаа; не до двоих или тріех год, иже преидоша, но и простертію лЂтнему сопротяжят ся и ваше ко отцю любленіе.

Сего бо ради вожделЂнен он, яко таковы сынове роди; вожделЂнны же и вы, яко таково сподобисте ся имЂти отца. Доблествен корен и чюден, но и плоди кореню достойни. Ибо яко же нЂкій корен чюден, в нЂдрох крыющь ся земли, той убо не дивить ся, ради же плодов своея добродЂтели крЂпость показует.

Сице и блаженный Кипріан, во гробе сокровен, то убо нашима очима телесныма незрим єсть. Ради же вас, плодов своея благодати, крЂпость показует. И болши вы от нас явисте ся, вам бо, яко достойным, дасть ся; от нас же, яко от недостойных, отят ся. И отнелЂ же вас духом породи, того вы видЂніа никакаже оскудЂсте.

Мы же святаго оного лица вмалЂ сподобихом ся видЂти отроческый єще носяща возраст. Абіе же от нас отиде и старости нас постигши, не к тому того видЂхом. И что виновное сему, яко да нынЂ рыданіе много о нем уплождаваем и страсти утЂшеніе ни откуду же имЂем.

ВЂсте же и вы, возлюбленніи, єгда великое сіє видЂхом сокровище — и да отчасти о том воспомянем вам. Суть бо оттоли до тридесят нЂгдЂ лЂт, єгда от вас воздвиг ся к великому сему и царици градовом грядяаше. Подвижааше бо пастыря любление, долготу ни во что же вмЂнити.

И нЂкій язык, проходящю по Истру-рЂцЂ, спротяжущи искушенія, святаго срЂтоша и многою скорбію того обложиша. Обычно бо господови святым таковаа попущати смотрителнЂ, яко да они убо страждуще, проявленнЂйше бывают. Тогова же божественнаа сила в тЂх немощи свершает ся, яко же ко Іову первіе: «Мниши ли мя инако ти сотворша, но яко да проявиши ся праведен»; и к Павлу второе: «Сила бо моя в немощи свершает ся».

И яко же уже близь быс, к нам грядый. Тогда церкви, яже нас воспитавшіа и наказавши, с рождешим нас отцем и учителем зЂлным срЂте. Восприемлющи многою свЂтлостію блаженнаго, цЂловающи, обємлющи, печалнаа радостными отгоняши, студ ограбленіа подобающею честю забвенію отсылающи.

Понеже бо бог на пути тому оскорбити ся попусти, благоволи тому во отчествіи тако прославити ся и утЂшити того желающаа сердца, и самому исполнити ся неизглаголяныа радости, видЂвшу свое отечество тако правимо, яко многым похвалам достойно бяше своего же и великаго Євфиміа, таковая кормленіа держаща.

И стъщи ся от жители града, яко же нЂкоторіи быстринЂ напрасно множеству, притекшю того стретенію. Не жена восхотЂ от видЂниа предстати, не муж убог или богат. Оставиша хранилища домов хранителіе, не затворени убо беша купцем продавница, помЂтаху же ся по торжищу продаемая. Єдино же хранение всЂм и отвержение: єже всЂм купно изыти и никому же отнудь остати во градЂ. Оставиша раби владикоугожденіа, оставиша художници своя дЂла. И єлико чюждое народа, и єлико мЂстное тамо идяше, Кипріана видети.

Такоже и дЂва неисходнаа, студ преобидЂвши, течааше. И стар и недужен, немощ повудивше, тамо тщаху ся. Ибо велика сладость бяше, єже святаго лица воспріати оного. НЂ бо токмо уча или вещаа, но и зрим, просто достоин бЂ всякоа добродЂтели, учение во зрящих душа вселити.

И овы убо близ грядааху, и ногам касааху ся, и руку целоваху. Овій же, от множества возбраняеми, издалечя того зря точію, яко доволно приемше благословение, и ничто же менше от иже близ бывших имЂвше. Сице всяцЂм: извЂщением отхождааху жены, умилно припадающе, своя чада под ногама єго помЂтааху верою и недугощіих друзій. И явлено бяху всЂм богом послано врачевство, непощующе и освящение сладкое оно святаго вохождение. И єда нЂ по которагождо вЂрЂ благодать дЂйствуаше, и паче в лЂпоту, яже бо во апостолЂх действовавшиа сила. И тогда, ради благословеніа оного освящеваше вЂрный он народ, и отраду страстем подавааше.

Тогда великое сіє свЂтило видЂхом, братие, и священныа оны руцЂ нашей коснуша ся главЂ, купно убо благословяюще, купно же и хотящая нам случати ся духом проричяюще. Тогда радостнаа бЂша, ныне же рыдателная; тогда веселіа органы начинахом, нынЂ же плачевныа подвижем. Тогда бо утЂшааше разлученіе жизни; надежда и блага упованіа имЂхом видети пакы твердаго оного благочестна столпа.

НынЂ же послЂднее наше разлучение изволи пропасть велика посреди того же и нас утверди ся; ово убо во Авраамовых упокоевает ся нЂдрох, мы же того желанием палими, стражем и устужаещего нЂсть. Тогда духовнЂ ликоствовахом, нынЂ умилно о страстех воздышем. Тогда свЂтлаа, нынЂ надгробное поем. О, злыа тмы, въсток свЂтила не уповающей! Отиде доброта она, яже паче солнЂчных зарей вам же и надсладчяйшаа.

Братіа бо вам єсмы от лучшіи, понеже и отЂць ваш, иже плачю, нам предлежит вина, брат бяше нашему отцю. Сего ради, єгда веселясте ся вы, и мы слышаще, веселію вашему спричящахом ся; и плачю вашему подобны есмы сообЂщници, понеже и бЂда обща.

Молчит глас сладкій он и да сице реку — небесный, оттуду бо имяше, єже вЂщати, и паче вина сердца веселящіи. Затвориша ся устны, тихо убо движимыа, обилно же благодать испущающаа. ГдЂ око, небесное зрящее, єже тому дарова бог в пустыни єще сущу? Где ухо, божественаго гласа послушающее? Где язык, он истинный і єретиком страшный? Где сладкая очима тишина? Где устам свЂтлое осклабленіе, благословлением являемое? ГдЂ десница много благословляемаа? Где свЂтлое оно ядрило духа, корабль вашего жителства, сотворяющее тихо преплавати житійскыа волны? ГдЂ извЂстное душам кормило, им же возмощениа языческаа бестрастно прехождаясте? Где непреложное разума утвержение, им же всяк страх отгоняасте? Где добрый кормчий, иже вашего ума корабль к небесем направляаше? О, лютаго истомленіа му, напрасно от нас отбЂгшу!

Слышах ІеремЂины гласы нЂкыа сЂтованы, жалостны, ими же опустЂвши Іерусалим рыдааше со многыми иными, сіе препЂвающу: «Путие Сионови плачют ся». Сіа убо тогда рЂша ся, нынЂ же исполниша ся.

Єгда бо возвЂсти ся блаженое оно преставление, не вси ли московстіи путие восплакаша ся? Не вмЂсто ли гуслей и цЂвниц, всЂх равно сЂтованіе обіат? Не и саміи ли младеици, страсти во искусЂ бывше, подобно рождешим честиное убо тому и желаемое исхождение, нам же горкое, рыданьми достойными почтоша? ВЂмы и другую подобну ІеремЂинЂ пЂснь, нашей страсти ключиму, яже о плененіи Израіле†сотвори, рече бо: «На рЂци Вавилонстій и ту сЂдохом и плакахом, помянувше Сиона; на вербЂ, посредЂ єя, обсихом органы наша». Мое творя жалостное сие пЂние! И на мнЂ бо събысть ся, яко же и на онЂх, идущи ми к вам, яко же и доспЂв рЂки. И тамо рЂка убо Геон бяше, идЂже — плененіи — они себе же и органи молчанію осудиша. РЂка же Немон бяше, протичающая Литвы; на ней же горкому нас стрЂтшю возвЂщению. ¹³ Ни же плакати можахом, ни же телесныа органы по єстественому движимыи имЂти. Но изумлени быхом о ненадЂжнем гласЂ, и зрящим токмо, мечтающе ся живи. Души в нас дръжими пленицами неизбЂжными от создавшаго, животнЂй же силЂ уже от нас сопрятавшиа ся.

Исполни же ся и ино на нас, єже о тЂх же людех рече ся: «Возвратих ся на страсть, єгда у нозе ми терн». И тамо убо, єгда прилучааше ся єдиному в ногу впасти терну, прекланяюще ся падааху, подобно страждущему и прочіи, занеже в єдинове ризЂ водимом быти тысущам. Зде же не єдиному и стом, или тысущіи, но всЂм купно сердца стрЂла печали уязви, яже зависть пусти на нас, добротЂ нашей позавидЂз. И нас, брачныа совлек одежда, во вретище облече и от чертога изведе, на распутіе оставы; от злых отят ся от нас добрый жених. I абие нас обіят сЂтованиа сиротство. В перфиру и виссон нЂкогда облачахом ся, нынЂ же нищи являем ся.

И почто тЂм же и хотЂл бых — аще и вас близ имЂл бых спомагающих ми — взыти на величество бЂды. И нЂкій глас воздвигнути, чести достоин, велегласно, яже отци бЂду обрыдаваа, якоже сотвориша доблественіи сынове патріарха Якова. Но что постражду? Како язык понужду к служенію слову, якоже нЂкыми тяжкыми оковами бЂдою окованный? Како отверзу уста, безгласием содержимаа! Како же ли возрю душевныма очима, тмою бЂди покровен? Кто ми разрЂшив мрачный и глобокій сей облак утра, пакы от ясноты свЂтлу покажет смиреніа зарю? Како же и восіяет заря, свЂтилу нашему зашедшу?

Да речем, что и от ИвовлЂх глагол, и сами страждуще, их же он к другом глаголаше болезненою душею: «Кто поставит нас на лЂта дни первых, в них же храняаше ны господь, єгда сіаше свЂтилник єго над главою нашею»? Угаси зависть дунувши церковную лампаду, и дыма и тмы сію, исполни, яже убо над главою нашею стояше, вселеннЂй же свЂтяше всей, по господню гласу: «Да возсіяет свЂт ваш пред чловЂкы»!

ОскудЂ источник язык — глаголю — святаго, и древеса же при исходищих того, иже єсте вы, показуете дряхло листвие. ОтлЂте славій церковный, сладко поай божественаа во уши ваши, и ради сего уныли єсте. Велика нас окружившіа бЂда, понеже и велик сосуд божіих даров ненадежно от среды нас взят быс. В нем бЂаше любовь нелицемЂрна, яже закону и пророком глава, благодать во устну излианна, смиреномудріа крайній предЂл, Авраамово странноприимство или паче богоприимство, цЂломудрие Іосифово, Моисеева благость и о своеплеменном милованіи, Іовово терпЂніе.

ВЂсте бо возлюбленніи, колико бЂды пудят, иже и каменное умягчило бы ся єстество: вся сладцЂ претерпЂ, да вас не разлучит ся Аароново священнолЂпие, Самоилова твердость, Давидова кротость, Соломонова премудрость, Ильина ревность, Данилово разсуждение — не в соновох, яко же он в ХалдЂох , но в духовох.

ВидЂаше бо добрЂ премудрый всяк дух истинный, исповЂдающий господа Исуса Христа, во плоти пришедша и дух льстечь. По высокому Іоанну постынно бЂ воспитание, и постыньства лЂтааше крылы сЂмо, і онамо, духом наставляєм до явленіа єго, єже к новому Ильию вам, им же и подобен бяше. Єму же и достойни бЂсте: «Тако бо нам подобаше архиереи». Иже во всем духовнЂ возвесели вас, осЂни вас своих молитв крылома от нашедшіа многажды бЂды, яко же птенца орел к нЂдром прием.

ЄдЂнЂм токмо оскорби вас и наша силы с собою погребе, єже из тЂла исошествіем. И понеже бог повелЂ, кто спротив глаголяй, и конец убо плачевным сіє да будет: «Аще забуду тебе, Іерусалиме, забвена буди десница моя».

Вы же утЂшите ся прочее, молящу ми вас, и вопль рыданиа оставите. Кто бо и утЂшит страждущих, аще не иже подобно вам страждай? Не взят ся отЬць от нас, но посредЂ нас стоить, болше нынЂ назирает нас, нынЂ яснЂйши молит ся о нас. И почто незрим єсть нашима очима? Понеже во внутреняя завЂсы внидет святитель, в незаходимая достиже, оставль плоти завЂсу, идЂже Исус, предотечя о нас, вийде. Не к тому во зерцалох и гаданіих и вещеи образох, но лицем к лицю бесЂдует богови, єго же от юности возлюби, єго же ради тому распят ся. И он мирови — иже о вас толико труди ся, сопротивя ся, скорбнаа с вами раздЂляем, и нынЂ купно плачем ся разлученіа учителева — бодрствуа да некого от вас отторгнет сатана.

Толико бо возлюби вас, якоже Павел вселенную, с ними же и глаголаше: «Кто изнемогает, и аз не изнемогаю; кто соблажняет ся, и аз не раждизаю ся». Другій вам Павел явль ся и болше всЂх труди ся, иже прежде єго во вас болших, подвиг добрьй подвиза ся, теченіе сконча, вЂру соблюде.

ТЂмже предлежи тому праведный вЂнець, єгоже воздаст єму во он день господь — праведный судій — єгда и вас всЂх тако того возлюблеших, отческый же и пастырскый окрЂсть себе соберет, сіающих свЂтом неизглаголенным. И радостный ок и блаженный испустит глас: «Се аз и дЂти, яже дасть бог». Єму же слава в бесконечныа вЂкы! Аминь!

Написах Кипріану. «Отче Кипріане, по истиннЂ єси свЂтило російскои земли»!

Григоріе Цамблак, писавый слово сіє надгробноє, бывый митрополит Кіеву і всеа державы Литовскыа.