Ко входуЯков Кротов. Богочеловвеческая историяПомощь
 

Митрополит Фотий Московский

ПОСЛАНИЯ В ПСКОВ

Cм. стригольники

Приводится по изданию: Казакова Н.А., Лурье И.С. Антифеодальные еретические движения на Руси XIV - начала XVI в. М.-Л. 1955

Cм. оглавление Русской исторической библиотеки.

Послание митрополита Фотия во Псков против стригольников. 23 сентября 1416 г.

 

Послание Фотия 1416 г. издавалось дважды: в «Актах исторических» (т. I, № 21) и в «Русской исторической библиотеке» (т. VI, № 42). «Послание» 1416 г. известно нам в следующих списках:

1) ГИМ, Синод. № 562; 4°; нач. XVI в. «Послание», лл. 319—324. По этому списку это и последующие «Послания» были изданы в АИ;

2) ГИМ, Синод. № 280; 1°; нач. XVI в. «Послание», лл. 429—433;

3) БИЛ, Рум. № 204; 1°; перв. пол. XVI в. «Послание», лл. 406—412. По этому списку «Послание» было издано в РИБ;

4) ГПБ, Соф. № 1323; 1°; перв. пол. XVI в. «Послание», лл. 350—351 об.;

5) ГИМ, Синод. № 996; 1°; сер. XVI в. «Послание», лл. 621—623 об.

В списке ГИМ, Синод. № 182 («Царская Минея») этой и остальных грамот Фотия нет (после «Послания Антония» здесь следует «Сказание о срацынской вере» и «Пленение Иерусалима»).

Список Синод. № 280 (Хронографический список Новгородской летописи, см. выше стр. 231—232), до сих пор не привлекавшийся при издании данного «Послания», дает значительные разночтения текста — главным образом, в приводимых Фотием цитатах из постановлений вселенских соборов.

Мы издаем «Послание» 1416 г. по списку ГИМ, Синод. № 562 (С) с важнейшими разночтениями и исправлениями по списку ГИМ, Синод. № 280 (X) и БИЛ, Рум № 204 (Р).

[1]Послание Фотея митрополита[1]

Благословение Фотеа, митрополита киевьскаго и всея Руси, в Псков, о святем дусе детем моим, посадником и тысячкым, и старым посадником и тысячькым, и всему священническому и иноческому чину, и всему христоименитому господню исполнению, святому людству, обретающимся всем в богоспасаемей державе пьсковьской. О чада о господе възлюбленная нашего смирения! Много уверение и ползу душевную имею[2], слышавше благочестия; но иже слышах от писания ваших священник от[3] отлучающихся божиа закона и православия, зовомых стригольникех[3], и смутися. Чада моа, скорбь о сем немала, и не усыпающь о сих ум имею, и поисках в божественых правилех, пишу вам и тех ради уверения, еже среде вашея православныя веры теи суть зовемии стригольници, помрачении прелестию диавольскою и ослеплени прелестию лукавства своего, я не ведят света истиннаго Христа, ни разумеют праведных судеб его, и не видят истинных путий его. Но, сынове, и сами ведаете по божественому писанию, колико шатание и неистовство и укор и мятеж, бывъший преже на истинную на православную христьанскую веру и на божию церьков от несмысленаго и суетословного и бестуднаго Ария и Нестория, и Македония, и Севгира, и Мамента, и Оригена, и прочих проклятых; и тии окааннии на пагубе токмо собе исходатаивши и огнь вечный [4] уготованный диаволу и аггелом его; а церковь божия, утверженая богом и даным нам законом новым, и отгражена повеленьими апостольскими, и укрепляема божествеными святых отець правилми седми збор, и светится паче солнца, яко сущее небо земное украшена, и красящися непобедимым благолепием православия. И глаголеть убо о сих правило 31: 5 «Аще, рече, кто от прозвитер, ничтоже сведый зазорьство своему епископу, ничтоже о благочестивой вере погрешившю ему, но обаче благочестиву ему бывшу к богу, к человеком же праву сущу, въсхощет же любоначальства ради низринутися, и особь въдружит жертвеник, и збор творя и службу, такоже и в первых и в другых и в третиих крать възван будеть от своего епископа от таковыя прельсти, и не послушает, но пребывает в том же злочестии, сам убо, яко любоначалник и мучителное дело являя пребывает, да извержен будеть; и иже с ним единомысленици, аще убо клирици суть, и теи извержени будут; аще же миряне будут, да отлучени будуть». Явлене убо есть от сего, да[5] аще священническому чину възбраняют правила святых апостол и вселенстии святии збори и проклятию предают, колми же паче мирскаго человека възбраняти повелеваем, не смеяти таковая дерзнути замышления, понеже мирянин не имееть никаковаго сана священническаго, но пребывает под послушанием[6] церковных правил, овча сущи словесна, того ради и вышъшему мучению достоин еси. Не достоит бо от своего епископа отметатися или отскакати клириком, и зазор держати, яко нечтиву ему сущу названу, или обидливу, аще и хулнейшая кто имает глаголати на епископа, или на священника, не подобает отлучитися кому от причащениа их дондеже убо будут [7] испытнии, буди и сего извержения [7]: не человечьскый бо дар, но святаго духа, его же ради недостойных подоватися обыче темь, иже с теплою верою просящим: «Всех бо, рече, бог не поставляет, всех же действует». Таажде и еже в Антиохии 5-е правило, рече,[8] приложи, глаголя: «Иже по извръжению в смущении пребывая и церковь божию раскалая, от мирския власти уцеломудрен будет; съгрешающих бо, рече, а не покорившихся предстати от таковаго зла, властелем повелеваем продати, смерти их казнию». 13-е же правило перваго и втораго збора рече: «Яко же еретическаго плевела прорасти, рече, от меча духовнаго корение их отсечено бысть, такоже и разрушникы их шатания, иже Христово тело разделяют начинающи, мы повелеваем отсечи в отринути. Иже аще кто от благочестивых от сих реченых вещех зазор имеет на своего епископа, яко всякого зла и неправеднаго деяния имущу ему житие от явления, якоже и апостольское правило обдержити отлучитися приобщения своего епископа, преже даже не явлене бывши его вине на сборе, сих отинудь заточити повелеваем, дондеже своего злодейства поправъше, и к своему епископу обратятся. Аще ли же отинудь в своем злонравии пребывают, проклятии продаем». А иже в Гангре 6 събор глаголеть: «Иже в малем положении церковь божию смущая и особь собе службу замышляя, без повеления своего епископа, последнему и лютей шому сих проклятию достойны творим; понеже речено бысть: Церкву глаголем не храма того съзиданаго, но исполнение сущее верных; ибо храм, якоже глаголеть святый Пилусийскы Исидор, събрание верных мужий поистинне убо глаголются». Но и десятое правило иже в Кагаре нии глаголеть: «Иже безумно особь въдружити храм и служити начнет, проклятию предается, понеже церковную веру и устав вредяшу, и к хулению ея створяет». Мы же[9] преже взываем таковыя на обращение к съединению тех, иже раздор[10] творящих церкви божий: аще ли же не обратятся, но пребывают безъстудно в своем развращении, сих проклятию предаем, и яко же гнилый уд от здраваго тела от церкви Христовы отсекаем». [11]Многоустная же труба церковная[11], блаженный въистинну Златауст, еже к Ефисеем указуя послание, таковых пиша, иже расколение церковное творящих, «беседова мужь некоторый от святых, рече, глаголя, яко иже таковая творящим, ниже аще мученичьскою кровию сподобится, не может потребити таковаго греха». В 65-той главизны того же послания глаголеть сице: «Яко иже в ересь въпадших иже расколение творящих церкви божии, таковыя же вины повинныя творить».

[12]О правиле[12] и о поставлении священничьском речено бысть сице: «Аще в котором граде или в власти, идеже аще случится к которой церкви потребно есть поставити священникы, по разсуду и по повелению своего епископа да поставлени бывают, и на свою главизну да взирают, рекше на своего святителя». Сего ради [13]правило, еже о поставлении священничьском пошлину давати обычно, повелителным своим писанием присноблаженаго царя Исакия Комнина, якоже ко иным вещем, сия пишет[13]: «Въображает, рече, царство мое, поставление священническое и о правителных древнех образ действо творити ничтоже лишное от ставление да не емлемо будет, развее 7 златниць:[14] едину бо златницу, егда поставят кого в четци, а 3 егда на дьяконьство, 3 же, егда на поповьство. Сего же устава царева потвержает съборный суд, бывъший от патриарха Михаила, и другое зборное знамение, бывшие от патриарха Николая[14 ]такоже повелевающее, такоже, якоже царево писание, толико уставивши даяти от поставлениа.

И вы, сынове, просвещении благочестием и правдою наставляем благодатию и всемогущаго бога, поучающеся божественым его заповедем и велением, а тех омраченых очесы и ушесы уверяйте и наказайте ко истинному пути, и да сбудется о сих спасово слово, глаголющее в святомь Еуаггельи: «Да будеть одино стадо и един пастырь». Суетословие же их и прелесть ни в чтоже въменяйте: на истинну и на православную христаньскую веру възлагают ложная, и на великое божие священьство, вышшее великаго аггельскаго ликостояниа; понеже помрачении от помрачения своего глаголють помраченная, забыша апостола Паула глаголюще, еже глаголеть: «Кто въиньствуеть[15] коли? Кто насажает виноград, и от плода его не ясть ли, или кто пасеть стадо, от млека его не ясть ли?. Егда к человеку сия глаголеть? Ибо сия закон глаголеть; в Моисееве бо законе пишеть: не завяжши рта волу верхущу, ибо достоин делатель мьзды своея». И: «еже на прозвитера хулы не приемли, прилежащеи же добре попове сугубей чьти достойни да бывают, паче же тружающеся в слове и учении. Егда же и о волех радит бог? Но нас ради сия глаголеть, и нас ради сия вписашяся».

И аще ли же, чада моя, тии окааннии, зовомии стригольници, ходяще в суете ума своего, и не обратятся и не уверятся к истинному пути, но укладающися[16] к своей пагубе, якоже июдеи окааннии и помрачении окаменени своеми сердци, их же расточи господь и не дасть им страны, наследия, язык, но и мука без конца есть: и вы бы, сынове, на тех окаанных и нечювственых такоже створили, укланяющеся злочестиа: отженете их от своея православныя веры, да не будут посреди вас, яко у пшеници плевел. Прочее же по лукавствию их створит господь, якоже сам весть, им же уготовано есть место по [17] лукавьствию их, по спасову слову, глаголющему: «Огнь их не угаснеть, и червь их не умреть». Праведно убо о сих известуя апостол Павел глаголеть: «Се убо глаголю и свидетельствую пред богом, не к тому вам ходити, якоже и прочии языци ходят в суете смыслениа их, помрачени умом,[18] вы же не таково знасте Христа, и не смешайтеся иже таковая деющим; понеже лукавнии человеци и волъховнии предспевают на горшая, прелыцающася и прелщаеми, развратишася в след сотоны? И сего ради, чада моя, пишу вам, да уклонитися сими чювствы сих окааньствия; не ведять бо ся, что творять, окааннии, яко же бо о такых пророк глаголеть: «Ослепи бо их злоба их, и забыша бога, створшаго их, и възлюбиша рече, паче тму, неже свет». И молюся человеколюбию богу о сих, яко да оградятся благочестием их, правдою; аще ли же не обратятся, и молюся господу богу, да не сих ради окаанствия попустит господь бог праведнаго своего гнева на языки, не знающаа его, и да не притокнется неисцелно что и к вашей православной державе, понеже огражени суть тех злочестиа вашим православием; ожидая[19] бо долготръпеливно человеколюбець бог обращениа их от зол, не хощет бо напрасно създание свое погубити. Господь же бог да съблюдеть державу вашу своего жительства о всем добре. Молитва моа и благословение мое да будет с вами.[20] А дана грамота сия нашего смирения на Москве, месяца семьтября 23, индикта 10.[20]

Примечания

[1-1] С на поле киноварью; Р А си грамота о стриголникех.
[2] Так Р; С имое.
[3-3] Так Р; С олучающихся божиа закона и православия зовомых стригольником.
[4] С далее написано и зачеркнуто собе приобретше; Р собе приобретав; X собе приобретше нет.
[5-5] X святых апостол: «Аще кий презвитер небрег о своем епископе кроме събор съберет и алтарь другыи поставит, ни о чем же зазревь епископу своему в благоверии и правде, да извержется таковый, аки начальстволюбець, насильник бо есть. Тако же и прочии причетници ему приобщающейся, мирстии же да отлучатся, сия же по едином и вторем и третием позвании епископа да бывает». Явно убо есть от сего разумети, яко.
[6] Так X; СР послушанию.
[7-7] X истинно испытание о сих; Р испытный суд и сего извержение.
[8-9] X «Аще кто презвитер или диакон, преобидевь своего епископа, отлучит себе от церкве и особь събирает и олтарь поставит и, епископу призывающу его, не покорится и не хощет ему покоритися, ни послушати, и первое и второе призывающу его не послушает, тогда того отврещи отнудь, и к тому исцеление не имети ему, ниже мощи ему въсприяти свою честь. Аще же в бестудии пребывает, укоризны и поношение клевеща всуе на божия святителя, развращая и смущая уставы церковныя, нещадно того мирскою властию, яко расколы творящаго, изгонити». Тако же и третие на десять правило перваго и втораго събора рече: «Еретических плевел сеяния в церкви Христове вселукавый диавол вверг, и сия зря, мечем духовным отсечена искорени, на ин путь кознования прииде и отлучающихся неистовством христово тело разделяти начинает». Но и сие ловительство его святый събор всячески възбраняя, истерзал и заповедав, прочее речет: «Аще ли кий презвитер или диякон, аще убо о винах своего епископа, осудив преже съборнаго испытанна и разсужения и всяческаго осужениа, еже на нь, отступити дерзнет от его обыцения и имени его в священных литургиях и молитвах по преданному обычаю церкви не возглашает, тому подлежати извержению повелеваем, и от всея священническия чти лишитися. Учиненыи бо в чину презвитера и митропольскый предвъсхищая суд и преже суда той осужая; елико от своеа силы своего предстателя и отца и епископа, таковый ниже презвитерскыя чти или именования достоин есть, а иже тем последующей, аще убо священници будуть, и тии от своея чти да отпадают, аще же иноци или мирстии человеца, да отлучаются весма от церкви, донели же съобщения, еже к отлучившимся исъплюють и к своему епископу обратятся». К сим же правило шестое иже в Гагре събора глаголеть: «Аще кто свене соборныя церкви особь собирается и не радя о церкви, церковная хощет творити, не сущу презвитеру по воли епископли, да будет проклят». Подобно же тем и десятое правило, иже в Карфагени собора глаголеть о презвитерех, осужаемых от своих епископов. Аликий епископ, местодержатель Нумидийскыа страны рече: «Ниже то подобает пропустити [на полях:] ниже сие подобает мимо ити], яко аще убо некый прозвитер от своего епископа осужен и надмением некыим и гордынею превозношаяся възнепщует лепо особне святая богови приносит или иный воздвзати олтарь противу церковныя веры и чина, таковый без казни да не изыдет». Валентин епископ прьваго престола Нумидийския страны рече: «Потребне церковне и вере и чину съгласна суть приведеная от брата нашего Алипия [sic, что убо видится вашей любви, глаголите». Весь святый събор рече: «Аще кий презвитер на своего епископа надомся крамолу сътворить, онафема да будет». Сия убо тако извещение есть и мы же по сведетелству божественых писаний и священных правил.
[10] X раздоры и сонмици.
[11-11] X нет.
[12-12] X нет.
[13-13] Х устав имат от древних изложен о поставлении свещенническом пошлину давати обычно повелительным законным писанием. Тако же уставленье великаго Устиниана божественыя кончины последованно завещавает на поставление священническое пошлину давати. Присномнимый же царь Исакие Комнин, яко же ко иным вещем и сия написав.
[14-14] X Сих же уставовь древних подтвержая, съборный суд, бывший от патриарха Михаила начала философом тако же установив утверди и запечатле. И другое соборное установление, бывшее от патриарха Николы Царяграда.
[15] X на поле вставлено своими оброки.
[16] ХР уклоняющеся.
[17] Так ХР; С по нет.
[18] X на поле поправка ума их помрачени прелесью
[19] Так ХР; С и дая.

[20-20] Х нет

Послание митрополита Фотия во Псков против стригольников (и по другим вопросам) 1422 или 1425 г

 

«Послание Фотия» 1422—1425 гг. издавалось один раз — в «Русской исторической библиотеке» (т. VI, № 51). Датировка «Послания» предложена А. С. Павловым: она основана на упоминании в «Послании» о «казнех смертоносных», — Павлов отожествлял эти «казни» с голодом, бывшим во Пскове в 1422 и 1425 году (ПСРЛ, V, СПб., 1851, стр. 23—25. Ср.: Псковские летописи, вып. I, 1941, стр.35)

«Послание» 1422—1425 гг. известно нам в следующих списках:
1) ГИМ, Синод. № 562; 4°; нач. XVI в. «Послание», лл. 398—402;
2) БИЛ, Рум. № 204; 1°; перв. пол. XVI в. «Послание», лл. 438—445. По этому списку «Послание» было издано в РИБ;
3) ГПБ, Соф. № 1323; 1°; перв. пол. XVI в. «Послание», лл. 361—363;
4) ГИМ, Синод. № 996; 1°; сер. XVI в. «Послание», л. 632 сл.
Мы издаем «Послание» 1422—1425 гг. по списку ГИМ Синод. № 562 (С) с исправлениями и разночтениями по списку БИЛ, Рум. № 204 (Р).

[1]Послание Фотея митрополита во Псков о священническом чину[1 ]

Благословление Фотиа, митрополита Киевского и всея Руси во Псков, збору святые Троици и збору святые Софии и збору святого Николы, игуменом и попом, и священническому всему и иноческому чину, и посаднику Федосью Фефиловичу и старым посадником, и всему Пъскову,, христоименитым господним людем, живущим всем под законом божиим! Что есте вы, господнии священници и игумени и попы и диякони, писали ко мне с своим братом священником попом Иевом, и о том слышал есмь, как туто уничижение и понос на чин великаго божия священьства, и како судят вас: где вам что взяти, или кто поклеплет вас, и велят вам облещи себе во всю одежю священническую, и таковою ротою судят вас. И такова убо безчиниа ни в писании обрехох, ни слышах где. А убо в том сану священническом не царю временному посылаеми есте, но к царю царствующим и господу господствующим. И тамо, идеже предстоите, и тамо и аггилом предстоящим, тех одеаниих ваших священных касающеся. И на сия той священническый чин устроися. И вы же убо посадникы и все христоименитое господне людьство смотрите о семь, иже отселе да не будеть таковый понос и рота чину великаго божья священьства. Понеже бо неудобь разумеваю откуду таковое безчиние введеся ту в вас: мирьскым и рота — целованием крестным на имениех, и чину великаго божиа священьства рота и их священным саном. А убо не предана есть христианом православным рота, и не ротою судити повелено есть, но по Христову еуагельскому глаголющему слову судяще: «Пред двема или треми сведетели, да станеть всяк глагол». И тако повсюду священничество судится, и без двою или без триех сведетелей достоверных священник не осужается. И в вас убо то не вем, како тое и самое еуагельское слово оставлено бысть, и ротою судимо есть божье священьство. И имже саном священник одеян всегда предстоить царю царствующим и господу господьствующим всегда Христово тело и честную кровь в том сану дръжаще, аггельскыми лики оступлен, и так тем саном священник одеян изводится на тризнища и на понос и на безчестие, и тако судом вашим, тою ротою священнаго своего сану, от вас осужаеми суть. И сего ради благословляю ваше православие, отселе да не будет таковый суд на великое божье священьство, но суд да будеть божия правды со сведетели достоверными.

А что ми пишете вы, священници: котораго отца от вас сын духовный в запрещении каком, и отходить к другому, и другий того приимаеть: и о том убо по правилом приемляй священник в запрещении сына духовнаго чюжаго, а не с волею и с не отпущением отца прьваго, и приимаяй убо сына чюжаго сам той священник запрещение прииметь, от священьства въздержится, донележе еже останется от таковых; а приятый сын к первому отцу да приходить. А что ми пишете, что который поп овдовееть, и он ся женить: ино то безъчинствено есть: понеже не земнаго царя той бысть служитель, но небеснаго. И который убо ради сладострастья и сътворив таковое оженится, а пол тела своего мертвенаго земли предасть, и той убо преобидить божье служительство. А попадье тако же нелепо ходити замуж: понеже едино бысть тело преже с своим мужем, и то убо есть яко пол тела мертваго. А что ми пишете, что суть у вас таковии: одеяние аггельскаго образа с себе сложив, да мирьская на ся взем, и в миру живуть, и таковии убо яко поругателе суть тому великому аггельскому образу; и о таковых есмь преже много к вам писал и ныне пишу, и что с нужею да приводите тех в монастырь, облечете их во одеяния иноческая. А что ми пишете, что котораго ради какова дела жена, утаився мужа своего, и идет в монастырь, и игумени таковых постригают: ино тие игумени в запрещении суть и в воздержании от священьства. А муж убо или жена в болезни или не в болезни, которых похощеть от них; к чину иноческому, и муж убо жене волю даеть и ножици, а жена такоже мужеви. А инако несть предано постригати. А что ми пишете, что и черници от мужей жены постригают, а без игуменов: ино тех постригающих должно есть показнити заточением в монастыри, в храмине или в яме; а котораа пострижена, а платие чернеческое на ней было, и именовала на себе инокини, и та от игумена свершена пострижением да будеть. А что ми пишете, что игумени по миру жены мужскыя в покаянии держать: ино аже не нужи ради, нелепо игуменом венчаниа творити, ни в рожении женам молитвы даяти, ниже в покаянии жену держати; а старцу духовну и во иночестве утвержену игумену, человеку добродетелну, не отлучено и жены в покаании держати. А что ми пишете, что который игумен при смерти пострижет котораго мужа или жену, и как ми пишете, что игумени не велять попу бельцю ни проводити, ни пети, ни поминати тех душь: ино без игумена несть достойно проводити и пети. А поминати всегда умерших душа и игумену и попу единако велено[2] есть. А нужа лучится, игумена не будеть, ино попу белцу и проводити и пети. А что ми пишете, что который человек первую жену отослав или вторую, да поймает третью, или четвертую, а Попове их благословляють: но те попы по правилом без священьства суть. А что ми пишете, что много у вас и пятероженцев и многоженцев, ино в християньстве православном нигде так не слышах, и богу ведомо, колико ми о том рыдание есть, како заблужьших зело, иноверственых, в божие пастве избранной такое безаконие бысть: ради тела тленнаго, мертвенаго, вмале растлимаго червьми, душам единородным бысть погубление. И о четвероженцев убо преже к вам писах и ныне пишу. А о пятероженцех и многоженцех вам пишу: в том безъзаконнии будущих, якоже убе оканнаго Магмета ересобудущих, отлучайте и тех божиа церкви, и блюдуще никако приношения приимати от них, ни доры не дающе им, ни богородичина хлеба. А аще отстанутся от тех беззаконний и с рыданием обратятся, каася тех своих грехопадениих, и по епитимиях да сподобите их к церквам божиим приходити, и потом и за многое по многых епитемиях неправленых, и дору даати им и богородичин хлеб. А святое причастие при часе смертнем вдати таковым. И о тех есть о том в божьих судьбах. А что ми пишете, что дьякон ростригину жену понял, скимникову: ино и тех разлучити должно есть; аще не разлучятся, и епитемьями великими связати тех. А что пишете, что поп вдовець попадью понял, ино тие яко мертви посполу суще (полу бо их телеса мертва суща и земли предана), и той убо бывый поп яко преобидник божия служительства бысть: а та попадья, не схранив чистоту единаго своего тела с первым своим мужем, и достоить тех разлучити. А что пишете, что и проскурници замуж ходять, ино тие преже как были богу на службу собе вдали и чисте свои руци уготовали, а потом изволиша не духовнаа мудроствовати, но плоти годити, и таковых достоить ходящим по духу удалятися. А что ми пишете, что суть у вас котории проскурници, и мясо ядять и проскуры пекуть: ино о ядении мяса не толико есть отлучение; но аще и мясо ядять, но довлела бы в тех паче чистота духовнаа и телеснаа и покаание всегдашнее к отцу духовному. А что ми пишете, что котории попы без нужи великие оставив церковь, и к иной приходять: ино тое не предано есть божествеными отци; но к которой церкви презвитер поставлен бысть и написание от епископа, и тамо должен есть и до живота служите тому божию престолу, и нужу претръпеваа, аще кого не епископ изведет, или людие града того, по воли же епископа. А что ми пишете, что суть у вас некотории попове, до обеда пиють в праздники и во иныя дни: ино который священник до обеда пиеть, и таковый первое и второе и третие да накажется[3], яко да престанеть. И по сем того аще нерадити начнеть, ино въздержание от священьства таковому 40 дний. Да слышание мое, что деи суть в вас которыи попы и дияконы вдовци, тако и пребывают в мирьских и священьствують: ино священником мирьским, докогда богу благоволившу в временой их жизни с их подружии быти, и тогда и священьство их бысть; а егда богу вземшу их подружия и, по вышереченному, пол их телес, то мертвых суть, и земля своего тела естественаго в растление червем прият: и должни суть таковии, благодаря божьи судбы и его повеление, в монастыря отходити и во иноческаа одеяния от настоятеля духовнаго игумена острищи собе, и о своих согрешениих и о своем конце и о своем ответе рыдающе, и обновив собе о всем чистым покаянием к своему духовному отцю, и по достоиньству аще суть достойни, и тогда да священьствують таковии в манастырех, а не вь мирьскых. И се же убо, по божественых отець преданию, в всей своей святейшей митрополии, отнюдуже в ню приидох, и таковое запрещение и заповедь священником вдовьствующим възложих. Но ныне како грех ради наших нужи ради и ради божьих казней смертоносных, на ны належащих, на мало время от воздержания и тех разреших. А ваше великое божие священичьство благословляю от мирьских прийти, с обновлением всяко духовным, по достоиньству, в священноиноческаа, и юже ризу подобия одеания ангельскаго въсприяти хощете, и тако сию нескверну и чисту потщите собе с единородную своею бесмертною душею пред поставити своему владыце. А ослушение о сем никако да будет в вас еже в мирьских священьствовати. Вас же, великое божье священьство, мирьских, благословляю о поискании и всем разсужения духовнаго, еже ищете от смирения нашего, и молю, яко да и дела таковая всякая споследствують ми словесем тем, собою добраго образа всем подавающи, и яко да о пастыри изрядне паства възвеселится и обоя исполнятся благости [4].

Да и о сем же, господни священници, смотрите: о сущих тех в вас развращенных от врага диявола стригольницех прилежне зрите, како направити их в богоразумие и в познание истинны еуаггелия слушати и апостольскых и отеческых преданей. И егда держаще собе будут в преданиих евангельскых и апостольских и отеческых и егда могут бога и отца собе нарицати. А аще диявольским запятием и злоухищрением до конца будут таковии, зовоми стригольници, от бога отпадающе, и блюдите о таковых, никако в ястьи и питьи верным с теми съприобщатися; но блюдите о таковых и от священных, еже да не предайте како святаа псом, ни да помещете бисера пред свиньями: и ибо ожидаеть таковых геена и огнь неугасаяй. И сего ради всяко потщите собе вы, священици господни и богоразумное Христово людство, от сего освобождения[5]тем подавайте, благоуветне всяко тех възводяще от помрачения в прозрение духовных очию и в познание богоразумия истинны еуаггелиа, а зело нерадящих о сем — и нужами (толико кровь и смерть да не будуть на таковых, но инако всяко), заточении приводити тех в познание, да не погибнуть, ни снидуть в ад в помрачении своем.

А божия же о всем благодать и милость и молитва моя и благословение да есть о всем с вашим истинным господним священничеством и с всем вашим православием христоименитаго людства, живущаго в законе божии. А дана грамота на Москве, месяца септеврия в 24.

Да и о сем же еще слышах от попа Иова, что деи збор святыя Троици и збор святыя Софеи и збор святого Николы, игумены и попы и дияконы възъбраняють вам от игрищ неподобных дьявольскых, от плесканиа: зане таа игрища неподобьственая — ельлиниская суть, и святыми отци христианом не предана суть, и никако повелена творити, но отлучена суть. Да еще слышание мое, что де заговев великый святый пост, еже есть божье десятование всего лета, и простии деи людие бой и плищь стваряють и позорища безчинъная, еже суть богу мерзъкаа и ненавидима. И о том благословляю великое ваше православие, чтобы отселе того безчиниа в вас не было. А милость божиа да есть со всеми вами.

Примечания

[1-1] С вписано мелким почерком киноварью; Р а се что судить попов ротою, и что жены от мужей стригутся тайно от черниць.
[2] С велено переправлено из волно; Р волно.
[3] Так Р; С кажется.
[4] С повторено и да исполнятся благости.
[5] Испр.; С освожения.

Послание митрополита Фотия во Псков против стригольников 22 июня 1427 г.

 

«Послание Фотия» 22 июня 1427 г. издавалось дважды: в «Актах исторических» (т. I, № 33) и в «Русской исторической библиотеке» (т. VI, ,№ 55). «Послание» 22 июня 1427 г. известно нам в следующих списках:

1) ГИМ, Синод. № 562; 4°; нач. XVI в. «Послание», лл. 324—327;

2) БИЛ, Рум. № 204; 1°; перв. пол. XVI в. «Послание», лл. 412—416. По этому списку «Послание» было издано в РИБ;
3) ГПБ, Соф. № 1323: 1°; перв. пол. XVI в. «Послание», лл. 353 об.—354 об.:
4) ГИМ, Синод. № 996; 1°; сер. XVI в. «Послание», лл. 623 об.—625.
Мы издаем «Послание» 22 июня 1427 г. по списку ГИМ, Синод. № 562 (С) с исправлениями по списку БИЛ, Рум. № 204 (Р).

[1]Послание Фотея митрополита во Псков[1]

Благословение Фотея, митрополита Киевскаго и всея Руси, в Пъсков, збору Святые Троици и збору Святые Софеи и збору Святого Николы, и посаднику, и старым посадником, и архимандритом и игуменом и священническому чину, и всему христоименитому исполнению святого людь ства. Слышание мое, сынове, еже в преизначалных жителъств ваших православных, еже межди вас, богоизбраннаго Христова стада, сущих ныне некоторых новъзмущенных от пропинаемых дьявольскых сетей, и того яда отригновением, слышу тех некоторых, яко отступлены от бога, о своем крестьанстве небрегуще, но и чин великаго божиа священства, иночьства яко ни во чтоже полагающе, но и умаляюще; и тех, по слышанию слышу, ижо яко садукеем онем проклятым подражающе суть, еже и яко и въскресенйю не надеюще быти мняху. И тое убо не от тех бысть таковое неразумие, но пришедшее тем бысть помрачение духовных очию, отемненое падение, еже от древняго началства на род человечьскый, от общаго врага диавола. И весте убо и онех израильтескых людей, како от всех язык превъзлюблени суще богу, и того же запятием врага диавола колико зело помрачишася и всяческых благодарованьих нашего творца и своего зижителя забыша, и истуканным пожроша, и убити на нь пустишяся. И того же врага запятием на род человечьскый, потоп и огнь от бога на землю ниспослася. И того же врага злоухыщрение весте, како и законопреступных царей и мучителей безбожное шатание бысть и на предания божиа закона и на божественыя апостолы; такоже весте, еже о том предании благочестивыя вашея истиныя православныя всеисполненыя христьянскыя веры колико добропобеднии мученици своих кровей о том пролиашя. И весте еже, от того же вышеречен наго врага диавола того сетех пропинаемых, коликых царей на законопреступление и на иконоборство святых икон въздвиже, и того же зло ухыщрением коликих тех от бога отпастися створи. И весте убо и онех ересоначалных и зломудрьственых, от бога проклятых и до конца омерзостных, злочтиваго Ариа оного, и Македония, и Несториа, и Севгира и прочих[2] тех от бога оттужденных: ов убо от тех на сына божиа единород наго хулу, яко яда, изблеваше, и ов же на животворящий святый дух, еже от отца исходящий, хулу глаголаше, и ин же зломудрьствуяй глаголаше на пречистую богородицю. И первие же благоуразумеся о сем равному в апостолех, первому царю Костянтину и иным благочестивым царем; и тие благочестивии велицие цари, с божествеными святыми отци, с всеми седми вселенскыми зборы, иных злочестивых царей и царская же таковая злочестивая борения и злонеистовства и шатание на святыя иконы и на православие низложиша, и закон же и священьчество и предание христьанькыя веры утвердившее божествеными и священными правилы, и предаша церкви божией: и от тех святых всех вселенских збор не исправляющих православие истинное, по вере с делы, но инако мудрьствующих и тее божествении святии отци таковых от божия церкве мечьми духовными отсекоша, и от христьанства отлучиша и проклятию вечному осудиша. И тие убо, аще таковии в вас обретаются, словесъми глаголюще собе християне, делесы же яко не суше, о преданом великом православном хрестьанском предании яко нерадяще, по вышереченному, яко и чин великаго божия священьства умаляюще, и по великаго апостола Паула слову, и «иных смущающе, хотяще превратити благовестие Христово», по того великаго проповедника Павла слову: «Аще, рече, мы или аггел с небесе благовестит вам, [3]паче еже благовестихом вам[3], анафема да будет»; и якоже предрекохом, и пакы о сем рече: «Аще кто вам благовестит паче, еже приясте, анафема да будет». И оттуду же убо таковыми божественых апостол от Христа данным основании и властию хрестьанская вера благоутвердися; и та яко великая власть, по Христове заповеди, и святительскому чину и священическому дасться: еже единаго бога дело бысть, то и великому божью священству дело вручено бысть, иже грехи человечьския пращати. И великий убо Деонисие Ареопагитьскый пишеть о чину святительском и о великом божий священьстве и о иночьстве, яко подобны аггельскым чином небесным устраяя тех быти. И аще же, чрес то суть в вас таковии обретающейся ересоводци, покрадени от врага диавола, и тех божественых апостол и богоносных отець укрепление и основание рушаще, и чин великаго того божиа священньства и своего хрестьанства яко уничижающе, по выше о тех реченному, конечне яко не надеющеся и въскресению быти: и о сих же падении, богу ведущу, колико ми есть рыдание! И благословляю же вас, своих детей, великое ваше богоразумие, учити таковых и възъставляти в богоразумие. А аще ли же таковии до конца дьавольскым възмущением и запятием в ров погыбели низпадут, и будуть в таком падении, и никако радяще к возникновению. И таковии яко Христу не работающе, к своей погыбели; и вы убо, священници, никако приношения тех приимайте к церквам божиим, и отлучайте таковых и отметайте, яко согнилыя уды, от здраваго тела церкве Христовы; а мирстии же вси никако с теми приобщайте собе в ястьи и питии, и да никако оскверните себе с таковыми, дондеже с покаянием и с слезами обратятся таковии в благоразумие истиннаго христианьства. Смотрите же о сих всех прилежне, православнии вси о господе и господни священници, да никако съобщение ваше с теми падшими будут до их обращениа и покаания к богу о сем и благопокорениа к своим духовным отцем: ино по великаго апостола Павла слову, к коренфом пишуща: «Предайте, рече таковаго, в изможение плоти, яко да дух спасется», рекше по всему отлучайте их от себе, аще не покаются, и яко да те в познание да придут своего православия. А аще дьавольскым помрачением в том и пребудут, и зде аще и временно по долготръпению божью не въздасться сим суд и месть наскоре, но приимут таковии в он великий страшный день осужение великаго Христова евангельскаго слова: «Не приемляй, рече, глагол моих завещания, и аз не сужу ему, но слово еже глаголах, и то судит ему в последний день». И о сем же всем, православнии вси о господе, молю вы смотрение имети прилежное о отпадших тех, к възникновению и ко исправлению на богоразумие о здеанных от них неподобных деяний, яко да обратятся в богу с покаанием и теплыми слезами. И о сем же и преже пространно писах и о тех заблуждениих, о отпадших от бога, зовемых стриголникох, и ныне сие пишу, ради их познания и обращениа. А не обратятся в богоразумие и в чин по всему православнаго хрестьанства, и благословляю вас, своих детей, от великаго и до мала, никако с ними ни в чем же сообщайте собе, и отпишите ко мне: и аз по божественым и священным правилом створю на токовых суд и осужение. А милость божиа, и молитва моа и благословение да есть о всем с великим вашим православием, с живущими с вами божественым и священным правилом, и с держащими истинную православную хрестьянскую веру. А дана грамота на Москве, месяца иуния в 22 день в лето 6935, индикта 5.

Примечания

[1-1] С вписано мелким почерком киноварью; Р а се о стриголницех
[2] Испр.; С прочитх
[3-3] Испр. по Р; С нет

Послание митрополита Фотия во Псков против стригольников (и по другим вопросам) 23 сентября 1427 г.

 

«Послание Фотия» 23 сентября 1427 г. издавалось дважды: в «Актах исторических» (т. I, № 34) и в «Русской исторической библиотеке» (т. VI, № 56). «Послание» 23 сентября 1427 г. известно нам в следующих списках:

1) ГИМ, Синод. № 562; 4°; нач. XVI в. «Послание», лл. 327 об.—331;

2) БИЛ, Рум. № 204; 1°; перв. пол. XVI в. «Послание», лл. 416—420. По этому списку послание было издано в РИБ;

3) ГПБ, Соф. № 1323; 1°; перв. пол. XVI в. «Послание», лл. 324 об.—356;

4) ГИМ, Синод. № 996; 1°; сер. XVI в «Послание», л. 625 ел.

Мы издаем «Послание» 23 сентября 1427 г. по списку ГИМ, Синод. № 562 (С) с исправлениями и разночтениями по списку БИЛ, Рум. № 204 (Р).

[1]Послание Фотия митрополита во Псков[2]

Благословение Фотея, митрополита Киевскаго и всея Руси, в Псков, збору Святые Троици, и збору Святые Софии, и збору Святого Николы, игуменом и попом и священическому всему и иноческому чину, и посаднику Федосью Фефиловичу, и старым посадником, и всему Пскову, христоименитым господним людем, живущим всем под законом божьим, и дръжащим и имеющим по преданию божественых апостол и богоносных отець, чин великаго божиа священньства, и живущим всем и держащим тое от божественых и священых правил и от божьей церкви преданое православие истинное, и чисте и непреложне тем божественым и священным преданием покаряющеся и верующе.

Что есмь, сынове, преже слышав от ваших послов, что деи некотории суть в вас от супостата врага диавола, еже от многых того сетей, пропинаемых от искони на род человечьский, а паче на хрестьанскый, и того же запятием и злоухищрением, слышах, некоторых в вас помраченных, зовемых стриголником, и от хрестьаньства отпадающих и в ров погыбели низпадающих: и от тех падений и от помрачении духовных очию, богу ведущу, с коликом рыданием преже писах вашей любви, ради тех стриголникох уверения и познаниа и обращения к богу, в православие истинное. И пишете ми, сынове, со своим послом с посадником Феодорем, что есте, по моей грамоте, тех стриголников обыскали и показнили: и о том вашем крепком благостоании, еже о благочестии божия закона, великое ваше православие благодарю, и благословляю и непреложне и крепце тако о том стояти, и тех помраченных к свету и к истинне богоразумия възводяще, якоже и божествении мученици о вере о истине свои крови пролиашя, и неверных царей мучителей к Христу приведоша. А что пишете, что инии ти стриголници побегали; а котории осталися, а про тех пишете, что те деи таки дьавольскым запятием, яко[3] диаволу в них въгнездившуся, и те деи к своему хрестьанству истинному и к вере православней таки не дръзають чисте зрети, и смотрити, и веровати, ни к отпем духовным на покаянна приходити, а еще и хулу глаголюще на чин великаго божиа священьства: и преже убо пространне о семь писах вашей любви, еже того общаго врага диавола поучение бысть, еже како нашего праотца Адама из рая изгнана показа, и того же запятием Иуду ученика предателя сыну божию введе, и того же паки запятием израильтескыя они люди той враг дьавол на своего творца въскую шататися створи. А как ми пишете о тех помрачении, что как тие стриголници, отпадающеи от бога и на небо взирающе беху, тамо отца собе наричают: а понеже бо самых того истинных еуаггельскых благовестей и преданей апостольскых и отеческых не верующе, но како смеют, от земли к въздуху зряще, бога отца собе нарицающе, и како убо могут отца собе нарицати? А убо ослепи их помрачение их. А весте, еже не аггелы бог сведе роду человечьскому на исправление, но человек достоверных, святителей и архиереи постави, и иереи, и свою власть от апостолов тем дарова; и се пакы и по божественому писанию весте от апостол, еже бог нашь на небеси и на земли. И котории тие стриголници, от своего заблужениа, не имут чисте веровати православия истинаго, ни к божьим церквам, к небу[4] земному, не имуть быти прибегающе, и на покаяние к своим отцем духовным не имуть приходити: и якоже убо преже к вам писах, и ныне пишу, удаляйте собе от тех в ястии и питии, и казньми (толико не смертными, но внешнеми казньми и заточении) приводяще тех, да будут в познание и обращения к богу, и никако да будут тие попущени в вас, яко плевелы посреди пшеница.

А что ми пишете, что суть у вас и таковии людие, ротники, и крест целуют накриве; ино крест дан от Христа хрестьаном, верою тому покланятися, и истинною и чистотою того честнаго креста целовати; и целуяй тако крест освящевает собе, и от болезни и от недуг всяческих исцелевает, а не верою и не истинне целуяй крест, и то убо лжеобещник неисцелно врежает собе, и по писанию, яко богоубийца вменяется таковый и поругатель честному кресту. И пишете ми, что и у церквах у вас таковии людие старостят, и на властех седят и судят: ино таковии ротници и лжеобещници, по писанию, никако могуть дел церковных заведати, ни судов судити; и вы от таковых блюдите и никако власти в церковных делех вдавайте им, ни суда судити. Но вы, священници, учите таковых, о том с покаянием к богу обратитися и плакати собе, зане христьанину православну не дан честный крест в роту, ти имение и ища, целовати того; а и на истинну целуяй кто крест до трижды на имениех, на злате и на сребре, — и по сем несть тому целования крестнаго, ни съприобщения с веръными.

Да и еще, что ми пишете, что деи таковии у церквей старостят, с женами законными раступився, а поняв вторую жену или третью лко прелюбодейци; и о том таковии треженци отселе никако дабы старишиньствовали в церквах божиих; зане преже от божественаго писаниа писах вам, како пишут божествении отци: «Первый брак, пишет, закон, второй прощение, третий законопреступление, и той нужди ради последняго времени человеком введеся, с многым о том разсужением и смотрением о собе имеющим, како единородную, бесмертную душу от того сладострастия очистити»; и егда же убо пишется «третий брак законопреступление», того ради таковии треженци никако могут старишиньствовати у церквах божиих, но должни суть о собе попечение и смотрение имети.

Господь же бог да оградет и съблюдет о всем ваше православие в всяком благоверии и чистоте, с победою о всем на вся видимыя врагы и невидимыя; и с сим всем божия благодать[5] и молитва моа и благословенье да есть с вами. А дана грамота на Москве, месяца септевриа в 23 день, в лето 6936, индикта 6.

Примечания

[1-2] С на нижнем поле киноварью; Р А си грамота о стриголницех и о ротницех и о роспустниках, и о властех, и у церквах старостят.
[3] Испр.; С кко
[4 ]Так Р; С господу
[5 ]Р благодать и милость.

 
Ко входу в Библиотеку Якова Кротова