| См. древнерусская литература.
Пролог.
Мая 14 день.
В той же день преставление святаго блаженнаго Исидора Христа ради юродиваго, нарицаемаго Твердислова, ростовскаго
чюдотворца.
Сей блаженный, якоже поведают нецыи, западных стран бяше, латинскаго языка, земли же немецкия рождение име и воспитание,
от славна и богата рода бе, якоже глаголют, от местерскаго. И возненавидев богомерзкую отеческую прелесть, веру
латинскую, возлюби же истинную нашу христианскую веру православную. Посем утаився всех, изыде из дому своего,
и мало отшед, и от риз совлечеся, и прием юродственное еже Христа ради буйственное житие, якоже мнимо человеки.
И тако от земли и отечества своего отыде, и к восточным странам пойде, взыскати древле погубленнаго отечества.
И многу досаду блаженны и укорение прием от безумных человек, и биение, и яко юрод вменяем ими и безумен. И велие
терпение показа от студени зимния, и от вара солнечнаго. В день яко юрод хождаше, в нощи же непрестанно молитву
к Богу возсылаше. И плачася глаголаше в себе: о Исидоре, многими скорбьми подобает ти внити в царство небесное,
нуждно бо есть, и нуждницы восхищают е. И сими словесы утешаяся блаженный, и тако от града во град прехождаше,
дондеже славнаго и многонародного града Ростова достиже, и ту произволяет блаженный жительствовати. Вси же мняху
его яко юрода, и ум погубивша, и многа досаждения, и укорения, и раны даяху ему. Блаженный же яко в чуждем телеси
все со благодарением терпяше, и никако же зла досадителем воздаваше, но токмо в уме своем глаголаше к Богу: Господи,
не постави им в грех сего. И никтоже ведяше добродетельнаго его жития. Посем же блаженный устроив себе кущу в
хврастии непокровену, на месте сусе во граде, среди блатца некоего порога, идеже святое его тело и ныне лежит:
да егда молитву творити ему, невидим будет от человек. Сице же святому житие сие временное преходящу, и славу
мира сего нивочтоже вменяющу, в день убо оскорбляем и уничижаем многими озлобленьми бяше, нощи же приходящей,
абие в свою хврастную хижу прихождаше, и всю нощь без сна в молитвах и в слезах и в коленопреклонении пребываше.
И паки в день юродство творяше, и от многаго труда покой телеси своему приимаше на улицах градских, на гноищах
или на сметии, или в своей кущи тело свое на землю пометаше, и тамо мало сна приимаше. Не имеяше же у себе ничтоже
в хижине своей, но токмо свое тело, и округ его хврастие, и то непокровено. И егда мразу, или снегу, или дождю
бывати, святый же тело и хижу непокровену имеяше, и тако пребываше во вся дни живота своего. И елико же блаженный
Бога возлюби, толико и Бог того в сем мире прослави, и во оном же своем непреидущем и безконечнем небеснем царствии
сторицею благих подаст. Посем откры Бог святому о преставлении его, и от уз телесных разрешение. И от того времени
доволне в хижи своей в молитвах, и в коленопреклонении, и в посте пребываше, слезы от очию яко струи испущая.
Посем же возлег, и руце крестообразно согнув, глагола: Господи Боже Вседержителю Иисусе Христе, в руце твои предаю
дух мой. И тако со гласом вкупе дух испусти. Святая же его и непорочная душа, святыми ангелы возносима, взыде
на небеса, блаженное же его тело оста на земли, верным подавая и до сего дне исцеления. Абие же по преставлении
его, святому телу его лежащу в хиже его, се внезапу весь град обыде благоухание, всем дивящымся и ужасающимся
о благоухании, и глаголющим: како и откуду сие бысть; не ведяху бо святаго преставления. И се некий человек мимоходя
хижи святаго, уведе уже к Богу святаго отшедша, честное же тело его на земли лежаше, и благоухание испущаше; и
шед, возвести во граде всем людем о преставлении святаго. Пришедше же нецыи богобоязнивии людие, иже веру имуще
к святому, погребоша честное его и трудолюбное тело, и пложиша е во гробе на том месте, идеже преставися. И посем
вземше благословение у епископа, поставиша над мощми святаго церковь, во имя Вознесения Господа Бога и Спаса нашего
Иисуса Христа, ему же слава, ныне и присно, и во веки веков. |
