СЛОВО О ИГУМЕНЕ, КОТОРОГО ИСКУСИЛ ХРИСТОС В ОБРАЗЕ НИЩЕГО

Из Пролога, 18 октября.

См.: Памятники древнерусской церковно-учительной литературы, вып. 2, с. 138.

Текст взят не из печатного издания, нуждается в выверке!

В той же день слово о некоем игумене, его же искуси Христос во образе нищаго.

Общему житю бе некто старейшина игумен, имея под собою братии не менее двою сту, иже бе исперьва нищелюбив, последи же славолюбив, и имея великую любовь к богатым, и к боляром, и от тех славим. К сему Господь яко старец убог в монастырь вниде и рече двернику, иди ко игумены и рцы: он сей брат ти есть и многим трудом до тебе приидох.

И пришед дверник, обрете игумена с богатыми беседующа, постояв же мало и возвести ему о убозем, не ведый яко се Христос есть.

Игумен же сваряшеся на него глаголя, не видиши ли мене с человеки беседующа, да почто еси пустил его, небрези ныне.

И отиде дверник. Долготерпеливый же Господь, ожидая его дондеже изыдем. При пятом же часе, богат некто прииде, его же в борзе игумен сам во вратех стрете.

И ту узрев игумена со святыми, богатыи милостию, и смиреных друг Христос, моли игумена рекии, слово ми есть к тебе отче. Он же ни озреся, но с богатым иде на обед.

И паки по обеде проводив до врат богатаго и возвратися, небрег моления убогаго и беззлобиваго старца.

Вечеру же бывшу, не сподобися прияти небеснаго того воистину странника.

И отиде рек вратнику, сице рцы игумену, понеже славы человечестей хощеши, аз бо предних деля трудов твоих и древняго жития пришел без, благословение хотя вдати тебе, и не восхотел еси. И се ныне от всея страны сея вельможы послю к тебе, понеже требования хощеши, благих же царьства моего не требуеши.

И тако познася Вседержитель Христос во образе нищаго пришедыи.

Се же мы слышяще братие, не отвращаем очию от убогих, зане сам Христос Вседержитель ходит во образе нищаго, дающеи бо нищему, Христу в руце дают. Ядущии же с богатыми и пиющии славохотие мира сего исполняют. Неудобь есть велблуду сквозе иглине уши пройти, ни богату в царство небесное.

Аз же не богатьство хуля глаголю, но иже не умеющих жити в богатьстве наказую, и собирающих сокровища, и ненавидящих нищих, губящих свое царство, и во власть дияволу дающихся. Молю же вы братия моя, слышаще се, будем милости, и странноприимцы, и нищелюбцы, да вечных благ сподобимся прияти.