Слава в вышних Богу, и на земле мир, в человецех благоволение (дважды). Господи, устне мои отверзеши, и уста моя возвестят хвалу Твою.
Диакон: Время сотворити Господеви, владыко, благослови.
Священник знаменует его, говоря: Благословен Бог наш всегда, ныне и присно, и во веки веков.
Диакон: Помолися о мне, владыко святый.
Священник: Да исправит Господь стопы твоя.
Диакон: Помяни меня, владыко святый.
Священник: Да помянет тя Господь Бог во Царствии Своем всегда: ныне, и присно, и вовеки веков.
Диакон: Аминь. Благослови, владыко.
Знаменуя крест Евангелием:
Благословенно Царство Отца, и Сына, и Святого Духа и ныне, и присно, и во веки веков.
Народ: Аминь
Господи Боже наш, Его же держава несказанна и слава непостижима, Его же милость безмерна и человеколюбие неизреченно, Сам, Владыко, по благоутробию Твоему призри на ны и на святый храм сей и сотвори с нами и молящимися с нами богатыя милости Твоя и щедроты Твоя яко подобает Тебе всякая слава, честь и поклонение: Отцу, и Сыну, и Святому Духу ныне, и присно, и во веки веков.
Первый антифон. Благослови, душе моя, Господа, благословен еси, Господи. Благослови, душе моя, Господа, и вся внутренняя моя Имя Святое Его. Благослови, душе моя, Господа и не забывай всех воздаяний Его: очищающаго вся беззакония твоя, исцеляющаго вся недуги твоя, избавляющего от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Щедр и милостив Господь, долготерпелив и многомилостив. Благослови, душе моя, Господа, и вся внутренняя моя имя святое Его. Благословен еси Господи. (целиком)
Господи Боже наш, спаси люди Твоя и благослови достояние Твое, исполнение Церкви Твоея сохрани, освяти любящыя благолепие дому Твоего, Ты тех воспрослави Божественною Твоею силою и не остави нас, уповающих на Тя, яко Твоя держава, и Твое есть Царство, и сила, и слава: Отца, и Сына, и Святаго Духа ныне, и присно, и во веки веков.
Народ: Аминь.
Второй антифон. Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в них же несть спасения. Изыдет дух его, и возвратится в землю свою: в той день погибнут вся помышления его. Блажен, ему же Бог Иаковль помощник его, упование его на Господа Бога своего. Сотворшаго небо и землю, море и вся, яже в них. Хранящаго истину в век, творящаго суд обидимым, дающаго пищу алчущим. Господь решит окованныя, Господь умудряет слепцы. Господь возводит низверженныя, Господь любит праведники. Господь хранит пришельцы, сира и вдову приимет, и путь грешных погубит. Воцарится Господь во век, Бог твой, Сионе, в род и род.
Слава Отцу, и Сыну, и Святому Духу и ныне, и присно, и во веки веков. Аминь.
Единородный Сыне и Слове Божий, Безсмертен Сый, и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, един Сый Святыя Троицы, спрославляемый Отцу и Святому Духу, спаси нас.
Иже общыя сия и согласныя даровавый нам молитвы, иже и двум или трем согласившимся во Имя Твое прошения подати обещавый, Сам и ныне раб Твоих прошения к полезному исполни, подая нам и в настоящем веке познание Твоея Истины и в будущем жизнь вечную даруя яко благ и Человеколюбец Бог еси, и Тебе славу возсылаем: Отцу, и Сыну, и Святому Духу ныне, и присно, и во веки веков.
Третий антифон
Во Царствии Твоем помяни нас, Господи, егда приидеши во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.
Блажени чистии сердцем, яко тии Бога узрят.
Блажени миротворцы, яко тии сынове Божии нарекутся.
Блажени изгнани правды ради, яко тех есть Царство Небесное.
Блажени есте, егда поносят вам, и изженут, и рекут всяк зол глагол на вы, лжуще Мене ради.
Радуйтеся и веселитеся, яко мзда ваша многа на небесех.
Диакон: Господу помолимся.
Малый вход: Владыко Господи, Боже наш, уставивый на небесех чины и воинства ангел и архангел в служении Твоея славы, сотвори со входом нашим входу святых ангелов быти, сослужащих нам и сославословящих Твою благость, яко подобает Тебе всякая слава, честь и поклонение Отцу, и Сыну, и Святому Духу ныне и присно и во веки веков. Аминь.
Диакон: Благослови, владыко, святый вход.
Благословляя: Благословен вход святых Твоих всегда: ныне, и присно, и во веки веков.
Диакон: Премудрость, прости.
Приидите, поклонимся и припадем ко Христу. Спаси ны, Сыне Божий, воскресый из мертвых [или: молитвами Богородицы; во святых дивен сый], поющия Ти: аллилуиа.
Тропари и кондаки: понедельника - вторника - среды - четверга - пятницы - субботы. гласов: первый - второй - третий - четвертый - пятый - шестой - седьмой - восьмой. Тропари при хиротонии.
Боже Святый, иже во святых почиваяй, иже Трисвятым гласом от серафимов воспеваемый и от херувимов славословимый, и от всякия небесныя силы поклоняемый, иже от небытия во еже быти приведый всяческая, создавый человека по образу Твоему и по подобию и всяким Твоим дарованием украсивый, даяй просящему премудрость и разум и не презираяй согрешающего, но полагаяй на спасение покаяние, сподобивый нас, смиренных и недостойных раб Твоих, и в час сей стати пред славою Святаго Твоего Жертвенника и должное Тебе поклонение и славословие приносити, Сам, Владыко, приими и от уст нас, грешных, Трисвятую песнь и посети ны благостию Твоею, прости нам всякое согрешение, вольное же и невольное, освяти наша душы и телеса и даждь нам в преподобии служити Тебе вся дни живота нашего, молитвами Святыя Богородицы и всех святых, от века Тебе благоугодивших,
Диакон: Благослови, владыко, время трисвятаго. Священник: яко свят еси, Боже наш, и Тебе славу возсылаем: Отцу, и Сыну, и Святому Духу, ныне и присно и во веки веков. Аминь.
Диакон: Господи, спаси благочестивыя и услыши ны. И во веки веков.
Святый Боже, Святый Крепкий, Святый Бессмертный, помилуй нас (Трижды). Слава Отцу, и Сыну, и Святому Духу и ныне, и присно, и во веки веков. Аминь. Святый Бессмертный, помилуй нас. Святый Боже, Святый Крепкий, Святый Бессмертный, помилуй нас.
Диакон: Повели, владыко.
Священник: Благословен грядый во имя Господне.
Диакон: Благослови, владыко, горний престол.
Священник: Благословен еси на престоле славы Царствия Твоего. седяй на херувимех, всегда, ныне, и присно, и во веки веков.
Благословляя кадило: Кадило Тебе приносим, Христе Боже наш, в воню благоухания духовнаго, еже приемь в пренебесный Твой Жертвенник, возниспосли нам благодать Пресвятаго Твоего Духа.
Диакон: Вонмем.
Мир всем. * Чтец: И духови твоему.
Диакон: Премудрость. * Чтец: Прокимен… * Диакон: Премудрость. * Чтец: (название книги) * Диакон: Вонмем. * Чтец: (текст) * Мир ти. * Чтец: И духови твоему. * Диакон: Премудрость. * Народ: Аллилуиа (трижды).
Молитва перед чтением Евангелия: Возсияй в сердцах наших, человеколюбче Владыко, Твоего богоразумия нетленный свет, и мысленныя наши отверзи очи во евангельских Твоих проповеданий разумение: вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще, Ты бо еси просвещение душ и телес наших, Христе Боже, и Тебе славу возсылаем со безначальным Твоим Отцем и всесвятым, и благим, и животворящим Твоим Духом ныне, и присно, и во веки веков. Аминь.
Диакон: Благослови, владыко, благовестителя святаго апостола и евангелиста имярек.
Бог молитвами святаго славнаго, всехвального апостола и евангелиста имярек да даст тебе глагол благовествующему силою многою во исполнение Евангелиа возлюбленнаго Сына Своего, Господа нашего Иисуса Христа. И подает ему Святое Евангелие. Диакон: Аминь.
Премудрость, прости, услышим святого Евангелиа. Мир всем.
Народ: И духови твоему.
Диакон: От ... Святаго Евангелия чтение
Народ: Слава Тебе, Господи, слава Тебе.
Вонмем.
После чтения народ: Слава Тебе, Господи, слава Тебе.
Священник - диакону: Мир ти, благовествующему
Сугубая ектенья
Рцем вси от всея души и от всего помышления нашего рцем.
Господи Вседержителю, Боже отец наших, молим Ти ся, услыши и помилуй.
Помилуй нас, Боже, по велицей милости Твоей, молим Ти ся, услыши и помилуй.
Еще молимся о господине и отце нашем святейшем вселенском архиерее (имярек) Папе Римском, о господине нашем Высокопреосвященном митрополите (имярек), и всей во Христе братии нашей.
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Народ трижды: Господи, помилуй.
Еще молимся о братиях наших, священницех, священномонасех и всем во Христе братстве нашем.
Еще молимся о милости, жизни, мире, здравии, спасении, посещении, прощении рабов Божиих (имя рек) и о еже умножитися лета жития их.
Еще молимся о блаженных и приснопамятных святейших патриарсех православных и о всех прежде почивших отцех и братиях, зде лежащих и повсюду, православных.
Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатая милости.
Раскрывая антиминс: Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающыя от Тебе богатыя милости,
яко милостив и Человеколюбец Бог еси, и Тебе славу возсылаем: Отцу, и Сыну, и Святому Духу ныне, и присно, и во веки веков.
Народ: Аминь.
Ектения об оглашаемых и первая молитва верных
Молитва верных вторая: Паки и многажды Тебе припадаем и Тебе молимся, благий и человеколюбче, яко да призрев на моление наше, очистиши наша душы и телеса от всякия скверны плоти и духа, и даси нам неповинное и неосужденное предстояние святаго Твоего жертвенника. Даруй же, Боже, и молящымся с нами преспеяние жития и веры и разума духовнаго, даждь им всегда со страхом и любовию служащым Тебе, неповинно и неосужденно причаститися святых Твоих таин, и небеснаго Твоего царствия сподобитися,
Диакон: Премудрость.
яко да под державою Твоею всегда храними, Тебе славу возсылаем: Отцу, и Сыну, и Святому Духу ныне, и присно, и во веки веков.
Народ: Аминь.
Иже херувимы тайно образующе и Животворящей Троице Трисвятую песнь припевающе, всякое ныне житейское отложим попечение.
Молитва во время пения Херувимской песни: Никто же достоин от связавшихся плотскими похотьми и сластьми приходити, или приближатися, или служити Тебе, Царю славы, еже бо служити Тебе велико и страшно и самем небесным силам. Но обаче, неизреченного ради и безмернаго Твоего человеколюбия непреложно и неизменно был еси человек, и архиерей нам был еси, и служебныя сея и бескровныя жертвы священнодействие предал еси нам, яко владыка всех. Ты бо един, Господи, Боже наш, владычествуеши небесными и земными, иже на престоле херувимсте носимый, иже серафимов Господь и Царь Израилев, иже един свят и во святых почиваяй. Тя убо молю единаго и благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя силою Святаго Твоего Духа, облеченна благодатию священства, предстати святей Твоей сей трапезе и священнодействовати Святое и Пречистое Твое Тело и Честную Кровь. К Тебе бо прихожду, приклонь мою выю, и молю Ти ся, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим. Ты бо еси приносяй и приносимый, и приемляй и раздаваемый, Христе Боже наш, и Тебе славу воссылаем со безначальным Твоим Отцем и пресвятым, и благим, и животворящим Твоим Духом ныне, и присно, и во веки веков. Аминь.
Трижды: Иже Херувимы тайно образующе и Животворящей Троице Трисвятую песнь припевающе, всякое ныне житейское отложим попечение. Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа.
Трижды: Боже, очисти мя, грешного.