Книгохранильница Якова Кротова
 

ПОСЛАНИЯ ИОСИФА ВОЛОЦКОГО

Послания Иосифа Волоцкого. М. —Л., 1956.

Послание Иосифово к великому князю Ивану Васильевичю на еретика Кленова

Государю великому князю Ивану Васильевичю всея Русии нищий твой, господине, грешный чернец Иосиф з братьею челом бью.

Что еси, государь, прислал в монастырь Пречистые к нам еретика Семена Кленова, да и его речи еретическиа написаны, что он мудръствовал, а велел еси его дръжать в монастыре, ино государь, о том есмя обрадовалися были вси, что еси показал ревность о благочестивей и православней християнстей вере, как прежний святии православнии христианстии царие, а ныне, государь, сказали нам, что еретиков по манастырем шлеш, ино, государь, нам нынешняя скорбь много горши первые, занеже, государь, миряном ползу твориш, а иноком погибель. А в писании, государь, того нет, кое еретиков по монастырем посылать: на всех, государь, соборех по проклятии еретиков посылали в заточение, да сажали по темницам, а не в монастыри посылали их. И который въсхощет покаятися, моему возможно и в темници каятися: в скорбех бо и бедах и во юзах паче услышит бог кающихся сердцем сокрушенным и смиренным.

Мнози, государь, и православнии християне впадали в согрешения, да как почели каитися о своих гресех, и они на себя клали сами - иной вериги железны, а иной чепь на себе положил, а иной, государь, велел себя в погребе приковать чепью. И коли, государь, захотели каятися истинно от сердца, и оне себе не пощедели, а и согрешение их было не толь тяжко, да сами на муки себе предовати произвели. А нынешний, государь, еретики сами не производили каятися, - как ты, государь, почел их казнити смертными казнями, да и торговыми, и они, государь, почели каятися мук деля, а не Бога ради, и как еси потщался очистить святую Божию церковь от еретических скверн, так бы еси, государь, и о монастырех милость покозал, чтобы не погибли от еретическаго зла.

А яз тебе, государю моему, нищий твой з братьею, челом бью, и должни есмя Бога молити о твоем здравии и спасении.

Послание Василию III о еретиках

Послание старца Иосифа к великому князю Василью на еретики Господарю великому князю Василью Ивановичю всея Руси грешный чернец Иосиф, нищей твой, со священники и з братиею вси соборне со слезами челом бием.

Бога ради, господарь, и Пречистыа Богородицы, пожалуй, и попецыся, и промысли о Божественых церквах и о православной вере хрестьянстей и о нас, нищих своих и убогих, занежа, государь, от вышнея Божия десница поставлен еси самодержец и государь всея Руси. Глаголет бо Господь Бог пророкам: аз воздвигох тя с правдою царя, и приях тя за руку и укрепих тя. Сего ради слышите, царие и князи, и разумейте, яко от Бога дана бысть держава вам. Вас бо Бог в себе место избра на земли и на свой престол вознес, посади, милость и живот положи у вас. Вам же подобает, приемши от вы повеления правленья человеческаго рода, православным госуарем, царем и князем, не токмо о своих пещися и своего точью жития правити, но и все обладаемое от треволнения спасти и соблюдати стадо его от волков невредимо, и боятися серпа небесного, и не давати воля злотворящимчело веком, иже душю с телом погубляющим: скверныя, глаголю, и злочестивыя еретики. Нам же лепо по царскому твоему остроумию и богопреданней мудрости воспоминати ти яко государю и яко владыце. Ты же, о боговенчанный владыка, яко же преже поревновал еси благочестивому и равноапостольному великому царю Константину, яко же он христианский род в своем царствии из рова преисподнего возведе, темнаго оного и богопротивнаго и втораго Июду, Ария, глаголю, до конца низложи, подобно же тому и ты сътворил еси з боговенчанным самодержцем и государем всея Руси с своим отцем с великим князем Иваном Васильевичем всея Руси. Темных онех и скверных новогородцких еретиков и отступников и жидовская мудрствующих до конца низложил еси с богохульными их предании, православную же и истинную и непорочную христианскую веру поколебавшююся и изнемогшюю от еретических и жидовских учений паки утвердил еси и всех верующих в святую и животворящую троицю сердца возвеселил еси. И якож исперва чистая и непорочная християнская вера по апостольских и Богоутверженых преданиих во всех наших церквах боголепно и благообразно цветет и проповедуетца.

Да ныне аще ты, государь, не подщишися и не подвигнешися о сих, не утолиши скверных еретик, темное их еретическое учение, ино, государь, погибнути всему православному християнству от еретических учений, яко ж и прежа много царства погибоша сим образом: Ефиопское великое царство, и Армейское, и Римское, иже много лета пребыша в православной вере християнстей, тако погибоша. Прихожаху бо преже немнози еретицы втай царствия и прелыцаху преже нищая человеки и убогия, потом же и благородныя, потом же прияша учение их и великия власти. Во многа жа лета вся царства отступиша от соборныя и апостольския церкви и от провославныя християнския веры.

Тако же и Руская великая земля, иже пятьсот лет пребысть в православной вере християнстей, егда ж враг человеческаго спасения диявол приведе скверныа еврея в Великий Новгород отселе за четыредесят лет, преже убо малых в жидовство отведоша, потом жа множество несведомо по всей Рустей земли. И аще бы не ты, государь, показал ревность о православной вере християнстей и любовь Господу Богу и Пречистой Богородици и ненависть к еретиком и казнь на иже жидовская мудроствующих, было бы уже безчисленое множество православных християн в жидовской вере. Аще ли же и ныне, государь, не потщишись. Бога ради и Пречистыя Богородица, как, государь, в первом обыску все ты, государь, обыскал и управил, тако и ныне тебе, государю, подобает о сем попещись, глава бо еси всем. Покажи ревность благочестия твоего, да видят вси царие славу православного царствия твоего. Придет бо ти от сего свет вечный и невечерний в тебе восияет, аще подобно сотвориши первым православным и благочестивым царем. Оне убо на всех соборех не точию епископы и священики еретики бывшая, но и потриярси и митрополиты по проклятии в темницы метаху, и сии никого от православных не прельстиша. А их же вероваху покоянию и даяху им свобожение, сии многа зла сотвориша и многия в ереси отведоша. Занеже, государь, инем нечим тое беды утолити.

Подобно ж тому бысть и в нашей земли Русстей. Самодержец и государь всея Русскыя земля князь великий Иван Васильевич, отец твой, по проклятии еретиков Захара черньца и Дениса попа повеле в темницу воврещи. И сии зле живот свой скончаша, и никого же от православных не прельстиша. А которые, государь, почали каятись, и отец твой, государь, их покаянию поверил и дал им ослабу, и те много неизреченна зла сотвориша и многих православных христьян в жидовство отведоша. Ино, государь, никому невозможно тое беды утолити, разве тобя, государя и самодержца всея Руския земля. И того ради непоколебимо и непревратно соблюдет и сохранит вышняго десница богом поставленое твое царство, самодержавный царю и владыка и с тво-ею благочестивою и великою княгинею. И мирна да будет и многодетна твоя держава и победительна со всеми повинующимись тебе христолюбивыми воинствы и с прочими людьми, да пребывает во веки и во век века во вся дни живота твоего и пропустит в род небесному царьствию сподобит.

Ответ кирилловских старцев.

Второе послание князю Юрию Ивановичу

Посланье Иосифово князю Юрью Ивановичи о препитании нищих во время глада Государю князю Юрью Ивановичю грешный чернець Иосиф нищий твой челом бию.

Бога ради, государь, и Пречистые Богородици, пожалуй, попецися и промысли о православном христьянстве, о своем отечьствии. Тебе бо, государю, от Господа Бога дана бысть дрьжава и сила от Вышнего. Тебе бо Господь Бог избра в себе место, постави на твоем отечестве, милость и живот положи у тебе. Тебе же, православному государю, приемшему от вышняго повелениа правленье своего отечествиа, не токмо о своих пещись и своего точью жития правити, но и все обладаемое от треволнениа спасати и съблюдати, и от нужа и скорби и от бед избавляти. Якоже и прежний государи, православнии царие же и князи, первый православный царь равноапостольный Константин, и великий Феодосие, и сынове егоАркадие и Анорие, такоже и благочести-вый царь Маркиан, Иустиниян и Василис Македонянин, отець премудраго царя Лва, и Никифор Фока, и вси благочестивии царие и князи, егда бываше в лета котораго их велика нужа от глада, тогда великое попечение о сих имеяху, яко да не измрут гладом сущий под ними нищий и убозии человеци. И аще который государь имеяше у себе много жита, подаваше неимущим, или продавати веляше недорого и уставляше цену, обговорив з бояры якоже подобаше и заповедь полагаше во всем своем государстве, и запрещение страшно полагаше на преступающих сиа, якоже и ныне сътвори брат твой великий князь Василий Иванович всея Русии. Аще подобно тому и ты, государь, сътвориши в своем государьстве, живиши нищиа и убогиа человеки, занеж, государь, уже многиа ныне люди мрут гладом, а кроме тебя, государя, некому той беде пособити; а инем невозможно той беде пособити, аще не ты, государь, о том попечешися и уставиши цену своим государьским велением, в своем отечестве, и оживиши люди бедныя, и за то приимешь милость от Бога.

И яз, нищий твой, тебе, государю, челом бию, с священники и з братьею, и длъжни Бога молити о твоем здравии и спасении.

 

Посланіе Іосифа Волоцкаго къ митрополиту Симону [1].

Государю преосвященному митрополиту Симону всея Русіи грешной чернецъ Іосифъ нищій твой, господине, зъ братіею челомъ бью. По грехомъ, государь, нашимъ князь Федоръ Борисовичъ, государь нашъ, почалъ обидити манастырь Пречистыа; что Пречистая Богородица посылала милостыню въ манастырь Свой, да которые христолюбцы давали по своихъ душахъ, и онъ, государь, учалъ у насъ все то отнимати; и мы, государь, то не учали давати ему, того ради, что мне о томъ ответъ Богу дати; и онъ, государь, того ради на насъ брань великую въздвигъ, меня, государь, захотели изъ манастыря изгнати и братію, государь, старцевъ добрыхъ хотелъ кнутіемъ бити; а Возмицкому, государь, архимандриту велелъ на черньцовъ изъ монастыря подговаривати и наводити, и архимандритъ Алексей подговорилъ десять черньцовъ на Возмище, да пять черньцовъ и увезъ, а те черньцы взяли съ собою четверынатцетеры книги, да ину рухлядь монастырскую. И мы, государь, посылали бити челомъ князю Федору Борисовичу о томъ, и князь Федоръ намъ отвечалъ: техъ де и не велю выдати, а иныхъ велю прогнати, да въпередъ деи бы ко мне не посылали. И мы, государь, познали конечное нежалованіе въ всемъ государя своего князя Федора Борисовича, и язъ хотелъ изыти изъ монастыря; и братіа, государь, учали мне говаривати; господине Іосифе, пришли есмя къ Пречистыя да къ тебе, и животы есмя, государь, давали Пречистой въ домъ да тебе, да и силу есмя истощили свою, работаючи монастырю Пречистыя; а ныне, господине, ты хочешь изъ монастыря, а мы, господине, съ тобою; а которые христолюбцы давали села и именіа по родителехъ и по своихъ душахъ, и техъ память погинетъ съ шумомъ, а намъ, господине, и тебе подъ старость волочитися по чюжимъ монастыремъ; а церковь, господине, Пречистыя и монастырь запустеетъ; посылай, господине, бити челомъ государю великому князю Василію Ивановичу всея Русіи, чтобы, государь, Симонъ митрополитъ самъ жаловалъ, а государю великому князю Василію Ивановичу всея Русіи печаловался, чтобы, государь, смиловался Бога ради, пожаловалъ, о насъ своихъ нищихъ промыслилъ, какъ ему Богъ положилъ на сердце. И язъ, государь, посылалъ братію бити челомъ тебе, государю, чтобы ты, государь, самъ жаловалъ, а государю великому князю, сыну своему, печаловался, и твоимъ, государь, благоволеніемъ и печалованіемъ государь князь великій смиловалъся: пожаловалъ Бога ради взялъ въ свою державу монастырь Пречистыя и насъ нищихъ; и мы, государь, отъ техъ местъ въ тишине и въ покои молили Бога за государя благовернаго великаго князя и за тебя, государя, и за великую княгиню и за все православное христіанство. И ныне, государь, ведомо тебе, въ великое говеніе прислалъ на меня архіепископъ Новогородскій Серапіонъ грамоту неблагословенную, а написалъ, государь, вину мою, слышаніе мое таковое, что еси отказался отъ своего государя въ великое государство, и коли еси таковое великое безчиніе съдеялъ, а ты чюжъ священства и нашего благословеніа. Или ведомо тебе, государю нашему, что ни въ божественномъ писаніи, ни въ летописцехъ, ни въ обычаехъ земскихъ того не бывало: кто великое безчиніе учинилъ въ томъ, что посылалъ бити челомъ государю болшому да тебе, государю болшому святителю, чтобы церковь Пречистыя да монастырь не запустелъ; ни въ святыхъ правилехъ не написано, что техъ ради винъ отлучати отъ священства и не благословити кого. И ты бы, государь, Бога ради и Пречистыа Богородица, пожаловалъ смиловался, самъ жаловалъ, а государю сыну своему великому князю печаловался, какъ еси въ начале жаловалъ. И язъ тебе, государю, нищій твой зъ братіею челомъ бью и долженъ Бога молити о твоемъ здравіи и спасеніи.

Примечанiе:

[1] Печатается по рукописному сборнику XVI века, принадлежавшему Императорской Публичной библіотеке, Q. XVII, 64 (по описанію Славяно-Россійскихъ рукописей графа Ф. А. Толстаго – отд. II, Q. № 64). Рукопись эта частію написана архимандритомъ Ново-Спасскаго монастыря Нифонтомъ, бывшимъ после епископомъ Сарскимъ и Подонскимъ, и завещана имъ Іосифову монастырю, где онъ былъ постриженъ и одно время былъ игуменомъ.

Печатается по изданiю: Памятники старинной русской литературы, издаваемые Графомъ Григоріемъ Кушелевымъ-Безбородко. Выпускъ четвертый: Повести религіознаго содержанія, древнія поученія и посланія, извлеченныя изъ рукописей Николаемъ Костомаровымъ. – СПб, 1862. – с. 208-209.

 

 
    Return